Enero

Timoteoqa Jehová Diospi creerqa, Palabranpi yachakusqan cheqapuni kasqanta yachasqanrayku. Noqanchejpis Bibliapi Jehová Diosmanta yachakusqanchej, cheqapunichus manachus kasqanta yachananchej tiyan. Ñaupajtaqa noqanchejpuni yachananchej tiyan, kay kinsa yachachiykuna cheqachus manachus kasqanta: Ñaupaj kaj, ‘tukuy imata ruwajqa’ Jehová Diospuni kasqanta (Éxo. 3:14, 15; Heb. 3:4; Apo. 4:11). Iskay kaj, Diospuni Bibliata runasman qosqanta (2 Tim. 3:16, 17). Kinsa kaj, Diosqa kamachisnin ujchasqa yupaychanankuta munasqanta, paykunatataj Jesús ñaupajman pusashasqanta, chay kamachisnintaj Jehovaj testigosnin kasqankuta (Isa. 43:10-12; Juan 14:6; Hech. 15:14). Chaypajqa mana Bibliamanta tukuy imatapunichu yachananchej tiyan. Astawanqa chay yachachiykunapi creenallapajpuni, ‘yuyayninchejwan’ allinta reparana tiyan (Rom. 12:1). w20.07 pág. 10 párrs. 8, 9

Chay langostasqa runa uyasniyoj kanku, umasninkupitaj qori pillusniyoj jina kanku (Apo. 9:7). Paykunaqa “pikunajtachus frentesninkupi mana Diospa sellon kanchu”, chaykunata ñakʼarichinku, nisunman Diospa enemigosninta. Chaytataj ruwanku phishqa killata, uj langostaj kausasqan tiempota (Apo. 9:4). Chay profeciaqa ajllasqa cristianosmanta parlashan. Imaraykuchus paykunaqa, Jehová Dios kay mundomanta sajra runasta chinkachinanta mana manchachikuspa willashanku. Chay willasqankutaj runasta mayta llakichin. Chayrayku nisunman Joel 2:7-9 profeciamanta langostasqa, Apocalipsis libropi langostaswan mana ujllachu kasqankuta. Chantapis Bibliapeqa uj kikinchayta oqharikuyta yachan, iskaymanta chayri astawan imasmanta parlanapaj. Astawan entiendenapaj, imaynatachus “león” palabrata oqharikusqanta qhawarina. Apocalipsis 5:5 versiculopi “Judá ayllumanta Leonqa” nispa, Jesusmanta parlashan. 1 Pedro 5:8 versiculopitaj, “qhaparirishaj león” nispa, Satanasmanta parlashan. w20.04 pág. 3 párr. 8; pág. 5 párr. 10

Agarqa Saraij kamachin karqa. Jinapis Abrahanpa warminman tukuytawan mayta pantaykorqa. Agarqa onqoj rikhurispa, Saraita mana wawasniyoj kayta atisqanrayku kʼumuykachacherqa. Chayrayku Saraiqa Agarta ñakʼarichiyta qallarerqa. Agartajrí ayqekorqa (Gén. 16:4-6). Agarta mana allinta rejsisqanchejrayku, ichapis nisunman: “Imapaj pay umata oqharinri, chaytamá munan á”, nispa. Jehová Diostajrí mana ajinatachu Agarmanta yuyarqa. Chayrayku angelninta payman kacharqa. Chay angeltaj Agarta nerqa wasinman kutipunanta, patronantataj kasukunanta, bendicerqataj. Agarqa chaypi repararqa Jehová Dios payta qhawashasqanta, llakiynintapis sumajta entiendesqanta. Chayrayku Jehová Diosman nerqa: ‘Qan kanki Rikoj Dios, noqata rikuwaj Dios’, nispa (Gén. 16:7-13). ¿Imatataj Jehová Dios Agarmanta yacharqa? Payqa imaynatachus Agar ñaupajpi kausasqanta, ima llakiykunasniyojchus kasqantapis sumajta yacharqa. Jehová Diosqa chay tukuy imasta Agarmanta yacharqa, imaynachus kashasqantapis entienderqa. Chayrayku Agarpa pantasqanta mana allinpajchu qhawaspapis, paymanta khuyakorqa. w20.04 pág. 16 párrs. 8, 9

Apóstol Pabloqa, tukuy cristianos atipanakupi correjkuna jina kasqanchejta nerqa (Heb. 12:1). Chayrayku jóvenes, viejitos, kallpayoj chayri saykʼusqa kaspapis, maymanchus chayananchej kashan, chaykama correnallanchejpuni tiyan. Jehová Diostaj premionchejta qowasun (Mat. 24:13). Pabloqa nerqa: “Atipanakupi corresqaytapis tukuniña”, nispa. Chayrayku payqa tukukuykama correnamanta parlayta aterqa (2 Tim. 4:7, 8). ¿Ima atipanakupitaj correshanchej? Unay tiempopeqa, Grecia suyupi atipanakupi pujllaykuna karqa. Apóstol Pablotaj cristianosman yachachinanpaj, wakin kutis chay pujllaykunamanta parlarqa (1 Cor. 9:25-27; 2 Tim. 2:5). Chayrayku ashkha kutispi, cristianospa kausayninkuta uj atipanakupi correywan kikincharqa (1 Cor. 9:24; Fili. 2:16). Chay atipanakupi correyta qallarinchej, maypachachus Jehová Diosman kausayninchejta qopunchej, bautizakunchejtaj, chaypacha (1 Ped. 3:21). Maymanchus chayananchej kashan chayman chayajtinchejtaj, Jehová Diosqa wiñay kausayta premiota jina qowasun (Mat. 25:31-34, 46; 2 Tim. 4:8). w20.04 pág. 26 párrs. 1-3

