Diciembre

Ñaupa tiempopi runasqa, mikhurikunankupaj pillatapis wajyarikojpuni kanku. Chaywantaj rikuchej kanku amigosninku kayta munasqankuta, allintataj kausakuyta munasqankuta (Gén. 18:1-8; Jue. 13:15, 16; Luc. 24:28-30). Noqanchejpis wajkunata wasinchejman wajyarikunanchej tiyan, astawanqa congregacionninchejmanta hermanosta. Ajinamanta hermanosninchejwan aswan ujchasqa kasunchej, ima llakiypi rikukuspapis yanapanakuyta atisunchej. Noqanchejpis congregacionesta waturej hermanosta wasinchejpi alojarisunman. Chantapis alojarillasunmantaj Tantakuna Wasista ruwaysikuspa yanapakoj hermanosta, jinallataj precursorespaj escuelaman jamojkunata. Wakin hermanosqa wasinkuta pierderqanku terremoto kasqanrayku chayri inundaciones kasqanrayku. Paykunatapis alojarillasunmantaj wasinkuta sayarichinankukama. Nitaj yuyanachu jatuchaj wasisniyoj hermanoslla alojayta atisqankuta. Paykunaqa ichapis wasinkupi alojankupuni. Noqanchejpis mana jatun wasiyoj kaspapis, hermanosta alojayta atillasunmantaj. w18.03 págs. 15, 16 párrs. 6, 9

Juchapi urmaspa sayarikunapajqa, Jehová Dioslla atiyninwan yanapawasunman (Fili. 4:13). Diosqa atiyninwan yanapallawasunmantaj mana munayninchejwan atipachikunapaj. Munayninchejwan mana atipachikunapajqa, Diospa yanapayninta mañakuna, Bibliata estudiana, yachakusqanchejpitaj tʼukurina. Bibliata mana ukhunchayta atillanchejchu chay, nitaj gustawanchejchu chayqa, Jehová Dioswan yanapachikuna. Payqa Palabranta mayta yachayta munananchejpaj yanapawasun (1 Ped. 2:2). Diospa Palabranta sumajta estudianapajqa tiempochakuna, Diospa yanapaynintataj mañakuna. Bibliata estudiayman yachasqa kanapajtaj, ichá primeritosta pisi tiempollata estudiasunman. Ajinata ruwajtinchejqa, pisimanta pisi Diospa Palabranta estudiaspa astawan miskʼirichikusunchej. Chantapis Diospa Palabranpi tʼukuriy astawan gustawasunchej (1 Tim. 4:15). w18.03 pág. 29 párrs. 5, 6

Bibliamanta yachakojqa, niraj bautizakushaspa Jehová Diosmanta sumajta yachakunan tiyan. Yachanallantaj tiyan imachus Jehová Diospa munaynin kasqanta, salvanawanchejpajtaj imatachus ruwasqantapis (1 Tim. 2:3-6). Chaykunata yachajtenqa aswan creeyniyoj kanqa. Chaytaj yanapanqa Diospa kamachiykunasninta kasukunanpaj (Hech. 3:19). Chay imasta ruwayqa may sumajpuni, imajtinchus Diosqa chayta ruwajkunallata allinpaj qhawan (1 Cor. 6:9, 10). Chantapis bautizakuyta munajqa, tantakuykunaman, predicacionmanpis rinanpuni tiyan, estudiosniyojtaj kanan tiyan (Hech. 1:8). Chaykunata ruwasparaj bautizakuyta munajqa, uj mañakuypi Jehová Diosman ninman, payllapajña kausananta, chantataj bautizakuyta atinman. w18.03 pág. 6 párr. 12

Mariataqa Jehová Dios, Jesuspa maman kananpaj ajllarqa. Imajtinchus Mariaqa Jehová Diospa munayninman jinapuni kausakorqa. Chaytataj reparasunman, imaynatachus Jehová Diosta jatunchasqanpi Zacariasta, Elisabettawan waturikushajtin (Luc. 1:46-55). Chay kutipi Mariaqa rikucherqa Diospa Palabranta jatunpaj qhawasqanta, sumajtataj rejsisqanta (Gén. 30:13; 1 Sam. 2:1-10; Mal. 3:12). Chantá Mariaqa, Josewan casarasqaña kaspapis, mana puñuykorqachu Jesús nacekunankama. Imaraykuchus paykunaqa, Jehová Diospa munayninta ruwayta munarqanku (Mat. 1:25). Chantapis Mariaqa, imastachus Jesús wiñasqanman jina ruwasqanta, yachachisqantapis uyarerqa. Imaraykuchus Mariaqa yacharqa Mesías chayamunanta. Chayrayku allin kanman Mariamanta yachakunapaj kallpachakunanchej. Pay jinataj Jehová Diospa kamachiykunasninta kasukunanchej, Diospa munaynintataj ruwananchej. Arí, allin kanman tʼukurinanchej Jehová Diospa munaynintachus manachus kausayninchejpi ruwashasqanchejta. w18.02 pág. 21 párr. 11

