Noviembre

Satanasqa mana munanchu Dios kamachinanta. Chayrayku Diosman nerqa runas interesraykulla payta sirvisqanchejta (Job 2:4, 5). Qhepamantaj cielomanta kay Jallpʼaman wijchʼuchikamuytawan, Diospa kamachisninmanta kikillantapuni nerqa (Apo. 12:10). Kunanpis nishallantaj mana munakusqanchejraykuchu Jehová Diosta sirvisqanchejta. Munantaj Diospa gobiernonta qhesachananchejta, Diosta niña sirvinanchejta ima. Uj chʼampaypi rikukuspapa imaynatachus ruwasqanchejqa, Jehovata kamachejninchejta jinachus, manachus qhawasqanchejta rikuchin. Kay jina kasqanpi tʼukurina: Uj ladonchejpi Satanás, supaykunasnin ima kashanku. Paykunaqa imatachus ruwashasqanchejta qhawashanku, chay chʼampayninchejwan atipachikunanchejtataj nishawanchej. Ujnin ladonchejpitaj Jehová, Jesucristo, cielopiña kaj ajllasqa cristianos, may chhika ángeles ima kashanku. Paykunapis imatachus ruwashasqanchejta qhawashallankutaj, chʼampayninchejwan mana atipachikunatataj nishawanchej. Kusikunkutaj sinchʼita sayasqanchejmanta, cheqa sonqollapuni kasqanchejmanta ima. w16.04 2:8, 9

Chay hermanowan allinyakuspaqa Jesús nisqanman jina cheqan ñanman kutirichinchej. Ashkha kutistaña chay hermanowan parlaspa, nipuni allinyakunchejchu chayqa, ancianoswan parlarinanchej tiyan. Jesús yachachisqanman jina, hermanonchejta munakusqanchejrayku yanapananchejpaj. Wakin kutislla Mateo 18:15-17 versículos nisqanman jina chay kinsa imasta ruwana tiyan. Chayta yachaytaj mayta kallpachawanchej. Imaraykuchus casi tukuy juchallejkunaqa pantaykusqankuta reparanku, chʼampayninkuta allinchanku, nitaj congregacionmanta qharqochikunkuchu. Sonqo pʼakisqa kajpis, payta perdonanan tiyan, allinta kausakunankupaj. Jesuspa yuyaychasqanqa rikuchiwanchej, pillapis sonqonchejta nanachiwajtinchej mana usqhayllata ancianosman willamunachu kasqanta. Manaqa Jesús nisqanman jina chay iskay imasta ruwaspalla, hermano pantakusqantapuni reparaspa imalla ancianosman willana. w16.05 1:15, 16

Kay pachaman mana satʼikunchejchu Jehová Diospa gobiernollan kamachinawanchejta munasqanchejrayku. Kay pachamanta gobiernos kamachinawanchejta munasunman chayqa, ¿imaynatá runasman nisunman Diospa gobiernollan chʼampaykunata chinkachinanta? Chantapis, kay pachaman mana satʼikunchejchu, imaraykuchus ajinallamanta Jallpʼantinmanta hermanosninchejwan ujchasqas kanchej. Llulla religionesqa politicaman satʼikusqankurayku, runasta tʼaqanachinku (1 Ped. 2:17). Kay pachaj tukukuynin astawan qayllamushasqanrayku ichá mana atillasunchu kay pachaj imasninman mana satʼikuspa kausakuyta. Kay tiempopi runasqa mana qhawarikuspa imallatapis ruwarparinku, “kʼullu runas” ima kanku, chayrayku astawan tʼaqanakunku (2 Tim. 3:3, 4). Wakin hermanospa creeyninku pruebaman churakun suyunkupi waj gobiernoñataj yaykojtin. Chayrayku kunan wakichikunanchej tiyan llakiykunapi kaspa kay pachaj imasninman mana satʼikunapaj. w16.04 4:3, 4

Wakin runasqa yuyanku munayninkuman jina imatapis ruwayta atisqankuta. Noqanchejtaj mana chay runas jinachu yuyanchej, imaraykuchus Jehovata kusichiyta munanchej. Chayrayku niraj imatapis ajllashaspa imatachus Biblia nisqanpiraj tʼukurinanchej tiyan, chantá kasukunanchej tiyan. Sutʼincharinapaj, Bibliaqa niwanchej Jehová yawarta jatunpaj qhawasqanta, noqanchejtaj imatachus kamachiwasqanchejta kasukunanchej tiyan (Gén. 9:4; Hech. 15:28, 29). Diosmanta yanapata mañakusunman, kusichinanchejpaj jina imatapis ajllanapaj. Sumajta imatapis ajllasunchej chayqa Jehovawan sumaj amigos kasunchej. Mana allintachu imatapis ajllaspataj Jehovamanta karunchakusunman. Imastachus ajllasqanchejqa wajkunatapis kusichinman chayri llakichinman. Mana allin imasta ajllajtinchejqa hermanosninchejta llakichisunman chayri creeyninkuta llauchʼiyachisunman. Ni jaykʼajtaj chayta ruwayta munasunmanchu, nillataj hermanosninchejta tʼaqanachiytapis. Chayrayku sumajta imatapis ajllananchej tiyan (Rom. 14:19). w16.05 3:4, 5

