Febrero

Hermanosninchejta sumajta rejsina. Paykunata sumajta rejsinapajqa, niraj reunión qallarishajtin chayri reunión pasayta paykunawan parlarisunman. Chayrí paykunawan predicaj llojsisunman, manaqa wasinchejman invitasunman. Ajinata ruwaspaqa, hermanosninchejta astawan rejsisun. Ichapis uj hermanaqa manchiskiri kasqanrayku mana ni piwan parlanchu, nitaj phiña kasqanraykuchu. Chantapis ichá qolqellata maskʼajta jina qhawaj kanchej chay hermanoqa, may kʼacha kasqanta reparasun. Manachayrí ichá uj hermanaqa, qosan churanakusqanrayku wawitasninwan reunionesman tarde chayamun (Job 6:29). Hermanosninchejta sumajta rejsinanchej kajtinpis, mana kausayninkuman ‘satʼikunachu’ tiyan (1 Tim. 5:13). Jinapis may allinpuni paykunamanta tumpata yachananchejqa. Ajinamanta paykunata astawan entiendesun. Ichapis uj hermanota chayri uj hermanata mana aguantayta atillanchejchu. Jinapis chay hermanoj kausaynin imaynachus ñaupajta kasqanta yachaspaqa, payta entiendesunman. Hermanosta rejsiyqa mana facilchu. Jinapis Biblia nin jina sonqonchejta paykunapaj jatunta kicharina. Chayta ruwaspaqa Jehová Dios jina ruwasun. Payqa ‘tukuy laya runasta’ munakun (1 Tim. 2:3, 4; 2 Cor. 6:11-13). w20.04 págs. 16, 17 párrs. 10-12

Jesusqa wañuchinanku qayllata yachachisqasninman nerqa: “Purajmanta munanakuychej”, nispa. Chayta nerqa, yachachisqasnin ujchasqallapuni kanankupaj, runas chejnikojtinkutaj sinchʼita sayanankupaj. Tesalónica llajtamanta hermanosqa, qallariymantapacha qhatiykachasqa karqanku. Jinapis sinchʼita sayarqanku, munanakorqankutaj (1 Tes. 1:3, 6, 7). Chayta ruwajtinkupis, Pabloqa nerqa: “Hermanosníy, mañakuyku astawanraj munakuypi wiñanaykichejta”, nispa (1 Tes. 4:9, 10). Ajinata munanakuspaqa, llakisqa kajkunata sonqochankuman karqa, llauchʼiyajkunatapis yanapankuman karqa (1 Tes. 5:14). Tesalonicamanta hermanosqa, Pablota kasukorqanku. Chayta yachanchej, imatachus Pablo paykunaman qhelqasqanpi. Pay qhelqarqa: “Tukuyniykichej purajmanta munanakusqaykichejpis, astawan wiñashan”, nispa (2 Tes. 1:3-5). Chay cristianosqa, llakiypi kaspapis, qhatiykachasqa kaspapis, purajmanta munanakusqankurayku Jehovata sirvillarqankupuni. w21.03 pág. 22 párr. 11

Wiñay kausayta japʼiyta munanchej chayqa, Diospa munayninman jina kausananchej tiyan (Hech. 20:24; 1 Ped. 2:21). Satanaswan pay jina kausajkunawanrí, mana chayta munankuchu. Astawanpis paykuna jina kausananchejta munanku (1 Ped. 4:4). Paykunaqa Diospa munayninman jina kausasqanchejmanta asikunku. Ninkutaj: “Noqaykoj kausayniykoqa aswan sumaj, imaraykuchus ni pita kasunaykuchu tiyan”, nispa. Chaytaj mana jinachu (2 Ped. 2:19). Mayqen ñantachus correnanchejta sumajta ajllana. Cristianosqa kʼullku ñanta rishanchej, chay ñantaj kausayman pusan. Satanasrí chay ñanmanta llojsipunanchejta munan. Payqa munan, kay mundomanta runas jinallataj ancho ñanta rinanchejta. Chay ñanta riytaj atikullan. Jinapis chay ñanqa wañuyman pusan (Mat. 7:13, 14). Kausayman pusaj ñanmanta mana llojsipunapajqa, Jehová Dios allinninchejta munasqanpi creenanchej tiyan, kamachiwasqanchejtataj kasukunanchej tiyan. w20.04 pág. 26 párr. 1; pág. 27 párrs. 5, 7

