Junio

Estudiosninchejta tukuy sonqo munakuna. Paykunatataj hermanosninchejta jinaña qhawana. Wakenqa Jehová Diosta sirvinankupaj, mundomanta amigosninkuta saqepunanku tiyan. Jinapis ichá sapallanku rikhuriyta manchachikuspa, mana chayta ruwayta atillankuchu. Chayrayku experienciayoj hermanosqa, estudionkuta hermanosman rejsichinkupuni. Hermanostaj yachakojta Diosman astawan qayllaykunanpaj yanaparinku, problemasniyoj kajtintaj sonqocharinku. Estudionchejqa congregacionpi munasqa kasqanta, familianchejta jinataj qhawasqanchejta reparanan tiyan. Hermanosta munakunanpaj yanapasun chayqa, paykunawan amigosta ruwakonqa. Paykunataj Jehová Diosta astawan munakunanpaj yanapanqanku (Pro. 13:20). Chantapis estudionchejqa, Jehová Diospa llajtanpi sumaj amigosta tariyta atisqanta yachanqa. Mundomanta amigosnin saqerpajtinkutaj, manaña llakikonqachu (Mar. 10:29, 30; 1 Ped. 4:4). w20.10 pág. 17 párrs. 10, 11

Jehová Diospa sumaj amigosnin kayta munaspaqa, ñaupajta Jesuspa amigosninraj kananchej tiyan. ¿Imaraykutaj chayta ninchej? Ñaupaj kaj, Jesusllataj nerqa: “Tatayqa munakusunkichej noqata munakuwasqaykichejrayku”, nispa (Juan 16:27). Chantá nillarqataj: “Mana pipis Tatayman chayayta atinchu, mana noqanejtaqa”, nispa (Juan 14:6). Uj wasimanqa punkuntapuni yaykunchej. Jehová Diosqa wasi jina, Jesustaj punku jina. Chayrayku mana Jesuspa amigosnin kaspaqa, manallataj Jehová Diospa amigosnin kayta atisunmanchu. Jesusqa ujnin kikinchayninpi nerqa: “Noqaqa ovejas yaykunankupaj punku kani”, nispa (Juan 10:7). Iskay kaj, Jesusqa tukuy imapi Tatanman rijchʼakorqa. Chayrayku discipulosninman nerqa: “Noqata rikuwajqa Tataytapis rikullantaj”, nispa (Juan 14:9). Jesusta sumajta rejsispaqa, Jehová Diostapis sumajta rejsisun. Jesusmanta astawan yachakuspaqa, payta astawan munakusun. Payta astawan munakuspataj, Jehová Diostapis astawan munakusun. w20.04 pág. 21 párrs. 5, 6

Wakin hermanosqa onqosqa kasqankurayku, camapi chayri silla de ruedaspi kashanku. Wakintajrí moqosninkumanta mana sanochu kasqankurayku, mana purikuyta atinkuchu. Wakintaj niña allinta rikuyta atinkuchu. Chay hermanos, ¿correyta atinkumanchu joveneswan chayri sano kajkunawan? Arí. Ashkha hermanos machitus chayri onqosqa kaspapis, kausayman pusaj ñanta correshanku. Jinapis mana kallpankuwanchu correshanku, manaqa Jehová Dios paykunata yanapasqanrayku. Paykunaqa tantakuykunata telefonopi uyarinku. Chayrí reunionta grabasqata videopi qhawanku chayri uyarinku. Chantapis familiaresninkuman, doctoresman, enfermerasman ima predicanku. Ajinamantataj runasta Jesuspa discipulosninman tukuchishanku. Onqosqas chayri viejitosña kaspapis, wiñay kausayta japʼinapaj correyta atillasunmanpuni. Jehová Diosqa creeyniyoj kasqanchejrayku munakuwanchej, yachantaj imastachus paypaj ruwasqanchejta. Onqosqa chayri viejitoña kaspaqa, Jehová Diospa yanapayninta astawan necesitanchej. Paytaj mana saqerpawasunchu, astawantaj qayllaykamuwasun (Sal. 9:10). w20.04 pág. 29 párrs. 16, 17

Uj runa Diospi creesqanta niwajtinchej, ¿imamantataj paywan parlarisunman? Imapichus paywan kikinta yuyasqanchejpi piensarina. Ichapis chay runaqa, Dios ujlla kasqanta yuyan. Chayrí Jesús Salvadorninchej kasqanta nin. Manachayrí sajra kausay pisi tiempomantawan chinkananta nin. Chay runaman chay imasmanta parlarisunman. Ajinata ruwasun chayqa, ichapis chay runaqa uyariwasun. Ashkha runasqa, iglesiankupi yachachikusqanmanta mana tukuy imatachu creenku. Chayrayku uj runa religionniyoj kasqanta nejtin, imatapunichus piensasqanta yachanapaj kallpachakuna. Uj misionero nin: “Wakin runasqa Trinidadpi creesqankuta ninku. Jinapis mana creenkuchu Tata Dios, Wawan, espíritu santowan uj Dioslla kasqankuta. Chayta yachaspa, yachaniña imamantachus paykunawan parlarinayta”, nispa. Chayrayku imatapunichus runas yuyasqankuta yachanapaj kallpachakuna. Ajinamanta apóstol Pablo jina, “tukuy runaspaj imaynachus kasqankuman jina” tukusun (1 Cor. 9:19-22). w20.04 pág. 10 párrs. 9, 10

