Abril

Cristianosqa imaymana problemasniyoj kanchej. Ichá congregacionmanta pillapis sonqonchejta nanachiwanchej (Sant. 3:2). Chayrí trabajomanta, manaqa colegiomanta compañerosninchej, Jehovata sirvisqanchejrayku asipayawanchej (1 Ped. 4:3, 4). Manachayrí familiaresninchej mana reunionesman rejta saqewanchejchu, chayri mana predicananchejta munankuchu (Mat. 10:35, 36). Sinchʼi llakiykunasniyoj kaspaqa, ichapis niña Jehovata sirviyta munasunmanchu. Jinapis Jehová Diosqa, chay llakiykunata aguantanapaj yanapawasun. Payqa yachayta, kallpatawan qowasun. Jehová Diosqa, imaynatachus wakin kamachisnin llakiykunata aguantasqankuta, Palabranpi qhelqacherqa. Chaytataj noqanchej yachakunanchejpaj ruwarqa. Payllataj chayta apóstol Pablowan qhelqacherqa. Chayrayku Bibliapi Diospa kamachisninmanta leeyqa, sonqochawasun, ñaupajman rinallapajpunitaj yanapawasun. Jinapis mana Bibliata leenallachu tiyan, manaqa chay leesqanchejman jina yuyayninchejta, sonqonchejtapis cambiana tiyan. w21.03 pág. 14 párrs. 1, 2

¿Runasta cosechanapaj chajrasta jinachu qhawanchej? Ajinata qhawaspaqa kinsa imasta ruwasun. Ñaupaj kaj, mana tiempota usuchispa predicasun. Mana tiemponpi cosechajtinchej, chajraqa pierdepun. Chayrayku usqhayllata llankʼana tiyan. Iskay kaj, runas sumaj willaykunata japʼikojtinku kusikusun. Bibliaqa nin: “Cosechapi runas kusikunku”, nispa (Isa. 9:3). Kinsa kaj, runasta Jesuspa discipulosninta jinaña qhawasun, imamantachus yachayta munasqankuman jinataj predicasun. Jesuspa yachachisqasnenqa ichapis ajinata yuyarqanku: “Samaritanosqa ni jaykʼaj Jesuspa yachachisqasninman tukunkumanchu”, nispa. Jesustajrí mana paykuna jinachu yuyarqa. Astawanpis payqa samaritanosta discipulosninta jinaña qhawarqa. Noqanchejpis predicanchej chay runasta, Cristoj discipulosninman tukuyta atejkunata jina qhawana. Apóstol Pablomanta yachakusunman. Payqa imapichus runas creesqankuta reparaj. Imatachus runas yachayta munasqankupi piensarej. Chantapis runasta Jesuspa discipulosninta jinaña qhawaj. w20.04 pág. 8 párrs. 3, 4

Wajkunaj ruwasqasninkuta qhawaranamantaqa, imaynachus kashasqankuta entiendenapaj kallpachakuna. Jehová Dioslla sumajta yachan imaynachus sapa runa kashasqanta. Chayrayku wajkunata pay jina qhawanapaj, llakiyninkuta entiendenapaj, khuyakunapajtaj, paymanta yanapata mañakuna. Noqanchejqa tukuy hermanosninchejmanta khuyakunanchej tiyan. Tukuyninku llakiykunasniyoj kanku, imaynatachus Jonás, Elías, Agar, Lot ima llakiykunasniyoj karqanku, ajinata. Ashkha kutispitaj, paykunallataj juchayoj kanku problemasniyoj kanankupaj. Jinapis tukuyninchej juchanchejrayku wakin kutis problemasniyoj kanchej. Chayrayku Jehová Diosqa, purajmanta entiendenakunanchejta munan (1 Ped. 3:8). Jehová Diosta kasukusun chayqa, jallpʼantinpi familianchej aswan ujchasqa kananpaj yanapakusun. Chay familiapitaj tukuy clase runas kashanchej. Chayrayku tukuy atisqanchejta ruwana, hermanosninchejta sumajta uyarinapaj, imaynachus kashasqankuta entiendenapaj, khuyakunapajtaj. w20.04 págs. 18, 19 párrs. 15-17

Jesusqa Jehová Diosta tukuy imapi kasukorqa, noqanchejpis kikinta ruwananchejpaj. Chayrayku Jesús jina ruwaspaqa, Jehová Diosta kasukusun (Juan 8:29). Cheqa kajpi purinallapajpuneqa, Jehová Dios cheqa kajtapuni parlasqanpi creenanchej tiyan. Chaytataj ruwasunman, Bibliaj nisqanmanta mana iskayrayaspa. Chantapis Jesuspuni Mesías kasqanta creenanchej tiyan. Ashkha runasqa, mana creenkuchu Diospa Gobiernonpi Jesús Rey kananpaj ajllasqa kasqanta. Apóstol Juanqa, “ashkha chʼaukiyajkuna” rikhurinankuta nerqa. Paykunataj pisi creeyniyoj kajkunata pantachinanku karqa. Chay pisi creeyniyojkunaqa kanku, Bibliapi Jehová Diosmanta, Jesusmantawan yachakusqankuta, niraj sutʼinchayta atejkuna (2 Juan 7-11). Apóstol Juanqa, chʼaukiyaj runasmanta nerqa: “¿Pitaj chay llullari? ¿Manachu chay llullaqa nin Jesusqa mana Cristochu kasqanta?”, nispa (1 Juan 2:22). Chay runas mana pantachinawanchejpajqa, Diospa Palabranta estudiananchej tiyan. Chayta ruwaspalla Jehová Diosta, Jesusta ima sumajta rejsisunchej (Juan 17:3). Paykunata sumajta rejsispataj, cheqa kajpi kashasqanchejmanta mana iskayrayasunchu. w20.07 pág. 21 párrs. 4, 5