Kay qhepa wataspi, Rusia paywan ujchasqa suyuswan, wichay ladomanta rey kashanku. Paykunapis ‘sumaj kʼachitu jallpʼaman’ yaykullankutaj (Dan. 11:41). ¿Imaynatá chayta ruwarqanku? Paykunaqa 2017 watapi, Jehovaj testigosninta niña predicajta, nitaj tantakojtapis saqerqankuchu. Wakin hermanostapis carcelman wisqʼaykorqanku. Chantá publicacionesninchejta, Diospa Palabran Biblianchejtawan niña apaykachakunanta kamacherqanku. Chantapis Rusiapi Betel wasita, Jatun Tantakuna Wasista, salonestawan japʼikaporqanku. Chayrayku Diospa Llajtanta Kamachejkunaqa, 2018 watapi willawarqanchej, Rusiawan paywan ujchasqa suyuswan, wichay ladomanta rey kasqankuta. Diospa kamachisnenqa, sinchʼi qhatiykachasqa kajtinkupis, mana mayqen gobiernoj contrantapis oqharikunkuchu, nitaj chay gobiernosta cambiayta maskʼankuchu. Astawanpis Biblia nisqanman jina “tukuy kamachejkunapaj” Diosmanta mañapunku. Chaytataj astawan ruwanku, chay kamachejkuna Diosta yupaychayta jarkʼayta munashajtinku. w20.05 pág. 14 párr. 9

Tatas, mamas, wawasniykichej Bibliaj nisqan cheqapuni kasqanta creenankupajqa, paykunapuni Jehová Dioswan sumaj amigosta ruwakunanku tiyan. Chantapis paykunapuni reparananku tiyan, Bibliaj yachachisqan cheqapuni kasqanta. Chayrayku wawasniykichejman Diosmanta yachachiyta munankichej chayqa, qankunaraj Bibliata sumajta estudianaykichej tiyan, chay yachakusqaykichejpitaj tʼukurinaykichej tiyan. Ajinamanta wawasniykichejman kikinta ruwanankupaj yachachiyta atinkichej. Chantapis wawasniykichejman Bibliata estudianapaj yanapasta apaykachayta yachachiychej, imaynatachus estudiosniykichejman yachachinkichej, ajinata. Chayta ruwajtiykichej, wawasniykichejqa Jehová Diosta munakonqanku. Chantapis Jehová allin kamachi yuyayniyojnejta Bibliata entiendechiwasqanchejta reparanqanku (Mat. 24:45-47). Tatas, mamas, ama Bibliamanta wakin imasllatachu wawasniykichejman yachachiychej, manaqa “Diospa pakasqa yachaynintapis”. Chaytataj ruwaychej, wawasniykichejpa edadninkuman jina, yuyaysitunkuman jinataj. Ajinamanta wawasniykichejqa sinchʼi creeyniyoj kanqanku (1 Cor. 2:10). w20.07 pág. 10 párr. 10; pág. 11 párrs. 12, 13

May chhika runas Jehová Diospa sumaj amigosnin kanku. Jehovawan allinta kausakunapajqa, Jesuspa wañuyninpi creena tiyan. Jesús juchamanta kacharichiwasqanchejrayku, Jehová Diosman kausayninchejta jaywapuyta, bautizakuytataj atinchej. Chayta ruwaspaqa, jallpʼantinpi may chhika cristianosman ujchaykukunchej. Paykunapis Jehová Diosman kausayninkuta qoporqanku, bautizakorqankutaj. Chayraykutaj tukuy atiyniyoj Diospa sumaj amigosnin kanku. ¿Imaynatá Jehová Diosman agradecekusunman amigosnin kayta atisqanchejmanta? Abrahán jina, Job jinataj ruwaspa. Paykunaqa 100 watas kurajta Jehová Diosta tukuy sonqo sirverqanku. Noqanchejpis unayña cristianos kaspapis, Jehová Diosta paykuna jinallataj tukuy sonqo sirvina. Chantapis Daniel jina ruwana. Payqa Jehová Diosmanta mana karunchakunanrayku, wañuytapis mana manchachikorqachu (Dan. 6:7, 10, 16, 22). Jehová Diospa yanapayninwanqa, ima llakiytapis aguantayta atisun, amigosnillanpunitaj kasun (Fili. 4:13). w20.05 pág. 27 párrs. 5, 6

Davidqa uj pacha casada warmita mayllarikushajta rikorqa. Chay warmeqa Betsabé karqa. Payqa Jehová Diospa kay nisqanta sumajta yacharqa: “Ama munapayankichu runa masiykej warminta” (Éxo. 20:17). Jinapis payqa chay warmita qhawallarqapuni. Davidqa chaypacha iskay sonqolla kasharqa. Payqa Jehová Diosta kasukuyta munarqa, chay warmitapis munapayashallarqataj. Iskay sonqolla kasqanrayku, sajra munayninwan atipachikorqa. Davidqa Jehová Diosta unaytaña tukuy sonqo sirvispapis, juchapi urmarqa. Chantapis Diospa sutinta chʼichicharqa, mana juchayoj runasta, familiantapis ñakʼaricherqa (2 Sam. 11:1-5, 14-17; 12:7-12). Jehová Diosqa Davidta juchanta reparacherqa. Davidtaj juchanmanta pesachikuspa Dioswan allinyakorqa (2 Sam. 12:13; Sal. 51:2-4, 17). Davidqa iskay sonqolla kasqanrayku, ashkha problemasta, llakiykunata ima rikhuricherqa. Chaytataj ni jaykʼaj qonqarqachu. Salmo 86:11 versiculopi imatachus nisqanqa, ajinata nikullanmantaj: “Yanapaway tukuy sonqo sirvisunaypaj”. Jehová Diosrí, ¿Davidta yanaparqachu? Arí. Bibliallataj nin, Davidqa Jehová Diosta ‘cheqan sonqowan yupaychasqanta’. Chaytaj niyta munan, Jehová Diosta tukuy sonqo sirvisqanta (1 Rey. 11:4; 15:3). w20.06 pág. 11 párrs. 12, 13

