Enero

Jesusqa judiospa religionninkuta kamachejkunaman nerqa, Jehová Diosta yupaychaspa puraj uyas kasqankuta. Fariseosqa tatasninkuta cuidanankumanta, makisninkuta mayllakunankumanta astawan llakikorqanku. Jesustaj chayta rikuspa puraj uyas kasqankuta nerqa (Mat. 15:1-11). Jesusqa judiospa religionninkuta kamachejkuna mayta phiñakojtinkupis, sutʼita niporqa imastachus mana allintachu ruwashasqankuta. Jesusqa llulla yachachiykunatapis sutʼiman orqhorqa. Pay nerqa, Diosqa mana tukuy religionestachu allinpaj qhawasqanta. Chantá nillarqataj, wañuyman pusaj ancho ñantaqa ashkhas rinankuta, kausayman pusaj kʼullku ñantataj pisilla rinankuta (Mat. 7:13, 14). Jesusqa sutʼita nerqa wakenqa Diosta sirvejkunaman rijchʼakunankuta, manataj Diostapunichu sirvinankuta. Chayrayku paykunaman nerqa: “Llulla profetasmanta allinta qhawakuychej, paykunaqa ovejasman tukuspa qankunaman jamunku, ukhunkupitaj yarqhasqa atojkuna kanku. Paykunataqa ruwasqasninkunejta allinta rejsinkichej”, nispa (Mat. 7:15-20). w21.05 pág. 9 párrs. 7, 8

Anaj qosanqa uj levita karqa, Elcana sutiyoj. Elcanaj ujnin warmenqa Peniná karqa. Jinapis payqa Anata astawan munakorqa. “Peninaqa wawasniyoj karqa, Anatajrí mana”. Chayrayku “asipayaspa Anata llakichillajpuni”. Ajinamanta “Anaqa waqallajpuni, manataj mikhojchu”. Jinapis Bibliaqa mana ninchu Ana imaynallamantapis vengakuyta munasqanta. Astawanpis Anaqa llakiyninta Jehovaman willakorqa, pay yanapananpitaj confiarqa (1 Sam. 1:2, 6, 7, 10). ¿Imatá yachakunchej Anamanta? Pillapis noqanchejwan atipanakuyta munashan chayqa, ama pay jinallataj ruwanachu. Nitaj atipanakuytapuni munanachu. Sajramanta sajrallawantaj kutichikunamantaqa, paywan allinyakunapaj kallpachakuna (Rom. 12:17-21). Ajinallapuni kajtintaj, noqanchej sonqo tiyasqallapuni kanapaj kallpachakuna. w21.07 págs. 17, 18 párrs. 13, 14

Judas Iscariotemanta parlarina. Payqa kʼacha runa karqa (Luc. 6:13). Confianapaj jina kasqanraykutaj Jesusqa, payta qolqe cajamanta encargadota jina churarqa. Jesusqa ashkha kutispi apostolesninman nerqa, tukuy imata munapayaymanta allinta qhawarikunankuta (Mar. 7:22, 23; Luc. 11:39). Jinapis Judasqa suwakuyta qallarerqa. Qolqeta mayta munapayasqanraykutaj Jesusta wasancharqa (Luc. 6:16). Judasqa qolqeta astawan munapayarqa. Chaytaj Jesusta wañuchinanku qayllata sutʼi rikukorqa. Uj kuti, Simón pichus aswan ñaupajta lepra onqoyniyoj karqa chay, Jesusta discipulosnintawan wasinman wajyarikorqa. Chaypeqa kashallarqankutaj Mariawan hermanan Martawan ima. Mikhushajtinkutaj Mariaqa manchay valorniyoj perfumasqa aceitewan Jesuspa umanman jichʼaykorqa. Judaswan chay ujkuna discipuloswantaj, chayta rikuspa mayta phiñakorqanku. Ichapis paykunaqa piensasharqanku, chay aceiteta vendeytawan, chay qolqeta predicacionpi gastosninkupaj apaykachayta. Jinapis Judasqa mana chaymantachu phiñakorqa. Payqa suwa karqa, qolqe cajamantataj suwakuyta munarqa (Juan 12:2-6; Mat. 26:6-16; Luc. 22:3-6). w21.06 pág. 18 párrs. 12, 13

Ashkha ruwanasniyoj kasqanchejrayku, ichá wakin kutis yuyanchej mana tukuynintapunichu ruwayta atinanchejta. Apóstol Pablopis ajinallatataj yuyarqa. Pay nerqa “tukuy hermanosmanta” llakikusqanta (2 Cor. 11:23-28). Chantapis ichá sinchʼi onqosqa kasqanchejrayku, llakisqalla kashanchej. Pablopis ajinapi rikukorqa. Chayrayku nerqa: “Aychaypi khishkayoj jina kani”, nispa. Chayqa ichapis uj onqoy karqa, chaymantataj mayta sanoyapuyta munarqa (2 Cor. 12:7-10). Chantapis ichá llakikullanchejtaj pantasqasninchejmanta. Apóstol Pablopis llakikullarqataj. Payqa mana cheqan kajta ruwayta atispa nerqa: “¡Ay, imanallasajtaj!”, nispa (Rom. 7:21-24). Apóstol Pabloqa ashkha llakiykunasniyoj kaspapis Jehová Diosta sirvillarqapuni. ¿Imataj chaypaj yanaparqa? Payqa yacharqa pantaj runa kasqanta. Jinapis Jesús tukuy runasrayku kausayninta qosqanpi, sinchʼita creerqa. w21.04 pág. 22 párrs. 7, 8  