Hermanosninchejqa noqanchejwan khuska correshanku, manataj paykunata pantachiyta munanchejchu. Chayrayku atikojtenqa, munasqankuta ruwajta saqena, amataj munasqanchejtapuni ruwachinachu (Rom. 14:19-21; 1 Cor. 8:9, 13). Atipanakupi correjkunaqa, sapa ujninku premiota japʼiyta munanku. Chayrayku correj masisninkutapis tanqarparinku. Noqanchejrí mana hermanosninchejta atipayta munaspachu correshanchej (Gál. 5:26; 6:4). Astawanpis tukuyta yanapayta munanchej, noqanchejwan khuska correnallankupajpuni, wiñay kausaytataj japʼinankupaj. Chayrayku kay yuyaychayta kasukunapaj, mayta kallpachakunchej: “Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej”, nispa (Fili. 2:4). Jehová Diosqa munakuwasqanchejrayku niwanchej, tukukuykama correjtinchej uj premiota qonawanchejta. Chay premiotaj kashan, cielopi chayri kay jallpʼapi wiñay kausay. w20.04 pág. 28 párr. 10; pág. 29 párr. 12

May chhika cristianos, mosoj mundoman yaykonqanku. Paykunapis wañuy atipasqa kasqanta rikonqanku. Imajtinchus may chhika runas, pikunachus unay wataspi wañuporqanku, chaykuna kausarimonqanku. Chay tiempoqa manchay kusiypuni kanqa (Hech. 24:15). Mosoj mundopi Jehová Diosta mana wasanchaspa sirvejkunaqa, Adanmanta japʼisqanku wañuytapis atipanqanku. Chaymantataj wiñay kausayta japʼenqanku. Apóstol Pabloqa Corintomanta hermanosman wañusqas kausarimunankumanta qhelqarqa. Chay qhelqasqantaj noqanchejtapis mayta yanapawanchej. Chayrayku Pabloj nisqanta kasukuna. Pay nerqa: “Señorpa ruwayninpi ashkhata llankʼallaychejpuni”, nispa (1 Cor. 15:58). Chayta tukuy atisqanchejta ruwasun chayqa, noqanchejpis aswan qhepaman sumaj kausayta japʼisun. Chay kausayqa, yuyasqanchejmantapis aswan sumajraj kanqa. ‘Señorpaj llankʼasqanchejqa, manapuni qhasipajchu kanqa’. w20.12 pág. 13 párrs. 16, 17

Kay textospi rikhurej profeciasqa, kikin tiempomantasina parlashanku: Ezequiel 38:10-23; Daniel 2:43-45; 11:44–12:1; Apocalipsis 16:13-16, 21 ima. Jina kajtin, pisi tiempomantawan ichá kay jina kanqa. Manchay ñakʼariy tiempo qallarisqanmanta qhepaman, ‘jallpʼantinmanta gobiernos’ ujchaykukonqanku (Apo. 16:13, 14). Bibliapeqa chay ujchasqa nacionesta, ‘Magog jallpʼamanta Gog’ nispa sutichan (Eze. 38:1, 2). Chay nacionesqa Diospa llajtanta chinkachiyta munanqanku. Chaypajtaj uj runa jinalla contrankupi sayaykonqanku. Juanqa chay tiempomanta parlaspa nerqa, cielomanta jatuchaj granizos Diospa enemigosninman urmamunanta. Chay granizosqa ichá juchachana willaykunawan ninakun, mayqentachus chay tiempopi willasun chaywan. Magogmanta Gogqa, ichá chayrayku Diospa llajtanta chinkachiyta munanqa (Apo. 16:21). w20.05 pág. 15 párrs. 13, 14

Jehová Diospa atiyninmanta chayri espíritu santonmanta, mayta agradecekunanchej tiyan. Chayrayku imastachus atiyninwan ruwashasqanpi tʼukurina. Jesusqa niraj cieloman wicharishaspa, discipulosninman nerqa: “Diospa atiynin qankunaman jamojtin atiyta japʼinkichej, noqamantataj testigos jina willamunkichej [...] kay jallpʼaj tukuy kʼuchusnintinpi”, nispa (Hech. 1:8). Diospa atiyninpa yanapayninwanqa, may chhika runas Jehová Diospa kamachisninman tukunku. Mundontinpeqa 8 millones khuskanniyojmanta astawanña kanchej. Tukuyninchejtaj Diospa llajtanpi ujchasqas, kusisqastaj kausakunchej. Ajinata kausakunchej, Diospa atiynin yanapawasqanchejrayku. Chay ateyqa yanapawanchej: munakuyniyoj kanapaj, kusikuyniyoj kanapaj, sonqo tiyasqa kanapaj, pacienciayoj kanapaj, kʼacha sonqoyoj kanapaj, kʼacha kanapaj, creeyniyoj kanapaj, llampʼu sonqoyoj kanapaj, munayninchejwan mana atipachikunapaj ima (Gál. 5:22, 23). Diospa atiynenqa manchay valorniyojpuni. w20.05 pág. 29 párrs. 10, 13

