Diciembre

Mana yuyaychakuspalla parlarparisunman chayqa, ashkha problemasta rikhurichisunman. Ichapis uj hermanoqa, maypichus autoridades niña predicajta, nitaj tantakojta saqenkuchu, chay lugarpi tiyakun. Chay jina hermanota rejsispa, ¿allinchu kanman tapurinanchej, imaynatachus chay lugarmanta hermanos Diosta yupaychashasqankuta? Ichapis chayta tapuriyta munasunman, hermanosninchejmanta llakikusqanchejrayku. Imaraykuchus hermanosninchejta munakunchej. Chantapis paykunapaj mañapuyta munanchej. Chaywanpis chay kutispeqa, chʼinlla kakunanchej tiyan. Uj hermanomanta imatachus yachasqanta orqhoytapuni munasunman chayqa, mana chay hermanota munakushasunmanchu. Nillataj munakushasunmanchu, pikunachus chay hermanopi atienekunku chaykunata. Jehovaj testigosninta prohibinku chay lugarespi tiyakoj hermanosqa, ashkha llakiykunasniyojña kanku. Noqanchejtaj mana paykunaman astawan llakiyta yapayta munasunmanchu. Chay lugarespi tiyakoj hermanospis, imaynatachus predicasqankuta chayri Jehová Diosta yupaychasqankuta, manallataj pimanpis willanankuchu tiyan. w20.03 pág. 21 párrs. 11, 12

Jehová Diosninchejqa runata wiñaypaj kausananpaj ruwarqa, manataj wañunanpajchu. Payqa Adanman nerqa: “Allin kajta mana allin kajta yachanamanta sachʼaj poqoynillanta amapuni mikhunkichu. Chay sachʼaj poqoynintachus mikhunki chayqa, wañunki”, nispa. Evamanpis chayllatataj nerqa. Adanwan Evawanqa chay kamachiyllata kasukunanku karqa (Gén. 2:16, 17). Jinapis Satanasqa, uj katarinejta Evaman kay pʼunchaypaj texto nisqanta nerqa. Evatajrí Satanasta creespa sachʼaj poqoyninta mikhuykorqa, Adanmanpis jaywarqa. Chantá paypis mikhuykullarqataj (Gén. 3:6). Ajinamanta juchawan wañuywan “tukuy runasman chayarqa” (Rom. 5:12). Diospa nisqanman jinapuni, Adanwan Evawanqa wañorqanku. Supaytaj chaymantapacha llullakushallanpuni, wañusqasmanta imaymana llulla yachachiykunata rikhurichispa. ¿Mayqentaj ujnin yachachiynin? Pay nin, runa wañupojtin alman chayri espiritun llojsipusqanta, waj lugarpitaj kausashasqanta. Satanasqa chay llulla yachachiywan, may chhika runasta engañashallanpuni (1 Tim. 4:1). w19.04 págs. 14, 15 párrs. 3, 4

Wawaj yuyaysitonqa, mana kuraj runajta jinachu. Chayrayku manaraj sumajtachu reparan, imachus allin, imatajchus mana allin kasqanta. Chayraykutaj abusajkunaqa wawasta facilta engañanku. Abusaj runasqa, wawaman creechinku abusasqa kananpaj pay juchayoj kasqanta. Manachayrí wawaman ninku, willakojtin ni pi creenanta. Chayrí wawata creechinku, kuraj runaswan wawaswan munanakojtinkoqa, qhariwarmi jina puñuykuyta atillasqankuta. Abusasqa wawataj chay yuyaywan wiñan, nitaj entiendenchu chay runa llullakushasqanta. Chantapis pisipaj, chʼichipajtaj qhawakuspa wiñakun, yuyantaj ni pi payta munakusqanta. Rikunchej jina, abusasqa wawasqa unayta sufrinku. Kay tiempopitaj chayqa astawan rikukushan. Chaytaj sutʼita rikuchiwanchej, qhepa pʼunchaykunapi kausashasqanchejta. Runasqa “runa masinkuta mana munakojkuna” kanku. “Chʼaukiyaj sajra runasrí, astawan astawan” sajrayashanku (2 Tim. 3:1-5, 13). w19.05 pág. 15 párrs. 7, 8

¿Imaynatá Jesús yachacherqa? Jesusqa parlasqanwan yachacherqa. Payqa Jehová Diosmanta cheqa kajta yachacherqa. Chantá yachachillarqataj imapajchus kausasqanchejta, Diospa Gobiernollan runaj llakiyninta tukuchinanta ima. Chay imasta yachachisqanrayku, Jesuspa palabrasnenqa atiyniyoj karqa (Luc. 24:19). Jesusqa ruwasqanwan yachachillarqataj. Payqa discipulosnin yachakunankupaj jina kausakorqa (Juan 13:15). ¿Maykʼajtaj Jesús yachacherqa? Kay jallpʼapi Diospa Gobiernonmanta willashaspa (Mat. 4:23). Chantá kausarimuytawanpis yachachillarqapuni. Payqa 500 kuraj yachachisqasninman rikhurerqa. Paykunamantaj kamacherqa: “Runasta yachachisqasniyman tukuchimuychej”, nispa (Mat. 28:19, 20; 1 Cor. 15:6). Jesusqa congregacionpa uman kasqanrayku, cieloman kutipuytawanpis discipulosninta yachachillarqapuni. Payqa 96 watapi, ajllasqa cristianosta apóstol Juannejta kallpacharqa, yuyaycharqataj (Col. 1:18; Apo. 1:1). w19.05 pág. 3 párrs. 4, 5

