Enero

Kay tiempopeqa, qhepa pʼunchaykunaj tukukuyninpi kausakushasqanchejrayku, runasqa astawan sajrayashanku. Paykunaqa “qhora jina wiñanku” (Sal. 92:7). Diospa kamachiykunasnintapis qhesachanku. Chayrayku Pabloqa, cristianosman jinata nerqa: “Sajra imaspaj wawas jina kaychej, yuyayniykichejpitaj wiñay tukusqa runas jina kaychej”, nispa (1 Cor. 14:20). ¿Imaynatá chayta ruwasunman? Proverbios 28:5 nin: “Tata Diosta maskʼajkunarí chay tukuy imasta allinta entiendenku”, nispa. Kayqa reparachiwanchej, Jehová Diosta maskʼajkunalla “tukuy imasta allinta” entiendespa Diosta kusichiyta atisqankuta. Chantapis Proverbios 2:7, 9 versiculosqa yachachiwanchej, Jehová “sumaj yachayta” qosqanta cheqan kajta ruwajkunaman. Ajinamanta entiendeyta atinku “cheqan kajta, allin kajta, maychus kajta ruwayta, tukuy allin ñantapis”. Noé, Daniel, Job ima sumaj yachayniyoj karqanku (Eze. 14:14). Kay tiempopipis, Diospa kamachisnenqa, chay jina yachayniyojllataj kanku. Chayrayku kallpachakunanchej tiyan Jehovamanta tukuy imata entiendenapaj, payta kusichinapajtaj. w18.02 págs. 8, 9 párrs. 1-3

Ni pitapis bautizakunanpaj tanqananchejchu tiyan. Imajtinchus Jehová mana pitapis tanqanchu payta sirvinanpaj (1 Juan 4:8). Estudiosninchejman yachachishaspaqa, reparachinanchej tiyan Diosman astawan qayllaykunankupaj kallpachakunallankupuni kasqanta. Estudiosninchejtaj, Diosta rejsispa, imatachus uj cristiano ruwananpuni kasqanta yachaspa ima, bautizakuyta munanqanku (2 Cor. 5:14, 15). Mashkhayoj kaspapis bautizakuyta atinchej. Wakenqa jóvenes kashaspa bautizakorqanku, Diostataj kasukushallankupuni. Wakintaj machitusña kashaspa, Bibliamanta yachakuytawan bautizakorqanku. Uj runa bautizakushajtenqa, tukuypis mayta kusikunchej. Chaywanpis, bautizakojqa chay día sumajta tʼukurinan tiyan Jehovaj munayninta juntʼananpaj mayta kallpachakunanpi. Jesuspa yachachisqasnenqa, ‘manaña paykunapajchu kausanku. Astawanqa pichus paykunarayku wañorqa, kausarinporqataj chaypaj kausanku’ (2 Cor. 5:15; Mat. 16:24). w18.03 págs. 6, 7 párrs. 14-17

Wajkunata wasinchejman wajyarikuyta mana manchachikunanchejchu tiyan. Imajtinchus hermanosta wasinchejman wajyarikuspaqa, paykunawan sumajta parlarikunchej, amigos ruwakunchej, nitaj sapayakunchejchu. Chaywanpis wakenqa mana wasinkuman wajyarikuyta atillankuchu. Hermanosta wajyarikunapajqa tiempochakuna, kallpachakunataj. Jehová kamachisnenqa may ocupasqa kashanchej, llajtanpi ashkha ruwanasniyoj kasqanchejrayku. Chayrayku hermanosta wasinchejman wajyarikunapaj ichá mana tiempochakuyta atillanchejchu chayri may saykʼusqa kashanchej. Ajinapi rikukushanchej chayqa, allin kanman qhawarikunanchej imasmanchus tiemponchejta churashasqanchejta. Ajinamanta wakin ruwanasta saqespa hermanosninchejta wajyarikuyta atillasun, wajyariwajtinchejpis tiempochakuyta atillasun. Bibliapis niwanchej: “Ama qonqaychejchu wajkunata wasiykichejman wajyarikuyta”, nispa. Chayrayku hermanosta wasinchejman wajyarikunapajqa, mayta kallpachakunanchej tiyan. Chaypajtaj ichapis wakin imitasta manaña ruwananchejchu kanqa. w18.03 págs. 16, 17 párrs. 13, 14

Jesusqa, Diospa munayninta ruwaspapuni kausakorqa. Chayrayku paymantaqa mayta yachakusunman. Jesusqa, Jehová Dios jina yuyaj, ruwaj, kamachiykunasninta kasukoj, wajkunamantapis khuyakoj (Juan 8:29; 14:9; 15:10). Arí, Jesusqa Jehová Dios jina khuyakuyniyoj karqa. Imaraykuchus profeta Isaiasqa Dios may khuyakuyniyoj kasqanta nerqa. Marcostaj Jesuspis khuyakuyniyoj kasqanta nerqa (Isa. 63:9; Mar. 6:34). Chayrayku Jesús jina noqanchejpis runasta khuyakuna, yanapanataj. Chantá Jesús jina tukuy sonqo Jehová Diosmanta tukuy laya runasman willamuna, yachachimunataj. Chaykunata ruwaspaqa, Jehová Dios jina yuyasqanchejta rikuchiyta atisunchej. w18.02 pág. 21 párr. 12

