Enero

Cristianosqa Jehová Diosninchej qowasqanchej llankʼayta, ‘allinta juntʼayta’ munanchej, imaynatachus chayta ruwanatapis (2 Tim. 4:5). Chay llankʼayqa ima ruwanamantapis aswan ñaupajpi kashan, aswan usqhaytataj ruwana tiyan. Jinapis mayta munaspapis, ichá mana chayta ruwayta atillanchejchu. Tukuypis ashkha ruwanasniyoj kanchej. Ichá familianchejta uywanapaj diantinta trabajanchej. Manachayrí onqosqa chayri sinchʼi llakisqa kashanchej. Manaqa viejitosña kasqanchejrayku, ñakʼayllataña purishanchej. Chayri ujnin familianchej ajina llakiypi kashan. Chay jina llakiykunawan kausananchej kajtinpis, Jehová Diospaj llankʼayninchejta allinta juntʼayta atisunman. Diospaj astawan llankʼayta munaspapis, ichá mana atinchejchu. Jina kajtin, ama anchata llakikunachu. Jesusqa yacharqa, mana tukuychu ashkha horasta predicayta atisqanchejta (Mat. 13:23). Jehovaqa paypaj tukuy atisqanchejta llankʼasqanchejta, sumajpaj qhawan (Heb. 6:10-12). w19.04 pág. 2 párrs. 1-3

Supayqa Jehová Diospa sutinta chʼichichan. Ujnin llulla yachachiynenqa, sajra runas wañuspa infiernopi ñakʼarishasqankuta nisqan. Chay yachachiywan, munakuyniyoj Jehová Diosninchejta, pay jina sajrapis kanman jinata qhawachin (1 Juan 4:8). Tatanchej Jehovamanta ajinata parlajta uyarispa, rabiakunchej. Jehová Diosninchejpa sonqonpis nananchá. Payqa runasta sufrichiyta millaypaj qhawan (Jer. 19:5). Supayqa Jesucristo qhasillata kausayninta qosqanta yuyachin (Mat. 20:28). Supayqa wañojtinchej almanchej kausakushasqanta nin. Cierto kanman chayqa, wiñay kausayniyojña kanchej, niñataj wiñay kausayta japʼinapaj Cristo noqanchejrayku wañunanta necesitarqanchejchu. Jehová Diosninchejrí, mayta munakuwasqanchejrayku Wawanta kachamorqa noqanchejrayku wañunanpaj. Jesucristopis manchayta munakuwasqanchejrayku, kausayninta entregarqa (Juan 3:16; 15:13). Jehovawan Jesuswanqa maytachá llakikunku, Satanaspa llulla yachachiynin Jesuspa wañusqanta qhasillapaj qhawachisqanmanta. w19.04 pág. 14 párr. 1; pág. 16 párrs. 8, 9

Jesuspa yachachisqantaqa, Mateo, Marcos, Lucas, Juan librospi tarisunman. Chay librospeqa Jesuspa nisqasninta, ruwasqasnintawan yachakusunman. Jinapis tukuynin Mosoj Testamento, Jesuspa yuyayninta entiendenapaj yanapawanchej. Chay librosta qhelqaj runaspataqa, “Cristoj yuyaynin” kaporqa, Jehová Diospa atiyninwantaj qhelqarqanku. Jesusqa tukuy imamanta yachacherqa. Chayrayku Cristoj leynenqa, wasipi, trabajopi, escuelapi, congregacionpipis yanapawasunman (Gál. 6:2). Chay leytaqa yachakusunman, Mosoj Testamentomanta librosta leespa, chaykunapi tʼukurispa ima. Chay librospeqa kamachiykuna, yachachiykuna, yuyaychaykunapiwan tiyan. Chaykunaman jina kausakuspaqa, Cristoj leyninta juntʼasun. Chay leyta juntʼaspataj, munakuyniyoj Tatanchej Jehovatapis kasukushallanchejtaj. Imaraykuchus Jesusqa, Tatanpa yachachisqallanta yachacherqa (Juan 8:28). w19.05 pág. 3 párrs. 6, 7

Ashkha runasqa Kuraj Supaypa munasqanta ruwashanku. Jinapis Tatanchej Jehovaqa, Supaypa mañasninta sumajta yachan. Jehová Diosqa llakiyninchejta allinta entienden, sonqochawasuntaj. Payqa “may khuyakuyniyoj Tata, tukuy imapi sonqochaj Diostaj. Paymin sonqochawanchej tukuy llakiyninchejpi. Ajinamanta noqanchejpis imaymana llakiykunapi kajkunata sonqochananchejpaj, imaynatachus Dios sonqochawanchej, ajinata”. Chay jina kʼacha Tatata sirvispa, may kusisqa kanchej (2 Cor. 1:3, 4). Wakin tatas chayri mamasqa, wawasninku abusasqa kajtinku mana imatapis ruwankuchu. Wakin wawastataj familiankumanta kajkunallataj abusanku. Ajina familiaspi wiñakojkunaqa, astawan sonqochanata necesitanku. Rey Davidqa Jehová Diosninchej sonqochayta atiwasqanchejta yacharqa (Sal. 27:10). Payqa yacharqa tatanwan mamanwan saqerparejtinkupis, Diosqa mana saqerparinanta. Kunanpis Tatanchej Jehovaqa, sufrejkunata kamachisninwan sonqochachin. Jallpʼantinpi hermanos, familianchej kanku. Jesuspis nerqa: “Pichus cielopi kashaj Tataypa munayninta ruwajqa, chaymin hermanoy, hermanay, mamaytaj”, nispa (Mat. 12:48-50). w19.05 págs. 15, 16 párrs. 8, 9