Familiaresninchej kausarimojtinku, ¿paykunata rejsikapuyta atisunchu? Arí. Jehová Diosqa wañusqasta kausarichimunanpaj, watejmantasina cuerponkuta ruwanqa. Jinapis niraj wañupushaspa, imaynachá karqanku, kikisitunta kausarichimonqa. Parlasqankupis yuyasqankupis kikin kanqa. Jehová Diosqa ajinata ñaupa tiempopi runasta kausarichimorqa. Chantapis Jesusqa wañuyta puñuywan kikincharqa, kausarimuytataj puñuymanta rijchʼariywan (Mat. 9:18, 24; Juan 11:11-13). Runasqa niraj puñushaspa imaynachus kanku, kikisitun rijchʼarimunku. Parlasqankupis yuyasqankupis mana cambianchu. Jesús Lazarota kausarichishajtin, Lazaroqa tawa diaña wañusqa kasharqa, cuerponpis asnaykusharqañachá. Jinapis kausarimojtin, hermanasnenqa Lazarota chay rato rejsikaporqanku. Lazaropis paykunata rejsikapullarqataj (Juan 11:38-44; 12:1, 2). w20.08 pág. 14 párr. 3; pág. 16 párr. 8

Ajllasqa cristianospis, waj ovejasmanta kajkunapis, Jehová Diospaj may valorniyoj kanku. Payqa iskaynin gruposta mayta munakun. Chantapis iskaynin gruposta munasqa Wawanpa llawarninwan ranterqa. Ajllasqa cristianoswan waj ovejasmanta kajkunawanqa, imatachus aswan qhepaman japʼinallankupi mana kikinchu kanku. Chantapis iskaynin grupos Diosta tukuy sonqo sirvinallankupuni tiyan, Cristotapis qhatinallankupuni tiyan (Sal. 31:23). Jehová Diosqa, tukuy kamachisninman necesitasqankuman jina atiyninta qon, cieloman rinankupaj ajllasqa kajtinkupis chayri manapis. Payqa tukuyninkupaj sumaj imasta wakichipun (Jer. 29:11). Señorpa Cenanpeqa Diostawan Cristotawan jatunchayta atinchej. Imaraykuchus paykunanejta wiñay kausayta japʼisun. Jesuspa Wañuyninta Yuyarina diaqa, tukuynin cristianospaj may jatun pʼunchay. w21.01 pág. 18 párr. 16; pág. 19 párr. 19

Jesuspa Wañuyninta Yuyarinapaj, mundontinpi may chhika runas tantakunchej. Casi tukuy cristianostaj kay jallpʼapi kausakuyta suyakushanchej. Jina kajtin, ¿imaraykutaj Señorpa Cenanman rinchej? Chayta entiendenapaj, kaypi piensarina. Uj amigonchej casarakojtenqa, payta munakusqanchejrayku, paymanta kusikusqanchejrayku ima matrimonionman rinchej. Waj ovejasmanta kajkunapis, chayraykullataj Señorpa Cenanman rinku. Paykunaqa Cristota, ajllasqa cristianostapis mayta munakunku, paykunawan khuskataj kusikunku. Chantapis Señorpa Cenanman rispaqa, Jesús paykunarayku wañusqanmanta agradecekusqankuta rikuchinku. Imajtinchus paynejta kay jallpʼapi wiñay kausayta japʼenqanku. Waj ovejasmanta kajkunaqa, Jesuspa kamachisqanta kasukusqankurayku Señorpa Cenanman rillankutaj. Jesusqa kay jallpʼapi kashaspa, apostolesninwan chay Cenata ruwayta qallarerqa. Chantataj paykunaman nerqa: “Kayta ruwallaychejpuni noqamanta yuyarikuspa”, nispa (1 Cor. 11:23-26). Chayrayku waj ovejasmanta kajkunaqa, ajllasqa cristianos kay jallpʼapiraj kashajtinku, Jesuspa Wañuyninta Yuyarinapaj tantakuyman rillanqankupuni. w21.01 págs. 17, 18 párrs. 13, 14

Munakusqanchejtaqa ruwasqanchejwan rikuchinanchej tiyan (Santiago 2:17, 26, kikinchay). Jehová Diosqa munakuwanchej (1 Juan 4:19). Payqa Bibliapi kʼacha palabrasta qhelqachisqanwan, munakuwasqanchejta rikuchiwanchej (Sal. 25:10; Rom. 8:38, 39). Jinapis Jehovaqa mana simillamantachu munakuwanchej, manaqa ruwasqasninwan chayta rikuchiwanchej. Payqa munasqa Wawanta kachamorqa, noqanchejrayku sufrinanpaj, wañunanpajtaj (Juan 3:16). Jehovaqa cheqamantapuni munakuwanchej. Jehová Diosta, Jesustawan munakusqanchejtaqa, paykunata kasukuspa rikuchisunman (Juan 14:15; 1 Juan 5:3). Jesusqa hermanosninchejwan munanakunanchejta kamachiwarqanchej (Juan 13:34, 35). Hermanosninchejta munakusqanchejqa, mana simillamantachu kanan tiyan, manaqa ruwasqanchejpi rikukunan tiyan (1 Juan 3:18). w21.01 pág. 9 párr. 6; pág. 10 párr. 8

