Enero

Timoteoqa sumaj cristiano kasqanrayku Jehovata sumajta sirverqa (Fili. 2:19-22). Apóstol Pablo imastachus Timoteomanta nisqanpi reparanchej, Timoteoqa kʼumuykukoj sonqo kasqanta, Jehovata munakusqanta, kʼuchi runa kasqanta, ruwanasnintapis sumajta juntʼasqanta. Timoteoqa hermanostapis yanapariytapuni munaj. Chayrayku Pabloqa Timoteota munakorqa, congregacionpi jatun ruwaykunatataj qorqa. Noqanchejpis Timoteo jina aswan sumaj cristianos kanapaj kallpachakuna. Ajinamanta Jehovapaj aswan munasqa kasun, congregacionpipis astawan yanapakusun (Sal. 25:9; 138:6). Imaspichus astawan ñauparinanchej kasqanta yachanapajqa, Jehovamanta mañakuspa sumajta qhawarikuna. Chantá piensarina imayna runachus kayta munasqanchejpi. Ichá astawan kallpachakusunman hermanosta entiendenapaj. Chantapis ichá kallpachakullasunmantaj wajkunawan allinpi kanapaj chayri perdonayta yachanapaj. Imapichus astawan kallpachakunanchej kasqanta yachanapajqa, sumaj amigonchejta tapurikusunman (Pro. 27:6). w22.04 pág. 23 párrs. 4, 5

Jehovaqa munan kusisqas kananchejta. Chaytataj yachanchej Diospa espíritu santonpa poqoyninmanta ujqa kusikuyniyoj kay kasqanrayku (Gál. 5:22). Wajkunaman qorispaqa aswan kusisqa kanchej. Chayrayku predicanapaj, hermanosta imaynallamantapis yanapanapaj tukuy atisqanchejta kallpachakuspaqa, aswan kusisqa kanchej (Hech. 20:35). Apóstol Pabloqa kay pʼunchaypaj versiculopi nerqa, kusisqallapuni kanapaj iskay imas yanapanawanchejta. Ñaupaj kaj, Jehovapaj tukuy atisqanchejta llankʼaspaqa kusisqa kasun (Mat. 22:36-38). Iskay kaj, mana wajkunawan kikinchakunapaj sumajta qhawarikuna. Jehovaman mayta agradecekunanchej tiyan sanitos kasqanchejmanta, llajtanpi yachachiwasqanchejmanta chayri imatapis sumajta ruwayta yachasqanchejmanta. Chantapis wakin hermanos predicacionpi aswan sumajta ruwasqankumanta kusikunanchej tiyan. Imajtinchus paykunaqa imatachus ruwayta yachasqankuwan Jehová Diosta jatunchashanku. w22.04 pág. 10 párrs. 1, 2

Llulla religionesqa ujllata chinkarparichisqa kanqanku, chaytaj kay mundomanta runasta tʼukushajta saqenqa (Apo. 18:8-10). Jatun Babilonia chinkachisqa kasqanqa mundontinmanta runasta mancharichenqa, chantapis ichá problemasta apamonqa. Jehovaj llajtantaj kay iskay imasrayku kusikonqa: Llulla religionqa, pichus unaymantaña Jehová Diospa enemigon, chinkachisqa kanqa, tumpitamantawantaj kay sajra mundomanta kacharichisqa kasun. Danielqa nerqa ‘cheqa yachayqa astawan ashkhayananta’. Jinapunitaj kashan. Kunanqa kay tiemponchejmanta profeciasta astawan sutʼitaña entiendenchej (Dan. 12:4, 9, 10). Chay profecías maychus kasqanman jina juntʼakusqanta yachaspaqa, Jehovata, Palabrantapis astawan jatunpaj qhawanchej (Isa. 46:10; 55:11). Chayrayku creeyninchejta sinchʼiyachinallapuni Bibliata sumajta estudiaspa, wajkunatapis Jehová Diosman qayllaykunankupaj yanapaspa. Jehovaqa paypi atienekojkunata jarkʼanqa, ‘sonqo tiyaykuytataj qonqa’ (Isa. 26:3). w22.07 págs. 6, 7 párrs. 16, 17

