Febrero

Jehovaqa kamachisninpa allinnintapuni munan. Payqa qayllanchejpi kashan, yachantaj maykʼajchus llakisqa kashasqanchejta (Sal. 145:18, 19). Qhawarina imaynatachus Jehová, profeta Eliasta yanapasqanta. Payqa Israelpi sajra runaspa chaupinkupi tiyakuspapis, Diosta kasukullarqapuni. Diospa enemigosnenqa kamachisninta mayta qhatiykacharqanku, Eliastapis wañuchiyta munarqanku (1 Rey. 19:1, 2). Eliasqa payllaña Jehovaj profetan kasqanta yuyarqa, chayrayku mayta llakikorqa (1 Rey. 19:10). Jehovataj chay rato Eliasta yanaparqa. Uj angelnejta willacherqa mana sapallanchu kashasqanta, manaqa ashkha israelitasraj pay jina, Diosta kasukushasqankuta (1 Rey. 19:5, 18). Jesustaj kʼachallamanta discipulosninman nerqa congregacionmanta hermanos familianku jina kananta (Mar. 10:29, 30). Chantapis Tatanchej Jehovaqa, payta sirvejkunata yanapananta nin (Sal. 9:10). w21.06 págs. 8, 9 párrs. 3, 4

Bibliamanta yachachisqanchejwanqa, religionespa llulla yachachiyninkuta sutʼiman orqhonchej. Chayraykutaj ashkha runas noqanchejpaj mayta phiñakunku. Iglesiasta kamachejkunaqa yachachinku, sajra runasta Dios infiernopi ñakʼarichisqanta. Paykunaqa chayta yachachinku runasta manchachinankurayku. Noqanchejqa munakuyniyoj Tatanchej Jehovata sirvinchej. Chayraykutaj chay llulla yachachiykunata sutʼiman orqhonchej. Chantapis iglesiasta kamachejkunaqa yachachillankutaj, runa wañupojtin imallanpis kausashallasqantapuni. Noqanchejtaj yachachinchej chayqa llulla kasqanta, nitaj Bibliaj yachachisqanman jinachu kasqanta. Imaraykuchus runa wañupojtin imallanpis kausashallanmanpuni chayqa, mana kausarimuy kananta necesitasunmanchu. Chantapis ashkha iglesiaspi yachachillankutaj, Diosqa imaynachus kananchejta, imatachus ruwananchejtapis ajllapuwasqanchejtaña. Jinapis noqanchejqa yachachinchej, sapa ujninchej Jehovata sirviytachus manachus ajllakuyta atisqanchejta. Chay llulla yachachiykunata sutʼiman orqhosqanchejraykutaj, iglesiasta kamachejkunaqa mayta noqanchejpaj phiñakunku. Chayrayku Diosmanta yachakusqanchejman jina kausakuna (Juan 8:45, 46). Cheqa kajpi sinchʼita sayana, Diosmanta yachakusqanchejman jinapunitaj tukuy imata ruwana. Ajinamanta mana Satanás jinachu ruwasun (Juan 8:44). Jehová Diosqa munan, Jesús jina ‘sajra kajta chejnisqata chejnikunanchejta, allin kajmantaj kʼaskakunanchejta’ (Rom. 12:9; Heb. 1:9). w21.05 pág. 10 párrs. 10, 11

Jatunchakushasqanchejta chayri tukuy imata munapayashasqanchejta reparakunchej chay, ¿imatá ruwasunman? Chay trampasmanta kacharichikuna. Apóstol Pabloqa nerqa Satanaspa trampasninpi urmajkunaqa, chay trampasmanta kacharichikuyta atisqankuta (2 Tim. 2:26). Amapuni qonqanachu Satanasmanta nisqa, Jehová aswan atiyniyoj kasqanta. Chayrayku Jehová yanapanawanchejta saqesun chayqa, Satanaspa mayqen trampanmantapis ayqeyta atisun. Satanaspa trampasninmanta kacharichikuyta atispapis, aswan allin kanman ni jaykʼaj chay trampaspi urmananchej. Chaytataj Jehovaj yanapaynillanwan ruwayta atisun. Ichapis yuyaspa chayri imata ruwaspa, Satanaspa trampasninpi urmanayashanchej. Chayrayku Jehovamanta sapa día mañakuna, chayta sutʼita reparachinawanchejpaj (Sal. 139:23, 24). Amapuni Satanaspa trampasninpi urmanachu. Satanasqa may chhika watastaña, ashkha runasta trampasninpi urmachishan. Jinapis pisi tiempomantawan watasqa kanqa, chantataj chinkachisqa kanqa (Apo. 20:1-3, 10). Maytapuni suyakushanchej Satanás chinkachisqa kananta. Chaykamataj allinta qhawarikunallapuni, Satanaspa trampasninpi mana urmanapaj. Tukuy atisqanchejta kallpachakuna mana jatunchakunapaj, nitaj tukuy imata munapayanapaj. Bibliaj kay nisqanta kasukunallapuni: ‘Kuraj Supaypa contranpi sayaykuychej, paytaj qankunamanta ayqenqa’. w21.06 pág. 19 párrs. 15-17