Kay tiempopi kausayqa, manchay trabajo. Ashkha hermanosninchej, familiankupaj diantinta trabajanku. Wakin hermanostaj, trabajonkuman sapa día ashkha horasta rinkutaj, jamunkutaj. Wakintatajrí trabajonku qʼala tʼunasqata saqen. Tukuynin chay hermanos wasinkuman manchay saykʼusqa chayanku. Chayrayku Bibliata estudianankupaj niña kallpanku kanchu. Diospa Palabranta, publicacionesta ima sumajta estudianapajqa, tiempochakunapuni tiyan. Chayta ruwaspalla, Jehová Diosman sumaj kʼaskasqa kasun, wiñay kausaytapis japʼiyta atisun (1 Tim. 4:15, 16). Wakin hermanosninchejqa, Bibliata ukhunchanankupaj sutʼiyayta sayarikunku. Imajtinchus chay horasqa wasinkupi ni ima chʼajwa kanchu, sumaj samarisqastaj kashanku. Wakin hermanostaj Bibliata chʼisiyaykuyta estudianku. Imajtinchus chay horasta, maypichus mana chʼajwa kanchu chaypi, sumajta tʼukuriyta atinku. w19.05 pág. 26 párrs. 1, 2

Imayna runachus kasqanchejta mana jinallamantachu cambianchej, watasta tukuy atisqanchejta kallpachakuna tiyan (2 Ped. 1:5). Chayrayku tukuy atisqanchejta ruwana, yuyayninchejta, sonqonchejtawan mosojyachinapaj. Ñaupaj kaj, Jehová Diosmanta mañakuna. Uj salmista mañakorqa: ‘Diosníy, llimphu sonqota qoway. Ukhuypi mosoj cheqan yuyayta churay’, nispa. Noqanchejpis chay salmista jina mañakuna (Sal. 51:10). Reparakunanchej tiyan, yuyayninchejta pusaj kallpata mosojyachinanchej kasqanta. Chayta ruwanapajtaj Jehová Diospa yanapanta mañakuna. Iskay kaj, tʼukurina. Bibliata sapa pʼunchay sumajta leena. Chantá tʼukurina imatachus sonqonchejmanta chayri yuyayninchejmanta cambiananchej kasqanta (Sal. 119:59; Heb. 4:12; Sant. 1:25). Sumajta qhawarikuna, kay mundoj yachachiyninwan chimpaykuchikushanchejchus manachus, chayta. Reparakunanchej tiyan, imapichus pantanapaj jina kashasqanchejta. Chantá mana urmanapaj kallpachakuna. w19.06 pág. 8 párr. 1; pág. 10 párr. 10; pág. 12 párrs. 11, 12

Imatachus ruwayta munasqanchejtaqa maykʼajchus qallarinanchejta yachana. Chay diataj ruwayta qallarina. Ruwanasninchejta qallarinapaj tukuy ima allillan kananta suyasun chayqa, ni jaykʼaj qallarisunchu (Ecl. 11:4). Tiemponchejta, kallpanchejtapis ama qhasi manakaj imaspi usuchinachu. Ajinamanta imastachus ruwananchejpuni kasqanta ruwallasun (Fili. 1:10). Atikojtenqa ima ratochus ni pi pantachiwasunmanchu chay horasta tʼaqana. Wajkunamanpis chay horasta ama pantachinawanchejta nina. Chantapis celularninchejta apagasunman, Internetpi kaj imastapis mana qhawasunmanchu. Ruwayta tukojtinchej ima bendicioneschus kanantaqa, uj lugarman chayaywan kikinchasunman. Chay lugarman chayanapajqa ichapis mayusta pasananchej kanqa chayri qaqas chayninta rinanchej kanqa. Jinapis chayananchejrayku chay jarkʼaykunata atipanchej. Ajinallataj imastachus ruwayta munasqanchejwanpis. Ruwayta tukojtinchej ima bendicioneschus kananpi piensasun chayqa, ima jarkʼay kajtinpis ruwayta munasqanchejta juntʼasunpuni (Gál. 6:9). w19.11 pág. 30 párrs. 17, 18

¿Imataj bautizakunaykipaj tanqasunan tiyan? Bibliata sumajta estudiaspaqa, imaynachus Jehová Dios kasqanta, imastachus ruwasqantawan yachakorqanki. Chay yachakusqaykitaj, sonqoykiman chayarqa. Sonqoykitaj Jehová Diosta mayta munakunaykipaj aysasorqa. Bautizakunaykipajqa chay munakuy tanqasunan tiyan. Bautizakunaykipajqa imastachus Bibliamanta yachakorqanki, chaypi creenayki tiyan. Imatachus Jesús Mateo 28:19, 20 versiculospi nisqanta yuyarikuna. Chaypi Jesús nerqa, yachachisqasnin kayta munaspaqa “Tata Diospa sutinpi, Wawanpa sutinpi, atiyninpa sutinpiwan” bautizakunanchej kasqanta. Chaytataj ruwanchej, imatachus Biblia Jehová Diosmanta, Wawan Jesusmanta, atiyninmantawan yachachisqanta tukuy sonqo creespa. Chay yachachiykunaqa, manchay atiyniyoj, sonqoyki ukhukamataj chayanman. w20.03 pág. 9 párrs. 8, 9