Adanqa mana pantaj runa karqa. Jinapis juchallikusqanrayku, niña wiñaypaj kausayta aterqachu, nitaj wawasninpis. Payqa yachashaspa juchallikorqa. Jinapis wawasnenqa, mana ima juchatapis ruwarqankuchu. Nitaj Adanpa juchallikusqanmanta juchayojchu karqanku (Rom. 5:12, 14). Adanqa juchallikusqanrayku wañunanpuni karqa. Jinapis Jehová Diosqa Adán juchallikusqanmanta pisi tiemponman nerqa, imaynatachus Adanpa mirayninta juchamanta, wañuymantawan kacharichinanta (Gén. 3:15). Jesús kausayninta qosqanrayku, pantaj runas kaspapis Jehová Dioswan sumaj amigos kayta atinchej. Chantapis Jesús kausayninta qosqanrayku, ‘Kuraj Supaypa ruwasqasnin tukuchisqa kanqa’ (1 Juan 3:8). Mana chayllachu, Jehová Diosqa Jesuspa wañuyninnejta imatachus qallariypi runaspaj munarqa chayta juntʼanqa. Kay jallpʼata uj paraisoman tukuchenqa. w21.04 pág. 14 párr. 1; pág. 19 párr. 17

Kay 33 watapi ashkha qharis, warmis ima Jerusalenman rerqanku. Paykunaqa tukuy llajtasmanta karqanku, sapa ujtaj waj parlayta parlarqanku. Maytataj tʼukorqanku wakin judiosta parlayninkupi parlajta uyarispa. Chantapis astawanraj tʼukorqanku chay judío runas imatachus nisqankumanta chantá apóstol Pedro imastachus paykunaman nisqanmanta. Pedroqa nerqa Jesucristopi creespalla salvakuyta atisqankuta. Chaytaj paykunaj sonqonkuman chayarqa, chayrayku nerqanku: “¿Imatataj ruwasqaykuri?”, nispa. Pedrotaj paykunata nerqa: ‘Sapa ujniykichej bautizakuychej’, nispa (Hech. 2:37, 38). Imachus chay diapi pasasqanqa tʼukunapajpuni karqa. Imajtinchus chay diallapi 3 mil runas jinapuni bautizakorqanku, Cristoj discipulosninmantaj tukorqanku. Ajinamanta Jesuspa kamachisqan juntʼakuyta qallarerqa. Payqa kamacherqa runasta discipulosninman tukuchinata. Jesuspa kamachisnenqa kunankama chayta ruwashallanchejpuni. w21.06 pág. 2 párrs. 1, 2  

Ichá yuyanchej maypichus predicanchej chaynejpi ni pi Bibliamanta yachakuyta munasqanta. Wakin runasqa, Diosmanta willasqanchejta mana uyariyta munankumanchu. Wakintaj ni predicajtapis saqewasunmanchu. Jinapis, ¿imaraykutaj predicanallanchejpuni tiyan? Kay mundoqa sapa día cambiashan, chayrayku runaspa kausayninpis cambiashallantaj. Chantapis Diosmanta willasqanchejta mana uyariyta munawarqanchejchu chaykunaqa, ichapis aswan qhepaman yachakuyta munanqanku (Mat. 5:3). Wakin runasqa aswan ñaupajpi ni imarayku publicacionesninchejta japʼikuyta munaspapis, Bibliamanta yachakuyta qallarerqanku. Jehovaqa ‘cosechaj Dueñon’ kasqanrayku, munan plantanallanchejtapuni, qarpanallanchejtapunitaj. Jinapis pay mujuta wiñachin (Mat. 9:38). Ni piman Bibliamanta yachachishanchejchu chaypis, Jehová Diosqa kallpachakusqanchejta allinpaj qhawan, manataj mashkhatachus ruwasqanchejtachu. Chayta yachaytaj mayta sonqochawanchej. w21.07 pág. 6 párr. 14

Jehovaqa runasta wawasniyoj kayta atinanchejpaj jina ruwawarqanchej, kamachiwanchejtaj payta munakuyta, sirviyta ima yachachinanchejta. Jehovaqa angelesta tʼukuna imasta ruwayta atinankupaj jina ruwarqa. Jinapis paykunaqa mana wawasniyoj kayta atinkuchu. Chayrayku tatasqa maytachá kusikunchej wawasniyoj kayta atisqanchejmanta. Chantapis Jehovaqa tatasta kamachiwanchej wawasninchejta uywananchejta paypa “nisqanman jina cheqanchaspa, yachachispataj” (Efe. 6:4; Deu. 6:5-7). Diospa llajtanqa tatasta yanapananpaj ashkha publicacionesta, videosta, takiykunata, Internetpi waj yachaqanasta ima orqhon. Chaykunataj Bibliamanta orqhosqa kashan. Reparanchej jina, Tatanchej Jehovawan Jesuswanqa wawitasta mayta munakunku (Luc. 18:15-17). Chantapis Jehová Diosqa, mayta kusikun tatas paypi atienekojtinku, wawasninkuta cuidanankupaj kallpachakojtinku ima. Ajinamanta chay tatasqa wawasninkuta yanapanku wiñaypaj Jehovaj familianmanta kayta atinankupaj. w21.08 pág. 5 párr. 9