¿Imatá ñaupajta estudiananchej tiyan? Diospa Palabranta. Sapa pʼunchay Bibliata estudianapaj tiempochakunanchej tiyan. Kunanqa chaupi semana tantakuypaj, sapa semana pisi capitulosllataña leerinchej. Ajinamanta astawan tiempo kapuwanchej, leesqanchejpi tʼukurinapaj, chay leesqanchejta astawan ukhuncharinapaj ima. Chay capitulostaqa mana leerpanallachu tiyan. Imaraykuchus leesqanchejqa sonqonchejman yaykunan tiyan, Jehová Diosmantaj astawan kʼaskaykuchinawanchej tiyan (Sal. 77:12). Torremanta Qhawaj revistata estudianapaj tantakuypeqa, astawanqa Bibliata estudianchej. Chayrayku Bibliaj textosninta sumajta qhawarina, astawanraj mayqenkunachus congregacionpi leekonqa, chaykunata. Qhawarina sapa textomanta mayqen palabraschus, parrafoj yachachisqanta sutʼinchasqanta. Chantapis tukuynin textospi tʼukurinapaj tiempochakuna, piensarinataj imaynatachus chayman jina ruwananchejta (Jos. 1:8). w19.05 pág. 27 párrs. 5, 9

Jesuspa ruwasqanmanta mayta yachakusunman. Payqa Diospa Gobiernonmanta willayta ñaupajman churarqa. Jesusqa runasman Diosmanta willananrayku, karusta purerqa. Payqa wasimanta wasi, mercadospi, plazaspi, waj lugarespiwan predicarqa. Jesusqa Diosmanta willayta kausayninpi ñaupajman churarqa. Noqanchejpis Jesús jina ruwasunman, sapa atispa mayllapipis sumaj willaykunata willarispa. Predicananchejrayku munayninchejta, ruwanasninchejtapis qhepaman churanchej (Mar. 6:31-34; 1 Ped. 2:21). Wakin hermanosqa, precursores especiales, precursores regulares chayri precursores auxiliares kanku. Wakintaj waj parlayta yachakunku chayri maypichus pisi predicajkuna kanku, chayman predicaj ripunku. May chhika hermanostaj, tukuy atisqankuta Diosmanta willashallankupuni. Ashkhata chayri pisillata predicajtinchejpis, Jehová Diosqa ruwayta atisqallanchejta mañawanchej. w19.04 pág. 4 párrs. 7, 8

Kay tapuykunapi piensarina: “¿Sonqonchejpi wajkunamanta envidiakunchejchu?” (1 Ped. 2:1). “Llajtanchejmanta, escuelayoj kasqanchejmanta, chayri qhapaj kasqanchejmanta, ¿jatunchakunchejchu?” (Pro. 16:5). “Qhapaj runas kanchej chayqa, ¿wajchasta pisipajchu qhawanchej? Wajcha runas kanchej chayrí, ¿qhapajkunata chejnikunchejchu? Waj llajtayojkunata, ¿pisipajchu qhawanchej?” (Sant. 2:2-4). “Satanaspa mundonpi kaj imasta, ¿munapayanchejchu?” (1 Juan 2:15-17). “Millay imaswanchu chayri sajra imaswanchu, ¿kusirikuyta munanchej?” (Sal. 97:10; 101:3; Amós 5:15). Chay tapuykunapi tʼukurispaqa, reparakusunman imaspichus cambiananchejraj kasqanta. Reparakojtinchejpis manapis, masichakunchej chay runas jina kanchej (Pro. 13:20). Escuelapi chayri trabajopi kashajtinchej, ashkha runaswan masichakunchej. Paykunataj mana yanapawanchejchu Jehová Dios jina yuyananchejpaj. Jinapis congregacionpeqa, sumaj amigosta tarisunman. Chay amigosninchejtaj ‘munakuyniyoj kanapaj, allin ruwaykunatataj ruwananchejpaj’ yanapawasun (Heb. 10:24, 25). w19.06 pág. 12 párrs. 13, 14

Jehová Diosninchejqa mana munarqachu problemasniyoj chayri llakiykunasniyoj kananchejta. Chayrayku ama tʼukunachu, llakiypi kaj hermanonchej imatapis parlarparejtin (Job 6:2, 3). Jehovamanta chayri noqanchejmanta pantasqata parlajtinpis, ama usqhayta phiñakunachu, nitaj juchachanachu. Wakin kuti, sinchʼi llakiypi kaj hermanonchejqa, yuyaycharinanchejta chayri kʼamirinanchejta necesitallantaj (Gál. 6:1). ¿Imaynatá ancianos chay hermanota yanaparinkuman? Elihú jina ruwaspa. Elihuqa Job parlashajtin khuyakuywan uyarerqa (Job 33:6, 7). Chantá Jobta niraj yuyaycharishajtin, imaynachus kashasqanta sumajta entienderqa. Ancianospis Elihú jina ruwankuman, llakisqa kajkunata sumajta uyarispa, imaynachus kashasqankuta entiendespa ima. Chayta ruwajtinkoqa, yuyaychasqankuwan llakisqa kajpa sonqonman chayanqanku. w19.06 págs. 22, 23 párrs. 10, 11