Jehová Diospa angelesnenqa, mana Lotta Sodomamanta llojsinallantachu nerqanku. Paykunaqa makinmanta japʼispa ayqecherqanku (Gén. 19:12-14, 17). Noqanchejpis ajinallatataj ruwasunman. Ichapis uj hermano problemaspi rikukunanpaj jina imatapis ruwashan. Bibliaj nisqanta mana chay ratochu kasukun chayqa, paywan pacienciakuna. Lotta yanaparqanku chay iskay ángeles jina kana. Hermanonchejta yanaparispa ama saykʼunachu, nitaj paymanta karunchakunachu. Astawanqa payta yanaparinapaj tukuy atisqanchejta ruwana (1 Juan 3:18). Hermanonchej Bibliaj nisqanta kasukunanpaj, ichá makinmantapis japʼispa jina yanapananchej kanqa. Jehová Diosqa mana Lotpa pantasqasnintachu qhawarqa. Astawanpis apóstol Pedrowan, Lot cheqan runa kasqanta qhelqacherqa (Sal. 130:3). Noqanchejpis Jehová jina kasunman, hermanosninchejpa allin ruwasqasninkuta astawan qhawaspa. Chayta ruwaspaqa, hermanosninchejpaj aswan pacienciayoj kasunchej. Paykunataj yanapananchejta saqekullanqanku. w19.06 pág. 21 párrs. 6, 7

Autoridades Jehová Diosta niña yupaychajta saqewajtinchej, ichapis payta sirvinapaj waj suyuman ripuyta munasunman. Chayta ruwayqa sapa ujninchejmanta kashan. Wakin hermanosqa, ichapis ñaupa cristianos jina ruwayta munankuman. Jerusalenmanta cristianosqa qhatiykachasqas kasqankutawan ashkhas, waj llajtasman riporqanku: Judeaman, Samariaman, Feniciaman, Chipreman, Antioquiaman ima (Mat. 10:23; Hech. 8:1; 11:19). Pabloqa kausayninta wañuy pataman churaspapis, may lugarespichus cristianosta qhatiykacharqanku chaypi qhepakorqa (Hech. 14:19-23). ¿Imatá ñaupa cristianosmanta, Pablomanta ima yachakusunman? Sapa tata chayri qosa, imatachus familianpaj ruwananta ajllanan tiyan. Niraj imatapis ruwashaspa, Jehová Diospa yanapayninta mañakunan tiyan. Payqa qhawarinan tiyan, imaynachus familian kashasqanta. Chantá piensarinan tiyan, waj llajtaman ripunanku familianpaj allinchus manachus kananta. Chay ajllasqankutataj, mana qhawarananchejchu tiyan. w19.07 pág. 10 párrs. 8, 9

Jesusqa kamachiwarqanchej: “Tukuy laya runasta yachachisqasniyman tukuchimuychej”, nispa (Mat. 28:19). Mana chayllachu, paykunaman Jesús imatachus kamachisqanta yachachispapis, chay kamachiykunaman jina kausakunankupaj yanapanallanchejtaj tiyan. Chay runas Bibliaj nisqanta ruwanankupaj kallpachakushajtinku, pacienciawan yanaparinanchej tiyan. Wakin runasqa sajra yuyayninkuta, ruwasqasninkutapis chay rato cambianku. Wakintajrí unaypi cambianku. Perú suyumanta misioneroj ujnin estudionwan imachus kasqanta qhawarina. Misionero hermanonchej nin: “Raulqa iskay librostaña estudiaspa tukorqa. Jinapis payqa ashkha problemasniyojllapuni karqa. Payqa señoranwan mana allintachu kausakoj, millay parlaykunatataj parlaj, nitaj wawasninpis respetajchu kanku. Jinapis Raulqa tantakuykunaman jamullajpuni. Chayrayku payta, familiantawan visitarillajpuni kani. Estudiachiyta qallarisqaymanta kinsa watasninmanraj bautizakuyta aterqa”, nispa. Raulpa kausaynenqa, estudiosninchejwan pacienciakunanchej kasqanta yachachiwanchej. w19.07 pág. 15 párr. 3; pág. 19 párrs. 15-17

Filiposmanta cristianosman cartanta qhelqashajtin, apóstol Pabloqa Romapi kasharqa. Wasinpi presochasqa kasqanraykutaj, mana predicaj llojsiyta aterqachu. Jinapis apóstol Pabloqa visitarejkunaman Jehová Diospa Gobiernonmanta willarqa, karupi kaj congregacionesmantaj cartasta qhelqarqa. Cristoqa wañupunankama Jehová Diosta sirverqa. Pablotaj pay jina ruwananpaj kallpachakunan kasqanta yacharqa. Chayrayku cristianosta atipanakupi correjkunawan kikincharqa (1 Cor. 9:24-27). Atipanakupi correjkunaqa, maymanchus chayananku tiyan chaypi yuyanku, nitaj imapis pantachinanta saqenkuchu. Llajta ukhupi atipanakupi correjkunaqa, ichapis tiendas chaynejta chayri waj lugaresnejta pasanku. Jinapis mana chaykunatarajchu qhawaj churakunku. Imaraykuchus correjkunaj yuyayninkoqa, premiota japʼinankupi kashan. Noqanchejpis wiñay kausayta japʼinanchejpaj, mana imapis pantachinawanchejta saqenachu tiyan. Yuyayninchejta premiopi churasun, apóstol Pablo jinataj kallpachakusun chayqa, premionchejta japʼisunpuni. w19.08 pág. 3 párr. 4; pág. 4 párr. 7

