Diciembre

Jesusqa runaspa sonqonkuta sumajta entienden. Kay jallpʼapi kashaspa, payqa ‘kusikojkunawan kusikorqa, waqajkunawantaj waqarqa’ (Rom. 12:15). Uj kuti, Jesuspa 70 discipulosnin predicacionpi sumaj risqanmanta kusisqas kasharqanku. “Chaypacha Jesusqa mayta kusikorqa” (Luc. 10:17-21). Waj kutipitaj, Lázaro wañupusqanmanta runasta “waqajta rikuspa sonqon wawayarqa, sinchʼitataj llakikorqa” (Juan 11:33). Jesusqa mana juchayoj kaspapis, juchasapa runasmanta khuyakorqa, paykunawantaj pacienciakorqa. Ajina karqa runasta munakusqanrayku. Ñaupaj yachaqanapi yachakorqanchej jina, Jesuspa sonqon runasrayku “tʼikarerqa” (Pro. 8:31). Runasta mayta munakusqantaj, paykunata entiendenanpaj tanqarqa. Apóstol Juan Jesusmanta nerqa: “Payqa yachallarqa imachus runaj sonqonpi kasqanta”, nispa (Juan 2:25). w19.03 pág. 20 párrs. 1, 2

Satanasqa Jobmanta tukuy kapuyninta qhechorqa, kamachisnintapis wañuracherqa. Chantapis Jobta sajra runata jina qhawacherqa. Mana chayllachu, Satanasqa Jobpa chunka wawasnintapis wañuracherqa. Chaymantataj “uj millay sarna onqoyta churaykorqa”. “Chaytaj tukuy cuerponman juntʼaykorqa, chaki puntanmanta uma puntankama”. Señorantaj manchay llakisqa, phiñasqataj kasqanrayku Jobta nerqa: “Qanqa Diospi creellankipunichu? Diosta maldeciy, jinaspataj wañuy ari”, nispa. Jobqa wañupullaytaña munaspapis manapuni Jehová Diospa contranta parlaspa juchallerqachu. Satanasqa Jobta urmachiytapuni munaspa, payman kinsa amigosnintañataj kacharqa. Chay amigosnenqa ashkha pʼunchaykunata Jobta waturikorqanku. Jobta sonqochanankumantaqa astawan llakicherqanku. Paykunaqa Jobta kʼamerqanku, qhasimantataj tumparqanku. Nerqankutaj: ‘Dios castigashasunki. Chantapis Jehová Diospajqa tukuy sonqo kasukusqaykeqa qhasi manakajlla. Sajra runa kasqaykirayku ajinata ñakʼarishanki, yachay ari’, nispa (Job 1:13-22; 2:7-11; 15:4, 5; 22:3-6; 25:4-6). w19.02 pág. 4 párrs. 7, 8

Wakin imasta ruwaytaqa manchachikunapuni. Chaykunamanta ujtaj kashan, Jehová Diospa contranpi imatapis ruway. Sichus Adanwan Evawan Jehová Diosta manchachikunkuman karqa chayqa, payta kasukunkuman karqa. Chaywanpis Diospa contranpi oqharikorqanku. Chayrayku ñawisninku kicharikorqa, juchallikusqankutataj reparakorqanku. Chayta reparakusqankurayku, qʼalaslla kashasqankumanta pʼenqakorqanku, laqheswantaj maytʼukorqanku. Wawasninkumantaj juchatawan wañuytawan herenciata jina saqerqanku (Gén. 3:7, 21). Jehová Diospa contranpi juchallikuyta manchachikunanchej tiyan. Chaywanpis wañuytaqa mana manchachikunanchejchu tiyan. Imaraykuchus Diosqa Wawanta noqanchejrayku qorqa. Ajinamanta wiñay kausayta japʼinanchejpaj. Juchanchejmanta sonqomantapacha pesachikusunchej chayqa, Diosqa perdonawasunchej. Chaypajqa Jesús noqanchejrayku kausayninta qosqanpi creenanchej tiyan. Chaytataj ruwasunman Jehová Diosman kausayninchejta qospa, bautizakuspa ima (1 Ped. 3:21). w19.03 págs. 5, 6 párrs. 12, 13

Israelitasqa Jehová Diosman ashkha imasmanta agradecekunanku karqa. Imaraykuchus Jehová Diosqa paykunata egipciospa atiyninmanta kacharicherqa. Chaypajtaj chunka ñakʼariykunawan egipciosta castigarqa. Israelitasta salvallarqataj Puka Qochapi Egiptomanta soldadosta wañurachispa. Israelitastaj Jehová Dios egipciosta atipasqanmanta payman takispa agradecekorqanku. Chaywanpis paykunaqa pisi tiemponman Dios salvasqanmanta qonqaporqanku. Israelitasqa yakuta chayri mikhunata pisichikuspa chayri uj llakiypi rikukuspa imastachus Dios paykunarayku ruwasqanmanta qonqaporqanku, agradecekuytapis qonqaporqanku (Sal. 106:7). Chayrayku Bibliapi israelitasmanta nin: “Chay chʼin pampapi ujtawan rimayta qallarerqanku Moisespaj, Aaronpaj ima”, nispa. Israelitasqa Moisespaj, Aaronpajwan rimaspaqa Jehová Diospa contranta rimarqanku (Éxo. 16:2, 8). Israelitasqa maytapuni Diospa sonqonta nanacherqanku. Chayrayku Diosqa nerqa: ‘Kaykunaqa tukuyninku chʼin pampapi wañonqanku, Calebwan Josuellawan mana wañonqankuchu’, nispa (Núm. 14:22-24). w19.02 pág. 17 párrs. 12, 13