Sutʼita yachanchej Bibliata, publicacionesninchejta leenapaj, estudianapaj ima tiempochakojtinchej Jehová mayta kusikunanta (Efe. 5:15, 16). Chaywanpis uj imamanta sumajta qhawarikunanchej tiyan. ¿Imamanta parlashanchej? Mana sumajta qhawarikusunchu chayqa, ichá yuyasunman Bibliamanta wakin cheqas chayri wakin publicaciones mana noqanchejpajchu kasqanta. Sutʼincharinapaj, ¿imatataj ruwasun Bibliamanta wakin cheqas mana chʼampayninchejpaj jinachu kajtin? Chayrí, ¿imatá ruwasun uj publicación mana noqanchejpajchu llojsejtin? ¿Pata patallantachu leerparisun? Chayrí, ¿nichu leellasunpis? Chayta ruwaspaqa, sumaj yuyaychaykunata Jehová qoshawasqanchejta mana yachasunchu. Yuyarina Jehová Diosta tukuy chay yachachiykunata qoshawasqanchejta. w16.05 5:5, 6

Jehovaqa ancianosnejta, congregacionnejta cheqanchawanchej. Sutʼincharinapaj, ancianosqa mayqennillanchejpis juchaman urmanayashasqanchejta reparaspa, allin ñanman kutirichinawanchejpaj yanapayta munawanchej. Nitaj yuyayninkuman jinallachu yuyaychawanchej. Astawanpis paykunaqa llampʼu sonqos kanku, Diosmantataj yachayta, sumaj yuyaytawan mañakunku. Yuyaychanawanchejpajtaj Bibliapi, publicacionesninchejpi ima yanapasta maskʼanku. Imaynatachus Jehová Dios cheqanchawasqanchejta entiendespaqa, hermanosninchejwan allinta kausakusun. Chantapis willanchej chaypi runasta, Bibliamanta yachakojkunata ima Jehová jina qhawasun. Chaywanpis runasta kausayninkupi imatapis ajllanankuta saqen. Nitaj runaswan munajta mana munajta kasuchikunchu. Astawanpis pisimanta pisi leyesninmanta yachachin, saqentaj paykuna ajllanankuta kausayninkuta tijrachiytachus manachus. w16.06 1:13, 14

Apóstol Juanpis chaymanta parlaspa nerqa: “Kay mundopeqa tiyan: aychaj sajra munaynin, ñawispa rikusqanta munapayay, kapuyninmanta runaykachay ima”, nispa. Pillapis chay imasta munakojqa Jehová Diosta mana “munakunchu” (1 Juan 2:15, 16). Chayrayku sapa kuti allinta qhawarikunanchej tiyan. Ichapis reparakusun kay pachamanta runas jina sonqota kusirichiyta, pʼachallikuyta, kʼachanchakuyta ima munasqanchejta. Chayri reparakusun kay pachapi mentasqa kayta chayri jatuchaj imasta tariyta munaspa universidadman riyta munasqanchejta. Chaywanpis paraíso qayllitapiña kashan. Chayrayku Moisespa nisqanta Deuteronomio 6:4 versiculopi sumajta yuyarikunanchej tiyan. Jehová “pay kʼatalla” Dios kasqanta entiendesun, yachasun ima chayqa, Jehovallata munasqanman jina yupaychasun (Heb. 12:28, 29). w16.06 3:14

Imastachus necesitasqanchejwan, imastachus munasqanchejwan mana kikinchu. Imaraykuchus kausanapajqa mikhunata, pʼachata, wasita imalla necesitanchej. Chaywanpis tukuy imasniyoj kayta munasunman. Ashkha runastaj yuyanku kausanankupaj tukuy ima munasqanku necesitakusqanta. Mana tukuy lugarespichu runasqa kikin imasta munanku. Sutʼincharinapaj, wajcha suyuspi wakin runasqa celularta, motota, juchʼuy loteta rantikunankupaj qolqeyoj kasqankumanta kusikunku. Qhapaj suyuspitaj runasqa ichá valesqa pʼachata, valesqa autota, jatun wasita ima rantikuyta munanku. Chaywanpis maypi tiyakuspapis chayri mashkha qolqeyoj kaspapis tukuy imayoj kayta astawan munasunman, mayqenkunatachus mana necesitanchejchu chayri mana rantiyta atinchejchu (Heb. 13:5). w16.07 1:1-3