Apocalipsis libropeqa nin Diospa Gobiernonqa cielopi kamachishasqantaña, Satanastaj kay jallpʼaman wijchʼuchikamusqanta (Apo. 12:1-9). Chayraykutaj cielopi kajkunaqa kusikunku, jallpʼapi kausakojkunataj aswan ashkha problemaspi rikhurinchej. Imajtinchus Satanasqa kay jallpʼapi Jehovaj kamachisninwan rabianta pagachikushan (Apo. 12:12, 15, 17). Satanás qhatiykachawajtinchejpis, ¿imataj yanapawasunman sinchʼillatapuni sayanapaj? (Apo. 13:10). Chaypajqa yanapawasun imachus aswan qhepaman kananta yachay. Apóstol Juanqa Apocalipsis libropi nerqa ima bendicionestachus tumpamantawan japʼinanchejta. Ujnin bendicionqa kanqa, Jehová Diospa enemigosnin chinkachisqa kananku. Apocalipsis libropi apóstol Juan mosqoypi jina rikusqan imasqa, kikinchaykunalla kanku. w22.05 pág. 8 párrs. 1-3

Jehovaman churanakojkunaqa, maytapuni phiñakonqanku Diosta sirvejkuna cheqa sonqos kasqankumanta. Chayraykutaj uj qotu naciones jallpʼantinpi mayta Diospa llajtanta qhatiykachanqanku. Paykunamanta parlaspa Bibliaqa nin Magogmanta Gog Diospa llajtanpa contranpi oqharikunanta (Eze. 38:14, 15). ¿Imatá Jehová ruwanqa llajtanta mayta qhatiykachajtinku? Payllataj kutichiwanchej: “Sinchʼi phiñakuyniy phatanqa”, nispa (Eze. 38:18, 21-23). Chanta, ¿imataj kanqa? Apocalipsis 19 capítulo chayta sutʼinchan. Jehovaqa Wawanta kachamonqa llajtanta jarkʼananpaj, enemigosnintataj atipananpaj. Jesustaj mana sapallanchu kanqa. Paywanqa kanqanku ‘cielomanta soldados’ nisunman ángeles, 144.000 ajllasqa cristianoswan khuska (Apo. 17:14; 19:11-15). Chanta, ¿imapitaj chay maqanaku tukukonqa? Jehovaman churanakoj tukuynin runas, organizaciones ima tukuchisqa kanqanku (Apo. 19:19-21). w22.05 pág. 17 párrs. 9, 10

Adanwan Evawan juchallikusqankutawan, Jehovaqa may importante profecianejta mirayninkuman uj suyakuyta qorqa. Chay profecía kashan Génesis 3:15 versiculopi. Chaypi nin: “Qantawan warmitawan chejninachisqaykichej, mirayniykiwan, paypa mirayninwanpis chejninakonqanku. Miraynenqa umaykita pʼaltarparisonqa, qantaj mirayninpa chaki talonninta khaninki”. Kay profeciaqa Bibliamanta ñaupaj kaj libropi kashan, Bibliaj tukuynin librosnintaj chay profeciaman ujchasqa kashanku. Imaynatachus uj libroj paginasnin ujllapi sumaj kʼaskasqa kashanku, ajinallatataj Bibliaj tukuynin librosninpis Génesis 3:15 versiculoman kʼaskasqa kashanku. Bibliaj tukuynin librosnin parlan, Dios uj Salvajta kachamunanmanta Diablota, payta qhatejkunatawan tukuchinanpaj. Chayqa Jehová Diosta munakojkunapaj may sumaj. Bibliata estudiaspaqa imaynatachus kay profecía juntʼakusqanta yachasun, jinallataj imaynatachus yanapawasqanchejta. w22.07 pág. 14 párrs. 1-3