Jehová Diosqa llajtanta munakusqanta uj waskhawan kikincharqa. ¿Imaraykutaj Diospa munakuynin waskha jina? Ukhu tʼoqoman urmaykusqanchejpi piensarina. Chay tʼoqopi kashajtinchej, ichá pipis mikhunata chayri yakuta pasarichimuwanchej. Ajinata yanapariwasqanchejmantaqa mayta agradecekusunman. Jinapis chay tʼoqomanta mana llojsimuspaqa wañusunman. Chayrayku pillapis uj waskhawan chayri uj pitawan, chay tʼoqomanta orqhonawanchejta munasunman. Jehová Diosqa paymanta karunchakoj israelitasman kay pʼunchaypaj textopi nerqa: ‘Munakuywan waskhawan jina aysamuykichej’. Kunanpis Jehová Diosqa, ajinallatataj chiriyapoj hermanosman nin. Ichá chay hermanosqa, problemasninkurayku chayri llakiykunasninkurayku, ukhu tʼoqopi jina kashanku. Jehová Diosqa munakuyninwan waskhawan jina paykunata chay tʼoqomanta orqhomuyta munan. Ajinamanta paypa qayllanpi watejmanta kanankupaj. Noqanchejtaj Jehová Diospa makinman churakusunman, chay hermanosta noqanchejnejta yanapananpaj. Chiriyapoj hermanosninchejqa, yachananku tiyan Jehová Diospis, noqanchejpis paykunata munakusqanchejta. w20.06 págs. 27, 28 párrs. 12, 13

Judíos Estebanta wañuchisqankutawanqa, ashkha cristianos Jerusalenmanta ayqekorqanku. Paykunaqa Judeaman, Samariaman, waj karu lugaresmanwan chʼeqerachisqa karqanku. Chay lugaresmanta iskaytaj, Chiprewan Antioquiawan karqa (Hech. 7:58–8:1; 11:19). Chay tiempomanta cristianosqa, manchay llakiykunapi rikukorqanku. Jinapis maymanchá rerqanku chaypi sumaj willaykunata willallarqankupuni. Ashkha congregacionestaj rikhurerqa (1 Ped. 1:1). Jinapis chay cristianosqa, ashkha llakiykunataraj aguantananku karqa. 50 wata chaynejta, Romata kamachej Claudioqa, tukuy judíos Romamanta ripunankuta kamacherqa. Chayrayku cristianoman tukoj judiospis, wasinkuta saqespa waj ladosman riporqanku (Hech. 18:1-3). Kay 61 wata chaynejtataj, apóstol Pabloqa imaspichus cristianos rikukusqankumanta parlarqa. Wakin cristianosqa, tukuypa rikunanta pʼenqaypi rikhurichisqa karqanku, wakintaj carcelpi wisqʼasqas karqanku. Wakintajrí tukuy kapuyninkuta qhechuchikorqanku (Heb. 10:32-34). Chantapis cristianosqa, waj runas jinallataj onqorqanku, pisichikorqanku ima (Rom. 15:26; Fili. 2:25-27). w21.02 págs. 26, 27 párrs. 2-4

Creeypi sinchʼi sayasqa kajtinchejqa, Satanaswan paypa makinpi kajkunawanqa mana urmachiwasunchu (2 Juan 8, 9). Kay mundomanta runas chejnikuwajtinchejqa, mana tʼukunanchejchu tiyan (1 Juan 3:13). Apóstol Juan nerqa, ‘mundontinmanta runas Kuraj Supaypa makinpi kasqankuta’ (1 Juan 5:19). Kay mundoj tukukuynin astawan qayllamusqanman jina, Satanasqa astawan phiñasqa kashan. Chayrayku payqa mana reparayllata urmachiyta munawanchej khuchichakuy juchawan, Diospa llajtanta wasanchajkunaj parlasqankuwan ima. Jinapis sutʼimanta urmachiyta munallawanchejtaj. Chaypajtaj runaswan qhatiykachachiwanchej. Satanasqa yachan, paypaj pisi tiempollaña kasqanta. Chayrayku tukuy imata ruwashan niña predicananchejpaj, Diospi manaña creenanchejpaj ima. Chantachá ashkha suyuspi gobiernosqa, hermanosninchejta Jehovata yupaychajta mana saqenkuchu, chayri wakin imasllata ruwajta saqenku. Jinapis chay lugaresmanta hermanosninchejqa, sinchʼita sayashallankupuni. Chaywantaj rikuchishanku, Satanás imata ruwajtinpis payta atipayta atisqankuta. w20.07 pág. 24 párrs. 12, 13