Jesusqa mana jatunchakorqachu, wañuynin sumaj yuyarisqa kananpaj uj jatun mikhuyta waykʼuchispa. Astawanpis discipulosninman nerqa wañuyninta yuyarinankupaj tantakuyta watapi uj kutillata ruwanankuta, pisi imasllawantaj (Juan 13:15; 1 Cor. 11:23-25). Ajinamanta Jesusqa kʼumuykukoj sonqo kasqanta rikucherqa. Maytapuni kusikunchej Reyninchej Jesús kʼumuykukoj sonqo kasqanmanta (Fili. 2:5-8). Jesús jina kʼumuykukoj sonqo kanapajqa, mana allinnillanchejtachu maskʼana, manaqa wajkunaj allinnintaraj maskʼana (Fili. 2:3, 4). Jesusqa mayta sufrichinankuta, wañuchinankutataj yachaspapis, discipulosninmanta astawan llakikorqa. Chayrayku chay chʼisi japʼichisqa kanankama discipulosninta yachacherqa, sonqocharqa, kallpacharqataj (Juan 14:25-31). Chayta ruwaspa rikucherqa wajkunaj allinnintaraj maskʼasqanta. Noqanchejpis Jesús jina kʼumuykukoj sonqo kasunman wajkunaj allinninkuta maskʼaspa. w19.01 pág. 21 párrs. 5, 6

Ichapis manchachikunchej comentashajtinchejpuni qallunchej watakunawanchejta. Chaywanpis mana noqallanchejchu manchachikunchej. Wakin comentajkunapis comentashaspa tumpata manchachikunkupuni. Sapa ujninchej reparakunanchej tiyan imatachus manchachikusqanchejta. Ajinata manchachikuspaqa rikuchinchej kʼumuykukoj sonqo kasqanchejta, wajkunatataj kurajninchejta jina qhawasqanchejta. Jehová Diostaj llampʼu sonqosta munakun (Sal. 138:6; Fili. 2:3). Chaywanpis Jehová Diosqa munan comentaspa payta jatunchananchejta, hermanostapis tantakuykunapi kallpachananchejta (1 Tes. 5:11). Jehová Diosqa munakuwasqanchejrayku comentanapaj kallpata qowasunchej. Bibliaj wakin yuyaychaykunasninta qhawarinachej. Bibliaqa yuyarichiwanchej parlashaspa tukuypis pantasqanchejta (Sant. 3:2). Chayrayku Jehová Dioswan, hermanosninchejwanqa, mana suyankuchu mana pantaspa comentananchejta (Sal. 103:12-14). Hermanosninchejqa familianchej kanku, munakuwanchejtaj (Mar. 10:29, 30; Juan 13:35). Chayrayku comentashaspa pantaykojtinchejqa entiendewasunchej. w19.01 pág. 8 párr. 3; págs. 10, 11 párrs. 10, 11

Kay tiempopi jovenesqa, Jehová Diosta yupaychanankupaj mayta kallpachakunanku tiyan. Jehová Diosqa munan jóvenes allinta kausakunankuta, sonqo juntʼasqataj. Jovenesqa Jehová Diospa yanapaynillanwan tukuy kausayninkupi allinta kausakunkuman. Chayta allinta entiendenapajqa yachakusunchej imastachus israelitas ruwasqankuta Sumaj Jallpʼata japʼinankupaj. Israelitas Sumaj Jallpʼaman yaykunankupajña kashajtinku, Jehová Diosqa mana nerqachu sumaj soldados kanankupaj, guerrapi maqanakunankupajtaj wakichikunankuta (Deu. 28:1, 2). Astawanpis nerqa nisqasninta juntʼanankuta, paypitaj confianankuta (Jos. 1:7-9). Wakin runasqa ichapis yuyarqanku Diospa nisqan mana allinchu kasqanta. Chaywanpis israelitasqa allintapuni ruwarqanku Diosta kasukuspa. Imaraykuchus Diosqa israelitasta yanaparqa cananeosta kutin kutita atipanankupaj (Jos. 24:11-13). Diosta kasukunapajqa, yuyaychaykunasnin allinninchejpaj kasqanpi creenanchej tiyan. Ajinallamanta tukuy imapi allinpuni riwasunchej. Unay tiempopi Diospi creejkunata allinpuni rerqa, noqanchejtapis allinpuni riwasunchej Diospi creejtinchejqa. w18.12 pág. 25 párrs. 3, 4