Jehová Diosqa mayta kusikun uj runa Bibliamanta yachakojtin, yachakusqantataj wajkunaman willarejtin (Pro. 23:15, 16). Chantapis maytachá kusikullantaj kay tiempopi tukuy atisqanchejta predicajtinchej, yachachejtinchej ima. Kay jatun onqoy kajtinpis, septiembre de 2019 watamanta agosto de 2020 watakama 7.705.765 estudiosta ruwarqanchej. Ajinamanta 241.994 runasta yanaparqanchej Jehová Diosman kausayninkuta qopunankupaj, bautizakunankupaj ima. Paykunapis wajkunata yanapallanqankutaj Jesuspa discipulosninman tukunankupaj (Luc. 6:40). Jehová Diosqa, mayta kusikun runasman paymanta yachachejtinchej. Runasman Jehová Diosta munakuyta yachachinapajqa, mayta kallpachakunchej. Jinapis Jehová yanapawanchej paymanta yachachinapaj. Chayrayku allin kanman uj runallamanpis Bibliamanta yachachinapaj kallpachakunanchej. Atikojtenqa tukuy predicasqanchej runasman Bibliamanta yachachiyta munasqanchejta nisunman. Ichapis paykunaqa yachakuyta munanqanku. w21.07 págs. 6, 7 párrs. 14-16

Rey Davidqa templo ruwakunanpaj kapuyninmanta qorqa ashkha qorita, qolqeta, waj imastawan (1 Cró. 22:11-16). Qan machituña kasqaykirayku, kallpaykitaj pisiyasqanrayku manaña construccionpi yanapakuyta atinkichu chayqa, atisqaykiman jina qolqesituykiwan yanapakullawajpuni. Chantapis jovenesman willariy Jehová Diosta sirvisqaykipi imastachus yachakusqaykimanta. Apóstol Pablopis imastachus yachasqanta wajkunaman yachachej. Payqa misionero jina viajashaspa Timoteota pusarqa, yachacherqataj imaynatachus predicayta, yachachiyta ima (Hech. 16:1-3). Timoteoqa Pablo sumajta wakichisqanrayku, sumajta Diosmanta yachachej (1 Cor. 4:17). Chantá payñataj Pabloj yachachisqanman jina wajkunata yachacherqa. w21.09 pág. 12 párrs. 14, 15

Discípulo Apolosmantawan apóstol Pablomantawan parlarina. Paykunaqa Diosmanta Qhelqasqasta allinta yachaj kanku. Iskayninku sumaj rejsisqas, sumaj yachachejkunataj karqanku. Chantapis paykunaqa ashkha runasta yanaparqanku Jesuspa discipulosninman tukunankupaj. Jinapis ni mayqenninku atipanakupi jina kayta maskʼarqankuchu (Hech. 18:24). Chayrayku Apolos Corintomanta ripusqanmanta pisi tiemponman, apóstol Pabloqa payman nerqa Corintoman ujtawan kutinanta (1 Cor. 16:12). Apolosqa sumajta parlasqanrayku, Diosmanta Qhelqasqatapis allinta rejsisqanrayku, sumaj willaykunata willarqa, hermanosnintapis kallpacharqa. Chantapis llampʼu sonqo runa karqa. Imajtinchus Aquilawan Priscilawan “Diospa ñanninmanta aswan sutʼita” yachachejtinku, mana phiñakorqachu (Hech. 18:24-28). Apóstol Pabloqa, sumajta yacharqa Apolos Jehovapaj allinta llankʼashasqanta. Jinapis Pabloqa mana llakikorqachu hermanos Apolosta aswan allinpaj qhawasqankumanta. Corintomanta hermanosman yuyaychasqanta leerispaqa, sutʼita reparanchej Pablo kʼumuykukoj sonqo, llampʼu sonqotaj kasqanta, paymantapis maychus kajllata yuyasqanta (1 Cor. 3:4-6). w21.07 págs. 18, 19 párrs. 15-17

Adanwan Evawan Diosta mana kasukuyta ajllasqankurayku, manaña Jehovaj familianmanta kanankupaj jinachu karqanku. ¿Wawasninkuwanrí ajinallatajchu karqa? Mana. Jehová Diosqa runasta munakusqanrayku, kʼata Wawanpa kausayninta qorqa. Ajinamantataj payta kasukojkunata wawasninta jina rejsikapunanpaj (Juan 3:16). Diosqa Jesucristo kausayninta qosqanrayku, 144 mil kasukoj runasta wawasninpaj rejsikaporqa (Rom. 8:15-17; Apo. 14:1). Chantapis may chhika runas, Diosta kasukuspa munayninta ruwashanku. Paykunapis Jehovaj familianmanta kayta suyakushanku 1.000 watas tukukuyta pruebata pasaytawan (Sal. 25:14; Rom. 8:20, 21). Chayrayku kunanña Jehovata ‘Tatáy’ ninku (Mat. 6:9). Wañuymanta kausarimojkunapis, Jehovamanta yachakuyta atillanqankutaj. Paykuna Diosta kasukuyta ajllanqanku chayqa, tiempowan Diospa familianmanta kallanqankutaj. w21.08 pág. 5 párrs. 10, 11