Jehová Diosqa sumaj kʼachitu jallpʼata ruwarqa, munarqataj runas chaypi wiñaypaj kausakunankuta. Jinapis Adanwan Evawan paypa contranpi oqharikorqanku. Ajinamantataj juchawan wañuywan tukuy runasman chayarqa (Rom. 5:12). ¿Imatá Jehová Dios ruwarqa? Adanwan Evawan juchallikusqankutawan, Jehová Diosqa imaynatachus wawasninkuta juchamanta kacharichinanta nerqa (Gén. 3:15). Chaypajtaj Wawanta kay jallpʼaman kachamorqa tukuy runasrayku wañunanpaj. Ajinamanta paykunata juchamanta, wañuymantawan kacharichinanpaj. Jehová Dios chayta ruwasqanrayku, runasqa payta sirviytachus manachus ajllayta atinchej. Payta sirviyta ajllajtinchejtaj, wiñay kausayta japʼisunchej (Juan 3:16; 1 Cor. 15:21, 22). Jehová Diosqa, Wawan Jesusnejta may chhika runasta kausarichimonqa. Jinapis manasina tukuy runastachu ujllapi kausarichimonqa. ¿Imajtintaj chayta ninchej? Imajtinchus chayta ruwanman chayqa, may chhika runas ujllapi rikhurinkuman, kay jallpʼataj qʼala pejtu kanman. Jehová Diosninchejtaj mana munanchu imapis tʼusti kananta. Payqa yachan allin kausay kananpaj, tukuy imapis maychus kananpi kanan kasqanta (1 Cor. 14:33). w20.08 pág. 14 párr. 3; pág. 15 párr. 5

Bibliamanta yachakojqa, Jehovaj testigon kananpaj yachachishasqanchejta yachanan tiyan. Payqa bautismoman chayananpaj ashkha imasta ruwan. Ñaupajtaqa Jehová Diosta rejsin, munakun, paypitaj creen (Juan 3:16; 17:3). Chantá Jehovaman qayllaykun, congregacionmanta hermanostapis familianta jina qhawan (Heb. 10:24, 25; Sant. 4:8). Bibliapi yachakusqanman jinataj, manaña sajra imasta ruwanchu, juchasninmantapis pesachikun (Hech. 3:19). Chantá creeynin yapakun, Bibliapi yachakusqantataj wajkunaman willarin (2 Cor. 4:13). Chaymantataj Jehová Diosman kausayninta jaywapun, bautizakuntaj (1 Ped. 3:21; 4:2). Chayta ruwajtin tukuypis mayta kusikunchej. Chayrayku estudionchej ñauparejtin, sumajta ruwashasqanta nina, ñaupajman rinallanpajpunitaj kallpacharina. w20.10 pág. 18 párrs. 12, 13

Mana waj hermanoswan kikinchakunachu. Chayta ruwasunman chayqa, ni imapaj valesqanchejta yuyasunman. Wakin hermanosqa sumaj yachachejkuna kanku. Wakintaj imallatapis sumajta wakichinku. Wakintajrí wajkunata sumajta sonqochanku, kallpachankutaj. Noqanchejtaj ichapis mana chay hermanos jinachu kanchej. Chayta reparakusqanchejqa may sumaj. Imaraykuchus kʼumuykukoj sonqo, llampʼu sonqotaj kasqanchejta rikuchishanchej (Fili. 2:3). Jinapis mana allinchu kanman, waj hermanos qhawarisqalla kananchej. Imaraykuchus paykunawan kikinchakusunman. Chayta ruwaspataj, mana paykuna jina kasqanchejmanta llakikusunman, nisunmantaj: “Ni imapaj valenichu”, nispa. Ñaupa tiempomanta wakin cristianosqa, Diospa atiyninta japʼisqankurayku tʼukuna imasta ruwayta aterqanku. Jinapis mana kikin imastachu ruwaj kanku (1 Cor. 12:4-11). Jehová Diosqa tukuyninkuta may valorniyojpaj qhawarqa. Kay tiempopi, Jehová Diosqa manaña atiyninta qowanchejchu tʼukuna imasta ruwanapaj. Nillataj tukuychu kikin imasta ruwayta atinchej. Jinapis Jehová Diosqa sapa ujninchejta may valorniyojpaj qhawawanchej. w20.08 págs. 22, 23 párrs. 13-15

Jehová Diosmanta kallpata mañakuy. Payqa mañakusqaykita uyarisonqapuni, nitaj jaykʼajpis saqerparisonqachu (Hech. 4:29, 31). Jehová Diosqa qanwanpuni kanqa yanapasunanpaj. Ichá llakiykunapi kashajtiyki, chayri kausayniykita cambianaykipaj yanapasorqa. Chaykunapi piensareyqa mayta yanapasonqa. Imaynatachus Jehová Dios israelitasta Puka qochata pasanankupaj yanaparqa, ajinallatataj qantapis Jesuspa yachachisqanman tukunaykipaj yanapasunkiman (Éxo. 14:13). Qanpis kay pʼunchaypaj textomanta salmista jina niwaj. Jehová Diosqa reciellanraj predicaj llojsishanku chaykunatapis, mana manchachikunankupaj yanapallantaj. Tomoyo sutiyoj hermanamanta parlarina. Ñaupaj kutipi wasimanta wasi predicaj llojsishajtin, uj señora payman qhapariykusqa: “¡Mana testigosta uyarinaypajchu kashani!”, nispa. Chantá punkuwan uyanpi wisqʼarparisqa. Hermana Tomoyotajrí, paywan predicaj hermanaman nisqa: “Niraj imatapis nishajtiy, ñapis yacharqaña Jehovaj testigosnin kasqanchejta. Sumaj, ¿i?”, nispa. Hermananchej Tomoyoqa, kunan precursora regular. w20.09 pág. 6 párrs. 13, 14