Jehová Diospa Palabran nisqanman jina kausakuyta qallarejtinchej, ichá familianchejqa imapichus creesqanchejta, imaynatachus kausakusqanchejta ima mana entiendeyta atillanqankuchu. Paykunaqa fiestasta niña ruwasqanchejta, nitaj politicaman satʼikusqanchejta reparankupacha. Chayraykutaj ichá noqanchejwan phiñakunku (Mat. 10:35, 36). Jinapis paykunawan pacienciakunallapuni tiyan. Imapichus creesqanchejta paykunaman niña entiendechisunchu chayqa, “paykunaqa mana wiñay kausayta japʼinankupaj jinachu kanku” nispa juzgashasunman. Jehová Diostaj mana munanchu runasta juzgananchejta. Jehová Diosninchejqa Jesusllata churan runasta juzgananpaj (Juan 5:22). Familianchejwan pacienciakusun chayqa, ichapis aswan qhepaman Bibliamanta parlarisqanchejta uyarillawasunña. Familianchej churanakuwajtinchejpis, paykunawan kʼachas kananchej tiyan, sinchʼitataj sayana tiyan (1 Cor. 4:12). Ichapis familianchejqa, Jehová Diosta sirviyta jatunpaj qhawasqanchejta, mana chay ratochu entiendenqanku. w19.08 pág. 17 párrs. 10, 13; pág. 18 párr. 14

Ichapis sinchʼita onqoykusqanchejrayku chayri familianchejmanta pillapis wañupusqanrayku, uj jatun llakiypi karqanchej. Chay llakiy pasasqantawan, ichá nerqanchej: “Sapallaymantaqa mana chay llakiyta aguantayta atiymanchu karqa”, nispa. Chay jina llakiykunataqa, Jehová Dios ‘may sumaj atiyninta’ qowasqanchejraykulla aguantarqanchej (2 Cor. 4:7-9). Jehová Diospa atiyninta necesitallanchejtaj, kay sajra mundoj yuyayninwan mana chimpachikunapaj (1 Juan 5:19). “Cielopi kaj supaykunawan” maqanakunapajpis, yanapata necesitallanchejtaj (Efe. 6:12). Jehová Diospa atiynenqa, llakiykuna kajtinpis ruwanasninchejta juntʼanapaj kallpachawanchej. Apóstol Pabloqa ima llakiypi rikukuspapis, ‘Cristoj atiynin’ yanapasqanrayku Jehová Diosta sirvillarqapuni, runasmanpis tukuy atisqanta willamullarqapuni (2 Cor. 12:9). w19.11 pág. 8 párrs. 1-3

Biblialla sutʼita willan, imatachus Jesús sapa ujninchejrayku ruwasqanta. Jehová Diosta astawan munakunaykipaj, Jesusta munakuy. Jesusqa tukuy imapi Tatanman rijchʼakorqa. Chayrayku Jesusmanta astawan yachakuspaqa, Jehová Diosta astawan rejsinki, astawantaj munakunki. Kaypi piensariy: Jesuspa tiemponpi wakin runasqa, pobresta, onqosqasta, pisi kallpayojkunatapis, mana khuyakojchu kanku. Jesustajrí paykunata khuyakoj. Chantapis Jesuspa sumaj yuyaychaykunasninpi piensariy. Chay yuyaychaykunata kasukuy, ¿yanapasorqachu? (Mat. 5:1-11; 7:24-27). Jesusqa juchasninchej perdonasqa kananpaj kausayninta qorqa. Chaypi piensarispaqa, payta astawan munakunki (Mat. 20:28). Jesús sapa ujninchejrayku wañusqanta entiendespaqa, juchasniykimanta pesachikunki, Jehová Diospa perdonnintataj maskʼanki (Hech. 3:19, 20; 1 Juan 1:9). Jehová Diosta, Jesustawan astawan munakuspaqa, paykunata munakojkunawan kayta munanki. w20.03 págs. 5, 6 párrs. 10-12

Ichá uj hermanoqa yuyanman, congregacionpi uj llankʼayta wajkunamanta nisqa aswan sumajta ruwayta atisqanta. Chayrí uj hermana yuyanman: “Qosayqa chay hermanomanta nisqa aswan sumaj wakichisqa kashan”, nispa. Kʼumuykukoj sonqos kaspaqa, mana ajinata yuyasunchu. Wajkuna astawan ruwanasta japʼejtinku, imatachus Moisés ruwasqanmanta yachakuna. Payqa israelitasta kamachiyta may jatunpaj qhawarqa. Jinapis Jehová Dios Moisesta yanapanankupaj waj israelitasmanwan atiyta qojtin, payqa mana envidiakorqachu (Núm. 11:24-29). Waj kutipitaj Moisesqa kʼumuykukoj sonqo kasqanrayku wajkuna juzgaysinankuta saqerqa (Éxo. 18:13-24). Israelitas ukhupi astawan juezkuna kajtin, aswan usqhayllata israelitasta atiendej kanku. Moisesqa Israelpi jatunpaj qhawachikunanmantaqa, israelitaspa allinninkuta ñaupajman churarqa. Paymantaqa mayta yachakusunman. Mana kʼumuykukoj sonqochu kanchej chayqa, may jina yachayniyoj kaspapis Jehová Diospajqa mana valenchejchu. Chayrayku uj llankʼayta qonawanchejta munanchej chayqa, kʼumuykukoj sonqo kananchej tiyan. w19.09 págs. 5, 6 párrs. 13, 14

