Febrero

Bibliapi “justicia” palabraqa niyta munan mana piman kutikuspa, imatachus Dios cheqanpaj qhawasqanta ruway. Cristoj leynenqa tukuypaj justicia kananpaj yanapan. Imaraykuchus chayta nisqanchejta qhawarina. Jesusqa cheqan kajtapuni ruwarqa. Fariseoswan leymanta yachachejkunawanqa, waj llajtayoj runasta chejnikoj kanku, mana paykuna jina kaj judiostapis pisipaj qhawaj kanku, warmistataj mana valechejchu kanku. Jesustajrí mana paykuna jinachu karqa, astawanpis tukuyta allinpaj qhawarqa. Waj llajtayoj runas paypi creejtinku, Jesusqa paykunata tukuy sonqo japʼikorqa (Mat. 8:5-10, 13). Payqa tukuy runasman predicarqa, qhapajkunamanpis, wajchasmanpis (Mat. 11:5; Luc. 19:2, 9). Jesusqa warmista ni jaykʼaj kʼumuykachacherqachu. Astawanpis paykunata kʼachamanta parlapayarqa, respetarqataj. Jesusqa chejnisqa warmistapis, mana pisipajchu qhawarqa (Luc. 7:37-39, 44-50). Jesús jina tukuyta allinpaj qhawana. Chantapis tukuyman predicana, mayqen iglesiamanta kajtinkupis, qhapaj chayri pobres kajtinkupis. Hermanosqa Jesús jina ruwankuman, warmista mana pisipaj qhawaspa, paykunata respetaspataj. w19.05 pág. 2 párr. 1; pág. 5 párrs. 15-17

Kay tiempopi munakuyniyoj ancianosqa, llakisqa hermanosta Bibliawan sonqocharishaspa, munakuywan parlapayanku. Abusasqa kajkunataqa, mana ancianosllachu sonqochankuman. Bibliaqa tukuyman niwanchej: “Purajmanta sonqochanakullaychejpuni”, nispa (1 Tes. 4:18). Sinchʼi creeyniyoj hermanasqa, llakiypi kaj hermanasta sonqochariyta atinkuman. Jehová Diosninchejqa wawitanta sonqochaj mamawan kikinchakun (Isa. 66:13). Bibliaqa nin, wakin warmis llakiypi kajkunata sonqochasqankuta (Job 42:11). Jehová Diosqa mayta kusikun, sinchʼi creeyniyoj hermanas llakiypi kajkunata sonqochajtinku. Ichá ancianosqa ajina wiñay tukusqa cristianaswan sapallankupi parlarinkuman, llakisqa hermanata yanaparinankupaj. Llakisqa kajkunaqa wakin imasmanta mana parlayta munankuchu. Paykunata yanaparishaspaqa, ama anchata tapuykachanachu (1 Tes. 4:11). w19.05 págs. 16, 17 párrs. 10-12

Ancianos pitapis juzganankupaj iskay testigosllapis kanan tiyan. Imaraykuchus Bibliapuni iskay rikojkuna kananta nin. Chayqa Diospa cheqan kamachiykunasninman jina kashan. Juchallikoj runa, juchanta mana rimarinchu chayqa, iskay rikojkuna sutʼinchananku tiyan. Ajinamanta ancianosqa, chay iskay testigospa parlasqankunejta juchallikojta juzganankupaj (Deu. 19:15; 1 Tim. 5:19). Chay runa qhasillamanta tumpasqankuta nin chayqa, ancianosqa iskay testigosta tapurinku, nisunman pikunachus chay juchamanta yachanku, chaykunata. Ujnin testigoqa chay runata juchachaj kanman, ujnintaj chay wawata, manachayri waj wawasta abusasqanta yachaj kanman. Iskay testigos kan chayqa, ancianosqa comité judicialta ruwanku. Uj testigolla kanman chaypis, mana nisunmanchu chay runata juchachaj llullakusqanta. Chayrayku mana iskay testigos kajtinpis, ancianosqa chay juchata mana qhawallankuchu, reparankutaj chay jucharayku wajkuna ñakʼarishasqankuta. Chayrayku ñakʼarejkunata yanapallankupuni, congregaciontapis allinta qhawallankupuni chay tumpasqa runamanta jarkʼanankupaj (Hech. 20:28). w19.05 pág. 11 párrs. 15, 16