Diospa atiyninwan ajllasqa cristianosqa, paypa Gobiernonpi Jesuswan khuska cielomanta kamachimonqanku. Paykunaqa Jesusta rikonqanku, paywan uyapura parlanqanku, paywan khuskataj wiñaypaj kanqanku (Juan 14:2, 3). Kay jallpʼapi tiyakuyta suyakojkunarí, Jesuspa munakuyninta, yanapaynintawan rikusunchej. Jesuswan mana uyapura parlaspapis, paywan aswan sumaj amigos kasunchej. Chantapis Jehová Dioswan Jesuswan allin kausayta qowasun. Chaypitaj kusisqa kausakusun (Isa. 9:6, 7). Jesusqa amigosnin kananchejpaj wajyariwanchej. Amigosnin kaspataj ashkha bendicionesta japʼinchej. Jesusqa amigosnin kasqanchejrayku munakuwanchej, yanapawanchejtaj. Chantapis wiñay kausayta suyakushanchej. Astawanpis Jesuspa amigosnin kaspaqa, Jehová Dioswanpis amigosllataj kasun. Chayrayku Jesuspa amigosnin kayqa, ¡may sumajpuni! w20.04 pág. 25 párrs. 15, 16

Apóstol Pabloqa Corinto llajtamanta ajllasqa cristianosman qhelqarqa. Paykunaqa wañuytawan cielopaj cuerpoyoj kausarimunanku karqa. Chayrayku Pablo paykunaman nerqa: “Diosmin qankunata tʼaqasorqachej, Cristo Jesuswan ujchasqa kanaykichejpaj”, nispa. Chantá parlallarqataj ‘Cristoj yachachisqasnin kashaspa wañupojkunamanta’ (1 Cor. 1:2; 15:18; 2 Cor. 5:17). Pabloqa ajllasqa cristianosman waj cartanpi nillarqataj: “Pay jina wañunchej chayqa, cheqamanta pay jinallataj kausarichisqa kasunchej. Ajinamanta paywan ujchasqa kanchej”, nispa (Rom. 6:3-5). Jesusqa mana rikukoj cuerpoyoj kausarichisqa karqa, cielomantaj riporqa. “Cristowan ujchasqa” kajkunawanpis kikillantaj kanqa, nisunman tukuy ajllasqa cristianoswan. Pabloqa Jesusmanta nerqa: “Payqa wañusqasmanta ñaupajta kausarimorqa, ñaupaj poqoy jina”, nispa (1 Cor. 15:20). Jesusmanta ñaupajtaqa, ni pipis cielopaj cuerpoyoj kausarerqachu, nillataj mayqenninkupis wiñay kausayta japʼerqachu. w20.12 págs. 5, 6 párrs. 15, 16

Kay tiempopi wañupoj ajllasqa cristianosqa, wañupusqankutawan cieloman kausarichisqa kanku. Chaytaj 1 Corintios 15:51, 52 nisqanman jina kashan. Ajllasqa cristianosqa, kausarichisqa kasqankutawan mayta kusikunku. Yachakunchej jina, ajllasqa cristianosqa “uj ñawi chʼirmiypi” cieloman rinankupaj cambiasqa kanku. Bibliataj willawanchej, imatachus paykuna cieloman rispa ruwanankuta. Jesús nerqa: “Atipaspa tukukuykama kamachisqasniyta kasukojmanqa, atiyta qosaj nacionesta kamachinanpaj. Imaynatachus Tataypis atiyta qowarqa, ajinata. Chay atipajqa runasta fierro varawan kamachenqa, tʼuru yurusta jinataj paykunata phirenqa”, nispa (Apo. 2:26, 27). w20.12 págs. 12, 13 párrs. 14, 15

Pabloqa Jesusta “ñaupaj poqoy” nispa, waj runaspis cieloman rinankupaj kausarimunankuta nisharqa. Apóstoles, waj cristianospis “Cristowan ujchasqa” kasqankurayku, Jesús jinallataj cielopaj cuerpoyoj kausarimunanku karqa (1 Cor. 15:18). Pablo Corintomanta hermanosman qhelqashajtin, “Cristowan ujchasqa” kajkunamantaqa, niraj pipis cieloman rinanpaj kausarichisqachu karqa. Chayqa aswan qhepamanraj kanan karqa. ¿Imaraykutaj chayta ninchej? Pabloqa wañusqas “maychus kananta” kausarimunankuta nerqa. Pay nerqa: “Ñaupajtaqa Cristoraj ñaupaj poqoy jina kausarimorqa, chaymantataj Cristojta kajkuna kausarimonqanku. Paykunataj kausarimonqanku Cristoj kutimunan tiempopi”, nispa (1 Cor. 15:23; 1 Tes. 4:15, 16). ¿Maykʼajtaj ‘Cristoj kutimunan tiempo’ kashan? Chay tiempoqa kay tiemponchej kashan. Chayrayku apóstoles, chay tiempomanta tukuy ajllasqa cristianospis, wañupuytawan ‘Cristoj kutimunan tiempota’ suyakorqanku. Chay tiempo qallarejtintaj, Jesuswan khuska cielopi kausanankupaj ‘kausarichisqa karqanku’ (Rom. 6:5). w20.12 pág. 5 párr. 12; pág. 6 párrs. 16, 17