Tatas, wawasniykichejta Jehovata munakunankupaj yanapanaykichejpajqa, paymanta yachayta mañakuychej (Sant. 1:5). Jehová jinaqa ni pi sumajta yuyaychariwasunmanchu. ¿Imajtintaj chayta ninchej? Qhawarina iskay imasta. Jehovaqa tukuy tatasmanta aswan experienciayoj (Sal. 36:9). Chantapis Jehovaj yuyaychaykunasnenqa allinninchejpajpuni (Isa. 48:17). Jehovaqa Palabrannejta, llajtannejta ima tatasman ashkha yanapasta qon. Chaytaj tatasta yanapan wawasninkuman Jehovata munakuyta yachachinankupaj (Mat. 24:45). Chay yanapasmanta wakenqa, “Ayuda para las familias” nisqa yachaqanas kashan. Chay yachaqanasqa ñaupaj wataspi llojserqa ¡Despertad! revistapi. Kunantaj Internetpi jw.org nisqapi kashan. Chantapis chaypeqa kallantaj tataspa experienciasninkumanta ashkha videos. Chaytaj tatasta yanapanman Jehová yuyaychasqanman jina wawasninkuta uywanankupaj (Pro. 2:4, 5). w22.05 pág. 27 párrs. 4, 5

Jehová jina perdonajqa mana pipis kanchu. Ñaupaj kaj, Jehovaqa perdonanapaj wakichisqapuni kashan. Iskay kaj, Jehovaqa sumajta rejsiwanchej. Payqa tukuy imata noqanchejmanta yachan, rikuntaj sonqomantapachapunichus manachus arrepientekusqanchejta. Kinsa kaj, Jehovaqa perdonawajtinchej manaña ujtawan chaymanta yuyarikunchu. Chayraykutaj llimphu sonqoyoj kayta atinchej, Jehovataj allinpaj qhawawanchej. Pantaj runas kashaspaqa juchallikullasunpuni. Jinapis mayta sonqochawanchej imatachus Perspicacia para comprender las Escrituras, volumen 1, página 209 nisqan. Chaypi nin: “Jehovaqa khuyakuyniyoj Dios, yachantaj sonqonchejqa juchamanpuni aysawasqanchejta. Pantaj runasraj kasqanchejrayku pantasunpuni. Chayrayku pantasqanchejmanta ama sonqonchejta nanachikunallapunichu (Sal. 103:8-14; 130:3). Jehovaj kamachiykunasninman jina kausakunapaj tukuy atisqanchejta kallpachakushanchej chayqa, kusikuna (Fili. 4:4-6; 1 Juan 3:19-22)”. w22.06 pág. 7 párrs. 18, 19

Satanasqa mana gobiernoswan chejnichispallachu manchachiwanchej. Wakenqa testigosman tukojtinku, familianku imatachus ninankumanta manchachikunku. Wakenqa chayta astawan manchachikunku maqachikunankumanta nisqaqa. Paykunaqa familiankuta mayta munakunku, munankutaj paykunapis Jehovata rejsinankuta, munakunankutapis. Chayrayku familiasninku Jehovamanta, kamachisninmantapis mana allinta parlajtinku sonqonku mayta nanan. Jinapis chay familiaresninkoqa wakin kutis Jehovata sirviyta qallarinku. Sichus mayqen familiallanchejpis noqanchejmanta manaña yachayta munanchu chay, ¿imatá ruwasunman? Salmo 27:10 imatachus nisqanqa may kʼachitupuni, maytapuni kallpachawanchej. Amapuni qonqanachu Jehová mayta munakuwasqanchejta. Ajinamanta wajkuna churanakuwajtinchejpis mana manchachikusunchu, nitaj iskayrayasunchu aguantasqanchejrayku Jehová bendecinawanchejmanta. Jehovaqa ni pi jina tukuy ima necesitasqanchejta qowasun kausakunanchejpaj, yanapawasuntaj sonqo tiyasqas, kusisqas, paypa qayllallanpipunitaj kananchejpaj. w22.06 págs. 16, 17 párrs. 11-13