Autoridades Jehová Diosta manaña sirvejta saqewajtinchej, ¿imatá ruwasunman payta yupaychanallanchejpajpuni? Sucursalqa ancianosnejta yuyaychawasun, kamachiwasuntaj. Sucursalmanta hermanos ancianoswan mana parlayta atejtinkoqa, ancianos niwasunchej imaynatachus Diosta sirvinallatapuni. Paykunaqa Bibliaman jina, publicacionesman jinataj yuyaychawasunchej (Mat. 28:19, 20; Heb. 10:24, 25). Jehová Diosqa niwanchej, yachachiykunasninta mana faltachinawanchejta (Isa. 65:13, 14; Luc. 12:42-44). Jehová Diospa llajtanqa sinchʼita sayananchejpaj, imatachus necesitasqanchejta qollawasunpuni. Chayrayku ama chaymanta iskayrayanachu. Autoridades niña predicajta, nitaj tantakojta saqewajtinchejqa, Biblianchejta, publicacionesninchejtawan sumajta pakaykunanchej tiyan. Chaykuna papelpi chayri celularpi kajtinpis, ama mayllapipis saqerparinachu, wajkuna facilta tarinankupaj jinaqa. Creeyninchej sinchʼillapuni kananpajqa, tukuy atisqanchejta ruwananchej tiyan. w19.07 pág. 10 párrs. 10, 11

May chhika watasta, runasqa religionniyojpuni karqanku. Jinapis kunanqa manaña jinachu. Sapa kuti astawan ashkha runas ninku, ni mayqen iglesiamanta kasqankuta. Wakin suyuspeqa casi tukuynin runas, Diospi mana creenkuchu chayri ni mayqen iglesiaman rinkuchu (Mat. 24:12). ¿Imaraykú? Wakin runasqa munaynillankuta ruwayta munanku chayri problemasnillankupi yuyanku (Luc. 8:14). Wakintaj niña Diospi creenkuchu. Wakintajrí Diospi creespapis, yuyanku religionqa ñaupa runasllapaj kasqanta, nitaj yanapawasqanchejta. Yuyallankutaj religionqa cienciawan churanakusqanta, nitaj creenapaj jinachu kasqanta. Ichapis kausay jinallamanta rikhurisqanta radiopi chayri telepi rejsisqa runasmanta uyarinku. Manaqa yachachejkunasninku chayri amigosninku chayta ninku. Jinapis imaschus Dios kasqanta rikuchisqanmanta, pisillata yachanku. Wakintataj mayta phiñachin, pastoreswan curaswan atiyniyoj kayta munasqanku, qolqemanta wañusqas kasqanku ima. Wakin lugarespitaj, gobiernosqa Diosta mana yupaychanapaj leyesta churanku. w19.07 pág. 20 párrs. 1, 2

Wiñay kausayta japʼinapaj correnapajqa, mana kallpayojpunichu kananchej tiyan. Ashkha hermanosqa, kallpanku pisiyajtinpis Jehová Diosta tukuy atisqankuta sirvishallankupuni (2 Cor. 4:16). Ichapis Jehová Diosta unaytaña sirvishanchej. Jinapis onqosqa kasqanchejrayku, manaña ñaupajta jinachu ruwashanchej. Ajina kajtenqa ama llakikunachu. Jehová Diosqa ‘mana qonqakunchu imastañachus paypaj ruwasqanchejta’ (Heb. 6:10). Chantapis Jehová Diosta munakusqanchejtaqa, mana paypaj mashkhatachus llankʼasqanchejpichu rikuchinchej. Astawanpis chaytaqa rikuchinchej, kusisqallapuni kaspa, paypaj tukuy atisqanchejta llankʼaspa ima (Col. 3:23). Jehová Diosqa maykamachus ruwayta atisqanchejta yachan, atisqallanchejtataj mañawanchej (Mar. 12:43, 44). w19.08 pág. 3 párr. 6; pág. 5 párrs. 11, 12

Jehová Diosqa kamachisninpa ‘sumaj ruwasqasninkunejta’ runasta payman pusamushan (Mat. 5:14, 15; 1 Ped. 2:12). Qosayki chayri warmiyki mana Jehovaj testigonchu chayqa, allin kanman congregacionmanta hermanosta rejsichinayki. Chantapis familianchejtaqa yanapallasunmantaj, reunionesninchejman pusarispa (1 Cor. 14:24, 25). Mayta suyashanchej tukuy familianchej Jehová Diosta sirvinankuta. Paykunata yanapanapaj mayta kallpachakojtinchejpis, ichá paykunaqa manapuni Jehová Diosta sirvenqankuchu. Jina kajtinpis ama llakikunachu. Paykunataqa mana obligasunmanchu Jehová Diosta sirvinankupaj. Jinapis ichá paykunaqa, Jehovata sirvispa kusisqa kasqanchejta rikuspa, Jehovata sirviyta munallanqankutaj. Chayrayku paykunapaj Diosmanta mañapuna, cheqa kajmanta respetowan parlarina, yanaparinallapunitaj (Hech. 20:20). Chayta ruwajtinchej, Jehová Diosqa bendeciwasunpuni. Familianchej Jehová Diosta sirvenqanku chayqa, paykunapis salvakonqanku. w19.08 págs. 18, 19 párrs. 15-17