¿Ima nispataj gobiernos ‘Jatun Babiloniata’ chinkachinankupaj oqharikonqanku? Mana yachanchejchu. Ichapis nenqanku: “Allin kausay mana kananpaj religiones juchayoj kanku. Politicamantaj anchata satʼikunku”, nispa. Chayrí nenqanku: “Paykunaqa manchayta qhapajyaykunku, tukuy imayojtaj kanku”, nispa (Apo. 18:3, 7). Gobiernos ‘Jatun Babiloniata’ chinkachishajtinku, ichapis llulla religionesllata chinkachenqanku, manataj chay religionespi kaj runastachu. Chayrayku nisunman llulla religiones chinkachisqa kajtinku, chay religionespi kajkunamanta ashkhas mana wañunankuta. Paykunataj reparanqanku pastoresninku, tata curasninkupis ni imapi yanapasqankuta. Chayrayku ichapis religionninkumanta niña yachayta munanqankuchu. “Jatun Babiloniaqa” pisi tiempollapi chinkachisqa kanqa (Apo. 18:10, 21). Jehová Diosqa niwanchej, manchay ñakʼariy tiempota ‘ajllasqasninrayku’, llajtanta salvananrayku ima ‘pisiyachinanta’ (Mar. 13:19, 20). w19.10 pág. 15 párrs. 4, 5

Mamas, ichapis tatasniykichejqa imamantapis rato phiñakoj kanku, sonqoykichejta nanachinapaj jinataj kʼamej kasunkichej. Ajina uywasqa kasqaykichejrayku, ichá qankunapis ajinallatataj wawasniykichejta uywayta munankichej. Jinapis Jehová Diosta rejsispaqa, wawasta mana ajinatachu uywana kasqanta yachakorqankichej. Chayta yachaspañapis, ichá wakin kutis rabiawan atipachikoj jina kankichej, manataj pacienciakuyta atillankichejchu. Chaytaj astawanraj kanman saykʼusqa kashajtiykichejpuni wawasniykichej mana kasukojtinku (Efe. 4:31). Ajinapi rikukuspaqa, Jehová Diosmanta astawan mañakuychej (Sal. 37:5). Wakin mamasqa wawasninkuman mana niyta atillankuchu, “munakuyki wawitáy” nispa. Ichapis ajina kanku, juchʼuyllaraj kashajtinku tatasninku mana chayta nisqankurayku. Jinapis mamasqa mana paykuna jina kanankupaj kallpachakunanku tiyan. Jehová Diospa kamachisqanta kasukoj mamasqa, wawasninkuta mana sonqollankupichu munakunanku tiyan. Mana atikullajtinpis, cambiayta atinkuman. Chayta ruwanqanku chayqa, paykunapis familiankupis aswan kusisqa kanqanku. w19.09 págs. 18, 19 párrs. 19, 20

Diosta yupaychashaspa qhapajyayta maskʼasunman chayqa, iskay patronesta sirvishasunman. Chayta ruwaspataj, niña Jehová Diosllatachu sirvishanchej. Laodicea llajtamanta cristianosqa, qhapaj kasqankumanta runaykacharqanku. Paykunaqa nej kanku: “Qhapaj kani, tukuy imata sayachikuni, nitaj imapis pisiwanchu”, nispa. Jinapis Diospa, jinallataj Jesuspa ñaupaqenpeqa, “mana imayoj, khuyana, wajcha, ciego, qʼalallataj” kasharqanku. Jesusqa mana qhapaj kasqankumantachu kʼamerqa, manaqa qolqenkurayku Diosmanta qonqakapushasqankumanta (Apo. 3:14-17). Noqanchejpis ichá sonqonchejpi qhapajyayta munashasunman. Chayta reparakuspaqa, usqhayllata chay munayta sonqonchejmanta orqhonanchej tiyan (1 Tim. 6:7, 8). Mana chayta ruwajtinchejqa, Diosta niña tukuy sonqochu sirvisun. Paytaj yupaychasqanchejta mana allinpajchu qhawanqa. Imaraykuchus payqa ‘tukuy sonqonchejwan’ munakunanchejta munan (Mar. 12:30). w19.10 pág. 27 párrs. 5, 6

Kay versículo griego parlaypi qhelqakushajtin, “yuyaychasqa” ninapaj “pusachikuy” chayri “apachikuy” palabrata oqharikorqa. Lucasqa chayman rijchʼakoj palabrallatataj Hechos libropi oqharerqa. Chaypeqa uj barco wayrawan apachikusqanmanta parlarqa (Hech. 27:15). Bibliamanta yachaj runa nerqa: “Apóstol Pedroqa Bibliata qhelqajkuna Diospa atiyninwan ‘pusachikusqankuta’ nispa, imaynatachus barco purisqanpi piensananchejta munarqa”, nispa. ¿Imatá apóstol Pedro niyta munasharqa? Diospa atiynin Bibliata qhelqajkunata yanapasqanta, imaynatachus wayra uj barcota maymanpis chayananpaj yanapan, ajinata. Chay runa nillarqataj: “Profetasqa barco purichinanku carpata kicharerqanku wayrata japʼinankupaj”, nispa. Jehová Diosqa “wayrachimorqa”, nisunman Bibliata qhelqajkunaman atiyninta qorqa. Paykunataj chay atiywan yanapachikuspa llankʼayninkuta juntʼarqanku. Diospa atiynintaqa wayrawan kikinchasunman. Barcota purichejkunaqa, may ladomanchus riyta munasqankuman jina wayrawan yanapachikunku. Sumajta yanapachikuspaqa, loco paras kajtinpis maymanchus chayanankuman chayanku. Diospa atiynenqa ajinallatataj yanapawanchej, llakiykuna kajtinpis payta sirvinallapajpuni. Ajinamanta paraisoman chayananchejpaj. w19.11 pág. 9 párrs. 7-9