Apóstol Pabloqa chay nisqanman jinapuni ruwarqa. Payqa Diosmanta uj llankʼayta japʼerqa. Chaytaj karqa runasman Diosmanta yachachiy. Chaytataj ashkha watasta kausayninpi ñaupajmanpuni churarqa. Pabloqa predicarqa ‘tukuypa rikunanta, wasimanta wasitaj’ (Hech. 20:20). Payqa ima ratollapis predicajpuni. Pabloqa Atenas llajtapi Silastawan Timoteotawan suyaj jina, may respetasqa runasman sumaj willaykunata willarqa. Paykunamanta wakintaj tukuy sonqo japʼikorqanku (Hech. 17:16, 17, 34). Pabloqa “presochasqa” kashaspapis predicallarqapuni (Fili. 1:13, 14; Hech. 28:16-24). Pabloqa tiemponta manapuni usucherqachu. Payqa wajyarejpuni wajkunata paywan predicaj rinankupaj. Pabloqa ñaupaj kutipi misionero jina rishaspa Juan Marcosta pusarqa, qhepanpitaj Timoteota (Hech. 12:25; 16:1-4). Payqa mayta kallpachakorqa, paykunaman sumajta yachachinanpaj congregacionespi ruwanasta allinta ruwanankupaj, hermanosta kallpacharinankupaj, sumaj yachachejkuna kanankupajtaj (1 Cor. 4:17). w22.03 pág. 27 párrs. 5, 6

Ashkha runasqa nipuni creenkuchu Dios tukuy imata ruwasqanpi. Imaraykuchus paykunaqa imatachus rikusqallankupi creesqankuta ninku. Por ejemplo, paykunaqa creenku wayra kasqantapuni, mana wayrata rikuspapis. Biblia nisqanman jina, creeyniyoj runaqa yachan “imapichus creesqan cheqapuni kasqanta, chayta mana rikojtinpis” (Heb. 11:1). Imapichus creesqanchejta sutʼita yachanapajqa tiempochakuna, kallpachakunataj tiyan. Ashkha runastaj mana chayta ruwayta munankuchu. Chayraykutaj ashkha runasqa ninku Dios mana kasqanta. Ashkha cientificosqa sumajta estudiaytawan Diospuni jallpʼata, cielota ima ruwasqanta sutʼita repararqanku. Ichá wakin runasqa universidadespi mana Diosmanta yachachisqankurayku, mana Diospi creenkuchu. Jinapis ashkhas Jehovamanta yachakuyta, paytataj munakuyta qallarerqanku. Noqanchejpis paykuna jinallataj Diospa ruwasqasninta sumajta estudiananchej tiyan. Ajinamanta creeyninchejta kallpachasun sumajta leeyta yachaspapis manapis. w21.08 pág. 14 párr. 1; págs. 15, 16 párrs. 6, 7

Jesusqa chinkasqa qhari wawamanta parlarqa Jehová may khuyakuyniyoj kasqanta yachachinanpaj. Chay jovenqa wasinmanta ripusqa, “chaypitaj herencianta tukuchimusqa mana allinta kausaspa” (Luc. 15:13). Tiemponmantaj, millay kausaypi purisqanmanta pesachikusqa, kʼumuykukusqa, wasinmantaj kutipusqa. Tatantaj payta rikuspa kusirikusqa. Jesús nerqa: “Karullapiraj kashajtintaj, tatanpa sonqon wawayasqa payta rikuspa, usqhayllata taripamuspataj abrazaykusqa, may munakuywantaj muchʼaykusqa”, nispa. Chay tataqa mana wawanta kʼumuykachacherqachu, manaqa khuyakorqa, perdonarqa, wawanta jinallapunitaj japʼikaporqa. Chantapis wawanta perdonarqa juchasninmanta pesachikusqanrayku. Chay khuyakoj tataqa Jehová Dioswan ninakun. Jesusqa chay kikinchaywan yachacherqa Jehová perdonasqanta tukuy sonqo arrepientekojkunata (Luc. 15:17-24). w21.10 pág. 8 párr. 4; pág. 9 párr. 6