Kay tiempopeqa ashkha tatas mana Jehová Dios nisqanman jina wawasninkuta uywayta atillankuchu (2 Tim. 3:1-5). Chayrayku wawasmanqa, nacekusqankumantapacha imachus allin kajta, imatajchus mana allin kajmanta reparayta yachachinanchej tiyan, sumaj runasman tukunankupaj (Rom. 2:14, 15). Wawasqa, tatasninku munakuywan yachachejtinku, tatasninkuta kasukuyta atillanku. Reparankutaj mana munaynillankuta ruwayta atisqankuta, sajra kajta ruwajtinkutaj ñakʼarinankuta. Chayrayku cristiano tatasqa Jehová Diospa yanapayninta maskʼanankupuni tiyan wawasninkuta sumajta uywanankupaj. Astawanpis wawasninchejta Diospa Palabranwanpuni yachachinanchej, cheqanchananchejtaj tiyan, manataj munayninchejman jinachu, nitaj runas yuyasqankuman jinachu. Imajtinchus runasqa, sapa lugarpi imaymanata ninku, imaynatachus wawasta uywanamanta. w18.03 pág. 30 párrs. 8, 9

Jóvenes, tatasniykichejwan tiyakojtiykichejpis, qankunamanta kashan, Jehová Diosta tukuy sonqo yupaychanaykichejqa. Chayta yuyarikuytaj allinpuni. Imaraykuchus ichapis wawallaraj kashaspa bautizakorqankichej. Kunantaj jovencitusña kaspa, waj phutiykunapi rikukunkichej, ashkha problemastataj atipanaykichej kashan. Chaymanta parlaspa, uj jovencita ajinata nerqa: “Wawallaraj kashaspaqa Jehová Diosta kasukuyta atillanchej. Escuelamanta compañerosninchej cumpleañosta ruwashajtinku tortata qoriwayta munawajtinchejpis. Jovenesña kaspataj, ichapis Jehová Diosta mana kasukuyta atillasunmanchu, qhariwarmi jina puñuykuyta munapayay aswan sinchʼi kasqanrayku. Chayrayku sonqonchejpi sutʼi kanan tiyan, Jehová Diosta kasukuy allinninchejpajpuni kasqanta”, nispa. Machitusña kaspa bautizakojkunapis, ashkha llakiykunallapitaj rikukunku. Paykunaqa llakikunkuman onqoykusqankurayku, chayri familiankupi, trabajonkupi ima chʼajwas kasqanrayku. Wawas, jóvenes chayri machitusña kaspapis, tukuy imaymana llakiykunata aguantananchej kanqa, Jehová Diosta mana wasanchanapaj (Sant. 1:12-14). w17.12 pág. 24 párrs. 4, 5

Davidtaqa maytapuni ñakʼaricherqanku. Jinapis payqa mana phiñakuyninwan atipachikorqachu. Astawanqa David nerqa: “Phiñasqa kayta saqey, qhesachaytaj; amapuni phiñakuychu, imaraykuchus chaywanqa aswan mana allinman chayanki”, nispa (Sal. 37:8). Noqanchejqa phiñasqa kayta saqepunchej, Jehová Dios jina ruwayta munasqanchejrayku. Imajtinchus Jehová Diosqa “mana sajrata ruwasqanchejman jinachu kutichiwanchej, nitaj sajra kayninchejman jinachu pagawanchej” (Sal. 103:10). Phiñakoyqa onqochiwasunman, imajtinchus mana allinta samayta saqewasunmanchu, wijsanchejpis qʼewiwasunman, jinallataj tukuy ukhunchej nanawasunman. Chantapis phiñakuspaqa imatapis ruwarpallasunman. Mana chayllachu, rabiakuspaqa unayta umphulla kasunman. Mana phiñakojtinchejrí, mana chay imaspi rikukusunchu. Chayrayku Biblia nin: “Kʼacha sonqo kayqa runaj cuerpompaj kawsayta apamun”, nispa (Pro. 14:30). Chayrayku mayqen hermanollawanpis allinyakunapaj kallpachakuna. Chaypajtaj Bibliaj yuyaychaykunasninman jina ruwana. w18.01 pág. 10 párrs. 14, 15

Chayta nispa Davidqa, mana nisharqachu ni jaykʼaj wañunanta, nitaj pʼampasqa kanantapis. Imajtinchus Bibliaqa nin, ‘David wañupusqanta, tatasninpa aya pʼampananpitaj pʼampasqankuta Davidpa llajtanpi’ (1 Rey. 2:1, 10). Pedroqa Jesús kausarichisqa kasqanmanta semanasninman, ashkha judiosman, mana judío kajkunamanwan nerqa: “Davidmanta sutʼita parlarisqaykichej, payqa wañuporqa, pʼampasqataj karqa”, nispa (Hech. 2:29-32). Chantá Pedro nillarqapuni: ‘Davidqa ñaupajmantaña Cristoj kausarimuyninta rikorqa, chay kausarimuyninmantataj parlarqa’, nispa. Biblia nisqanman jinataj, chayta nisqanmanta Pedrowan tukuypis de acuerdo kasharqanku. Pedroqa, David imatachus Salmo 110:1 versiculopi nisqanta oqharerqa, Salmo 16:10 versiculota sutʼinchananpaj (Hech. 2:33-36). Ajinamanta Pedroqa, runasta reparacherqa Diosninchej “Jesusta churasqanta Señor kananpaj, Cristo kananpajtaj”. Runastaj sutʼita repararqanku Salmo 16:10 versículo juntʼakusqanta, Jehová Dios Jesusta wañuymanta kausarichimusqanwan. w17.12 pág. 10 párrs. 10-12