Profeta Danielwan apóstol Juanwan willarqanku, Jehová Diostawan Jesustawan sirvejkuna, manchay ñakʼariy tiempomanta kausashaj llojsinankuta. Chayta yachayqa mayta kallpachawanchej. Daniel nerqa: “Libropi sutisninku qhelqasqa kajkunalla salvasqa kanqanku”, nispa. ¿Imatá ruwasunman sutinchej chay libropi qhelqasqa kananpaj? Jesuspi creesqanchejta ruwasqanchejwan rikuchinanchej tiyan. Paymin “Diospa Corderonqa” (Juan 1:29). Chantapis Jehová Diosman kausayninchejta jaywapuspa, bautizakunanchej tiyan (1 Ped. 3:21). Diospa Gobiernon kamachinanta munasqanchejtataj rikuchinanchej tiyan. Chaytataj runasman Jehová Diosmanta yachachispa ruwasunman. Tumpamantawan Diospa Gobiernonqa, wichaynejmanta reyta uraynejmanta reytawan chinkachenqa. Chayrayku tukuy atisqanchejta ruwana Jehová Diospi, llajtanpiwan astawan atienekunapaj. Chantapis Gobiernonta kausayninchejpi ñaupajman churana. Chay imasta ruwasun chayqa, chay iskay reyes chinkachisqa kashajtinku salvakusunchej. w20.05 pág. 16 párrs. 18, 19

Adanwan Evawanqa, yacharqanku Diospa sutin Jehová kasqanta, imayna Dioschus kasqantapis. Yachallarqankutaj Diosqa tukuy imata ruwasqanta. Jehovaqa paykunaman kausayta qorqa, uj kʼachitu huertamantaj churaykorqa. Chantapis Adanmanqa uj sumaj warmita qorqa, Evamanpis uj sumaj qosata qorqa (Gén. 1:26-28; 2:18). Jinapis, ¿piensarqankuchu imastachus Jehová paykunaman qosqanpi? ¿Payta astawanchu munakorqanku, agradecekorqankuchu? Chayta yachanapaj, Diospa enemigon paykunata pruebaman churajtin imatachus ruwasqankuta qhawarina. Satanasqa Evata katarinejta taporqa: “Huertapi kaj tukuynin sachʼaspa poqoyninta ama mikhunkichejchu, nispachu Diosqa nisunkichej?”, nispa (Gén. 2:16, 17; 3:1). Satanasqa chayta nerqa, Jehovata sajrapaj qhawachiyta munaspa. Jinapis Diosqa, mana chaytachu nerqa. Astawanpis nerqa, tukuynin sachʼasmanta mikhunankuta. Uj sachʼaj poqoynillanta mana mikhunankuchu karqa (Gén. 2:9). Satanasta uyarispa Evaqa ichapis piensarqa: “¿Imaraykupunitaj Dios mana munanchu chay sachʼaj poqoyninta mikhunaytari?”, nispa. w20.06 pág. 3 párrs. 8, 9

Wakenqa uj hermano sonqonkuta nanachisqanrayku Jehovamanta karunchakapunku. Apóstol Pablo nerqa, wakin kutis ‘wajkuna contranchejpi imatapis ruwanankutapuni’. Ichapis uj hermanoqa, qhasimanta imatapis niwasun chayri ruwawasun. Payta mana perdonaspaqa phiñasqallapuni kasunman. Chay phiñakuyta sonqonchejmanta mana wijchʼojtinchejtaj, congregacionmanta karunchakusunman. Sudamericamanta hermano Pablota qhasimanta tumparqanku. Ancianostaj chayta creespa, congregacionpi ruwanasninta qhechorqanku. ¿Imatá hermano Pablo ruwarqa? Pay nin: “Maytapuni phiñakorqani. Chantá pisimanta pisi congregacionmanta karunchakaporqani”, nispa. Wakin hermanostaqa, jatun juchapi urmasqankurayku sonqonku juchachallanpuni. Yuyankutaj Jehová manaña paykunata munakusqanta. Chay hermanosqa ichapis juchankumanta pesachikunkuña, Diostaj paykunata perdonanña. Jinapis paykunaqa, manaña Diospa llajtanpi kanankupaj jinachu kasqankuta yuyanku. Paykunamanta, ¿llakikunchejchu? w20.06 pág. 19 párrs. 6, 7

Noqanchejqa imaschus Jehovamanta karunchawasunman, chaypi piensarinanchej tiyan. Chayta reparaytawantaj, chay imasta mana ruwanapaj kallpachakunanchej tiyan (Heb. 5:14 ). Chayrayku imawanchus kusirikunata sumajta ajllana tiyan. Telepi programas, peliculaspis, millay imaswan juntʼa kayta yachanku. Chay millay imasta qhawasunman chayqa, Jehová Diosmanta pisimanta pisi karunchakusunman. Chayrayku mana chay imasta qhawanchejchu. Chantapis Jehová Diosqa chay millay imasta chejnikun. Millay kausayniyoj runastaj llakiyllaman chayanku, wajkunatapis llakichinku (Efe. 5:5, 6). Diospa llajtanta wasanchajkunata uyareyqa, pantachiwasunman. Diosta wasanchajkunaqa, iskaychachinawanchejrayku hermanosninchejmanta, Diospa llajtanmantapis llullasta parlanku (1 Tim. 4:1, 7; 2 Tim. 2:16). Chay parlasqankuta creesunman chayqa, creeyninchej pisiyanman. Chayrayku amapuni chay runasta creenachu. Paykunaqa ‘chʼichi yuyayniyoj kanku, cheqa kajtataj mana entiendenkuchu’. Chantapis churanakuykunata, chʼajwasta ima jatarichiyta munaspalla parlanku (1 Tim. 6:4, 5). Chay runasqa hermanosninchejpi manaña atienekunanchejpaj, llulla cuentosninkuta creechiyta munawanchej. w20.09 pág. 29 párrs. 13, 15