Apóstol Pabloqa ‘cielopaj cuerpoyoj’ kausarichisqa kajkunamanta parlasharqa, nisunman ‘mana rikukoj cuerpoyoj’ kausarichisqa kajkunamanta (1 Cor. 15:43, 44). Jesusqa kay jallpʼapi kashaspa, aycha cuerpoyoj karqa. Jinapis wañupuytawanqa “mana rikukoj cuerpoyoj” kausarichisqa karqa, cielomantaj kutiporqa. “Paytaj kausayta qon”. Ajllasqa cristianospis, mana rikukoj cuerpoyojllataj kausarichisqa kanqanku. Pablo nerqa: “Imaynatachus rijchʼakunchej ñutʼu jallpʼamanta ruwasqa runaman, ajinallatataj rijchʼakusunchej cielomanta jamojmanpis”, nispa (1 Cor. 15:45-49). Pabloqa Jesús mana aycha cuerpoyojchu kausarichisqa kasqanta sutʼincharqa. Pay nerqa: “Aycha cuerpoqa mana [cielopi] Diospa Gobiernonta herenciata jina japʼiyta atinmanchu”, nispa (1 Cor. 15:50). Chayrayku apóstoles, waj ajllasqa cristianospis, mana ismoj cuerpoyojchu kausarichisqa kanku. w20.12 pág. 11 párrs. 10-12

Jehovaqa wakin ñaupa cristianosman yuyaycharqa, cieloman rejkunaj kausarimuyninkumanta qhelqanankupaj. Apóstol Juan qhelqarqa: “Kunanqa Diospa wawasnin kanchej, jinapis manaraj yachakunchu imachus aswan qhepaman kananchejta. Yachanchejtaj pay rikuchisqa kajtenqa pay jina kananchejta”, nispa (1 Juan 3:2). Ajllasqa cristianosqa, mana yachankuchu cielopaj cuerpoyoj kausarichisqa kajtinku, imayna rijchʼayniyojchus kanankuta. Jinapis cieloman ripuytawanqa, Jehová Diosta rikonqanku. Bibliaqa willawanchej, Jesús “tukuy kamachejkunata, tukuy atiyniyojkunatawan”, wañuytapis chinkachishajtin, ajllasqa cristianosqa paywan khuska kashanqanku. Chaymantataj Jesús, ajllasqa cristianos, tukuy ima kajpis, Jehová Diospa makinman churakonqanku (1 Cor. 15:24-28). Chayqa, ¡may sumajpuni kanqa! w20.12 pág. 8 párr. 2

Kay jallpʼapi kausakuyta suyakoj cristianospis, kausarimullanqankutaj. Bibliaqa nin, apóstol Pablo, waj ajllasqa cristianospis, “wañusqas ukhumanta ñaupajta kausarimojkunamanta” kasqankuta (Fili. 3:11). Chaytaj niyta munan, waj runaspis kausarimunallankutataj. Jobpis aswan qhepaman kausarimunanmanta parlarqa (Job 14:15). Pisimantawan Jesusqa kay jallpʼapi tukuynin gobiernosta, autoridadesta, atiyniyoj kajkunata ima chinkachenqa. ‘Cristojta kajkunataj’, chaypachaqa paywan khuskaña cielopi kashanqanku. Chantá ‘tukuy enemigosmanta qhepa kaj enemigoqa, nisunman wañoyqa atipasqa kanqa’. Yachanchej jina, cieloman rinankupaj kausarichisqa kajkunaqa, niña wañonqankuchu (1 Cor. 15:23-26). Mana cieloman ripojkunapis, apóstol Pablo kay pʼunchaypaj textopi nerqa jina, wañusqas kausarimunankuta suyakullankumantaj. Yachanchej jina, cielomanqa cheqan runaslla riyta atinkuman. Chayrayku Pabloqa ‘mana cheqan runaspis’ kausarimunankuta nispa, mana cieloman rejkunamantachu parlasharqa, manaqa kay jallpʼapi kausarimuy kananmanta. w20.12 págs. 6, 7 párrs. 18, 19