Wakin runasqa yuyanku creeyniyoj kaspaqa, imapipis creenalla kasqanta. Biblia nisqanman jinataj mana ajinachu. Biblia sutʼinchasqanman jina creeyniyoj runaqa Jehová Diospi, Jesuspi, Diospa Gobiernonpi ima creenpuni, chay imasta mana rikuspapis (Heb. 11:3). Uj científico Jehovaj testigonman tukorqa. Paytaj nin: “Noqanchejqa yachanchej imapichus creesqanchej cheqapuni kasqanta. Cientificospa wakin imasta nisqankumanpis mana churanakunchejchu”, nispa. Diospuni tukuy imata ruwasqan sutʼi kajtinpis, ¿imaraykutaj ashkha runas mana creenkuchu? Imaraykuchus wakin runasqa ni jaykʼaj kallpachakorqankuchu paykunapuni jinachus manachus kasqanta yachanankupaj. Robertmanta parlarina. Payqa Jehovaj testigon, nintaj: “Escuelapeqa ni jaykʼaj Diosmanta parlawajchu kayku. Chayraykutaj mana Diospi creejchu kani. 22 watasniyoj kashajtiytaj Bibliawan sumajta sutʼinchariwarqanku Diospuni tukuy imata ruwasqanta”, nispa. w21.08 pág. 15 párrs. 4, 5

Jehová may kʼacha kasqantaqa Bibliata leerispa yachasunman. Imaynatachus Jehová wajkunata bendecisqanta uyarispa yachallasunmantaj. Jinapis imayna kʼachapunichus Jehová Dios kasqanta yachanapajqa, noqanchejpuni “llamirisunman” mikhunata jina. Jehovapaj astawan llankʼayta munashasqanchejpi piensarina. Ichapis chaypajqa wakin imasninchejta pisiyachinanchej tiyan. Noqanchejqa yachanchej, Jesusqa Diospa Gobiernonta kausayninchejpi ñaupajman churajtinchej, Jehová tukuy ima necesitasqanchejta qonawanchejta nisqanta. Jinapis ichá chay nisqantaqa ni jaykʼaj kausayninchejpi juntʼakojta rikorqanchejchu (Mat. 6:33). Chaywanpis Jesuspa nisqanta creesqanchejrayku, gastosninchejta pisiyachinchej, pisi horasllataña trabajanchej, Diosmanta willanapajtaj tukuy tiemponchejta churanchej. Chayta ruwaspaqa ñawisninchejwanpuni rikusun Jehová mayta cuidawasqanchejta. Ajinamantataj noqanchejpuni yachasun Jehová may kʼacha kasqanta. w21.08 pág. 26 párr. 2

Kay tiempomanta runasqa Jesuspa tiemponpi jinallataj yuyanku. Iglesiasta kamachejkunamanta ashkhasqa, mayta munanku qhapajkuna, may rejsisqas, yachayniyojkuna ima iglesiankumanta kanankuta. Chay runasmanta ashkhasqa, mana Jehovaj munayninman jinachu kausakunku, millay imastataj ruwanku. Jinapis iglesiasta kamachejkunaqa, saqellanku chay jina runas religionninkupi kanankuta. Jehovaj testigosnintatajrí pisipaj qhawawanchej. Imajtinchus noqanchejqa mana kay mundopi qhapajkunachu, nitaj may rejsisqaschu kanchej. Astawanpis Jehovaj munayninman jina kausakunchej. Apóstol Pablo nerqa Diosqa kay mundopi pisipaj qhawasqa kajkunata ajllasqanta (1 Cor. 1:26-29). Jinapis Jehová Diospajqa, tukuy kamachisnin may valorniyoj kanchej. ¿Imatá ruwasunman mana kay mundomanta runas jina yuyanapaj? (Mat. 11:25, 26). Jehovaj llajtanmanta, ama kay mundomanta runas jina yuyanachu. Chantapis amapuni kayta qonqanachu: Jehovaqa llampʼu sonqo runasnejta munayninta juntʼashan (Sal. 138:6). Kay mundomanta runasqa, mana yachayniyoj runasta jina qhawawanchej. Jinapis Jehová Diosqa noqanchejnejta tʼukuna imasta ruwashan. w21.05 pág. 8 párr. 1; pág. 9 párrs. 5, 6

Apóstol Pabloqa mayta agradecekorqa payta yanapasqankumanta. Payqa hermanos yanapayta munajtinku yanapachikullarqa (Fili. 2:19-22). Qan machitu hermano kanki chayqa, ashkha imaymanasmanta agradecekoj kasqaykita rikuchiwaj congregacionniykipi jóvenes kasqankumanta. Autopi pusasuyta munasojtinku, rantikoj rejtiyki acompañayta munasojtinku chayri waj imaspi yanapayta munasojtinkoqa, kusiywan yanapachikuy. Jehovaqa chay hermanosnejta munakususqanta rikuchisunki. Ichá chay yanapasoj hermanoswanqa sumaj amigosman tukuwajchej. Paykunata yanapariypuni Diosman astawan qayllaykunankupaj. Paykunaman niy kusikusqaykita congregacionpi ashkha jóvenes yanapakunankupaj mayta kallpachakushasqankumanta. Paykunawan karinaykipaj, experienciasniykita willarinaykipaj ima tiempochakuy. Ajinamantaqa Jehová llajtanman jovenesta pusamusqanmanta mayta agradecekusqaykita rikuchinki (Col. 3:15; Juan 6:44; 1 Tes. 5:18). w21.09 pág. 12 párrs. 12, 13