Qhariwarmi kajkunaqa munanakunanku, respetanakunankutaj tiyan (Efe. 5:33). Biblia nin: “Aswan kusiy wajman qoriy, qorichikunamanta nisqaqa”, nispa (Hech. 20:35). Casarasqas kʼumuykukoj sonqo kajtinkoqa, munanakunku, respetanakunkutaj. Ashkha qhariwarmisqa, kʼumuykukoj sonqo kaspa aswan kusisqa kausakunku. Steven sutiyoj qosa nin: “Qhariwarmis uj runa jinalla kajtinkoqa, imatapis khuska ruwanku. Problemas kajtinpis iskayninku allinchanku. Ni mayqenninku ninkuchu: ‘Kaysina noqapaj sumaj kanman’, nispa. Astawanpis ninku: ‘Kaysina noqanchejpaj sumaj kanman’ nispa”. Paypa señoranqa Stephanie sutikun. Paytaj qosan jinallataj nin: “Ni pipis enemigonwan kausayta munanmanchu. Chayrayku ima problemayoj kaspapis, mana tumpanakuykuchu. Astawanpis problemaykuta allinchayku. Chaypajtaj imaynapichus chay problema rikhurisqanpi piensariyku. Diosmanta mañakuyku, Bibliaj nisqantapis leeriyku. Chantá imatachus ruwanaykumanta parlariyku”, nispa. Qosapis warmipis kʼumuykukoj sonqo kanku chayqa, aswan kusisqas kausakunku. w20.07 págs. 3, 4 párrs. 5, 6

Jehová Diosta sirvinapajqa, mana kallpanchejpichu, nitaj imatachus ruwayta yachasqanchejpichu atienekunanchej tiyan. Apóstol Pablotaqa Gamaliel sutiyoj runa yachacherqa. Chay runataj judiospa religionninku ukhupi may jatunpaj qhawasqa karqa. Apóstol Pabloqa chay tukuy imasrayku jatunchakunman karqa, paypa yachasqallanpitaj atienekunman karqa (Hech. 5:34; 22:3). Chantapis Pabloqa, judíos ukhupi manchay sumajpaj qhawasqa karqa (Hech. 26:4). Jinapis Pabloqa, mana may kasqanta yuyakorqachu. Kay mundopi jatunpaj qhawasqa kayta atispapis, chay imasta saqeporqa (Fili. 3:8). Pabloqa cristiano kasqanrayku, ashkha llakiykunapi rikukorqa. Judío masisnenqa payta chejnikorqanku (Hech. 23:12-14). Romamanta llajta masisninpis seqʼoykucherqanku, carcelmantaj wisqʼaykucherqanku (Hech. 16:19-24, 37). Chantapis Pabloqa pantaj runa kasqanrayku, allin kajta ruwananpaj mayta kallpachakunan kasqanta yacharqa (Rom. 7:21-25). Jinapis payqa Jesusta qhatillarqapuni, runas chejnikojtinkupis, pantasqanrayku llakikojtinpis. Pabloqa ‘pisi kallpayoj kasqanmanta kusikorqa’. Imaraykuchus pisi kallpayoj kajtin, Diosqa atiyninwan yanapaj (2 Cor. 4:7; 12:10). w20.07 pág. 16 párrs. 7, 8

Kay tiempopeqa Diospa Gobiernonmanta willayta, ni jaykʼaj jina ñaupajman churananchej tiyan. Jesús nerqa, sumaj willaykunaqa wañupusqanmanta qhepamanpis willakunallantapuni, astawan ashkha lugarespitaj. Jesustaj kausarimuytawan, uj milagronejta paykunata ashkha pescadosta japʼicherqa. Yachachisqasninmantaj nerqa, runa japʼej pescadores kanankoqa, imamanta nisqapis aswan sumaj kasqanta (Juan 21:15-17). Chantá cieloman ripunanpajña kashajtin, Jesusqa yachachisqasninman nerqa qallarisqan llankʼay jallpʼantinpi ruwakunanta (Hech. 1:6-8). Aswan qhepamantaj, apóstol Juanman mosqoypi jina rikucherqa imaschus “Señorpa pʼunchayninpi” kananta. Juanqa chaypacha uj angelta rikorqa. Chay angeltaj “wiñay wiñaypaj sumaj willaykunata” willasharqa “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” (Apo. 1:10; 14:6). Chaytaj rikuchiwanchej predicanallanchejpuni kasqanta. Arí, Jehová Diosqa “kaykamalla” ninawanchejkama willananchejta munan. w20.09 pág. 9 párr. 5