¿Imatá Jesús chaywan niyta munasharqa? Pisi imasllawan kausakunata, nisunman yuyayninchejta uj imallapi churanata. Jesuspis Jehová Diosmanta willayta kausayninpi ñaupajman churarqa, chaytataj discipulosninman yachacherqa. “Ñaupajtaqa Diospa Gobiernonta, cheqan kaynintawan” maskʼallasunpuni chayqa, Jesús jina ruwasunchej (Mat. 6:33). Jehová Diospaj llankʼayta ñaupajman churasunman, ruwanasninchejta pisiyachispa. Ajinamanta astawan tiempoyoj kasun, runasta yanapananchejpaj Jehová Diosta rejsinankupaj, munakunankupaj ima. Ichapis astawan predicamunapaj, patronninchejta nisunman waj horaspi trabajananchejta. Chayrí kusirikunapaj tiemponchejta pisiyachisunman. w19.04 págs. 5, 6 párrs. 12, 13

Jehová Diospaj unaytaña llankʼaj hermanosmanta ashkhas, kay qhepa wataspi waj llankʼayta japʼerqanku. Jehovapaj astawan llankʼaj hermanospajqa, waj jinamantañataj yanapakuy mana facilchu karqa. Imajtinchus chay llankʼayman yachasqaña karqanku, ashkhastaj watastaña chay llankʼayta ruwarqanku. Chayrayku paykunamanta wakin, chay llankʼayninkuta saqespa mayta llakikorqanku. Jinapis waj jinamanta Jehovapaj llankʼayman pisimanta pisi yachaykukorqanku. ¿Imaraykutaj chayta ruwarqanku? Jehová Diosta munakusqankurayku. Paykunaqa sutʼita yacharqanku Diosman kausayninkuta qosqankuta, manataj uj llankʼaymanchu, nitaj uj cargomanchu (Col. 3:23). Chay hermanosqa mayta kusikunku, Jehová Diosta kʼumuykukoj sonqowan sirvispa. Chantapis ‘tukuy llakiyninkuta Jehová Diospa makinman saqenku, imaraykuchus yachanku Diosqa paykunamanta llakikusqanta’ (1 Ped. 5:6, 7). Kʼumuykukoj sonqo kayqa allinninchejpaj, wajkunapis noqanchejwan kayta munanqanku. Chantapis kʼumuykukoj sonqo kaspaqa, kausayninchejpi problemasta aguantayta atillasun. Astawanqa Tatanchej Jehovata kusichisun. w19.09 págs. 6, 7 párrs. 15-17

Jehová Diosninchejqa Davidta familianmanta uma kananpaj, jinallataj Israel llajtaj reynin kananpaj churarqa. Payqa rey kasqanrayku ashkha runasta kamachinanpaj autoridadniyoj karqa. Wakin kutistaj, atiyninmanta valekuspa wajkunata ñakʼaricherqa, maytataj pantarqa (2 Sam. 11:14, 15). Jinapis Jehová payta kʼamejtin kasukorqa. Davidqa Jehová Diosman tukuy juchasninta willakorqa, maytataj kallpachakorqa yuyaychasqanta kasukunanpaj (Sal. 51:1-4). Chantapis qharis chayri warmis yuyaycharejtinku, paykunaj yuyaychasqankuta kʼumuykukoj sonqowan japʼikorqa (1 Sam. 19:11, 12; 25:32, 33). Davidqa pantasqasninmanta yachakorqa, Jehová Diosta sirviytataj ñaupajman churarqa. Payta kasukuy allinninchejpaj kasqanta yacharqa. Kunanpis Davidpa nisqan cheqapuni kasqanta sutʼita reparanchej. Jehová Diosta kasukojkunaqa, allinta kausakusqankurayku kusisqa kanku. Jehová Diospa sumaj yuyaychaykunasninta mana kasukojkunarí, mana kusisqaschu kausakunku (Isa. 65:13, 14). w19.09 pág. 17 párr. 15; pág. 19 párr. 21

Jehovaj testigosnenqa, 1935 watapi sutʼita repararqanku, may chhika runas “kamachina tiyanaj ñaupaqenpi, Corderoj ñaupaqenpipis” kanankupaj, mana cielomanchu rinanku kasqanta. May chhika runasmanta kajkunaqa, kay jallpʼapi kashaspa “kamachina tiyanaj ñaupaqenpi” kanku. Chaytataj ruwanku Jehová Diosta Kamachejninkuta jina qhawaspa, payta kasukuspa ima (Isa. 66:1). ‘Corderoj ñaupaqenpitaj’ kanku, Jesús tukuy runasrayku wañusqanpi creespa. Bibliaj waj textosninpis, Apocalipsis 7:9 nisqanta aswan sutʼita entiendenapaj yanapawanchej. Ujqa kashan Mateo 25:31, 32. Chaypi nin, Jesusqa “lliphipej jatun kamachina” tiyananpi kashajtin, ‘tukuynejmanta runas’, sajra runaspis ‘ñaupaqenman tantasqa kanankuta’. Chay runastaj mana cielopichu tantasqa kanqanku, manaqa kay jallpʼapi. Chayrayku 1935 watapi pikunachus ‘may chhika runas’ kasqankuta sutʼinchakusqanqa, aswan chʼuwa karqa. Imaraykuchus entienderqanku, may chhika runasqa Biblia nisqanman jina mana cielomanchu rinankuta. Entiendellarqankutaj uj grupo cristianoslla cielopi wiñay kausayta japʼinankuta. Paykunataj 144.000 cristianos kanku, Jesuswan khuskataj ‘jallpʼata reyes jina kamachimonqanku’ (Apo. 5:10). w19.09 pág. 28 párr. 9