Diospa Llajtanta Kamachejkunaqa, sumaj yuyaywan apaykachanku hermanos churasqanku qolqeta (Mat. 24:45). Paykunaqa Diosmanta mañakunku chay qolqeta sumajta apaykachanankupaj (Luc. 14:28). Apóstol Pablopis, Judeamanta cristianosta yanapananpaj qolqeta tantarqa. Chay kutipitaj jinata nerqa: “Tukuy imata mana chʼaukiyaspa ruwanaykupaj kallpachakuyku, mana Jehová Diospa ñaupaqellanpichu, manaqa runaspa ñaupaqenkupipis”, nispa (2 Cor. 8:18-21). Kay tiempopipis Diospa llajtanta ñaupajman apajkunaqa, Esdras jina, Pablo jinataj sumaj yuyaywan qolqeta apaykachanku (Esd. 8:24-33). Ajinamantataj hermanospa churasqanku qolqeta sumajta apaykachakorqa. Imaraykuchus kunallanraj Diospa llajtanpi, jatuchej Betel wasis, jatun tantakuna wasis waj imaspiwan ruwakorqa. Chaykunapitaj may chhika qolqe gastakorqa. w18.01 págs. 19, 20 párrs. 12, 13

Hermanosta tukuy sonqo munakusunchej chayqa, perdonayta atillasunchej. Wajkuna sonqonchejta nanachiwajtinchejqa, allin kanman yuyarikunanchej, mashkha kutistachus noqanchejpis waj runaspa sonqonkuta nanachisqanchejta. Chay kutipi perdonanawanchejta munasqanchejtapis. Chayta yuyarikuspaqa, perdonayta atillasunchej (Ecl. 7:21, 22). Tukuyninchej Jesusman may agradecesqas kashanchej, uj sonqolla kananchejpaj yanapawasqanchejmanta. Arí, Jehová Diosllata yupaychanchej, Gobiernonmantataj willamunchej. Chantá casi kikin llakiykunapi rikukunchej. Chayrayku perdonanakojtinchejqa, congregación aswan ujchasqa kanqa. Ajinamanta, hermanoswan phiñanakushanamantaqa, tʼinkanchejta japʼinanchejpi yuyasunchej. Hermanosmanta envidiakusunchej chayqa, Dios qonawanchej kashan chay premiota mana japʼisunchu. Bibliataj wakin runas envidiakusqankumanta parlan. Cainqa envidiakusqanrayku hermanon Abelta wañucherqa. Corewan Datanwan Abiramwantaj envidiakusqankurayku, Moisespa contranpi oqharikorqanku. Rey Saulpis, envidiakusqanrayku Davidta wañuchinanpaj qhatiykacharqa. w17.11 pág. 27 párrs. 9, 10

Ancianosqa uj hermanota juzgashajtinku, sumajta reparananku tiyan, chay hermano sonqomantapachachus manachus pesachikusqanta. Chantá sumajta reparananku tiyan, juchallikoj hermano, juchallikusqanmanta imatachus yuyasqanta, imaraykutajchus juchallikusqantapis (Apo. 3:3). Juchallikojqa sonqomantapacha pesachikunan tiyan, Jehová Dios khuyakunanpaj. Jehová Dioswan Jesuswanqa, yachayta atinku imachus sonqonchejpi kasqanta, imapitajchus yuyasqanchejtapis. Ancianostajrí mana runaj sonqonta qhawayta atinkuchu. Chayrayku imachus juchallikojpa sonqonpi kasqanta yachanankupaj, Jehová Diospa yanapayninta, yachaynintawan mañakunanku tiyan (1 Rey. 3:9). Chantá Bibliawan publicacioneswan ima, juchallikojta reparachinanku tiyan, “Diospa munayninman jina llakikoyqa” pesachikunapaj tanqawasqanchejta. “Kay mundomanta runas jina llakikuyrí wañuyman” pusawasqanchejta (2 Cor. 7:10, 11). Ancianosqa sumajta yachananku tiyan, unay tiempomanta Diospa kamachisnin, imaynatachus sonqomantapacha pesachikusqankuta. Chaytaj ancianosta yanapanqa, maychus kajman jina juzganankupaj. w17.11 pág. 17 párrs. 16, 17