Problemasniyoj kaspaqa, wakin kutis llakisqalla kanchej. Jinapis mana allinchu kanman, chayllapi yuyananchej. Imaraykuchus Jehová Dios sumaj kausayta qonawanchejta nisqanta qonqapusunman (Apo. 21:3, 4). Llakisqalla kajtinchejqa saykʼupusunman, niñataj Jehová Diosta sirvisunmanchu. Estados Unidosmanta hermananchejpi piensarina. Paypa qosanqa sinchʼi onqosqa kashan. Jinapis hermananchejqa sinchʼi creeyniyojllapuni. Imatachus chaypaj ruwasqanta qhawarina. Pay nin: “Wakin kutisqa manchay llakisqa kayku. Jinapis jamoj bendicionesta mana qonqakuykuchu. Jehová Diosman mayta agradecekuyku, creeyniykuta kallpachanaykupaj tukuy imata qowasqaykumanta. Chaykunaqa maytapuni sonqochawayku. Yanapawaykutaj ñaupajman rinallaykupajpuni”, nispa. Hermananchejpa nisqanqa, llakiyninchejta atipayta atisqanchejta yachachiwanchej. ¿Imaynatá chayta ruwasunman? Problemasninchejta Satanás rikhurichisqanta yuyana, Jehová Dios sonqochanawanchejpi atienekuna, pay qowasqanchej yachachiykunatataj jatunpaj qhawana. w19.11 pág. 16 párrs. 9, 10

Ancianosqa kay yuyaychayta kasukunanku tiyan. Paykunaqa, imastachus hermanoswan parlasqankuta, mana pimanpis willarparinallankuchu tiyan. Chayta ruwankuman chayqa, hermanosqa niña paykunaman imatapis willankumanchu. Chantapis niña allinpajchu qhawasqa kankuman. Ancianosqa atienekunapaj jina kananku tiyan. Chayrayku “mana puraj uyaschu” kananku tiyan, nisunman “mana parlayninkuwan chʼaukiyajkunachu” kananku tiyan (1 Tim. 3:8, sutʼinchaynin). Chayrayku paykunaqa mana pitapis engañankuchu, nitaj cuento qʼepischu kanku. Señoranta munakoj ancianoqa, mana payman willanchu imastachus mana yachananchu tiyan chayta. Uj ancianoj señoranqa, qosanta yanapanman allinpaj qhawasqa kanallanpajpuni. Chaytataj ruwanman, imatachus qosan mana pimanpis willananchu tiyan, chayta mana willachikuspa. Ajinamanta qosanta yanapanqa, qosanpi atienekoj hermanostapis respetanqa. Chantapis congregacionpi hermanosta yanapanqa allinta kausakunankupaj, ujchasqataj kanankupaj. Chaytaj Jehová Diosta mayta kusichin (Rom. 14:19). w20.03 pág. 22 párrs. 13, 14

1512 watapi Jesús niraj jamushajtin, Sinaí orqo qayllapi Dioswan tinkukuna toldo sayarichisqa karqa. Chaypacha Moisesqa, Aaronta, wawasnintawan sacerdotes kanankupaj churarqa (Éxo. 40:17; Lev. 9:1-5). Jehová Diosrí, ¿chay sacerdotesta allinpajchu qhawarqa? Arí. Imaraykuchus Moiseswan Aaronwan israelitasta bendecisqankutawan, Jehová Diospa ñaupaqenmanta ujllata nina lauray uraykamorqa. Chantá altar patapi kasharqa chay jaywasqa uywa wañuchisqata qʼolaykorqa (Lev. 9:23, 24). Jehová Diosqa cielomantapacha ninata apachimuspa, Aaronta, wawasnintawan sacerdotesnin kanankupaj ajllasqanta rikucherqa. Israelitasqa chayta rikuspa, yacharqanku paykunapis sacerdotesta allinpaj qhawananku kasqanta. ¿Imaynatataj chayta yachay yanapawanchej? Israel llajtapi sacerdotes kasqanqa, jamoj imaspa llanthun jinalla karqa. Cristoqa Kuraj kaj Sacerdotenchej, paywan khuskataj cielopi 144.000 runas sacerdotestaj reyestaj kanqanku (Heb. 4:14; 8:3-5; 10:1). Sutʼita reparanchej, Jehová Diosqa llajtanta yanapashasqanta, bendecishasqantataj. w19.11 pág. 23 párr. 13; pág. 24 párrs. 14, 16

Corintopi kashaspa, Pabloqa Aquilawan Priscilawan ima qhepakorqa “kikin oficioyoj kasqanrayku”. “Paykunawantaj llankʼarqa toldosta ruwaspa”. Apóstol Pabloqa “tuta pʼunchay” trabajasqanta nispa, mana nisharqachu mana samarikuspa trabajasqanta. Imaraykuchus payqa, sapa Samarikuna Pʼunchaypi judiosman yachachej, paykunapis chay día samarikusqankurayku (Hech. 13:14-16, 42-44; 16:13; 18:1-4). Apóstol Pabloqa gastosninpaj trabajakuspapis, “sumaj willaykunata” willaspa ‘Diospaj sinchʼita llankʼarqa’ (Rom. 15:16; 2 Cor. 11:23). Pabloqa wajkunatapis pay jina ruwanankupaj kallpacharqa. Chayrayku Aquilamanta Priscilamantawan nerqa: “Paykunaqa Cristo Jesuspi yanapawajkuna kanku”, nispa (Rom. 12:11; 16:3). Apóstol Pabloqa, Corintomanta hermanosman nillarqataj: “Señorpa ruwayninpi ashkhata llankʼallaychejpuni”, nispa (1 Cor. 15:58; 2 Cor. 9:8). Chantapis Jehová Dios yuyaychasqanrayku, jinata qhelqallarqataj: “Pichus mana trabajayta munajqa, amallataj mikhuchunchu”, nispa (2 Tes. 3:10). w19.12 pág. 5 párrs. 12, 13