“Señortajrí nisqanta juntʼanpuni. Paymin kallpachasonqachej, Kuraj Supaymantataj jarkʼasonqachej”, nispa (2 Tes. 3:3). Jehová Diosqa Satanasmanta jarkʼanawanchejpaj, maqanakuna pʼachata qowanchej (Efe. 6:13-17). Chay pʼachaqa manchay sumaj, sumajtataj jarkʼawasunman. Jinapis chaypajqa, tukuysitunta churakuna tiyan, manataj orqhokunachu tiyan. Chay pʼachamanta ujqa chumpi kashan. Chaytaj Diospa Palabranpi cheqa yachachiykunawan ninakun. ¿Imaraykutaj chaywan matʼita chumpiykukunanchej tiyan? Imaraykuchus Satanasqa ‘llullakojkunaj tatan’ (Juan 8:44). Payqa llulleriosninwan may chhika unaytaña “jallpʼapi kaj tukuy runasta pantachishan” (Apo. 12:9). Bibliaj yachachiykunasninrí, mana paywan engañachikunapaj yanapawanchej. ¿Imaynatá churakusunman Dios qowanchej chay chumpita? Jehovamanta cheqa kajta yachakuspa, “atiyninman jina, cheqa kajman jinataj” payta yupaychaspa, tukuy imapitaj allinta purispa (Juan 4:24; Efe. 4:25; Heb. 13:18). w21.03 págs. 26, 27 párrs. 3-5

Israel llajtaqa sumajpaj qhawasqa karqa, imaraykuchus chaypi Jehová Diosta yupaychaj kanku. Jinapis Pentecostés 33 watamantapacha, chay ‘sumaj kʼachitu jallpʼaqa’ manaña uj lugarchu. ¿Imaraykutaj chayta ninchej? Imaraykuchus Jehová Diospa kamachisnenqa, kay tiempopi jallpʼantinpi kashanku. Chayrayku chay ‘sumaj kʼachitu jallpʼaqa’, Diospa llajtanmanta kajkuna imaynatachus kausakusqankuwan ninakun. Paykunaqa kausayninkupi Jehová Diosta yupaychayta ñaupajman churanku. Chayrayku tantakunku, predicanku ima. Tukukuy tiempopi, wichaynejmanta reyqa ashkha kutispi chay ‘sumaj kʼachitu jallpʼaman’ yaykuykun. Imaynatachus Alemania chayta ruwasqanmanta parlarina. Segunda Guerra Mundialpi, chay nación wichaynejmanta rey karqa. Alemaniapi nazis nisqa partido gobiernopi kashajtin, hermanosninchejta qhatiykacharqanku, ashkhastataj wañucherqanku. Ajinamanta wichay ladomanta reyqa, ‘sumaj kʼachitu jallpʼaman’ yaykorqa. Segunda Guerra Mundial pasayta, Unión Sovieticañataj wichaynejmanta rey karqa. Paykunapis hermanosninchejta qhatiykacharqanku, waj llajtamantaj presota jina aparqanku. Ajinamanta chay reyqa ‘sumaj kʼachitu jallpʼaman’ yaykullarqataj. w20.05 pág. 13 párrs. 7, 8

Jehová Diospa wakin amigosninmanta parlarina. Paykunaqa niraj Jesús wañupushajtin kausarqanku. Ujqa Abrahán karqa. Payqa ni mayqen runa jina Jehová Diospi creerqa. Paytaj Abrahán wañupusqanmanta waranqa watasninman jina, payta “kawsaqey” nerqa (Isa. 41:8). Jehovaqa amigosnin wañupojtinkupis, paykunata amigosnillanpajpuni qhawan. Abrahanqa Jehová Diospaj kausashallanpuni (Luc. 20:37, 38). Jobpis Diospa amigollantaj karqa. Uj pacha, ángeles cielopi tantasqa kasharqanku. Chaypachataj Jehovaqa, Jobmanta tukuy sonqo nerqa: “Payqa mana juchayoj, cheqan runa, Diosta manchachikun, sajra ruwaykunatataj chejnikun”, nispa (Job 1:6-8). Profeta Danielpis 80 watasta jina Diosta mana wasanchaspa sirverqa. Payqa waj dioskunata yupaychaj llajtapi tiyakorqa. Viejituña kashajtintaj, angelesqa kinsa kutita Danielman nerqanku “Diospa may munasqa kamachin” kasqanta (Dan. 9:23; 10:11, 19). Jehová Diosqa wañupoj amigosninta maytapuni kausarichiyta munashan (Job 14:15). w20.05 pág. 27 párrs. 3, 4

Estudiosninchejman Jehová Diospa yachachiykunasninta, kamachiykunasninta, leyesninta ima yachachinchej. Chay kamachiykuna sumaj kasqanta yuyajtinkupis, ichá mana Jehová Diosta munakusqankuraykuchu kasukonqanku. Evamanta yuyarikuna. Payqa Jehová imatachus kamachisqanta yacharqa, jinapis mana tukuy sonqochu payta munakorqa. Adanpis kikillantaj karqa (Gén. 3:1-6). Chayrayku runasmanqa mana Diospa kamachiykunasnillantachu, nitaj leyesnillantachu yachachinanchej tiyan. Diospa kamachiykunasnenqa, may sumajpuni, allinninchejpajtaj kanku (Sal. 119:97, 111, 112). Noqanchejtaj runas Diospa kamachiykunasninta ajinata qhawanankuta munanchej. Chaypajqa entiendenanku tiyan, Jehová Dios munakuwasqanchejrayku chay kamachiykunata qowasqanchejta. Chayrayku Bibliamanta yachachishaspa, estudionchejta tapurisunman: “¿Imaraykutaj Jehová Dios kayta kamachiwanchej? ¿Imajtintaj mana kayta ruwananchejta munanmanchu? ¿Imatá kay kamachiy paymanta yachachiwanchej?”, nispa. Bibliamanta yachakojta ajinata tapurispaqa, Jehová Diosta, sutintawan munakunanpaj yanapasun. Chantapis ichá sonqonman chayasun. Ajinamantataj payqa mana Diospa leyesnillantachu munakonqa, manaqa chay leyesta qoj Diostapis. Chantapis creeynin sinchʼiyanqa. Llakiykuna chayri problemas kajtintaj, aguantayta atenqa (1 Cor. 3:12-15). w20.06 pág. 10 párrs. 10, 11

