Marzo

Mana runaswan chejnichikuyta munanchejchu, nitaj runas qhatiykachanawanchejmanta wañurishanchejchu. Chanta, ¿imaraykutaj runas chejnikuwajtinchej kusisqa kanchej? Kinsa imasrayku. Ñaupaj kaj, runas chejnikuwasqanchejta aguantaspaqa, Jehová Diosninchejta kusichinchej (1 Ped. 4:13, 14). Iskay kaj, creeyninchej sinchʼiyan, aswan valorniyojmantaj tukun (1 Ped. 1:7). Kinsa kaj, wiñay kausayta japʼisun (Rom. 2:6, 7). Jesús kausarimusqanmanta pisi tiemponman, apostolesqa runas chejnikojtinkupis kusisqa karqanku. Judiospa Jatun Juntanmanta kajkunaqa, paykunata jasutʼicherqanku, niña Jesusmanta parlanankutataj kamacherqanku. Jinapis apostolesqa “kusisqa riporqanku, Jesuspa sutinrayku ñakʼarisqankumanta” (Hech. 5:40-42). Paykunaqa Jesusta mayta munakusqankurayku, mana enemigosninkuta manchachikorqankuchu. Chantapis sumaj willaykunata “mana saykʼuspa” willallarqankupuni. Kunanpis may chhika hermanos, llakiypi kaspapis sinchʼita sayashanku. Paykunaqa sutʼita yachanku, Jehovaqa imatachus ruwasqankuta, sutinta munakusqankutapis ni jaykʼaj qonqananta. w21.03 págs. 24, 25 párrs. 18, 19

Ajllasqa cristianosqa mana cieloman riyta munaspañachu nacekunku, manaqa Jehová Dios chay munayta paykunaj sonqonkuman churan. Paykunaqa cieloman rinankupi piensanku, mañakuyninkupipis chaymanta parlarinku, maytataj cielopi premionkuta japʼiyta munashanku. Ichá paykunaqa, mana yachankuchu cieloman rispa imayna cuerpoyojchus kanankuta (Fili. 3:20, 21; 1 Juan 3:2). Jinapis anchatapuni munashanku, cielopi Diospa Gobiernonpi kayta. Waj ovejasmanta kajkunataj, kay jallpʼapi wiñay kausayta suyakushanku. Chaytaqa tukuy runas munanchej. Waj ovejasmanta kajkunaqa, maytapuni munashanku kay jallpʼata uj paraisoman tukuchiypi yanapakuyta. Paykunaqa mayta munashallankutaj wasista ruwakuyta, huertasta churaytapis. Chantapis wawasninkuwan khuska sanitos kausakuyta munashanku (Isa. 65:21-23). Paykunaqa kay jallpʼamanta tukuy lugaresta purimuyta munashanku. Ajinamanta lomasta, montesta, jatuchaj qochasta, Diospa tukuy ima ruwasqantawan rejsimunankupaj. Jinapis astawanqa, Jehová Diosman astawan kʼaskaykuyta munashanku. w21.01 págs. 18, 19 párrs. 17, 18

Babilonios Jerusalenta thuñisqankutawan, runasqa nerqanku: “Kay jallpʼaqa mana runasniyoj, mana uywasniyojtaj chʼin qhepakun, caldeospa makinkuman jaywaykusqa kasqanrayku”, nispa (Jer. 32:43). Joel profecianta willasqanmanta 200 watasninman jina, Jehová Diosqa profeta Jeremiasnejta uj imatawan willarqa. Payqa nerqa Jerusalenman yaykoj soldados, sajra imasta ruwaj israelitasta maskʼanankuta, tukuyninkutataj japʼinankuta. Jehová Dios nerqa: “Kunanrí kachamusaj ashkha challwa japʼejkunata, challwasta jina israelitasta japʼinankupaj. Chantá kachamullasajtaj ashkha kʼita animalesta japʼejkunata tukuy orqospi, lomaspi, jinataj chhanka kʼajlluspipis israelitasta wañurachinankupaj. [...] Uj jinatawanraj tukuy sajra ruwasqasninkumanta, jinataj juchasninkumantapis paykunata castigasaj”, nispa. Juchasninkumanta mana pesachikoj israelitasqa, babiloniosmanta manapuni ayqeyta atinkumanchu karqa (Jer. 16:16, 18). w20.04 pág. 5 párrs. 12, 13

Lotqa kausaynin wañuy patapi kashajtin, Jehová Diosta mana usqhaytachu kasukorqa. Lotmanta ichapis yuyasunman, Jehovaj nisqanta pisipaj qhawasqanta chayri mana kasukoj runa kasqanta. Jehová Diostajrí mana jinatachu paymanta yuyarqa. Astawanpis ‘payta khuyakorqa’. Chayraykutaj angelesqa Lotta, warminta, iskaynin warmi wawasnintawan makisninkumanta llajtamanta jawaman aysarqanku (Gén. 19:15, 16). ¿Imaraykutaj Jehová Dios Lotta khuyakorqa? Ichapis Lotqa llajtamanta jawapi tiyakoj runasta manchachikusqanrayku, mana wasinmanta ripuyta atillarqachu. Chantapis ichá yacharqa, iskay reyes machʼayoj chayri alquitranniyoj tʼoqosman urmaykusqankuta. Chaytaj karqa chay qayllallapi kaj Sidim vallepi (Gén. 14:8-12, Qheshwa Biblia). Chantapis Lotqa tata kasqanrayku, warminmanta wawasninmantawan llakikorqachá. Mana chayllachu, qhapaj runa kasqanrayku, Sodoma llajtapi sumaj wasiyojchá karqa (Gén. 13:5, 6). Imayna kajtinpis, Lotqa Jehová Diosta chay rato kasukunanpuni karqa. Jinapis Jehová Diosqa mana Lotpa pantasqantachu qhawarqa. Astawanpis ‘cheqan runata’ jina qhawarqa (2 Ped. 2:7, 8). w20.04 pág. 18 párrs. 13, 14