Abrahanpa familianpeqa, wakin problemas karqa. Ujqa karqa, munasqa warmin Sara, mana wawayoj kayta atisqan. Chaytaj ashkha watasta paykunata mayta llakicherqa. Chayrayku Saraqa, kamachin Agarta Abrahanman jaywaykorqa. Ajinamanta paynejta wawasniyoj kanankupaj. Jinapis Agarqa onqoj rikhurisqantawan, Sarata pisipaj qhawayta qallarerqa. Chayrayku Saraqa Agarta ñakʼaricherqa, Agartaj ayqekorqa (Gén. 16:1-6). Aswan qhepaman Saraqa onqoj rikhurerqa. Abrahantaj chay wawankuman Isaac sutita churarqa. Abrahanqa Agarpi wawan Ismaelta, wawan Isaactapis mayta munakorqa. Jinapis Isaac jatitunña kashajtin, Ismaelqa paymanta alqochakorqa. Chayrayku Abrahanqa, Ismaelta, Agarta ima wajnejman kachaporqa (Gén. 21:9-14). Chay qhepata, Jehová Diosqa Abrahanman nerqa wawan Isaacta qʼolachipunanta (Gén. 22:1, 2; Heb. 11:17-19). Chay iskaynin kutispi, Abrahanqa wawasninta Jehová Dios yanapananpi creenan karqa. w20.08 pág. 4 párrs. 9, 10

Kausarimojkunaqa ñaupa kausayninkuta saqespa, Jehová Diospa munayninman jina kausakunanku kanqa. Chayta ruwajkunaqa, maytachá kusikonqanku. Imaraykuchus Diosta kasukojkunaqa, “wiñay kausayta” japʼenqanku. Diosta mana kasukuyta munajkunarí, chinkachisqa kanqanku. Ajinamanta paraisopi allin kausay kanallanpajpuni (Isa. 65:20; Juan 5:28, 29). Diospa Gobiernon kay jallpʼata kamachimushajtin, payta kasukojkunaqa Proverbios 10:22 nisqanta juntʼakojta rikonqanku. Chaypi nin: “Tata Diospa bendicionnenqa qhapajyachin, nitaj ima llakiytapis chay bendición apamunchu”, nispa. Diospa atiyninwan yanapachikuspa, diamanta día astawan Cristoman rijchʼakusun, pisimanta pisitaj mana juchayoj runasman tukusun (Juan 13:15-17; Efe. 4:23). Chantapis sapa día aswan sumaj runas kasun, cuerponchejpis sapa día aswan sano kanqa. ¡May kusiypuni kanqa! (Job 33:25). w20.08 pág. 17 párrs. 11, 12

Imaraykuchus soltero hermanosninchej sapallanku kashasqankupi piensarina. Wakenqa munasqankurayku solteroslla kakushanku. Wakintajrí casarakuyta munaspapis, mana paykunapaj jina warmita chayri qosata tarinkuchu. Wakintajrí viudos chayri viudas kasqankurayku, sapallanku kashanku. Imayna kajtinpis, mana allinchu kanman solterosta ninanchej: “¿Maykʼaj casaranki?”, nispa. Nillataj allinchu kanman ninanchej: “Kay hermanita chayri jaqay hermanito qanpaj jinapuni. Noqa presentaykiman”, nispa. Mana imata niwajtinchejqa, mana pitapis kʼaskachinachu tiyan. Chayta ruwasunman chayqa, chay hermanitosta pʼenqachisunman chayri sonqonkuta nanachisunman (1 Tim. 5:13). Soltero hermanosninchejtaqa, mana khuyaypaj qhawasqanchejraykuchu munakunanchej tiyan, manaqa kʼachas kasqankurayku. Paykunaqa chayta ruwajtinchej kusikunku. Chayrayku solterosta khuyaypaj qhawanamantaqa, Jehová Diosta tukuy sonqo sirvisqankuta jatunpaj qhawana. Mana chayta ruwajtinchejqa, paykunaman kaytapis nishasunman jina kanqa: “Mana qanllawan kasaj” (1 Cor. 12:21). Jinapis paykunata munakusun, respetasuntaj chayqa, Diospa llajtanpi kashasqankumanta kusikonqanku. w20.08 pág. 29 párrs. 10, 14

Tukuymanta qhepata, Jesusqa Pabloman rikhurerqa (1 Cor. 15:8). Pabloqa niraj cristiano kashaspa, uj kuti Damasco llajtaman risharqa. Chaypitaj ujllata cielomanta uj kʼanchay muyuyninpi lliphipirerqa, Jesuspa parlasqantataj uyarerqa. Chaypacha Saulo sutikorqa (Hech. 9:3-5). Pablo Jesuspa parlasqanta uyarisqanqa, sutʼita rikuchin Jesuspa kausarimusqan mana cuentollachu kasqanta (Hech. 26:12-15). Pablo Jesusta rikusqanta nisqanqa, wakinta astawanchá kausarimuypi creenankupaj yanaparqa. Imajtinchus Jesusta rikorqa chaypachaqa, cristianosta qhatiykachasharqa. Pabloqa Jesús kausarimusqanmanta mana iskayrayasqanrayku, tukuy atisqanta runasman willamorqa. Ajinamanta paykunapis Jesús kausarimusqanpi creenankupaj. Pabloqa Jesús kausarimusqanta willananrayku, carcelpi wisqʼachikorqa, maqachikorqa, barcospi risqasninpipis casi wañorqa (1 Cor. 15:9-11; 2 Cor. 11:23-27). Payqa Jesús kausarimusqanmanta, ni tumpitallatapis iskayrayarqachu. Chayrayku kausaynin wañuy patapi kajtinpis, Jesús kausarimusqanta willallarqapuni. Chay tukuy imasta yachayqa, Jesús kausarimusqantapuni creenapaj yanapawanchej. Chantapis wañusqas kausarimunankupi creenapaj kallpachawanchej. w20.12 pág. 3 párrs. 8-10