Jesustaqa kay jallpʼapi kashajtin qhasimanta juchacharqanku: “Kay runaqa anchata mikhun, vinomanta wañusqataj”, nispa. Chantá paymanta nillarqankutaj Satanaspa atiyninwan imatapis ruwasqanta, samarikuna pʼunchayta mana respetasqanta, Diospa contrantataj parlasqanta (Mat. 11:19; 26:65; Luc. 11:15; Juan 9:16). Chaywanpis Jesusqa ni jaykʼaj sajrallawantaj kutichikorqachu. Noqanchejpis Jesús jina kana wajkuna sonqonchejta nanachinawanchejpaj jina parlawajtinchej, amataj sajrallawantaj kutichikunachu (1 Ped. 2:22, 23). Jinapis wakin kutisqa, runas mana allinta parlawajtinchej mana kʼachas kayta atillanchejchu (Sant. 3:2). Chanta, ¿imataj yanapawasunman kʼachas kanapaj? Predicacionpi pillapis kʼamirpawajtinchejqa ama phiñakunachu. Hermano Samuel nin: “Wasiyoj phiñakojtenqa, piensarini Bibliamanta yachakuytapuni necesitasqanpi, cambiaytataj atisqanpi”, nispa. Chantapis ichá wasiyojqa phiñakunman, waj imasta ruwashajtinpuni chayasqanchejrayku. Wasiyojta phiñasqata tarispaqa, sonqollanchejpi Jehovamanta mañakuna sonqo tiyasqa kanapaj, respetowan parlanapaj ima. w22.04 pág. 6 párrs. 8, 9

Tatasqa yachanku wawasninku Jehovaman qayllaykunankupaj, paykunawan Bibliata estudianankupuni kasqanta (2 Tim. 3:14-17). Jinapis Bibliaqa nillawanchejtaj, jovenesqa waj jinamantapis Jehovamanta astawan yachakuyta atisqankuta. Proverbios libropeqa uj tata wawanwan parlashan, yuyarichishantajsina Jehovaj kʼacha kaykunasninmanta amapuni qonqakunanta, mayqenkunachus ruwasqasninpi sutʼi rikukun chaykunamanta (Pro. 3:19-21). Tatas, ¿maytacharí kusirikunkichej wawasniykichejwan khuska Diospa ruwasqasninta qhawarispa? Chay kutispi wawasniykichejta yanapariychej, “paypa ruwasqasninpi” ima sumaj kʼacha kaykunasninchus rikukusqanta reparanankupaj. (Rom. 1:20). Tatas, reparaychej imaynatachus Jesús Diospa ruwasqasninwan yachachisqanta. Uj pacha, Jesusqa discipulosninta nerqa qharqañastawan tʼikastawan qhawarinankuta (Luc. 12:24, 27-30). Jesusqa Jehová mana michʼachu kasqanmanta, kʼachataj kasqanmanta kayta discipulosninman yachacherqa: Jehovaqa kasukoj kamachisninta mikhuchinanta, ropatapis qonanta, imaynatachus qharqañasta mikhuchin, tʼikastapis vistin ajinata. w23.03 págs. 20, 21 párrs. 1-4

Jehovaman agradecekunchej Wawannejta paymanta mañakuyta atisqanchejmanta. Jehovaqa Jesusnejta mañakusqanchejta uyariwanchej, kutichiwanchejtaj. Chayrayku Jesuspa sutinpi mañakunanchej tiyan. Payqa juchasninchejta perdonawanchej Jesús wañusqanrayku (Rom. 5:1). Bibliaqa nin Jesusqa ‘kuraj kaj sacerdotenchej’ kasqanta, ‘cielopi Diospa kamachina tiyananpa pañanpi tiyaykukusqanta’ ima (Heb. 8:1). Jesusqa “yanapawajninchej, paytaj Tata Dioswan kashan” (1 Juan 2:1). Mayta Jehovaman agradecekunchej Jesusta Kuraj kaj Sacerdotenchejta jina churapuwasqanchejmanta. Jesusqa khuyakuwanchej, sumajta entiendewanchej, ‘noqanchejpajtaj mañapuwanchej’ (Rom. 8:34; Heb. 4:15). Sichus Jesús mana noqanchejrayku wañunmanchu karqa chayqa, mana Jehovamanta mañakuyta atisunmanchu karqa. Jehovamanqa ni jaykʼaj agradecekuyta tukusunmanchu, munasqa Wawanta noqanchejrayku kachamusqanmanta. w22.07 pág. 23 párrs. 10-12