Jehovaqa hermanosninchejta munakun. Jinapis ichá noqanchejqa mana paykunata munakuyta atillasunmanchu, nitaj “munakuyki niytapis”. Imajtinchus waj jina culturasniyoj kanchej chayri waj jinamanta uywasqas kanchej. Tukuytaj imapipis pantanchejpuni, chaytaj hermanosninchejta phiñachinman chayri sonqonta nanachinman. Chaywanpis tukuy kallpachakusunman Jehová Dios jina hermanosninchejta munakunapaj (Efe. 5:1, 2; 1 Juan 4:19). Khuyakoj runaqa wajkunata imaynallamantapis yanapananpaj, sonqochananpaj ima kallpachakun. Jesusqa runasta khuyakuspa, Tatan jina kasqanta rikucherqa (Juan 5:19). Bibliaqa Jesusmanta parlaspa nin: “Ashkha runasta rikuspataj paykunata khuyakorqa, imaraykuchus mitharasqas, tʼaqa tʼaqallataj kasharqanku, mana michejniyoj ovejas jina”, nispa (Mat. 9:36). Jesusqa runasta khuyakusqanrayku paykunata yanaparqa, onqosqasta sanoyacherqa, saykʼusqasta yanaparqa, llasa qʼepiyojkunatapis samaricherqa (Mat. 11:28-30; 14:14). w21.09 pág. 22 párrs. 10, 11

Apóstol Pabloqa nerqa Dios ‘khuyakuyninpi may qhapaj’ kasqanta. Pabloqa chay kutipi parlasharqa, ajllasqa cristianosman pantaj runas kajtinkupis Dios cielopi kausakunankupaj suyakuyta qosqanmanta (Efe. 2:4-7). Jinapis Jehová Diosqa mana ajllasqa cristianosllatachu khuyakun. Imajtinchus David nerqa: “Jehová Diosqa tukuywan kʼacha, khuyakuynenqa tukuy ruwasqasninpi sutʼi rikukun”, nispa (Sal. 145:9). Jehová Diosqa munakuwasqanchejrayku, khuyakunapaj jina kajtinchej, khuyakuwanchej. Jesusqa sumajta yachan runasta Jehová mayta khuyakusqanta. Payqa niraj jallpʼaman jamushaspa, ashkha watasta Tatanwan cielopi kausakorqa (Pro. 8:30, 31). Chantapis ashkha kutispi rikorqa, imaynatachus Tatan juchasapa runasta khuyakusqanta (Sal. 78:37-42). Wajkunaman yachachishaspapis Tatan khuyakuyniyoj kasqanmanta ashkhata parlarqa. w21.10 págs. 8, 9 párrs. 4, 5  

Jehová Diosqa cielomantapacha nimorqa sutinta jatunchananta. Jesusqa kay jallpʼapi kashaspa Tatanpa sutinta jatuncharqa (Juan 17:26). Chayrayku cheqa cristianosqa Jehová Diospa sutinta oqharispa, wajkunamantaj rejsichispa maytapuni kusikunchej. Apostolespa tiemponpi congregación cristiana rikhurisqanmanta pisi tiemponman, Jehová Diosqa ‘mana judío kajkunatapis khuyakorqa, paykuna ukhumantataj uj llajtata ajllakorqa, paypa sutinta apanankupaj’ (Hech. 15:14). Paykunaqa kusiywan Diospa sutinta oqharej kanku, wajkunamantaj yachachej kanku. Jesuspa apostolesninwan discipulosninwanqa Diosmanta willashaspa, Bibliata qhelqashaspapis Jehová Diospa sutinta oqharejpuni kanku. Ajinamanta paykunaqa Jehová Diospa sutinta aparqanku (Hech. 2:14, 21). Kay tiempopipis Jehovaj testigosnenqa, paypa sutinta jatunchanku. w21.10 págs. 20, 21 párrs. 8-10

Diospa munakuynenqa wiñaypaj kallanqapuni. Salmo 136 capitulopeqa 26 kutista chayta nin. Ñaupaj versiculopeqa nin: “Jehová Diosman graciasta qoychej, kʼacha kasqanrayku. Munakuynenqa wiñaypaj kallanqapuni”, nispa (Sal. 136:1). Iskay versiculomanta 26 versiculokamaqa sapa versiculopi nin: “Munakuynin wiñaypaj kasqanrayku”, nispa. Chay salmota leespaqa reparanchej Jehová Diosqa tukuy imaymanamanta, tukuy tiempotaj munakuyninta rikuchisqanta. “Munakuynin wiñaypaj kasqanrayku” nisqanqa, noqanchejpaj uj garantía jina. Chayqa reparachiwanchej Diosqa llajtanta munakunallantapuni. Jehová kamachisninta mana saqerparinanta yachayqa mayta kallpachawanchej. Diosqa payta sirvejkunaj ladonkupipuni kashan, astawanraj llakiy tiempospeqa. Jehová ladonchejpipuni kasqanta yachayqa mayta kusichiwanchej, kallpachawanchejtaj problemaswan mana atipachikunapaj, kausayman apaj ñanpitaj purinallapajpuni (Sal. 31:7). w21.11 págs. 4, 5 párrs. 9, 10