Kay tiempomanta religionesta kamachejkunaqa, tukuy imata ruwanku Diospa sutinta chinkachinankupaj. Chayrayku paykunaqa Bibliasninkumanta Diospa sutinta orqhorpanku, wakin kutistaj mana munankuchu Diospa sutin iglesiasninkupi oqharikunanta. Jinapis Jehovaj testigosnillan Diospa sutinta maychus kasqanman jina jatunchanchej. Ni mayqen religionpis noqanchej jina Diospa sutinta runasman rejsichinkuchu. Chantapis mayta kallpachakunchej Jehovaj testigosnin sutiwan rejsisqa kasqanchejman jina kausakunapaj (Isa. 43:10-12). Diospa Palabran nisqa Bibliatapis 240 millones kurajta imprimerqanchej. Chay Bibliapeqa Jehovaj sutin maychus kananpi kashan. Waj Bibliasta traducejkunataj Diospa sutinta orqhorpanku. Bibliamanta orqhosqa publicacionesninchejtapis 1.000 kuraj parlaykunapiña orqhonchej. Chaykunapipis Jehovaj sutin kashallantaj. w21.10 págs. 20, 21 párrs. 9, 10

Pisichikoj hermanosta yanapaspa Jehovata yupaychanchej. Jehovaqa israelitasman nerqa wajcha hermanosninkuta yanaparejtinku bendecinanta (Deu. 15:10). Noqanchejpis pisichikoj hermanosninchejta yanapanchejpuni. Chaytaj Jehovapajqa, paypajpis ruwashasunman jina (Pro. 19:17). Uj pacha Filiposmanta cristianosqa, apóstol Pabloman presochasqa kashajtin imatachus necesitasqanta apacherqanku. Pablotaj nerqa chayta ruwasqankoqa, “ima munay qʼapashaj jaywana jina, Diospaj ñaupaqenpitaj allinpaj qhawasqa” kasqanta (Fili. 4:18). Congregacionninchejmanta hermanospi piensarina: “¿Mayqen hermanollatapis chayri hermanallatapis yanapariyta atisunmanchu?”. Yanapata necesitaj hermanosninchejtaqa kallpanchejwan, imastachus ruwayta yachasqanchejwan, kapuwasqanchejwan ima yanaparinchej. Chaypajtaj tiempochakunchej. Chayta ruwaspataj Jehová Diosta mayta kusichinchej. Chantapis Jehovapajqa chayta ruwasqanchej, payta yupaychay jina (Sant. 1:27). Jehovata munayninman jina yupaychanapajqa, tiempochakunanchej tiyan, kallpachakunanchejtaj tiyan. Chaytataj ruwayta atillanchej (1 Juan 5:3). Imaraykuchus Jehová Diostaqa mayta munakunchej, jinallataj hermanosninchejtapis. w22.03 pág. 24 párrs. 14, 15  

Hermanosninchej ima llakiykunasniyojchus kashasqankupi piensarisun chayqa, paykunata khuyakuyta atillasun. Ichá uj hermananchej sinchʼi onqosqa kashanman, onqoyninmantataj ni jaykʼaj parlanmanchu. Jinapis yanaparejtinchejqa mayta kusikunman. Ichá yanaparisunman mikhunata waykʼuripuspa chayri wasinta llimphuchapuspa. Chayri uj hermano mana trabajoyoj qhepakunman. Jina kajtin ichá qolqesituwan yanaparisunman mana willaspalla pichus qoshasqanta. Chaytaj yanapanman waj trabajota tarikunankama. Khuyakuyniyoj runa kayta munanchej chayqa, ama suyanachu hermanosninchejraj yanapata mañakunawanchejta. Noqanchejqa Jehová jina paykunata yanaparisunman. Payqa mana mañakushajtillanchej tukuypaj sapa pʼunchay intita llojsichipuwanchej. Manataj agradecekuyta yachaj runasllapajchu. Jehovaqa tukuy ima necesitasqanchejta qowanchej. Ajinamanta mayta munakuwasqanchejta rikuchiwanchej. Payqa munakuyniyoj, may kʼachataj. Chayrayku paytaqa mayta munakunchej. w21.09 págs. 22, 23 párrs. 12, 13

Diospa munakuynenqa perdonananpaj aysan. Pillapis juchasninmanta pesachikojtin, cambiananpajtaj mayta kallpachakojtin, Jehová Diostaqa munakuynin aysan chay runata perdonananpaj. Davidqa uj salmopi Jehovamanta nerqa: “Mana juchasninchejman jinachu castigawanchej, nitaj pantasqanchejman jinachu pagachiwanchej”, nispa (Sal. 103:8-11). Davidqa yacharqa, sonqonchej mayta nanawasqanchejta imallamantapis sonqonchej juchachawajtinchej. Jinapis yachakullarqataj Jehovaqa perdonananpaj wakichisqa kasqanta. Davidqa uj mañakuypi nerqa imachus Jehovata perdonananpaj aysasqanta. Chaytataj kay diapaj textopi rikunchej. Jehovaqa perdonan paymanta mañakojkunapaj munakuynin may jatun kasqanrayku. Juchallikunchej chayqa, sonqonchej nanawasqanchejqa allillan. Chay yanapawasunman arrepientekunanchejpaj, cambiananchejpajtaj. w21.11 págs. 5, 6 párrs. 11, 12

