Febrero

Uj pacha Jehová Diosqa, Noeta kamacherqa uj arcata ruwananta. Noetaj mana yacharqachu imaynatachus ruwananta. Chayrayku Noeqa Jehová Diospi atienekuspa, nisqanman jinapuni arcata ruwarqa. Noé, Jehová Diosta kasukuspa arcata ruwasqanrayku, paywan familianwanqa Jatun Parapi salvakorqanku. Chantapis Noeqa, sumaj tata karqa Jehová Diospa kamachisqasninta kasukusqanrayku. Payqa wawasninman Diosmanta sumajta yachacherqa, chay tiempomanta runas millay sajra imasta ruwajtinkupis. Wawasninrí paymanta yachakorqanku Diosta ñaupajman churayta (Gén. 6:5). Noqanchejpis Noé jina Diosta kasukuna, nisqanman jinapuni wawasninchejta uywaspa. Chaypajqa Bibliaman jina, publicacionespi yuyaychakusqanman jinataj wawasninchejta yachachina. Chaywanpis wakin wawasqa, tatasninku Diosmanta yachachejtinkupis, Jehová Diosmanta karunchakunku. Ajina kajtinpis, wawasninchejpa sonqonman Diospa Palabranta churanapaj kallpachakojtinchejqa, karunchakojtinkupis sonqonchej mana juchachawasunchu. Astawanpis wawasninchej Diospa llajtanman kutinpunankuta suyakusun. w18.03 pág. 30 párrs. 10, 11

Ichapis hermanosta wasinchejman wajyarikuyta mana aterqanchejchu manchachikusqanchejrayku chayri imamantachus parlanata mana yachasqanchejrayku. Manachayri ichá pʼenqakorqanchej wajcha kasqanchejrayku mana tukuy imata qoyta atinanchejmanta. Chaywanpis mana chay imasmanta pʼenqakunanchejchu tiyan. Hermanosninchejtaqa wajyarikusunman mana sumaj wasiyoj kaspapis. Imajtinchus wasinchejta llimphituta, kʼuchunchasqatataj japʼejtinchej, visitasninchejqa mana pʼenqakonqankuchu. May allinpuni wajkunaj allinninta maskʼayqa (Fili. 2:4). Wakin hermanosqa, experienciasninkumanta parlarispa mayta kallpachanakunku. Noqanchejpis hermanosta wasinchejman wajyarikuspa, experienciasninkuta willarinawanchejta nisunman. Uj ancianopis jinata nin: “Congregacionniymanta hermanosta wasiyman wajyarikunipuni. Imaynatachus Jehová Diosta rejsisqankuta yachaspataj, paykunata aswan sumajta entiendeni, astawantaj rejsini”, nispa. Invitadosninchejwan kʼachas kaspaqa, paykunata kusichisunchej, noqanchejpis kusisqas kasunchej. w18.03 pág. 17 párrs. 15-17

Ashkha cristiano tatasqa wawasninkuta sumajta yanapayta munanku bautizakunankupaj. Imajtinchus yachanku bautizakunankupaj mana yanapajtinku, wawanku Jehová Diosmanta karunchakunanta (Sant. 4:17). Arí, sumaj yuyayniyoj tatasqa, wawasninkuta yanapankupuni niraj bautizakushajtinku sumaj wakichisqa cristianos kanankupaj. Congregacionesta waturej hermanosqa, reparasqanku ashkha Testigospa wawasninku mana bautizasqaschu kasqankuta. Chay jovenesqa 16 watayojmanta 23 watayojkama jina kanku. Paykunaqa tantakuykunaman rinku, predicamunku, Jehovaj testigosnin kasqankutataj yuyakunku. Ichá wakin kutispitaj, jovenesqa mana bautizakunkuchu, tatasninku wawallaraj kasqankuta nisqankurayku chayri waj imasrayku. w18.03 págs. 8, 9 párrs. 1, 2

Cristo jina yuyanapajqa, yachananchej tiyan imatachus pay yuyasqanta, ruwasqanta ima. Jesusqa kausayninpi, Jehová Diosta sirviyta aswan ñaupajman churarqa. Chayrayku Jesús jina yuyanapaj kallpachakunallapuni tiyan, ajinamantataj Jehová Diosman astawan qayllaykusunchej. Jesusqa milagrosta ruwarqa, ashkha runasman yachacherqa, runasmanta khuyakorqa, Diospa munasqanman jinapunitaj kausakorqa. Yachachisqasnintaj chayta rikorqanku (Hech. 10:39). Kay tiempopeqa Jesusta mana rikuspapis, payta rejsiyta atisunman Mateo, Marcos, Lucas, Juan librosta leespa. Chay librosta sumajta leerispa, chaypi tʼukurispataj, Jesús jina yuyayta qallarisunchej. ‘Ajinamantataj purisqanta sumajta qhatisunchej’ (1 Ped. 2:21; 4:1). w18.02 pág. 22 párrs. 15, 16