Yachanchej llulla religión chinkachisqa kananta, Magogmanta Gog Diospa llajtanpa contranpi oqharikunanta, Armagedón guerra chamunanta ima. Chaykunapi piensarispataj ichá tumpata manchachikusunman. Jinapis chay llakiy tiempos chamojtin, ¿creeyninchej sinchʼillapunichu kanqa? Chay imaspi piensashanchej chayqa, Jesús kay pʼunchaypaj textopi nisqanta estudiay mayta yanapawasunman. Jesusqa discipulosninman nerqa: “Ama sonqoykichej sinchʼita llakikuchunchu. Diospi creeychej”, nispa. Sinchʼi creeyniyoj kaspaqa, jamoj tiempopi llakiykunata mana manchachikusunchu. Jamoj tiempopi llakiykunata aguantanapajqa, creeyninchejta sinchʼiyachina tiyan. Chaypajqa imaynatachus kay tiempopi llakiykunata aguantasqanchejpi piensarina. Ajinamanta yachasun imaspichus creeyninchejta astawan kallpachananchej kasqanta. Sapa kuti uj llakiyta atipajtinchejqa, creeyninchej astawan sinchʼiyan. Sinchʼi creeyniyoj kaspataj, jamoj tiempopi llakiykunata aguantallasun. w21.11 pág. 20 párrs. 1, 2

Apóstol Pabloqa Timoteota kallpacharqa tukuy atisqanta Diospaj llankʼananpaj. Chaytaj kay tiempopi noqanchejtapis kallpachallawanchejtaj (2 Tim. 4:5). Jinapis wakin kutisqa mana atikullanchu. Imajtinchus wakin hermanosninchejqa, gobiernos mana predicajta saqewanchejchu chay lugarespi tiyakunku. Jehovaj kamachisnenqa, ashkha problemasniyoj kanchej. Chaytaj ichá mayta llakichiwasunman. Wakin hermanosqa, ashkha horasta trabajananku tiyan familiankuta uywanankupaj. Paykunaqa astawan predicayta munaspapis, semana tukukuytaqa saykʼusqas kashanku. Wakenqa pisillata predicanku, sinchʼi onqosqa kasqankurayku chayri viejitusña kasqankurayku. Paykunamanta wakintaj, ichá ni wasimantapis llojsiyta atinkuñachu. Wakintaj ni imapaj valesqankuta yuyakunku. Ima problemasniyoj kajtinchejpis, Jehová Diosqa kallpata qowasun aguantanapaj, atisqanchejman jinataj payta sirvinallapajpuni. w21.05 pág. 20 párrs. 1-3

Wakin runasqa waj imasta ruwanapaj tanqawasunman. Chaytaj mana yanapawasunmanchu Jehovata munasqanman jina sirvinapaj. Ajinapi rikukuspaqa imatachus ruwananchejta sumajta ajllananchej tiyan. Chaypajqa Levítico 19:19 versiculopi uj sumaj yuyaychayta qhawarina. Chay versiculoj tukukuyninpi nin: ‘Ama iskay rijchʼaj qʼaytusmanta awasqa ropata churakunkichu’, nispa. Israelitasqa chay kamachiyta kasukuspa waj nacionesmanta nisqa, waj jinas kasqankuta rikucherqanku. Kay tiempopeqa atillanchejña iskay rijchʼaj qʼaytusmanta ruwasqa ropasta churakuyta. Chaywanpis mana allinchu kanman, pikunachus Bibliaj yachachisqanta mana creenkuchu, nitaj kasukunkuchu, chay runas jina kananchej. Familiaresninchejta, runa masinchejta munakojtinchejpis, imastachus kausayninchejpi ajllasqanchejqa, sutʼita rikuchinan tiyan Jehovaj kamachisnin kasqanchejta. Llimphus kayta munanchej chayqa, Diospaj tʼaqasqapuni kananchej tiyan (2 Cor. 6:14-16; 1 Ped. 4:3, 4). w21.12 pág. 5 párr. 14; pág. 6 párr. 16

Kausayman pusaj ñanta maskʼankuman chayqa tarinkuman, imajtinchus Jesús nerqa: “Nisqasniytachus kasukullankichejpuni chayqa, cheqamanta discipulosniy kankichej, cheqa kajtataj rejsinkichej, chay cheqa kajtaj kacharichisonqachej”, nispa (Juan 8:31, 32). Noqanchejtaj cheqa kajtapuni maskʼarqanchej. Diospa Palabranta sumajta estudiarqanchej imastachus kamachiwasqanchejta yachakunanchejpaj, Jesuspa yachachiwasqanchejtapis uyarerqanchej. Yachakorqanchej Jehovaqa llulla religionespa yachachisqankuta qhesachananchejta munasqanta, niñataj costumbresninkutapis ruwananchejta munasqanta. Yachakullarqanchejtaj Jehovaj kamachiykunasninman jina kausakuy, imastachus millaypaj qhawan chay imasta saqepuypis mana atikullasqanta (Mat. 10:34-36). Ichapis Jehovaj kamachiykunasninman jina kausakuyta mana atillarqanchejchu. Jinapis chayta ruwarqanchej payta munakusqanchejrayku. Chayrayku Jehovaqa may kusisqachá kashan chayta ruwasqanchejmanta (Pro. 27:11). w21.12 pág. 22 párr. 3; pág. 23 párr. 5