Confianza runaqa kallpachakun imatachus nisqanta juntʼananpaj, cheqa kajtapunitaj parlananpaj (Sal. 15:4). Wajkunataj yachanku paypi confiayta atisqankuta. Noqanchejpis munanchej hermanosninchej, hermanasninchejpis noqanchejpi confianankuta. Mana wajkunata obligasunmanchu noqanchejpi confianankupaj. Noqanchej rikuchinanchej tiyan de confianza kasqanchejta. De confianza kayqa qolqe jina, mana ganakuyta atillanchejchu, jinapis chay rato wayrarpachinchej. Jehovaqa sutʼita rikuchiwanchej confianapaj jina kasqanta. “Payqa atienekunapaj jina, tukuy ima ruwasqanpis may sumajpuni” (Sal. 33:4). Jehovaqa munan noqanchejpis pay jinallataj kananchejta (Efe. 5:1). Maytapuni agradecekunchej Jehová familianman pusaykamuwasqanchejmanta. Chay familianpi kaj hermanosqa munanakunku, confianapaj jinataj kanku. Sapa ujninchej kallpachakunallanchejpuni tiyan hermanosninchej noqanchejpi confianankupaj. Sichus sapa ujninchej kallpachakusun munakuyniyoj kanapaj, kʼumuykukoj sonqo kanapaj, tanteayta yachanapaj, mana llullakuspa parlanapaj, parlasqanchejta midirikunapaj ima chayqa, congregacionpi confianza kananpaj yanapakusun. Chayrayku tatanchej Jehová jina de confianza kasqanchejta rikuchinallapuni. w22.09 pág. 8 párrs. 1, 2; pág. 13 párr. 17

Congregacionpi ashkha hermanosninchej, hermanasninchej kajtinpis, wakin kuteqa sapitallanchej kasqanchejta yuyasunman. Wakinninchejqa ichapis desanimasqas kashasunman, yuyasunmantaj sapallanchej chayta aguantananchej kasqanta. Jehovatajrí mana munanchu ajina sientekunanchejta. Jehovaqa ashkha imaynasmanta Eliasta yanaparqa. Payta iskay kutita taporqa: “Elías, ¿imatá kaypi ruwashanki?”, nispa (1 Rey. 19:9, 13). Iskaynin kutipitaj Jehovaqa Eliaspa nisqanta sumajta uyarerqa. Chantapis nerqa Israelpeqa ashkha runasraj payllata yupaychashasqankuta (1 Rey. 19:11, 12, 18). Eliaspa sonqonqa maytachá tiyaykorqa Jehová Diosman willakusqantawan, kutichisqantataj uyarisqantawan. Chantapis Jehovaqa Eliasman kay sumaj ruwaykunata ruwananta kamacherqa: Hazaelta Siriapi rey kananpaj churananta, Jehuta Israelpi rey kananpaj churananta, Eliseotataj profeta kananpaj churananta (1 Rey. 19:15, 16). Jehovaqa chay ruwaykunata qospa Eliasta yanapasharqa allin imaspi yuyananpaj. Chantapis Eliseota sumaj compañeron kananpaj churarqa. w22.08 pág. 8 párr. 3; pág. 9 párr. 5