Adanwan Evawan wawasniyoj kasqankumantapacha, runasqa Jehová Diosmanta yachakorqanku ruwasqasninta qhawarispa, Diospa kamachisninta uyarispa, Diospa kamachiykunasnin allinninkupaj kasqanta reparaspa ima (Isa. 48:18). Noemanta parlarina. Ichapis payqa Jehová Diospa ruwasqasninta qhawarispa, Dios kasqantapuni yachakorqa. Ajinamantataj ichapis repararqa Jehová Diosqa may kʼacha kasqanta. Chayta reparaspa ichapis Noeqa, Jehová Dios may atiyniyoj kasqanta entienderqa, payllataj cheqa Dios kasqanta (Rom. 1:20). Chayrayku Noeqa, creeypi sumaj sayasqa karqa. Kayqa reparachiwanchej, wajkuna imallatapis willariwajtinchej creeyniyoj kanapaj yanapawasqanchejta. Chanta, ¿pitaj Noeman Jehová Diosmanta willarerqa? Paymanqa ichapis familiaresnin willarerqanku. Ichapis tatan Lamec Diosmanta willarinman karqa. Lamecqa Adán kausashajtillanraj nacekorqa, Diospitaj creerqa. Waj familiaresnintaj karqanku aweliton Matusalén, awelitonpa aweliton Jared ima. Jaredqa Noé 366 watasniyoj kashajtin wañuporqa (Luc. 3:36, 37). Yachakusqanqa sonqonman chayarqa, chaytaj Jehová Diosta sirvinanpajpuni Noeta yanaparqa (Gén. 6:9). w18.02 pág. 9 párrs. 4, 5

Sonqonchej mayta nanawasunman pi hermanollapis chayri familianchejmanta pillapis ñakʼarichiwajtinchej. Chaytataj ichá ni qonqapuyta atillasunmanchu. Chayrayku allin kanman piensarinanchej, Bibliaj nisqanman jina chay hermanowan allinyakuyta maskʼasqanchejtachus chayri manachus. Imajtinchus mana allinyakuyta maskʼaspaqa, mana atillasunchu aswan qhepaman hermanonchejwan allinyakuyta. Chay hermanowantaj ichá phiñasqallapuni kasunman. ¿Imatataj paywan allinyakunapaj ruwasunman? Diospa yanapayninta mañakusunman, chay hermanowan kʼachamanta parlarinapaj. Yuyarikunataj chay hermanopis Diospa kamachillantaj kasqanta. Diostaj payta munakusqanta (Sal. 25:14). Munantaj noqanchejpis hermanosninchejwan kʼachas kananchejta (Pro. 15:23; Mat. 7:12; Col. 4:6). Chantá chay hermanowan parlarinapajqa, sumajtaraj umachakuna. Amataj yuyanachu pay sonqonchejta nanachiytapuni munawasqanchejta. Chay hermanowan allinyakunapaj kallpachakuspaqa, Diosta kusichinchej. Imajtinchus payqa, chay hermanotapis munakullantaj. w18.01 págs. 10, 11 párrs. 15, 16

Diospa kamachisnenqa, mana kay mundomanta runas jinachu kanchej, tukuy sonqo runasta munakusqanchejrayku. Jesustaj nerqa Moisespa Leyninmanta aswan kuraj kamacheyqa, Diosta munakuy kasqanta, qhepantaj runa masinchejta munakuy (Mat. 22:38, 39). Nillarqataj: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35). Jesuspa yachachisqasnenqa enemigosninkutapis munakunanku karqa (Mat. 5:43, 44). Jesusqa runasta tukuy sonqo munakusqanta rikucherqa. Chayrayku sumaj willaykunata llajtamanta llajta willarqa. Payqa ciegosta qhawaricherqa, suchusta puriricherqa, lepra onqoyniyojkunata sanoyacherqa, lojtʼusta chayri joqʼarasta uyaricherqa, wañusqastapis kausaricherqa (Luc. 7:22). Chantapis tukuy runasrayku kausayninta qorqa. Arí, Tatan jinapuni runasta munakoj. Kunanpis mundontinmanta Jehovaj testigosnenqa, Jesús jina runasta munakunchej. w18.01 págs. 29, 30 párrs. 11, 12