Moisesqa maytapuni pantaykorqa, Jehová kʼamejtintaj tukuy sonqo japʼikorqa. Payqa uj pacha rabiawan atipachikorqa, nitaj Jehovata jatuncharqachu. Jinapi niña sumaj jallpʼaman yaykorqachu (Núm. 20:1-13). Moisesqa Jehová Diosman nerqa pantaykusqanmanta may llakisqa kashasqanta. Jehovataj nerqa: “Amaña chaymanta ujtawan parlawaychu”, nispa (Deu. 3:23-27). Moisesqa llakiywan atipachikunanmanta Jehovaj nisqanta uyarerqa. Jehovataj Moisesnejta llajtanta ñaupajman pusallarqapuni (Deu. 4:1). Moisesqa yuyaychaykunata tukuy sonqo japʼikorqa. Paymantaqa mayta yachakusunman. Chantapis payqa Jehovaj kʼamisqanta tukuy sonqo japʼikorqa. Chayrayku Jehová niña sumaj jallpʼaman yaykunanta nejtinpis, tukuy sonqo payta sirvillarqapuni. Moisés jina, Diospa waj kamachisnin jinataj ruwasun chayqa allinpuni riwasun (Pro. 4:11-13). Ashkha hermanosqa paykuna jina ruwarqanku. w22.02 pág. 11 párrs. 9, 10

Jesuspa munasqa amigon Lazaroqa 32 wata tukukuyta onqoykorqa, wañuporqataj (Juan 11:3, 14). Jesusqa Lazarota, hermanasnin Mariata, Martata ima mayta munakorqa. Martataj Jesús rishasqanta yachaspa usqhayllata payta taripamoj rerqa. Payqa sinchʼi llakisqapuni kasharqa. Chayrayku Jesusta nerqa: “Señor, kaypichus kawaj karqa chayqa, hermanoyqa mana wañupunmanchu karqa”, nispa (Juan 11:21, 32, 33). Jesusqa waqarikullarqatajchá Mariawan Martawan hermanonku wañupusqanrayku sinchʼi llakisqas kashasqankumanta. Ichá noqanchejpis ajina llakisqallataj sientekorqanchej, uj familiarninchej chayri munasqa amigonchej wañupusqanrayku. Jehovaqa yachan imayna llakisqachus kashasqanchejta. Jesusqa Diospa ‘kikin rijchʼaynin’ (Heb. 1:3). Chayrayku Jesuspa waqarikusqanqa, rikuchiwanchej munasqa familiarninchej chayri amigonchej wañupojtin imaynachus Jehová sientekusqanta (Juan 14:9). Ujnin familiarninchej wañupusqanrayku sinchʼi llakisqa kashanchej chayqa, Jehovaqa imayna llakisqapunichus kashasqanchejta sumajta yachan, noqanchej jinataj mayta llakikun. Payqa sonqo pʼakisqa kashajtinchej sanoyachiyta munawanchej (Sal. 34:18; 147:3). w22.01 pág. 15 párrs. 5-7

Jehovawan parlarinapaj, payta uyarinapaj, imaynachus kasqanpitaj tʼukurinapaj tiempochakusun chayqa, ashkha bendicionesta japʼisun. Ñaupaj kaj, kausayninchejpi allin imastapuni ajllasun. Bibliaqa nin: “Allin yachayniyoj runaswan purejqa allin yachayniyojllataj kanqa”, nispa (Pro. 13:20). Iskay kaj, aswan sumaj yachachejkuna kasun. Estudiosninchejmanqa Bibliamanta yachachinchej Jehovaman qayllaykunankuta munaspa. Orakunapaj, Jehovamantataj yachakunapaj astawan tiempochakuspaqa, astawan payta munakusun. Ajinamantataj estudiosninchejtapis aswan sumajta yanapayta atisun Jehovata munakunankupaj. Jesusqa ajinata ruwarqa. Payqa Tatanmanta may munakuywan parlaj. Chayrayku discipulosninpis Jehovata munakullarqankutaj (Juan 17:25, 26). Kinsa kaj, creeyninchej astawan sinchʼiyanqa. Jehovaqa uyariwanchejpuni yuyaycharinawanchejta, sonqocharinawanchejta chayri yanaparinawanchejta mañakojtinchej. Chaytaj astawan creeyninchejta sinchʼiyachin (1 Juan 5:15). w22.01 pág. 30 párrs. 15-17