Job jina sinchʼi creeyniyoj kana, Diostataj kasukuna. Chaypajqa imapi rikukuspapis Jehová Diostapuni kasukuna, paypitaj atienekuna. Jehová Diosmanta amapuni karunchakunachu. Imajtinchus yachanchejña ima mañasniyojchus Satanás kasqanta (2 Cor. 2:11). Yachallanchejtaj, Job libro nisqanman jina, imajtinchus Dios llakiykuna kananta saqesqanta. Daniel libro nisqanman jinataj, yachanchej Diospa Gobiernonpi Jesús kamachishasqantaña (Dan. 7:13, 14). Chay Gobiernotaj tumpamantawan tukuy llakiykunata chinkachinanta, jallpʼatataj kamachimunanta. Jobmanta yachakullasunmantaj, llakiykunapi rikukoj hermanosninchejmanta khuyakuna kasqanta. Ichapis ñakʼariypi rikukoj hermanosninchejqa, Job jina imatapis parlarpallankuman (Ecl. 7:7). Ajina kajtenqa ama sajra runasta jina qhawanachu, nitaj kʼamirpanallachu. Astawanqa paykunawan kʼachas kana. Kʼachas kaspaqa Tatanchej Jehová Dios jina kasunchej, munakuyniyoj, khuyakuyniyojtaj (Sal. 103:8). w18.02 págs. 6, 7 párrs. 16, 19, 20

Wakin runasqa jatunchakunku, simpáticos kasqankurayku, may rejsisqas kasqankurayku, takiyta yachasqankurayku, kallpasapas kasqankurayku chayri wajkuna jatunpaj qhawasqankurayku. Davidtaj simpático kajtinpis, may rejsisqa kajtinpis, takiyta yachajtinpis, kallpasapa kajtinpis, wajkuna jatunchajtinkupis, manapuni jatunchakorqachu. Rey Saulqa, Davidta nerqa wawanwan casarakunanta, Goliatta wañuchisqanrayku. Davidtaj Saulman nerqa: “Noqaqa mana imachu kani [...] Israelpi reypa tolqan kanaypajqa”, nispa (1 Sam. 18:18). Diospa kamachisnenqa, David jina kʼumuykukoj sonqo kanapaj kallpachakunchej. Kʼumuykukoj sonqo kanapajtaj Diosmanta mayta yachakusunman. Payqa atiyniyoj kajtinpis, kʼumuykukoj sonqo. Chantapis noqanchejqa Diosta kasukunapaj kallpachakushanchej. Dios niwanchej: “Kay imaswan pʼachawan jina pʼachallikuychej: khuyakuywan, munakuywan, kʼacha kaywan, kʼumuykukoj sonqo kaywan, llampʼu sonqoyoj kaywan, pacienciawan ima”, nispa (Col. 3:12). Chantá ‘munakuyniyoj runaqa mana may kasqanta yuyakunchu, nitaj jatunchakunchu’ (1 Cor. 13:4). Noqanchejpis kʼumuykukoj sonqo kasunchej chayqa, runaspis Diosman qayllaykuyta munanqanku. w18.01 págs. 28, 29 párrs. 6, 7

Congregacionpeqa, imata ruwanapajpis qolqesitunchejwan yanapakusunman (Hech. 4:34, 35; 1 Cor. 16:2). Ichá Tantakuna Wasinchej allinchakunan kashan chayri mosojta sayarichikunan kashan. Chantá qolqesitunchejwan yanapakullasunmantaj, Betel wasi allinchakunanpaj, jatun tantakuykuna ruwakunanpajpis. Qolqesitunchejwan yanapakullasunmantaj terremotorayku, inundacionesrayku llakiypi tarikoj hermanosta. Qolqesitunchejwanqa yanapakullanchejtaj misionerosta, precursores especialesta, congregacionesta waturejkunata, centralninchejpi trabajajkunata, Betelpi trabajaj hermanostawan. Kay qhepa pʼunchaykunapi, predicación ñaupajllamanpuni rinanpaj qolqesitunchejwan yanapakusunman. Congregacionpi cajitasman qolqeta churashaspataj, ni piman willanchejchu. Jinallataj Internetnejta qospapis nillataj pimanpis willanchejchu. Noqanchejmanta ashkhastaj, pisi qolqesitullawan yanapakusqanchejrayku, ichá yuyasunman qolqesitunchej ni imapaj valesqanta. Jinapis ama jinata yuyanachu. Imajtinchus mundontinpi casi tukuyninchej pisi qolqellawan yanapakojtinchejpis, ashkha qolqe tantakun. w18.01 pág. 19 párrs. 10, 11