Wakenqa Jehová Diosmanta karunchakorqanku uj versículo waj jinamanta sutʼinchakusqanrayku, Diosta wasanchajkunata chayri testigosmanta llullasta parlajkunata creeykusqankurayku. Wakinrí Jehová Diosmanta karunchakorqanku manaña Diospa llajtanpi kayta munasqankurayku (Heb. 3:12-14). Chay hermanos Diosmanta karunchakunankumantaqa, allin kanman karqa apóstol Pedro jina Jesuspi confiananku. Wakin hermanosqa Diosmanta mana reparakuspalla pisimanta pisi karunchakorqanku. Imaynatachus uj barco mar kantumanta pisimanta pisi karunchakun, ajinata. Chayrayku Biblia niwanchej allinta qhawarikunanchejta “creeymanta ni jaykʼaj karunchakunanchejpaj” (Heb. 2:1). Pisimanta pisi karunchakoj hermanosqa, mana karunchakuytapunichu munarqanku. Chaywanpis Jehová Diosman qayllaykunankupaj mana kallpachakusqankurayku, chiriyaporqanku. w18.11 pág. 9 párrs. 5, 6

Diosta sumajta sirvinapaj wakichisqa kayta munanchej chayqa, Diospa Gobiernonmanta Willajkunapaj Escuelaman risunman. Chay escuelamanqa precursores riyta atinku. Ajinamanta Diosta astawan sirvinallankupajpuni. Chay escuelaman rejkunaqa, wakichisqa kananku tiyan mayllamanpis kachasqa kanankupaj. Chayrayku tukuypis kallpachakusunman chay escuelaman rinapaj (1 Cor. 9:23). Jehová Diosta yupaychasqanchejrayku tukuypis kallpachakunanchej tiyan wajkunawan kʼachas kanapaj, qorikuyta yachanapaj, tukuyta munakunapaj ima. Ajinamanta kusisqas, sonqo tiyaykusqastaj kasunchej (Gál. 5:22, 23). Ima problemapi rikukuspapis kusisqas kayta atisunman Jehová Dios jina wajkunawan kʼachas kaspa, paywan khuska llankʼaspa ima (Pro. 3:9, 10). w18.08 pág. 27 párrs. 16-18

Ichapis wakenqa tapukunkuman: “¿Uj cristiano atinmanchu imallamantapis divorciakuyta watejmantataj wajwan casarakuyta?”, nispa. Chaymanta parlaspa Jesús nerqa: “Pillapis warminmanta divorciakuspa wajwan casarakun chayqa, ñaupa warminta wasanchaspa qhenchachakun. Sichus warmipis qosanmanta divorciakuytawan wajwan casarakunman chayqa, chay warmeqa qhenchachakullantaj”, nispa (Mar. 10:11, 12; Luc. 16:18). Jesuspa nisqanqa sutʼita reparachiwanchej qhariwarmis ujchasqallapuni kanankuta munasqanta, noqanchejpis qhariwarmi kausayta jatunpaj qhawananchejta munasqanta. Pillapis warminmanta divorciakuspa wajwan casarakojqa qhenchachakun. Imaraykuchus imallamantapis divorciakoj qhariwarmisqa, Diospa ñaupaqenpi ‘uj runa jinallapuni kanku’. Chantapis Jesús nerqa: ‘Pillapis warmin mana khuchichakuy juchaman urmajtillan, paymanta divorciakojqa, qhenchachakuyman warminta urmachinman’, nispa. Chay tiempomanta divorciada warmisqa ichapis watejmanta casarakuyta munaj kanku mikhunata, ropatapis mana faltachikunankurayku. Jinamantataj chay warmeqa watejmanta casarakuspa, qhenchachakoj. w18.12 pág. 11 párrs. 8, 9

Habacucqa Jehová Dioswan parlasqanrayku manaña anchata llakikorqachu. Manaqa suyarqa Jehová Dios tukuy imata allinchananta. Habacucqa jinata nerqa: “Suyallasaj, maypachachus Dios chay ñakʼarichiwajninchejpa soldadosninta ñakʼariyman churanqa, chay pʼunchayta”, nispa (Hab. 3:16). Habacucmanta yachakunchej Jehová Diosman orakuspa llakiykunasninchejta willakunapuni kasqanta. Yachakullanchejtaj Jehová Diosta kasukuna kasqanta. Payqa Palabrannejta, llajtannejtataj yachachiwanchej. Chantapis yachakunchej Jehová Diospi pacienciawan suyakuna kasqanta, tukuy imata tiemponpi allinchananpitaj atienekuna kasqanta. Jehová Dios allin kausayta apamunanpi Habacuc jina atienekuspaqa, ima llakiytapis kusisqas aguantasunchej. Imaraykuchus yachanchej Tatanchej Jehová sajra kajmanta libranawanchejta (Rom. 12:12). w18.11 págs. 15, 16 párrs. 11, 12

Jehová Diosqa mana allinpajchu qhawan wajkunata pantachiyta, juchallichiyta, paymanta karunchachiyta ima. Chayrayku Jesús nerqa: “Noqapi creejkunaqa wawas jina kanku. Sichus pipis ujninta juchaman urmachinman chayqa, aswan allin kanman chay runapajqa burro muyuchin chay molino rumita kunkanman warkhuykuspa, qochaman wijchʼuykunanku”, nispa (Mar. 9:42). Jesuspa nisqanqa reparachiwanchej wajkunata pantachiyta mana allinpajchu qhawasqanta. Jesusqa Jehová Dios jina yuyarqa. Chayrayku nisunman Jehová Diospis wajkunata pantachiyta manallataj allinpajchu qhawasqanta (Juan 14:9). Noqanchejqa kallpachakunanchej tiyan Jehová Dios jina, Jesús jinataj yuyanapaj. Chaytaj ruwasqasninchejpi yachakunan tiyan. Por ejemplo, ichapis munasqanchejman jina vistikusunman chayri kʼachanchakusunman. Chaywanpis ichá ajinata vistikuspa wajkunata pantachishasunman chayri pʼenqachishasunman manarí mana allin imasta yuyachishasunman. Chayta reparaspaqa hermanosninchejta munakusqanchejrayku maychus kajta vistikunanchejpaj kallpachakunanchej tiyan. w18.11 pág. 25 párrs. 9, 10