Ichapis ninchej: “¿Imaynapí yachayman Jehová Dios perdonawasqantapuni?”, nispa. Ajinata tapukunchej chayqa, Jehová Diosqa perdonawanchejña. 1954 watamanta inglés parlaypi Torremanta Qhawaj revista nerqa: “Ichá kikin imasllapipuni kutin kutita pantachej. Ichapis niraj Jehová Diosta sirvishaspa imatachus ruwaj kanchej, chayta nipuni qonqayta atishanchejchu. [...] Ama yuyanachu Jehová Dios juchanchejta ni jaykʼaj perdonanawanchejta. Satanasqa chaytapuni piensananchejta munan. Pantasqanchejmanta llakikunchej chayri rabiakunchej chayqa, mana munaspapunichu pantasqanchejta rikuchishanchej. Jehová Diostaj perdonawasunchej. Chayrayku kʼumuykukoj sonqowan Jehovamanta perdonta mañakuna. Paytaj watejmanta llimphu sonqoyoj kanapaj, mana kikin juchapi urmanapajtaj yanapawasun”. Apóstol Pabloqa niraj cristianoman tukushaspa ashkhata juchallikorqa. Payqa chay sajra ruwasqasninta mana qonqarqachu (1 Tim. 1:12-15). Chantapis Jesusmanta nerqa: “Paymin munakuwarqa, noqaraykutaj kausayninta qorqa”, nispa. Pabloqa mana saqerqachu sonqon juchachanallantapuni. Astawanpis Jehová Diospaj tukuy atisqanta llankʼallarqapuni. w20.11 pág. 27 párr. 14; pág. 29 párr. 17

Satanasqa mana millay fotosllawanchu, nitaj millay videosllawanchu urmachiyta munawanchej. Payqa tukuy imawan pantachiyta munawanchej. Jinapis ichá ninchej: “Kayta ruwajteyqa mana congregacionmanta qharqowanqankuchu. Manachá juchapunichu kanman”, nispa. Ajinata yuyayqa, manapuni allinchu. Astawanpis allin kanman kay jinata piensarinanchej: “¿Satanaschu pantachishawan iskay sonqolla kanaypaj? Sajra munayniywan atipachikojtiy, ¿Jehová Diospa sutinta chʼichichasajchu? Kay ruwasqay, ¿Jehová Diosman qayllaykuchiwanqachu chayri karunchawanqachu?”. Chay tapuykunaman maychus kajta kutichinapaj, Jehová Diosmanta yachayta mañakuna. Chayta ruwayqa juchaman mana urmanapaj yanapawasun. Imallapis pantachiyta munawajtinchejtaj, Jesús jina nisun: “¡Riy kaymanta Satanás!”, nispa (Mat. 4:10). Iskay sonqolla kayqa, mana ni imapi yanapawanchejchu. w20.06 págs. 12, 13 párrs. 16, 17

Jehová Diosqa imachus noqanchejpaj allin kasqanta sumajta yachan. Chayrayku kamachisqasninta kʼumuykukoj sonqowan kasukunchej (Efe. 4:22-24). Kʼumuykukoj sonqo kayqa, Jehová Diospa munayninta aswan ñaupajman churanapaj yanapawanchej. Yanapallawanchejtaj wajkunata noqanchejmanta astawan kurajta jina qhawanapaj. Ajinamantataj Jehová Diospa qayllallanpipuni kanchej, hermanosninchejwanpis allinta kausakunchej (Fili. 2:3). Mana allinta qhawarikuspaqa, kay sajra mundomanta runas jina imatapis noqallanchejpaj munasunman, jatunchakusunmantaj. Apóstol Pabloj tiemponmanta wakin cristianosqa, chaypisina urmasharqanku. Chayrayku Pabloqa Romapi kaj cristianosman qhelqarqa: “Tukuy qankunaman niykichej: Ama qankuna kikiykichejmanta aswan sumaj kasqaykichejta yuyakuychejchu. Manachayqa maychus kajllata qankunamanta yuyaychej”, nispa. Pabloqa mana pisipaj qhawakunanchejtachu nisharqa. Astawanpis nisharqa, mana jatunchakunapaj sumajta qhawarikunanchejta. Chaypajtaj kʼumuykukoj sonqo kay yanapawasun. w20.07 pág. 2 párrs. 1, 2

Asaj tiemponpi, Judá llajtamanta runasqa, uj tiempollata allin kausaypi karqanku. Imajtinchus Etiopiamanta Zeraqa, uj millón soldadoswan paykunawan maqanakoj rerqa. Payqa Judamanta runasta facilta atipananta yuyarqa. Rey Asatajrí Jehová Dios yanapananta yacharqa. Chayrayku paymanta ajinata mañakorqa: “Yanapariwayku Señorniyku Tata Dios, qampi suyakusqaykurayku, sutiykipitaj kay soldadoswan maqanakoj jamusqaykurayku”, nispa (2 Cró. 14:11). Etiopiamanta soldadosqa, Judá llajtaj soldadosninmanta casi iskay jinaspiwan aswan ashkha karqanku. Jinapis Asaqa yacharqa Jehová Dios llajtanta yanapayta atisqanta. Jehová Diostaj paykunata yanaparqapuni. Chayrayku Judamanta soldadosqa, etiopesta ni uj puchuyojta tukucherqanku (2 Cró. 14:8-13). Mana yachanchejchu imachus sapa ujninchejmanta qhepaman kananta. Jinapis yachanchej, ima ratollapis qhatiykachasqa kananchejta. Jesusqa tukukuy pʼunchaykunapi “tukuy runaspa chejninan” kananchejta nerqa (Mat. 24:9). w20.09 págs. 17, 18 párrs. 14-16