Salvakunapajqa bautizakunapuni tiyan (Mat. 28:19, 20). Jóvenes, Diospa munayninta ruwajtiykichejqa allinniykichejpajpuni kanqa, Diabloj munayninta ruwanaykichejmanta nisqaqa. Imajtinchus Diabloqa mana allinniykichejtachu maskʼan. Astawanqa Diosta wasanchanaykichejta munan, ajinamanta wiñay kausayta mana japʼinaykichejpaj. Jóvenes, Jehová Dios maytachá bendecisorqachej bautizakusqaykichejmantapacha. Qankunataj niraj bautizakushaspa Jehová Diosman nerqankichej, payllata sirvinaykichejta. Chayrayku tukuy sonqo niyta atiwajchej: “Tata Diosqa noqawan kashan; mana manchachikusajchu. Imanawanqataj runari?”, nispa (Sal. 118:6). Diosqa allin ñawiwan qhawasunkichej, paypa ladonmanta churakusqaykichejrayku. Chaytaj ni imawan kikinchakunchu. w17.12 págs. 23, 24 párrs. 1-3

Ichá pi hermanollapis sonqonchejta nanachinawanchejpaj jina, imatapis ruwanman chayri imatapis nirpawasunman. Manachayri noqanchej wajkunaj sonqonkuta nanarpachisunman. Pillawanpis phiñanarpakuspaqa, Diospa qayllallanpipuni kana. Diosqa wakin imas pasananta saqenman, hermanoswan allinta apanakuyta yachakunanchejpaj, ujchasqa trabajayta yachakunanchejpajpis. Jehová tukuy hermanosta munakun, juchasapa kajtinkupis. Diosqa saqellan kamachisnin llakiykunapi rikukunankuta. Chaytaqa Josejpa kausayninpi reparasunman. Paytaqa joven kashajtin hermanosnin envidiarayku venderparqanku. Jinapi Joseqa Egiptoman apasqa karqa (Gén. 37:28). Jehovaj sonqontaj maytachá nanarqa, José ñakʼarichisqa kashajtin. Imajtinchus Joseqa cheqan runa karqa. Jinapis Diosqa, chay pasananta saqellarqa. Aswan qhepamantaj Joseta qhasimanta juchacharqanku, Potifarpa warminta abusayta munasqanta nispa. Carcelmantaj wisqʼaykorqanku. Chay kutipipis Jehová saqellarqa Joseta wisqʼaykunankuta. Jinapis Diosqa, Joseta mana saqerparqachu. Biblia nin: “Dios paywan kasharqa tukuy ima ruwasqasnimpi allin rinampaj”, nispa (Gén. 39:20-23). w18.01 págs. 9, 10 párrs. 12-14

Noqanchejqa creenchejpuni Jehová wañusqasta kausarichimunanta. Creellanchejtaj Pay tukuy imata ruwasqanta, kausaytapis qowasqanchejta. Jesucristo juchasninchejrayku wañusqantapis. Kay jallpʼapis tumpamantawan uj paraisoman tukunanta, chaypitaj Diosta kasukojkuna wiñaypaj tiyakunankuta. Wiñay kausayta japʼinapaj, jatun ñakʼariy tiempopi wañojtinchejpis chayri manapis, creenchejpuni Jehová wañusqasta kausarichimunanta. Arí, sichus Jesús mana kausarimunmanchu karqa chayqa, mana cielomantapacha Rey jina kamachimushanmanchu karqa, predicasqanchejpis qhasilla kanman karqa (1 Cor. 15:12-19). Chaywanpis Jesús kausarimusqantapuni yachanchej. Arí, wañusqas kausarimunankuta creenchejpuni, runas chaypi creesqanchejmanta asikuwajtinchejpis (Mar. 12:18; Hech. 4:2, 3; 17:32; 23:6-8). w17.12 págs. 8, 9 párrs. 1, 2

Fariseosqa runaj pantasqallankuta qhawaj kanku, nitaj imayna sonqoyoj kasqankutachu. Uj kuti fariseosqa, Jesusta Mateoj wasinpi mikhojta rikusqanku. Jesuspa yachachisqasnintataj nisqanku: “¿Imaraykutaj yachachejniykichej impuesteroswan, juchasapa runaswan khuska mikhunri?”, nispa. Jesustaj paykunata uyarispa nerqa: “Sano runasqa mana doctorta necesitankuchu, manachayqa onqosqaslla. Rispa yachamuychej, imachus niyta munasqanta Diospa nisqan, pay nerqa: ‘Wajkunata khuyakunaykichejta munani, manataj noqapaj uywasta ñakʼanaykichejtachu’, nispa. Noqaqa mana cheqan runastachu wajyaj jamuni, manachayqa juchasapasta”, nispa (Mat. 9:9-13). Arí, Jesusqa juchasapa runas pesachikunankuta munarqa (Mat. 4:17). Jesusqa repararqa ashkha impuesteros, juchasapaspis paypa qhepanta riyta munasqankurayku, ñaupa kausayninkuta saqepuyta munasqankuta. Mateoj wasinpipis mana mikhunaraykullachu kashasqankuta (Mar. 2:15). Fariseosqa runasta pisipaj qhawaj kanku, yuyajtaj kanku ni jaykʼaj sajra ruwayninkuta qonqanankuta. w17.11 págs. 13, 14, 16, 17 párrs. 2, 15