Rey Asaqa Judá llajtamanta runasman nerqa, Jehová Dios paykunata ‘allin kausayman churasqanta’ (2 Cró. 14:6, 7). Jinapis mana yuyarqachu jinalla kakunanku kasqanta. Chayrayku Asaqa Judapi sumaj jarkʼachasqa llajtasta jataricherqa. Chay llajtastataj perqaswan muyuricherqa, torresta, punkusta imataj ruwacherqa. Chantá Judamanta runasman nerqa: “Kay jallpʼas makillanchejpiraj kashan”, nispa. Asaqa chaywan nisharqa, tiempota sumajta aprovechanankuta. Imaraykuchus judiosqa ni imamanta manchachikuspa purikuyta aterqanku, nitaj enemigosninkupis llajtasta ruwajta jarkʼasharqankuchu. Rey Asaqa Judá llajta allin kausaypi kashajtin, soldadosninta, maqanakupaj armasninkutapis yaparqa (2 Cró. 14:8). ¿Jehová Diospi mana atienekusqanraykuchu chayta ruwarqa? Mana. Asaqa rey kasqanrayku, llajta masisninta yanapanan kasqanta yacharqa. Ajinamanta mayqen nacionpis contrankupi oqharikojtin, wakichisqa kanankupaj. Payqa yacharqa, Judá llajtapi allin kausay ima ratollapis tukukunanta. Jinapunitaj karqa. w20.09 pág. 15 párrs. 4, 5

Wakin ancianosqa, hermanospa allinninkuta maskʼaspa, imatachus ruwanankuta kamachiyta munankuman. Jinapis ancianoswan familiamanta umaswan, mana kikin ruwanasniyojchu kanku. Jehovaqa ancianosllaman atiyta qon, congregacionpi kajkunata juzganankupaj. Paykunaqa congregacionta llimphuta japʼinankupaj, juchanmanta mana pesachikojta congregacionmanta qharqoyta atinku (1 Cor. 5:11-13). Jehovaqa familiamanta umasman mana chay atiyta qonchu. Jinapis familiankupi waj imasta ruwanankupaj atiyta qon. Paykunaqa familiankupaj kamachiykunata churayta atinku, chayta juntʼachiytapis (Rom. 7:2). Tataqa wawasninman kamachiyta atin, ima horaskamachus tuta chayamunankuta. Mana kasukojtinkutaj, paykunata kʼamiyta, castigayta atin (Efe. 6:1). Jinapis munakuyniyoj tataqa, ima kamachiyta churananpajpis señoranwan ñaupajta parlarin. Imaraykuchus paykunaqa ‘ujlla kanku’ (Mat. 19:6). w21.02 págs. 16-18 párrs. 10-13

Bibliaj yachachiykunasnenqa, may valorniyoj kanku. ¿Imaraykutaj? Jehová Diosqa chay yachachiykunata llampʼu sonqoyoj runasllaman rejsichin, nisunman “allin sonqoyoj” kajkunallaman (Hech. 13:48). Paykunaqa yachanku, Jehová ‘allin kamachi yuyayniyojnejta’ yachachiwasqanchejta. Chayrayku paykunaj yachachisqankuta tukuy sonqo japʼikunku (Mat. 11:25; 24:45). Bibliaj yachachisqantaqa, mana sapallanchejmanta entiendeyta atisunmanchu. Chayrayku chay yachachiykunata entiendeyqa, qorimantapis aswan valorniyoj (Pro. 3:13). Jehová Diosqa uj sumaj llankʼayta qowanchej. Payqa kamachiwanchej, runasman paymanta, imastachus ruwayta munasqanmantawan yachachimunanchejta (Mat. 24:14). Chay yachachiyta japʼikojkunataj, Diospa familianman yaykunku, wiñay kausaytataj suyakunku. Chayrayku Bibliamanta yachachisqanchejqa may valorniyoj (1 Tim. 4:16). Chay sumaj llankʼaypi ashkhata chayri pisillata ruwaspapis, runasta salvakunankupaj yanapanchej (1 Tim. 2:3, 4). Chantapis Dioswan khuska llankʼashanchej. Chaytaj may sumajpuni (1 Cor. 3:9). w20.09 págs. 26, 27 párrs. 4, 5