Jóvenes, pikunachus wawamantapacha rejsisunkichej chaykunaqa, mana wiñarqosqaykichejtawanchu kuraj runata jina qhawasonqachej. Jinapis Jehová Diosqa, mana paykuna jinachu qhawasunkichej. Payqa sumajta rejsisunkichej, yachantaj imastachus ruwayta atisqaykichejta (1 Sam. 16:7). ¿Imatawan Davidmanta yachakuwajchej? Jehovawan sumaj amigos kanaykichejpaj kallpachakuychej. Davidqa Diospa ruwasqasninpi sumajta tʼukurej. Ajinamanta Jehovata astawan rejserqa, astawantaj munakorqa (Sal. 8:3, 4; 139:14; Rom. 1:20). Chantapis David jina Jehovamanta kallpata mañakuychej. Ichapis escuelamanta chayri colegiomanta compañerosniykichej, testigo kasqaykichejrayku asipayasunkichej. Jina kajtin, aguantanaykichejpaj Jehovamanta yanapata mañakuychej. Chantapis Bibliapi, publicacionespi, videospi ima yachakusqaykichejman jina ruwaychej. Imaynatachus Jehová yanapasusqaykichejta rikuspaqa, astawan paypi atienekunkichej. Chayta rikuspataj, wajkunapis allinpaj qhawasonqachej. w21.03 pág. 4 párr. 7

Sumaj amigosqa, imastachus yuyasqankuta, sonqonkupi imaschus kasqantapis willanarikunku. Jehová Diospis chayllatataj amigosninwan ruwan. Payqa Palabrannejta parlawanchej. Chaypi willawanchej imatachus yuyasqanta, imachus sonqonpi kasqantapis. Noqanchejrí Jehová Dioswan mañakuynejta parlanchej. Paywan parlarishaspaqa, sonqomantapacha tukuy imata willakuyta atinchej. Diosqa munakuwasqanchejrayku, mana uyarillawanchejchu, manaqa imatachus mañakusqanchejtapis qowanchej. Wakin kutisqa, mañakuyninchejman chay rato kutichiwanchej. Wakin kutistaj, mañakunallanchejpuni tiyan. Jinapis Jehová Diosninchejqa, mañakuyninchejman maychus tiemponpipuni kutichiwanchej. Chantapis imatachus necesitashanchej, chaytapuni qowanchej. Jinapis wakin kutisqa, mana munasqanchejtapunichu qowanchej. Ichapis Jehová Diosmanta llakiyninchejta chinkachinanta mañakunchej. Paytajrí chay llakiyta chinkachinanmantaqa, aguantanapaj yachayta, kallpatawan qowanchej (1 Cor. 10:13). ¿Imaynatá Jehová Diosman agradecekusunman mañakuyta atisqanchejmanta? Ujqa kanman, ‘mana saykʼuspa Diosmanta mañakuspa’. Jehová Diosllataj chayta ruwananchejta niwanchej (1 Tes. 5:17). w20.05 págs. 27, 28 párrs. 7, 8

Karu ñanta atipanakupi correjkunaqa, mana urmanankupaj sumajta ñaupaqenkuta qhawakunku. Jinapis urmakojqa, mana “kay urmachiwan” nispa pachanpi qhepakunchu. Astawanpis sayariytawan correllanpuni. Imaraykuchus yachan, maymanchus chayanan kashan, chayman chayajtin premiota japʼinanta. Chay yuyaywantaj correllanpuni. Cristiano kausayninchejpi, ichá noqanchejpis ashkha kutista parlasqanchejpi chayri ruwasqanchejpi pantasun. Manachayrí ichá waj hermanos contranchejpi imatapis ruwasqankurayku pantasun. Chaytaj kanqapuni, imaraykuchus tukuyninchej pantaj runas kanchej, kʼullku ñantataj correshanchej. Chayrayku ichapis wajkunawan tanqarparinakusun, nisunman purajmanta pantachinakusun. ‘Wajkunaqa contranchejpi imatapis ruwanqankupuni’ (Col. 3:13). Jinapis pichus chayri imachus urmachiwasqanchejpi yuyanamantaqa, ima premiotachus japʼinanchejpi yuyana, correnallapunitaj. Ama phiñasqallapuni pachanpi kanachu. Chayta ruwasunman chayqa, maymanchus chayananchej kashan, chayman mana chayasunchu, nitaj premiotapis japʼisunchu. Chantapis kikillanpi qhepakuspaqa, wajkunata urmachisunman. Imaraykuchus kausayman apaj ñanqa kʼullkulla. w20.04 pág. 26 párr. 1; págs. 27, 28 párrs. 8, 9

