Julio

Jehová Dios mañakuyninchejta uyarinawanchejpajqa, Jesuswan amigos kananchej tiyan. Chaypajtaj mana oracionninchejta “Jesuspa sutinpi” nispallachu tukuchananchej tiyan. Jehová Dios uyarinawanchejpajqa, entiendenanchej tiyan mañakuyninchejman Jesusnejta kutichiwasqanchejta. Jesús nerqa: “Sutiypi imallatapis mañakojtiykichejqa, chayta qosqaykichej”, nispa (Juan 14:13). Jehová Diospuni mañakuyninchejta uyariwajtinchejpis, payqa Jesusman atiyninta qon imastachus ruwayta munasqanta juntʼananpaj. Chayrayku Jehová Diosqa mañakusqanchejman kutichinawanchejpaj, Jesuspa nisqanta kasukusqanchejtachus manachus qhawarin. Jesús imatachus perdonaymanta nisqanpi piensarina. Pay nerqa: “Sichus contraykichejta juchallikojkunata perdonankichej chayqa, cielopi kaj Tataykichejpis perdonallasonqachejtaj. Manachus contraykichejta juchallikojkunata perdonankichej chayqa, manallataj Tataykichejpis juchasniykichejta perdonanqachu”, nispa (Mat. 6:14, 15). Chayrayku imaynatachus Jehovawan Jesuswan khuyakuwanchej, ajinallatataj noqanchejpis wajkunata khuyakunanchej tiyan. w20.04 pág. 21 párr. 6

Apóstol Pabloqa runas imamantachus parlayta munasqankuta reparaj, chayman jinataj predicaj. Uj pacha, Listra llajtapi ashkha runasman sumaj willaykunata willasharqa. Chay runastaj Diospa Palabranmanta pisillata chayri ni imata yacharqankuchu. Chayrayku Pabloqa, mana chaymantachu paykunawan parlarqa. Payqa parlarqa chajras sumajta poqosqanmanta, kusisqa kausakunamanta ima. Pabloqa rejsisqanku imasmanta parlarqa, entiendenankupaj jinataj predicarqa. Predicanchej chaypi runas, imastachus yachayta munasqankupi piensarina, chayman jinataj paykunawan parlarina. ¿Imaynatá yachasunman uj runa imamantachus parlariyta munasqanta? Payta, wasintawan sumajta qhawarina. Ichapis chay runaqa, plantasninta qarpashan, uj librota leeshan, autonta arreglashan chayri waj imasta ruwashan. Imatachus ruwashasqanta rikuspaqa, chaymanta parlarisunman (Juan 4:7). Chantapis uj runa imayna ropayojchus kasqanta qhawarillasunmantaj. Ajinamanta yachasunman maymantachus kasqanta, imapichus trabajasqanta, chayri ima equipochus gustasqanta. w20.04 págs. 10, 11 párrs. 11, 12

Wakin hermanosqa anchata phutikusqankurayku, yuyanku runas paykuna qhawarisqalla kasqankuta. Chayrayku waj runaswan kayta manchachikunku chayri pʼenqakunku. Ajina kaspapis, tantakuykunaman, jatun tantakuykunamanpis rishallankupuni. Mana rejsisqaswan parlayta manchachikuspapis, predicacionman llojsillankupuni. Noqanchejpis ajina kanchej chayqa, ama yuyanachu sapallanchej kashasqanchejta. Ashkha hermanosninchejpis ajinallataj kanku. Kayta yuyarikuna: Jehová Diosqa mayta kusikun paypaj tukuy sonqo llankʼasqanchejta rikuspa. Paypajqa tukuy atisqanchejta ruwashallanchejpuni. Chaytataj ruwashanchej Jehová Dios bendeciwasqanchejrayku, kallpatataj qowasqanchejrayku (Fili. 4:6, 7). Jehová Diosqa mayta kusikun, mana sano kaspapis payta sirvisqanchejmanta. Wiñay kausayman pusaj ñanta correjkunamanta wakintajrí, onqosqas chayri machitusña kanchej. Jinapis correshallanchejpuni (2 Cor. 4:16). Jehová Diospa yanapayninwanqa, tukuyninchej tukukuykama correllasunpuni. w20.04 pág. 31 párrs. 20, 21

Jehová Diosqa kay jallpʼata may sumajtapuni ruwarqa. Chaypi piensarispa, may yachayniyoj kasqanta reparanchej (Heb. 3:4). Ni mayqen planetapis, jallpʼanchejman rijchʼakunchu. Imaraykuchus jallpʼallanchej kausay kananpaj jina ruwasqa kashan. Kay jallpʼanchejqa uj wasi jina. Jinapis uj wasipi tiyakoj runasqa, mana samanankupaj aireta rikhurichiyta atinkumanchu. Chantapis mikhunatawan yakutawan mana jawamanta apaykamunkuman chayqa, nichá unaytachu kausankuman. Qʼopankutapis mana wijchʼunkuman chayqa, wasinkuman qʼopa juntʼaykunman. Jallpʼanchejpirí may chhika runas tiyakojtinkupis, aireqa mana tukukunchu, mikhunapis, yakupis kallanpuni. Qʼopata jallpʼamanta mana wijchʼojtinkupis, kay jallpʼanchejqa kausanapaj jinallapuni, may kʼachitutaj. ¿Imaraykutaj jallpʼanchej ajina? Imaraykuchus Jehová Diosninchejqa, jallpʼapi imaschus kasqanta ruwarqa sapankumanta llimphuchakunankupaj jina. w20.05 pág. 20 párrs. 3, 4