Jehová Diosqa Jatun Babiloniamanta tʼaqakunanchejta munan. Jinapis mana chayllatachu ruwananchej tiyan, manaqa Jehová Diosta sirvinallanchejpuni tiyan. Imaynatachus chayta ruwanata yachakuna. Ñaupajtaqa, Jehová Dios llimphu kausayniyoj kanata kamachiwasqanchejta kasukuna tiyan. Noqanchejqa kay mundomanta runaspa millay kausayninkuta, ni jaykʼaj allinpaj qhawasunmanchu. Chayrayku tukuy clase khuchichakuy juchata chejnikunchej. Chay millay juchas ukhupi kashan, warmipura chayri qharipura casarakuy, chayman rijchʼakoj ruwaykuna ima (Mat. 19:4, 5; Rom. 1:26, 27). Chantapis Jehová Diosta hermanoswan khuska yupaychanallapuni tiyan. Chaytataj ruwanchej Tantakuna Wasispi, hermanospa wasisninkupi, pakayllamanta waj lugarespiwan. Ima kajtinpis, Diosta yupaychanapaj tantakuytaqa manapuni saqenachu tiyan, astawanraj “Diospa pʼunchaynin qayllamushasqanta” yachasqanchejrayku (Heb. 10:24, 25). w19.10 págs. 15, 16 párrs. 6, 7

Jehová Diosqa kusisqa kausakunanchejta munan. Chaypajtaj imallawanpis kusirikunapuni kanman. Bibliapis nin: “Runapajqa chay tukuy imasmanta nisqaqa aswan allimpuni mikhunan, ujyanan, tukuy ruwasqanwan kusikunan ima”, nispa (Ecl. 2:24). Kusirikunapaj ashkha imas kajtinpis, mana tukuyninchu allinninchejpaj. Imajtinchus kay mundopi kusirikunapaj imasqa, yuyayninchejta chʼichichanman. Chantapis Diospa Palabran juchachasqan ruwaykunata allinpaj qhawachiwasunman, chayri chaykunata munakunapaj tanqawasunman. Noqanchejqa Jehová Diosllata yupaychayta munanchej. Chayrayku mana atinchejchu “Jehová Diospa mesanmanta mikhushaspa, supaykunaj mesanmantapis mikhuyta” (1 Cor. 10:21, 22). Piwanpis khuska mikhunchej chayqa, paywan amigos kasqanchejta rikuchinchej. Kusirikunapaj ashkha imasqa, runasta tanqan maqanakuyman, layqeriosman, khuchichakuyman, sajra munayninkuta ruwayman, chayri pantasqata yuyayman. Chay imaswan kusirikuyta ajllasunman chayqa, Diospa enemigosninwan mikhushasunman, paykunaj waykʼusqankuwantaj miskʼirichikushasunman. Chayta ruwaspaqa, noqallanchej ñakʼarisunman, Jehová Diosmantataj karunchakusunman. w19.10 pág. 26 párr. 2; págs. 29, 30 párrs. 11, 12

Barcota purichejqa wayrawan yanapachikunanpaj, iskay imasta ruwanan tiyan. Ñaupajtaqa maypichus wayrashan chayman barcota apanan tiyan. Qocha kantullapi barcota sayachenqa chayqa, mana maymanpis riyta atenqachu. Chantá barco purichina carpasta kacharinan tiyan, wayra chay barcota tanqananpaj. Ajinallataj noqanchejwanpis. Jehová Diosta sirvinallapajpuneqa, paypa atiyninwan yanapachikunanchej tiyan. Chaypajtaj iskay imasta ruwana tiyan. Ñaupajtaqa “maypichus wayrashan chayman” rinanchej tiyan, nisunman ima ruwaykunachus Diospa atiyninta japʼinapaj yanapawanchej, chaykunata ruwananchej tiyan. Chantá “barco purichina carpasta” kacharinanchej tiyan, nisunman Diospa atiyninta japʼinapaj ruwaykunata, tukuy atisqanchejta ruwananchej tiyan (Sal. 119:32). Jehová Diospa atiynenqa payta sirvinallapajpuni yanapawasun, runas churanakuwajtinchejpis chayri ima llakiy kajtinpis. w19.11 pág. 9 párr. 8; pág. 10 párr. 11