Daniel libroqa, tukuy laya metalesmanta runaman rijchʼakoj jatun lantimanta parlan. Chay lantitaj ashkha atiyniyoj gobiernos rikhurisqankuwan ninakun. Chay gobiernosqa, maypichus Diospa kamachisninmanta ashkhas tiyakunku, chaypi gobernarqanku. Chay lantej chakisnenqa, fierrowan tʼuruwan ima chajrusqa karqa. Chaytaj qhepa kaj atiyniyoj gobiernowan ninakun, nisunman Gran Bretañawan Estados Unidoswan ima. Danielpa profecianman jina, Diospa Gobiernon tukuy gobiernosta chinkachishajtin, Gran Bretañawan Estados Unidoswanqa kashanqankuraj. Apóstol Juanpis mundontinpi atiyniyoj gobiernosmanta parlallarqataj. Chay gobiernosqa, maypichus Diospa kamachisninmanta ashkhas tiyakunku, chaypi gobernananku karqa. Juanpa profecianpi, chay gobiernosqa qanchis umasniyoj ‘millay phiña animalwan’ ninakunku. Chay animalpa qanchis kaj umanqa, Gran Bretañawan Estados Unidoswan ninakun. Juanqa mana nerqachu, chay phiña animalmanta waj umapiwan llojsinanta. Chayrayku Jesuswan cielopi soldadosninwan, chay phiña animalta chinkachishajtinku, qanchis kaj umaqa gobernashanqaraj (Apo. 13:1, 2; 17:13, 14). w20.05 pág. 14 párrs. 11, 12

Kayqa yuyarichiwanchej, munakoyqa kausayta rikhurichej Diosninchejmanta jamusqanta. Jehovaqa mayta munakuwanchej. Ajinata munakuwasqanchejrayku, ni imata manchachikunchejchu. Chantapis kusisqa, sonqo juntʼasqataj kanchej. Cristianosqa wajkunata munakunanchejpuni tiyan. Imaraykuchus Jehová chayta kamachiwanchej (Mat. 22:37-40). Jesusqa Diosta munakuy ñaupaj kaj kamachiy kasqanta nerqa. Chaytataj kasukuyta atillanchej. Imajtinchus Jehovaqa, ni imapi pantanchu. Chantapis payqa manchay kʼacha, noqanchejmantataj llakikun. Jinapis iskay kaj kamachiytaqa mana juntʼayta atillanchejchu. ¿Mayqentaj chay kamachiy? Runa masinchejta munakuy. Paykuna ukhupitaj, hermanosninchej kashanku. ¿Imaraykutaj paykunata mana munakuyta atillanchejchu? Pantaj runas kasqankurayku. Wakin kutistaj imata nispapis, chayri imata ruwaspapis sonqonchejta nanachiwanchej. Jehová Diosqa ajina kananta yacharqa. Chayrayku Bibliapi qhelqacherqa, imaraykuchus munanakunanchej kasqanta, imaynatachus chayta ruwanatapis. Chay qhelqajkunamanta ujtaj, apóstol Juan karqa (1 Juan 3:11, 12). w21.01 pág. 8 párrs. 1, 2

Unayña chayri kunallanraj Jehová Diosta sirvispapis, kaypi piensarina: “¿Kallpachakushanchejchu Satanaspa trampasninpi mana urmanapaj?”. Telepi chayri Internetpi millay fotos chayri millay videos rikhuriwajtinchej, ¿imatá ruwanchej? ¿Ninchejchu “kayqa mana pornografiapunichu” nispa? Chayrí, ¿reparakunchejchu Satanás chaywan urmachiyta munashawasqanchejta iskay sonqolla kananchejpaj? Chayta entiendenapaj, imaynatachus maderata khuchusqankupi piensarina. Maderata khuchojqa, maderata iskayman partinankama pisimanta pisi khuchun. Satanaspis ajinallatataj ruwan. Payqa millay fotoswan chayri millay videoswan, pisimanta pisi urmachiyta munawanchej. Ujta qhawaspaqa mana imananawanchejta yuyasunman. Jinapis chayta qhawaspallapuneqa, iskay sonqolla kasun. Iskay sonqolla kaspataj, juchapi urmasunman, Jehová Diostataj wasanchasunman. Chayrayku amapuni saqenachu, millay imas sonqonchejman yaykunanta. Astawanqa Jehová Diospa sutinta mana chʼichichanapaj kallpachakuna. w20.06 pág. 12 párrs. 14, 15

Chiriyapoj hermanosta tariytawanqa, mana saykʼuspa paykunata yanapanallanchejpuni tiyan. Ichapis paykunaqa, Jesuspa kikinchayninmanta chinkaj joven jina llakisqas kashanku (Luc. 15:17-24). Chantapis ichá Satanaspa mundonpi mayta ñakʼarerqanku. Chayraykutaj ichapis manaña Jehová Diosmanta ñaupajta jinachu japʼikunku. Creeyninkuta kallpachanankupajqa, noqanchej yanaparinanchej tiyan. Jesuspa kikinchayninmanta michejqa, chinkasqa ovejitanta mana saykʼuspa maskʼarqa. Tarispataj ovejitan pisi kallpita kashasqanta repararqa. Chayraykutaj qʼepiriykukuspa tropaman apakaporqa (Luc. 15:4, 5). Chiriyapoj hermanosninchejqa, ichá imallapis jarkʼasqanrayku, congregacionman mana kutinpuyta atishankuchu. Paykunata yanapanapajqa, tiempochakunanchej, kallpachakunanchejtaj tiyan. Chaypajtaj Diospa atiyninwan, Bibliawan, publicacioneswan ima, yanapachikusunman. Ajinamanta creeyninkuta kallpachanankupaj yanapasun. Sichus uj anciano chiriyapoj hermanonchejta estudiachinata niwanchej chayqa, chay llankʼayta kusiywan japʼikuna. w20.06 pág. 28 párrs. 14, 15