Satanasqa chayta nispa, Dios llulla kasqanta nisharqa. Payqa sutʼimanta Diospaj sajrata parlaporqa. Ajinamantataj Kuraj Supayman tukorqa. Chay sutitaj niyta munan, “llullakuspa tumpaj”. Evaqa Satanaswan engañachikorqa. Payqa Jehová Diosta creenanmanta, Satanasta creerqa (1 Tim. 2:14). Chayraykutaj Jehová Diosta mana kasorqachu, mana mikhunanchu karqa chay sachʼaj poqoynintataj mikhuykorqa. Chantá Adanmanpis jaywarqa (Gén. 3:6). Eva imatachus Satanasman kutichiyta atisqanpi piensarina. Payqa katariman ajinata niyta atinman karqa: “Qantaqa mana rejsillaykipischu. Tatay Jehovatarí allinta rejsini, maytataj munakuni. Payqa mana llullakuwanmanchu. Tatayqa tukuy imata qowayku. Ama ajina llullasta paymanta parlaychu. ¡Chinkay kaymanta!”, nispa. Eva ajinata Satanasman ninman karqa chayqa, Jehová Diosqa maytachá kusikunman karqa. Evaqa chayta nispa, Jehová Diosta tukuy sonqo munakusqanta rikuchinman karqa (Pro. 27:11). Jinapis Evaqa mana tukuy sonqochu Jehová Diosta munakorqa. Adanpis kikillantaj karqa. Chayrayku Satanás Jehovamanta llullasta parlajtin, paykunaqa mana Tatankuman kutikorqankuchu. w20.06 pág. 4 párrs. 10, 11

Hermanasninchejqa Jehová Diospa llajtanpi ashkhata llankʼanku. Wakenqa Diosta yupaychanapaj wasista ruwaysikunku chayri allinchaysikunku. Wakintaj waj parlaypi kaj congregacionpi yanapakunku. Wakin hermanastajrí Betel wasipi wakin diasta yanapakunku. Wakintaj jatun llakiypi tarikoj hermanosta yanaparinku, manachayrí publicacionesta waj parlayman tijrachispa yanapakunku. Wakenqa precursoras kanku, wakintaj misioneras kanku. Casada hermanastajrí, qosasninkuta Diospaj llankʼanankupaj yanapanku. Ajinata yanapasqankurayku, qosasninkoqa Diospa llajtanpi ruwanasninkuta sumajta juntʼanku, ‘sumaj regalos jinataj’ kanku (Efe. 4:8). Sumaj yuyayniyoj ancianosqa, yachanku hermanasqa imapipis sumajta yanapakusqankuta. Paykunaqa yachallankutaj, sumajta predicajkuna ukhupeqa ashkha hermanas kasqankuta. Sinchʼi creeyniyoj hermanasqa, joven hermanasta ashkhata yanapayta atinkuman. Ancianostaj chayta sumajta yachanku (Tito 2:3-5). Rikunchej jina, hermanasqa Diospa llajtanpi sumajta llankʼanku. Chayrayku paykunata munakuna, agradecekunataj. w20.09 pág. 23 párrs. 13, 14

Ashkha hermanosqa, Jehová Diosta tukuy sonqo uj tiempota sirverqanku. Jinapis paymanta karunchakapunku. Jehová Diosqa mana paykunamanta qonqakunchu, nillataj paypaj llankʼasqankumantapis (Heb. 6:10). Profeta Isaiasqa Jehová Diosta uj sumaj michejwan kikincharqa, nerqataj chay michej jina llajtanta qhawasqanta. Pay nerqa: “Uj michej jina ovejasninta michenqa; corderosta makisninwan marqʼarikonqa”, nispa (Isa. 40:11). Sumaj Michejninchej Jehovaqa, mayqen ovejitallanpis paymanta karunchakojtin, mayta llakikun. Chaytataj Jesuspa ujnin kikinchaynin rikuchiwanchej. Jesusqa yachachisqasninman nerqa: “¿Ima niwajchejtaj qankuna? Uj runa 100 ovejasniyoj kashajtin, sichus uj ovejan chinkanman chayqa, ¿manachu 99 ovejasninta orqopi saqespa, chinkasqa ovejanta maskʼamunman? Cheqatapuni niykichej, chinkasqa ovejanta tarikapuspaqa, chay ovejanmanta astawan kusikun, 99 mana chinkajkunamanta nisqaqa”, nispa (Mat. 18:12, 13). w20.06 págs. 19, 20 párrs. 8, 9

Jehová Diosta imaynallamantapis sirvispa, mayta kusikunchej (Sal. 27:4; 84:10). Uj hermano Diospa llajtanpi astawan ruwanasta japʼiyta munasqanqa may sumaj. Jinapis Diospa llajtanpi astawan ruwanasta japʼej hermanoqa, mana wajkunamanta aswan sumaj kasqanta piensananchu tiyan (Luc. 17:7-10). Astawanpis wajkunata tukuy sonqo yanapayta munanan tiyan (2 Cor. 12:15). Bibliaqa wakin jatunchakoj runasmanta parlan, mana paykuna jina kananchejpaj. Chay runasmanta ujqa Diótrefes karqa. Payqa ‘hermanos ukhupi ñaupajpipuni kayta munaj’ (3 Juan 9). Wajtaj Uzías karqa. Payqa mayta runaykachaspa Diosman inciensota qʼoshñichiyta munarqa. Chay llankʼaytaqa, sacerdoteslla ruwananku karqa (2 Cró. 26:16-21). Absalonpis may kasqanta yuyakullarqataj. Payqa rey kayta munaspa, israelitaspa sonqonkuta suwarqa (2 Sam. 15:2-6). ¿Imatá chay runasmanta yachakunchej? Jehová Diosqa may kasqankuta yuyakojkunata mana allinpajchu qhawasqanta (Pro. 25:27). Runaykachajkuna, jatunchakojkuna, alabachikuyta munajkunapis, mana allinmanchu chayanku (Pro. 16:18). w20.07 pág. 4 párrs. 7, 8