Jehová Diostaqa tukuy sonqo munakunanchej tiyan. Imaraykuchus Satanasqa Diosman churanakorqa, noqanchejmanpis churanakushallawanchejtaj. Satanasqa nerqa Dios mana allintachu kamachisqanta, payllapi yuyasqanta, llulla kasqantataj. Chayta nispaqa Diospa sutinta pisipaj qhawacherqa. Adanwan Evawantaj Satanaspa ladonmanta churakorqanku. Jinaspataj Diospa contranpi oqharikorqanku (Gén. 3:1-6). Adanwan Evawanqa Edén huertapi tiyakushaspa ashkha imasta ruwayta aterqanku Jehová Diosta tukuy sonqo munakunallankupajpuni. Chaywanpis paykunaqa mana Diosta tukuy sonqochu munakorqanku. Chaytaj sutʼi yachakorqa Satanás paykunata pantachisqanpi. Unayninmantaj Jobpa tiemponpi Satanasqa runasmanta nerqa, ni pipis Jehová Diosta tukuy sonqo kasukuyta atisqanta (Job 1:8-11). Jobqa juchasapa kasqanrayku noqanchej jinallataj pantaj. Jinapis Jehová Diosqa payta munakorqa tukuy sonqo kasukusqanrayku. w19.02 págs. 3, 4 párrs. 6, 7

Uj pacha Jesús nerqa: ‘Sumaj perlasta maskʼaj ranqheroqa may valorniyoj perlata tariytawan, tukuy imasninta usqhayllata vendemusqa. Chantá chay perlata rantikapusqa’, nispa (Mat. 13:45, 46). Chay perlaqa ninakun imapunichus Diospa Gobiernon kasqanta entiendeywan. Jesusqa chay rijchʼanachinawan reparachiwanchej, Diospa Gobiernonmanta yachakuy uj perla jina may valorniyoj kasqanta. Noqanchejtaj Diospa Gobiernonmanta yachakunapaj, Bibliaj nisqasnintataj entiendenapaj tukuy imata saqerqanchej. Chayrayku amapuni Diosmanta karunchakunachu (Pro. 23:23). Chaywanpis wakin hermanosqa chiriyaporqanku, Diosmantataj karunchakaporqanku. Noqanchejqa, mana chay hermanos jina karunchakunapaj Bibliata kasukunanchej tiyan. Biblia niwanchej: ‘Cheqa kajpi purillaypuni’, nispa (3 Juan 2-4). Cheqa kajpi pureyqa niyta munan Bibliaj nisqasninta tukuy imapi kasukuy. Chaytaj kausayninchejpi yachakunan tiyan. w18.11 pág. 9 párr. 3

Jehová Diosqa uj angelnejta Josueman kamachillarqataj ama Jericó llajtata atacanankuta. Astawanpis nerqa: ‘Jericó llajtata uj kutita sapa pʼunchaypi muyuyninta muyurinkichej. Chaytaqa ruwankichej sojta pʼunchayta. Qanchis kaj pʼunchaypitaj qanchis kutita llajtata muyurinkichej’, nispa. Chayta uyarispa israelita soldadosqa ichapis nerqanku: “Chayta ruwaspaqa tiempollanchejta usuchisunchej, kallpanchejtapis qhasita tukuchisunchej”, nispa. Ajinata yuyankuman karqa chaypis, Jehová Diosqa chay kamachiykunata mana qhasipajchu qorqa. Imaraykuchus israelitasqa chay kamachiykunata kasukuspa mana maqanakuspalla Jericó llajtata japʼikaporqanku. Jinamantataj repararqanku Jehová Diosta kasukuy allinninkupaj kasqanta, paypitaj confianankupuni kasqanta (Jos. 6:2-5). Jehová Diosqa mana yuyasqanchejman jinapunichu imatapis ruwan. Chayrayku llajtannejta wakin kamachiykunata qowanchej. A vecesqa imajtinchus wakin cambios kasqanta mana entiendeyta atillanchejchu. Por ejemplo ichapis mana allinpajchu qhawarqanchej predicanapaj, estudianapaj, reunionespaj ima celularta chayri tabletata apaykachana kasqanta. Chaywanpis kunanqa ichapis reparanchej chay aparatos sumajta yanapawasqanchejta. Chayrayku Diospa llajtanpi chay jina cambiosta rikuspa kasukunapacha, ajinamanta astawan Jehová Diospi atienekusunchej, aswan ujchasqastaj kasunchej. w18.10 pág. 23 párrs. 8, 9