Hermanosninchejtaqa munakunanchej tiyan. Ajinamanta cheqa cristianos kasqanchejta rikuchisun. Jinapis “cheqa yachaypi, sumajta reparaypi ima” wiñanallanchejtaj tiyan (Fili. 1:9). Mana chayta ruwaspaqa, ‘chʼaukiyaj runaspa llulla yachachiyninkuwan’ wayrawan jina apaykachachikusunman (Efe. 4:14). Jesusta wakin yachachisqasnin saqerparejtinku, apóstol Pedroqa Jesusman nerqa: “Qanpa nisqasnillayki wiñay kausayman pusan”, nispa (Juan 6:67, 68). Pedroqa Jesuspa nisqasninta mana sutʼita entiendespapis, mana Jesusta saqerparqachu. Payqa yacharqa Jesusqa Cristopuni kasqanta. Noqanchejpis Bibliaj nisqan cheqapuni kasqanmanta, mana iskayrayanachu tiyan. Chaypajtaj creeyninchejta sinchʼiyachinanchej tiyan. Chayta ruwajtinchejqa, llakiykuna chayri problemas jamojtinpis, creeyninchejqa sinchʼillapuni kanqa. Wajkunatapis creeyninkuta sinchʼiyachinankupaj yanapasun (2 Juan 1, 2). w20.07 pág. 8 párr. 2; pág. 13 párr. 18

Hermanosninchej cheqa kajpi sayanallankupajpuneqa, paykunata khuyakunanchej tiyan (1 Juan 3:10, 11, 16, 17). Paykunataqa mana tukuy ima allin kajtillanchu munakunanchej tiyan, manaqa llakiykuna chayri problemas kajtinpis. Ichapis ujnin hermanonchejpa familiarnin wañupun. Jina kajtin, payta sonqocharisunman chayri imaynallamantapis yanaparisunman. Manachayrí ichapis sinchʼita parasqanrayku chayri waj llakiyrayku hermanosninchejpa wasinku, manaqa salonninku urmaykun. Jina kajtin, wasinkuta chayri salonninkuta allinchaysisunman. Hermanosninchejta munakusqanchej, khuyakusqanchejpis mana simillamantachu kanan tiyan, manaqa ruwasqanchejpi rikukunan tiyan. Hermanosninchejwan munanakuspaqa, munakuyniyoj Tatanchejpa wawasnin kasqanchejta rikuchinchej (1 Juan 4:7, 8). ¿Imaynatá hermanosninchejta munakusqanchejta rikuchisunman? Paykunata perdonaspa. Pillapis sonqonchejta nanachiwanchej chayqa, payta munakusqanchejrayku perdonananchej tiyan. Chay ruwasqantataj qonqapunanchej tiyan (Col. 3:13). w20.07 pág. 24 párrs. 14, 15

¿Kay tiempopi jinallatajchu kausarimoj runasman yachachinanchej kanqa? ¿Kunan jinachu congregaciones kanqa? Kanqa chaytaj, ¿kausarimojkuna chaykunamanchu rinanku kanqa? Chantá, ¿paykunata yachachinachu kanqa paykunamanta qhepata kausarimojkunaman yachachinankupaj? Chayta yachanapajqa, suyakunachá kanqa. Jinapis kayta sutʼita yachanchej: Cristo Waranqa Watasta kamachiyta tukojtin, “tukuy jallpʼaqa Tata Diosta rejsiywan juntʼa kanqa” (Isa. 11:9). Chay wataspeqa ashkha trabajo kapuwasun, may kusisqastaj chayta ruwasun. Cristo mil watasta kamachishajtin, Jehovata kusichinapaj cambianallanchejpuni kanqa. Chaytaj kausarimojkunawan pacienciakunapaj yanapawasun. Imaraykuchus paykunata yanapananchej kanqa, sajra yuyayninkuta cambianankupaj, Jehová Diospa munayninman jinataj kausakunankupaj (1 Ped. 3:8). Kausarimoj runasqa, Diospa kamachisnin llampʼu sonqos kasqanchejta rikonqanku. Rikullanqankutaj Diosta kusichinapaj kallpachakusqanchejta. Chayta rikuspataj, paykunapis Jehová Diosta yupaychayta munanqanku (Fili. 2:12). w20.08 pág. 16 párrs. 6, 7

Apóstol Pabloj nisqanta kasukuspaqa, sapa ujpis ruwasqanchejta qhawarikusun. Chayta ruwaspataj, ichá reparakusun wakin imasta sumajta ruwayta yachasqanchejta. Ichapis uj ancianoqa, mana plataformamanta sumajta yachachimuyta atinchu, jinapis runasman sumajta Bibliamanta yachachin. Waj ancianotaj ichá imatapis patan uranta ruwan, pero manchay munakuyniyoj. Chayraykutaj hermanosqa, paytapuni maskʼanku imatapis tapurikunankupaj. Waj ancianotajrí ichapis wajkunata wasinman wajyarikunpuni (Heb. 13:2, 16). Imatachus sumajta ruwayta yachasqanchejta reparakuspaqa, mana yuyasunchu ni imapaj valesqanchejta. Imaraykuchus reparasun, chaywan Diospa llajtanpi yanapakuyta atisqanchejta. Chantapis waj hermanos imatapis noqanchejmanta aswan sumajta ruwajtinku, mana paykunamanta envidiakusunchu. Congregacionpi imapi yanapakuspapis, tukuyninchej kallpachakunanchej tiyan Diosta aswan sumajta sirvinapaj. Kallpachakunallataj tiyan sumaj yachachejkuna kanapaj. w20.08 págs. 23, 24 párrs. 16-18