Wakin familiasqa, suyunkupi problemas kasqanrayku chayri trabajota tarinankurayku, waj suyuman ripunku. Chay suyupitaj, runasqa ichá waj parlayta parlanku. Chay familiaspa wawasninkutaj, ichá chay parlaypi escuelaman rinku. Tataspis trabajota tarinankupaj, ichá chay parlayta yachakunallankutaj kanqa. Paykunaqa Diosta yupaychayta mana saqenankuchu kasqanta yachanku. Chay suyupitaj, ichá parlayninkupi uj congregación tiyan. Jina kajtin, ¿chay congregacionmanchu renqanku? Chayrí, ¿chay suyupi parlakoj congregacionmanchu renqanku? Chaytaqa paykuna ajllananku kanqa. Sapa tata, familianta mayqen congregacionmanchus pusananta ajllanan tiyan. Chaypajtaj tataqa familianpaj imachus aswan allin kasqanta qhawarinan tiyan. Chayrayku sapa tatamanta kashan familian mayqen congregacionmanchus rinanqa. Familianta congregacionninchejman pusamuyta ajllajtenqa, mana payta qhawaranachu tiyan, familiantataj tukuy sonqo japʼikuna tiyan (Rom. 15:7). w20.08 pág. 30 párrs. 17, 18

Jehová Dios atiyninta qonawanchejpajqa, mana yuyanachu tiyan kallpayoj chayri escuelayoj kananchej kasqanta. Nillataj yuyanachu tiyan, sumaj llajtamantapuni chayri qhapajpuni kananchej kasqanta. Jehová Diosta sirvinapajqa, mana chay imastachu necesitanchej. Diospa llajtanpeqa, ‘runaj qhawayninman jina mana ashkhachu yachayniyojkuna kanchej, mana ashkhachu atiyniyojkuna kanchej, nitaj ashkhachu sumaj familiapi nacekorqanchej’ (1 Cor. 1:26). Chayrayku mana kallpayoj, mana escuelayoj, mana sumaj llajtamantachu, nitaj qhapajchu kanchej chayqa, mana yuyanachu tiyan Jehová Diosta mana sirviyta atisqanchejta. Imaraykuchus Jehová Dios atiyninwan yanapawasun. ¿Imaynatá pay yanapawasunman? Runas iskaychachinawanchejpaj jina imatapis tapuwajtinchej, Jehová Diosqa imapichus creesqanchejmanta mana manchachikuspa parlanapaj yanapawasun. Chaypajtaj paymanta mañakunanchej tiyan (Efe. 6:19, 20). Mana jampiy atina onqoyniyoj kanchej chaytaj, Jehová Diosqa payta sirvinallapajpuni kallpata qowasun. Chaypajtaj paymanta mañakunallanchejtaj tiyan. Sapa kuti Jehová Dios yanapawasqanchejta reparajtinchejqa, creeyninchej astawan sinchʼiyanqa, astawan kallpayojtaj kasun. w20.07 pág. 16 párr. 9

Abrahanqa Diosta sirvinanrayku, ashkha imasta saqerqa. Noqanchejpis Diospa Gobiernonta ñaupajman churayta munanchej chayqa, pay jina ruwananchej tiyan (Mar. 10:28-30; Heb. 11:8-10). Ama suyanachu kausayninchejpi llakiykuna mana kananta. Abrahanqa tukuy kausayninpi Jehová Diosta sirvispapis, llakiykunasniyoj karqa. Noqanchejpis ichá pay jinallataj llakiykunasniyoj kasun (Sant. 1:2; 1 Ped. 5:9). Noqanchejqa jamoj bendicionespi astawanraj yuyananchej tiyan. Kay tiempopeqa tukuy imata mundontinpi rikushanchej. Chaytaj sutʼita rikuchiwanchej, kay sajra mundoj tukukuynin qayllitapiña kashasqanta. Diospa Gobiernon gobernashajtenqa, ashkha bendicionesta japʼisunchej. Chaypeqa wañupoj familiaresninchejwan, amigosninchejwan ima watejmanta tinkukapusun. Chantapis Jehová Diosqa, Abrahanta creeyniyoj, pacienciayojtaj kasqanmanta premianqa. Chaytataj ruwanqa, payta familiantawan kausarichimuspa. ¿Imatá ruwasunman paykunata kausarimojta rikunapaj? Abrahán jina ruwana. Diospa Gobiernonpaj tukuy atisqanchejta llankʼana, sinchʼi creeyniyojllapuni kana, Jehová Diospitaj pacienciawan suyakuna (Miq. 7:7). w20.08 págs. 5, 6 párrs. 13, 14; pág. 7 párr. 17

Noqanchejqa yachanchej, enemigosninchej wañuchiwajtinchejpis Jehová Dios kausarichimunawanchejta. Chayrayku ni ima ruwasqankupis, Jehová Diosmanta karunchawasunchu (Rom. 8:35-39). Jehová Diosqa wañusqasta kausarichimuspa, manchay yachayniyoj kasqanta rikuchin. Satanasqa manaña wañuywan manchachiyta atiwanchejchu. Chantapis kausarimunanchejta yachayqa, astawan sinchʼita sayanapaj kallpachawanchej. Enemigosninchej wañuchinawanchejta niwajtinchej, ¿atienekusunchu Jehová Dios kausarichimunawanchejpi? Chayta yachanapaj, kay tapuykunapi piensarina: Imata ruwanallapajpis, ¿Jehová Diospipunichu atienekunchej? (Luc. 16:10). Paypa Gobiernonta ñaupajman churajtinchej, ¿ni imata faltachinawanchejta creenchejchu? (Mat. 6:31-33). Chay tapuykunaman “arí” ninchej chayqa, Jehová Diospi atienekunchej. Chaytaj ima llakiyllatapis aguantanapaj yanapawasun (Pro. 3:5, 6). w20.08 pág. 18 párrs. 15, 16