Kay tiempopi runasqa librospi, telepi, videospi ima, tatasta mana kasukuyta allillanpaj qhawachinku. Jinapis wawas tatasninkuta mana kasukojtinkoqa, familiata tʼaqanachin. Runasqa chayta unaymantaña yacharqanku, Grecia suyupi jina. Chay suyupi tatanta maqaj runaqa, comunidadninpi manaña ni imapaj derechoyojchu karqa. Romaj leyninman jinataj, tatanta maqaj runata mayta castigaj kanku, runa wañuchita jina. Chayrayku Bibliaqa wawasman nin: “Tataykita, mamaykitawan jatunpaj qhaway”, nispa (Éxo. 20:12; Efe. 6:1-3). Wakin jóvenes tatasninkuta mana kasukojtinkupis, ¿imatataj cristiano jóvenes ruwankuman tatasninkuta kasukunankupaj? Imatachus tatasninku paykunarayku ruwasqanpi piensarinkuman. Chaypi piensarejtinkutaj tatasninkuta agradecekonqanku, kasukuytataj atillanqanku. Chantá jovenesqa yachananku tiyan, Jehová Dios, wawas tatasninkuta kasukunankuta munasqanta. Jóvenes allinta tatasninkumanta parlajtinkoqa, waj jovenesta yanapanqanku tatasninkuta respetanankupaj. w18.01 pág. 29 párrs. 8, 9

Kay tiempopi uj hermano jatun juchapi urmajtenqa, ancianoswan parlarinanpuni tiyan. Ancianostaj Jehová Diosman kutirinanpaj yanapananku tiyan. Chantá, ¿imaraykutaj juchallikojkuna ancianoswan parlarinankupuni kanman? Imaraykuchus Jehová Diosqa, ancianosta churarqa juchallikojkunata yanapanankupaj (Sant. 5:14-16). Ancianosqa churasqallataj kanku, juchankumanta pesachikojkunata Jehová Diosman kutirichinankupaj. Chantá juchallikojta yuyaycharillankutaj manaña watejmanta kikin juchapi urmananpaj (Gál. 6:1; Heb. 12:11). Chantapis ancianosqa, wakichisqa kanku juchankumanta pesachikojkunata kallpachanankupaj, sonqochanankupaj ima. Jehová Diosqa ancianosmanta jinata nin: ‘Loco para wayramanta pakakunapaj jina kanku’, nispa (Isa. 32:2). Arí, Jehová Diosqa ancianosta churan khuyakuwasqanchejrayku. Juchallikoj hermanos, ancianoswan parlarejtinku, yanapanta maskʼajtinkutaj, sonqo tiyasqa kanku. w17.11 págs. 9, 10 párrs. 8, 9

Familianchejmanta pillapis qharqosqa kajtenqa, mayta sonqonchej nanawasunman. Jinapis Jehová Diosta kasukunapaj, paykunawan amapuni parlanachu telefononejta, celularnejta, cartanejta, mensajenejta chayri Internetnejta. Jinapis qharqosqa kajkuna kutinpunankuta suyakunallapuni. Munakuyniyoj runaqa tukuy imata suyan. Chayrayku noqanchejqa qharqosqa familiaresninchej kutinpunankuta mayta suyakushanchej (1 Cor. 13:7). Qharqosqa familiarninchej pesachikusqanta reparajtinchejqa, Jehová Diosmanta mañakuna llajtanman kutinpunanpaj yanapananta (Isa. 44:22). Jesús nerqa, familianta astawan munakojqa mana paypata kananpaj jinachu kasqanta. Chantapis Jesusqa yacharqa yachachisqasnin payta kasukunankuta, familiaresninku churanakojtinkupis. Jesusta kasukusqanchejrayku familianchejpi tʼaqanakuy kan chayqa, Jehová Diospa yanapayninta mañakuna, chay llakiykunata atipanapaj (Isa. 41:10, 13). Maytataj kusikunchej Jehová Diosta, Jesustapis kusichisqanchejmanta. Jehová Diostaj payta kasukusqanchejmanta, mayta bendeciwasunchej. w17.10 pág. 16 párrs. 19-21

Onqosqa runasta, awelitostawan rikuspa llakikunchej, paykunamantataj khuyakunchej. Tukuy sonqo Diosmanta mañakunchej, paypa Gobiernon jamunallantaña onqoykunata, machuyaytapis chinkachinanpaj. Chaykamataj onqosqasta, awelitostapis tukuy atisqanchejta yanapana. Uj runa, uj kuti ajinata qhelqasqa: “Mamayqa awelitaña karqa, Alzheimer onqoywantaj karqa, uj kutitaj jatun jispʼayninwan atipaykuchikusqa, ropanta cambiakuytataj mana atishasqachu. Jinallapitaj iskay hermanitas punkuta takamusqanku. Chay hermanitasqa mamayta waturejpuni kanku, mamaytaj pʼenqakuspa atipaykuchikusqanta willakusqa. Hermanastaj mamayta yanapasqanku. Chantá yaku qʼoñita tomarikuspa, mamaywan parlarikusqanku. May agradecesqa kashani, chay hermanitaswan, mamayta yanapasqankumanta”, nispa. Chantapis Jehovaj testigosninmanta jinata nisqa: “Paykunaqa Bibliaj nisqanman jinapuni kausakunku”, nispa. Chayrayku tukuyninchej mayta kallpachakuna onqosqasmanta, awelitosmantawan khuyakunapaj (Fili. 2:3, 4). w17.09 págs. 9, 12 párrs. 5, 14