Diospa llajtanpi kasqanchejmanta, may kusisqa kashanchej. Imaraykuchus hermanosqa yanapawanchej ima tʼinkatachá suyakushanchej, chayta japʼinapaj. Bibliamanta tantakuykunapi yachakuypis, yanapallawanchejtaj tʼinkanchejta japʼinapaj. Ichá wakin kutis, congregacionpi pi hermanollawanpis phiñanarpakusunman. Chay hermanowan mana allinyakojtinchejtaj, ichapis manchay phiñasqallapuni kasunman (1 Ped. 3:8, 9). Phiñakuywan atipachikusunchej chayqa, tʼinkanchejta mana japʼiyta atisunchu. Chayrayku apóstol Pablo nerqa: “Qankunaqa Diospa ajllasqasnin kankichej, paypaj tʼaqasqas, may munasqastaj. Chayrayku kay imaswan pʼachawan jina pʼachallikuychej: khuyakuywan, munakuywan, kʼacha kaywan, kʼumuykukoj sonqo kaywan, llampʼu sonqoyoj kaywan, pacienciawan ima. Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej”, nispa (Col. 3:12, 13). w17.11 pág. 27 párrs. 7, 8

Pi israelitallapis mana yuyasqallamanta runa masinta wañuchejtenqa, pakakuna llajtaman ayqenan karqa. ‘Chay llajtaj punkunman chayaspataj, willakunan karqa chay llajtapi kaj kurajkunaman imajtinchus jamusqanta. Paykunataj chay llajtaman yaykuchispa, rikuchinanku karqa, maynejpichus tiyakunanta’. Pisi tiemponmantaj, kurajkunaqa mana yuyasqallamanta wañuchej runata, kachananku karqa ima llajtapichá runata wañucherqa, chay llajtaman. Chay llajtamanta kurajkunataj, mana yuyasqallamanta wañuchisqantachus manachus ninankupaj (Núm. 35:22-25). Chay kurajkuna mana yuyasqallamanta wañuchisqankuta nejtinkutaj, pakakuna llajtaman kutichipullajtaj kanku. Jehová Diosqa, mana yuyasqallamanta runata wañuchejkunata khuyakunanpajqa, kamacherqa Israelmanta kurajkunawan parlarinankuta. Ajinamanta khuyasqa kanankupaj, mana sajra ruwayman yachaykukunankupaj ima. Chaymanta parlaspa uj yachayniyoj runa, jinata nerqa: “Mana yuyasqallamanta runata wañuchejqa, kurajkunawan mana parlamojtin, wañuchisqa kayta aterqa, Diospa kamachisqanta mana kasukusqanrayku”, nispa. Sichus runata wañuchej, mana pakakuna llajtaman rinmanchu karqa chayqa, payta wañuchiyta atinman karqa, wañojpa aswan qaylla kaj familian. w17.11 pág. 9 párrs. 6, 7

Jehová angelesnejta mayta kallpachawanchej, sajra runasmantataj jarkʼawanchej (Mal. 3:6; Heb. 1:7). Kay 1919 watapi, Diospa llajtanqa, llulla religionpa yachachiykunasninmanta kacharichisqa karqa. Chay watamantapachataj, ashkha runasqa churanakushanku Diosmanta mana willakunanpaj. Jinapis ángeles yanapawasqanchejrayku, mundontinpi predicakushallanpuni (Apo. 18:4). Chantapis Diospa llajtanqa, angelespa yanapayninwan, manaña watejmanta llulla yachachiykunawan chhapukonqachu (Sal. 34:7). Chayrayku Diosta tukuy sonqo yupaychanallapuni. Jatun ñakʼariy tiempopi, Jehová Diosqa angelesninwan jarkʼawasunchej. Chantá contranpi churanakojkunatapis chinkachenqa (2 Tes. 1:7, 8). Chay diaqa tʼukunapaj jinapuni kanqa. w17.10 pág. 28 párrs. 10, 11

Sonqo pʼakisqa kasunman familianchejmanta pillapis qharqochikojtin, chayri Jehová Diospa llajtanmanta llojsipojtin. Ajinapi rikukuspa imatachus ruwananchejta qhawarina. May allinpuni Diosman astawan qayllaykunapaj kallpachakuna. Diospi atienekunallapajpuni, Diospa Palabranta sapa día leena, tantakuypajtaj wakichikuna, amataj tantakuykunamanta faltakunachu. Chantapis Diospa yanapayninta mañakuna, predicamunallapunitaj (Jud. 21). Chaykunata tukuy sonqo ruwanapajtaj kallpachakunallapuni. Ajinamanta llakiyninchej pisiyanqa. Kunantaj qhawarina, 73 Salmota qhelqaj imapichus rikukusqanta. Payqa sajra runaspa ruwasqankuta qhawaspa, astawan llakisqa karqa. Chaywanpis Jehová Diosta watejmanta yupaychasqanrayku, llakiyninta atiparqa (Sal. 73:16, 17). Noqanchejpis Jehová Diosta tukuy sonqo yupaychasunchej chayqa, llakiyninchejta atipayta atisunchej. w17.10 pág. 16 párrs. 17, 18