Jehová Diosqa ñaupaj kaj qhariwarmita wawasniyoj kayta munanankupaj ruwarqa. Jinapis, ¿pitaj ajllanan tiyan uj qhariwarmi wawasniyojchus manachus kanankuta? Wakin lugarespi, runasqa qhariwarmis casarakusqankutawan wawasniyoj kanankuta munanku. Chayrayku familiasninku, waj runas ima usqhayllata wawasniyoj kanankupaj tanqanku. Asiamanta Jethro sutiyoj hermano nin: “Congregacionpi familiayoj kajkunaqa, mana wawasniyoj qhariwarmista niyta yachanku: ‘Maykʼajtaj wawas kanqari’, nispa”. Asiamanta Jeffrey sutiyoj hermanopis nillantaj: “Wakenqa mana wawasniyoj casarasqasta ninku: ‘Machuyapojtiykichej pitaj cuidasonqachej’, nispa”. Jinapis casarasqasqa, paykuna kikin ajllananku tiyan wawasniyojchus manachus kanankuta. Imaraykuchus “sapa uj qʼepinta apanan tiyan” (Gál. 6:5, sutʼinchaynin). Familiasninku chayri amigosninku kusisqa kanankuta munaspapis, mana paykunata wawasniyoj kanankupaj tanqanankuchu tiyan. Chaytaqa paykunalla ajllananku tiyan (1 Tes. 4:11). w19.12 pág. 22 párrs. 1-3

Wakin runasqa, Jehová Diosta mana Tatankuta jina qhawayta atillankuchu. ¿Imaraykú? Wakenqa ninku: “Noqa juchasapaqa imatá Tukuy Atiyniyoj Diosman qayllaykuyta atiymanri. Ni creenichu pay noqanchejmanta llakikunanta”, nispa. Jinapis munakuyniyoj Tatanchej Jehovaqa, mana ajinata yuyananchejta munanchu. Payqa kausayta qowasqanchejrayku, payta maskʼananchejta, tarinanchejtataj munan. Apóstol Pabloqa chay imasmanta parlaytawan, Atenas llajtapi nerqa: Jehová Diosqa “mana karupichu kashan sapa ujninchejmanta”, nispa (Hech. 17:24-29). Jehová Diosqa imaynatachus uj wawita papasunwan parlarin, ajinallatataj paywan parlarinanchejta munan. Wakenqa ninku: “Tatayqa pisillata munakuwaj”, nispa. Wakintajrí ninku: “Papasoyqa mana munakuwajchu”, nispa. Ajina tatasniyoj runasqa, mana Jehová Diosta Tatankuta jina qhawayta atillankuchu. Uj hermana nin: “Papasoyqa anchata ultrajawaj. Chayrayku Bibliata estudiayta qallarishaspa, mana Diosta Tatayta jina qhawayta atillarqanichu”, nispa. Ichá noqanchejpis chay hermana jinallataj yuyanchej. Jehová Diosta rejsisqanchejman jina, noqanchejpis Tatanchejta jina qhawayta atisun. w20.02 pág. 3 párrs. 4, 5

Viejoyapusqanchejrayku ichapis Jehová Diospaj pisillata llankʼasqanchejta, chayri ashkha imasta mana ruwayta atisqanchejta yuyanchej. Jinapis Jesusqa yachachiwarqanchej, chay ruwasqanchejta Jehová Dios may sumajpaj qhawasqanta (Sal. 92:12-15; Luc. 21:2-4). Chayrayku ama llakikunachu imatachus mana ruwayta atisqanchejmanta. Imaraykuchus Jehová Diosmanta wajkunaman willariyta atinchejraj, hermanosninchejpaj mañakuyta atinchej, wajkunatapis Diosta sirvinallankupajpuni kallpachayta atinchej. Jehová Diosninchejqa paywan khuska llankʼasqanchejta nin. Chaytataj nin mana uj imata ruwasqanchejraykuchu, manaqa payta tukuy sonqo kasukuyta munasqanchejrayku (1 Cor. 3:5-9). Jehová Diosta sirviyqa may sumajpuni. Payqa kamachisninta mayta munakun. Jehová Diosqa munayninta ruwanapaj ruwawarqanchej. Chayrayku payta yupaychaspa kusisqa kausakunchej (Apo. 4:11). Kay mundomanta runaspajqa mana valenchejchu. Jehová Diosninchejpajrí ashkha valenchej (Heb. 11:16, 38). Sichus onqosqa kasqanchejrayku, qolqenchej pisiyasqanrayku chayri viejoyapusqanchejrayku llakikunchej chayqa, kayta yuyarikuna: Tatanchej Jehovaj munakuyninmantaqa ni ima tʼaqawasunchu (Rom. 8:38, 39). w20.01 pág. 18 párr. 16; pág. 19 párrs. 18, 19