Tatasqa wawasninkuman sumajta estudiayta yachachinanku tiyan. Wawasqa yachananku tiyan tantakuykunapaj wakichikuyta, escuelankupi imatapis tapojtinku kutichinankupaj wakichikuytapis (Heb. 5:14 ). Tatas, wawasniykichejman Bibliata estudiayta wasiykichejpi yachachinkichej chayqa, tantakuykunapi, jatun tantakuykunapipis, sumajta atiendenqanku. Jinapis wawastaqa edadninkuman jina, yuyaysitunkuman jinataj yachachina tiyan. Estudiospis sumajta estudiayta yachakunanku tiyan. Paykunata estudiachej rinanchejpaj, tantakuykunapajpis kutichiykunata marcakojtinkoqa, mayta kusikunchej. Jinapis paykunata yachachinanchej tiyan sapallankupi estudiayta, yachachiykunata sumajta ukhunchayta ima. Ajinamanta problemaspi kashajtinku, imatachus ruwanankuta yachanankupaj, mana waj hermanostarajchu tapukamonqanku. Astawanpis problemasninkuta allinchanankupaj, publicacionesninchejpi maskʼanqanku. w19.05 pág. 26 párr. 2; pág. 28 párrs. 10, 11

Satanasqa tukuy atisqanta ruwashan, yuyayninchejta cambiachinawanchejpaj. Payqa yachan, Biblia allin yuyayniyoj kananchejpaj yanapawasqanchejta. Chayrayku imaymana pantasqa yachachiykunamanta valekun. Ajinamanta yuyayninchejta cambiachinawanchejpaj, iskayrayachinawanchejpaj ima. Satanasqa Edén huertapi Evaman nerqa: “¿Nispachu Diosqa nisunkichej?”, nispa. Kunanpis ajina tapuyllawantaj umanchejta muyuchiyta munawanchej (Gén. 3:1). Satanaspa mundonmanta runasqa, iskayrayananchejpaj jina tapuwanchej. Paykunaqa niwanchej: “Qharipura chayri warmipura casarakoyqa jucha, ¿nispachu Diosqa nisunkichej? Ni navidadtapis, ni cumpleañostapis ruwankichejchu, ¿nispachu Diosqa nisunkichej? Ama yawarta churachikunkichejchu, ¿nispachu Diosqa nisunkichej? Iglesiaykichejmanta qharqochikoj familiarniykichejwan chayri amigoykichejwan amaña parlankichejchu, ¿nispachu munakuyniyoj Diosniykichej nisunkichej?”. Imaspichus creesqanchejmanta, mana iskaychakunanchejchu tiyan. Bibliamanta yachachiykunata mana sutʼita entiendespaqa, iskayrayayta qallarisunman. Iskayrayajtinchejtaj niña allintachu yuyasunman, Diosmantapis karunchakusunman. w19.06 págs. 12, 13 párrs. 15-17

Tatanchej Jehovaqa mayta munakuwanchej (Juan 3:16). Noqanchejtaj pay jina kayta munanchej. Chayrayku tukuyta khuyakunapaj, familianchejta jinataj munakunapaj, mayta kallpachakunchej. Astawanraj ‘creeypi kaj hermanosninchejtaʼ munakuyta munanchej (Gál. 6:10). Hermanosninchej familianchej jina kasqankurayku, llakiypi kajtinku yanapayta munanchej. Viudosta ¿imaynatá sonqochasunman? Paykunaman chimpayta manchachikuspapis chayri imatachus ninanchejta mana yachaspapis, paykunawan parlarinapuni. Paulinaj qosanqa jinallamanta wañuporqa, pay nin: “Runasqa llakisqaj sonqonta nanachiyta manchachikusqankurayku, wañuymanta mana parlayta munallankuchu. Jinapis noqapajqa aswan sumaj imallatapis ninawanku, chʼinlla kanankumantaqa”, nispa. Wañupojpa familiaresninkoqa, mana suyankuchu may yachayniyoj runa jina parlananchejta. Paulina nillantaj: “Sonqochanawankupaj imallatapis niwajtinku, mayta agradecekoj kani”, nispa. w19.06 pág. 20 párr. 1; pág. 23 párr. 14

Autoridades niña tantakojta saqewajtinchej ancianosqa runaswan mana reparachikunanchejpaj jina tantakuykunata wakichenqanku. Paykuna ichapis niwasun, juchʼuy grupitospi tantakunanchejta. Ichá mana kikin lugarllapipunichu, nitaj kikin horasllapipunichu tantakunanchej kanqa. Gobiernos niña predicananchejta nejtinku, ¿imatá ruwasun predicanallapajpuni? Mana tukuy lugarespichu kikinta ruwakonqa. Jehovata Diosninchejta munakusqanchejrayku, Gobiernonmanta tukuyman willamuyta munanchej. Chayrayku sumajta yuyaychakuspa predicallasunpuni (Luc. 8:1). Emily Baran sutiyoj warmeqa, Unión Soviética nisqapi hermanosninchej imaynatachus predicasqankumanta parlarqa. Pay nerqa: “Gobierno amaña pipis predicananta kamachejtin, Jehovaj testigosnenqa vecinosninkuman, trabajonkumanta compañerosninkuman, amigosninkuman ima predicallarqankupuni. Chayrayku sinchʼita llankʼanankupaj carcelesman apasqas karqanku. Chaypipis predicallarqankupuni”, nispa. Hermanosninchejqa gobiernos manaña predicanankuta nejtinkupis, predicallarqankupuni. Noqanchejpis chayta ruwana. w19.07 pág. 11 párrs. 12, 13