Cristianosqa Diospa Palabranta sumajta rejsinanchej tiyan. Ajinamanta chaywan sumajta yachachisun. Reunionespeqa imaynatachus Bibliawan yachachiyta yachakunchej. Noqanchejqa yachanchej, Bibliaj yachachiykunasnin runasta mayta yanapayta atisqanta. Chayta runasman entiendechinapajqa, noqanchejraj Bibliata sumajta estudiananchej tiyan. Chayrayku creeyninchejta sapa kuti Diospa Palabranwan kallpachana. Jinapis mana Bibliata leenallachu tiyan, manaqa leesqanchejpi tʼukurina tiyan. Chay versiculosta astawan entiendenapajtaj, publicacionesninchejta qhawaykurina. Ajinamanta Bibliaj nisqanta sumajta entiendesun (1 Tim. 4:13-15). Bibliata entiendespataj, wajkunamanpis yacharichiyta atisun. Jinapis mana Bibliata leepunallachu tiyan, manaqa imaynatachus Biblia paykunata yanapasqanta entiendechina tiyan. Diospa Palabranta sapa kuti estudiaspaqa, aswan sumaj yachachejkuna kasun (2 Tim. 3:16, 17). w20.09 pág. 28 párr. 12

Diospa Gobiernonmanta willayta ñaupajman churanapajqa, Jehová Dios imastachus qowasqanchejpi tʼukurina. Jehová Diosqa paypaj qayllallanpipuni kanapaj, ashkha yanapasta qowanchej. Chaykunataj kanku: imprimisqa chayri celularpi leenapaj publicaciones, grabaciones, videos, JW Broadcasting ima. Internetpi jw.org nisqapi publicacionesninchejpis, 1.000 kuraj parlaykunapiña tiyan (Mat. 24:45-47). Jesusmanta yachakuypis, predicacionta ñaupajman churanapaj yanapallawasunmantaj. Payqa ima kajtinpis cheqa kajmanta willallarqapuni (Juan 18:37). Satanasqa “jallpʼantinmanta llajtasta, qhapaj kapuyninkutawan” Jesusman rikucherqa. Runaspis Jesusta reyta jina churayta munarqanku. Jesustajrí mana chay imas pantachinanta saqerqachu (Mat. 4:8, 9; Juan 6:15). Payqa mana qhapaj kayta munarqachu, nitaj runas churanakojtinku manchachikorqachu (Luc. 9:58; Juan 8:59). Chayrayku apóstol Pablo imatachus kay pʼunchaypaj textopi nisqanta ruwasun chayqa, creeyninchej pruebaman churasqa kajtinpis, Diosmanta willayta ñaupajman churallasunpuni. w20.09 pág. 10 párrs. 6, 7

Hermanasninchejqa Diospa llajtanpi sumajta yanapakunku. Paykunaqa predicanku, reunionespi comentanku, wajkunamantataj llakikunku. Wakin hermanastaj, Tantakuna Wasista llimphuchaspa chayri allinchaspa yanapakunku. Chayrayku hermanasninchejta mayta munakunchej. Jinapis paykunaqa llakiykunasniyoj kanku. Wakenqa machuyasqa tatankuta chayri mamankuta cuidanku. Wakin hermanastaj familiasninku churanakusqankuta aguantanku. Wakintajrí wawasninkuta sapallanku uywanku. Chayraykutaj mayta trabajanku. Kay mundomanta runasqa, warmista mana anchata respetankuchu. Chayrayku hermanasninchejta respetachinanchej tiyan. Chantapis Bibliapuni niwanchej hermanasninchejta yanaparinata. Apóstol Pabloqa Romapi kaj congregacionman nerqa: ‘Febe sutiyoj hermananchejta tukuy sonqo japʼikuychej. Imamanta pisichikojtinpis yanapariychej’, nispa (Rom. 16:1, 2). Pabloqa niraj cristiano kashaspa warmista pisipaj qhawaj. Jinapis cristianoman tukuspaqa, Jesús jina kananpaj kallpachakorqa. Chayrayku warmista khuyakorqa, respetarqataj. w20.09 pág. 20 párrs. 1, 2

Estudionchej predicayta munananpaj tapurisunman: “Bibliaj nisqasninta kasukuy, ¿yanapasunkichu aswan sumajta kausakunaykipaj? Wajkunatarí, ¿yanapanmanchu? ¿Imaynapí Bibliaj nisqanta paykuna yachankuman?”, nispa (Pro. 3:27; Mat. 9:37, 38). Jesusqa kamachiwarqanchej: “Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa. Aswan kuraj kamachiykunataj kashan: Jehová Diosta munakuy, runa masinchejta munakuy ima. Chay iskay kamachiykunaqa, predicanapaj, runasman Bibliamanta yachachinapaj ima yanapawanchej (Mat. 22:37-39). Imaraykuchus Diosta, runa masinchejtawan munakusqanchejrayku predicanchej. Jinapis estudiosninchejqa, ichá predicacionman riyta manchachikonqanku. Jina kajtin, paykunaman nina Jehová Dios paykunata yanapananta. Paypa yanapayninwanqa, niña runasta manchachikonqankuchu (Sal. 18:1-3; Pro. 29:25). w20.11 pág. 3 párrs. 6-8