Judiosqa suyarqanku Mesías problemasninkuta chinkachinanta, Jesuspa yachachisqasninpis chayllatataj suyasharqanku. Ichapis chayrayku Galileamanta runasqa Jesusta reyninkuta jina churayta munarqanku. Yuyarqankuchá Jesusqa uj sumaj gobierno kananta. Imaraykuchus payqa sumajta yachachej, onqosqasta sanoyachej, yarqhasqastapis mikhuchej. Uj kuti Jesusqa milagrota ruwaspa casi 5.000 runasman mikhucherqa, runastaj chay milagrota rikuspa mayta tʼukorqanku. “Chantá munajta mana munajta reyninku kananpaj Jesusta apayta munasharqanku, Jesustaj chayta yachaspa watejmanta sapallan orqoman riporqa” (Juan 6:10-15). Qʼayantintaj Jesusqa runasman sutʼincharqa mana mikhuchejchu jamusqanta, manaqa Diospa Gobiernonmanta yachachej. Chayrayku Jesús nerqa: “Ama pʼosqoj mikhunaraykuchu llankʼaychej, manachayqa wiñay kausayta qoj mikhunarayku”, nispa (Juan 6:25-27). w18.06 pág. 4 párrs. 4, 5

Lajrasqa soqoso, ñakʼayllata larwashaj mechero imaqa, ninakun manchay phutisqa runaswan. Señorninchej Jesustaj chay jina runasta entiendej. Chayrayku paykunata munakoj, khuyakoj, lugarninkupi churakoj, pacienciawantaj yachachej. Chaynejta wawaspis Jesusman kʼaskakoj kanku (Mar. 10:14). Noqanchejqa mana Jesús jinapunichu runasta entiendesunchej, nitaj pay jinapunichu runasman yachachisunchej. Chaywanpis predicacionpi runaspa lugarninpi churakuyta atisunman. Chayrayku qhawarinachej imaynasmantachus runaspa allinninkuta maskʼayta atisqanchejta. Comercianteswan autoridadeswan pastoreswan curaswan imaqa, runasmanta mana khuyakunkuchu, astawanpis engañanku. Chayrayku may chhika runasqa mitharasqas jina manchay llakisqas kashanku (Mat. 9:36). Nitaj pipipis confiayta atillankuchu, nillataj kay kausay allinyananta suyankuchu. Chayrayku noqanchejqa paykunawan kʼachamanta parlarinanchej tiyan, khuyakunanchejtaj tiyan. Ashkha runasqa kʼachamanta, respetowantaj parlapasqanchejrayku uyariyta munallawanchej, manataj Bibliamanta sumajta sutʼinchasqanchejraykullachu. w18.09 pág. 31 párrs. 13, 14

Bibliata estudiaspa, nisqasninta kasukuspa, Diostataj kausayninchejpi ñaupajman churaspaqa, Diosmanta yachakuyta munasqanchejta rikuchisunchej. Chaykunata ruwaspaqa kusisqa kasunchej, Diosninchej sumaj kausayta apamunanmantataj mana iskayrayasunchu (Tito 2:13). Imapi rikukuspapis kusisqallapuni kanapajqa, Jehová Diosman astawan qayllaykunanchej tiyan. Apóstol Pablo nerqa: “Señorpi kusikuychejpuni. Ujtawanpis nillanitaj: ¡Kusikuychej!”, nispa (Fili. 4:4). Jehová Diosman astawan qayllaykunapajqa Diosta astawan rejsinanchej tiyan (Pro. 3:13, 18). Kusisqallapuni kanapajqa Bibliaj nisqanman jinallapuni kausakunanchej tiyan. Chaymanta parlaspa Jesuspis jinata nerqa: “Qankunaqa chay imasta yachankichejña, chaykunata ruwaspataj kusisqa kankichej”, nispa (Juan 13:17; Sant. 1:25). Kusisqallapuni kayta munaspaqa, Diosmanta yachakunallanchejpuni tiyan, Bibliaj nisqantataj kasukunallanchejpuni tiyan. w18.09 pág. 18 párrs. 4-6

Epafrasqa hermanosta allinta rejserqa, paykunamantataj llakikorqa. Chantapis Pabloqa Epafrasmanta nerqa: “Noqawan khuska presochasqa kashan”, nispa. Chaytaj sutʼita rikuchiwanchej paypis llakiykunasniyoj kasqanta (File. 23). Epafrasqa llakiykunasniyoj kaspapis wajkunamanta llakikorqa. Chayrayku paykunata yanapananpaj Diosmanta mañaporqa sutisninkuta oqharispa. Noqanchejpis Epafras jinallataj hermanospa sutisninkuta oqharispa Diosmanta mañapusunman. Diosninchejtaj chay hermanosta tʼukunapaj jina yanapanqa (2 Cor. 1:11; Sant. 5:16). Allin kanman piensarinanchej pikunapajchus Diosmanta mañapunanchejpi. Epafras jina Diosmanta mañapusunman llakiypi rikukoj hermanospaj chayri familiarninchejpaj. Ichapis wakenqa jatun problemaspi kashanku chayri juchaman urmanankupaj jinaña kashanku. Qhatiykachasqa hermanospajpis sutisninkuta oqharispa Diosmanta mañapullasunmantaj. Wañupojpa familiaresninpajpis Diosmanta mañapullasunmantaj. Chantapis guerrarayku, terremotorayku, inundacionesrayku, qolqeta pisichikusqankurayku sufrej hermanospajpis Diosmanta mañapullasunmantaj. May chhika hermanosqa Diospa yanapanta necesitashanku. Paykunapajtaj Diosmanta mañapusunman. w18.09 págs. 5, 6 párrs. 12, 13