Kay tapuypi piensarina: “¿Reunionesman mana faltakuspachu rishanchej?”. Reunionesqa Jehová Diosta sirvinallapajpuni kallpachawanchej. Chantapis chaypeqa hermanosninchejwan kallpachanakunchej (Mat. 11:28). Kay tapuykunapiwan piensarina: “¿Bibliata estudiayman yachasqachu kanchej? Familianchejwan tiyakunchej chay, ¿sapa semanachu Bibliata estudianapaj tantakunchej? Sapallanchej tiyakunchej chayrí, ¿Bibliata sapa semana estudianapaj tiempochakunchejchu? ¿Tukuy atisqanchejtachu predicashanchej, runasmanpis yachachishanchejchu?”. Chay tapuykunapeqa piensarinanchejpuni tiyan. Imajtinchus Bibliaqa nin, Jehová Dios sonqonchejta, yuyayninchejtapis qhawaykusqanta. Chayrayku noqanchejpis kikinta ruwananchej tiyan (1 Cró. 29:17). Chayta ruwashaspaqa, ichapis yuyayninchejta chayri imastachus ruwayta munasqanchejta cambiananchej kasqanta reparasun. Jina kajtin, Jehová Diospa yanapanta mañakuna. Jamoj pruebaspajqa kunan wakichikunanchej tiyan. w20.09 pág. 19 párrs. 19, 20

Jesusqa discipulosnin kayta munajkuna imatachus ruwanankuta nerqa. Chaypajqa wasita ruwakuyta munaj runamanta, guerraman yaykuyta munaj reymantawan parlarqa. Jesusqa wasita ruwakuyta munaj runamanta nerqa: “Ñaupajtaqa tiyaykukuspa qolqentaraj qhawarikun, wasinta tukuchananpaj kapunchus manachus, chayta”, nispa. Guerraman yaykuyta munaj reymantataj nerqa: ‘Ñaupajtaqa tiyaykukuspa yuyaychachikunraj, soldadosninwan atipayta atenqachus manachus chayta’, nispa (Luc. 14:27-32). ¿Imatataj Jesús chaywan yachachiyta munarqa? Discipulonman tukuyta munajqa, imatachus ruwanan kasqanpi piensarinan kasqanta. Chayrayku estudiosninchejta sapa semana estudianankuta nina. Estudionchejta sapa yachachej rinapaj, sumajta wakichikuna. Paypi piensarina, tapurikunataj: “¿Imaynatá kay yachachiyta estudioyman entiendechiyman? ¿Imatá niyman yachakusqanman jina ruwananpaj?”, nispa (Neh. 8:8; Pro. 15:28 qallariynin). w20.10 pág. 7 párr. 5; pág. 8 párr. 7

Jesusqa niwanchej, imastachus kamachisqanta runasman yachachimunanchejta. Chay kamachiytaj sutʼi. Jinapis kayta mana qonqananchejchu tiyan. Jesusqa nerqa: “Yachachimuychej [...] paykunapis kasukunankupaj”, nispa. Chaywanqa nisharqa, kamachiykunasninta runasman yachachispapis, kasukuytawan yachachinanchej kasqanta. ¿Imaynatá chayta ruwasunman? Estudiosninchejmanqa mana ninallanchejchu tiyan: “Kayta ruwanayki tiyan”, nispa. Manaqa yachachinallanchejtaj tiyan, imaynatachus chayta ruwanankutapis (Hech. 8:31). Uj runaman Bibliamanta yachachishaspaqa, Diospa kamachiykunasninta payman yachachinchej. Jinapis, ¿chayllatachu ruwananchej tiyan? Mana. Payman yachachinallanchejtaj tiyan, imaynatachus chay kamachiykunaman jina kausakunanta (Juan 14:15; 1 Juan 2:3). ¿Imaynatá chayta ruwasunman? Estudionchejman yachachisunman, colegiopi, trabajopi chayri kusirikushaspa, imaynatachus Bibliaj nisqanta kasukuyta. Chantapis paywan kashaspaqa, Jehovamanta mañakusunman atiyninwan yanaparinanpaj (Juan 16:13). w20.11 págs. 2, 3 párrs. 3-5

Jesuspa discipulosnenqa, waj problemasniyoj karqanku. Diospa Palabranmanta qhelqasqasqa, wakillanpata kaporqa. Manataj kay tiempopi jinachu, Diospa Palabranta entiendenapaj yanapas kaj. Chantapis Jesuspa discipulosnenqa, tukuy laya parlaykunapi willamunanku karqa. Jina kajtinpis, sumaj willaykunaqa 30 wataspi jinalla “tukuynejpi willasqa karqa”. Chaytaj runaj qhawayninman jinaqa, ni jaykʼaj atikunmanchu karqa (Col. 1:6, 23). Kay tiempopi, Jehová Diosqa llajtanta ñaupajman pusashallanpuni, kallpachashantaj. Payqa Biblianejta chayta ruwashan. Bibliaqa willawanchej, Jesusqa Diospa Gobiernonmanta runasman willasqanta. Discipulosnintaj chayta ruwanallankupuni karqa. Bibliaqa Jesús chayta kamachisqanta nin (Mat. 28:19, 20). Jehová Diosqa tukuy runasta munakun. Chayrayku nerqa, sumaj willaykunaqa “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” willakunanta (Apo. 14:6, 7). Jehovaqa tukuy runas Gobiernonmanta yachanankuta munan. w20.10 pág. 21 párrs. 6-8