Jehová Diosqa sutinta jatunpaj qhawan, munantaj tukuy respetanankuta (Isa. 42:8). Jinapis 6 mil watas jinaña Jehovaj sutin chʼichichasqa kashan (Sal. 74:10, 18, 23). Jehovaj sutintaqa, Kuraj Supay chʼichichayta qallarerqa. (Kuraj Supayqa niyta munan “llullakuspa tumpaj”). Payqa Adanman Evaman ima nerqa, Dios mana tukuy imatachu paykunaman qosqanta kausakunankupaj (Gén. 3:1-5). Chaymantapacha Jehová Diostaqa qhasimanta juchachanku kayta nispa: “Diosqa runasman mana tukuy ima necesitasqankutachu qon”. Jesusqa mayta llakikorqa tiempo pasasqanman jina Tatanpa sutinta aswan pisipaj qhawasqankumanta. Jehová Dioslla tukuy derechoyoj cielota jinallataj jallpʼata kamachinanpaj. Mana pay jinaqa waj kanchu (Apo. 4:11). Jinapis Kuraj Supayqa, angelesta, runasta ima yuyachiyta munarqa Jehová Diosqa mana derechoyojchu kasqanta gobernananpaj. Pisimantawan sutʼi yachakonqa Jehovalla sumaj Kamachej kasqan. Gobiernollantaj kay jallpʼaman allin kausayta apamonqa. w21.07 pág. 9 párrs. 5, 6

Tataqa wawasninman, señoranman ima mana faltachiyta munanchu mikhunata, ropata, wasita ima. Qolqemanta pisisqa kashanki chayqa, llakisqachá kashanki. Ajina llakiypi kashaspaqa, creeyniykita astawan sinchʼiyachiwaj. Chantapis Jehová Diosmanta mañakuy, Jesús imastachus Mateo 6:25-34 versiculospi nisqanta leeriy, chaypitaj tʼukuriy. Jehovaqa kay tiempopi paypaj astawan llankʼajkunaman ni imata faltachinchu. Chaypi tʼukureyqa mayta yanapasunkiman (1 Cor. 15:58). Imaynatachus Jehová Dios kay tiempopi hermanosta yanapasqanta reparaspaqa, qantapis kikillantataj yanapasunanpi atienekunki. Payqa yachan imatachus necesitasqaykita, chaytataj qosonqapuni. Jehová Dios yanapasusqanta reparaspaqa, creeyniyki astawan yapakonqa, jamoj tiempopi sinchʼi llakiykunatataj aguantallanki. w21.11 pág. 20 párr. 3; pág. 21 párr. 6

Jesusqa juchamanta, wañuymantawan kacharichiwanchej. Chayta yachaytaj, cristianosta mayta kallpachawanchej. Ashkha cristianosqa runas paykunaman churanakojtinkupis, chayri imaymana llakiykunapi kaspapis predicallankupuni. Apóstol Juanmanta parlarina. Payqa 60 watas kurajtasina predicarqa, juchamanta wañuymantawan Jesús kacharichiwasqanchejmanta. Juanqa 100 watasniyoj jinaña kashaspa, “Diosmanta Jesusmantawan” predicasharqa (Apo. 1:9). Romamanta kamachejkunataj, chayta mana allinpajchu qhawarqanku. Chayrayku Patmos churuman presota aparqanku. Apóstol Juanqa sinchʼi creeyniyojpuni karqa, tukuy chay llakiytataj aguantarqa. Apóstol Juanqa qhelqasqan librospi Jesusta mayta munakusqanta, runasrayku wañusqanmanta mayta agradecekusqanta ima rikucherqa. Payqa chay librospi 100 kutismanta astawan, Jesuspa wañuyninmanta, imaynatachus chay yanapawasqanchejmanta ima parlarqa (1 Juan 2:2). Sutʼita reparanchej Juanqa, Jesús kausayninta qosqanmanta maytapuni agradecekusqanta. w21.04 pág. 17 párrs. 9, 10