Pablo Romaman viajashajtin, Jehová Diosqa ashkha kutispi payta hermanosnejta yanaparqa. Aristarcowan Lucaswanqa, Pabloj amigosnin karqanku. Paykunaqa Pablowan khuska Romaman viajarqanku. Jesusqa mana paykunaman nerqachu Romaman chayanankutapuni. Chayrayku Aristarcowan Lucaswanqa, Pablowan viajaspa kausayninkuta wañuy pataman churasharqanku. Jinapis Pablota tukuy sonqo compañarqanku. Paykunaqa viajepi kashasparaj mana wañunankuta yacharqanku. Viajasharqanku chay barco Sidonman chayajtin, comandante Julioqa Pablota “saqellarqa amigosninta waturikamojta, imallapipis amigosnin yanaparinankupaj” (Hech. 27:1-3). Chaymanta Puteoli nisqa puertoman chayajtinku, Pablowan compañerosninwanqa chay lugarmanta hermanoswan tinkorqanku. Chay hermanostaj qanchis diasta paykunawan karikunankuta nerqanku. Paykunaqa Pablotawan compañerosnintawan atisqankuta yanaparqanku. Pablotaj paykunaman experienciasninta willarerqachá. Chaytaj maytachá paykunata kallpacharqa (Hechos 15:2, 3, kikinchay). w20.11 pág. 16 párrs. 15-17

Tatamamas, Jehová Diosta tukuy sonqo munakuychej. Chaytataj parlasqaykichejwan, ruwasqaykichejwantaj wawasniykichejman rikuchiychej. Paykunaman Jehová Diosta munakuyta yachachiychej. Chayqa ima regalomantapis aswan sumaj. Wawasniykichejman yachachiychej, Bibliata estudiayta, orakuyta, reunionesman riyta, predicaytapis (1 Tim. 6:6). Wawasniykichejpaj mikhunata, ropitatapis churapuychej (1 Tim. 5:8). Jinapis astawanqa, Jehová Dioswan amigos kanankupaj yanapaychej. Imajtinchus kay sajra mundo chinkachisqa kashajtin, chaymin salvakunankupaj yanapanqa, manataj qolqeyoj kaychu. Wawasniykichejqa Jehovata sirvispalla, paraisoman yaykonqanku (Eze. 7:19). Ashkha cristiano tatamamasqa, wawasninkuta Jehová Dioswan amigos kanankupaj yanapanku. Chay jina familiaspi wiñakoj wawasqa, jovenyaspapis ajinallatapuni Jehová Diosta sirviyta yachanku. Chantapis sumaj uywasqa kasqankumanta, tatasninkuman mayta agradecekunku (Pro. 10:22). w20.10 págs. 28, 29 párrs. 10, 11

Apóstol Pedroqa uj pacha imatachus nisqanmanta chayri ruwasqanmanta mayta pesachikorqa. Chaypacha, Jesusqa apostolesninman willarerqa ñakʼarichisqa, wañuchisqataj kananta. Pedrotaj Jesusta kʼamerqa kay pʼunchaypaj textopi palabraswan (Mat. 16:21-23). Jesustajrí Pedrota chay nisqan mana allinchu kasqanta nerqa. Waj kutipitaj, ashkha runas Jesusta presochaj rerqanku. Pedrotaj kuraj kaj sacerdotej kamachinpa ninrinta mururparerqa (Juan 18:10, 11). Chay kutipipis Jesusqa, Pedrota mana allintachu ruwasqanta reparachillarqataj. Chantapis Pedroqa, Jesusta nerqa tukuynin apostolesnin saqerparejtinkupis, payqa ni jaykʼaj saqerparinanta (Mat. 26:33). Jinapis Pedroqa runasta manchachikusqanrayku, chay kikin tutallataj kinsa kutita Jesusta mana rejsisqanta nerqa. Chayta ruwasqanmanta mayta llakikorqa. Chayrayku “jawaman llojsispa sonqo nanayta waqarikorqa” (Mat. 26:69-75). Pedroqa ichapis piensarqa Jesús mana perdonananta. Jinapis mana llakiyninwan atipachikorqachu. Payqa pantaspapis, waj apostoleswan khuska Jehová Diosta sirvillarqapuni (Juan 21:1-3; Hech. 1:15, 16). w20.12 págs. 20, 21 párrs. 17, 18

Kʼumuykukoj sonqo qosaqa, mana suyanqachu warmin, wawasninpis ni imapi pantanankuta. Chantapis familianta uyarenqa, mana pay jina yuyajtinkupis. ¿Imatawan qosa kʼumuykukoj sonqo kaspa ruwan? Wasipi ruwanaswan yanapakun, runas chayta warmislla ruwanankuta nejtinkupis. Jinapis wakin qosasqa, mana chayta ruwayta atillankuchu. Hermananchej Raquel nin: “Lugarniypeqa qosas platosta mayllaysikojtinku chayri wasita llimphuchaysikojtinku, runasqa warminwan mandachikusqanta yuyanku. Ninkutaj: ‘Manachu qhari imatajri’, nispa”. Ichá lugarninchejpipis, runasqa ajinallatataj yuyanku. Jina kajtin, Jesusmanta yuyarikuna. Payqa discipulosninpa chakisninta mayllarqa, chayta esclavoslla ruwananku kajtinpis. Kʼumuykukoj sonqo qosaqa, mana llakikunchu runas imatachus paymanta ninankumanta. Astawanqa warminta, wawasnintawan kusichinanmanta llakikun. w21.02 pág. 2 párr. 3; pág. 4 párr. 11