Hermano Rutherfordqa, 1935 watapi uj jatun tantakuypi kay discursota qorqa: “May ashkha runas”. Chaytaj karqa Estados Unidos, Washington llajtapi. Hermano Rutherfordqa, Apocalipsis 7:9 versiculota sutʼincharqa, nerqataj pikunachus ‘may chhika runas’ kasqankuta. Unayqa paykunata ‘may ashkha runas’ nej kanku (Dios Parlapawanchej). Chay tiempo hermanosqa, chay ‘may ashkha runas’ cieloman rinankuta yuyaj kanku. Jinapis piensarqanku, chay cristianosqa mana Diosta tukuy imapichu kasukusqankuta. Chayraykutaj nej kanku ajllasqa cristianoswan mana kikinchu kasqankuta. Hermano Rutherfordqa, Bibliawan sutʼincharqa: “‘May chhika runasmanta’ kajkunaqa, mana cielomanchu renqanku. Paykunaqa Cristoj waj ovejasnin kanku, ‘manchay ñakʼariymantataj’ kausashaj llojsenqanku. Chaymantataj kay jallpʼapi wiñaypaj kausakonqanku”, nispa (Apo. 7:14). Jesús nerqa: “Waj ovejas tiyapullawantaj, chaykunataj mana kay kanchamantachu kanku, chaykunatapis pusamunallaytaj tiyan, chay ovejasneyqa parlasqayta uyarenqanku, tukuyninkutaj uj tropalla kanqanku, uj michejniyojllataj kanqanku”, nispa (Juan 10:16). Chay ‘waj ovejasqa’, Jehová Diosta tukuy sonqo sirvej cristianos kanku, kay jallpʼapitaj wiñaypaj kausakuyta suyakushanku (Mat. 25:31-33, 46). w21.01 pág. 14 párrs. 1, 2

Cristianosqa mana munayninchejwan atipachikunachu tiyan. Ajinamanta Dios qowasqanchej llankʼayta tukunakama ruwasun (Mat. 28:19, 20). Pantaj runas kasqanchejrayku, mana atikoj imasta ruwayta qhellakunchej. Chay imastataj mana munaspapis ruwanapuni tiyan. Chayrayku ruwanasninchejta juntʼanapajqa, ama munayninchejwan atipachikunachu. Jehová Diostaj chayta ruwanapaj atiyninwan yanapawasun (Gál. 5:22, 23). Apóstol Pabloqa ruwanasninta juntʼajpuni. Jinapis chayta ruwananpajqa mayta kallpachakoj. Pay nerqa: “Cuerpoyta ni imarayku munayninta ruwajta saqenichu”, nispa (1 Cor. 9:25-27). Pabloqa munallarqataj cristianos ruwanasninkuta juntʼanankutapuni. Chayrayku paykunaman nerqa: “Tukuy imata allinta ruwaychej, maychus kananta jinataj”, nispa (1 Cor. 14:40). Noqanchejpis Jehová Diosta yupaychaypi ruwanasninchejta juntʼananchejpuni tiyan. Chay ruwanasninchejmanta ujtaj, Diosmanta runasman willamuy kashan (Hech. 2:46). w20.09 págs. 6, 7 párrs. 15-17

Ashkha lugarespi gobiernosqa predicajta saqellawanchej. Ajina lugarpi tiyakunchej chay, ¿kallpachakushanchejchu tukuy atisqanchejta predicanapaj? Tukukuy tiempopi kausasqanchejrayku, Diospa llajtanmanta kajkunaqa, ni jaykʼaj jina mundontinpi willashanchej, yachachishanchejtaj. Chay sumaj llankʼaypi yanapakuyta atisqanchejmanta, mayta kusikunchej. Lugarninchejmanta autoridades predicajta saqellawanchej chayqa, ama tiempota usuchinachu (2 Tim. 4:2). Kay tapuykunapi piensarina: “¿Astawan predicayta chayri precursor kayta atisunmanchu? Mana atinchejchu chayrí, ¿familianchejmanta pillapis chayta ruwayta atinmanchu?”. Kunanqa mana qolqeta chayri tukuy imayoj kayta maskʼana tiempochu kashan. Imajtinchus manchay ñakʼariy tiempo chayamojtenqa, chay imasqa qhasi manakaj kanqa (Pro. 11:4; Mat. 6:31-33; 1 Juan 2:15-17). Ashkha hermanosqa, astawan runasman Diosmanta yachachinankupaj waj parlayta yachakunku. Diospa llajtanqa 1.000 kuraj parlaykunapi publicacionesta, videosta, waj yanapastawan orqhoshan. w20.09 pág. 16 párrs. 9-11

Uj sumaj soldadoqa, mana tropanta wasanchanchu. Chantapis pitachus munakun, chayri imatachus valorniyojpaj qhawan chayta, tukuy kallpanwan jarkʼan. Apóstol Pabloqa Timoteota nerqa, Diosta tukuy sonqo yupaychananta. Chaywanqa nisharqa Jehová Diosta munakunanta, nitaj jaykʼajpis wasanchananta (1 Tim. 4:7). Noqanchejpis Jehová Diosta tukuy sonqo yupaychasun chayqa, ni jaykʼaj paymanta karunchakusunchu (1 Tim. 4:8-10; 6:6). Uj soldadoqa niraj guerraman rishaspa, maqanakuyman amañakun chayri yachaykukun. Timoteoqa Pabloj yuyaychasqanta kasukusqanrayku, Cristoj sumaj soldadon karqa. ¿Imatá Pablo payman yuyaycharqa? Pabloqa Timoteoman nerqa sajra munayninta atipananta, allin cristiano kananpaj kallpachakunanta, hermanoswan masichakunantataj (2 Tim. 2:22). Timoteoqa chaykunata ruwayman yachaykukunan karqa. Noqanchejpis sajra munayninchejta atipayta munanchej chayqa, allin kajta ruwayman yachaykukunanchej tiyan (Rom. 7:21-25). Sapa día aswan sumaj cristianos kanapajpis, chayllatataj ruwananchej tiyan (Efe. 4:22, 24). Allin kajta ruwayman yachaykukuspaqa, diantinta trabajasqanchejrayku saykʼusqa kaspapis, mana reunionesman faltakusunchu (Heb. 10:24, 25). w20.09 pág. 28 párrs. 9-11