Chiriyapoj hermanosqa, mana chay ratochu Jehová Diosman kutinpunku. Chayrayku pacienciayoj kananchej tiyan. Paykunamanta ashkhasqa, ancianos, waj hermanos ima kutin kutita waturisqankutawanraj kutinporqanku. Asiamanta hermana Nancy nin: “Congregacionmanta uj amigay mayta yanapawarqa. Payqa sullkʼa hermanitanta jina munakuwarqa. Imastachus ñaupajta khuska ruwasqaykuta yuyarichiwaj. Chantapis imaynachus kashasqayta willarejtiy, pacienciawan uyariwaj, yuyaychariwajtaj. Payqa ima ratopis yanapariwajpacha, sumaj amigapuni karqa”, nispa. Wakin chiriyapoj hermanosqa sonqo nanasqa kashanku. Khuyakuywan entiendeywantaj, paykunapaj uj sumaj jampi jina. Wakenqa, ichapis waj hermano sonqonkuta nanachisqanta mana qonqayta atinkuchu. Phiñasqallapuni kasqankuraykutaj, congregacionman mana kutinpunkuchu. Ichapis paykunaqa, contrankupi sajrata ruwasqankuta piensanku. Chayraykutaj uyarinanchejta, entiendenanchejta ima necesitanku. w20.06 págs. 26, 27 párrs. 10, 11

Juchaman tanqasqa kaspa mana urmanchejchu chayqa, allin kajta ruwayman yachaykukusun. Kay mundomanta runas imatachus qhariwarmi puñuykuymanta yuyasqankoqa, Satanasmanta jamun. Chayrayku mana paykuna jina yuyaspaqa, ‘Kuraj Supayta atipasun’. Yachanchej Jehová Dioslla imachus jucha kasqanta ninanpaj derechoyoj kasqanta. Chayrayku imatachus juchapaj qhawasqanta mana ruwanapaj kallpachakunchej. Juchallikunchej chaytaj, chay juchanchejta Jehová Diosman willakunchej (1 Juan 1:9). Jatun juchapi urmanchej chaytaj, ancianosmanta yanapata mañakunchej. Imajtinchus Jehová Diosqa, paykunata churan yanapanawanchejpaj (Sant. 5:14-16). Munasqa Tatanchej Jehovaqa, Wawanta kachamorqa juchasninchejrayku wañunanpaj. Chayrayku Jehová Dios juchanchejta perdonawasqanchejta niwanchej chayqa, perdonawanchejpuni, watejmantataj llimphu sonqowan sirviyta atisunman. Chayrayku mana allinchu kanman, ñaupa juchasninchejmanta yuyarikunallanchejpuni (1 Juan 2:1, 2, 12; 3:19, 20). w20.07 págs. 22, 23 párrs. 9, 10

Jehová Diosqa uj tiempota sapallan karqa, nitaj llakisqachu kausarqa. Payqa ni pita necesitanchu kusisqa kananpaj. Jinapis munakuyniyoj kasqanrayku, wajkunapis pay jinallataj kusikunankuta munarqa. Chayrayku kausayniyoj kajkunata ruwayta qallarerqa (1 Juan 4:19). Jehová Diosqa Wawan Jesustaraj ñaupajta ruwarqa. Chaymantataj “tukuy ima paynejta ruwasqa karqa”. Tukuy ima nispaqa, may chhika angelesmantawan parlashanchej (Col. 1:16). Jesusqa Yanapaj Maestro jina karqa. Tatanwan khuska llankʼaspataj, mayta kusikorqa (Pro. 8:30). Paywan Jehová Dioswanqa, cielotawan jallpʼatawan ruwarqanku. Angelestaj chayta rikuspa, mayta kusikorqanku. Chayrayku kay jallpʼa ruwasqa kasqantawan, Jehová Diosta jatuncharqanku. Jinapis Jehová Diosqa mana jallpʼallatachu ruwarqa. Payqa chaypi tukuy ima kajtawan ruwarqa, jinallataj runastapis. Angelestaj tukuy chay imasta rikuspa, Jehová Diosta maytachá jatuncharqanku (Job 38:7; Pro. 8:31). Jehová Diosqa tukuy ima ruwasqanpi munakuyniyoj, yachayniyojtaj kasqanta rikuchiwanchej (Sal. 104:24; Rom. 1:20). w20.08 pág. 14 párrs. 1, 2