Apóstol Pablo chayta yuyarichishaspa mana kapuyninchejwan yanapakunallatachu nisharqa, manaqa wajkunata yanapanata kallpachaspa, Bibliawan yuyaychaspataj (Hech. 20:31-35). Pabloqa ruwasqanwan, parlasqanwantaj yachachiwarqanchej wajkunata yanapanapaj munakuna kasqanta, uyarinapaj tiempochakuna kasqanta, tukuy kallpanchejwantaj yanapana kasqanta. Runasta estudiajkunaqa ninku uj runa imallatapis wajman qorejtin kusikusqanta. Uj libropitaj nin uj runaqa wajpa allinninta ruwaspa sonqo juntʼasqa sientekusqanta. Wakin yachayniyoj runastaj ninku: “Wajkunata yanapaj runasqa mana qhasipajchu kausashasqankuta sientekunku”, nispa. Chayrayku wakin yachayniyoj runasqa ninku mana onqonapaj, aswan kusisqa kanapajtaj wajkunata yanapanata mana pagota suyaspalla. Chayta yachayqa mana tʼukuchiwanchejchu. Imajtinchus Jehová Diosqa yachachiwarqanchejña, qorikoj kajtinchej kusisqa kananchejta (2 Tim. 3:16, 17). w18.08 pág. 22 párrs. 17, 18

Profeta Isaiasqa unaymantaña Jesusmanta jinata nerqa: “Payqa mana rikusqanman jinallachu juzganqa, nitaj uyarisqanman jinallachu justiciata ruwanqa. Manachayqa, cheqan kayman jina wajchasta juzganqa; kay pachapi llampʼu sonqoyojkunapaj justiciata ruwanqa”, nispa (Isa. 11:3, 4). Chayta yachaytaj mayta kallpachawanchej. Imaraykuchus chejninakuy chaupipi tiyakunchej, runaspis rikusqankuman jinalla juzganku. Tukuypis munanchej Jesús juzganawanchejta. Imajtinchus payqa mana rijchʼayninchejman jinallachu juzgawasunchej. Pantaj runas kasqanchejrayku qhawaranapaj churasqa kanchej. Rikusqanchejman jinallataj runasta juzganchej. Chayrayku Jesús nerqa, mana ñawisninchej rikusqanman jinallachu juzganata, “astawanqa cheqan kajman jina” juzganata. Jesusqa pay jina kananchejta munan, nitaj munanchu runasta rijchʼayninkuman jinalla juzgananchejta. w18.08 pág. 8 párrs. 1, 2

Jehová Diosqa mana cielomantapachachu parlamuwanchej, manaqa Biblianejta parlawanchej, kamachiykunatapis qowanchej. Chantapis Diosqa ‘allin mayordomonejta’ atiyninwan mikhunata jina qoshawanchej. Chaykunataj kanku publicaciones, videos, grabaciones ima (Luc. 12:42). Chay chhika publicacionesqa creeyninchejta kallpachan. Diospa nisqasnenqa Bibliapi qhelqasqa kashan. Chaytaj yanapawanchej Jehová Diospa makinpi kashasqanchejpi atienekunapaj. Chantapis rikuchiwanchej Jehová Dios Satanaspa ruwasqasninta, runaspa sajra ruwasqasnintapis chinkachinanta. Chayrayku Jehová Diosta uyarinapuni. Chayta ruwasunchej chayqa, ima llakiytapis kay tiempopi, aswan qhepamanpis aguantayta atillasun. Bibliaqa yuyarichiwanchej: “Qankunaqa sinchʼita sayanaykichej kanqa. Ajinamanta Diospa munayninta ruwaytawan, imatachus qonanta nisqanta japʼinaykichejpaj”, nispa (Heb. 10:36). w19.03 pág. 13 párrs. 17, 18

Josueqa ichapis piensarqa israelitas mana valechinankuta. Imajtinchus Moisesqa unayta uj kamachej jina israelitasta ñaupajman pusarqa (Deu. 34:8, 10-12). Josué 1:1, 2 versiculosmanta parlaspa uj libro nin: “Unay tiempopi uj gobierno cambiakojtenqa nacionninpi ima chʼajwaspis kajpuni. Kay tiempopipis ajinallataj”, nispa. Josueqa israelitasta kamachinanmanta manchachikuspapis Jehová Diospi atienekorqa, kamachiykunasnintapis kasukorqapacha (Jos. 1:9-11). Jehová Diosqa paypi Josué atienekusqanrayku, uj angelnejta Josueta yuyaycharqa israelitasta sumajta pusananpaj. Chay angelqa ichapis Palabra karqa. Palabraqa Diospa Wawan, tukuy ima ruwasqa kajmantataj ñaupaj kaj (Éxo. 23:20-23; Juan 1:1). Jehová Diosqa Josueta kamachejta jina churashaspa, israelitasta yanaparqa mana chʼajwasta rikhurichinankupaj. w18.10 págs. 22, 23 párrs. 1-4