Ichá congregacionninchejwan khuska Tantakuna Wasita ruwaypi, chayri allinchaypi yanapakorqanchej. Chay mosoj Tantakuna Wasipi primera vez tantakusqanchejta sumajtachá yuyarikunchej. Maytapuni Jehovaman agradecekorqanchej. Ichapis kusiymanta waqay ñawilla kasharqanchej, chayraykutaj reunionpi ñaupaj kaj takiyta mana takiytapis aterqanchejchu. Chay sumaj Tantakuna Wasisninchejqa Jehovata jatunchan. Jinapis Tantakuna Wasista ruwaymanta nisqaqa waj ruway kallantaj. Chaytaj imamanta nisqapis aswan sumaj, Jehovatataj astawanraj jatunchan. ¿Imataj chay ruway? Tantakuna Wasiman jamojkunata kallpachay. Kay pʼunchaypaj versiculopi apóstol Pablo “kallpachay” palabrata oqharisqanqa, griego parlaypi niyta munallanmantaj “wasita ruway”. Chaywanqa apóstol Pablo cristianosta nisharqa hermanosninkuta kallpachaypi “wasita ruwaypi jina” yanapakunankuta. Hermanosninchejta sumajta kallpachanapajqa, qhawarina imaynatachus apóstol Pablo ruwasqanta. Payqa wajkunapaj sonqoyoj karqa. Noqanchejpis pay jina ruwasunman (1 Cor. 11:1). w22.08 pág. 20 párrs. 1, 2

Uj cristiano Jehovaj ñaupaqenpi cheqan runapaj qhawasqa kayta munaspaqa, negociosninpi maychus kajtapuni ruwanqa. Chantapis Jehovaj justicianta munakoj runaqa, ni imarayku allinpajchu qhawan wajkuna qhasimanta ñakʼarichisqa kasqankuta. Diosta tukuy imapi kusichinanpajtaj niraj imatapis ruwashaspa Diospirajpuni piensarin. Bibliapeqa nin Jehová ‘justicia wasi’ kasqanta. Chaytaj niyta munan cheqan kaj justiciaqa Jehovamanta jamusqanta (Jer. 50:7). Ruwawajninchej kasqanraykutaj paylla derechoyoj imachus allin, imatajchus mana allin kasqanta ninanpaj. Jehovaqa mana pantayniyoj kasqanrayku, sutʼita yachan imachus allin, imatajchus mana allin kasqanta (Pro. 14:12; Isa. 55:8, 9). Jinapis cheqan kamachiykunasninman jina kausakuyta atisunman, imajtinchus Diosqa “payman rijchʼakojta” ruwawarqanchej (Gén. 1:27). Chantapis cheqan kamachiykunasninta tukuy sonqo kasukunchej. Tatanchej Jehovata munakusqanchejrayku, pay jinapuni ruwayta munanchej (Efe. 5:1). w22.08 pág. 27 párrs. 5, 6

Llakisqas, desanimasqas kaspaqa, mana chay imasllapi yuyanapaj ichapis kusirikuyta munasunman imallawanpis. Chaytaj mana juchachu. Jinapis allinta qhawarikunanchej tiyan Jehovaj chejnisqan imasta ama ruwanapaj (Efe. 5:10-12, 15, 16). Apóstol Pabloqa Filipensesman cartata qhelqashaspa, cristianosta nerqa kay imaspi yuyanallankutapuni: ‘tukuy ima cheqan kajpi, tukuy ima llimphu kajpi, tukuy ima allin kajpi, tukuy ima kʼacha kajpi’ ima (Fili. 4:8). Pabloqa mana imawanchus kusirikunamantapunichu parlasharqa, jinapis chay nisqanqa yanapawanchej imawanchus kusirikunanchejta allinta ajllanapaj. Chay versiculota kaytapis nishanman jina leerina: “Yuyallaychejpuni chay takiykuna llimphuchus manachus kasqanpi, chay películas, libros, videojuegospis allinchus manachus kasqanpi”. Chayta ruwaspaqa reparayta atisun mayqentachus Dios allinpaj qhawasqanta, mayqentatajchus mana allinpajchu qhawasqanta. Noqanchejqa Jehovaj kamachiykunasninman jinapuni kausakuyta munanchej (Sal. 119:1-3). w22.10 pág. 9 párrs. 11, 12