Jehová Diosqa munakunapaj, wajkuna munakunawanchejpaj ima ruwawarqanchej. Chayrayku pipis chejnikuwajtinchejqa, llakikunchej, wakin kutistaj mancharikunchej. Uj hermano nin: “Soldadosqa testigo kasqayrayku maqawarqanku, tukuy imasta niwarqanku, kʼumuykachachiwarqankutaj. Chayta ruwawajtinku mancharikorqani, llakikorqanitaj”, nispa. Runas ajinata ruwawajtinchej, mayta sonqonchej nanawanchej. Jinapis mana chaymanta tʼukunchejchu. Jesusqa nerqaña runas chejnikunawanchejta. Imaraykuchus yachachisqasnenqa “mana kay mundomanta runas jinachu” kanchej. Chayrayku chejnisqa kanchej (Juan 15:17-19). Noqanchejqa Jehovallata yupaychanchej. Chayrayku gobiernosta respetaspapis, mana diosta jinachu qhawanchej. Nillataj banderata, escudota chayri chayman rijchʼakoj imasta jatunchanchejchu. Chantapis Jehovalla kamachinanpaj derechoyoj kasqanta ninchej. Satanaswan mirayninwantajrí, mana ajinatachu yuyanku (Gén. 3:1-5, 15). Chantapis runasman willamunchej, Diospa Gobiernollan allin kausayta apamunanta, mana kasukojkunatataj chinkachinanta (Dan. 2:44; Apo. 19:19-21). Chay willayqa llampʼu sonqo runasta kusichin, sajra runastataj phiñachin. w21.03 pág. 20 párrs. 1, 2

Jehová Diosqa hermanasman sumaj ruwaykunata llajtanpi qon. Paykunamanta wakenqa sumaj yuyayniyoj, creeyniyoj chayri mana manchachikojkuna karqanku. Wakintaj imatapis tukuy sonqo ruwaj kanku. Wakinrí qorikojkuna karqanku, chayri waj imasta ruwarqanku (Luc. 8:2, 3; Hech. 16:14, 15; Rom. 16:3, 6; Fili. 4:3; Heb. 11:11, 31, 35). Diospa llajtanpeqa ashkha viejito hermanos, viejita hermanaspis kapullawanchejtaj. Ichá paykunaqa sinchʼi onqosqas kashanku. Jinapis machitu hermanosninchejqa, tukuy atisqankuta Diosmanta willanku. Chantapis wajkunata yachachinku, kallpachankutaj. Paykunamantaqa mayta yachakusunman. Chay hermanosninchejqa, Jehová Diospaj, noqanchejpajpis, ¡may munasqas kanku! (Pro. 16:31). Jovenesmantañataj parlarina. Kay sajra mundopi kausakusqankurayku, imaymana problemasniyoj kanku. Yachanchej jina, kay mundoqa Supaypa makinpi kashan, paypa yuyaynintaj tukuynejpi kashan. Jinapis cristiano jovenesqa, tantakuykunapi comentanku, predicankutaj. Wakintaj maypi kashaspapis, mana manchachikuspa imapichus creesqankumanta parlanku. Chaytaj mayta kusichiwanchej, kallpachawanchejtaj. Jóvenes, qankunaqa Diospa llajtanpi may valorniyoj kankichej (Sal. 8:2). w20.08 págs. 21, 22 párrs. 9-11

Predicayta qallarejtinchej, Jehovaj testigon kasqanchejta nejtinchej ima, ichá familiaresninchej churanakuwasun, amigosninchej asipayawasun, chayri runas mana uyariwasunchu. Chaytaj ‘loco para jina’ kanman. ¿Imataj yanapawasunman mana manchachikoj kanapaj? Ñaupajtaqa Jesús predicacionta ñaupajman apashasqanta yuyarikuna (Juan 16:33; Apo. 14:14-16). Chantá Jehová Diosninchej ni imata faltachinawanchejmanta, ama iskayrayanachu (Mat. 6:32-34). Jehová Diospi astawan creesun, atienekusuntaj chayqa, mana imatapis manchachikusunchu. Ichá qanpis familiaresniykiman, amigosniykiman ima, Bibliata estudiashasqaykita willarerqanki. Ichá paykunaman willarillarqankitaj, Jehovaj testigosninpa reunionesninkuman jamushasqaykita. Chayta ruwaspaqa creeyniyoj kasqaykita rikucherqanki. Chantapis kausayniykita cambiashanki, Jehová Diospa kamachiykunasnintataj kasukushanki. Chaypipis creeyniyoj kasqaykita, nitaj manchachikusqaykita rikuchishallankitaj. Diosta kasukunaykipaj kallpachakullankipuni chayqa, payqa qanwanpuni kanqa (Jos. 1:7-9). w20.09 pág. 5 párrs. 11, 12

Rey Asamanta mayta yachakusunman. Payqa mana llakiypi kashaspallachu Jehová Diospi tukuy sonqo atienekorqa, manaqa allinta kausakushaspapis. “Asaj sonqonqa tukuy kawsaynimpi Tata Diospaj cheqan karqa” (1 Rey. 15:14). Chaytataj reparanchej Judá llajtamanta llulla yupaychayta chinkachisqanpi. Bibliaqa rey Asamanta nin: “Waj dioskunaj altaresninkuta chinkacherqa, jinataj loma patapi yupaychana wasista. Rumismanta lantisninkutapis pʼakirarqa, jinallataj Asera lanti kʼullusninkutapis”, nispa (2 Cró. 14:3, 5). Rey Asaqa, jatun maman Maacatapis manaña reina kananta saqerqachu. Imaraykuchus Maacaqa runas yupaychanankupaj uj lantita ruwachisqa (1 Rey. 15:11-13). Rey Asaqa mana llulla diosesllatachu Judá llajtamanta chinkacherqa, manaqa runastapis Jehová Diosman watejmanta chimpanankupaj yanaparqa. Jehová Diostaj payta, tukuynin Judatawan allin kausaywan bendicerqa. Rey Asa kamachishajtenqa, “chunka watasta Judá suyupi allin kawsakuylla karqa” (2 Cró. 14:1, 4, 6). w20.09 pág. 14 párrs. 2, 3