Ama runaspa ñaupaqellanpichu wajkunata yanapana. Nitaj runasman ninachu “payta yanaparqani”, nispa (Mat. 6:1-4). Chantapis ‘wajkunata jatunpaj qhawana’ (Rom. 12:10). Jesusqa apostolesninta jatunpaj qhawasqanrayku chakisninkuta mayllarqa (Juan 13:3-5, 12-15). Apostolestaj imaraykuchus Jesús chakisninkuta mayllasqanta, Diospa yanapayninwan aswan qhepamanraj entienderqanku (Juan 13:7). Jesús jina wajkunata jatunpaj qhawanapaj, llampʼu sonqostaj kanapaj mayta kallpachakunanchej tiyan. ¿Imaynatataj hermanosta jatunpaj qhawasunman? Hermanosninchejmanta aswan sumaj kasqanchejta mana yuyakuspa, profesionniyoj kaspapis, qhapaj kaspapis, chayrí Diospa llajtanpi ima ruwanasniyoj kaspapis (Rom. 12:3). Uj hermanota yanapasqanchejpi piensarina. Noqanchej payta yanapajtinchejpis, hermanosqa payta ninkuman “allinta ruwanki”, nispa. Jinapi rikukojtinchejqa ama envidiakunachu. Astawanqa kusikuna, chay hermano ñauparisqanmanta. w17.10 pág. 9 párrs. 9, 10

Predicacionpi Diospa Palabranta runaspaj leeripoyqa, may sumajpuni. Uj hermanomanta parlarina. Payqa uj caballeroman revistasta apapojpuni. Chay caballeroqa unaymantaña revistasninchejta leej kasqa. Uj kutitaj hermanoqa Torremanta Qhawaj revistata saqenallanmantaqa, kay 2 Corintios 1:3, 4 versiculosta leeripusqa. Chaypi nin: “Paymin may khuyakuyniyoj Tata, tukuy imapi sonqochaj Diostaj. Paymin sonqochawanchej tukuy llakiyninchejpi”, nispa. Chay caballerotaqa, chay hermanoj leesqan, sonqonta kuyurichisqa. Chayrayku chay versiculosta watejmanta leeripunanta nisqa. Chantá chay caballeroqa hermanoman nisqa, señoranwan may llakisqa kashasqankuta. Hermano Bibliamanta leeripusqanrayku, chay caballeroqa astawan Bibliamanta yachakuyta munarqa. Reparanchej jina, Bibliaqa may atiyniyoj. Predicashaspa runasman Bibliata leeripusqanchejqa runaspa sonqonmanpuni chayanqa (Hech. 19:20). w17.09 págs. 25, 26 párrs. 9, 10

Ichá noqanchejpis Satanaspaj phiñakullanchejtaj, juchanrayku ñakʼariypi kashasqanchejmanta. Jehová Diostajrí Satanaspa ruwasqanta mana allinpaj qhawajtinpis, mana usqhayta phiñakuspachu imatapis ruwarqa. Manaqa cheqan kajman jina allinchananta nerqa (Éxo. 34:6; Job 2:2-6). Payqa pacienciawan tiempo pasananta saqeshan, “imaraykuchus mana munanchu ni pi chinkachisqa kananta. Astawanqa munan tukuy pesachikunankuta” (2 Ped. 3:9). Jehovamanta yachakunchej, niraj imatapis ruwashaspa chayri nishaspa allintaraj tʼukurina kasqanta. Chayrayku imata ruwananchejpajpis sumajtaraj piensarina. Jehovamanta yachayta mañakuna, cheqan kajman jina imatapis ruwanapaj, nitaj ima sajratapis parlanapaj (Sal. 141:3). Phiñasqa kashaspaqa, mana yuyaycharikuspa imallatapis ruwarparinchej chayri parlarparinchej, chantaraj pesachikushanchej (Pro. 14:29; 15:28; 19:2). w17.09 pág. 4 párrs. 6, 7

Josueqa mana rey jina churasqa kayta atinmanchu karqa. Imaraykuchus Josueqa mana Davidpa ayllumantachu karqa. Chay pilluta Zacarías, Josueman churaspaqa, judiosman rikuchisharqa, uj runa rey jina, sacerdote jinataj churasqa kananta. Chay runaqa Ijimoj nisqa. Bibliaqa sutʼimanta nin, chay Ijimoj runaqa Jesús kasqanta (Isa. 11:1; Mat. 2:23). Jesusqa Rey jina, Kuraj kaj Sacerdote jinataj churasqa kashan. Payqa angelespa comandanten. Kay tiempopitaj sajra runasmanta Diospa llajtanta jarkʼananpaj, mayta llankʼashan (Jer. 23:5, 6). Tumpamantawanqa Señorninchej Jesucristo, sajra runasta chinkachenqa, Diospa llajtantataj waqaychanqa. Ajinamantataj Jehová Dioslla sumaj Kamachej kasqanta rikuchenqa (Apo. 17:12-14; 19:11, 14, 15). Cheqamantapuni ninchej Señorninchej Jesucristoqa uj sumaj llankʼayta ruwanqa. w17.10 pág. 29 párrs. 12-14