Estudionchejman yachachej rinapaj wakichikushaspaqa, paypaj Jehová Diosmanta mañapuna. Payman willarina imaspichus estudionchej yanapata necesitasqanta. Jehová Diosmanta mañakunallataj, Bibliawan estudionchejpa sonqonman chayanapaj. Noqanchejqa estudionchejta bautizakunanpaj yanapayta munanchej. Payqa Jehová Dioswan parlarinan tiyan, uyarinantaj tiyan. ¿Imaynatá Jehová Diosta uyarinman? Bibliata sapa día leespa (Jos. 1:8; Sal. 1:1-3). Chantapis Jehová Dioswan parlarikunan tiyan. Chaytataj paymanta sapa día mañakuspa ruwanman. ¿Imaynatá estudionchejta mañakuyta yachachisunman? Bibliamanta yachachinapaj, yachachiyta tukuytawanpis, sonqomantapacha Jehová Diosmanta mañakuna. Mañakushaspataj paymantawan parlarina. Ajinata mañakojtinchej, estudionchejpis sonqomantapacha orakuyta yachakonqa. Chantapis mañakuyninta Jesuspa sutinpi tukuchayta yachakonqa (Mat. 6:9; Juan 15:16). Estudionchej Bibliata sapa día leenqa, Diosmantataj sapa día mañakonqa chayqa, Jehovaman astawan qayllaykonqa (Sant. 4:8). w20.10 pág. 8 párr. 8; pág. 9 párrs. 10, 11

Ñaupa tiempomanta Diospa llajtanqa, sumaj organizasqa karqa. Cristianostaj paykunapura allinta kausakorqanku. Kay tiempomanta Diospa llajtanpis kikillantaj (Hech. 16:4, 5). Imaynatachus Torremanta Qhawaj revistata estudiasqanchejpi piensarina. Mundontinmanta tukuynin congregacionespi, kikin yachaqanata estudianchej, tapuykunawan kutichiykunawantaj ukhunchanchej. Chayrayku may lugarman rispapis, imatachus estudiananchejta yachanchej, wasinchejpi jinataj kanchej. Diospa atiynin yanapawasqanchejraykulla ajina ujchasqas kanchej (Sof. 3:9). Sapa uj, kay tapuykunapi piensarina: “¿Yanapakunichu congregación ujchasqa kananpaj? ¿Kallpachakunichu tukuywan allinta kausakunaypaj? Congregacionta ñaupajman apajkunata, ¿kasukunichu? ¿Atienekunapaj jinachu kani? Congregacionpi ruwanasniyta, ¿juntʼanipunichu? ¿Tiemponpipunichu imatapis ruwani? ¿Tempranopunichu maymanpis chayani? Yanapakuna kajtin, ¿chay ratochu yanapakuni?” (Sant. 3:17). Mayqen tapuyllamanpis “mana” ninchej chayqa, Jehovaj atiyninta mañakuna. Chay atiywan yanapachikuspaqa, aswan sumaj cristianos kasun. Hermanosninchejpis astawan munakuwasun, sumajpajtaj qhawawasun. w20.10 pág. 23 párrs. 12, 13

Diospa Palabranqa espejo jina (Sant. 1:23-25). Casi tukuy runas, niraj wasimanta llojsishaspa espejopi qhawarikunchejpuni. Imanchej mana allinchu kajtintaj, niraj pipis rikushawajtinchej allincharqokunchej. Ajinallatataj Bibliata leespa ruwananchej tiyan. Bibliata sapa leespa, imapichus cambiananchej kasqanta piensarinanchej tiyan. Wakenqa sapa diapaj ajllasqa textota, tutamanta leerinku. Chantá chay leesqankupi tʼukurinku. Chaymantataj chay leesqankuman jina diantinta ruwanankupaj kallpachakunku. Tukuyninchej Bibliata sapa día estudianapaj, yachakusqanchejpi tʼukurinapaj ima kallpachakunanchej tiyan. Ichá mana chay imasta ruwanapunichu kasqanta piensasunman. Jinapis chaytaqa ruwananchejpuni tiyan. Imajtinchus chay yanapawasun, kausayman pusaj kʼullku ñanta rinallapajpuni. Diospa Palabranqa, radiografiasta orqhoj máquina jina, imaschus sonqonchejpi kasqanta rikuchiwanchej. Jinapis Bibliaj nisqanwan, Diospa llajtanta ñaupajman apaj hermanoswan ima yanapachikunapajqa, llampʼu sonqos kananchej tiyan. w20.11 pág. 18 párr. 3; pág. 20 párr. 8

Ñaupa cristianosqa, mana tukuy tiempochu qhatiykachasqa karqanku. ¿Imatataj ruwarqanku mana qhatiykachasqa kashaspa? Tukuy atisqankuta sumaj willaykunata willarqanku. Hechos libroqa paykunamanta nin: “Paykunaqa kausakusharqanku Jehová Diosta manchachikuspa”, nispa. Chay cheqa sonqo cristianosqa, mana qhatiykachasqa kashaspa tukuy sonqo predicarqanku. Chayraykutaj “astawan yapakushallarqankupuni”. Chaytaj sutʼita rikuchiwanchej, Jehová Dios paykunata bendecisqanta (Hech. 9:26-31). Chay tiempomanta cristianosqa, tukuy atisqankuta sumaj willaykunata willarqanku. Apóstol Pablopis Éfeso llajtapi kashaspa, mayraj chaypi predicana kasqanta repararqa. Chayrayku chaypi predicananpaj uj tiempotawan qhepakorqa (1 Cor. 16:8, 9). Ñaupa cristianosqa, “Jehová Diospa palabranmanta sumaj willaykunata” tukuy atisqankuta willarqanku (Hech. 15:30-35). Ajinata predicasqankurayku, kay pʼunchaypaj texto nisqanman jina karqa. w20.09 pág. 16 párrs. 6-8