Wakin kutisqa valorniyoj imasninchejta, confianzapaj qhawanchej chaywan japʼichikuyta yachanchej. Wakin runastaj qolqenkuta bancopi jallchʼanku mana chinkachinankupaj, chayri mana suwachikunankupaj. Apóstol Pabloqa Timoteoman nerqa, Diosmanta manchay valorniyoj imasta japʼisqanta. ¿Imastaj chay valorniyoj imas karqa? Timoteoqa imatachus Dios runaspaj munasqanta yacharqa. Chantapis Jehová Diosqa, Timoteota kamacherqa “sumaj willaykunata” willananta (2 Tim. 4:2, 5). Pabloqa Timoteoman nerqa, imatachus Dios qosqanta allinta waqaychananta. Jehová Diosqa noqanchejmanpis manchay valorniyoj imasta qollawanchejtaj. Jehová Diosqa manchay kʼacha kasqanrayku, Palabranpi cheqa kajta yachachiwanchej. Chay yachachiykunataj may valorniyoj kanku. Imajtinchus Jehová Diosman qayllaykunapaj, kusisqa kausakunapajtaj yanapawanchej. Chay yachachiykunata japʼikuspa, chayman jinataj kausakuspaqa, llulla yachachiykunamanta librakunchej, niñataj millay kausaypichu purinchej (1 Cor. 6:9-11). w20.09 pág. 26 párrs. 1-3

Estudionchejman yachachishaspaqa, kusiywan, tukuy sonqotaj Bibliamanta yachachina. Ajinamanta estudionchejqa, yachachisqanchejpi creesqanchejta reparanqa. Chaytaj astawan yachakuyta munananpaj yanapanqa. Chayrayku payman willarisunman, imaynatachus Biblia kausayninchejpi yanapawasqanchejta. Chayta ruwajtinchej, estudionchejqa paytapis Biblia yanapayta atisqanta reparanqa. Ichapis estudionchejqa, uj viciota chayri costumbresta mana qonqayta atishanchu. Manachayrí kausayninpi waj problemas tiyapun. Jina kajtin, wakin hermanospa experienciankuta willarisunman. Congregacionninchejmanta mayqen hermanoj kausayninpis estudionchejta yanapanman chayqa, paywan yachachej risunman. Estudionchejta yanaparina, Bibliaj yachachiykunasnin yanapawasqanchejta reparananpaj. Estudionchejpa qosan chayri señoran mana Bibliata estudiashanchu chayqa, paytapis estudiachiyta atisqanchejta nisunman. Chantapis estudionchejta yachachisunman, imatachus yachakusqanta familianman, rejsisqasninmanpis willarinanpaj (Juan 1:40-45). w20.10 págs. 16, 17 párrs. 7-9

Josewan Mariawanqa, imatachus Jehová Dios tatamamasman kamachisqanta kasukorqanku. Chayrayku Jesusta Diospa ñaupaqenpi allinpaj qhawasqa kananpaj yanaparqanku (Deut. 6:6, 7). Josewan Mariawanqa, Jehová Diosta mayta munakorqanku. Paykunaqa munarqanku, wawasninkupis paykuna jinallataj Jehová Diosta munakunankuta. Chayta ruwanankupajtaj kallpachakorqanku. Josewan Mariawanqa, Jehová Diosta yupaychayta ñaupajman churarqanku. Paykunaqa Nazaretpi sinagogaman sapa semana wawasninkuta pusaj kanku. Chantapis sapa wata, tukuynin familia Pascuapaj Jerusalenman rej kanku (Luc. 2:41; 4:16). Josewan Mariawanqa, ajinata viajashaspa wawasninkuman ashkha imastachá yachacherqanku. Ichapis paykunaman willarej kanku, imachus Diospa llajtanwan unay kasqanta. Chantapis ichá Diospa Palabran oqharisqan lugaresta pasaj kanku. Josej familian wiñasqanman jina, ichá Diosta yupaychanapaj mana tukuy imata ruwayta atillarqankuchu. Jinapis Josewan Mariawanqa, Jehová Diosta yupaychayta ñaupajmanpuni churarqanku. Chayrayku familiankoqa, mana Jehovamanta karunchakorqachu. w20.10 pág. 28 párrs. 8, 9

Pillatapis estudionman compañasun chayqa, imatachus yachachenqa chayta sumajta wakichikuna. Hermano Dorin nin: “Compañawan chay hermano sumajta wakichikojtenqa, sumajta yanapawan. Chayrayku mayta kusikuni, ajina hermanos compañawajtinku”, nispa. Yachachejpis, compañajpis sumajta wakichikojtinkoqa, estudiosqa sutʼita reparanku. Chantá paykunapis kikinta ruwayta munanku. Chayrayku pitapis estudionman compañasun chayqa, imatachus yachachenqa chayta, sumajta wakichikuna. Mana allinsituta wakichikuyta atispataj, imatachus yachachenqa chayta, tumpallatapis yachananchej tiyan. Pimanpis Bibliamanta yachachinapajqa, Jehovaj bendicionninta mañakunchejpuni. Chayrayku pitapis estudionman compañasun chayqa, ñaupajmanta piensarina imatachus mañakushaspa ninanchejta. Ajinamanta estudiota yanapanapaj jina mañakusun (Sal. 141:2). Japonmanta hermananchej Hanae nin: “Yachachejniywan jamoj hermanaj mañakuyninta yuyarikunipuni. Payqa mañakushaspa, Jehovawan sumaj amigonwan jinapuni parlarej. Noqapis pay jinallataj mañakuyta munarqani. Payqa mañakushaspa sutiyta oqharejpuni. Chaypi munakuwasqanta repararqani”. w21.03 págs. 9, 10 párrs. 7, 8