Kay tiempopi ashkha runas Jehová Diosmanta mana yachakuyta munankuchu (Mat. 5:3). Chayraykutaj tukuy tiemponkuta, kallpankuta ima churanku kay pachapi kaj imasta maskʼanankupaj (1 Juan 2:16). Jehovaj atiyninwan yanapachikuyta munanchej, manataj kay pachaj yuyayninwanchu. Jehová Diosqa atiyninwan imachus tumpamantawan kananta entiendenapaj yanapawanchej (1 Cor. 2:12). Jinapis sumajta qhawarikunanchej tiyan, imaraykuchus sonqonchejqa anchata mikhuywan, ujyaywan ima atipachikunman (Luc. 21:34, 35). Wakin runasqa qhepa pʼunchaykunapi kausashasqanchejpi creesqanchejrayku ichá wampus niwasunman (2 Ped. 3:3-7). Chaywanpis chay nisqankuta mana kasunachu. Imaraykuchus sutʼita yachanchej kay pachaj tukukuynin qayllitapiña kasqanta. Dios atiyninwan yanapanawanchejta munanchej chayqa, tantakuykunaman mana saqespa rinanchej tiyan. w16.07 2:13, 14

Ashkha runas Diosmanta mañakunku allin sientekusqankuraykulla. Jinapis mana creenkuchu Dios mañakuykunasninkuta uyarisqanta. Chay runasqa yachakunanku tiyan Jehová mañakuykunata uyarisqanta. Jesús yachachisqasninman nerqa: “Imallatapis sutiypi mañakojtiykichejqa, chayta qosqaykichej”, nispa (Juan 14:14). Kayqa rikuchiwanchej, Diospa munayninman jina imallatapis mañakuyta atisqanchejta. Juan qhelqarqa: “Diospi atienekusqanchejqa: Imatapis munayninman jina mañakojtinchejqa, pay uyariwanchej”, nispa (1 Juan 5:14). Mana allin sientekunallapajchu Diosmanta mañakunchej, manaqa Diosmanta mañakuspa “jatun khuyakuyta qoj Diospa” ñawpaqenman qayllaykunchej. Chayta runasman yachacheyqa may sumaj (Heb. 4:16). Runasman imaynatachus mañakunata, pimantachus mañakunata, imastachus mañakunata yachachispaqa, Jehovawan amigos kanankupaj, ñakʼarishajtinku sonqochayta tarinankupaj ima yanapanchej (Sal. 4:1; 145:18). w16.07 4:11, 12

Jehová Diosta tukuy sonqonkuwan munakojkunaqa, mayta paymanta runasman willamuyta munanku. Chaywanpis machitus chayri onqosqas kasqanchejrayku, ichá mana wasimanta wasi willayta atillanchejchu. ¿Imatataj ruwasunman? Allin kanman muyuyninchejpi kaj runasman willarinanchej, nisunman doctoresman, enfermerasman ima. Ajinata ruwaspaqa Jehovata jatunchallanchejtaj. Diospi creesqanchejrayku carcelpi kaspapis, carcelpi kajkunaman Diosmanta willayta atisunman. Chaypis Jehovata mayta kusichillantaj (Pro. 27:11). Chantapis Jehovaqa kusikullantaj payta sirvejtinchej, familiaresninchej mana payta yupaychajtinkupis (1 Ped. 3:1-4). Llakiypi kaspapis, Jehovata jatunchayta, llajtanpi ñaupariyta ima atinchej. Jehovaqa paywan amigosllapuni kajtinchej, payta sirvinapaj tukuy atisqanchejta ruwajtinchej ima bendeciwasun. w16.08 3:19, 20

Cristiano qosaqa Jesús jina kʼacha kanan tiyan, pichus congregacionpa uman. Warmitaj mana yuyanchu, qosan paypa uman kasqanrayku payqa mana valesqanta. Jehová sutʼincharqa, warmi qosanpaj sumaj yanapa kasqanta. Chayrayku nerqa: “Mana allinchu runaqa sapallan kanan. Paywan kanampaj, uj yanapajta ruwapusaj”, nispa (Gén. 2:18). Warmeqa qosanta yanapanan tiyan, familianpa sumaj uma kananpaj. Qosa kʼacha kajtenqa, warmeqa paywan kusisqa kanqa. Chantapis jatunpaj qhawayta, yanapayta ima atillanqa. Kunanpis cristianosqa imaynatachus Jesús yachachisqasninta munakorqa, ajinata purajmanta munanakunku (Juan 13:34, 35; 15:12, 13; Efe. 5:25). Cristiano qhariwarmisqa mayta munanakunanku tiyan. Kausayninkutapis qosankurayku chayri warminkurayku qoyta munananku tiyan. w16.08 2:3, 4