Uj runata bautismoman chayachinapajqa, pacienciayoj kana tiyan. Jinapis reparananchej tiyan, estudionchej Jehová Diosta sirviyta munasqantachus manachus. Chaypajtaj qhawarinanchej tiyan, Jesuspa kamachisqanta kasukushanchus manachus chayta. Ichapis estudionchejqa, Bibliata estudiay gustasqanraykulla estudiashan. Estudionchej ñauparishasqantachus manachus reparana. ¿Imaynatá chayta ruwasunman? Kay tapuykunapi piensarina: Estudionchej, ¿Jehová Diosta munakusqanmanta parlanchu? ¿Paymanta mañakunchu? (Sal. 116:1, 2). ¿Bibliata leerinchu? (Sal. 119:97). ¿Reunionesman jamushanchu? (Sal. 22:22). Kausayninpi imatapis cambianan kajtin, ¿cambiashanchu? Bibliapi yachakusqanta, ¿familiaresninman, rejsisqasninmanpis willarishanchu? (Sal. 9:1). ¿Jehovaj testigon kayta munanchu? (Sal. 40:8). Estudionchej mana chay imasta ruwashanchu chayqa, imachus jarkʼashasqanta kʼachallamanta tapurina. Willariwajtinchejtaj yanaparina. w20.10 pág. 18 párrs. 14, 15

Jehová Dios, José, Mariapis, allin imastapuni ruwarqanku. Jinapis Jesusqa, wiñasqanman jina paypuni allin imasta ruwayta ajllanan karqa (Gál. 6:5). Payqa imatachus ruwananta noqanchej jinallataj ajllayta aterqa. Jesusqa munaynillanta ruwayta ajllayta atinman karqa. Jinapis payqa, Diospa munayninta ruwayta ajllarqa. Jesusqa imatachus Jehová Dios payman kamachisqanta yachaytawan, kasukorqapacha (Juan 6:38). Payqa ashkha runas chejnikunankuta yacharqa. Chaytaj ichá llakicherqa. Jinapis Jehová Diosta kasukuyta ajllarqa. Chayrayku 29 watapi bautizakusqanmantapacha, Diospa munayninta ruwayta ñaupajman churarqa (Heb. 10:5-7). Jesusqa wañuy patapiña kashajtinpis, Jehová Diosta kasukullarqapuni (Juan 19:30). w20.10 pág. 29 párr. 12; pág. 30 párr. 15

Ichá mayqen hermanonchej chayri mayqen hermananchejpis, onqosqa kasqanrayku chayri waj llakiykunarayku sufrishan. Chayrí waj hermanonchej, pinillanpis wañupusqanrayku llakisqa kashan. Ajina hermanosta rejsinchej chayqa, Jehová Diosmanta yanapata mañakuna. Payqa yanapawasunman chay hermanosta imitallawanpis yanaparinapaj, chayri imitallatapis nispa sonqocharinapaj. Ichapis hermanosninchejqa chaysitutapuni necesitashanku (1 Ped. 4:10). Jehová Dios noqanchejwan kasqanrayku, ñaupajllamanpuni rinchej. Payqa Jesusnejta, angelesnejta ima yanapawanchej. Munayninman jina kajtintaj, autoridadniyoj runasnejtapis yanapallawanchejtaj. Chantapis Jehová Diosqa, hermanosninchejwan yanapachiwanchej. Chaytataj ashkhas kausayninchejpi rikunchej. Arí, Jehovaqa yanaparinawanchejpaj hermanosninchejpa sonqonkuta atiyninwan kuyurichin. Chayrayku Pablo jina tukuy sonqo nisunman: “Jehová Diosmin yanapawajneyqa, mana manchachikusajchu. ¿Imanawanqataj runari?”, nispa (Heb. 13:6). w20.11 pág. 17 párrs. 19, 20

Apostolesqa sutʼita yacharqanku, Jehová Dios paykunawan kashasqanta. Imaraykuchus paykunaqa, milagrosta ruwanapaj atiyta japʼerqanku (Hech. 5:12-16; 6:8). Noqanchejqa mana milagrosta ruwayta atinchejchu. Jinapis Jehová Diosqa, Palabranpi niwanchej cheqan runas kasqanchejrayku sufrejtinchej, payta kusichisqanchejta, atiynintataj qonawanchejta (1 Ped. 3:14; 4:14). Chayrayku ama llakikunachu, aswan qhepaman qhatiykachasqa kajtinchej imatachus ruwananchejmanta. Astawanpis tukuy atisqanchejta kallpachakuna, Jehová Dios yanapanawanchejpi, salvanawanchejpi ima astawan atienekunapaj. Jesuspa kay nisqanta yuyarikuna: “Noqamin yachayta qosqaykichej, yanapasqaykichejtaj yachanaykichejpaj imatachus ninaykichejta. Qankunaman churanakojkunataj ujchaykukuspapis, ni imata kutichikuyta atenqankuchu”. Chantapis Jesusqa nillawanchejtaj: “Sinchʼita sayasqaykichejrayku salvakunkichej”, nispa (Luc. 21:12-19). Jehová Diosqa wañupunankukama payta sirvej kamachisninmanta, mana qonqakunchu. Payqa imaynachus kasqankuta allinta yuyarikun, paykunatataj kausarichimonqa. w21.01 pág. 4 párr. 12