Jehová Diosqa munarqa kamachisnin mana sano runasta allinpaj qhawanankuta. Jehovaqa israelitasman nerqa ama uj joqʼara runata maldecinankuta imapis pasarpananpaj chayri mana allin rinanpaj. Chayta ruwaspaqa nipuni allintachu ruwankuman karqa. Imajtinchus joqʼara runaqa, imatachus nisqankuta mana uyarispa mana kutichikuyta atinmanchu karqa. Chantapis Levítico 19:14 versiculopi, Diosqa israelitasman nerqa ama uj ciego runaj ñaupaqenman imatapis urmananpaj churanankuta. Uj libropi mana sano runasmanta parlaspa nin: “Israel kasharqa chay lugarpi runasqa, mana sano runasmanta aprovechakoj kanku, sufrichejtaj kanku”, nispa. Ichapis uj runaqa uj ciego runaj ñaupaqenman imatapis churanman urmachinanpaj chayri asikunanpaj. ¡Chayta ruwaj runaqa manchay sajrapuni! Jehovaqa 14 versiculopi nisqanwan llajtanta yanaparqa, mana sano runasta khuyakuyta yachanankupaj. w21.12 págs. 8, 9 párrs. 3, 4

Jacobqa hermanon paypaj may phiñasqallapuni kashasqanta yachaspa “mayta mancharikorqa, llakikorqataj”. Chayrayku Jehová Diosman tukuy sonqo orakorqa, chaymantataj hermanonman ashkha regalosta apacherqa (Gén. 32:9-15). Chantá Jacobqa hermanonman qayllaykusqanman jina, qanchis kutita pampakama kʼumuykukorqa. Chaywantaj kʼumuykukoj sonqo kasqanta, hermanon Esauta respetasqanta ima rikucherqa. Ajinamantataj allinyakaporqanku (Gén. 33:3, 4). Jacob hermanonwan tinkunanpaj imaynatachus wakichikusqanmanta, imaynatachus payman qayllaykusqanmanta ima mayta yachakusunman. Ñaupajtaqa kʼumuykukoj sonqowan Jehová Dios yanapananta mañakorqa. Chaymantataj mañakusqanman jina ruwananpaj kallpachakorqa hermanonwan allinyakunanpaj. Esauwan parlaspataj, mana nerqachu pichus juchayoj kasqanta. Astawanpis payqa hermanonwan allinyakapuytapuni munarqa. Noqanchejpis, ¿imaynatá Jacob jina ruwasunman? (Mat. 5:23, 24). w21.12 pág. 25 párrs. 11, 12

Pantaj runas kasqanchejrayku, ichá wakin kutisqa yuyasunman ni imapaj valesqanchejta, chayri ni pí munakunawanchejpaj jina kasqanchejta (1 Juan 3:19). Chayrayku ichá yuyasunman Jesús noqanchejrayku wañojtinpis, mana perdonasqa kayta atinanchejta. Maykʼajllapis ajinata yuyaspaqa, ‘Diosqa sonqonchejmanta aswan kuraj’ kasqanta yuyarikuna. Jehovaqa mayta munakuwanchej, perdonawanchejtaj. Chaymanta mana iskayrayanapaj, tukuy atisqanchejta kallpachakuna. ¿Imatá chaypaj ruwasunman? Bibliata sapa día estudiana, mana saykʼuspa Jehová Diosmanta mañakuna, hermanosninchejmantataj ama karunchakunachu. ¿Imaraykutaj chay kinsa imasta ruwananchejpuni tiyan? Chayta ruwaspaqa, Jehová Diosta astawan rejsisun, mayta munakuwasqanchejtataj reparasun. Sapa día Bibliata estudiasqanchejpi tʼukurisun chayqa, yuyayninchejpi, sonqonchejpi kaj imasta astawan cheqanchasun (2 Tim. 3:16). w21.04 págs. 23, 24 párrs. 12, 13

Creeyninchej sinchʼi kananpajqa, mana yachakunallanchejchu tiyan. Imatachus yachakushasqanchejpi tʼukurinanchej tiyan. 77 Salmota qhelqajpi piensarina. Payqa llakisqa kasharqa. Imajtinchus yuyarqa Jehová Diosqa payta, israelitastapis niña allinpajchu qhawasqanta. May llakisqa kasqanrayku manaña chʼisisninpis puñukuyta atejchu (versículos 2-8). ¿Imatá ruwarqa? Payqa Jehovaman nerqa: “Tukuy ruwasqasniykipi yuyasaj. Ruwasqasniykipi tʼukurisaj”, nispa (versículo 12). Payqa sumajta yacharqa imastachus Jehová ñaupajpi llajtanrayku ruwasqanta. Jinapis piensarerqa: “¿Qonqanchu Diosqa khuyakuyta? ¿Phiñasqa kaspachu manaña khuyakuwanchej?”, nispa (versículo 9). Chay salmistaqa piensarerqa, imastachus Jehová ruwasqanpi, imaynatachus aswan ñaupajpi llajtanta khuyakusqanpi ima (versículo 11). Chaytaj yanaparqa Jehová llajtanta mana saqerparinanpi atienekunanpaj (versículo 15). w22.01 pág. 30 párrs. 17, 18