Sumajta parlarisqanchejqa, ajinallatataj wajkunata kallpachanman. Yanapanmantaj Jehová Diosta yupaychanallankupajpuni. Chantapis ama qonqanachu, tantakuykunapi tapuykunaman kutichisqanchejqa hermanosninchejta kallpachallantaj. Jehovaj yanapayninwan, Nehemías, judíos ima makisninkuta kallpachakorqanku. Ajinamantataj Jerusalenpa perqasninta 52 diasllapi sayaricherqanku (Neh. 2:18; 6:15, 16). Nehemiasqa mana wajkuna llankʼashasqankuta qhawakullarqachu, manaqa paypis llankʼaysikorqa (Neh. 5:16). Kay tiempopipis, ashkha ancianos Nehemías jina ruwanku. Paykunaqa Tantakuna Wasista ruwaysikunku, allinchaysikunku chayri llimphuchaysikunku. Hermanosta munakusqankuraykutaj, chʼampaykunasniyoj kajkunata kallpacharinku, paykunata waturispa chayri paykunawan willaspa (Isa. 35:3, 4). w16.09 1:15, 16

Tukuy cristianos kay yuyaychayta kasukunapaj kallpachakushanchej: “Wañuchiychej qankunapi kaj sajra imasta. Ama kaykunapi urmanaykichejpaj: khuchichakuy juchapi, millay imasta ruwaypi, qʼoñirisqa kaypi, sajra kajta moqʼeypi” ima (Col. 3:2, 5). Wakin hermanosninchejqa, cristianos kanankupaj millay kausayninkuta saqerqanku. Wakintaj chay sajra munayninkuwan maqanakushankuraj. Imaynatachus pʼachallikusqanchejta mana allinta qhawarikuspaqa, mana chay sajra munayninkuta qonqanankupaj yanapayta atisunchu, nitaj Bibliaj nisqanta kasukunankupajpis (1 Cor. 6:9, 10). ¿Manacharí paykunata pantachiyta munanchejchu? Hermanoswan kashaspaqa, millay kausayman tanqaj runasmanta karunchasqa kashanchej. Maychus kajta pʼachallikuspataj, ajina kanallanpajpuni yanapakusunman, tantakuykunapi chayri maypi kashajtinchejpis. Ima ropatachus churakuyta ajllayta atejtinchejpis, pʼachallikusqanchejqa mana wajkunata miskʼachinanchu tiyan. Astawanpis paykunata yanapananchej tiyan, yuyayninku, parlayninku, ruwasqanku ima Diospa ñaupaqenpi llimphu kananpaj (1 Ped. 1:15, 16). w16.09 3:9, 10

Franciamanta uj tatamama nerqanku: “Jehovapi creeyku, chaytaj mana ninayanchu wawasniykupis creenallankutataj. Wawasqa pisimanta pisi creenku”, nispa. Australiamanta uj hermanotaj nerqa: “Wawaspa sonqonpi creeyta wiñacheyqa, mana atinapaj jinallachu. Yuyasqaykiman jina, wawaykej tapuyninman sumajtaña kutichinki. Jinapis watejmanta tapullasunkitaj. Kunan kutichisqaykeqa, ichá niña qʼayapaj sumajchu kanqa”, nispa. Wawas wiñasqankuman jina, tatasqa reparanku wakin imasta watejmanta sutʼinchananku kasqanta. Reparallankutaj, wawasninku Diosta munakunankupaj tukuy imaymanamanta yachachinankuta. Tata chayri mama kanki chayqa, ichá tapukorqanki: “¿Atisajchu wawasniyta yanapayta Jehová Diosta munakunankupaj, sirvinankupaj ima?”, nispa. Ni pipis chayta sapallanmanta ruwayta atinmanchu (Jer. 10:23). Jehovaj yanapaninta necesitasqanchejrayku. w16.09 5:1, 2

Waj llajtayojkunaqa, ima suyumanchus ripunku chay suyoj costumbresninman jina kausakunankupaj mayta kallpachakunanku tiyan. Rutpis chayta ruwarqa. Payqa mana rejsisqan llajtaman chayaspa chajmakunanpaj permisota mañakorqa, chayta ruwaspataj chay llajtaj costumbresninta jatunpaj qhawasqanta rikucherqa (Rut 2:7). Nitaj yuyarqachu chajmakunanpaj derechoyoj kasqanta, wajkuna yanapanankupuni kasqanta ima. Payqa agradecekorqataj khuyakusqankurayku (Rut 2:13). Waj llajtayojkuna, Rut jina ruwanqanku chayqa, chay lugarmanta hermanos, waj runaspis respetanqanku. Jehová munakuwasqanchejmanta kusikunchej, tukuyta sumaj willaykunata uyarejta saqewasqanchejmanta ima. Ichá waj llajtayojkunaqa suyunkupi mana Bibliata estudiayta aterqankuchu chayri mana Diospa llajtanwan khuska tantakuyta aterqankuchu. Chayrayku paykunata yanapana congregacionpi mana waj llajtayojkuna jina sientekunankupaj. w16.10 1:17-19