Rey Davidqa ‘Diospa kamachisqasninta’ kasukuytapuni munaj (Sal. 1:1-3). Payqa yacharqa, Jehová Diosqa ‘llampʼu sonqoyojkunata salvasqanta, umata oqharejkunatataj kʼumuykachachisqanta’. Chayrayku Davidqa, Diospa kamachiykunasninman jina yuyayninta cheqancharqa. Pay nerqa: “Diosta yupaychasaj, pay yuyaychawasqanrayku. Sonqoy ukhupi chʼisisnin pay kʼamiwan”, nispa (Sal. 16:7). Kʼumuykukoj sonqo kasun chayqa, sajra yuyaykuna jamuwajtinchej chay rato Diospa Palabranwan yanapachikusun. Ajinamanta niraj pantashaspa, chay sajra yuyayninchejta cambiasun. Jehovaqa Palabrannejta kaytapis nishawasunman jina kanqa: “Kaymin cheqan ñanqa; chayninta riychej”, nispa. Diospa Palabranqa yanapawasun, kausayman pusaj ñanmanta nitaj pañaman, nitaj lloqʼeman llojsinapaj (Isa. 30:21). Diosta kasukoyqa, tukuy imapi yanapawanchej (Isa. 48:17). Payta kasukuspaqa, mana piwanpis pʼenqayta kʼamichikusunchu. Chantapis munasqa wawasninta jina qhawawasqanchejrayku, payman astawan kʼaskakusun (Heb. 12:7). w20.11 pág. 20 párrs. 6, 7

Corinto llajtamanta wakin cristianosqa, wañusqas kausarimunankumanta iskayrayarqanku (1 Cor. 15:12). Wakin cristianostaj, kausarimuymanta ichá uj jinata yuyarqanku. Paykunaqa ichá yuyarqanku, juchasapa kashaspa “wañusqa” jina kashasqankuta, cristianoman tukuspataj “kausarimusqankuta”. Imayna kajtinpis, kausarimuypi mana creespaqa, pantasharqanku. Jesusta Dios mana kausarichimorqachu chayqa, chay cristianosqa juchasninkupiraj kasharqanku. Chayrayku kausarimuy mana kasqanta nejkunaqa, ni ima suyakuyniyoj karqanku (1 Cor. 15:13-19; Heb. 9:12, 14). Apóstol Pabloqa sutʼita yacharqa “Cristoqa wañusqasmanta kausarichisqapuni” kasqanta. Jesuspa kausarimuynenqa, aswan sumaj karqa paymanta ñaupajta kausarimojkunamanta nisqaqa. Imajtinchus Jesusmanta ñaupajta kausarimojkunaqa, tiempowan wañupullarqankutaj. Pabloqa Jesusmanta nerqa: “Wañusqasmanta ñaupajta kausarimorqa, ñaupaj poqoy jina”, nispa. ¿Imajtintaj Pablo chayta nerqa? Imajtinchus Jesusqa tukuy runasmanta ñaupajta cielopaj cuerpoyoj kausarimorqa, tukuymanta ñaupajtataj cieloman rerqa (1 Cor. 15:20; Hech. 26:23; 1 Ped. 3:18, 22). w20.12 pág. 5 párrs. 11, 12

Ñaupa tiempopi, Jerusalenmanta apostoleswan ancianoswanqa, Diospa llajtanpi allin kausay kananpaj ujchasqas llankʼarqanku (Hech. 2:42). Imaynatachus paykuna 49 watapi uj problemata allinchasqankuta qhawarina. Chay watapi cristianosqa, circuncisionmanta chʼajwasharqanku. Chay problema kallanmanpuni karqa chayqa, congregacionpi tʼaqanakus kanman karqa, niñataj predicankumanchu karqa. Chayrayku apostoleswan ancianoswanqa, Diospa atiyninwan yanapachikuspa chay problemata qhawaykurerqanku. Judíos kajtinkupis, mana costumbresninkuman jinachu chay problemata allincharqanku, nitaj chay costumbresta yachachejkuna nisqankuman jinachu. Astawanpis Diospa Palabranta qhawaykurerqanku, paypa atiyninwantaj yanapachikorqanku (Hech. 15:1, 2, 5-20, 28). Ajinata ruwasqankurayku, Jehová Diosqa paykunata bendicerqa. Chayrayku Diospa llajtanpi kajkunaqa, ujchasqallapuni karqanku, predicallarqankupunitaj (Hech. 15:30, 31; 16:5). Kay tiempopi Diospa llajtanpi kajkunaqa, noqanchejpura allinta kausakunapaj kallpachakunchej, jinallataj imatapis maychus kajman jina ruwanapaj. w20.10 págs. 22, 23 párrs. 11, 12

Machitusña kasqanchejrayku, onqosqa kasqanchejrayku, chayri waj imasrayku, ichá mana Diospa llajtanpi wakin imasta ruwayta atinchejchu. Ajina kajtin, rey Davidmanta mayta yachakusunman. Davidqa Diospa templonta mayta ruwayta munarqa. Jehová Diostajrí mana paychu templota ruwananta nerqa, manaqa wajta ajllarqa ruwananpaj. Jina kajtinpis, Davidqa tukuy atisqanta yanaparqa pitachus Jehová ajllasqanta. Chantapis payqa ashkha qoriwan, qolqewan ima yanapakorqa. Davidmantaqa maytapuni yachakusunman (2 Sam. 7:12, 13; 1 Cró. 29:3-5). Franciamanta hermano Hugoqa, sinchʼi onqosqa kasqanrayku manaña anciano jina yanapakuyta aterqachu. Wasinpipis manaña ruwanasninta ruwayta aterqachu. Pay nin: “Qallariypeqa ni imapaj valesqayta yuyarqani, maytataj llakikorqani. Jinapis tiemponmanqa, entienderqani imastachus manaña ruwayta atisqaymanta mana llakikunaychu kasqanta. Astawanpis imastachus Jehovapaj ruwayta atisqaymanta kusikorqani. Jehová Diostaqa sirvillasajpuni. Gedeonwan kinsa pachaj runasninwanqa, saykʼusqa kaspapis maqanakullarqankupuni. Ajinallatataj noqapis ruwasaj”, nispa (Jue. 8:4). w20.12 pág. 25 párrs. 14, 15