Jovenllaraj kashaspa bautizakuyta atiwaj. Jinapis mana yachasunmanchu, ima llakiykunapichus aswan qhepaman rikukunanchejta. Chayrayku jóvenes, imapi rikukuspapis Diosta mana wasanchanaykichejpajqa, yuyarikunaykichejpuni tiyan, imatachus Jehová Diosman nisqaykichejta. Qankunaqa payman nerqankichej, imapi rikukuspapis payllata sirvinaykichejta, familiaresniykichej chayri amigosniykichej paymanta karunchakojtinkupis (Sal. 27:10). Ima llakiypi rikukuspapis, Jehová Diospa yanapanta mañakuychej, payman imatachus nisqaykichejta juntʼanaykichejpaj (Fili. 4:11, 12). Jóvenes, Jehová Diosqa munan payman qayllaykunaykichejta. Payman astawan qayllaykunaykichejpajtaj, kallpachakunaykichej tiyan. Ajinamanta salvakunaykichejpaj. Chayrayku Biblia nin: ‘Kasukullaychejpuni manchachikuywan, kharkatiywantaj. Ajinamanta salvacionta tarinaykichejpaj’, nispa (Fili. 2:12). Kay versiculoqa sutʼita nin, Diospa qayllallanpipuni kanaykichejpajqa, payta kasukunaykichejpuni kasqanta, ima llakiypi rikukojtiykichejpis. Amataj qankunallapi atienekuychejchu. Yuyarikuychej imaynatachus unay tiempomanta wakin Diospa kamachisnin, paykunallapi atienekusqankurayku, Diosmanta karunchakusqankuta. w17.12 pág. 24 párrs. 4, 6, 7

Jehová Diosqa, munan kapuyninchejwan yanapakunanchejta, jallpʼantinpi predicakunallanpajpuni. Diostaj niwanchej kapuyninchejwan yanapakojtinchej bendecinawanchejta (Mal. 3:10). Nillawanchejtaj mana michʼakuspa yanapakojtinchej, tukuy imapi allin rinawanchejta (Pro. 11:24, 25). Chantapis nillawanchejtaj may kusisqas kananchejta, imaraykuchus “aswan kusiy wajman qoriy, qorichikunamanta nisqaqa” (Hech. 20:35). Noqanchejqa wawasninchejman, kunallanraj bautizakojkunaman ima, parlasqanchejwan ruwasqanchejwantaj yachachisunman kapuyninchejwan yanapakuyta. Ajinamanta paykunaqa may kusisqa kanqanku, ashkha bendicionestataj japʼenqanku. Tukuy ima kapuwasqanchejqa Jehová Diospata. Tukuy imanchejwan Diospa llajtanta yanapakuspataj, rikuchinchej Diosta munakusqanchejta, agradecekusqanchejtataj tukuy imata noqanchejrayku ruwasqanmanta. Israelitas Diospa templon ruwakunanpaj kapuyninkumanta qoshajtinku, mayta ‘kusikorqanku, Diosman tukuy sonqosninkuwan qosqankurayku’ (1 Cró. 29:9). Jehová Diospa llajtanta kapuyninchejwan yanapakunallapuni, ajinamanta may kusisqa, sonqo juntʼasqataj kasunchej. w18.01 pág. 21 párrs. 18, 19

Ajllasqa cristianosqa, Cristoj kutimunan tiempopi wañuymanta kausarichisqa kayta qallarerqanku, cielopi tiyakunankupaj. Chantá jatun ñakʼariy tiempopi kausashaj kaj ajllasqa cristianosqa, “phuyuspi oqharisqa” kanqanku (1 Tes. 4:13-17; Mat. 24:31). Manaqa wañusqankutawan ‘ujllata, uj ñawi chʼirmiypi uj jinaman tukuchisqa kanqanku, qhepa kaj corneta waqashajtin’ (1 Cor. 15:51, 52). Mana tukuy cristianoschu ajllasqa kanku Jesucristowan cielomantapacha gobernamunankupaj. Wakenqa suyakushanchej ‘Jehová Diospa pʼunchaynin’ chayamunallantaña, sajra runas chinkachisqa kanankupaj. Jinapis ni pi yachanchejchu ima diachus chay kananta. Chaywanpis Biblia nisqanman jina, chay diaqa tumpitamantawan chayamonqa (1 Tes. 5:1-3). Chay día pasajtintaj, Jehová Diosqa wañusqasta kausarichimonqa paraisopi tiyakunankupaj. Chaypitaj mana juchayoj runaman tukuspa, wiñaypaj tiyakuyta atenqanku. w17.12 págs. 11, 12 párrs. 15, 18, 19