Jehová Diosqa wañupoj kamachisninta mayta ujtawan rikuyta munashan (Job 14:15). Payqa maytachá munashan amigon Abrahanta ujtawan rikuyta (Sant. 2:23). Maytachá munashallantaj Moisesta ujtawan rikuyta. Paywanqa “uyapura” parlaj (Éxo. 33:11). Chantapis maytachá munashallantaj ujtawan uyariyta Davidta, waj salmistasta ima payta jatunchaspa takisqankuta (Sal. 104:33). Diosqa chay amigosnin wañupojtinkuñapis paykunamanta yuyarikullanpuni (Isa. 49:15). Jehovaqa paykunamanta tukuy imitata yuyarikun. Tumpamantawanqa paykunata kausarichimonqa, tukuy sonqo mañakusqankuta uyarenqa, yupaychasqankuwanpis kusikonqa. Wañusqas kausarimunankuta yachayqa, mayta sonqochawanchej. Jehovaqa yacharqa Edén huertapi paypa contranpi oqharikusqankutawan, niraj chayta allinchashajtin tukuy imapis aswan mana allinman tukunanta. Jehovaqa nipuni allinpajchu qhawan kay tiempopi sajra ruwaykunata, sajra kausay kasqanta ima. w21.07 pág. 10 párr. 11; pág. 12 párr. 12

Hermanosninchejta munakuspaqa, Jesús kausayninta qosqanmanta agradecekusqanchejta rikuchinchej. Imaraykuchus Jesusqa, tukuy hermanosninchejrayku wañorqa, manataj noqanchejraykullachu. Ajinamanta hermanosninchejta mayta munakusqanta rikucherqa (1 Juan 3:16-18). Noqanchejpis hermanosninchejwan allinta kausakuspa, paykunata munakusqanchejta rikuchinchej (Efe. 4:29, 31–5:2). Paykunataqa onqosqa kashajtinku, chayri imaymana sinchʼi llakiykunapi kashajtinku yanaparinchejpuni. Jinapis uj hermano sonqonchejta nanachiwajtinchej, ichá mana paykunata perdonayta atillanchejchu (Lev. 19:18). Jina kajtenqa, allin kanman kay yuyaychaypi piensarinanchej: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej” (Col. 3:13). Hermanosninchejta sapa kuti perdonaspaqa, Jehovaman Wawanta noqanchejrayku qosqanmanta mayta agradecekunchej. w21.04 pág. 18 párrs. 12, 13

Apolosmanta, Pablomanta ima yachakunchej, Jehovapaj tukuy atisqanchejta llankʼashasqanchej, ashkha runastataj bautismoman chayanankupaj yanapashasqanchejqa, Jehovaj yanapaynillanwan kasqanta. Yachakullanchejtaj congregacionpi cargosniyoj kaspaqa, hermanoswan allinta, ujchasqataj kausakunapaj astawan kallpachakunanchej kasqanta. Maytapuni agradecekunchej ancianoswan siervos ministerialeswan allinta, ujchasqataj kausakunanchejpaj yanapawasqanchejmanta. Paykunaqa Bibliaman jinapuni imatapis yuyaychariwanchej. Chantapis mana allinpaj qhawasqa kaytachu maskʼanku. Manaqa yanapawanchej Jesusta kasukunanchejpaj, pay jinataj kananchejpaj (1 Cor. 4:6, 7). Imata sumajta ruwayta atisqanchejpis chayri yachasqanchejpis Jehová Diosmanta jamun. Ichá yuyasunman pisillata yanapakushasqanchejta. Jinapis imaynatachus juchʼuy ladrillitoswan jatun wasita ruwakun, ajinallatataj pisi imasta ruwasqanchejwanqa, congregacionpi tukuy ujchasqa kanapaj yanapakunchej. Chayrayku mayta kallpachakuna ama wajkunawan atipanakupi jina kanapaj. Chantapis tukuy atisqanchejta yanapakuna congregacionpi allinta, ujchasqataj kausakunapaj (Efe. 4:3). w21.07 pág. 19 párrs. 18, 19

Noqanchejqa wañupoj familiaresninchejta chayrí amigosninchejta kausarinpojtinku rikukapusunpuni. Imajtinchus Jesús amigosninta sonqochashaspa waqarikusqanqa, sutʼita rikuchiwanchej wañusqasta kausarichimuytapuni munasqanta (Juan 11:35). Wañupoj familiarninkumanta llakisqa kajkunata yanaparina. Jesusqa Martawan Mariawan khuska waqarikorqa. Chantapis paykunata uyarerqa, sonqocharqa ima (Juan 11:25-27). Noqanchejpis kikillantataj ruwasunman munasqa familiarninku wañupusqanrayku llakisqa kajkunawan. Hermano Danmanta parlarina. Payqa anciano, Australiapitaj tiyakun. Pay nin: “Señoray wañupusqantawan maytapuni yanapata necesitarqani. Ashkha qhariwarmistaj tiempochakorqanku ima horallapis uyarinawankupaj. Paykunaqa llakiyniyta willarikojtiy uyariwarqanku, anchata waqajtiypis uyarillawarqankupuni. Llakisqa kasqayrayku ni imata ruwayta atejtiytaj, paykunaqa mayta yanapawarqanku. Autoyta mayllapuwaj kanku, wakin imasta rantinpuwaj kanku, waykʼupuwajtaj kanku. Sapa kutitaj noqawan khuska Jehová Diosmanta mañakoj kanku. Paykunaqa llakiypi kashajtiy sutʼita rikuchiwarqanku amigosniy, hermanosniytaj kasqankuta”, nispa (Pro. 17:17). w22.01 pág. 16 párrs. 8, 9