Adán juchallisqanrayku mana payllachu wañorqa, manaqa tukuynin wawasnintawan wañuyman vendeykuwarqanchej. Chayrayku kunanpis wañushallanchejpuni. Jinapis Diospa Wawan wañuymanta kausarimusqanrayku, wañusqasqa kausarimuyta atenqanku. Chayrayku apóstol Pablo nerqa: “Wañuymanta kausarimuypis uj runanejllatataj kanqa”, nispa. Chantá nillarqataj: “Imaynatachus Adannejta tukuy wañushanku, ajinallatataj Cristonejta tukuy kausarichisqa kanqanku”, nispa (1 Cor. 15:22). ¿Imatataj Pablo niyta munasharqa, “Adannejta tukuy wañushanku”, nispa? Payqa tukuy runasmanta parlasharqa. Tukuyninchej Adanpa wawasnin kasqanchejrayku, juchasapas, pantaj runastaj kanchej. Chayraykutaj tukuy wañunchej (Rom. 5:12). Adanqa mana wañuymanta kausarimonqachu. ¿Imajtintaj Jesuspa wañuynin mana payta yanapanchu? Imajtinchus payqa mana juchayoj kashaspa, Diosta mana kasukuyta ajllarqa. Adanqa ‘cabraswan’ ninakoj runas jina kashan. Imaynatachus Jesús paykunata juzgajtin “wiñaypaj wañonqanku”, ajinallatataj Adanpis wiñaypaj wañusqa kashan (Mat. 25:31-33, 46; Heb. 5:9). w20.12 pág. 5 párrs. 13, 14

Diospa llajtanpi ima ruwanatapis mana japʼispaqa, Diosta tukuy sonqo sirvej angelesmanta yachakuna. Uj pacha rey Achab kamachishajtin, Jehová Diosqa angelesninta tapurerqa imaynatachus Achabta chʼaukiyanankuta. Angelesqa imatachus ruwanankuta tukuy imaynamanta nerqanku. Jehová Diostaj ujnin angelpa nisqanta uyarispa, payman nerqa: “Rispa, ajinata ruwamuy”, nispa. Chantapis angelman nerqa, chay ruwasqanpi allin rinanta (1 Rey. 22:19-22). Ujnin angelesrí, ¿“qhasita imatapis nini” nispachu ninkuman karqa? Paykunaqa ni imarayku ajinata yuyarqankuchu. Angelesqa kʼumuykukoj sonqos kanku, Jehová Diosllatataj jatunchayta munanku (Jue. 13:16-18; Apo. 19:10). Noqanchejqa Jehovaj testigosnin jina rejsisqa kayta, Gobiernonmantataj willamuyta jatunpaj qhawanchej. Jinapis Diospajqa, mana llajtanpi uj llankʼayta ruwasqanchejraykuchu munasqa kanchej. Jehová Diosqa munakuwanchej, kʼumuykukoj sonqo kajtinchej chayri maykamallachus ruwayta atisqanchejta reparakojtinchej. Hermanospajpis chayraykullataj munasqa kanchej. Chayrayku Diosmanta mañakuna, kʼumuykukoj sonqo kanapaj, llampʼu sonqo kanapaj ima. Piensarina Jehová Diospa kʼumuykukoj sonqo kamachisninpi. Bibliaqa Diospa ashkha kamachisninmanta parlan. Chantapis hermanosninchejta tukuy atisqanchejta yanaparina (1 Ped. 5:5). w20.12 pág. 26 párrs. 16, 17

Salvacionmanta monteraqa, Jehová wiñay kausayta qonawanchejta suyakusqanchej. Payqa niwanchej, munayninta ruwajtinchej chay premiota qonawanchejta, wañupojtinchejtaj kausarichimunawanchejta (1 Tes. 5:8; 1 Tim. 4:10; Tito 1:1, 2). Salvacionmanta monteraqa yuyayninchejta jarkʼan. Chay monteraqa, yuyayninchejta Diospa nisqasninpi churanapaj yanapawanchej, problemasninchejmanta mana anchata llakikunapajpis. ¿Imaynatá chay monterata churakusunman? Jehová Dios jina yuyaspa. Chayrayku qolqepi atienekunamantaqa, Diospi atienekunchej (Sal. 26:2; 104:34; 1 Tim. 6:17). Diospa atiyninpa espadanqa, Biblia. Diospa Palabranqa, llulla yachachiykunata sutʼiman orqhon. Chay jinamantataj runasta yanapan, pantasqa yachachiykunamanta, millay viciosmantawan kacharichikunankupaj (2 Cor. 10:4, 5; 2 Tim. 3:16, 17; Heb. 4:12). ¿Imaynatá chay espadata sumajta apaykachasunman? Bibliata sapallanchejpi sumajta estudiaspa, Diospa llajtan yachachiwasqanchejman jina ruwaspa ima (2 Tim. 2:15). w21.03 pág. 27 párr. 4; pág. 29 párrs. 10, 11