Hermanosta tukuy sonqo munakusunchej, khuyakusunchejtaj chayqa, mana envidianakusunchu. Diospa Palabran nin: “Munakuyniyoj runaqa pacienciayoj, kʼachataj. Munakuyniyoj runaqa mana envidiakunchu”, nispa (1 Cor. 13:4). Sonqonchejpi envidiakuy mana saphichakunanpajqa, Jehová Dios jina hermanosta munakunanchej tiyan. Imaraykuchus congregacionmanta hermanosninchejwanqa, uj cuerpo jinalla kanchej. Bibliataj niwanchej: “Sitajchus ujnin allinpaj qhawasqa chayqa, tukuyninku chay ujwan khuska kusikunku”, nispa (1 Cor. 12:16-18, 26). Mayqen hermanollapis Diospa llajtanpi astawan ruwanasta japʼejtenqa, ama envidiakunachu. Astawanqa paywan kusikuna. Rey Saulpa wawan Jonatán jina ruwanapajtaj kallpachakuna. Jonatanqa mana envidiakorqachu, cuentanmanta David rey jina churasqa kananta nejtinku. Astawanqa Davidta kallpacharqa, yanaparqataj munakusqanrayku (1 Sam. 23:16-18). w17.11 págs. 27, 28 párrs. 10, 11

Jehová Diosqa, Moisespa Leyninta Bibliapi kananta saqerqa. Imaraykuchus Diosqa, munan chay Leyta sumajta entiendenanchejta (Mat. 23:23). Moisespa Leyninmanta yachakoyqa, yanapawanchej reparanapaj ‘imachus yachay, cheqa kajpis kasqanta’. Yanapallawanchejtaj imaynachus Jehová Diosninchej kasqanta yachanapaj, jinallataj imatachus noqanchejpaj munasqantapis (Rom. 2:20). Ancianostaj imaynatachus pakakuna llajtaspi juzgakusqanmanta, yachakunkuman juchallikojta cheqan kajman jina juzgayta. Chantapis tukuyninchej yachakusunman, imaynatachus runasmanta khuyakunata, allin kʼachastaj kanata (Zac. 7:8, 9). Manaña Moisespa Leyninta juntʼanachu tiyan. Jinapis Jehová Diosqa, maychus kajman jinallapuni ruwananchejta munan, tukuymanta khuyakunanchejtapis. Arí, Diosninchej jina ruwasunchej chayqa, paypi pakakusunchej, paytaj jarkʼawasunchej. w17.11 págs. 13, 14, 17 párrs. 2, 3, 18, 19

Plataformamanta discursota qoshaspa Bibliata leereyqa, may sumajpuni (Juan 7:16). Ichapis discursota qoshaspaqa uj experienciamanta parlarisunman chayri kikincharisunman. Jinapis Bibliawanpuni yachachinanchej tiyan. Bibliata leeytaj, mana kikinchu Bibliamanta yachachiywan. Uj discursopi Bibliamanta ashkha versiculosta leejtinchejqa, runasqa mana japʼeqanqankuchu. Chayrayku sumajta ajllananchej tiyan ima versiculostachus leenanchejta. Chantá piensarina imaynatachus chay versiculota sutʼincharinapi, imawantajchus kikincharinapi. Piensarillasunmantaj imaynatachus chay versículos runasta yanaparinanpi (Neh. 8:8). Chay discurso imamantachus parlasqanta, imaraykuchus chaypi versículos kashasqanta sumajta entiendenanchej tiyan. Astawanqa Jehovaj yanapayninta mañakuna, Bibliaj nisqanta sumajta sutʼinchanapaj (Esd. 7:10). w17.09 págs. 26, 27 párrs. 11, 12

Israelitasqa Babiloniapi 70 watastapuni esclavos jina karqanku. Kay 537 watapitaj Jesús niraj jamushajtin, israelitasqa Babiloniamanta kacharichisqas karqanku. Chayrayku paykunaqa may kusisqas kasharqanku. Chantá sonqonku mayta kʼajarisharqa, Jerusalenman kutispa Diospa templonta ruwanankupaj, Diostataj yupaychanankupaj. Kay 536 watapitaj, Diospa templonta ruwayta qallarerqanku. Templota ruwayta qallarisqankumantapachataj 16 watas pasajtinñapis, israelitasqa nipuni tukuchasqankuchu. Israelitasqa Jehová Dios paykunapaj, imatachus ruwasqanta qonqapusqanku. Kay 520 watapitaj, Jehová Diosqa Zacariasnejta israelitasta yuyaricherqa, templonta ruwanankupaj Babiloniamanta kacharichisqas kasqankuta. Chayraykuchá Zacariaspa sutenqa “Jehová yuyarikusqa”, niyta munan (Zac. 1:3, 4). Zacariasqa israelitasman nerqa, templota ruwajtinku Jehová Dios yanapananta. Chantá nillarqataj Jehová Dios allin ñawiwan paykunata qhawananta, tukuy sonqo yupaychajtinku. w17.10 págs. 21, 22 párrs. 2, 3