¿Imaynatá Diospi mana creejkunata yanapasunman Jehovata munakunankupaj, Jesuspa discipulosninman tukunankupaj ima? Runasqa maypichus wiñakusqankuman jina uj jinata creenku. Paykunaman predicanapajtaj, chayta yuyarikuna. Europamanta runasqa, mana Asiamanta runas jinachu kanku. Europamanta casi tukuy runasqa, Bibliamanta tumpata yachanku, Dios tukuy imata ruwasqantapis uyarinku. Asiamanta casi tukuy runastajrí, Bibliamanta pisita chayri ni imata yachankuchu. Wakin suyuspitaj, runasqa mana creellankupischu tukuy imata ruwaj Dios kasqanpi. Chayrayku mana saykʼuspa willamunallapuni. Sapa wata, Diospi mana creejkunamanta ashkhas Jehovaj testigosninman tukunku. Wakenqa llimphu kausayniyojña karqanku, iglesiasman rejkuna puraj uyas kasqankumantataj rabiakoj kanku. Wakintajrí mana allintachu kausaj kanku, millay viciosninkutataj saqerqanku. Jehová Diospa yanapayninwanqa, wiñay kausayta japʼinankupaj allin sonqoyoj kajkunata tarisunman (Hech. 13:48; 1 Tim. 2:3, 4). w19.07 págs. 20, 21 párrs. 3, 4

Premionchej cielopi kausay chayri kay jallpʼapi wiñay kausay kajtinpis, chayta japʼinanchejkama kallpachakunallanchejpuni tiyan. Kausayninchejpi ima llakiykunata aguantaspapis, “ñaupaj imasta” qonqaspa ñaupajman rinallapuni. Amataj saqenachu imapis pantachinawanchejta (Fili. 3:16). Ichá imastachus suyakusqanchej manaraj juntʼakunchu, chayri kallpanchej pisiyapun. Manachayrí ashkha watastaña llakiykunata aguantashanchej chayri qhatiykachasqa kashanchej. Imayna kajtinpis ama imamantapis llakikunachu. Astawanpis Diospa yanapayninta tukuy sonqo mañakuna. Paytaj sonqo tiyaykuyta qowasunchej, mayqentachus runas mana entiendeyta atinkuchu, chayta (Fili. 4:6, 7). Atipanakupi correjkunaqa, maymanchus chayananku kashan chayman chayashajtinku, astawan kallpachakunku. Noqanchejpis premionchejta japʼinanchejpajña kashanchej. Chayrayku premionchejta japʼinanchejkama tukuy atisqanchejta kallpachakunallapuni. w19.08 pág. 7 párrs. 16, 17

Wakin kutisqa, wañupojpa familianman ni imata niyta atinchejchu. Jinapis paykunawan khuska waqaspaqa, mayta kallpachasunman. Lázaro wañupojtin, hermanasnin Marta, María, wajkuna ima, mayta waqarqanku. Jesusqa tawa diasmantaraj chayman chayarqa. Payqa Lazarota kausarichinanta yachaspapis, “waqarikorqa” (Juan 11:17, 33-35). Jesuspa waqarikusqanqa, rikucherqa Tatanpis ajina llakisqallataj kasqanta. Mana chayllachu, Jesuspa waqarikusqanqa, Lazaroj familianta mayta munakusqanta rikucherqa. Chaytaj Mariata, Martatawan maytachá sonqocharqa. Ajinallataj hermanosninchejwanpis. Paykunamanta llakikojtinchej, munakojtinchejtaj, yachanqanku mana sapankuchu kasqankuta. Astawanpis ashkhas paykunata munakusqankuta reparanqanku. Wakin kutisqa llakiyninta willarishawajtinchej, mana pantachispa uyarina. Imatapis parlarparillan chaytaj, ama phiñakunachu (Job 6:2, 3). Ichapis hermanonchejqa, mana testigo familiasnin rabiachisqankurayku aswan llakisqa kashan. Paywan khuska Jehová Diosmanta mañakuna. Rogakunataj mañakuykunata uyarej Diosninchej, hermanonchejta kallpachananta, allin yuyaytawan qonanta (Sal. 65:2). w19.04 págs. 18, 19 párrs. 18, 19