Wañupunan pʼunchayqa, Jesusta ashkha imas llakichisharqa. Payqa yacharqa, enemigosnin mayta ñakʼarichispa wañuchinankuta. Jesusqa yachallarqataj, sinchʼita sayajtillan Jehovaj sutin llimphuchasqa kananta. Paytaj Tatanta mayta munakusqanrayku, kusichiyta munarqa. Chantapis Jesusqa yacharqa, Diosta wañupunan horakama kasukojtillan, runas wiñay kausayta japʼinankuta. Jesustaj runasta munakusqanrayku kasukuytapuni munarqa. Jesusqa ajina llakiykunasniyoj kashaspapis, sonqo tiyasqallapuni karqa. ¿Imamantataj Jesús parlasharqa? Jehová Diosman kʼaskasqa kajqa, mana imamantapis llakikunchu, sonqonqa “phaj” nisqa kashan. Jesusqa chay jina sonqo tiyaykuyniyoj kasqanta nisharqa, chaytaj sonqontawan yuyaynintawan waqaycharqa (Fili. 4:6, 7). Noqanchejmanta ni pí, Jesús jina sinchʼita ñakʼarisunchu. Jinapis Jesuspa yachachisqasnin kasqanchejrayku, llakiykunasniyojpuni kasun (Mat. 16:24, 25; Juan 15:20). Wakin kutistaj, ichapis Jesús jinallataj imatachus ruwananchejmanta llakikusun. w19.04 pág. 8 párrs. 1-3

Kay jallpʼapi Diospa llajtanpi kashasqanchejmanta, ¿agradecesqachu kashanchej? Sapa ujninchej chaypi tʼukurinanchej tiyan. Sutʼi rikukushan Jehová Dios llajtanta kay tiempopi bendecishasqan. Chayrayku Jehová Diospa llajtanpi kasqanchejmanta mayta agradecekunanchej tiyan (1 Tes. 5:18). ¿Imaynatá agradecekusqanchejta rikuchisunman? Publicacionesninchejpi, tantakuykunapi, jatun tantakuykunapiwan nikusqanta kasukuspa. Agradecekusqanchejta rikuchillasunmantaj, tukuy atisqanchejta predicaspa, runasman yachachimuspa ima (1 Cor. 15:58). Jehová Diospa ñaupaqenpi allinpaj qhawasqa kananchejpaj kallpachakuna. Ajinamanta Jehová Dios jaywanasninchejta japʼikunanpaj. Paytataj agradecekusqanchejrayku sirvina. Jehová Diosta munakusqanchejrayku, aswan sumajnin kajta payman qonallapuni. Llajtantapis tukuy sonqo kasukunallapuni. Tukuy chay imasta ruwaspaqa, Jehová Diosman nisunchej: “Tatáy, qanta sirvisusqay, testigoyki kaypis, noqapaj may sumajpuni”, nispa. w19.11 pág. 25 párrs. 17, 18

Jesusqa chaywan mana nisharqachu, pay jina milagrosta ruwananchejta. Astawanpis nisharqa, yachachisqasnin astawan llajtaspi predicanankuta, astawan runasman yachachinankuta, astawan unayta willanankuta ima. Trabajoyoj kanchej chayqa, kay tapuykunapi piensarisunman: “¿Wajkuna sumaj trabajador kasqanchejtachu ninkuman? Ima trabajotapis qowajtinchej, ¿tiemponpichu tukunchej? ¿Trabajonchejta tukuy atisqanchejman jinachu sumajta ruwanchej?”. Chay tapuykunaman “arí” ninchej chayqa, ichapis patronninchej sumajpaj qhawawanchej. Noqanchejwan trabajajkunapis, sumaj willaykunata willarejtinchej, ichá uyariyta munawasun. Kunanqa predicasqanchejpi, runasman yachachisqanchejpi ima piensarina. ¿Wajkuna reparankuchu tukuy atisqanchejta predicasqanchejta, yachachisqanchejta ima? Runaswan parlarinapaj, ¿sumajtachu wakichikunchej? ¿Chay ratochu yachakuyta munajkunata visitaj rinchej? Waj jinasmanta predicanapaj, ¿kallpachakunchejchu? Chay tapuykunaman “arí” nispa kutichinchej chayqa, predicaspa kusisqa kasun. w19.12 pág. 5 párrs. 14, 15

Casarasqa kajkuna wawasniyoj kayta munanku chayqa, allin kanman iskay imasmanta parlarinanku. Uj kaj, maykʼajchus wawasniyoj kayta munasqankumanta. Iskay kaj, mashkha wawasniyojchus kayta munasqankumanta. Jinapis, ¿maykʼajtaj chaykunamanta parlarinanku kanman? Chantá, ¿imaraykutaj chaykunamanta parlarinankupuni tiyan? Casarakunankupaj rejsinakushanku chaykunaqa, niraj casarashaspa parlarinanku tiyan wawasniyojchus manachus kanankumanta. Ajinamanta uj yuyaylla kanankupaj. Piensarinallankutaj tiyan, wawasta uywanankupaj wakichisqachus manachus kashasqankupi. Wakin casarakojkunaqa, wawasniyoj kanankupaj uj watata chayri iskay watata suyarinku. Chaytaj casado kausayman yachakunankupaj, ujchasqa kanankupajwan yanapan. Imajtinchus wawasniyoj kaspaqa, wawasninkuta uywanankupaj tukuy kallpankuta, tiemponkuta ima churananku kanqa. w19.12 pág. 23 párrs. 4, 5