Pasaj watasmanta sumaj imasta yuyarikoyqa, Jehová Diospa regalon. Jinapis unay kausayninchej may sumaj kajtinpis, paraisopi kausayninchejqa aswan sumajpuni kanqa. Ima ratollapis wajkuna sonqonchejta nanachiwasunpuni. Jinapis paykunata perdonasun chayqa, Jehová Diosta kusiywan sirvillasunpuni. Sonqonchej anchata juchachawajtinchejqa, niña Diosta kusiywan sirvisunmanchu. Chayrayku apóstol Pablo jinallataj, Jehová perdonawasqanchejta creenanchej tiyan (1 Tim. 1:12-15). Noqanchejqa paraisopi wiñaypaj kausakuyta suyakushanchej. Chaypitaj imaschus kunan llakichiwasqanchejta niña yuyarikusunchu. Bibliaqa chay tiempomanta parlaspa nin: “Chay ñawpaj kajkunaqa qonqasqa kanqa, manapunitaj yuyarisqachu kanqa”, nispa (Isa. 65:17). Ichá wakenqa Jehová Diospaj llankʼaspa viejitosña kanchej. Jinapis mosoj mundopeqa, watejmanta jovenyasunchej (Job 33:25). Chayrayku ama qhepa qhawarisqa kausanachu. Astawanpis jamoj bendicionespi yuyaspa, ñaupajman rinallapuni. w20.11 pág. 24 párr. 4; pág. 29 párrs. 18, 19

¿Imastaj tumpamantawan kanqa? Jehovata tukuy sonqo sirvejtinchej, payqa manchay ñakʼariy tiempopi iskaynejmanta salvawasun. Ñaupajtaqa salvawasun gobiernos Jatun Babiloniata, nisunman llulla religionesta chinkachishajtinku (Apo. 17:16-18; 18:2, 4). Chantá Satanaspa mundonmanta puchojkunata Armagedonpi chinkachishajtin salvallawasuntaj (Apo. 16:14, 16). Jehovaj qayllallanpipuni kajtinchejqa, Satanasqa mana wiñaypaj ñakʼarichiwasunchu. Astawanpis pay wiñaypaj chinkachisqa kanqa (Rom. 16:20). Chayrayku Jehová qowanchej chay maqanakuna pʼachata, tukuysitunta churakuna, amataj orqhokunachu. Amallataj Satanaswan, paypa makinpi kajkunawan ima sapallanchej maqanakunachu. Hermanosninchejwan yanapachikuna. Chantapis Comandantenchej Jehovata kasukuna. Chayta ruwasun chayqa, munakuyniyoj Tatanchej Jehovaqa kallpachawasun, jarkʼawasuntaj (Isa. 41:10). w21.03 pág. 30 párrs. 16, 17

¿Imaynatá Jehová Diospi atienekusunman? Kamachiwasqanchejta kasukuspa. Bibliaqa willawanchej, Jehovapi atienekuspa sonqo tiyasqa kakunaqa, may allinpuni kasqanta. Chayrayku Diospa ashkha kamachisninmanta parlan. Paykunamanta leerishaspaqa, qhawarina imaraykuchus qhatiykachasqa kashajtinku sonqo tiyasqa kasqankuta. Apostolespi piensarina. Judiospa Jatun Juntankumanta kajkuna amaña predicanankuta nejtinku, paykunaqa mana mancharikorqankuchu. Astawanpis nerqanku: “Noqaykoqa Diostapuni kamachejniykuta jina kasunayku tiyan runasta kasunaykumantaqa”, nispa (Hech. 5:29). Apostolesqa jasutʼisqa kaspapis, manapuni manchariywan kharkaterqankuchu. Imaraykuchus paykunaqa, Jehová paykunawan kashasqanta yacharqanku. Payqa apostoleswan kusisqa kasharqa. Chayrayku paykunaqa, sumaj willaykunata willallarqankupuni (Hech. 5:40-42). Discípulo Estebanpis wañuy patapiña kashaspapis, sonqo tiyasqa kasharqa. Chayrayku payta rikojkunaqa nerqanku “uyanqa uj angelpa uyanman rijchʼakusqanta” (Hech. 6:12-15). Estebanqa ajina kasharqa, Jehová Diosta kusichisqanta yachasqanrayku. w21.01 pág. 4 párrs. 10, 11