Betelpi sirvispapis chayri Jehová Diospaj waj jinasmanta llankʼaspapis, chay lugarman, runasman ima yachaykukunchej. Chayrayku ripunanchej kajtenqa, mayta sonqonchej nanawanchej. Chaypi kaj amigosninchejtapis faltachanchej, paykunamantataj llakikunchej, astawanraj chay lugarpi qhatiykachay kasqanrayku riporqanchej chayqa (Mat. 10:23; 2 Cor. 11:28, 29). Chantapis llajtanchejpi, chayri waj lugarpiñataj Jehová Diosta sirvinanchej kajtenqa, ichapis chay lugarman mana yachaykukuyta atillanchejchu. Chantapis ichá llakiypi rikhurisqanchejrayku qolqeta necesitasunman. Manataj yachasunmanchu imatachus ruwayta, llakikusunmantaj. Ajinapi rikukuspa imatachus ruwananchejta qhawarina. Jehová Diospa qayllallanpipuni kana (Sant. 4:8). Jehovaj qayllallanpipuni kanapajqa, paymanta mañakuna (Sal. 65:2). Jehová “Diosqa mañakusqanchejmantapis chayri yuyasqanchejmantapis, aswan ashkhataraj ruwayta atin” (Efe. 3:20). Payqa mana mañakullasqanchejtachu qowanchej. Manaqa problemasninchejta allinchanapaj, yuyasqanchejmantapis astawanraj ruwayta atin. w19.08 pág. 21 párrs. 5, 6

Wakin runasqa Armagedón palabrata uyarispa, kay jallpʼa bombaswan thuñisqa kananta, chayri waj jinasmanta chinkachisqa kananta yuyanku. Bibliatajrí mana chaytachu yachachin. Imatachus Armagedonmanta nisqanqa kusichiwanchej (Apo. 1:3). Armagedón guerraqa mana runasta chinkachenqachu, astawanpis salvanqa. ¿Imaynataj chay kanqa? Gobiernos, sajra runaspis chinkachisqa kanqanku. Chay guerraqa cheqan runasta salvanqa, jallpʼatataj thuñisqa kananmanta jarkʼanqa (Apo. 11:18). “Armagedón” palabraqa uj kutillata Bibliapi rikhurin. Chay palabraqa hebreo parlaymanta jamun, niytataj munan “Meguidó orqo” (Apo. 16:16, sutʼinchaynin). Ñaupa tiempopi, Meguidoqa Israelpa ujnin llajtan karqa (Jos. 17:11). Jinapis Armagedonqa mana kay jallpʼapi uj lugarchu. Entonces, ¿imataj Armagedón? Armagedonqa, maypachachus ‘jallpʼantinmanta reyes’ Jehová Diospa contranpi tantaykukonqanku, chay (Apo. 16:14). w19.09 pág. 8 párrs. 1-3

Uj warmeqa 12 watastaña may onqosqa kasharqa. Payqa ashkha doctoreswan jampichikusqa, nitaj sanoyakusqachu. Chantapis Ley nisqanman jina, payqa onqoyninrayku chʼichipaj qhawasqa karqa (Lev. 15:25). Ajinapi chay warmeqa Jesusmanta parlajta uyarisqa, paytataj maskʼamusqa. Jesusta tariytawan ropanpa waychʼasninta llankharisqa, chay ratopachataj sanoyapusqa. Jinapis Jesusqa mana chay warmita sanoyachillarqachu, manaqa manaña pisipaj qhawakunanpajpis sonqocharqa. Jesusqa chay warmita munakuywan, respetowantaj “wawáy” nispa nerqa. Chay warmitaj sonqochakorqa, kallpachasqataj karqa (Luc. 8:44-48). Rikunchej jina, onqosqa warmeqa mana Jesús payman jamunantachu suyarqa, manaqa pay Jesusta maskʼaj rerqa. Noqanchejpis kikillantataj ruwananchej tiyan. Jesusman chimpanapajqa noqanchej kallpachakunanchej tiyan. Kay tiempopi, Jesusqa payman qayllaykojkunata manaña uj milagronejta sanoyachinchu. Jinapis tukuyman niwanchej: “Noqaman jamuychej [...], noqataj samarichisqaykichej”, nispa (Mat. 11:28). w19.09 pág. 20 párrs. 2, 3

Profeta Zacariasqa chayman rijchʼakojllatataj nerqa: “Jaqay tiempopeqa waj llajtasmanta chunka runas uj judío runaj pʼachanmanta japʼiykukuspa, nenqanku: Qankunawan riyta munayku, imaraykuchus uyariyku qankunawan Dios kasqanta”, nispa (Zac. 8:23). Jehovaj testigosnenqa yachanchej, tukuy parlayniyoj runas Diospa llajtanman yaykumunankupajqa sumaj willaykunata parlayninkupi willananchej kasqanta. Kay tiempopi ni jaykʼaj jina publicacionesninchejqa 900 kuraj parlaykunapi ruwakushan. Jehová Diosqa mundontinmanta runasta, may chhika runasmanta kanankupaj tantashan. Paykunataj publicaciones ashkha parlaykunapi kasqanrayku, payta ujchasqa sirvishanku. Chantapis runasman kusiywan Diosmanta willamunku, hermanos jinataj munanakunku. Chayta rikuytaj creeyninchejta kallpachan (Mat. 24:14; Juan 13:35). w19.09 págs. 30, 31 párrs. 16, 17