Juanqa qhelqasqan evangeliopi, “munakuy” palabrata ashkha kutistapuni oqharerqa. Ni kinsantin evangeliosta tantaykuspapis, “munakuy” palabrata chay chhika kutista tarisunmanchu. Chay qhelqasqasnenqa, tukuy imata munakuywan ruwananchej kasqanta yachachiwanchej (1 Juan 4:10, 11). Jinapis Juanqa ashkha wataspi munakuyniyoj kayta yachakorqa. Juanqa jovenllaraj kashaspa, mana munakuyniyoj kayta atillarqachu. Uj kutipi Jesuswan yachachisqasninwanqa, Jerusalenman rishaspa Samarianta pasarqanku. Samariaj ujnin ranchitomanta runastaj, mana paykunata alojayta munarqankuchu. Juanqa Jesusman nerqa: “Señor, ¿munawajchu cielomanta ninata mañakunaykuta uraykamuspa paykunata qʼolarparinanpaj?”, nispa (Luc. 9:52-56). Waj kutipitaj Juanqa hermanon Santiagowan khuska, mamankuwan Jesusman nicherqanku: “Niy ari kay iskay wawasniy Gobiernoykipi tiyaykukunankuta, ujnin pañaykipi, ujnintaj lloqʼeykipi”, nispa. Chay ujnin apostolesqa, chayta yachaspa mayta phiñakorqanku (Mat. 20:20, 21, 24). Juan ajinata pantajtinpis, Jesusqa payta munakullarqapuni (Juan 21:7). w21.01 págs. 8, 9 párrs. 3, 4

Jehová Diosqa wajkunaj allinninkupi piensaspa imatapis ruwan. Payqa kausayta rikhuricherqa mana paypa allinninraykuchu, manaqa noqanchej kausayniyoj kaspa kusisqa kananchejpaj. Chantapis Jehovaqa Wawanta juchasninchejrayku wañunanpaj kachamorqa, chayta ruwananpajtaj ni pi obligarqachu. Jesuspis wajkunaj allinninkupi piensaspa ashkha imasta ruwarqa. Payqa samarinan kashajtinpis, runasman yachachinanpaj tiempochakorqa (Mar. 6:31-34). Uj sumaj qosaqa, familianpaj imatapis sumajtapuni ruwanan kasqanta yachan. Chayta ruwananpajtaj kallpachakun. Chayrayku familianpaj imatapis ajllanan kajtenqa, Jehovawan yanapachikun (Pro. 2:6, 7). Chantapis familianta tapurin, sumajtataj tʼukurin. Chaymantaraj imatapis ruwan. Ajinamanta qosaqa, familianpa allinninta maskʼan, manataj paypa allinnillantachu (Fili. 2:4). Sichus qosas Jehová jina, Jesús jinataj ruwanankupaj kallpachakonqanku chayqa, familiankumanta sumaj umas kanqanku. w21.02 pág. 7 párrs. 19-21

Rey Asaqa, joven kashaspa kʼumuykukoj sonqo, waputaj karqa. Payqa tatan Abías wañupusqantawan, Judapi rey jina kamachiyta qallarerqa. Kamachiyta qallarisqantawantaj, llulla yupaychayta chinkacherqa. Chantapis Asaqa, tukuy “Judá aylluta ñawpa tatasninkoj Señorninku Tata Diosman chimpanankuta kamacherqa, jinataj leyesninta, kamachisqasnintapis juntʼanankuta” (2 Cró. 14:1-7). Chantá Etiopiamanta Zera uj millón soldadoswan maqanakoj jamojtin, Asaqa Jehovamanta yanapata mañakorqa. Pay nerqa: “Tata Dios, kallpayoj kajtapis, pisi kallpayoj kajtapis yanapayta atinki. Chayrayku yanapariwayku Señorniyku Tata Dios, qampi suyakusqaykurayku”, nispa. Chay palabrasqa, Jehovapi mayta atienekusqanta rikuchiwanchej. Asaqa sutʼita yacharqa, Jehovaqa payta, llajtantapis salvayta atisqanta. Jehová Diostaj “Asata, Judatawan yanaparqa etiopespa contrankuta maqanakupi atipanankupaj” (2 Cró. 14:8-12). Uj millón soldadoswan maqanakoyqa, manchachikunapaj jinapuni karqa. Rey Asataj, Jehovapi atienekusqanrayku chay maqanakupi atiparqa. w21.03 pág. 5 párrs. 12, 13