Jesusqa apóstol Pabloman nerqa Romaman chayanantapuni. Jinapis Jerusalenmanta wakin judiosqa, Pablota ñanpi suyaykuspa wañuchinankupaj yachachinakorqanku. Pabloj sobrinontaj chayta yacharqospa, Claudio Lisias nisqa comandanteman willarqa. Claudiotaj chay rato ashkha soldadosta kamacherqa, Pablota Cesareaman ayqechinankupaj. Chaypitaj kamachej Felixqa, Pablota “Herodespa kamachina wasinpi” wisqʼacherqa. Ajinapi Pabloqa enemigosnin wañuchinankumanta salvakorqa (Hech. 23:12-35). Jinapis chaymantaqa Festoñataj Felixpa cuentanmanta kamachej karqa. Festotaj “judioswan allinpaj qhawachikuyta munaspa Pablota taporqa: ‘¿Munawajchu Jerusalenman riyta, chaypitaj kay imasmanta ñaupaqeypi juzgasqa kayta?’, nispa”. Jinapis Pabloqa, yacharqa Jerusalenpi wañuchiyta munasqankuta. Chayrayku Festoman nerqa: “César juzganawanta munani”, nispa. Festotaj Pablota nerqa: “César juzgasunanta munanki chayqa, Cesarman rinki”, nispa. Festoj ruwasqanqa Pablota enemigosninmanta librarqa. Imaraykuchus Pablo Romaman chayajtin, judiosqa niña wañuchiyta atinkumanchu karqa (Hech. 25:6-12). w20.11 pág. 13 párr. 4; pág. 14 párrs. 8-10

Wakenqa niraj Bibliata estudiashaspa ashkha sajra imasta ruwarqanchej. Wakintaj bautizakusqanchejmanta qhepaman pantarqanchej. Sonqonchejtaj chaykunamanta juchachallawanchejpuni (Rom. 3:23). Allin kajta ruwayta munajtinchejpis, “tukuyninchej ashkha kutista pantanchej” (Sant. 3:2; Rom. 7:21-23). Ni pipis sonqonchej juchachawasqanchejmanta kusikunchejchu. Jinapis chayqa yanapawasunman. Imajtinchus sonqonchej juchachawajtinchejqa, mana allinta ruwasqanchejta reparakusun, niña kikin juchapi urmanapajtaj kallpachakusun (Heb. 12:12, 13). Ichapis juchanchejmanta arrepientekunchejña, Jehová Diospis perdonawanchejña. Jina kajtin, mana allinchu kanman sonqonchej juchachanallawanchejpuni (Sal. 31:10; 38:3, 4). Sonqonchej juchachallawasunmanpuni chayqa, Jehová Dios perdonawajtinchejñapis, niña payta sirvisunmanchu. Satanastaj mayta kusikunman. Chayrayku ama saqenachu sonqonchej juchachanallawanchejtapuni (2 Corintios 2:5-7, 11, kikinchay). w20.11 pág. 27 párrs. 12, 13

Kay salmota qhelqaj levitaqa, sajra runas, jatunchakoj runaspis kusisqa kasqankumanta envidiakorqa. Chay levitaqa mana chay sajra runas jinachu kausayta munarqa (Sal. 73:2-9, 11-14). Jinapis levitaqa rikorqa, chay sajra runas qhapajyashasqankuta, kusisqa kashasqankuta, ni imamantataj llakikusqankuta. Paytaqa Jehová Dios jina yuyasqan yanaparqa. Ajinamanta sonqo tiyasqa, kusisqallapunitaj karqa. Chayrayku Jehovaman nerqa: “Qanwan kaspaqa, kay pachapi mana imatawampis munaniñachu”, nispa (Sal. 73:25). Sajra runasqa kusisqa kausaspa jinanku. Jinapis ama paykunamanta envidiakunachu. Imaraykuchus paykunaj kusikuyninkoqa uj ratollapaj, nitaj wiñaypajchu kausanqanku (Ecl. 8:12, 13). Paykunamanta envidiakusunman chayqa, llakisqalla kasunman, Jehová Diosmantataj karunchakusunman. Chayrayku maykʼajllapis sajra runasmanta envidiakunchej chayqa, levita jina ruwana. Jehová Dios imatachus yuyaychawasqanchejta kasukuna, payta sirvejkunawantaj masichakuna. Jehovata tukuy imamanta astawan munakusun chayqa, cheqamantapuni kusisqa kasun. Chantapis ‘cheqa kaj kausayman’ pusaj ñanta purillasunpuni (1 Tim. 6:19). w20.12 págs. 19, 20 párrs. 14-16

Llakiyninchejta Jehová Diosman willakushaspaqa, payman agradecekunallataj. Manchay llakiypi kaspapis, ima bendicioneschus kapuwasqanchejpi piensarina. Jinapis ichá sinchʼi llakisqa kashaspaqa, mana yachanchejchu imatachus orakushaspa ninata. Jina kajtin, yuyarikuna Jehová Diosqa “yanapariway Tatáy” nejtinchejpis, uyariwasqanchejtapuni (2 Cró. 18:31). Noqallanchejpi atienekunamantaqa, Jehová Diospi atienekuna. Profeta Isaiaspa tiemponpi, Judamanta runasqa Asiriamanta soldados maqanakoj jamunankuta manchachikorqanku. Chayrayku asiriospa makinkupi mana urmanankupaj, Egiptomanta yanapata mañakamorqanku (Isa. 30:1, 2). Jehová Diosqa chayta ruwajtinku mana allinchu rinanta nerqa (Isa. 30:7, 12, 13). Chantapis profeta Isaiasnejta nerqa, salvakunankupaj imatachus ruwananku kasqanta. Jehová nerqa: “Ni imata ruwaspalla noqapi atienekuychej. Ajinata ni imata ruwaspalla, tukuy sonqo atienekuspataj kallpayoj kankichej”, nispa (Isa. 30:15). w21.01 págs. 3, 4 párrs. 8, 9