Ni pipis munanchejchu, runas imaymanasta nispa kʼumuykachachinawanchejta. Ichá wakin runasqa imaymanasta niwanchej, asipayawanchejtaj. Chaymanta anchata llakikusunman chayqa, kallpanchej pisiyanman (Pro. 24:10). Chayrayku runas churanakuspa imatapis niwajtinchej, apóstol Pablo jina ‘kusikuna’. ¿Imaraykutaj kusikuna tiyan? Imaraykuchus chayqa, Jesuspa discipulosnin kasqanchejta rikuchin (1 Ped. 4:14). Jesusqa discipulosnin qhatiykachasqa kanankuta nerqa (Juan 15:18-20). Chaytaj ñaupa tiempopi juntʼakorqapuni. Griegospa yachachisqankuta qhatej runasqa, cristianosta pisipaj qhawaj kanku, sonso runas kasqankutataj nej kanku. Judiospis cristianos “mana yachakuyniyoj, mana kasuy runaslla kasqankuta” nej kanku. Apóstol Pedromanta, Juanmantawan chayta nerqanku (Hech. 4:13). Runasqa cristianosta pisipaj qhawaj kanku, mana piniyojta jinataj. ¿Imaraykutaj ajinata qhawaj kanku? Paykunaqa mana politicaman satʼikojchu kanku, nitaj soldado kanankupajpis wakichikojchu kanku. Chantapis runasqa paykunata chejnikoj kanku. Ñaupa cristianosqa, runas paykunata pisipaj qhawajtinkupis Jesusta qhatillarqankupuni. w20.07 págs. 14, 15 párrs. 3, 4

Apóstol Juanqa hermanosta mayta munakorqa, munarqataj creeyninku sinchʼi kananta. Chaytaj qhelqasqan kinsa cartaspi sutʼi rikukun. Cristowan khuska gobernamunankupaj tukuy ajllasqa kajkunaqa, apóstol Juan jinallataj munakuwanchej. Chaytaj mayta kusichiwanchej (1 Juan 2:27). Chayrayku apóstol Juan yuyaychawasqanchejman jina ruwana. Cheqa kajpi purinallapuni, Jehová Diostataj tukuy imapi kasukuna. Diospa Palabranta estudiana, imatachus yachakusqanchejpitaj creena. Jesuspi creesqanchejta wiñachina. Runaspa yachachiyninkuta qhesachana. Diospa llajtanta wasanchajkunatataj ama uyarinachu. Ama puraj uyas kanachu. Juchapi mana urmanapajpis kallpachakuna. Jehová Dios llimphu kausayniyoj kanapaj imatachus kamachiwasqanchejta kasukuna. Hermanosninchejtapis creeypi sinchʼita sayanankupaj yanapana. Chaypajtaj sonqonchejta nanachiwajtinchej perdonana, yanapata necesitajtinkutaj yanaparina. Chay imasta ruwaspaqa, ima kajtinpis cheqa kajpi purillasunpuni. w20.07 págs. 24, 25 párrs. 15-17

Jehová Diosqa munakuwasqanchejrayku llajtanpi kajta saqewanchej. Chaypi mana kikin imastachu ruwajtinchejpis, tukuyninchej may valorniyoj kanchej, purajmantataj yanapanakunchej. Apóstol Pabloqa cuerpoj imasninmanta parlaspa, yachachiwanchej mana mayqen hermanotapis “mana qanllawan kasaj” ninanchejchu kasqanta (1 Cor. 12:21). Congregacionpi allin kausay kananpajqa, mana mayqen hermanotapis pisipaj qhawanachu tiyan, purajmantataj yanapanakuna tiyan (Efe. 4:16). Hermanosninchejwan sumaj ujchasqa kasun chayqa, tukuyninchej kallpachasqa kasun, may munasqas kasqanchejtataj reparasun. Tukuy ancianosqa Jehová Diospa atiyninnejta churasqa kanku. Jinapis mana kikinchu kanku, nitaj kikin imastachu sumajta ruwayta yachanku (1 Cor. 12:17). Wakenqa reciellanraj ancianos kasqankurayku, manaraj ashkha experienciayojchu kanku. Wakintajrí machitusña chayri onqosqas kasqankurayku, congregacionpi pisillataña yanapakunku. Jinapis ni mayqen ancianopis, waj ancianomanta yuyananchu tiyan ni imapi yanapakusqanta. Astawanpis imatachus Romanos 12:10 nisqanta kasukunanku tiyan. w20.08 pág. 26 párrs. 1, 2; pág. 27 párr. 4

Jehovaqa kay jallpʼapi llajtannejta kausayman pusaj ñanta pusashawanchej. Diospa llajtan Bibliaj nisqanta waj jinamanta sutʼinchawajtinchej, rato japʼikunchej. Llimphu kausayniyojllapuni kanapaj imata kamachiwajtinchejpis, chay rato kasukunchej. Jinapis waj imasta kamachiwajtinchej, chaytaj mana allinchu rijchʼawajtinchej, ¿kikillantatajchu ruwanchej? Ichapis willawanchej salonninchej vendekunanta. Chay kajtin, yuyarikunanchej tiyan Jehová llajtanta ñaupajman pusashasqanta, noqanchejtaj paypaj llankʼashasqanchejta. Chayta ruwasun chayqa, kusisqallapuni kasun (Col. 3:23, 24). Rey Davidmanta mayta yachakusunman. Payqa Diospa templon ruwakunanpaj qolqeta churashaspa nerqa: “Pitaj noqa kasqani, aylluypis pitaj kasqa chhika imasta qanman qoyta atinaykupajri? Cheqamanta tukuy imaspis qanmanta jamun. Qanmanqa qoyku, qanmanta japʼerqayku, chayllamantataj”, nispa (1 Cró. 29:14). Noqanchejpis qolqeta churaspaqa, imatachus Jehovamanta japʼinchej chayllatataj qopunchej. Jinapis Jehovaqa mayta kusikun, paypaj llankʼanapaj tiemponchejta, qolqenchejta, kallpanchejta ima churajtinchej (2 Cor. 9:7). w20.11 págs. 22, 23 párrs. 14-16