Ropanchej may chʼichi kajtin, asnajtintaj, ¿imatá ruwanchej? ¿Nichu chay ratopacha lluchʼukunchej? Ajinallatataj Jehová Diosninchej chʼichipaj qhawasqan imastapis, chay ratopacha saqepunanchej tiyan. Apóstol Pabloqa khuchichakuy juchamanta, millay imasta ruwaymantawan parlaspa ajinata nerqa: “[Chaykunata] qankunamanta wijchʼuychej”, nispa (Col. 3:5-9). Arí, tukuyninchej mayta kallpachakunanchej tiyan Pabloj nisqanta kasukunapaj. Bibliapeqa khuchichakuy jucha palabraqa, oqharikun tukuy laya khuchichakuymanta parlanapaj, nisunman solteropura qhariwarmi jina puñuykuymanta, qhenchachakuymanta, qharipura chayri warmipura khuchichakuymantawan. Apóstol Pabloqa chay sajra imasta noqanchejmanta ‘chinkachinata’ nerqa. Chaypajtaj aychaj sajra munayninta noqanchejmanta usqhayllata chinkachinanchej tiyan. Chaytataj tukuypis ruwayta atinchej, wakin kuti mana atikullajtinpis. w17.08 pág. 18 párrs. 5, 6

Kay tiemponchejqa profeta Miqueaspa tiemponman rijchʼakun. Payqa sajra rey Ajaz kamachishajtin kausarqa. Chay tiempopi runasqa imaymana sajrata ruwaj kanku, ‘juchata ruwanapajpis may yachayniyoj’ karqanku (Miq. 7:1-3). Miqueasqa chay jina kausay tukukunanpaj ni imata ruwayta aterqachu. Miqueas jina Jehová Diospi atienekusun chayqa, kusiywan Jehová Dios nisqasninta juntʼananta suyakusunchej. Chayta entiendenapaj, uj presochasqa runamanta parlarina. Chay runataqa wañuchisqa kananpaj juchacharqanku. Wañuchisqa kanan pʼunchay mana chayamunanpaj ni imata ruwayta atinchu. Chayraykutaj llakisqalla chay pʼunchayta suyakun. Noqanchejtajrí may kusiywan suyakunchej Jehová Dios wiñay kausayta, maychus tiemponpi qonawanchejta. Biblia nisqanman jina “pacienciawan, kusiywantaj tukuy imapi sinchʼita” sayanchej (Col. 1:11, 12). Jehová Diosta thutuspa, mala ganawantaj suyakusunchej chayqa, payta phiñachisunman (Col. 3:12). w17.08 pág. 4 párrs. 6, 7

Jehová yanapanawanchejpajqa llampʼu sonqo kananchej tiyan, paywantaj sumaj amigos kana (Sof. 2:3). Llampʼu sonqo runasqa Jehová sajra ruwayta, nanaykunatawan chinkachinanta suyakunku. Jehovaqa llampʼu sonqo runasta allinpaj qhawan. Chantapis Jehovaqa ‘sajra runasta kʼumuykachachin’ (Sal. 147:6). Chayrayku sajra runaswan khuskata Jehová mana chinkachinawanchejpaj, sajra kajta chejninanchej tiyan (Sal. 97:10). Chantapis khuchichakuy juchata chejninallanchejtaj tiyan, jinallataj qʼala runasta qhawaytapis. Imaraykuchus chayqa khuchichakuypi urmachiwasunman (Sal. 119:37; Mat. 5:28). Ichapis chay sajra imasta qhesachanapaj maytapuni kallpachakuna kanqa, jinapis kallpachakusqanchejqa mana qhasichu kanqa. Imajtinchus Jehová bendeciwasunchej. Chay sajra imasta qhesachanapajqa Jehovaj yanapayninta mañakunanchej tiyan. Jehovamanta rogakuspa yanapanta mañakunanchej tiyan. w17.07 págs. 19, 20 párrs. 11-13

Kapuyninchejwan wajkunata yanapaspaqa, sumaj yuyayniyoj kasqanchejta rikuchinchej. Wakin hermanosqa qhapaj kanku, jinapis mana atinkuchu precursores jina llankʼayta, chayri waj llajtaman predicaj ripuyta. Ajinapis paykunaqa sonqo juntʼasqa kanku wajkunata qolqenkuwan yanaparikuspa. Qolqesitunchejmanta churaspaqa, publicacionesta ruwakunallanpajpuni, tukuy lugaresmantaj apachikunallanpajpuni yanapakunchej. Chantá yanapakullanchejtaj wajcha lugarespi runas Diosmanta yachakunankupaj. Congo, Madagascar, Ruanda suyuspeqa, hermanos Bibliata rantikunankupaj, uj semanata chayri uj killata llankʼananku karqa. Chayrayku wakin kuteqa ganasqankuwan mikhunata rantinankutachus chayri Bibliata rantinankutachus ajllananku karqa. Paykunaqa watasta ajina kasharqanku. Jinapis mundontinpi hermanosninchej qolqenkuwan yanapakusqankurayku, Diospa llajtanqa chay lugarespi tiyakoj hermanospaj, familiasninkupaj, Bibliamanta yachakojkunapajpis parlayninkupi Bibliata orqhorqa, ‘paykunaman mana pisinanpaj’ (2 Cor. 8:13-15). w17.07 págs. 9, 10 párr. 11