Bibliaqa willawanchej, wakin runas sumaj amigos jina munanakusqankuta. Jonatanmantawan Davidmantawan parlarina. Bibliaqa paykunamanta nin: “Jonatanqa Davidpa may sumaj kawsaqen ruwakorqa. Chayrayku Davidta pay kikinta jinapuni munakorqa”, nispa (1 Sam. 18:1). Jehová Diosqa Davidta ajllarqa, Saulpa cuentanmanta rey kananpaj. Saultaj Davidpaj mayta phiñakorqa, wañuchiytataj munarqa. Saulpa wawan Jonatantajrí, mana tatan jinachu karqa. Payqa mana Davidta wañuchiypi yanapakuyta munarqachu. Jonatanwan Davidwanqa, tratota ruwarqanku sumaj amigosllapuni kanankupaj, purajmantataj yanapanakunankupaj (1 Sam. 20:42). Jonatanwan Davidwanqa, ashkha imas jarkʼajtinpis sumaj amigos karqanku. ¿Imastaj paykunata jarkʼanman karqa? Jonatanqa Davidmanta 30 wataswan jina kurajnin karqa. Ichapis Jonatanqa Davidmanta ninman karqa: “¿Kay lloqallitutachu amigoypaj qhawakuyman? Wawallarajqa, niraj imatapis yachanchu”, nispa. Jinapis Jonatanqa mana chaytachu nerqa, nitaj Davidta pisipaj qhawarqachu. w21.01 págs. 21, 22 párrs. 6, 7

Jesusqa nerqa yachachisqasnin cheqamantapuni kusisqas kanankuta. Jinapis llakiykunapi rikukunankuta nillarqataj (Mat. 10:22, 23; Luc. 6:20-23). Noqanchejqa Jesuspa yachachisqasnin kasqanchejrayku kusisqas kanchej. Jinapis familianchej churanakuwajtinchej, chayri gobiernos qhatiykachawajtinchej, mana kusisqa kayta atillanchejchu. Nillataj kusisqa kayta atinchejchu, trabajomanta chayri colegiomanta compañerosninchej sajra imasta ruwachiyta munawajtinchej. Runasqa ninku: “Imaynatataj qhatiykachasqa kaspa kusisqa kasunmanri”, nispa. Jinapis Bibliaqa, llakiykunapi kaspa kusisqa kayta atisqanchejta nin. Discípulo Santiago nerqa: “Imaymana llakiykunapi kaspa mayta kusikuychej”, nispa (Sant. 1:2, 12). Jesuspis nillarqataj, runas qhatiykachawajtinchejpis kusisqas kananchejta (Mat. 5:11). Jehová Diosqa Santiagowan uj cartata qhelqacherqa. Ajinamanta chay tiempomanta cristianos llakiykunata kusiywan aguantanankupaj. w21.02 pág. 26 párrs. 1, 2; pág. 27 párr. 5

Timoteoj tiemponmanta wakin cristianosqa, Dioswan khuska llankʼayta pisipaj qhawarqanku. Paykunamanta wakin karqanku: Demas, Figelo, Hermogenes, Himeneo, Alejandro, Fileto ima (1 Tim. 1:19, 20; 2 Tim. 1:15; 2:16-18; 4:10). Tukuy chay runasqa, creeypi uj tiempota sinchʼita sayarqanku. Jinapis Diospa qosqan valorniyoj imasta, pisipaj qhawarqanku. Satanasqa Diosmanta japʼisqanchej valorniyoj imasta, pisipaj qhawananchejta munan. ¿Imastataj chaypaj ruwan? Payqa peliculasnejta, Internetnejta, musicasnejta, waj imasnejta ima, yuyayninchejta chʼichichayta munan. Satanasqa chayta ruwan, Jehová Diosta mana kasukunanchejpaj. Chantapis runaswan qhatiykachachiwanchej, chayri juchaman tanqachiwanchej. Payqa chaywan manchachiyta munawanchej niña predicananchejpaj. Chantapis Satanasqa, Diosta wasanchajkunaj yachachiyninkuwan engañayta munawanchej. Ajinamanta Diospa llajtanmanta orqhonawanchejpaj. Mana allinta qhawarikuspaqa, Diospa Palabranpi yachakusqanchejta pisipaj qhawayta qallarisunman (1 Tim. 6:21). w20.09 pág. 27 párrs. 6-8

¿Mayqen amigonchejpis chayri familianchejpis sonqonchejta nanachiwarqanchejchu? Jina kajtin, rey Davidpa kausaynin mayta yanapawasunman. Paytaqa wawan Absalón wasancharqa, gobiernontataj qhechuyta munarqa (2 Sam. 15:5-14, 31; 18:6-14). Davidpa kausayninmanta leerishaspa, Jehovaman sutʼita willakuna wajkuna sonqonchejta nanachiwasqanchejrayku imaynachus kashasqanchejta (Sal. 6:6-8). Chantá Davidpa munasqa wawan Absalonwan, amigon Ahitofelwan contranpi oqharikojtinku, imaynachus David kashasqanpi piensarina. Paykunaqa Davidpa sonqonta mayta nanacherqanku, wañuchiytapis munarqanku. Davidqa amigosninmanta niyta atinman karqa: “Ichá paypis Absalonman kutisqa kashan”, nispa. Niñataj paykunapi atienekunmanchu karqa. Chayrí payllapi piensaspa, sapallan ayqekuyta munanman karqa. Manachayrí llakiyninwan atipachikuspa ni imanakuyta atinmanchu karqa. Jinapis chayta ruwananmantaqa, Davidqa llakiyninta aguantarqa. Astawanpis Jehová Diosmanta, amigosninmantawan yanapata mañakorqa. Chantá imatachus ruwananta yuyaychakusqanman jina ruwarqa. Davidqa Jehovapi, amigosninpipis atienekullarqapuni. w21.03 pág. 15 párrs. 7, 8; pág. 17 párrs. 10, 11