Wakin doctores nisqankuman jina, khuyakoj runasqa, mana anchata onqonkuchu, wajkunawantaj sumajta apanakunku. Ñakʼariypi kajkunata yanapaspaqa aswan kusisqa kanchej, mana sapayakunchejchu, nitaj wajkunamanta sajrata yuyanchejchu. Runasmanta khuyakoyqa allinninchejpajpuni. Wajkunata munakusqanchejrayku yanapaspaqa, sonqo juntʼasqa kanchej. Imaraykuchus Diospa munayninta ruwanchej. Chantapis runasmanta khuyakoyqa yanapawanchej sumaj tatas, sumaj qosa chayri sumaj warmi kanapaj, wajkunawan amigos kanapajpis. Astawanpis wajkunamanta sonqomantapacha khuyakojtinchejqa, khuyasqallataj kasunchej (Mat. 5:7; Luc. 6:38). Runasmanta khuyakunchej Jehová Diosta jatunchayta, pay jinataj ruwayta munasqanchejrayku. Nitaj allinninchejta maskʼasqanchejraykullachu. Imaraykuchus yachanchej Jehová Dioslla jatun munakuyniyoj, khuyakuyniyoj ima kasqanta (Pro. 14:31). w17.09 pág. 12 párrs. 16, 17

Jehová Diosqa unaymantaña nerqa, Jesús “Templonta jatarichinanta”. Chaytataj Jesús ruwarqa 1919 watapi, Diospa llajtanta llulla religionpa yachachiykunasninmanta kacharichispa. Jesusqa chay watapaj Rey jina, Kuraj kaj Sacerdote jinataj churasqaña karqa. Chantapis Jesusqa 1919 watallapitaj, “allin kamachi” yuyayniyojta churarqa, Diospa llajtanta ñaupajman apananpaj. Allin kamachi yuyayniyojqa, uj qotu ajllasqa cristianos kanku. Pikunachus Diospa llajtanta ñaupajman apashanku, jallpʼantinpi predicakunanpaj (Mat. 24:45). Chantapis Jesusqa, Diospa llajtanta ‘sumajta llimphuchashan’, Jehová Diosta chʼuwa sonqowan yupaychanankupaj (Mal. 3:1-3). Jesuswanqa, 144.000 ajllasqa cristianos waranqa watasta gobernanqanku. Chay ajllasqa cristianosqa reyestaj, sacerdotestaj kanqanku. Gobernashajtinkutaj runasta yanapanqanku, cheqan runasman tukunankupaj. Chay waranqa watas tukukojtintaj, Jehová Diosta yupaychajkunalla kay jallpʼapi tiyakonqanku. w17.10 pág. 29 párrs. 15, 16

Mana yuyasqallamanta runata wañuchejqa, khuyasqa kananpaj usqhayllata pakakuna llajtaman ayqekunan karqa (Jos. 20:4). Chay llajtapitaj qhepakunan karqa, kuraj kaj sacerdote wañupunankama. Chayrayku mana yuyasqallamanta runata wañuchejqa, trabajonta, wasinta ima saqepunan karqa. Manañataj viajaytapis aterqachu. Mana yuyasqallamanta runata wañuchej, pakakuna llajtamanta llojsipojtenqa, runata wañuchisqanmanta “ima dakuwan” nishanmanpis jina karqa. Kay tiempopipis juchapi urmaj hermanoqa, Jehová Diospa khuyakuyninpi kananpajqa manaña sajra imasta ruwananchu tiyan. Nitaj juchapi urmananpaj jina imastapis ruwananñachu tiyan. Ajinamantataj Diosqa khuyakonqa. Manaña juchallikunapaj tukuy sonqo kallpachakusunchej chayqa, Diosman rikuchisun pesachikusqanchejta (2 Cor. 7:10, 11). w17.11 págs. 10, 11 párrs. 10, 11