Ashkha hermanospis Jesús jina ruwanku. Jehovaj nisqasninpi tʼukurinku, chʼampaykunapi rikukuspataj Jehovaj nisqasninta mana qonqapunkuchu. Rudolf Graichen hermanomanta parlarina, payqa Alemaniapi nacekorqa 1925 watapi. Payqa yuyarikun jovencito kashaspa, wasinpa perqasninpi Bibliamanta cuadrosta pintasqata rikusqanta. Pay nin: “Ujnin cuadropi pintasqa kasharqa atojwan ovejawan, leopardowan chivituwan, waka uñawan leonwan ima: tukuyninkutaj khuska kasharqanku, uj wawallataj michisharqa”, nispa (Isa. 11:6-9). Chaytaj chay hermanota yanaparqa paraisopi yuyanallanpajpuni, chay suyakuypi creeyninta sinchʼiyachinanpaj ima. Chayraykutaj Diosman cheqa sonqollapuni karqa, Alemania nazi nisqamanta policía, Alemania comunista nisqamanta policía ashkha watasta mayta qhatiykachajtinkupis. Rudolf hermanoqa waj llakiykunapi rikukullarqataj. Maman Ravensbrück nisqa carcelpi wisqʼasqa kashaspa tifus nisqa onqoywan wañuporqa. Tatantaj uj documentota firmarqa, manaña Jehovaj testigonchu kasqanta ninanpaj. Jinapis payqa sinchʼi creeyniyojllapuni karqa. w16.10 3:12-14

Bibliataqa jatunpaj qhawanchej, Diospa Palabran kasqanrayku. Bibliaj yuyaychaykunasnenqa, chʼampaykunapi mana rikukunapaj yanapawanchej, pantajtinchejpis cheqanchawanchej. Chay yuyaychaykunata, ¿japʼikunchejchu? Evodiapi, Sintiquepi ima tʼukurina. Bibliaqa phiñanakusqankuta nin, jinapis mana willanchu imaraykuchus phiñanakusqankuta. Chay ruwasqankutajrí, ichá congregacionta tʼaqanacherqa. Chantachá Pabloqa paykunata cheqancharqa, allinyakunankutataj nerqa. Bibliaqa mana sutʼita ninchu, Evodiawan Sintiquewan Pabloj yuyaychasqanta japʼikusqankutachus manachus. Jinapis ichá kasukorqanku (Fili. 4:2, 3). Kunanpis ichá wakin kutis hermanoswan phiñanakusunman. Jinapis Bibliaj nisqanqa, chay chʼampaykunata allinchanapaj chayri chaykunapi mana rikukunapaj yanapawasunman. Bibliaj nisqanta kasukuspaqa, Jehovaj Palabranta jatunpaj qhawasqanchejta rikuchisun (Sal. 27:11). w16.11 3:1-3

Tukuypis kallpacharinata necesitanchej. Tataspis wawasninkuta kallpacharinanku tiyan. Profesor Timothy Evans nin: “Imaynatachus uj plantita yakuta necesitan, ajinallatataj wawasqa kallpachasqa kayta necesitanku. [...] Tatamama wawankuta kallpacharejtinku, wawaqa munasqa kasqanta yachan, nitaj pisipajchu qhawakun”, nispa. Sajra pʼunchaykunapi kashasqanchejrayku, runasqa paykunallapaj imatapis munanku, nitaj wajkunata munakunkuchu (2 Tim. 3:1-5). Satanasqa yachan, llauchhiyachiwajtinchejqa Diosmanta karunchakunanchejta. Satanasqa Jobta ñakʼarichispa llauchhiyachiyta munarqa, nitaj aterqachu. Jobqa Diosman cheqa sonqollapuni karqa (Job 2:3; 22:3; 27:5). Noqanchejpis Satanasta atipayta atisunman. Familanchejta, congregacionmanta hermanosninchejtapis kallpachaspa. Chayta ruwaspaqa purajmanta yanapanakusun kusisqa kanapaj, Diospa qayllallanpipuni kanapaj ima. w16.11 1:4, 6