Kay tiempopi runasqa politicospi, qolqepi, kay mundoj waj imasninpiwan atienekunku. Jinapis manchay ñakʼariy tiempopeqa, chaykuna paykunata ni imapi yanapanqachu. Chayta rikuspataj runasqa mancharikonqanku, maytataj phutikonqanku. Chay tiempoqa ni jaykʼaj jina manchay llakiypuni kanqa. Runastaj kausayninkumanta llakikonqanku (Sof. 1:14, 15). Ichapis kausayqa mana runasllapajchu aswan llakiy kanqa, manaqa noqanchejpajpis. Mana kay mundomanta runas jinachu kasqanchejrayku, ichapis ñakʼarisunchej. Mikhuna chayri waj imaspis ichá pisiwasun. ‘Allin kamachi yuyayniyojqa’, manchay ñakʼariy tiempopi sinchʼita sayananchejpaj wakichishawanchejña (Mat. 24:45). Chaytataj tukuy imaymanamanta ruwashan. Chaykunamanta ujqa kashan, 2016 watamanta 2018 watakama kinsa pʼunchaypaj jatun tantakuykuna. Chay tantakuykunapeqa, Jehovaj pʼunchayninpaj wakichikunapaj imastachus ruwanata yachakorqanchej. w19.10 pág. 14 párr. 2; pág. 16 párr. 10; pág. 17 párr. 12

Mikhuykusqanchejtawanqa, cuerponchejqa sapallanmantaña chay mikhunaj alimentosninta chʼonqakapun. Sumajta alimentakuspaqa sanolla kanchej. Imatapis mikhullanchej chayrí onqoykunchej. Imatachus mikhusqanchej allinchus manachus kasqanqa, mana chay ratochu yachakun, manaqa tiemponmanraj. Kusirikunapaj imaswanpis kikillantaj. Imawanchus kusirikunanchejta ajllaspaqa, imachus yuyayninchejman yaykunanta noqanchej ajllashanchej. Jinapis ajllasqanchejtawanqa, chay ajllasqanchej sapallanmantaña sonqonchejpi, yuyayninchejpiwan trabajan. Imawanchus kusirikunata sumajta ajllasun chayqa, kallpachasqa kasun. Mana allinta ajllajtinchejrí, mana allinninchejpajchu kanqa (Sant. 1:14, 15). Chaytaj ichá mana chay ratochu yachakonqa, jinapis qhepaman yachakonqapuni. Chayrayku Biblia niwanchej: “Imatachá uj runa tarpun, chayllatataj oqharenqa. Pichus aychaj munayninman jina tarpojqa, wañuyta oqharenqa”, nispa (Gál. 6:7, 8). Chayrayku Jehovaj chejnisqan imaswanqa, amapuni kusirikunachu (Sal. 97:10). w19.10 pág. 30 párrs. 12-14

Jehovaqa maytapuni munakuwasqanchejrayku, Wawanta noqanchejrayku wañunanpaj kachamorqa (Juan 3:16). Jehová Diosninchej jina wajkunata munakuna. Hermanosninchejtapis sumajpaj qhawana. “Chinkasqa oveja jina” kajkuna kutinpojtinkutaj kusikuna (Sal. 119:176; Luc. 15:7, 10). Hermanosninchejta necesitasqankupi yanaparispaqa, paykunata munakusqanchejta rikuchinchej (1 Juan 3:17). Jesusqa yachachisqasninta kamacherqa, imaynatachus paykunata munakorqa, kikinta munanakunankuta (Juan 13:34, 35). Chay kamacheyqa mosoj karqa, imaraykuchus Moisespa Leyninpi mana chay kamachiy karqachu. Jesuspa yachachisqasnenqa, purajmanta munanakunanku karqa, imaynatachus Jesús paykunata munakorqa, ajinata. Wajkunata Jesús jina munakusun chayqa, paykunaj allinninkutaraj maskʼasun. Chantapis noqanchejmanta nisqaqa, hermanosninchejta astawan munakusun. Ajinata munakuspaqa, kausayninchejtapis paykunarayku Jesús jina qosun. w19.05 pág. 4 párrs. 11-13