Jehová Diosqa munan hermanosninchejta wasinchejman wajyarikunanchejta, qorikunanchejtapis (1 Juan 3:17). Hermanostaqa tukuy sonqo wajyarikunanchej tiyan. Chantapis sumajta qhawarikunanchej kanman, pikunallatachus wasinchejman wajyarikusqanchejta. Ichapis amigosnillanchejta chayrí rejsisqa hermanosllata wajyarikushanchej. Jinapis Biblia nisqanman jina, aswan allin kanman mana rejsisqanchej hermanosta chayri wajchasta wasinchejman wajyarikunanchej. Chantá pi hermanollatapis wajyarikuspaqa, ama suyanachu aynita jina kutichipunawanchejta (Luc. 14:12-14). Ichapis noqanchejqa uj hermanota wasinchejman wajyarikorqanchej llakiypi kashajtin. Paytaj ichá mana agradecekuwarqanchejchu. Ajinapi rikukorqanchej chayqa, kay diapaj ajllasqa texto nisqanman jina ruwanallapuni. Hermanosninchejta tukuy sonqo wajyarikojtinchej, aswan kusisqa kasunchej (Hech. 20:35). w17.10 págs. 9, 10 párr. 12

Joseqa kʼacha wayna, alajitutaj karqa. Chayraykutaj Potifarpa warmenqa Joseta munapayaspa, kutin kutita nej: “Jamuy, noqawan puñuykunki”, nispa. Joseqa sumajtachá piensarerqa, Potifarpa warminwan puñuykojtin, imaspichus tarikunanta. Chaymantataj ayqerikaporqa. Josemanta yachakunchej, pillapis ima juchapipis urmachiyta munawajtinchej, chaymanta ayqena kasqanta (Pro. 1:10). Wakinkunaqa manaraj Jehovaj testigon kashaspa, anchatapuni mikhoj kanku, tomajtaj kanku, chantá cigarrota pitaj kanku, drogakoj kanku, khuchichakojtaj kanku. Jehovaj testigonña kaspataj, ichapis wakin kutis chay juchaspi urmanankupaj tanqasqa kankuman. Ajinapi rikukusunman chayqa, allin kanman piensarinanchej, chay juchapi urmajtinchej Jehovaj sonqonta mayta nanachinanchejpi. Chantapis ichá tʼukurisunman ima juchapichus urmananchejpaj jina kashasqanchejpi, chay juchapi mana urmanapajtaj imastachus ruwananchejpipis (Sal. 26:4, 5; Pro. 22:3). Maykʼajllapis ima juchaman urmanapaj jina kashajtinchejqa, Jehová Diosmanta yachayta, yanapanta ima mañakuna, sajra munayninchejwan mana atipachikunapaj. w17.09 págs. 4, 5 párrs. 8, 9

Jehovawan amigosllapuni kanapaj, ama qhapajyayta munaspa negocioswan musphaykachanachu. Astawanqa tukuy atisqanchejta ruwana, Diospa ñaupaqenpi aswan valorniyoj imasta tarinapaj. Chaytataj Abrahán ruwarqa, payqa unay tiempopi Diospa kamachin karqa. Jehová Diospa amigon kayta munasqanraykutaj, payta kasukuspa qhapaj Ur llajtamanta llojsiporqa, toldospi tiyakunanpaj (Heb. 11:8-10). Abrahanqa Jehovapi astawan atienekorqa, manataj kapuyninpichu (Gén. 14:22, 23). Tiemponmantaj Jesusqa uj qhapaj jovenman, Abrahán jina Diospi atienekunanpaj kayta nerqa: “Sichus Diosta allintapuni yupaychayta munanki chayqa, tukuy kapuyniykita vendemuspa, wajchasman chay qolqeta qopuy. Ajinamanta cielopi may kapuyniyoj kanki, chantá qhepayta jamuy”, nispa (Mat. 19:21). Chay jovenqa mana Abrahán jinachu Diospi atienekorqa. Jinapis wakin runasqa Jehová Diospi tukuy sonqo atienekorqanku. w17.07 pág. 10 párr. 12

Abrahán Éufrates mayuta chimpasqanmanta 430 watas pasarqa, miraynin uj nación jina chay Sumaj Jallpʼata japʼikapunankupaj (Éxo. 12:40-42; Gál. 3:17). Abrahanqa mana rikorqachu Jehová Diospa tukuy nisqasninta juntʼakojta. Jinapis creesqanrayku, kusiywan, pacienciawantaj suyakorqa (Heb. 11:8-12). Abrahanqa paraisopi kausarimojtin, maytapunichá kusikonqa, kausayninmanta, mirayninmantawan Diospa Palabranpi leerejtin. Chantapis maytachá kusikullanqataj, mirayninmanta Diospa Wawan jamusqanta yachaspa. Reparanqataj may chhika unayta pacienciawan suyakusqan mana qhasipajchu kasqanta. w17.08 págs. 5, 6 párrs. 10, 11