Jehová Diosqa yachan pikunachus payta tukuy sonqo yupaychashasqankuta. Paykunaj sutisninkutataj uj “libroman” churan “yuyarisqa kanankupaj”. Sutinchej Jehová Diospa ‘libronpi’ kanallanpajpuneqa, Malaquías nisqanman jina Jehová Diosta manchachikunanchej tiyan, sutintataj jatunchananchej tiyan. Chaywanpis waj dioskunata yupaychasunman chayqa, sutinchej Jehová Diospa libronmanta orqhosqa kanqa (Éxo. 32:33; Sal. 69:28). Chayrayku mana ninallanchejchu tiyan “Jehová Diospa munayninta ruwasaj” nispa, nitaj bautizakunallanchejchu tiyan. Manaqa Jehová Diospa munasqanman jina kausakunanchej tiyan. Wañupunanchejkamataj ruwasqasninchejpi yachakunan tiyan Jehová Diosta kasukusqanchej (1 Ped. 4:1, 2). w18.07 págs. 23, 24 párrs. 7-9

Diosta unaytaña sirvispapis, mana nisunmanchu wiñay tukusqa cristianosña kasqanchejta. Imajtinchus wiñay tukusqa cristianos kanapajqa, Bibliata sumajta rejsinanchej tiyan, entiendenanchejtaj tiyan, chaypajtaj mayta kallpachakunanchej tiyan. Chayrayku Bibliata sapa día leenanchej tiyan (Sal. 1:1-3). Bibliata sapa día leespataj Diospa kamachiykunasninta, yuyaychaykunasnintawan sumajta entiendesunchej. Jehová Diosqa cristianosta kamachiwanchej purajmanta munanakunanchejta. Chayrayku Jesús discipulosninman nerqa: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35). Santiagopis nerqa runasta munakuy “reypa kamachisqan” kasqanta (Sant. 2:8). Pablotaj nerqa: “Munakuyniyojqa leyta juntʼan”, nispa (Rom. 13:10). Wajkunata munakuy may importante kasqanrayku, Biblia nin: “Diosqa munakuymin”, nispa (1 Juan 4:8). w18.06 pág. 19 párrs. 14, 15

Israelitas Jehová Diospa contranpi oqharikusqankurayku Moisés phiñakorqa. Payqa phiñakuywan atipachikuspa mana piensarispalla imatapis parlarparerqa. Ñaupaj kutipi israelitas yakumanta quejakushajtinku, Moisesqa Jehová Diospa yanapanta maskʼarqa, chayman jinataj ruwarqa (Éxo. 7:6). Chaywanpis israelitas qhepan kutipi yakumanta quejakushajtinku, Moisesqa mana Diosta kasukorqachu phiñasqa kasqanrayku. Moisesqa maytachá phiñakorqa israelitas sapa kuti Diospa contranpi oqharikusqankumanta. Jinamantataj payllapi yuyasqanrayku mana Diosta jatuncharqachu. Moisesqa Sumaj Jallpʼaman yaykunanpajña kashajtin juchallikorqa, israelitaspa pantasqallankupi yuyasqanrayku. Noqanchejpis mosoj jallpʼaman yaykunapajña kashanchej. Chaywanpis ichá Moisés jina juchallikusunman (2 Ped. 3:13). Chayrayku mana pantanapajqa sumajta qhawarikunanchej tiyan. Imajtinchus mosoj jallpʼaman yaykunapajqa Jehová Diospa munayninta ruwananchej tiyan, yanapantataj maskʼananchej tiyan (1 Juan 2:17). w18.07 pág. 15 párrs. 14-16

Satanasqa mana pitapis obliganmanchu munayninta ruwachinanpaj (Sant. 1:14). Chaywanpis ashkha runasqa, mana reparakunkuchu Satanaspa ladonmanta kashasqankuta. Chayrayku uj runa Bibliamanta yachakushaspaqa, ajllanan tiyan Satanaspa ladonmanta kaytachus chayri Diospa ladonmanta kaytachus (Hech. 3:17; 17:30). Sichus Jehová Diosta kasukuspa ladollanpipuni kasun chayqa, Satanasqa mana paymanta karunchawasunchu (Job 2:3; 27:5). Biblia nisqanman jina, Satanaswan sajra angeleswanqa manallataj yachayta atinkuchu imatachus yuyasqanchejta, imachus sonqonchejpi kasqantapis. Imajtinchus Jehová Dioswan, Jesusllawan imachus sonqonchejpi kasqanta yachayta atinku (1 Sam. 16:7; Mar. 2:8). Jehová Diospa munayninman jina kausakunapaj kallpachakusunchej chayqa, payqa Satanasmanta jarkʼawasunchej (Sal. 34:7). Satanastaqa allinta rejsinanchej tiyan, chaywanpis mana manchachikunanchejchu tiyan. Juchasapas kaspapis Jehová Diospa yanapayninwan Satanasta atipasunman. Satanaspa contranpi sayaykojtinchejqa, pay noqanchejmanta ayqenqa (Sant. 4:7; 1 Ped. 5:9). w18.05 pág. 26 párrs. 15-17