Jehovaqa niwanchej sajra yuyaykunata, costumbrestapis saqepunata. Chaytataj niwanchej mayta munakuwasqanchejrayku, allin rinawanchejtataj munasqanrayku (Isa. 48:17, 18). Jehovaqa yachan sajra munaynillanchejta ruwasqanchej, noqallanchejpajtaj mana allinchu kasqanta, wajkunatataj sufrichisqanchejta. Jehovataj chayta rikuspa mayta llakikun. Ichá familiaresninchej chayri amigosninchej burlakuwanchej cambianapaj kallpachakushasqanchejmanta (1 Ped. 4:3, 4). Ichapis paykunaqa niwasun munayninchejman jina kausakuyta atisqanchejta, nitaj pipis imaynatachus kausananchejta ninawanchejchu kasqanta. Jinapis Jehovaj kamachiykunasninta mana kasukojkunaqa, mana munayninkuman jinapunichu kausashanku. Imajtinchus paykunaqa Satanaspa sajra mundonpa munayninman jina kausashanku (Rom. 12:1, 2). Juchasapas kasqanchejrayku, Satanaspa sajra mundonraykutaj, kausayninchejpi mana allin imasta ruwarqanchej. Jinapis Jehovaj munayninman jina kausakusun chayqa, payqa kay tiempopi sumaj cristianosman tukuchiwasun. Chayrayku, ¿ñaupa kausayninchejman jinallapunichu kausasun chayri Jehovaj kamachiykunasninman jinachu? Chaytaqa sapa uj ajllananchej tiyan (Isa. 64:8). w22.03 pág. 3 párrs. 6, 7

Diospa Palabranta leesqanchejpi tʼukurispaqa, problemasniyoj kajtinchejpis mana llakiykunasninchejwan atipachikusunchu. Qhawarina imaynatachus uj viuda hermanata Biblia yanapasqanta. Paymanqa uj anciano yuyaycharisqa Job librota leerinanta, chaywantaj yanapachikunanta. Hermanaqa Job librota leeytawan nerqa: “Chanta, ¿imaraykutaj Job ajinata yuyarqari?”, nispa. Chaymantataj paypis reparakorqa Job jinallataj yuyashasqanta. Chaytaj yanaparqa manaña Job jina yuyananpaj, kallpacharqataj qosan wañupusqanmanta mana anchata llakikunanpaj. Pabloqa nerqa maytapuni hermanoswan tinkuyta munasqanta purajmanta kallpachanakunankupaj (Rom. 1:11, 12). w21.05 pág. 22 párrs. 10, 11; pág. 24 párr. 12

Israelitasmanqa kay kamachiy qosqa karqa: “Jehová Diosniykichejpa ñaupaqenmanqa, tukuy qharis rinkichej watapi kinsa kutita. Ima lugartachus pay ajllakonqa chayman rinkichej” (Deu. 16:16). Paykunaqa mana necesitarqankuchu pimanpis encargakuyta wasinkuta, jallpʼankuta ima. Imajtinchus Jehová Diosqa paykunaman nerqa: ‘Mana pipis chay jallpʼaykichejtaqa munapayanqachu, nitaj japʼikaponqachu Jehová Diosniykichejpa ñaupaqenman wicharinaykichejkama’, nispa (Éxo. 34:24). Israelitasqa Jehovapi atienekusqankurayku sapa wata chay fiestasman rej kanku. Chay fiestastaj paykunata mayta yanapaj. Imajtinchus chay fiestaspeqa Diospa Leyninta astawan sumajta entiendej kanku, tʼukurej kanku imastachus Jehová paykunapaj ruwasqanpi, chay fiestasman rejkunawan khuskataj kusirikoj kanku. Noqanchejtapis reunionesman rinapaj kallpachakusqanchejqa, israelitasta jinallataj mayta yanapawanchej. Jehovaqa mayta kusikun reunionespi pisi parlayllapi sumajta comentanapaj wakichisqa rejtinchej. w22.03 pág. 22 párr. 9

Jehovaqa Wawan ñakʼarichisqa kananta saqerqa, Kuraj kaj Sacerdote jina wakichisqa kananpaj. Jesusqa kausayninpi rikorqa, sinchʼi llakiykunapi kashaspa Jehovata kasukuy, mana facilchu kasqanta. Payqa niñapuni aguantayta atispa, ‘waqarikuspa, qhaparikuspataj’ Diosmanta yanapata mañakorqa. Jesusqa chay jina llakiykunata pasasqanrayku, tukuyta entiendewanchej. Chantapis yanapayta atiwanchej, pruebaman churasqa kashajtinchej. Mayta Jehovaman agradecekunchej, uj Kuraj Sacerdoteta churapuwasqanchejmanta. Chay ‘Kuraj Sacerdoteqa pantaj runas kasqanchejta yachan, chayraykutaj khuyakuwanchej’ (Heb. 2:17; 4:14-16; 5:7-10). Jehovaqa saqerqa Wawanta ñakʼarichinankuta, Satanás llulla kasqanta rikuchinanpaj. Imajtinchus Satanasqa nin, runasqa Diosta interesraykulla sirvisqanchejta, sinchʼi llakiypi kaspataj Diosta wasanchananchejta (Job 1:9-11; 2:4, 5). Jesusqa wañupunankama Jehovata kasukuspa, Satanás llulla kasqanta rikucherqa. w21.04 págs. 16, 17 párrs. 7, 8