Sumaj cristianos kasqanchejqa, mana ashkha runasta Diospa llajtanman pusamusqanchejpichu yachakun (Luc. 8:11-15). Runasman sumaj willaykunata willallasunpuni, yachachillasunpunitaj chayqa, Jehová Diosninchej kusikonqa. Imaraykuchus chayta ruwaspaqa, payta Wawantawan kasukushanchej (Mar. 13:10; Hech. 5:28, 29). Chantapis yachanchej, kay mundoj tukukuynin manchay qayllitapiña kashasqanta. Chayrayku usqhayllata predicamunanchej tiyan. Ajinallamanta runaspa kausayninkuta salvayta atisun. Chayrayku ama ninachu: “Kaysitulla japʼishawan. Chay allinchakojtin, predicaj llojsillasaj”, nispa. Bibliata unaytaña estudiashanki chayqa, predicayta munanaykipaj kallpachakuy, Bibliamanta astawan yachakuy, mana manchachikunaykipaj kallpachakuy, ruwanasniykita juntʼaymantaj yachaykukuy. Mundontinpeqa pusaj millones runasmanta astawanña predicashanku. Qanpis paykunaman ujchaykukuy, Diostaj kusikuyninta qosonqa (Neh. 8:10; Luc. 5:10). Jehová Dios “kaykamalla” ninankama, chay sumaj llankʼaypi yanapakuy. w20.09 pág. 7 párrs. 18-20

Noqanchejqa kallpachakunanchej tiyan, mana tukuy imayoj kayta munanapaj. ‘Qhapajyayta munasunman’ chayqa, Jehová Diosta niña munakusunmanchu, Palabranta pisipaj qhawasunman, niñataj predicayta munasunmanchu (Mat. 13:22). Chayrayku imapis urmachinawanchejpaj jina kajtin, chay rato imatapis ruwana tiyan. Ajinamanta Jehová Dios qowasqanchej valorniyoj imasta, sumajpaj qhawallasunpuni. Internetta, peliculasta, chayri teleta qhawashaspaqa, yachanchej Diosta wasanchaj runaspa parlasqanku, maqanakuykuna, chayri millay imas rikhurimuyta atisqanta. Chayrayku ñaupajmantaña piensarina tiyan, chaykuna rikhurimojtin imatachus ruwanata. Ajinamanta chay imas rikhurimojtin, chay rato imatapis ruwasun. Imatachus ruwananchejta sutʼita yachaspaqa, mana Diosmanta karunchakusunchu, llimphu kausayniyojllapunitaj kasun (Sal. 101:3; 1 Tim. 4:12). Jehová Diosqa Palabranpi ashkha imasta yachachiwanchej, chaytataj runasman yachachinanchejta kamachiwanchej. Chay iskay imasta manchay valorniyojpaj qhawananchej tiyan. Chayta ruwasun chayqa, sonqonchejqa mana juchachawasunchu, nitaj qhasipajchu kausasun. Chantapis runasta Jehová Diosta rejsinankupaj yanapasqanchejmanta kusikusun. w20.09 pág. 30 párrs. 16-19

Bautizakushaspaqa tukuypa ñaupaqenpi iskay imasta nerqanchej: Jehová Diospi creesqanchejta, llajtanwan khuskataj sirviyta munasqanchejta. Kay tiempopeqa Jehová Diospuni llajtanta ñaupajman pusashan. Chaypitaj reparasunman, imaynachus kasqanta, imatachus ruwayta munasqanta, kamachiykunasnintapis. Diospa llajtan ima kinsa imastachus paymanta rikuchisqanta qhawarina. Ñaupaj kaj, “Diosqa tukuy runasta uj rejllata” qhawan (Hech. 10:34). Jehová Diosqa mayta munakuwasqanchejrayku, Wawanta tukuy runasrayku wañunanpaj qorqa (Juan 3:16; 1 Tim. 2:6). Jesuspa wañuyninpi creejkunaqa, ashkha bendicionesta japʼenqanku. Jehová Diostaj tukuy runas chay bendicionesta japʼinankuta munan. Chayrayku sumaj willaykunata tukuyman willachishan. Iskay kaj, Jehová Diosqa mana munanchu imapis pejtu kananta, astawanpis allin kausay kananta munan (1 Cor. 14:33, 40). Chayrayku payqa, llajtanpi tukuy ima sumajta ruwakunanta munan. Jehovaqa munallantaj, llajtanpi kajkuna allinpi kausakunankuta. Kinsa kaj, Jehová Diosqa Sumaj Yachachejninchej (Isa. 30:21). Chayrayku llajtanpi kajkunaqa, congregacionpi, predicacionpipis Bibliamanta yachachinku. w20.10 pág. 20 párrs. 1-3