Kay 1501 wata qayllata Bibliata waj parlaykunaman tijrachikorqa. Wakin runasqa wañuchisqa kayta atisqankuta yachaspapis, Bibliata tijracherqanku runaspa entiendesqanku parlayninkuman. Iglesiata kamachejkunataj rabiamanta wañuyta munarqanku. Paykunaqa runas Bibliata parlayninkupi leeytawan tapuykunankuta manchikorqanku. Llampʼu sonqoyojkunataj tapuykorqanku: “¿Maypitaj Biblia nin wañusqaspaj misachikumanta qolqeta pagana kasqanta? ¿Maypitaj Biblia nin iglesiaspi papas chayri cardenales kananta?”, nispa. Iglesiata kamachejkunaqa, runas chay jinata tapuykojtinku rabiakorqanku. Iglesiaj yachachisqanta qhesachajkunaqa, wañuchisqa kanankupaj juchachasqa karqanku. Iglesiata kamachejkunaqa mana munarqankuchu, runas Bibliata leenankuta, paykunata tapunankutapis. Ashkha runastataj chʼinyacherqankupuni. Jinapis wakenqa mana Jatun Babiloniata manchachikorqankuchu. Paykunaqa imatachus Biblia yachachisqanta yachaytawan, astawan yachayta munarqanku. Llulla religionmanta llojsipunankoqa, qayllapiña kasharqa. w16.11 4:13

Jehovata yupaychanapajqa cheqan kajta ruwananchej tiyan (Efe. 4:25). Mana Satanás jinachu kayta munanchej. “Payqa llulla, llullakojkunaj tatantaj”. Yuyarikuna, Ananiaswan warminwanqa llullakusqankurayku wañorqanku. Chayrayku noqanchejqa mana llullakunchejchu (Juan 8:44; Hech. 5:1-11). Chaywanpis, ¿llullakuyllamantachu jarkʼakunanchej tiyan? Mana. Diospa qhasilla kʼacha yanapayninta tukuy sonqo agradecekunchej chayqa, tukuy imapi cheqan kajta ruwasunchej. Uj runaqa mana llullakuspapis, mana cheqan kajtachu ruwashanman. Jehovaqa israelitasta nerqa: “Ama suwaychejchu. Ama llullakuychejchu, nitaj chʼawkiyanakuychejchu”, nispa. ¿Imaraykú chayta ruwananku karqa? Jehová nerqa: “Qankunaqa juchamanta tʼaqasqa may santos kaychej, imaraykuchus noqa Señorniykichej Tata Diosqa may santomin kani”, nispa (Lev. 19:1, 2, 11). Mana llullakuspapis, wajkunata pantasqata yuyachinchej chayqa, mana cheqan kajtachu ruwashanchej. w16.12 1:17, 18

Diospa Palabranpeqa, imaynatachus Jesús runaswan parlarisqanmanta leeyta atinchej. Runasqa Jesuspa parlasqanta mayta uyariyta munaj kanku, astawanraj saykʼusqa chayri llakisqa kajkuna. Imaraykuchus payqa kallpacharinapaj jina, sonqochanapaj jinataj parlaj (Mat. 11:28-30). Jesusqa runasmanta llakikoj (Mar. 6:30-32). Payqa paywan rej apostolesninta yanapananta nerqa. Noqanchejtapis yanapallawasunchejtaj. Chaypajqa mana Jesuswan khuskapunichu kananchej tiyan. Imaraykuchus Reyninchej Jesusqa munakushallawanchejpuni. Chayrayku llakisqa kashaspaqa, ama iskayrayanachu maychus tiemponpi yanapanawanchejmanta. Jesusqa llakiykunasninchejta atipanapaj kallpachawanchej, uj suyakuytataj qowanchej (Heb. 2:17, 18; 4:16). w16.12 3:4, 6

Noej tiemponpi, mundoqa “imaymana juchawan juntʼa karqa, chejninakuywan ima” (Gén. 6:4, 9-12). Noeqa Jehovaj nisqasninta tukuy sonqo willarqa. Jinapis mana runasta kasukunankupaj tanqayta aterqachu, nillataj Jatun Parata ñaupajta chayachimuyta aterqachu. Noeqa Jehová Diosta sajra kajta tukuchinanta nisqanpi atienekunan karqa, jinallataj chayta maychus tiemponpi ruwananpipis (Gén. 6:17). Kunanpis kay mundoqa sajra ruwaykunawan juntʼa kashan. Jehovataj kay sajra mundota tukuchinanta ninña (1 Juan 2:17). Chay tukukuy chayamunankamaqa, mana runasta tanqayta atisunmanchu “Diospa Gobiernonmanta sumaj willaykuna[ta]” japʼikunankupaj, nillataj “manchay ñakʼariy” tiempota ñauparichimusunmanchu (Mat. 24:14, 21). Noé jina sinchʼi creeyniyoj kananchej tiyan, atienekunataj tiyan Jehová kay sajra mundota maychus tiemponpi chinkachinanpi (Sal. 37:10, 11). Payqa yachan maykʼajchus kay mundota chinkachinanta. Chaytataj maychus tiemponpipuni ruwanqa (Hab. 2:3). w17.01 1:5-7