Griego parlaypi millay imas palabraqa khuchichakuymanta, tukuy laya millay imasmantawan parlanapaj oqharikun. ¿Imastaj chay millay imas kanman? Chaykuna kankuman, cigarrota pitay, millay imasta parlay ima (2 Cor. 7:1; Efe. 5:3, 4). Chantapis kallanmantaj pakayllapi qʼala runasmanta fotosta chayri videosta qhaway, khuchichakuy cuentosta leey ima. Chay millay ruwaykunaqa, sajwakunapaj chayri masturbakunapaj tanqawasunman. Qʼala runasmanta fotosta chayri videosta qhawaj runaqa, ‘qʼoñirisqa kaspa’ pillawanpis puñuykunanmanta wañurisqa kanman. Wakin doctores nisqankuman jina, imaynatachus drogakojkuna chayri alcoholman qokojkuna mana vicionkuta saqeyta atillankuchu, ajinallatataj qʼala runasmanta fotosta chayri videosta qhawajkunaqa mana vicionkuta saqeyta atillankuchu. Chay viciopi urmajkunaqa, pisipaj qhawakunku, mana allinta llankʼayta atillankuchu, familiankupipis mana kusisqachu kanku, wakintaj divorciakunku, wakintajrí wañuchikunku. w17.08 pág. 19 párrs. 8, 9

Kay 147 Salmota qhelqajqa, Israelitas Jerusalenman kutipushasqankupi tʼukurispa, nerqa kunan diapaj texto nin jina. Chay salmota qhelqajqa mayta kusikorqa, Jehová kamachisninta jarkʼananpaj Jerusalenpa punkusninta sinchʼiyachisqanmanta. Ichapis wakin kuteqa chʼampaypi kaspa mayta llakikusunman. Jinapis Jehovaqa chay chʼampayta atipanapaj yachayta qowasunchej. Kay 147 Salmota qhelqajqa Jehovamanta nerqa: “Payqa kamachisqanta kay jallpʼaman apachimun; palabranqa usqhayta corren. Payqa ritʼita tʼakamun millmata jina, escarchastapis ushphata jina qhallimun. Chhullunkata granizota jina apachimun. Chirichimusqampi pitaj kakuyta atillanmanri? Pay kamachejtin, chhullunkas unuyanku”, nispa (Sal. 147:15-18). Diosqa may atiyniyoj kasqanrayku ritʼichimuyta, granizachimuytapis atin. Chayrayku ima chʼampaytapis atipanapaj yanapawasunman. w17.07 pág. 20 párrs. 14, 15

Manapuni iskayrayananchejchu tiyan, Jehovalla tukuyta kamachinanpaj derechoyoj kasqanmanta, kamachiynintaj may allinpuni kasqanmanta. Nillataj iskayrayananchejchu tiyan Payllata kasukuna kasqanmanta. Chaykunamanta mana iskayrayanapajtaj Biblia yanapawanchej. Jehovaqa tukuy imata ruwarqa, chayrayku paylla angelesta, runastapis kamachinanpaj derechoyoj. Jehová Dioslla tukuy imata ruwarqa, manataj Kuraj Supaychu. Chayrayku Kuraj Supayqa mana derechoyojchu kamachinanpaj. Kuraj Supaywan ñaupa tatasninchejwan Jehová Diospa contranta oqharikushajtinku, may kasqankuta yuyakorqanku (Jer. 10:23). Paykunaqa Jehová Diosta kasukunankutachus manachus ajllayta atinkuman karqa, jinapis contranpi oqharikunankupaj mana derechoyojchu karqanku. Noqanchejpis allin kajta ruwayta, mana allin kajtapis ajllayta atinchej, jinapis mana derechoyojchu kanchej Jehovaj contranpi oqharikunapaj. Jehovaj kamachiyninman churanakuyta ajllasunman chayqa, nipuni allinchu kanman. Imaraykuchus runasqa necesitanchejpuni Jehová kamachinawanchejta. w17.06 págs. 27, 28 párrs. 2-4