Envidiakuyta chinkachinapajqa, kʼumuykukoj sonqo kana, kapuwasqanchejwantaj kusisqa kausakuna. Kʼumuykukoj sonqo runaqa, mana may kasqanta yuyakunchu. Nillataj yuyanchu imatapis astawan ashkhata japʼinan kasqanta (Gál. 6:3, 4). Kapusqanwan kusisqa kajtaj, sonqo juntʼasqa kausakun, nitaj wajkunawan kikinchakunchu (1 Tim. 6:7, 8). Kʼumuykukoj sonqo kasun, kapuwasqanchejwantaj kusisqa kasun chayqa, wajkuna imatapis japʼejtinku kusikusun. Jehová Diospa atiynenqa, yanapawanchej mana envidiakunapaj, kʼumuykukoj sonqo kanapaj, kapuwasqanchejwan kusisqa kanapaj ima (Gál. 5:16; Fili. 2:3, 4). Chantapis Jehová Diospa atiynenqa, sonqonchejta yuyayninchejtawan qhawarikunapaj yanapawanchej. Diospa yanapayninwanqa, envidiata sonqonchejmanta orqhosun, sumaj yuyaykunawantaj juntʼachisun (Sal. 26:2). w20.02 pág. 15 párrs. 8, 9

Bautizakushaspaqa Jehová Diosman nerqanki payllapajña kausanaykita. Jehová Diostaj chay nisqaykita juntʼanaykita munan. Chayrayku congregacionmanta ama karunchakuychu. Congregacionmanta hermanos, hermanaspis familiayki kanqanku. Reunionesman mana faltakuspaqa, paykunaman astawan kʼaskaykunki. Chantapis Diospa Palabranta sapa día leey, chaypitaj tʼukuriy (Sal. 1:1, 2). Bibliata leesqaykipi piensariy. Ajinamanta chay palabrasqa sonqoykiman chayanqa. Chantá Diosmanta mana saykʼuspa mañakuy (Mat. 26:41). Jehová Diosmanta tukuy sonqo mañakuspaqa, payman astawan qayllaykunki. Chantapis ‘Diospa Gobiernonta ñaupajta maskʼallaypuni’ (Mat. 6:33). Chaytaqa ruwanki predicacionta kausayniykipi ñaupajman churaspa. Sapa kuti predicajtiykeqa, creeyniyki astawan kallpachakonqa. Kay sajra mundopi ima llakiypis “uj tiempollapaj, nitaj imapischu” (2 Cor. 4:17). Jehová Diosman kausayniykita qonki, bautizakunkitaj chayqa, kay tiempopiña aswan kusisqa kausakunki, jamoj tiempopitaj ‘cheqa kaj kausayta’ japʼinki. Bautizakunaykeqa may allinpuni (1 Tim. 6:19). w20.03 pág. 13 párrs. 19-21

Estudionchej mana ñauparishanchu chayqa, ichapis saqepunanchejpi piensarinanchej kanqa. Jinapis ñaupajtaqa kaypi piensarina: “¿Estudioy atishaspachu mana ñauparishan?”. Wakin runasqa chay rato ñauparinku, wakintaj unaypiraj. Chayrayku kay tapuykunapi piensarina: “Estudioy, ¿atisqanman jinachu ñauparishan? ¿Bibliapi yachakusqanman jinachu ruwashan?” (Mat. 28:20). Wakin runasqa, profeta Ezequielpa tiemponmanta israelitas jina kanku. Jehová Dios paykunamanta Ezequielman nerqa: “Qanqa paykunapaj munanakojkunaj takiyninkuta takej jinalla kanki, sumaj arpawan, kʼacha kunkawan takej jinalla. Parlasqasniykita uyarinku, manataj juntʼankuchu”, nispa (Eze. 33:32). Ichapis estudionchejman mana niyta atillanchejchu, niña estudiachinanchejta. Jinapis “tiempoqa pisillaña kashan”. Mana ñauparej estudiosta yachachinamantaqa, “wiñay kausayta japʼinankupaj allin sonqoyoj” kajkunata maskʼana (Hech. 13:48). w20.01 pág. 6 párr. 17; pág. 7 párr. 20

Biblia nin, Diosta kasukoj runasqa kay jallpʼapi wiñaypaj kausakunankuta. Cristiano nichikoj iglesiastaj mana chaytachu yachachinku (2 Cor. 4:3, 4). Kay tiempopi casi tukuy iglesias yachachinku, bueno runas wañupuspa cieloman ripusqankuta. Jinapis 1900 wata qayllataña, uj juchʼuy grupo mana kikintachu creerqanku. Paykunaqa Bibliata estudiaspa entienderqanku, Dios kay jallpʼata uj paraisoman tukuchinanta, chaypitaj ashkha kasukoj runas kausakunankuta. Jinapis mana sutʼita yacharqankuchu, pikunachus chay runas kanankuta. Chay juchʼuy grupoqa, Bibliamanta Yachaqajkuna nisqa karqanku, Torremanta Qhawaj revistatataj inglés parlaypi orqhosharqanku. Bibliamanta Yachaqajkunaqa, Bibliata estudiaspa entiendellarqankutaj uj grupo runas “jallpʼamanta rantisqa” kanankuta, Jesuswan khuskataj cielopi kamachinankuta (Apo. 14:3). Chay grupoqa 144.000 kananku karqa, jallpʼapi kashaspataj Diosta tukuy sonqo sirvinanku karqa. w19.09 pág. 27 párrs. 4, 5