Mundontinmanta hermanosninchejqa imaymana llakiykunasniyoj kanku. Wakin hermanosninchejqa, sinchʼi onqosqas kashanku. Wakintaj familiankumanta pillapis wañupusqanrayku, may phutisqas kashanku. Wakin hermanostaj, ujnin familiarninku chayri sumaj amigonku Jehová Diosta wasanchasqanrayku, llakisqas kashanku. Wakin hermanostajrí terremotos, sinchʼi paras chayri waj imas kasqanrayku sufrishanku. Tukuy chay hermanosqa sonqochanata necesitanku. ¿Imaynatá paykunata yanaparisunman? Hermanosninchejpaj sumaj amigos kasunman. Mana saqerparikoj amigosqa, yanapanawanchejpaj tiemponkuta, kallpankuta ima churanku. Hermanonchej Pedromanta, señoranmantawan parlarina. Doctorqa hermanonchejta nisqa uj sinchʼi onqoyniyoj kasqanta, chaytaj wañuchinanta. Señoran nin: “Congregacionniykumanta uj qhariwarmi doctorman pusawarqayku. Chaypitaj qosay ima onqoyniyojchus kasqanta yacharqayku. Chay qhariwarmeqa, niwarqayku mana saqerparinawaykuta, aguantanaykupajpis yanapanawaykuta”, nispa. Ajina sumaj amigosqa, llakiypi kashajtinchej mayta yanapawanchej, kallpachawanchejtaj. w20.01 pág. 8 párr. 1; págs. 9, 10 párrs. 5, 6

Pentecostés 33 watapi Jerusalenpi tantasqa kasharqanku chay cristianoswan kashasunman karqa chayqa, manachá qonqasunmanchu karqa Dios atiyninwan ajllawasqanchejta (Hech. 2:5-12). Jinapis, ¿tukuy ajllasqa cristianostachu Jehová Dios kikinta ajllarqa? Mana. Maykʼajchus uj cristiano cieloman rinanpaj ajllasqa kasqanmanta parlarina. Pentecostés 33 watapeqa, mana Jesuspa 120 yachachisqasnillanchu Diospa atiyninwan ajllasqa karqanku. Jehová Diosqa chay kikin diallapitaj, 3 mil runasta jina atiyninwan ajllallarqataj. Paykunaqa bautizakusqankutawan Diospa atiyninta japʼerqanku (Hech. 2:37, 38, 41). Chaywanpis mana tukuy ajllasqa cristianoschu, bautizakusqankutawan Diospa atiyninta japʼerqanku. Samariamanta cristianosqa, bautizakusqankumanta qhepamanraj Diospa atiyninta japʼerqanku (Hech. 8:14-17). Corneliowan, wasinpi kajkunawantaj, niraj bautizakushajtinku Diospa atiyninta japʼerqanku. Chaytaj tʼukunapaj jina karqa (Hech. 10:44-48). w20.01 págs. 20, 21 párrs. 2-4

Jesusqa Jehová Diosmanta parlananpaj, Mateomanta Juan librokama casi 200 kutista “Tatáy” palabrata oqharerqa. ¿Imaraykutaj Jesús chay chhika kutista Jehová Diosta “Tatáy” nerqa? Imaraykuchus payqa munarqa, runas Jehová Dios may munakuyniyoj Tatapuni kasqanta yachanankuta (Juan 17:25). Jehová Dios imaynatachus Wawan Jesusta cuidasqanmanta yachakuna. Jehová Diosqa Jesuspa mañakusqanta uyarejpuni. Manataj uyarillajchu, manachayqa mañakusqanman jina ruwaj (Juan 11:41, 42). Jesusqa ima llakiypi chayri ima pruebapi kaspapis, Tatan munakusqanta, yanapasqantataj sutʼita repararqa (Luc. 22:42, 43). Jehová Diosqa munakuyniyoj Tata kasqanrayku, Jesusman payta yanapananta nerqa (Mat. 26:53; Juan 8:16). Payqa mana tukuy llakiykunamantachu Jesusta jarkʼarqa. Jinapis chay llakiykunata aguantananpaj yanaparqa. Jesusqa yacharqa ima llakiyninpis uj tiempollapaj kananta (Heb. 12:2). Jehová Diosqa Wawan Jesusta uyarerqa, necesitasqanta qorqa, yachacherqa, yanaparqataj. Ajinamanta payta mayta munakusqanta rikucherqa (Juan 5:20; 8:28). w20.02 pág. 3 párrs. 6, 7, 9

Niraj ima costumbretapis ruwashaspa, chay ruwasqanchej wajkunata pantachenqachus manachus, chaypiraj piensarinanchej tiyan. Mana pi hermanonchejtapis urmachiyta munanchejchu (Mar. 9:42). Nillataj mana testigo kajkunatapis phiñachiyta munanchejchu. Munakuyniyoj kaspaqa, paykunawan kʼachamanta parlarisun. Chayta ruwaspa, Jehová Diosninchejta jatunchasun. Ama paykunawan discutinachu, nillataj costumbresninkumanta burlakunachu. Munakuyniyoj kaspaqa, paykunawan kʼachas kasun, respetasuntaj. Ajinamanta sonqonkuta llampʼuyachisunman. Tukuyman Jehovaj testigosnin kasqanchejta willarina (Isa. 43:10). Familiasninchejman chayta ñaupajsitumanta willasunchej chayqa, costumbresta mana ruwasqanchejta yachanqankuña. Pi familianchej wañupojtintaj, ichapis mana costumbresta ruwanapaj tanqawasunchu. Ama jaykʼajpis pʼenqakunachu, wañusqasmanta yachasqanchejta sutʼinchariyta (Rom. 1:16). w19.04 págs. 17, 18 párrs. 14-16