Apóstol Juanqa Jesusmanta willasqanrayku carcelpi kaspapis, wajkunamanta llakikorqa. Payqa imatachus Dios mosqoypi jina rikuchisqanta qhelqarqa. Chay qhelqasqantataj congregacionesman apacherqa. Ajinamanta paykuna ‘imaschus tumpamantawan kanan karqa chayta’ yachanankupaj (Apo. 1:1). Juanqa ichapis Patmos churumanta kacharichisqa kasqantawan, Jesuspa kausayninmanta parlaj evangeliota qhelqarqa. Chantapis hermanosta kallpachananpaj, chaypachallatajsina sutinta apaj kinsantin cartasta qhelqarqa. Juanmanta mayta yachakusunman. Noqanchejpis imatachus kausayninchejwan ruwananchejta ajllaspa, runa masinchejta munakusqanchejta rikuchisunman. Satanaspa mundonqa noqallanchejpi yuyanapaj tanqawanchej. Payqa mayta munan qolqellata chayri may rejsisqa kayta maskʼananchejta. Jinapis cristianosqa, sumaj willaykunata willayta kausayninkupi ñaupajman churanku. Ajinamanta runasta yanapanku Jehovaman qayllaykunankupaj. w21.01 pág. 10 párrs. 9, 10

Jonatanqa Davidmanta envidiakuyta atinman karqa. Rey Saulpa wawan kasqanrayku, qhepan rey kananpaj derechonta valechiyta munanman karqa (1 Sam. 20:31). Jinapis Jonatanqa kʼumuykukoj sonqo karqa, Jehová Diostataj kasukuyta munarqa. Chayrayku David rey kananpaj ajllasqa kajtin, mana phiñakorqachu. Chantapis Jonatanqa tatan mayta phiñakojtinpis, Davidpa amigollanpuni karqa (1 Sam. 20:32-34). Jonatanqa Davidta tukuy sonqo munakorqa. Chayrayku mana Davidta enemigonta jinachu qhawarqa. Jonatanqa sumajta flechasta kachariyta yacharqa. Chantapis guerrapi maqanakunapaj wapu karqa. Runasqa paymanta, tatanmantawan nej kanku: ‘Ankasmanta aswan usqhayta phawanku. Leonesmantapis aswan kallpasniyoj kanku’, nispa (2 Sam. 1:22, 23). Jonatanqa maqanakuspi atipasqanmanta jatunchakuyta atinman karqa. Jinapis payqa mana Davidta atipayta maskʼarqachu, nitaj ruwasqasninmanta envidiakorqachu. Astawanpis Davidta jatunpaj qhawarqa. Imaraykuchus payqa maqanakupaj wapu karqa, Jehovapitaj atienekorqa. Arí, Jonatanqa manapuni envidiosochu karqa. Chayta yachanchej, David Goliatta atipajtin imatachus ruwasqanpi. Jonatanqa Davidta envidiakunanmantaqa, pay kikinta jina munakuyta qallarerqa. w21.01 pág. 21 párr. 6; pág. 22 párrs. 8, 9

Tukuy cristianosqa Jesuspa kamachiyninpi kanchej, paytaj mana pantaj runachu. Cristiana warmitajrí, casarakusqantawan qosanpa kamachiyninman churakun, qosantaj pantaj runa. Ichá chayrayku mana qosanta kasukuyta atillanmanchu. Chayrayku solterasqa, pitapis casarakunankupaj qhawakushaspa, piensarinanku tiyan: “Kay hermano, ¿sumaj umachu kanqa? Diosta yupaychayta, ¿ñaupajmanpunichu churan? Mana chayta ruwanchu chay, ¿imaynatá Jehovaj qayllallanpipuni kanaypaj yanapawanqa?”. Chantapis hermanasqa, paykunapi piensarinallankutaj tiyan: “Casado viday sumaj kananpaj, ¿yanapakuyta atisajchu? ¿Pacienciayojchu kani? ¿Qorikuyta yachanichu? ¿Jehovamanta sinchʼitachu japʼikuni?” (Ecl. 4:9, 12). Sichus hermanas niraj casarakushaspa chay imaspi piensarenqanku chayqa, casarakuytawan astawan kusisqa kausakonqanku. May chhika hermanasqa, qosankuta kʼumuykukoj sonqowan kasukunku. Chay ruwasqankutaj, ¡may sumajpuni! w21.02 pág. 8 párrs. 1, 2

Kay qhepa wataspeqa, ashkha hermanos Jehovapaj astawan llankʼanankurayku waj parlayta yachakushanku. Ajinamanta maypichus astawan predicajkuna necesitakun, chaypi yanapakushanku. Chay hermanosqa, Jehová Diospaj astawan llankʼanankurayku chayta ruwashanku. Chay mosoj parlayta unaypi yachakojtinkupis, paykunaqa congregacionpi sumajta yanapakunku. Kausayninkuwan, kʼacha kasqankuwantaj, tukuy hermanosta kallpachanku. Mayta kusikunchej congregacionninchejpi chay jina hermanos kasqankumanta. ¿Allinchu kanman ancianos ninanku: “Kay hermano siervo ministerial chayri anciano kananpaj, parlayninchejtaraj allinta yachanan tiyan”, nispa? Mana. Astawanpis paykunaqa, chay hermano Bibliaj nisqanman jina wakichisqañachus manachus kasqanta qhawaykurinanku tiyan. Uj hermano siervo ministerial chayri anciano kananpajqa, mana uj parlayta chʼuwitatapunichu parlanan tiyan (1 Tim. 3:1-10, 12, 13; Tito 1:5-9). w20.08 pág. 30 párrs. 15, 16