Jesuspa nisqanqa yachachiwanchej, Jehová Diospa atiyninta japʼinapajqa mana saykʼuspa Diosmanta mañakuna kasqanta (Luc. 11:13). Lucas 11:5-9 versiculospi Jesuspa kikinchaynenqa, yanapallawanchejtaj imaraykuchus Jehová Dios atiyninta qonawanchejta entiendenapaj. Jesuspa kikinchayninmanta runaqa, amigon chaupi tutataña chayajtinpis payta sumajta atiendeyta munarqa. Payqa mikhunanpaj imallatapis jaywariyta munarqa. Jinapis ni iman kaporqachu. Jesús nisqanman jina, chay runaqa vecinonmanta anchatapuni mañakusqanraykulla tʼantata qorichikorqa. ¿Imatataj Jesús chaywan yachachiwanchej? Tatanchej Jehovaqa kutin kutita mañakojtinchej atiyninta qonawanchejtapuni. Payqa mana Jesuspa kikinchayninmanta vecino jinallachu yanapawasun, manaqa astawanraj. Chayrayku mana iskayrayaspa Jehová Diosmanta atiyninta mañakuna, paytaj qowasunpuni (Sal. 10:17; 66:19). Satanasqa churanakullawasunpuni, jinapis mana atipawasunchu. w19.11 pág. 13 párrs. 17-19

Jesusqa yacharqa, paypis apostolesninpis samarikuyta necesitasqankuta. Jinapis jaqay tiempopi ashkha runas, kay tiempomanta runas jinallataj yuyaj kanku. Paykunaqa Jesuspa kikinchayninmanta qhapaj runa jina karqanku. Chay runaqa sonqonpi nej: “Ni imamanta llakikusajchu, mikhusaj, ujyasaj, kusikusajtaj”, nispa (Luc. 12:19; 2 Tim. 3:4). Chay runaqa munaynillanpi, samarikuyllapi ima yuyasharqa. Jesuswan apostolesninwanrí, mana munayninkutachu ñaupajman churarqanku. Noqanchejpis Jesús jina kanapaj kallpachakunchej. Chayrayku mana trabajanchejchu chay horaspeqa, mana samarikullanchejchu, manachayqa predicanchej, reunionesmanpis rinchej. Chay iskay ruwaykunata jatunpaj qhawasqanchejrayku, tukuy atisqanchejta predicanchej, reunionesman mana faltakunapajpis kallpachakunchej (Heb. 10:24, 25). Chayrayku mayman viajaspapis, reunionesman rinchejpuni, runasmanpis tukuy atisqanchejta predicanchej (2 Tim. 4:2). w19.12 pág. 7 párrs. 16, 17

Jehová Diosqa kausayninchejpi imatachus ruwanata ajllajta saqewanchej. Payqa imatapis allinta ajllanapaj yachachiwanchej. Chay ajllasqanchej paypa munayninman jina kajtintaj, allin rinawanchejpaj yanapawanchej (Sal. 119:173). Diospa Palabranpi nisqanta kasukusun chayqa, imastachus ruwananchejta sumajta ajllasun (Heb. 5:14). Imatachus ruwananchejta sumajta ajllaspapis, ichá mana juntʼayta atillanchejchu. Wakin hermanosmanta parlarina. Uj joven hermanoqa tukuynin Bibliata leenanta nin. Jinapis uj mashkha semanasta leeytawan saqepun. Waj hermanataj precursora regular kananta nin, pero ni jaykʼaj qallarinchu. Uj congregacionmanta ancianos uj yuyaylla ninku, hermanosta kallpachanankupaj visitarinankuta. Jinapis killas pasan, manataj ni mayqen hermanotapis visitankurajchu. Tukuynin chay hermanos imatachus ruwanankuta ninkuña. Jinapis ni mayqenninku juntʼankuchu. w19.11 pág. 26 párrs. 1, 2

Jesusqa kay tiempopi kausayninchejta “Noejpa tiemponpi” kausaywan kikincharqa. Yachanchej jinataj, kay tiempopi ‘kausayqa may llakiypuni’ (Mat. 24:37; 2 Tim. 3:1). Chayrayku wakin casarasqasqa, aswan qhepamanraj wawasniyoj kanankuta ninku. Paykunaqa Jehová Diospajraj astawan llankʼayta munanku. Allin yuyayniyoj qhariwarmisqa, wawasta uywayta atinankutachus manachus sumajta qhawarikunku. Chaytataj ruwanku wawasniyojchus manachus kanankumanta, chayri mashkha wawasniyojchus kanankumanta parlarishaspa (Luc. 14:28, 29). Familiayoj tatasqa, wawasta uywayqa qolqepaj, tiempopaj, kallpapaj ima kasqanta ninku. Chayrayku casarasqasqa, kay tapuykunapi piensarinanku kanman: “Familianchejta uywanapaj, ¿iskayninchejchu trabajasun? Imatachus necesitasqanchejta rantinapaj, ¿uj yuyayllachu kanchej? Iskayninchej trabajajtinchej, ¿pitaj wawasninchejta cuidanqa? ¿Pi jinataj wawasninchej kanankuta munasun?”. Casarasqa kajkuna chay tapuykunapi piensarenqanku chayqa, kay diapaj texto nisqanman jina ruwanqanku. w19.12 pág. 23 párrs. 6, 7