Diablomanta parlarina. Payqa puraj uya karqa. Uj kuti payqa, Edén huertapi Evawan parlarisqa. Chaypitaj Diabloqa Evaj allinninta maskʼajman tukorqa. Jinapis Evata engañaykorqa (Gén. 3:4, 5). Ahitofelmantañataj parlarina. Payqa rey Davidpa amigon karqa. Jinapis allinnillanta maskʼasqanrayku, Davidta wasancharqa. Reparanchej jina, Ahitofelpa ruwasqasninpi sutʼi yachakorqa, Davidta mana tukuy sonqochu munakusqanta (2 Sam. 15:31). Kay tiempopipis, Diosta wasanchaj runasqa, allinninchejta maskʼajman tukunku. Chayrayku paykunaqa “miskʼi simiwan, kʼacha palabraswan ima”, Diospa llajtanta tʼaqanachiyta munanku (Rom. 16:17, 18). Puraj uya runasqa, wajkunata munakojman tukunku engañanankurayku. Chay jina runasqa runa masinkuta engañankuman, jinapis Jehová Diostaqa manapuni engañankumanchu. Jesustaj nerqa, puraj uya runasqa may ‘sinchʼi jasutʼisqa’ kanankuta (Mat. 24:51). Chayrayku sapa uj qhawarikunanchej tiyan, wajkunata tukuy sonqochus munakusqanchejta manachus. w17.10 pág. 8 párrs. 6-8

Bibliamanta uj versiculota runasman leeripoyqa, aswan sumaj noqallanchej parlaykunanchejmantaqa (1 Tes. 2:13). Chayrayku predicashaspaqa, maytapuni kallpachakuna Bibliata runasman leeripunapaj. Casi tukuy runasqa Biblia nisqanta mana entiendenkuchu. Unay tiempomanta runaspis, manallataj entiendejchu kanku. Runasman Bibliata leeripushaspaqa, ama yuyanachu leeripusqanchejta entiendesqankutapacha. Chayrayku runaspajqa mana uj versiculota leeripuyllachu. Manaqa entiendenankupaj leepusqanchej versiculomanta, wakin palabrasta watejmanta leeripullasunmantaj. Chantataj chay versiculota sutʼincharisunman. Ajinata ruwajtinchejqa, Diospa Palabran runaj yuyayninman, sonqonmantaj chayanqa (Luc. 24:32). w17.09 pág. 25 párrs. 7, 8

Wajkunata tukuy imapi yanapana. Jehovaqa munan hermanosmanta khuyakunanchejta, jinallataj vecinosninchejmantapis (Juan 13:34, 35). Khuyakuyniyoj runaqa waqajkunawan waqan, ñakʼarejkunawantaj ñakʼarin. Chantapis ñakʼarejkunata yanapananpaj tukuy atisqanta ruwan. Chayrayku noqanchejqa wajkunata yanaparinapuni. Jehovaj testigosnenqa terremoto chayri sinchʼi para kajtin, purajmanta yanapanakunku, wajkunatapis yanaparinku (1 Ped. 2:17). Japonmanta uj hermana, 2011 watapi mama qocha wasarimusqanrayku, terremoto kasqanrayku ima, sinchʼi llakiypi tarikorqa, jinallataj chaynejpi tiyakojkunapis. Hermanostaj tukuynejmanta jamorqanku wasisninkuta allinchaj, jinallataj Tantakuna Wasistapis. Chayta rikuspataj chay hermana nerqa: “Hermanos yanapashawasqaykuta rikuspa mayta sonqochakorqani, kallpachakorqanitaj. Sutʼita repararqani Jehová mayta munakuwasqanchejta, hermanospura mayta munanakusqanchejtapis. Reparallarqanitaj mundontinpi hermanos Jehovamanta mañapushawasqaykuta”, nispa. w17.09 págs. 11, 12 párrs. 12, 13

Sajra munayninchejwan ama atipachikunachu. Imaraykuchus sajra munayninchejwan atipachikusunchej chayqa, wajkunawan mana allintachu kausakusun, usqhayllata phiñarparikusun, ashkha problemaspitaj rikukusun. Chantapis ima juchapipis urmasunman. Chaykunataj Jehová Diosmanta karunchawasunchej. Adanwan Evawanqa munayninkuwan atipachikusqankurayku, juchallikorqanku (Gén. 3:6). Ashkha runastaj paykuna jina ruwasqankurayku ashkha problemaspi rikukunku. Juchasapa kasqanchejrayku sajra munayninchejta mana atipayta atillanchejchu. Jehovataj chayta allinta yachan, chayraykutaj yanapayta munawanchej (1 Rey. 8:46-50). w17.09 pág. 4 párrs. 3, 4