Ajllasqa cristianosqa wañupunankukama Jehová Diosta sirvisqankurayku, Cristowan khuska cielopi reyestaj, sacerdotestaj kanqanku (Apo. 20:6). Chay 144 mil cristianos cielopi premionkuta japʼejtinku, Jehová Dios, Jesús, jinallataj angelespis, mayta kusikonqanku. Apóstol Juanqa 144 mil reyesmanta parlaytawan, “may chhika runasta” rikorqa. Paykunaqa Armagedonmanta kausashaj llojsisharqanku. Chantapis chay 144 mil reyesmanta nisqa, may chhika runasqa mana yupay atina karqanku (Apo. 7:9, 10). Chantapis paykunaqa “yuraj qhoysu ropasniyoj” kasharqanku. Chaytaj ninakun, Satanaspa sajra mundonwan ‘mana chʼichichakusqankuwan’. Paykunaqa Jehová Diosta tukuy sonqo sirvillankupuni, Cristoj qhepantapis rillankupuni (Sant. 1:27). Juan rikusqanman jina, chay may chhika runasqa sinchʼita qhaparisharqanku: “Salvacionqa Diosninchejmanta jamun, pichus kamachina tiyanapi tiyasqa kashan, chaymanta, Corderomantawan”, nispa. Chantapis paykunaqa, palmera sachʼa ramas japʼirisqa kasharqanku. Chaytaj niyta munan, Jesusta Jehová Diospa churasqan Reyta jina qhawasqankuta (Juan 12:12, 13, kikinchay). w21.01 págs. 15, 16 párrs. 6, 7

Qosasqa familiankumanta sumaj umas kanankupaj, Jehovamantawan Jesusmantawan yachakunkuman. Kʼumuykukoj sonqo kasqankumanta parlarina. Jehovaqa tukuymanta aswan yachayniyoj kaspapis, kamachisninpa nisqankuta uyarin (Gén. 18:23, 24, 32). Jehová Diosninchejqa ni imapi pantanchu. Jinapis mana suyanchu noqanchejpis mana pantananchejta. Astawanpis payqa kausayninchejpi allin rinawanchejpaj yanapawanchej (Sal. 113:6, 7). Bibliaqa Jehová ‘yanapawajninchej’ kasqanta nin (Sal. 27:9; Heb. 13:6). Rey Davidpis nillarqataj, Jehová kʼumuykukoj sonqowan yanapasqanraykulla tukuy imata ruwasqanta. Jesusmantañataj yachakuna. Payqa Señortaj, Yachachejtaj kaspapis, discipulosninpa chakisninkuta mayllarqa. Jehová Diostaj Jesuspa ruwasqanta Bibliapi qhelqacherqa, kamachinapaj atiyta japʼejkuna kikinta ruwanankupaj. Jesuspuni nerqa: “Chayta ruwani qankuna yachakunaykichejpaj, imaynatachus noqa ruwani ajinallatataj qankunapis ruwanaykichejpaj”, nispa (Juan 13:12-17). Jesusqa may atiyniyoj kaspapis, mana wajkunawan sirvichikuytachu suyarqa. Astawanpis pay wajkunata sirverqa (Mat. 20:28). w21.02 págs. 3, 4 párrs. 8-10

Cristiano jóvenes, qankunaqa congregacionpi ashkhata yanapakuyta atiwajchej. Joven kasqaykichejrayku kallpaykichejpi kashankichej. Chayrayku hermanosta, hermanastapis mayta yanapayta atiwajchej. Ichapis qankunaqa, mayta siervos ministeriales kayta munashankichej. Jinapis hermanosqa, ichá wawata jinallapuni qhawasunkichej. Chayrí manaraj chay llankʼayta japʼinaykichejpaj jinachu kasqaykichejta yuyanku. Jina kajtin, ama llakikuychejchu. Qankunaqa hermanospa respetonkuta ganakuyta atiwajchej. Ichá imallatapis sumajta ruwayta yachankichej. Jina kajtin, chaywan hermanosta yanapaychej. Tabletta, celularta chayri computadorata sumajta apaykachayta yachanki chayqa, kuraj hermanitosta yacharichiy. Ajinamanta chaypi Bibliata estudiakunankupaj, reunionespaj wakichikunankupaj ima. Chayta ruwanki chayqa, paykunaqa mayta agradecekusonqanku. Tukuy ima ruwasqaykichejwan Tatanchej Jehovata kusichiychej. w21.03 pág. 2 párrs. 1, 3; pág. 7 párr. 18

Warmi qosanmanta astawan escuelayoj kajtinpis, qosapuni familianta Diosta yupaychaypi ñaupajman apanan tiyan (Efe. 6:4). Casada warmi qosanpa kamachiyninpi kajtinpis, paypuni sinchʼi creeyniyoj kananpaj kallpachakunan tiyan. Chayrayku Bibliata sapallanpi estudiananpaj, chaypi tʼukurinanpaj ima, tiempochakunan tiyan. Chayta ruwaspaqa, Jehová Diosta munakullanqapuni, respetallanqapunitaj. Chantapis qosanta tukuy sonqo kasukonqa. Ashkha warmisqa, mana qosankuta respetankuchu, nitaj kusisqachu kausakunku. Jinapis hermanasninchejqa, Jehovata munakusqankurayku qosankuta kasukunku. Chayraykutaj aswan kusisqa kausakunku. Chantapis kasukusqankuwan jovenesta, sipas warmista ima yanapanku. Mana chayllachu, familiankupi, congregacionpipis allin kausay kananpaj yanapakunku (Tito 2:3-5). Kay tiempopeqa, Jehová Diosta tukuy sonqo sirvejkunamanta, warmis aswan ashkha kanku (Sal. 68:11). w21.02 pág. 13 párrs. 21-23