Chayqa niyta munan, may chhika runasmanta kajkunaqa llimphu sonqoyoj kasqankuta, Diostaj paykunata allinpaj qhawasqanta (Isa. 1:18). Paykunaqa Jehová Diosman kausayninkuta qoporqanku, bautizakorqankutaj. Chantapis Jesús paykunarayku wañusqanpi creenku, Jehová Dioswantaj sumaj amigos kanku (Juan 3:36; 1 Ped. 3:21). Chayrayku paykunaqa, Diospa kamachina tiyananpa ñaupaqenpi kashanku, “tuta pʼunchaytaj” templonpa pationpi sirvishanku (Apo. 7:15). Chantapis Diospa Gobiernonta kausayninkupi ñaupajman churanku. Chayrayku chay Gobiernomanta manchay kusiywan runasman willashanku, yachachishankutaj. Chaytataj ajllasqa cristianosmanta nisqa, astawan ruwashanku (Mat. 6:33; 24:14; 28:19, 20). May chhika runasmanta kajkunaqa, mana iskayrayankuchu manchay ñakʼariy pasayta Dios paykunata yanapananmanta. Imaraykuchus ‘kamachina tiyanapi tiyasqa Kajqa, toldonta paykunaj patankuman aysarenqa’. Chantapis Bibliaj kay nisqan juntʼakonqa: Diosqa “ñawisninkumanta tukuy waqayta pichanqa”. Waj ovejasmanta kajkunaqa, chay juntʼakunanta mayta suyakushanku (Apo. 21:3, 4). w21.01 pág. 16 párrs. 9, 10

Jehová Diospa llajtanpi kasqanchejmanta, mayta kusikunchej. Chayrayku kamachinapaj atiyta jepʼejkunata respetanapaj kallpachakunallapuni tiyan. Jehovaqa qharistapis warmistapis uj rejllata qhawan. Apostolespa tiemponkupeqa, Jehovaqa qharismantaj warmismantaj atiyninta qorqa. Chayrayku waj parlaykunapi parlayta aterqanku, waj tʼukuna imastapis ruwarqanku (Hech. 2:1-4, 15-18). Chantapis Jehovaqa qharistawan warmistawan ajllarqa, cielopi Jesuswan khuska kamachimunankupaj (Gál. 3:26-29). Kay jallpʼapipis qharistaj warmistaj wiñay kausayta japʼenqanku (Apo. 7:9, 10, 13-15). Qharispis warmispis sumaj willaykunata willamunanchej tiyan, yachachimunanchejtaj tiyan (Mat. 28:19, 20). Hechos libroqa, imatachus Priscila sutiyoj hermana ruwasqanmanta parlan. Payqa qosanwan khuska, Apolos sutiyoj cristianota Diospa ñanninta astawan sutʼita entiendecherqanku. Chay cristianoqa manchay yachayniyoj karqa (Hech. 18:24-26). w21.02 pág. 14 párrs. 1, 4

Ancianos, qankunaqa hermanosta, hermanastapis yanapanaykichej tiyan, sumajta predicanankupaj, sumajta yachachinankupaj ima. Chayrayku allin kanman estudiosninkuman compañanaykichej. Sichus paykuna ñaupaqeykichejpi yachachiyta manchachikunku chayqa, qankuna chay kutipi yacharichinaykichejta niychej. Ancianosqa hermanosta, hermanastapis sumajta kallpacharinkuman estudiosman yachachinallankupajpuni (1 Tes. 5:11). Mana estudiosniyojchu kanchej chaypis, estudiosta bautismoman chayanankupaj yanapasunman. Pitapis estudionman compañaspaqa, yanaparinapaj ñaupajsitumanta sumajta wakichikuna. Jinapis mana anchata parlaykunachu tiyan. Estudios reunionesman jamojtinkutaj, paykunawan kʼachas kana, kausayninchejwantaj yacharichina. Ancianos, qankunapis estudiosta kallpachanaykichejpaj tiempochakuychej. Chantapis hermanosta, hermanastapis estudiosninkuman yachachinankupaj yanapariychej, allinta ruwashasqankutataj niychej. Yachakunchej jina, tukuyninchejpuni estudiosta imaynallamantapis yanapariyta atinchej. Paykuna Tatanchej Jehovata munakojtinku, payta sirvejtinkutaj, mayta kusikunchej. w21.03 pág. 13 párrs. 18, 19

Davidqa imatapis kʼuchisitu ruwaj, confianzataj karqa. Payqa jovencitollaraj kashaspa, tatanpa ovejasninta sumajta michej. Wakin kutisqa, chayta ruwananrayku kausaynintapis wañuy pataman churaj. Payllataj rey Saulman nerqa: “Noqa kamachiykeqa tataypa ovejasninta michishajtiy, sichus león, chayrí jukumaripis jamuspa ovejasta apakapusharqa chayqa, qhepanta rispa, siminmantaña ovejitata qhechoj kani”, nispa (1 Sam. 17:34, 35). Davidqa ovejitasta sumajta qhawanan kasqanta yacharqa. Jóvenes, qankunapis David jina kaychej. Ima ruwanatapis japʼispaqa, kʼuchi kʼuchilla ruwaychej. Davidqa jovencitomantapacha Jehová Diospa sumaj amigon karqa. Chaytaj wapu kasqanmanta chayri arpata sumajta tocayta yachasqanmanta, aswan sumaj karqa. Davidqa mana Jehovata Diosninta jinallachu qhawarqa, manaqa sumaj amigonta jina. Jóvenes, qankunapis Jehovawan sumaj amigos kanaykichejpaj kallpachakuychej. w21.03 pág. 3 párrs. 4, 5