Ñaupaj wataspi, Sudafricamanta autoridadesqa mana saqejchu kanku, Jehovaj testigosnin waj suyusmanta yuraj runaswan tantakunankuta. Jinapis 18 de diciembre de 2011 watapi, domingo pʼunchaypi, ashkha suyusmanta Jehovaj testigosnenqa, Johannesburgo llajtapi uj estadionpi tantakorqanku, tukuyninkutaj 78.000 testigosmanta astawan karqanku. Chay jatun tantakuymantaj tukuy laya runas rerqanku. Chantá chay estadionmanta ujnin encargado jinata nerqa: “Ni jaykʼaj rikorqanichu ajina kʼacha runasta. Tukuypis sumaj vestisqas kasharqanku. May llimphutataj kay estadionta saqerqanku. Chantá tukuypis allinta apanakorqanku, mana kikin suyumanta kajtinkupis. Chaytaj mayta tʼukuchiwarqa”, nispa. Kay mundomanta runasqa, sutʼita reparanku Jehovaj testigosnin mundontinpi hermanos jina, may ujchasqa kasqanchejta (1 Ped. 5:9). Chaytaj ajina, imaraykuchus Jehová Diosqa atiyninwan, Palabranwantaj yanapawarqanchej ‘ñaupa kausayninchejta saqepunapaj’, Diospa qosqan ‘mosoj kausaywantaj pʼachallikunapaj’ (Col. 3:9). w17.08 págs. 17, 18 párrs. 2, 3

Biblia nisqanman jina, pacienciayoj kasunman Jehová Dios atiyninwan yanapallawajtinchej. Jehová Dios mana yanapawasunmanchu chayqa, juchasapa kasqanchejrayku mana pacienciakuyta atillasunmanchu. Pacienciayoj kaytaqa Jehová Dios qowanchej. Pacienciakuspataj Diosta, runa masinchejtapis munakusqanchejta rikuchinchej. Mana pacienciakojtinchejtaj hermanosta munakusqanchej pisiyapunman (1 Cor. 13:4; Gál. 5:22). Pacienciayoj kasunchej chayqa, ima llakiytapis kusiywan aguantayta atillasun (Col. 1:11; Sant. 1:3, 4). Chantá pillapis ima sajrata ruwawajtinchej, mana sajrallawantaj kutichisunchu, astawanqa Jehová Diosta kasukullasunpuni. Discípulo Santiago nisqanman jina, tukuypis pacienciayoj kayta necesitanchej (Sant. 5:7, 8). w17.08 pág. 4 párr. 4

Jóvenes qankuna yachankichej jina, mayllamanpis viajanapaj ñaupajtaqa allinta yuyaycharikunchej, ¿icharí? Kikillantataj kausayninchejpi imatachus ruwanata allinta ajllanapajqa, ñaupajta allinta yuyaycharikuna. Ichapis chayta ruwayqa mana facilllachu kanqa. Manchachikunki chayqa, kay diapaj ajllasqa textopi Jehová Dios nisqanmanta ama qonqapuychu. Diosqa qhepaman imata ruwananchejpajpis, allintaraj yuyaycharikunanchejta munan (Ecl. 12:1; Mat. 6:20). Payqa kusisqa kausakunanchejta munan. Chayrayku noqanchejpaj tukuy imata kʼachituta ruwarqa. Miskʼi mikhunatapis churapuwarqanchej. Chantapis sajra imasmanta jarkʼawanchej, allinta kausakunanchejpajtaj yachachiwanchej. Pikunachus Paypa yachachisqanta qhesachanku, chaykunaman Jehová nin: “Imachus noqaman mana allinchu rijchʼawan, chaytapuni qankunaqa ajllakorqankichej”, nispa. Chantá nillantaj: “Kamachisneyqa kusikonqanku, qankunatajrí may pʼenqachisqa kankichej. Kamachisneyqa tukuy sonqowan sumajta takirikonqanku”, nispa (Isa. 65:12-14). Kausayninchejpi Jehovata kusichinapaj jina, allinta ajllaspaqa payta jatunchanchej (Pro. 27:11). w17.07 págs. 22, 23 párrs. 1, 2

Imaynatachus Diosninchej sapa estrella maypichus kashasqanta yachan, ajinallatataj yachan maypichus sapa ujninchej kashasqanchejta, imaynachus kashasqanchejta, imastachus necesitasqanchejtapis. Jehovaqa yachan sapa ujninchej ima llakiypichus kashasqanchejta, may atiyniyoj kasqanraykutaj yanapayta atiwanchej (Sal. 147:5). Wakin kuteqa ichapis yuyasunman llakiyninchej may jatun kasqanta, mana aguantayta atinapaj jinataj. Jinapis Diosqa maykamallachus aguantayta atisqanchejta yachan, yuyarikuntaj “jallpʼalla kasqanchejta” (Sal. 103:14). Juchasapas kasqanchejrayku kutin kutita kikin juchallapitaj pantanchej. Ichá imallatapis nisqanchejmanta pesachikunchej chayri sajra imasta munapayasqanchejmanta manachayri pillamantapis envidiakusqanchejmanta. Jehovaqa mana chay imaspi pantanchu, jinapis allinta entiendewanchej (Isa. 40:28). Ichapis yuyarikunchej imaynatachus Jehová atiyninwan llakiyninchejta atipanapaj yanapawasqanchejmanta (Isa. 41:10, 13). w17.07 págs. 18, 19 párrs. 6-8