Mana apóstol Pablollachu wañusqas kausarimunankumanta parlarqa. Jobqa Pablomanta aswan ñaupajtaña chaymanta parlarqa. Payqa Jehová Dios mana paymanta qonqakunanta yacharqa. Chayrayku mana iskayrayaspa nerqa, Dios wañuymanta kausarichimunanta (Job 14:7-10, 12-15). Tukuy cristianos ‘qallariy yachachiykunapi’ creenchej. Chay yachachiykunamanta ujtaj, “wañusqas kausarimunanku” kashan (Heb. 6:1, 2). Apóstol Pabloqa, 1 Corintios 15 capitulopi wañusqas kausarimunankumanta parlarqa. Chay qhelqasqantaj, ñaupa tiempomanta cristianosta maytachá kallpacharqa. Unaytaña chayri kunallanraj wañusqas kausarimunankupi creenchej chaypis, 1 Corintios 15 capituloqa mayta kallpachawasun. Jesús kausarimusqanqa, wañupoj familiaresninchej kausarimunankuta creenapaj yanapawanchej. Apóstol Pabloqa, Corintomanta kajkunaman “sumaj willaykunata” willarqa. Chay willaykunamanta ujtaj, Jesús wañuymanta kausarimusqan karqa (1 Cor. 15:1, 2). Chayrayku Corintomanta cristianosman nerqa: “Cristochus mana kausarichisqa karqa chayqa, creesqaykichejqa qhasi manakajlla”, nispa (1 Cor. 15:17). w20.12 pág. 2 párrs. 2-4

¿Imataj apóstol Pedrota llakiyninwan mana atipachikunanpaj yanaparqa? Payqa yuyarikorqa imatachus Jesús payman nisqanta. Jesusqa Pedroman nerqa: “Qanpaj sinchʼita Diosmanta mañapuyki ama creesqayki pisiyananpaj”, nispa. Jehová Diostaj Jesuspa mañakusqanta uyarerqa. Chantapis Jesusqa kausarimuytawan Pedroman rikhurerqa. Chaypitaj maytachá payta kallpacharqa (Luc. 22:32; 24:33, 34; 1 Cor. 15:5). Aswan qhepaman, Jesuspa apostolesnenqa tutantinta pescaspa, ni uj pescadota japʼerqankuchu. Chaypitaj Jesús paykunaman rikhurerqa. Jesusqa Pedrota tapurerqa munakusqantachus manachus. Chantá Pedrota perdonasqanrayku, payman astawan llankʼayta qorqa (Juan 21:15-17). Apóstol Pedrota Jesús imaynatachus yanapasqanqa, rikuchiwanchej Jesús Tatan jina khuyakuyniyoj kasqanta. Chayrayku pantaspaqa, ama yuyanachu Jehová ni jaykʼaj perdonanawanchejta. Satanasqa chaytapuni yuyananchejta munan. Astawanpis piensarina, Jehová Dios mayta munakuwasqanchejpi. Payqa yachan pantaj runas kasqanchejta, perdonaytataj munawanchej. Wajkuna sonqonchejta nanachiwajtinchejtaj, noqanchejpis Jehová Dios jina ruwana (Sal. 103:13, 14). w20.12 págs. 20, 21 párrs. 17-19

Jehová Diospi mana atienekuspa, imatapis ruwarparillarqanku chay runasmanta yachakoyqa, mana paykuna jina ruwanapaj yanapawasun. Rey Asaqa problemasniyoj kaspa, qallariypi Jehová Diospi atienekorqa. Jinapis chaymantaqa niña Jehovawan yanapachikorqachu. Astawanpis problemasninta payllamantaña allinchayta munarqa (2 Cró. 16:1-3, 12). Runaj piensayninman jina, Asaqa siriosmanta yanapata mañakuspa allillanta ruwasharqa. Jinapis chay ruwasqanqa, mana allinchu karqa. Jehová Diosqa ujnin profetanwan payman willacherqa: “Siriaj reynimpa soldadosnin makiykimanta lluspʼinku, imaraykuchus Siriaj reynimpi atienekorqanki Señorniyki Tata Diospi atienekunaykimantaqa”, nispa (2 Cró. 16:7). ¿Imatá chaymanta yachakusunman? Ima problema kapuwajtinchejpis, imatachus Jehová Dios nisqanta Bibliapi qhawarina, amataj yuyasqanchejman jinallachu allinchayta maskʼana. Uj problemanchejta rato allinchana kajtinpis, Jehová Diosmanta yanapata mañakuna. Paytaj imatapis allintapuni ruwanapaj yanapawasun. w21.01 pág. 6 párrs. 13-15

Kay tiempopi wakin hermanosninchejqa, mana qolqesituyoj kasqankurayku, chʼajwas chayri guerras kasqanrayku, mikhunamanta pisisqa kashanku. Wakintaj Diosta sirvisqankurayku carcelpi wisqʼasqa kashanku. Jinapis paykunaqa, may chhika runasmanta kasqankurayku kusisqas kashanku. Imaraykuchus yachanku, kay sajra mundo chinkachisqa kasqantawan, may chhika mikhunayoj kanankuta, Diospa yachachiyninpis ashkha kananta. Jehová Dios Satanaspa sajra mundonta chinkachishajtin, mana “ima qʼoñipis paykunata ruphanqachu”. Imaraykuchus paykunaqa, Diospa kʼajaj phiñakuyninmanta salvakonqanku. Manchay ñakʼariy pasaytataj, Jesusqa wiñay “kausay yaku” juturisman paykunata pusanqa (Apo. 7:17). May chhika runasqa, manchay sumaj bendiciontapuni japʼenqanku. Kay jallpʼapi tukuynin kausaj runasmanta, ichá paykunalla wañuyta ni jaykʼaj rejsenqankuchu (Juan 11:26). Waj ovejasmanta kajkunaqa, maytapuni Jehová Diosman, Jesusmanwan agradecekunku sumaj suyakuyniyoj kasqankumanta. w21.01 pág. 17 párrs. 11, 12