Jobpa kausaynenqa mayta sonqochawanchej. Chantá reparachiwanchej mana Jehová noqanchejpaj phiñasqa kasqanraykuchu llakiypi rikukusqanchejta. Astawanqa ima llakiypipis kashaspa, rikuchiyta atinchej, Jehová Diosllata sumaj kamachejninchejta jina qhawasqanchejta. Jehovamanta mana karunchakojtinchejqa, pay allinpaj qhawawasunchej, suyakuyninchejmantataj astawan chʼipakusunchej (Rom. 5:3-5). Jobpa kausayninpi reparanchej Jehovaqa “jatun sonqoyoj, khuyakuyniyojtaj kasqanta” (Sant. 5:11). Jehovaqa, payta sumaj kamachejta jina qhawajkunata bendicenqa. Chaytaj yanapawanchej, ima llakiytapis pacienciawan, kusikuywantaj aguantanapaj (Col. 1:11). Ashkha llakiykunapi kashaspaqa, ichapis qonqapusunman Jehová Dioslla sumaj kamachej kasqanta sutʼinchakunan aswan sumaj kasqanta. Chayrayku may allinpuni llakiypi kashaspa sapa kuti yuyarikunanchej, Jehovallata sumaj kamachejninchejta jina qhawananchejqa, imamantapis aswan sumaj kasqanta. w17.06 págs 25, 26 párrs. 15, 16

Kay tiempopi ashkha runas kunallanraj rikhurimoj ropata, celularesta, computadorata, waj imasta ima rantikuyta munanku. Paykunaqa kapuyniyoj kayta, qolqeyoj kayta ima astawan ñaupajman churanku. Cristianostaj allinta qhawarikunanchej tiyan, imastachus ñaupajman churashasqanchejta reparakunapaj. Kayta tapurikunachej: “¿Tantakuykunapaj wakichikuypichu tiemponchejta astawan churanchej? Chayri, ¿sumaj autota, kunallanraj rikhurimoj ropata rantikullaypichu astawan yuyanchej? ¿Ashkha ruwanasniyoj kasqanchejraykuchu pisillataña Bibliata leenchej chayri Diosmanta mañakunchej?”, nispa. Mana allinta qhawarikojtinchejqa, tukuy imata munapayaypi urmasunman, Jesustataj pisillataña munakusunman. Chayrayku kunan diapaj ajllasqa textopi imatachus Jesús nisqanpi tʼukurina kanman. Pay nillarqataj: “Mana pipis iskay patronesta ujllapi sirviyta atinmanchu”, nispa (Mat. 6:24). Mana atisunmanchu kapuyniyoj kayta astawan maskʼashaspa, Jehová Diosta sumajta sirviyta. Juchasapas kasqanchejrayku, kallpachakunanchej tiyan tukuy imata munapayaypi mana urmanapaj, imaraykuchus chayqa ‘aychanchejpa munaynin’ (Efe. 2:3). w17.05 págs. 25, 26 párrs. 15, 16

Diospa Gobiernonmanta willamusqanchejqa, runasta yanapan salvakunankupaj, jinallataj noqanchejtapis. Apóstol Pabloqa Diosmanta willamuyta may valorniyojpaj qhawarqa. Chayrayku sonqo kʼajaywan willamorqa, runas Jesuspa yachachisqasninman tukunankupaj (Rom. 1:14, 15; 2 Tim. 4:2). Chantapis Pabloqa ñakʼarichisqa kashaspa mayta aguantarqa, sumaj willaykunata may valorniyojpaj qhawasqanrayku (1 Tes. 2:2). Imaynatachus Pablo jina ruwananchejta qhawarina. Pabloqa Diospa Gobiernonmanta willayta, may valorniyojpaj qhawasqanrayku mayllapipis kashaspa runasman willarqa. Ñaupa cristianos jina noqanchejpis wasimanta wasi chayri mayllapipis willanchejpuni (Hech. 5:42; 20:20). Tukuy imaymanamanta Diosmanta willamunallapuni. Atejtinchejqa precursores auxiliares jina chayri regulares jina llankʼana, waj parlaytapis yachakuna. Chayri suyunchej ukhupi waj lugarman willaj rina, manachayri waj suyuman (Hech. 16:9, 10). w17.06 págs. 10, 11 párrs. 8, 9

Kay mundopi sajra ruwaykuna kananpaj organizaciones juchayoj kanku, manataj sapa uj runachu. Llulla religionesqa ashkha runasta chʼaukiyanku. Mana yachachinkuchu Jehová imayna Dioschus kasqanta. Nillataj yachachinkuchu Biblia atienekunapaj jina kasqanta, Jallpʼanchej uj kʼachitu paraisoman tukunanta, kasukoj runas paraisopi wiñaypaj tiyakunankuta ima. Gobiernostaj guerras, chejninakuy ima kananpaj juchayoj kanku, wajchastapis ñakʼarichinku. Chay gobiernosqa aswan qhapajman, atiyniyojman ima tukunku, wakin runasllata allinpaj qhawasqankurayku, llukʼichikusqankurayku ima. Diospa Palabranqa niwanchej kay mundomanta gobiernos, kay mundopi kaj organizacionespis, maypichus karqanku chaymanta kuyuchisqa kanankuta. Chayta nispaqa nishan tukuchisqa kanankuta. Chantapis Diospa Gobiernonman tukuy churanakojkuna chinkachisqallataj kanqanku (Jer. 25:31-33). w17.04 pág. 11 párrs. 7, 8