Diosmanta willayta valorniyojpaj qhawanchej chayqa, qhatiykachasqa kajtinchejpis Pablo jina willamullasunpuni (Hech. 14:19-22). Estados Unidospi 1930 watamanta 1940 watakama, hermanosninchej qhatiykachasqa karqanku. Jinapis apóstol Pablo jina, sinchʼita sayaspa willamullarqankupuni. Derechosninkuta valechinankupajtaj ashkha kutispi juecespaman chayarqanku. Nathan Knorr hermanoqa 1943 watapi, Tribunal Supremo de Estados Unidos nisqapi, juiciopi atipasqankumanta nerqa: “Hermanosníy mana saqespa willamusqanchejrayku, Tribunal Supremo nisqakama chayarqanchej, chay juiciopitaj atiparqanchej. [...] Chaytaj Diospa llajtan sinchʼita sayasqanrayku karqa”, nispa. Arí, sonqo kʼajaywan Diosmanta willasqanchejrayku, mana willayninchejta sayachiyta atinkuchu. Diospa Gobiernonmanta willayta valorniyoj perlata jina qhawasunchej chayqa, mana horasta ruwananchejraykullachu predicaj llojsisun. Astawanqa sonqo kʼajaywan “sumaj willaykunata allinta” sutʼinchasunchej (2 Tim. 4:5). w17.06 págs. 11, 12 párrs. 11, 12

Diosta mayta munakoyqa yanapawanchej kamachisqasninta kasukunapaj, sajra kajta chejninapaj, ima llakiyta aguantanapajpis (Sal. 97:10). Jinapis Kuraj Supay, sajra mundon ima tukuy imata ruwashanku Diosta manaña munakunapaj. Kay mundomanta runasqa Diosta munakunankumantaqa, ‘paykunallata munakunku’ (2 Tim. 3:2). Runasqa kaykunallata maskʼanku: ‘Aychaj sajra munayninta, ñawispa rikusqanta munapayayta, kapuyninkumanta runaykachayta’ ima (1 Juan 2:16). Apóstol Pabloqa cristianosman nerqa aychaj sajra munayninta maskʼay mana allinchu kasqanta. Pay nerqa: “Aychaj munayninpi yuyayqa wañuyman pusan. [...] Aychaj munayninpi yuyajkunaqa Diospa enemigosnin kanku”, nispa (Rom. 8:6, 7). Qhapajyayman qokojkuna chayri aychaj sajra munaynillanta ruwajkunaqa sonqo pʼakisqas qhepakunku, llakiykunawantaj ñakʼarinku (1 Cor. 6:18; 1 Tim. 6:9, 10). w17.05 pág. 18 párrs. 5, 6

Ayqekamojkunaqa agradecekunku, nitaj imatapis mañakunkuchu. Chayrayku hermanos kusiywan yanaparinku. Chantapis wajkunaj yanapaynillanwan kausayqa hermanospaj, noqanchejpajpis mana allinchu kanman (2 Tes. 3:7-9). Jinapis yanapata necesitankupuni. Ayqekamojkunata yanapanapajqa mana ashkha qolqeyojpunichu kana tiyan. Paykunaqa necesitanku paykunapaj tiempochakunanchejta, munakunanchejtapis. Paykunata yachachisunman maymanpis rinankupaj ima microtachus japʼinankuta, mana valesqa mikhunasta maymantachus rantikunankuta. Chantá yanapallasunmantaj rantikunankupaj siranapaj uj maquinata chayri pastota kʼutunapaj uj maquinata, ajinamanta qolqeta ganakunankupaj. Astawanqa yanapananchej tiyan congregacionmanta mana karunchakunankupaj. Atispaqa tantakuykunaman pusasunman. Paykunawan predicaj llojsisunman, chantá maypichus predicanchej chaypi imaynatachus predicanata yachachisunman. w17.05 pág. 5 párrs. 11, 12

Ashkha runasqa, imastachus munasqallankupi yuyasqankurayku tukuy imata munapayaypi urmanku (1 Cor. 2:14). Chayraykutaj imachus allin, imatajchus mana allin kasqanta ni sutʼita reparankuchu (Heb. 5:11-14). Ichapis astawan tukuy imata munapayanku. Ashkha imasniyojña kajtinkupis, astawanrajpuni munanku (Ecl. 5:10). Chay jina yuyaymantataj jarkʼakusunman, Bibliata sapa día leespa. Jesusqa Diospa nisqasninpi tʼukurinanpaj tiempochakorqa. Chayrayku sinchʼita sayarqa Kuraj Supay juchapi urmachiyta munashajtin (Mat. 4:8-10). Tukuy imata munapayaypi mana urmanapaj, Jehová Diospa yuyaychasqanman jina kausakuna. Ajinamanta rikuchisunchej Jesusta mayta munakusqanchejta. w17.05 pág. 26 párr. 17