Apóstol Pabloqa imaymana llakiykunapi rikukorqa, ashkha kutispitaj wañuy patapi rikhurerqa (2 Cor. 11:23-28). Chantapis payqa ‘aychanpi khishkayoj jina’ karqa. Chaytaj ichapis uj onqoy karqa (2 Cor. 12:7). Mana chayllachu, Pablotaqa Demas sutiyoj compañeron sonqonta nanacherqa. Chay compañeronqa, “mundoj imasninta munakusqanrayku” payta saqerparerqa (2 Tim. 4:10). Apóstol Pabloqa Diospa atiyninwan ajllasqa karqa, mana manchachikoj cristianotaj karqa. Payqa wajkunata yanaparejpuni. Jinapis wakin kutisqa, paypis sonqochanata necesitarqa (Rom. 9:1, 2). Jehová Diosqa apóstol Pablota sonqocharqa, yanaparqataj. ¿Imaynatá chayta ruwarqa? Atiyninwan payta kallpacharqa (2 Cor. 4:7; Fili. 4:13). Chantapis hermanosnejta sonqochallarqataj. Chayrayku Pabloqa, paywan khuska llankʼaj hermanos ‘mayta sonqochasqankuta’ nerqa (Col. 4:11). Paykunamanta wakenqa, Aristarco, Tíquico, Marcos ima karqanku. Paykunaqa Pablota kallpacharqanku, aguantananpajtaj yanaparqanku. w20.01 pág. 8 párrs. 2, 3

Diospa atiyninwan ajllasqa kajkunaqa, ‘watejmanta nacekunku’ chayri ‘Diospa atiyninmanta nacekunku’. Mana ajllasqa kajkunaqa, chayta mana entiendeyta atillanchejchu. Jesuspuni ajina kananta nerqa (Juan 3:3-8). Cieloman rinankupaj ajllasqa cristianospa yuyayninkupi, imachus cambiasqanmanta parlarina. Paykunaqa niraj ajllasqa kashaspa, kay jallpʼapi wiñaypaj kausakuyta mayta suyakusharqanku. Suyakushallarqankutaj Jehová Dios sajra kajta chinkachinanta, kay jallpʼatataj uj paraisoman tukuchinanta. Chantapis ichá wañupoj familiankuwan chayri uj amigonkuwan watejmanta tinkukapuyta munasharqanku. Jinapis ajllasqa kasqankutawan, niña ajinatachu yuyarqanku. Paykunaqa mana llakisqa kasqankuraykuchu, nitaj sufrisqankuraykuchu, uj jinata yuyayta qallarerqanku. Nillataj kay jallpʼapi wiñaypaj kausay mana allinchu kananta piensasqankuraykuchu, ajinata yuyarqanku. Astawanpis Jehová Dios paykunaj yuyayninkuta cambian, cielopi kausayta munanankupaj. w20.01 pág. 22 párrs. 9-11

Moisespa Leyninpeqa, kurajkunawan juezkunawan mana Diospa contranpi juchallikojkunallatachu juzgaj kanku. Paykunaqa juzgallajtaj kanku, imaymana problemaspi kajkunata, runa wañuchista, waj sajra imasta ruwajkunatawan. Jinapis Cristoj leyninpeqa, ancianosqa niña chaytachu ruwanku. Pipis juchallikojtin, ancianosqa juchallikojta Jehová Diospa contranpi, congregacionpa contranpiwan juchallikusqanmanta juzganku (Gál. 6:2). Paykunaqa entiendenku, Diosninchej autoridadesman atiyta qosqanta sajrata ruwajkunata juzganankupaj, castiganankupaj ima. Chayrayku autoridadesqa, multata orqhoyta atinku, carcelmanpis wisqʼachiyta atinku (Rom. 13:2-4). Congregacionpi pipis juchallikojtin, ¿imatataj ancianos ruwanku? Paykunaqa chay problemata Bibliawan yanapachikuspa qhawaykunku, chayman jinataj imatapis ruwanku. Ancianosqa yachanku, Cristoj leynin munakuypi sayachisqa kasqanta. Chayrayku chay jucharayku ñakʼarejkunata, imaynatachus yanapanankupi piensarinku. Chantapis juchallikojta Diosman kutirikunanpaj yanapayta munanku. Chaypajtaj qhawarinku, juchanmanta pesachikunchus manachus, chayta. w19.05 pág. 7 párrs. 23, 24