Jehová “sonqosta allinta qhawasqa[nrayku]”, Achabmanta khuyakorqa (1 Cró. 29:17). Achab wañojtinraj, familian castigasqa kanan karqa. Chayta Nabotpa familian, amigosnin ima yachajtinku, creeyninku pruebamanchá churakorqa. Chaywanpis llampʼu sonqo kajtillanku, sinchʼi creeyniyoj kankuman karqa. Llampʼu sonqo kajtinkoqa Jehová Diosta yupaychallankumanpuni karqa, atienekuspa Dios cheqan kajtapuni ruwananpi (Deu. 32:3, 4). Jehová Diosqa paraisopi, justiciata Nabotpaj ruwanqa, payta, familiaresninta ima watejmanta kausarichimuspa (Job 14:14, 15; Juan 5:28, 29). Llampʼu sonqoyoj runaqa yachan, Jehová Dios “tukuy ima ruwasqasninchejmanta cuentata” mañanawanchejta, “pakasqa kajmanta, sutʼipi kajmanta, allin kajmanta, mana allin kajmantapis” (Ecl. 12:14). Jehová Diosqa juzgashaspa imatachus mana yachanchejchu chayta sumajta yachan. Llampʼu sonqo kayqa, Jehová Diospi creenallapajpuni yanapawanchej. w17.04 págs. 24, 25 párrs. 8, 9

Sajra mundopi kausakusqanchejrayku, ashkha hermanos ayqekunanku karqa waj lugaresman. Ichá ayqekojkunaqa chayman mana yachaykukuyta atillankumanchu. Imajtinchus ujllapi yachakunanku kanqa waj parlayta, waj costumbresta, chantá mosoj leyesta, imaynatachus impuestosta pagaymanta, facturasmanta, escuelaman wawasta churanamanta, imaynatachus wawasta uywanamanta ima. Chayrayku, ajinapi rikukoj hermanosta pacienciawan, kʼachamantataj yanapana (Fili. 2:3, 4). Wakin kuti autoridadesqa ayqekoj hermanosta mana saqenkuchu suyunkupi kaj hermanoswan tinkukunankuta. Wakin organizacionesqa ayqekoj hermanosta ninku niña yanapanankuta chayri suyunkumanta wijchʼunankuta. Imajtinchus llankʼayta qoyta munasqankuta mana japʼikunkuchu tantakuykunaman mana rejta saqesqanrayku. Wakin hermanosqa ni pí yanapananta yuyaspa, chay llankʼayta japʼikorqanku. Chayrayku usqhayllata yanapananchej tiyan suyunchejman chamoj hermanosta. Paykunata khuyakusunchej, yanapasunchejtaj chayqa creeyninkuta kallpachasun (Pro. 12:25). w17.05 pág. 5 párrs. 9, 10

Jesús kay mundoj imasninpa tukukuyninmanta parlashaspa, nerqa: “Ashkhaspa munakuyninku chiriyaponqa”, nispa (Mat. 24:3). Kay palabrasqa ñaupajta, judiospi juntʼakorqa. Imaraykuchus paykunaqa Diospa llajtanmanta kasqankuta nejtinkupis, Diosta munakusqanku chiriyapunanta saqerqanku. Jinapis chay tiempomanta ashkha cristianosqa “Cristo Jesusmanta sumaj willaykunata yachachisharqanku, willasharqankutaj”. Chantá Jehová Diosta, hermanosta, mana cristiano kajkunatapis munakoj kanku (Hech. 2:44-47; 5:42). Jinapis wakin cristianospa munakuyninku chiriyaporqa. Jesucristoqa Éfeso llajtamanta cristianosman nerqa: “Kayta contraykipi nini: Qanqa manaña ñaupajta jinachu Diosta munakunki”, nispa (Apo. 2:4). Efesomanta cristianosqa chay tiempomanta runas jinallataj aychaj sajra munaynillanta maskʼayman qokusharqanku (Efe. 2:2, 3). w17.05 págs. 17, 18 párrs. 1-3

Jefteqa juez, wapu maqanakoj runa ima karqa. Anataj kʼumuykukoj sonqoyoj warmi karqa, wasipi ruwanasnintapis sumajta juntʼaj. Jefté, Ana ima Jehovata yupaycharqanku. Chantapis Jehovaman imatachus qonankuta nerqanku, nisqankutataj juntʼarqanku. Paykunamantataj mayta yachakusunman, imaraykuchus noqanchejpis imatachus ruwananchejta Jehovaman ninchej. Biblia nisqanman jinaqa, Diosman niyta atinchej imatachus ruwananchejta, uj regalota qonanchejta, Paypaj astawan llankʼananchejta chayri wakin imasta manaña ruwananchejta. Imatachus ruwananchejta Jehovaman nisqanchejtaqa mana tanqasqa jinachu juntʼananchej tiyan. Jehovaman uj imata ruwananchejta ninchej chayqa, yuyarikunanchej tiyan Paypaj chay nisqanchejqa mana pujllakuy jinallachu kasqanta, suyantaj juntʼananchejtapuni. Diospajqa imatachus ruwananchejta payman nisqanchejqa uj juramento jina. Uj juramentonejta uj runaqa imatachus ruwananta chayri mana ruwananta nin (Gén. 14:22, 23; Heb. 6:16, 17). w17.04 págs. 3, 4 párrs. 1, 2