Jesuspa 12 apostolesnenqa, paywan khuska kay jallpʼapi willashajtin purerqanku. Apóstol Pablotaj Jesús kausarimusqanmanta qhepamanraj cristianoman tukorqa. “Mana judío kajkunaman kachasqa” apóstol kajtinpis, payqa mana 12 apostolesmantachu karqa (Rom. 11:13; Hech. 1:21-26). Jinapis Pabloqa, Diospaj llankʼaspa kusisqa karqa. Payqa mana 12 apostolesmanta, nitaj paykuna Jesuswan amigos kasqankumanta envidiakorqachu. Jehová Diosqa wakin hermanosta uj llankʼayta ruwanankupaj churan. Kʼumuykukoj sonqo kasun, kapuwasqanchejwantaj kusisqa kausakusun chayqa, apóstol Pablo jina kasun, chay hermanostataj respetasun (Hech. 21:20-26). Jehová Diosqa congregacionta ñaupajman pusanankupaj ancianosta churan. Paykunaqa pantaj runas kaspapis, Jehová Diosmanta ‘regalos jina’ kanku (Efe. 4:8, 11). Ancianosta respetasun, kamachiwasqanchejtataj tukuy sonqo kasukusun chayqa, Jehová Diospa qayllallanpipuni kasun, hermanosninchejwantaj allinpi kausakusun. w20.02 pág. 17 párrs. 13, 14

Ichapis Jehovaj testigosninwan niraj estudiashaspa, Bibliata jatunpajña qhawarqanki. Chantá ichá Jesustapis munakorqankiña. Jehovaj testigosninwan Bibliata estudiasqaykimantapachataj, ichá paykunawan kaspa kusikunki. Chay tukuy imastataj jatunpaj qhawanki. Jinapis bautizakunaykipajqa, mana chayllatachu ruwanayki tiyan. Jehová Diosman kausayniykita qopunaykipajqa, payta munakunayki tiyan. Jehovata tukuy imamanta astawan munakunki chayqa, mana saqenkichu ni pipis, nitaj imapis payta sirvejta jarkʼasunanta. Chayrayku bautizakunaykipaj, bautizakuytawan payta sirvinallaykipajpuni ima, Jehová Diosta munakunayki tiyan. Jesusqa niwanchej: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj”, nispa (Mar. 12:30). ¿Imatá ruwawaj Jehová Diosta ajinata munakunaykipaj? Jehová Dios mashkhatachus munakususqanpi piensariy. Chaypi piensarispaqa, qanpis payta munakullankitaj. w20.03 pág. 4 párrs. 4, 5

Diospaj llankʼayninchejta allinta juntʼanapajqa, tukuy atisqanchejta runasman Diosmanta willamuna, yachachimunataj. Jehovaqa mana qhawanchu mashkha horastachus paypaj llankʼasqanchejta, manaqa imayna sonqowanchus chayta ruwasqanchejta. Jehová Diosta, runa masinchejta ima munakusunchej chayqa, tukuy sonqowan, tukuy kallpawantaj Diospaj llankʼasun (Mar. 12:30, 31; Col. 3:23). Jehová Diospa Gobiernonmanta willayta jatunpaj qhawasun chayqa, tukuy runasman sumaj willaykunata willamusun. Mayta munaspapis, ichá mana ashkhatachu predicayta atinchej. Tukuy cristianos sumaj willaykunata mayta willayta munanchej. Chayrayku sapa kuti astawan kallpachakunchej runaj sonqonman chayanapaj. Jinapis ashkha ruwanasniyoj kasqanchejrayku, ichá sonqonchejpi ninchej: “¿Imatá ruwayman astawan predicanaypaj?”, nispa. w19.04 pág. 2 párr. 3; pág. 3 párrs. 4, 6

Supayqa runaspa llakiyninkuta astawan yapan. Uj wawita wañupojtin, runasqa ninku: “Diosqa angelitosta necesitasqanrayku wawitaykiyta cieloman apakapun”, nispa. Chaytaj tatasta sonqochananmantaqa, astawan llakichin. Chantapis runasqa infiernopi creesqankurayku, runa masinkuta khuyayta ñakʼarichinku. Ashkha runasta iglesiaj yachachisqanta mana japʼikusqankuraykulla, kausashajta ruphaykuchej kanku. Iglesia catolicaqa, Inquisición española nisqa tribunalta rikhuricherqa. Chay tribunalqa iglesia catolicaj yachachiyninta mana japʼikojkunata, sonqo nanayta ñakʼarichispa wañuchej kanku. Uj libro nisqanman jina, “chay tribunalmanta juezkunaqa, juchasapa runasman infiernota llamirichishasqankuta nej kanku”. Ajinamanta niraj wañushaspa pesachikunankupaj, nitaj infiernoman chayanankupaj. Ashkha lugarespitaj, runasqa alma castigananta manchachikuspa, wañusqaspaj mikhunasta churapunku, waj costumbrestawan ruwanku. Manachayqa almamanta bendicionta mañakunku. Runasqa chay costumbresta ruwanku, Satanaspa llulla yachachiykunasninta creesqankurayku. Chaytaj runasta sonqochananmantaqa, astawan llakichin, manchachintaj. w19.04 pág. 14 párr. 1; pág. 16 párr. 10