Jesusqa yacharqa, Tatan kausayta, tukuy ima necesitasqantawan qosqanta. Jesusqa yachallarqataj Tatan ni imata faltachinanta. Jehová Diostaj Jesusman necesitasqanta qorqapuni. Jinapis astawanqa, sinchʼita sayananpaj yanaparqa (Mat. 4:4). Jehová Diosqa, payman kʼaskaykunanchejpajpis yanapallawanchejtaj. Payqa Palabranpi willawanchej: imaynachus pay kasqanta, imachus munaynin kasqanta, imapajchus ruwawasqanchejta, imachus qhepaman kanantapis. Jehovaqa sapa ujninchejta yanapawarqanchej. Chaypajtaj tatanchejnejta, mamanchejnejta chayri wajkunanejta paymanta yachachiwarqanchej. Payqa munakuywan yanapashallawanchejpuni ancianosnejta, wiñay tukusqa hermanosnejta chayri hermanasnejta. Jehová Diosninchejqa reunionespipis yachachillawanchejtaj. Chaypitaj uj familia jina, hermanosninchejwan khuska paymanta yachakunchej. Tatanchej Jehovaqa munakuwasqanchejrayku, chay tukuy imasta, waj imastawan ruwan (Sal. 32:8). w20.02 pág. 3 párr. 8; pág. 5 párr. 13

Envidiakuy kan chaypeqa, mana allin kausay kanchu. Chayrayku envidiata sonqonchejmanta orqhona, amataj imatapis ruwanachu wajkuna noqanchejmanta envidiakunankupaj. ¿Imatá ruwasunman wajkuna mana envidiakunawanchejpaj? Chanta, ¿imatá ruwasunman tukuywan allinta kausakunapaj? Imatachus yuyasqanchej, ruwasqanchejpis, wajkunata tanqanman envidiakunawanchejpaj. Kay mundomanta runasqa, ‘kapuyninchejmanta runaykachanapaj’ tanqawanchej (1 Juan 2:16). ¿Imatá ruwasunman wajkuna mana envidiakunawanchejpaj? Ama sapa kuti parlanachu imaschus kapuwasqanchejmanta, chayri imastachus rantiyta munasqanchejmanta. Chantapis noqanchejmanta maychus kajllata yuyana, nitaj congregacionpi ruwanasninchejmanta alabakunachu. Alabakusunman chayqa, wajkunata envidiakunawanchejpaj tanqasunman. Astawanpis wajkunaj allinninkuta maskʼana, allin ruwasqasninkutataj reparana. Chayta ruwaspaqa, kusisqa kanankupaj yanapasun. Chantapis hermanospura allinpi kausakusun, ujchasqastaj kasun. w20.02 pág. 18 párrs. 15, 16

Diosta rejsinaykipajqa, ruwasqasninpi tʼukuriy (Apo. 4:11). Plantaswan animaleswan, imayna ruwasqachus kasqankuta qhawariy. Chantá piensariy cuerponchej may sumaj ruwasqa kasqanpi. Chay tukuy imasqa, Jehová Dios may yachayniyoj kasqanta rikuchinku (Sal. 139:14). Intipiñataj piensariy. Cielopi may chhika estrellasmanta ujnillan kajtinpis, intej kʼajaynenqa may jina atiyniyoj. Chaytaj rikuchiwanchej, Dios may atiyniyoj kasqanta (Isa. 40:26). Jehová Diospa ruwasqasninpi tʼukurispaqa, payta astawan jatunpaj qhawanki. Diosninchej yachayniyoj, atiyniyojtaj kasqanta yachanaykeqa, may allinpuni. Jinapis mana chayllatachu yachanayki tiyan. Jehovata tukuy sonqo munakunaykipajqa, payta astawan rejsinayki tiyan. Payqa mayta munakusunki. Ama chaymanta iskayrayaychu. Yuyarikuy Jehová Diosqa nisunki ‘payta maskʼajtiyki tarichikusunanta’ (1 Cró. 28:9). Chantapis manachus Jehová Dios payman pusamusunkiman karqa chayqa, mana Bibliata estudiashawajchu karqa (Juan 6:44). Imastachus Dios qanrayku ruwasqanta astawan yachaspaqa, payta astawan munakunki. w20.03 pág. 4 párrs. 6, 7

Apóstol Pablomanta mayta yachakusunman. Misionero jina iskay kaj viajenpi, Corinto llajtapi uj tiempota qhepakorqa. Qolqen pisisqanraykutaj, toldosta ruwaspa trabajarqa. Ajinamanta Corinto llajtamanta runasman Diosmanta willarerqa, nitaj paykunamanta imatapis mañakorqachu (2 Cor. 11:7). Pabloqa trabajaspapis, sapa Samarikuna Pʼunchay predicaj. Ajinamanta Diosmanta willayta ñaupajman churallarqapuni. Gastosninpaj qolqesitun kapojtinña, “Pabloqa Diospa palabranta willaspallaña purerqa, judiosman sutʼinchaspa Jesusqa Cristopuni kasqanta” (Hech. 18:3-5; 2 Cor. 11:9). Chaymanta qhepaman, Pabloqa Romapi iskay watata wasinpi preso karqa. Ajina kashajtinpis, payta waturikoj rejkunaman predicarqa, cartastapis qhelqarqa (Hech. 28:16, 30, 31). Pabloqa Diosmanta willananpaj, ni ima jarkʼananta saqerqachu. w19.04 pág. 4 párr. 9