Apóstol Pabloqa llakiykunata aguantananpaj wapu karqa. Jinapis wakin kutisqa, pisi kallpa kasqanta yuyarqa. Payqa sutʼita yacharqa, Jehová kallpata qosqanraykulla llakiykunata aguantasqanta (2 Cor. 12:8-10; Fili. 4:13). Noqanchejpis kʼumuykukoj sonqowan Jehovamanta kallpata mañakuna. Paytaj llakiykunata aguantanapaj valorta qowasun (Sant. 4:10). Mana Jehová Dioschu llakiykunata apachimuwanchej. Discípulo Santiago nin: “Llakiykunapi kaspaqa, ama pipis nichunchu: ‘Dios pruebaman churashawan’, nispa. Imaraykuchus Diosqa mana sajra imaswan pruebaman churasqa kayta atinchu, nitaj payqa pitapis sajra imaswan pruebaman churanchu” (Sant. 1:13). Chayta tukuy sonqo creespaqa, Tatanchej Jehovaman astawan qayllaykusun. Payqa “mana uj jinayanchu, nitaj maychus kasqanmanta waj jinaman tukunchu” (Sant. 1:17). Jehovaqa ñaupa tiempo cristianosta llakiypi kashajtinku yanaparqa. Noqanchejtapis kikillantataj yanapawasun. Chayrayku yachayta, creeyta, valorta ima paymanta mañakunallapuni. Paytaj uyariwasunpuni. w21.02 pág. 31 párrs. 19-21

Bibliamanta yachakojkuna reunionesman jamojtinkupis, paykunata yanapanallapuni (Fili. 2:4). Paykunata astawan rejsinapaj kallpachakusunman. Kausayninkupi imatapis cambianku chayqa, allinta ruwasqankuta nisunman. Chantapis tapurisunman familiankumanta, trabajonkumanta, Bibliata estudiaspa imaynachus rishasqanmanta ima. Jinapis ama pʼenqachinapaj jina imatapis tapuykunachu. Estudioswan parlarinapaj kallpachakusun chayqa, paykunaj amigonkuman tukusun. Ajinamantataj bautizakuyta munanankupaj yanapasun. Bibliamanta yachakojkuna ñauparisqankuman jina, paykunata hermanosninchejñapis kankuman jinata qhawana. Chayta ruwasunman, paykunata wasinchejman wajyarikuspa (Heb. 13:2). Chantá uj estudio predicaj llojsiyta qallarejtin, paywan predicaj llojsisunman. Brasilmanta hermano Diego nin: “Predicayta qallarishajtiy, hermanosqa ujtaj ujtaj noqawan predicaj kanku. Chaypi paykunata astawan rejserqani, maytataj yachakorqani. Jehová Diosta, Jesustapis astawan munakorqani”. w21.03 pág. 12 párrs. 15, 16

Jesusqa yachachisqasninman nerqa, enemigosninkuta munakunankuta (Mat. 5:44, 45). Chayta ruwaytaj mana atikullanchu. Jinapis Diospa atiyninpa yanapayninwanqa, enemigosninchejta munakuyta atisunman. Diospa atiynenqa yanapawanchej, munakuyniyoj, pacienciayoj, llampʼu sonqoyoj, kʼacha kanapaj ima. Munayninchejwan mana atipachikunapajpis yanapallawanchejtaj (Gál. 5:22, 23). Ajina kaspaqa, familianchej chayri runas chejnikuwajtinchejpis Jehovata sirvillasunpuni. Ashkha runas testigo warminku, qosanku, wawanku chayri vecinonku Bibliaj nisqanman jina kausakusqanrayku, niña testigosta chejnikunkuchu. Wakintaj kunanqa hermanosninchej kanku. Chayrayku chejnikuwanchej chay runasta mana munakuyta atillanchejchu chayqa, Jehovaj atiyninta mañakuna (Luc. 11:13). Chantapis ama qonqanachu, Jehovaj nisqanta ruwayqa allinninchejpajpuni (Pro. 3:5-7). Pikunachus chejnikuwanchej chaykunata munakuspaqa, Jehová Diosta kusichisun. Chantapis chayta ruwajtinchej, ichapis paykunaqa niña chejnikuwasunchu. Mana jina kajtinpis, kusisqa kayta atisunman. w21.03 pág. 23 párr. 13; pág. 24 párrs. 15, 17

Joelpa profecianqa, uj tropa soldados maqanakoj risqankumanta parlasharqa (Joel 2:1, 8, 11). Jehová Diosqa nerqa mana kasukoj israelitasta castigananpaj, may chhika langostasta kachaykunanta. Payqa chay langostas soldadosnin kasqankuta nerqa. Chaytaj Babiloniamanta soldadoswan ninakorqa (Joel 2:25). Chay langostasqa, nisunman Babiloniamanta soldadosqa, Israelman “wichaynejmanta” yaykunanku karqa (Joel 2:20). Chay soldadostaqa, sumaj wakichisqa may chhika langostaswan kikinchakun. Profeta Joeltaj paykunamanta nerqa: ‘Sapa ujpis ñannillanta rin. Llajtaman yaykuykunku. Wasi patasta wasaykunku. Wasi ventananta suwas jina yaykuranku’, nispa (Joel 2:8, 9). Chay soldadosqa tukuynin llajtaman juntʼaykunanku karqa. Babiloniosmantaqa mana pipis pakakuyta, nitaj ayqeyta atinmanchu karqa. Paykunataj langostas jinapuni Jerusalén llajtaman juntʼaykorqanku. Chaytaj karqa 607 watapi, Jesús niraj jamushajtin. Biblia nisqanman jina, caldeospa reyninkoqa mana “khuyarqachu wayna runasta, nitaj sipas warmistapis, nitaj machu runastapis, nitaj allin achachistapis” (2 Cró. 36:17). w20.04 pág. 5 párrs. 11, 12