Jesusqa yacharqa, yachachisqasnin ashkha llakiykunasniyoj kanankuta. Wañuchinanku karqa chay diaj ñaupaj chʼisintaj, chaypi piensasharqa. Chayrayku Diosmanta mañakorqa: ‘Tatáy, mañakuyki yachachisqasniyta Kuraj Supaymanta jarkʼanaykita’, nispa. Chayta ruwarqa paykunata munakusqanrayku (Juan 17:14, 15). Jesusqa yacharqa cieloman ripojtin, Satanasqa Diosta sirviyta munajkunawan maqanakunallantapuni. Chayrayku Jehovamanta mañakorqa paykunata yanapananta. Kay tiempopeqa Jehová jarkʼanawanchejta astawan necesitanchej. Satanasqa cielomanta wijchʼuchikamusqanrayku, “manchay phiñasqa” kashan (Apo. 12:12). Chayrayku wakin runaswan qhatiykachachiwanchej. Chaypajtaj paykunaman creechin, chayta ruwaspa “Diosta yupaychashasqankuta” (Juan 16:2). Diospi mana creej runaspis, mana paykuna jina kasqanchejrayku qhatiykachawanchej. Jinapis mana manchachikunchejchu, kay pʼunchaypaj textopi nisqanta yachasqanchejrayku. w21.03 pág. 26 párrs. 1, 3

Jehová Diosqa munakuwasqanchejrayku tukuy imata ruwan. Payqa imatachus necesitasqanchejta qowanchej. Jehová Diosqa munakuwasqanchejrayku, Wawanta noqanchejrayku wañunanpaj kachamorqa. Jesuspis mayta munakuwasqanchejrayku kausayninta qorqa (Juan 3:16; 15:13). Paykunaj munakuyninkumantaqa, mana imapis tʼaqawasunchu (Juan 13:1; Rom. 8:35). Ajinallatataj qosaqa, familianta mayta munakunan tiyan. ¿Imajtintaj chayta ruwanan tiyan? Apóstol Juan nerqa: ‘Sichus pillapis rikusqan hermanonta chayri familianta mana munakunchu chayqa, ¿imaynatataj munakunman mana rikusqan Diostari?’, nispa (1 Juan 4:11, 20). Familianta munakoj qosaqa, Jehová Dios jina, Jesús jinataj ruwananpaj kallpachakun. Chayrayku paykunata yanapan Diospa qayllallanpipuni kanankupaj, kusisqa kanankupajtaj, nitaj paykunaman imatapis faltachinchu (1 Tim. 5:8). Chantapis tataqa wawasninta yachachin, kʼamina kajtintaj kʼamin. Imata ruwanan kajtinpis, familianpi ñaupajta piensarin, Jehová Diosta jatunchananpajtaj kallpachakun. w21.02 pág. 5 párrs. 12, 13

Munakuyniyoj Tatanchej Jehovaqa, ñaupajta imaynatachus kausakusqanchejta yachan, jinallataj chay imas mayta llakichiwasqanchejtapis. Chantapis Jehovaqa, sonqonchejpi allin kajta qhawan, noqanchej chayta mana rikojtinchejpis (1 Juan 3:19, 20). Ichá Diospa chejnisqan imasta mana ruwanapaj, mayta kallpachakushanchej. Jinapis ichá pantanchejpuni, chaytaj mayta llakichiwanchej. Juchapi urmaspaqa llakikunchejpuni (2 Cor. 7:10). Jinapis ama yuyanachu niña ni imapaj valesqanchejta, Jehová Diospis niña perdonanawanchejta. Ajinata yuyayqa mana Bibliaj nisqanman jinachu. Chantapis Jehová Diosmanta karunchawasunman. Astawanpis pantasqanchejmanta Jehovawan parlarina, perdontataj mañakuna (Isa. 1:18). Pantasqanchejmanta arrepientekusun, cambianapajtaj kallpachakusun chayqa, Jehová Diosqa perdonawasunpuni. Chantapis ancianoswan parlarisunman. Paykunaqa pacienciawan yanapawasun, Jehovaman watejmanta qayllaykunapaj (Sant. 5:14, 15). w20.12 pág. 23 párrs. 5, 6

Jesusqa warmista allinpaj qhawarqa, respetarqataj. Payqa mana fariseos jinachu karqa. Fariseosqa warmista pisipaj qhawaj kanku, nitaj paykunawan runas chaupipi parlajchu kanku. Chantapis mana Diospa Palabranta paykunaman yachachejchu kanku. Jesustajrí qharismanpis warmismanpis Diosmanta yachacherqa (Luc. 10:38, 39, 42). Chantapis Diospa Gobiernonmanta willaj rispa, warmistawan pusarqa (Luc. 8:1-3). Aswan qhepamanpis, Jesusqa kausarimuytawan warmisman rikhurerqa. Paykunamantaj nerqa apostolesninman willamunankuta (Juan 20:16-18). Apóstol Pabloqa Timoteoman nerqa warmista allinpaj qhawananta. Payqa Timoteota sumaj cristiano kananpaj mayta yanaparqa. Jinapis sutʼita nerqa, Timoteota mamanwan awelitanwan Diospa Palabranta yachachisqankuta (2 Tim. 1:5; 3:14, 15). Chantapis Pabloqa romanosman cartanta qhelqashaspa, ashkha hermanasta sutisninkumanta saludarqa. Payqa mana Diospaj llankʼasqallankutachu yacharqa, manaqa chay ruwasqankuta sumajpaj qhawasqanta nerqa (Rom. 16:1-4, 6, 12; Fili. 4:3). w21.02 pág. 15 párrs. 5, 6