Jehová Diosqa ajllayta atinapaj jina ruwawasqanchejqa, uj sumaj regalo. Chayrayku maytachá Jehová Diospa sonqon nanan, runas mana allin kajta ruwayta ajllajtinku, chayri wajkunata ñakʼarichejtinku. Bibliaqa “qhepa pʼunchaykunapeqa, kausay may llakiy” kananta nerqa, runaspis “mana graciasta qoyta yachajkuna” kanankuta (2 Tim. 3:1, 2). Chayrayku, ¿imaynatá Jehovaman agradecekusunman, ajllayta atinapaj ruwawasqanchejmanta? ¿Imaynatá allin kajtapuni ajllasunman? Tukuypis ajllayta atinchej: amigosninchejta, ima ropatachus churakuyta, imaynatachus kʼachanchakuyta, imawanchus kusirikuytapis. Jinapis allinta qhawarikuna tiyan, ajllayta atisqanchejrayku ama Diospa chejnisqan imasta ruwananchejpaj, nitaj kay mundomanta runas jina kausananchejpajpis (1 Ped. 2:16). Kacharichisqa kasqanchejrayku sajrata ruwanamantaqa, tukuy imata ruwanachej “Dios jatunchasqa kananpaj” (Gál. 5:13; 1 Cor. 10:31). w17.01 2:12-14

Diospa llajtanpi mosoj llankʼayta chayri astawan ruwanasta japʼejtinchej, Nehemías jina llampʼu sonqollapuni kanapaj kallpachakuna. Ama noqallanchejpichu, nitaj yachasqallanchejpichu atienekuna. ¿Imaynatá uj runa payllapi atienekuyta qallarinman? Uj ancianoqa ichapis congregacionpaj imatapis ruwanman Diosmanta mana mañakuspalla. Manaqa ichá uj hermano chayri hermana, imatapis ruwayta ajllaytawanraj Jehovaj bendicionninta mañakunman. Jinapis llampʼu sonqo runaqa, imallatapis ashkha kutistaña ruwaspapis, mana payllapichu atienekun. Nitaj qonqanchu imatachus ruwayta atisqanqa, Jehovaj ruwasqanwan mana kikinchakusqanta (Pro. 3:5, 6). Diospa llajtanpi ashkha ruwanasniyoj kaspapis, mana yuyanchejchu familianchejmanta chayri hermanosmanta aswan sumaj kasqanchejta. Astawanpis hemanosninchejwan khuska Diospaj llankʼanchej, llajtanpi ima ruwanayojchus kasqanchejtataj yachanchej (1 Tim. 3:15). w17.01 4:7, 8

Jehovaqa munarqa, runas kay Jallpʼapi wiñaypaj kausakunankuta (Gén. 1:28; Sal. 37:29). Kʼacha kasqanrayku, Adanman, Evaman ima sumaj imasta qorqa (Sant. 1:17). Diosqa paykunata ruwarqa, imatapis ajllayta atinankupaj, tʼukurinankupaj, munakunankupaj, sumaj amigosniyoj kayta atinankupajtaj. Jehovaqa Adanwan parlaj, yachacherqataj kasukuyta, imaynatachus kausakunanta, jinallataj imaynatachus animalesta, jallpʼatapis qhawananta (Gén. 2:15-17, 19, 20). Jehovaqa Adantawan Evatawan ruwarqa, imastachus ruwasqanta llamirinankupaj, llojchirinankupaj, rikunankupaj, muskhirinankupaj, uyarinankupaj ima. Ajinamanta Edén huertapi kusisqa kausakuyta atinkuman karqa. Adanwan Evawan ashkha imasta ruwayta aterqanku, wiñaypajtaj mosoj imasta yachakuyta atinkuman karqa. Jehová Adanta, Evatawan ruwarqa mana pantaj wawasniyoj kanankupaj. Jallpʼaqa wasinkuman tukunan karqa, chaypitaj wiñaypaj kausakunanku karqa. w17.02 1:6, 7