Joven, karu lugarman flotapi viajanaykipi piensariy. Chaypajqa terminalmanraj rinayki kanman. Terminalman chayaspataj ichapis umaykita muyuchikuwaj ima flotamanchus wicharinaykita mana yachasqaykirayku. Chaywanpis maymanchus viajanaykita sutʼita yachaspaqa, yachanki ima flotamanchus wicharinaykita. Kausayninchejqa, waj lugarman viajay jina. Chayrayku jovenespis imatachus kausayninkuwan ruwanankuta ajllananku kashan. Imatachus ruwanankuta mana yachajtinkoqa, umankuta muyuchikunkuman. Chaywanpis kausayninkuwan imatachus ruwanankuta yachajtinkoqa, allin kajta ajllayta atillanqanku. Jovenesqa, Jehová Diosta kusichiyta atinkuman paypa yuyaychasqanta kasukuspa. Chaytataj sutʼita rikuchinkuman ima trabajotapis ajllashajtinku, universidadman rinankutachus manachus ajllashajtinku chayri casarakunankutachus manachus ajllashajtinku. Jehová Diosninchejpaj astawan llankʼajtinkoqa, Jehová Diosman astawan qayllaykonqanku. Jehová Diosninchejtaj tukuy imapi paykunata bendicenqa. w18.04 pág. 25 párrs. 1-3

Jefteqa, nisqanta juntʼarqa, wawantataj Jehová Dioswan tinkukuna toldoman kacharqa wañupunankama chaypi Diosta sirvinanpaj (Jue. 11:30-35). Jefté mayta llakikojtinpis, wawanchá astawan llakikorqa. Chaywanpis Jeftej wawanqa, tatanpa nisqanta juntʼarqa (Jue. 11:36, 37). Jeftej wawanqa Jehová Dioswan tinkukuna toldoman sirvej ripusqanrayku, niña casarakuyta, nitaj wawasniyoj kaytapis aterqachu. Chayrayku Jeftej wawanqa sonqochasqa kayta necesitarqa. Biblia nin: “Chaymantapacha kay usu karqa israelitas ukhupi: Sapa wata sipaskuna Jeftejpa ususinmanta waqaj rinku tawa pʼunchayta”, nispa (Jue. 11:39, 40). Jeftej wawanpa kausaynenqa, tʼukurichiwanchej kay tiempopi Jehová Diospaj astawan llankʼanankurayku solteros qhepakojkunapi. Paykunataqa sumajta ruwashasqankuta nisunman, kallpacharisunmantaj (1 Cor. 7:32-35). w18.04 pág. 17 párrs. 10, 11

Ashkha angelesqa Diospa contranpi sayaykuspa Satanasman ujchaykukorqanku. Niraj Jatun Para kashajtintaj, Satanasqa wakin angelesta tanqarqa warmiswan puñuykunankupaj. Kunantaj chay angelesqa Satanaspa atiyninpi kashanku. Chaymanta parlaspa Biblia nin: “Chupanqa cielopi kaj chʼaskasmanta kinsaman tʼaqasqamanta ujnin kaj tʼaqanta pichaspa, jallpʼaman wijchʼuykorqa”, nispa. Chay chʼaskasqa angeleswan ninakun. Chay versículo nisqanman jinataj ashkha ángeles Satanasta qhaterqanku (Gén. 6:1-4; Apo. 12:3, 4). Chay angelesqa, Satanaspa makinman churakuspa Jehová Diosta wasancharqanku. Paykunaqa sumaj organizasqa kashanku, imaynachus Diospa Gobiernon sumaj organizasqa kashan, ajina. Chay sajra angelespa gobiernonqa Satanás. Paytaj sajra angelesman atiyta qorqa jallpʼantinta kamachinankupaj (Efe. 6:12). Satanasqa sajra angelesninnejta gobiernosta munasqanman jina apaykachan. w18.05 pág. 23 párrs. 5, 6

Jehová Diosqa uj kʼacha tata jina wakin kutis kʼamiriwanchej, yuyaychawanchejtaj. Davidqa Jehová Dios kʼamirejtin mana phiñakorqachu. Davidqa Jehová Diospa yuyaychaykunasninpi tʼukurej, kallpachakojtaj Dios jina yuyananpaj. Chantapis tukuy sonqo chay yuyaychaykunata japʼikoj, chaytaj yanaparqa cambiananpaj, sumaj runamantaj tukunanpaj. Sichus jovenespis David jina Diospa yuyaychaykunasninta japʼikonqanku chayqa, Jehová Diosta astawan munakonqanku, tukuy imapitaj kasukonqanku. Ajinamantataj wiñay tukusqa cristianoman tukonqanku. Christin sutiyoj hermana nin: “Estudiaspa, leesqaypitaj tʼukurispaqa reparani Jehová Dios noqapaj jinapuni chay yuyaychaykunata wakichisqanta”, nispa. Sichus jóvenes Jehová Dios jina yuyanqanku chayqa, Jehová Diosqa paykunata yanapanqa yachayniyoj kanankupaj, allinta reparanankupaj ima. Jehová Diosqa munan jóvenes reparanankuta kay mundo sajra imaswan juntʼa kasqanta, imapichus tukunanta ima. Chantapis munan reparanankuta imachus aswan importante kasqanta, munallantaj allin kajtapuni ruwanankuta, imachus aswan qhepaman kananmanta mana manchachikunankuta ima (Isa. 26:3). w18.12 pág. 26 párrs. 9, 10