Sri Lanka suyumanta uj hermano, waj ladoman tiyakoj riporqa. Suyunpi wasiyoj, jallpʼasniyoj ima kasqanrayku, hermanos chaypi tantakunankuta, precursorespis alojakunankuta saqellan. Ajinamanta wajcha hermanosta yanapan, wasinta allinta japʼinanpaj qolqenta gastanan kajtinpis. Wakin lugarespitaj, maykunapichus gobiernos mana predicajta saqewanchejchu chaykunapi, wakin hermanos wasisninkuta mañanku chaypi tantakuykuna ruwakunanpaj. Ajinamanta pisi qolqeyoj precursores, publicadores ima alquilerta mana pagaspalla tantakunku. Uj hermanaqa Diospa Gobiernonmanta willay ñaupajllamanpuni rinanpaj qolqesitunwan yanapakunpuni. Chay ruwasqantaj payta ashkha imaspi yanapan. Pay nin: “Kapuyniymanta astawan qosqayrayku, astawan perdonayta atini, astawan pacienciakuyta atini, yuyaychaykunatapis japʼikuyta atillani”, nispa. w17.07 pág. 9 párrs. 9, 10

Jobqa ichá tiempoman entienderqa imaraykuchus ajinata ñakʼarisqanta. Jinapis ichá wakin kuti sonqonpi nikorqa: “¿Chay jinatapunichu ñakʼarinay karqa?”, nispa. Ajinata yuyajtinpis manapis, Jehová imatachus nisqanpi tʼukurerqa. Chaytaj mayta sonqocharqa, maychus kajllata yuyananpajtaj yanaparqa (Sal. 94:19). Jobpa kausaynenqa yanapawanchej llakiykunasninchejmanta maychus kajllata yuyanapaj, sonqochayta tarinapajpis. Jehovaqa Jobpa kausayninta Palabranpi qhelqacherqa, yachakunanchejpaj, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej (Rom. 15:4). Jobpa kausayninmantaqa yachakunchej, llakiynillanchejpi anchata yuyanamantaqa, Jehovalla sumaj kamachej kasqanta sutʼinchakunanpi, astawan yuyananchej kasqanta. Jatun llakiypi kashaspa Job jina Jehová Diosman cheqa sonqollapuni kasunchej chayqa, Payta sumaj kamachejninchejta jina qhawasqanchejta rikuchisunchej. w17.06 págs. 24, 25 párrs. 9, 13, 14

Jesusqa repararqa yachachisqasnin samarikuyta necesitasqankuta. Uj kuti diantinta willamusqankutawan, yachachisqasninman kay diapaj ajllasqa textopi nisqanta nerqa. Kusirikunapaj imata ruwaspapis trabajonchejmanta samarikunchej, llakiykunamantataj qonqapunchej. Jinapis allinta qhawarikunanchej tiyan, kusirikuyllaman mana qokunapaj. Ñaupa tiempopi ashkha runas ajinata nej kanku: “Mikhuna ari, ujyanataj, imaraykuchus qʼaya wañupusun”, nispa (1 Cor. 15:32). Kunanpis runasqa ajinallatataj ninku. Kusirikuyllaman qokusun chayqa Jehovamanta karunchakusun. Kusirikuyllamanchus manachus qokushasqanchejta reparakunapaj sumajta qhawarikuna. Chantá anotakullasunmantaj pujllanapaj, teleta qhawanapaj, chayri waj imaswan kusirikunapaj, semanapi mashkha horastachus churashasqanchejta. Chay listasta kikincharispa reparasunchej imamanchus tiemponchejta astawan churashasqanchejta (Efe. 5:15, 16). w17.05 págs. 24, 25 párrs. 11-13

Jesusqa sumaj perlasta maskʼaj ranqheromanta parlarqa. Chay ranqheroqa chayta rantinanpajtaj tukuy imasninta vendemusqa. Ajinata ruwananpaj, chay perlaqa may valorniyojpunichá kanman karqa. Diospa Gobiernonqa chay sumaj perla jina. Ranqheroqa chay perlata may valorniyojpaj qhawarqa. Noqanchejpis Diospa Gobiernonta may valorniyojpaj qhawasunchej chayqa, kamachiyninpi tiyakunapaj tukuy imasninchejta saqepuyta atillasunchej (Mar. 10:28-30). Zaqueoqa runasta chʼaukiyaspa qhapajyarqa (Luc. 19:1-9). Paytaj Jesusta uyarerqa Diospa Gobiernonmanta yachachejta. Chay ratotaj repararqa Diospa Gobiernon may valorniyoj kasqanta. Chayrayku chʼaukiyaspa runasmanta orqhosqanta kutichiporqa, niñataj chʼaukiyarqachu. Zaqueo nerqa: “Señor, tukuy kapuwasqanmanta khuskanta wajchasman qopusaj. Sichus pimantapis chʼaukiyaspa qolqenta suwarqani chayqa, tawa jinastawanraj kutichipusaj”, nispa. w17.06 pág. 10 párrs. 3-5