¿Imaynatá Diospa Palabran yanaparqa llajtanta kamachejkunata? Rey Josiaspa ruwasqanpi tʼukurina. Moisespa Leyninta tarisqankutawan, Josiaspa ujnin kamachin leepuyta qallarerqa. “Jinapi chay leesqanta uyariytawan, reyqa pʼachasninta llikʼikorqa”. Diospa Palabranqa Josiasta yanaparqa llajtamanta lantista chinkachinanpaj, jinallataj “Diosman Pascua fiestata” ruwananpajpis. Josiaspa ruwasqan Pascua jinataj, ni jaykʼajpis ñaupajta ruwakorqachu (2 Rey. 22:11; 23:1-23). Josías, jinallataj waj kamachejkunapis, Diospa Palabranta kasukusqankurayku, imastachus llajtaman kamachisqankuta cambiananku kajtenqa, cambiarqanku. Chaytaj Diospa llajtanta yanaparqa payta kasukunankupaj. Israel llajtamantaqa mana tukuy reyeschu Diosta kasukorqanku. Jehovaqa chay kamachejkunata wakin kutis cheqancharqa, wakin kutistaj cuentankumanta wajta churarqa (1 Sam. 13:13, 14). Aswan qhepamantaj, mana pantaj kamachejta ajllarqa. w17.02 3:11, 12, 14

Jehová Diosqa runasta “payman rijchʼakojta” ruwarqa (Gén. 1:27). Chayraykutaj casi tukuy runas, imaynachus kasqanchejpi Jehová Diosman rijchʼakuyta atinchej. Sutʼincharinapaj, runasqa atinchej munakuyta, khuyakuyta, wajkunawan kʼacha kayta ima. Chantapis Diosqa concienciayojta ruwawarqanchej. Chayrayku atinchej reparayta imachus allin, imatajchus mana allinchu kasqanta, imachus cheqan, imatajchus mana cheqanchu kasqantapis (Rom. 2:14, 15). Runasqa kʼachitu, llimphitu kaj imasta munakunchej, allintataj kausakuyta munanchej. Chaytaj mana tʼukunapajchu, imaraykuchus Jehová Diosqa imatapis maychus kajtapuni ruwan, manataj chʼajwata maskʼanchu. Qhawanchej jina, tukuy runas imallapipis Jehovaman rijchʼakuyta atinchej. Chayrayku tukuy runasta jatunpaj qhawananchej, respetananchejtaj tiyan. Yachanchej wajkunata jatunpaj qhawana kasqanta. Jinapis ichá mana entiendeyta atillanchejchu imaynatachus chayta ruwanata. w17.03 1:5, 6

Ashkha runasmanta nisqaqa, Jehová mana imatapis ruwarparillanchu, ni phiñasqa kashaspapis. Payqa ninivitas pesachikusqankuta, niñataj sajra imasta ruwasqankuta rikuspa, manaña paykunata chinkacherqachu. Chayrayku, wakin kutisqa imatachus ruwayta ajllasqanchejta watejmanta qhawarina kanqa, ichá chayta ruwasun kausayninchej manaña ñaupajta jinachu kajtin. Jehovapis imatachus qallariypi nisqanta, wakin kutis waj jinamanta ruwarqa (1 Rey. 21:20, 21, 27-29; 2 Rey. 20:1-5). Noqanchejpis wakin kutis ichá wakin imasmanta astawan yachasqanchejrayku, chay imasta waj jinamanta ruwana kanqa. Rey Davidmanta parlarina. Payqa Saulpa allchhin Mefibosetmanta llullasta parlasqankuta creespa, Mefibosetpa tukuy imasninta waj runaman qoporqa. Jinapis chay willasqanku llulla kasqanta yachaytawan, imatachus qallariypi nisqanta tijrarqa (2 Sam. 16:3, 4; 19:24-29). w17.03 2:14, 15

Niraj imatapis ruwashaspa, Bibliaj yuyaychaykunasninpi tʼukurina tiyan, qhawarinataj tiyan imaynatachus chayman jina ruwanata. Diospi mana creej qosayoj hermanamanta parlarina. Payqa predicaj rinanpaj uj diata ajllakun (Hech. 4:20). Jinapis qosanqa nin: “Ama kunan predicaj riychu. Khuska puriykacharej mayllamanpis risunchej. Unayña mana maymanpis rinchejchu”, nispa. Hermananchejqa imatachus ruwananta yachananpaj Bibliaj wakin yuyaychaykunasninpi tʼukurin. Payqa Diosta kasukunan kasqanta yachan, jinallataj runasman yachachimunata Jesús kamachisqantapis (Mat. 28:19, 20; Hech. 5:29). Chantapis yuyarikun warmisqa qosankuta kasukunanku kasqanta, jinallataj Diospa kamachisnin mana kʼullu runaschu kananku kasqanta (Efe. 5:22-24). Hermananchejqa tapurikunman: “¿Predicacionman manaña rinayta munasqanraykuchu jarkʼashawan? Chayrí, ¿kay kutillachu mana rinayta nishawan?”, nispa. Jehová Diospa kamachisnenqa imatapis allin yuyaywan ruwayta munanchej, jinallataj Jehovata kusichiytapis. w17.03 4:17