Runasqa sanitos kaspa, qolqeyoj kaspa, chayri familiankuwan allinta kausakuspa, kusisqa kanankuta yuyanku. Jinapis Santiagoqa, mana chay kusiymantachu parlasharqa. Payqa Diospa atiyninmanta jamoj kusiymanta parlasharqa. Chaytaj kausayninchejpi ima kajtinpis, kusisqallapuni kanapaj yanapawanchej (Gál. 5:22). Ajina kusisqa kanchej, Jehovata kusichisqanchejta yachasqanchejrayku, Jesús jinataj ruwashasqanchejrayku (Luc. 6:22, 23; Col. 1:10, 11). Chay kusiyninchejtaqa farolwan kikinchasunman. Farol ukhupi ninataqa, sumaj jarkʼasqa kasqanrayku ni parapis ni wayrapis wañuchinchu. Noqanchejpis onqosqa kaspapis, pisi qolqeyoj kaspapis, chayri ima llakiyniyoj kaspapis, kusisqallapuni kanchej. Chantá familiasninchej chayri waj runas, Diosta sirvisqanchejrayku chejnikuwajtinchej, astawanraj kusikunchej. Imaraykuchus chayqa, Jesuspa yachachisqasnin kasqanchejta rikuchin (Mat. 10:22; 24:9; Juan 15:20). Chayraykuchá Santiago kay pʼunchaypaj versiculopi nisqanta qhelqarqa. w21.02 pág. 28 párr. 6

Ichá Bibliata leeshaspa, Jehovapi atienekuspa sonqo tiyasqa kanamanta parlaj textosta tarinchej. Jina kajtin, chay textosta umanchejpi japʼinapaj kallpachakuna. Chaypajqa ichapis chay textota jatunmanta leesunman. Chayrí kutin kutita qhawarinapaj, uj papelitopi anotakusunman. Jehová Diosqa Josueman kamacherqa Diospa Leyninta tuta pʼunchay leenanta, chaypitaj tʼukurinanta. Ajinamanta imatapis sumaj yuyaywan ruwananpaj. Chay ruwasqanqa, Josueta yanaparqa mana manchachikuspa Diospa llajtanta ñaupajman pusananpaj (Jos. 1:8, 9). Bibliaqa noqanchejtapis yanapallawasunmantaj. Chaypeqa manchay kʼachitu textos tiyan. Chaykunataj llakisqa chayri mancharisqa kashajtinchej, sonqo tiyasqallapuni kanapaj yanapawasun (Sal. 27:1-3; Pro. 3:25, 26). Jehová Diosqa hermanosninchejnejta yanapawanchej paypi atienekunapaj, sonqo tiyasqataj kanapaj. Reunionespeqa yachachikusqanta uyarispa kallpachakunchej. Hermanospa comentasqankupis yanapawanchej. Chantapis reunión pasayta, hermanoswan hermanaswan parlarikuspa kallpachanakullanchejtaj (Heb. 10:24, 25). Ima llakiyninchej kajtinpis, congregacionmanta uj amigonchejwan parlarisunman. Payman imaynachus kashasqanchejta willarispaqa, mayta kallpachakusun. w21.01 pág. 6 párrs. 15, 16

Bautizakushaspaqa Jehovapi creesqanchejta rikucherqanchej, paypitaj atienekorqanchej. Jehová Diostaj familianpi kusiywan japʼikuwarqanchej. Jinapis kunanqa, Jehovapi atienekunallanchejpuni tiyan. Kausayninchejpi jatun imasta ruwananchej kajtin, Jehovapi atienekuyta atillanchej. Jinapis ichá wakin imaspeqa, Jehovamanta qonqakapunchej. Chayrayku jóvenes, imata ruwanaykichejpajpis Jehovaj yanapantapuni maskʼaychej. Chayta ruwaychej imawanchus kusirikuyta ajllashaspa, trabajota maskʼashaspa, imatachus kausayniykichejwan ruwaypi piensashaspa ima. Ama yachaynillaykichejpi atienekuychejchu. Astawanpis Bibliaj yuyaychaykunasninta maskʼaychej, chayman jinataj ruwaychej (Pro. 3:5, 6). Chayta ruwaspaqa Jehová Diosta kusichinkichej. Congregacionmanta hermanospis sumajpaj qhawasonqachej. Qankunapis tukuy runas jinallataj juchasapas kasqaykichejrayku, wakin kutisqa pantankichej. Jinapis tukuy atisqaykichejta Jehovata sirviwajchej. w21.03 pág. 6 párrs. 14, 15

Ichapis Jehovata sirvisqanchejrayku, familiasninchej churanakuwanchej. Chayrí suyunchejmanta gobierno mana Jehovata yupaychajta saqewanchejchu, chayri wakin imasllata ruwajta saqewanchej. Jina kajtin, imatachus apóstol Pablo carcelpi kashaspa qhelqasqan, mayta yanapawasunman. Chay qhelqasqanqa kay versiculospi kashan: 2 Timoteo 1:12-16; 4:6-11, 17-22. Pabloj qhelqasqanta niraj leeshaspa, Jehovaman llakiyninchejta willakuna. Imaynachus kashasqanchejtapis sutʼita nina. Chantá Jehovamanta mañakuna, Pabloj qhelqasqanpi sumaj yuyaychaykunata rikuchinawanchejta. Ajinamanta imatachus ruwananchejta yachasun. Jehovaqa ñaupajmantaña Pabloman willarqa, cristiano kasqanrayku qhatiykachasqa kananta (Hech. 21:11-13). ¿Imaynatá Jehová Pablota yanaparqa? Payqa Pabloj mañakuyninta uyarerqa, kallpacharqataj. Pabloqa tʼinkanta japʼinanpaj, Diospaj sinchʼita llankʼarqa. Chayta japʼinanmantataj mana iskayrayarqachu. Jehová Diostaj, Pablota amigosninwan yanapacherqa. w21.03 págs. 17, 18 párrs. 14, 15, 19