Estudionchejqa niraj bautizakushaspa Bibliaj yachachisqanman jina kausakunan tiyan. Estudionchej yachakusqanman jina kausakun chayqa, rijchʼakun Jesuspa kikinchayninmanta “sumaj yuyayniyoj runaman”. Chay runaqa wasita ruwakunanpaj ukhuta allasqa, chhankata taripanankama (Mat. 7:24, 25; Luc. 6:47, 48). Estudionchejta yanapana kausayninta cambiananpaj (Mar. 10:17-22). Jesusqa uj qhapaj runata nerqa tukuy imasninta vendenanta, mana chayta ruwayta atinanta yachaspapis (Mar. 10:23). Chaytataj nerqa payta munakusqanrayku. Wakin kutisqa estudionchejta yachakusqanman jina ruwananta niyta manchachikusunman, niraj wakichisqachu kashasqanta yuyasqanchejrayku (Col. 3:9, 10). Jinapis estudionchejwan imapichus cambiananmanta parlarisun chayqa, ichapis cambianqapacha. Ajinamanta rikuchisun payta yanapayta munasqanchejta (Sal. 141:5; Pro. 27:17). w21.06 pág. 3 párrs. 3, 5

Apóstol Pedroqa nerqa: “Cristopis qankunarayku ñakʼarerqa, pay jinallataj ruwanaykichejpaj”, nispa. Jesusmantaqa ashkha imasta yachakusunman (1 Ped. 2:18-25). Arí, yachakusunman imaynachus kasqanmanta, imatachus ruwasqanmanta ima. Juchasapa runas kaspapis, ¿atisunmanchu Jesuspa purisqanta qhatiyta? Arí, atisunman. Apóstol Pedroqa, Jesuspa purisqanta sumajta qhatiychej niwanchej, manataj kikisituntapuni ruwanatachu niwanchej. Pantaj runas kaspapis, Jesuspa purisqanta sumajta qhatisun chayqa, imatachus apóstol Juan nisqanta juntʼasun. Pay nerqa purinata, ‘imaynatachus Jesús purerqa, ajinata’ (1 Juan 2:6). Jesuspa purisqanta qhatispaqa, Jehová Diosman astawan qayllaykusunchej. Jesusqa Jehovaj munayninman jina kausakuspa, payta kusicherqa. Noqanchejpis pay jina ruwasunman (Juan 8:29). Jesuspa purisqanta qhatispaqa, Jehovata kusichisunchej. Jehovataj payman qayllaykunapaj kallpachakojtinchej, qayllaykamullawasuntaj (Sant. 4:8). w21.04 pág. 3 párrs. 4-6

Jehovaqa noqanchejpi allin imastapuni qhawan. Yachantaj aswan kʼacha runasman tukuyta atisqanchejta. Chantapis payqa, amigosnin kananchejpaj yanapawanchej. Payta tukuy sonqo sirvillasunpuni chayqa, noqallanchejwanpuni kanqa (Juan 6:44). Jehová Dios munakuwasqanchejmanta mana iskayrayaspaqa, ima llakiypi kaspapis tukuy atisqanchejta payta sirvillasunpuni. Jinapis Jehovaj munakuyninmanta iskayrayasun chayqa, ‘kallpanchej pisiyanqa’ (Pro. 24:10). Chantapis Satanás urmachiyta munawajtinchej, mana jarkʼakuyta atillasunchu (Efe. 6:16). Wakin hermanosqa mana creeyta atillankuchu, Jehová paykunata munakusqanta. Chaynejta creeyninku pisiyapun. Chayrayku Jehová munakuwasqanchejmanta mana iskayrayanapaj, tukuy atisqanchejta kallpachakuna. Chantapis mana llakiyninchejwan atipachikunapaj, Jehovamanta mañakuna sonqonchejta tiyaykuchinanta. Ajinamanta payqa ‘sonqonchejta, yuyayninchejtawan waqaychanqa’ (Sal. 94:19; Fili. 4:6, 7). Chantapis ashkha hermanosninchej mayta kallpachakushanku, noqanchej jinallataj Jehová munakuwasqanchejmanta mana iskayrayanankupaj. w21.04 pág. 20 párr. 1; pág. 21 párrs. 4-6

¿Imaynapí Jehovaj testigonman tukorqanchej? Ichá tatasninchej, trabajomanta chayri escuelamanta compañeronchej manachayrí uj testigo wasimanta wasi predicashaspa ‘sumaj willaykunata’ willariwarqanchej (Mar. 13:10). Chaymantataj uj hermano chayri uj hermana Bibliamanta yachachinawanchejpaj tiempochakorqa, kallpachakorqataj. Ajinapi Jehová Diosta munakorqanchej, pay munakuwasqanchejtataj yachakorqanchej. Ajinamanta Jehová Diosqa llajtanman pusamuwarqanchej. Kunantaj Jesucristoj yachachisqan kasqanchejrayku, wiñaypaj kausakuyta suyakushanchej (Juan 6:44). Jehová Diosqa uj hermanonejta chayri uj hermananejta paymanta cheqa kajta yachachiwarqanchej. Chantapis saqewarqanchej payta yupaychananchejta. Chaymantataj mayta agradecekunchej. Cheqa kajta yachasqanchejrayku, wajkunata yanapayta atinchej kausayman pusaj ñanta noqanchejwan khuska rinankupaj. Ichapis predicaytaqa mana manchachikunchejchu. Jinapis ichá manchachikunchej pillamanpis Bibliamanta yachachiyta. w21.07 pág. 2 párrs. 1, 2