Jehovaqa allinninchejtapuni munan (Pro. 4:20-22). Payqa Palabrannejta, uj publicacionnejta chayri creeypi sinchʼi sayasqa hermanosnejta yuyaychariwanchej. Chaytataj ruwan mayta munakuwasqanchejrayku (Heb. 12:9, 10). Chayrayku pillapis yuyaychariwajtinchejqa imatachus niwasqanchejpi piensarina, amataj imaynatachus niwasqanchejpichu. Wakin kutisqa pillapis imaynatachus yuyaychariwasqanchej mana allinchu rijchʼawasunman. Chayrayku pitapis yuyaycharinanchej kajtenqa, kʼachamanta, japʼikunanpaj jinataj yuyaycharina (Gál. 6:1). Pillapis yuyaychariwajtinchejtaj imatachus niwasqanchejpi piensarina, mana kʼachallamantachu yuyaychariwajtinchejpis. Ichá piensarisunman: “Imaynatachus yuyaychawasqan mana allinchu rijchʼawajtinpis, ¿imallatapis chaymanta yachakuymanchu? Mana kʼachallamantachu yuyaychariwajtinpis, ¿chaywan yanapachikuymanchu?”, nispa. Pillapis yuyaychariwajtinchejqa, allin kanman tukuy atisqanchejta kallpachakunanchej chaywan yanapachikunapaj. w22.02 pág. 12 párrs. 13, 14

Jehovaqa yachan sajra yuyayninchejta, costumbrestapis saqepunapajqa, mayta kallpachakunanchej kasqanta, nitaj uj ratopichu chayta saqeyta atinanchejta (Sal. 103:13, 14). Jinapis Jehovaqa cambianapaj mayta yanapawanchej, yachayta, kallpata imataj qowanchej. Chaytataj ruwan Palabrannejta, espíritu santonnejta, llajtannejta ima. Bibliata estudiashaspa allinta qhawarikuy imaspichus cambianayki kasqanta. Diospa Palabranqa uj espejo jina. Chayrayku yanapawasunman reparakunapaj imatachus yuyasqanchejta, imaynatachus parlasqanchejta, imatachus ruwasqanchejtapis (Sant. 1:22-25). Chantapis Jehovalla astawan yanapayta atisunkiman. Payqa yanapasuytapuni munan. Imajtinchus payqa yachan imachus sonqoykipi kasqanta (Pro. 14:10; 15:11). Chayrayku tukuy atisqaykita kallpachakuy sapa día orakunaykipaj, Bibliatapis estudianaykipaj. Qanpuni reparay Jehovaj kamachiykunasnenqa allinninchejpaj kasqanta. Jehová Diosqa imatapis niwanchej allinninchejpajpuni. Jehovaj kamachiykunasninta kasukojkunaqa manaña pisipajchu qhawakunku, yachanku imapajchus kausasqankuta, kusisqataj kanku (Sal. 19:8-11). w22.03 pág. 4 párrs. 8-10

Diosta yupaychanapaj wasista ruwaspa, allinchaspa ima Jehovata yupaychanchej. Israelitasqa Diosta yupaychana toldota, chaypaj tukuy imastawan ruwarqanku. Jehovataj chayta paytapis yupaychashankuman jina qhawarqa (Éxo. 36:1, 4). Jehovaqa ajinallatataj qhawan kay tiempopi Tantakuna Wasista, payta yupaychanapaj wasistapis ruwasqanchejta. Wakin hermanostaj chay llankʼaypi tukuy tiemponkuwan yanapakunku. Ajinata ruwaspa Diospa Gobiernonta yanapakusqankumanta mayta agradecekunchej. Chantapis chay hermanosqa tiempochakunku predicanankupaj. Paykunamanta wakintaj precursores regulares kayta munanku. Ancianostaj chay hermanos precursores regulares kayta atisqankutachus manachus sumajta qhawaykurispa, chayman jina saqenku precursores kanankuta. Ajinamanta ancianospis Diosta yupaychana wasis ruwakunanpaj yanapakushanku. Construccionpi trabajayta yachaspapis manapis, tukuyninchej yanapakusunman chay wasista llimphuchaypi, allinchaypi ima. w22.03 pág. 22 párrs. 11, 12