Tatasta yanapaj hermanosqa, wawasta yachachinkuman tatasninkuta respetanankuta. Chaytataj ruwankuman, tatasninkumanta sumajta parlaspa, tataspuni Jehovamanta yachachinanku kasqanta jatunpaj qhawaspa. Chantapis hermanosqa chay familiaspa wawasninkuta yanapashaspa, imatachus ruwashasqankuta allinta qhawarikunanku tiyan, congregacionmanta hermanos, jawamanta runaspis ama ima sajratapis parlanankupaj (1 Ped. 2:12). Tatasta hermanos yanapajtinkupis, tataspuni cheqa kajta wawasninkuman yachachinanku tiyan. Tatasqa yachananku tiyan imaynatachus hermanos wawasninkuta yanapashasqankuta. Tatas, Jehovamanta yanapata mañakuychej, tukuy atisqaykichejtataj kallpachakullaychejpuni (2 Cró. 15:7). Tatas, allinnillaykichejta maskʼanaykichejmantaqa, wawasniykichej allinninkuta maskʼaychej Jehovawan sumaj amigos kanankupaj. Tukuy atisqaykichejta kallpachakuychej Bibliaj nisqan wawasniykichejpa sonqonman chayananpaj. Atienekuychejtaj wawasniykichej Diospa kamachisninman tukunankuta. w17.05 pág. 12 párrs. 19, 20

Iskay sajra runasqa uj runata llullakuspa juchacharqanku sajra imasta ruwasqanmanta. Ajina runataqa wañuchej kanku. Chay iskay sajra runasqa llullakorqanku, jinapis chay runaqa wañuchisqa kananpaj juchachasqa karqa. Tʼukuriy imaynachus kasharqanku sajra ruwaykunata chejnikojkuna, mana juchayoj runata, wawasninta ima rumiswan chʼanqaykuspa wañuchisqankuta rikuspa. Chayqa mana uj cuentollachu. Chay runaqa Diospa cheqa sonqo kamachin Nabot karqa. Rey Achab Israelta kamachishajtin kausakorqa (1 Rey. 21:11-13; 2 Rey. 9:26). Rey Achabqa Nabotman nerqa: ‘Uvas huertaykita qoway. Noqataj kay huertaykimanta aswan sumaj huertata qopusqayki’, nispa. Nabottajrí mana munarqachu. ¿Imaraykú? Imaraykuchus herenciata wiñaypaj vendeyqa, Jehová Israel llajtaman Leyta qosqanpa contranpi kasharqa (Lev. 25:23; Núm. 36:7). Rikunchej jina, Nabotqa Jehovata kasukorqa. w17.04 págs. 23, 24 párrs. 1, 4

Sajra runas chinkachisqa kajtinku, ¿pikunataj kay Jallpʼapi qhepakonqanku? Jehová Diosninchejqa Palabranpi nin: “Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku”, nispa. Chantapis Diospa Palabranqa Salmo libropi nillantaj: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa (Sal. 37:11, 29). ¿Pikunataj ‘llampʼu sonqoyojkuna’ kanku? ¿Pikunataj ‘cheqan runas’ kanku? Llampʼu sonqoyojkunaqa Jehová Diosmanta yachakoj, kasukoj runas ima kanku. Cheqan runastaj Jehová Diospa nisqasninta ruwayta munaj runas kanku. Kay mundopeqa astawan sajra runas tiyan, cheqan runasmanta nisqaqa. Jinapis paraisopeqa llampʼu sonqoyojkunalla, cheqan runaslla kanqanku. Arí, chay runastaj kay Jallpʼata uj kʼacha paraisoman tukuchenqanku. w17.04 págs. 10, 11 párrs. 5, 6

‘Diosta munakoyqa’ hermanosta munakunapaj yanapawanchej, astawanraj llakiypi rikukojtinku (1 Juan 3:17, 18). Ñaupa tiempopi Judeamanta cristianos yarqhaypi kashajtinku, paykunaman congregacionqa yanapata apacherqa (Hech. 11:28, 29). Chantá Pablowan Pedrowan hermanosta nerqanku wajyarikoj kanankuta (Rom. 12:13; 1 Ped. 4:9). Hermanosta munakuywan wajyarikunchej chay, ¿manachu wañuy patapi kajkunata, creeyninkurayku qhatiykachasqa kajkunata astawanraj wajyarikunanchej kanman? Ucrania suyoj inti llojsimuynin ladomanta may chhika hermanos, ayqekorqanku guerra kasqanrayku, qhatiykachasqa kasqankurayku ima. Wakenqa wañuchisqa karqanku. Jinapis ashkha hermanostaqa Ucraniamanta, Rusiamanta hermanos wajyarikorqanku. Iskaynin suyuspitaj hermanosqa, ‘mana kay mundomanta’ kasqankurayku mana politicaman chhapukorqankuchu. Astawanqa “Diospa palabranmanta sumaj willaykunata” willashallankupuni (Juan 15:19; Hech. 8:4). w17.05 págs. 4, 5 párrs. 6, 7