‘Mana cheqan runasmanta’ wakenqa niraj wañupushaspa millay imastapuni ruwarqanku. Chayrayku yachakunanku kanqa Jehovaj cheqan kamachiykunasninman jina kausakuyta. Diospa Gobiernontaj tukuy chay runasman yachachikunanpaj encargakonqa. Chay jina ruwaytaj ni jaykʼaj kay jallpʼapi ruwakorqarajchu. ¿Pikunataj yachachenqanku mana cheqan runasman? May chhika runasmanta kajkuna, kausarimoj cheqan runas ima. ¿Imatataj mana cheqan runas ruwananku kanqa sutisninku kausay libropi qhelqasqa kananpaj? Jehovaj amigonman tukunanku kanqa, kausayninkutapis payman qopunanku kanqa. Jesucristowan ajllasqa cristianoswanqa, cielomantapacha sumajta qhawamonqanku chay mana cheqan runas yachakushasqankuta japʼikushasqankutachus manachus (Apo. 20:4). Sichus mayqenninkupis chay yachakusqankuta mana japʼikonqankuchu chayqa, pachaj watasniyoj kaspapis chinkachisqa kanqanku (Isa. 65:20). Jehovawan Jesuswanqa runaspa sonqonkuta qhawasqankurayku, mana saqenqankuchu ni pi mosoj jallpʼapi ima sajratapis ruwananta (Isa. 11:9; 60:18; 65:25). w22.09 pág. 17 párrs. 11, 12

Kay versiculopi ‘autoridades’ nispaqa, parlashan gobiernosmanta, pikunachus runasta kamachinankupaj atiyniyoj kanku chaykunamanta. Cristianostaj chay autoridadesta kasukunanchej tiyan. Paykunaqa chʼajwas kananta mana saqenkuchu, leyestapis juntʼachinku, wakin kuteqa Diospa llajtantapis yanapanku (Apo. 12:16). Chayrayku Diosqa kamachiwanchej paykunaman impuestota pagananchejta, imamanta pagota mañawajtinchejpis pagananchejta, kasukunata munajtataj kasukunanchejta, respetanata munajtataj respetananchejta (Rom. 13:7). Jinapis chay gobiernosqa Jehová saqesqanraykulla atiyniyoj kanku. Chaytataj sutʼita Jesús nerqa Romamanta Poncio Pilato tapojtin. Pilato nerqa: ‘¿Manachu yachanki atiyniyoj kasqayta kacharichisunaypajpis chayri wañuchichisunaypajpis?’, nispa. Jesustaj nerqa: “Manachus Dios atiyta qosunkiman chayqa, mana imatapis ruwayta atiwankimanchu”, nispa (Juan 19:11). Kay tiempomanta tukuy gobiernos, politicospis Pilato jinallataj mana tukuy imapajchu atiyniyoj kanku. w22.10 pág. 13 párr. 6

Jehovaqa rey Davidta yuyaycharqa Diosta kasukoj uj yachayniyoj rey kamachishajtin, imaynachus kausay kananta qhelqananpaj (Sal. 37:10, 11, 29). Runasman paraisomanta willarishaspaqa, ashkha kutispi Salmo 37:11 versiculota leeripuyta yachanchej, chaytaj may sumaj. Jesuspis Orqopi Yachachishaspa chay versiculollamantataj parlarqa. Chaywantaj rikucherqa chay versiculoqa qhepamanpis juntʼakunallantataj (Mat. 5:5). Jinapis rey Davidpa qhelqasqanqa, imaynachus Salomonpa tiemponpi kausay kanantapis rikuchillarqataj. Salomonpa tiemponpi Israel nacionqa allinta kausakorqanku, tukuy ima patapitaj. Jallpʼankupeqa “lechewan miskʼiwan jinantin” karqa. Diosqa paykunata nisqa: ‘Sichus leyesniyman jina kausakunkichej chayqa, chay jallpʼapi allin kausayta qosqaykichej, ni pita manchachikuspataj puñukunkichej’, nispa (Lev. 20:24; 26:3, 6). Chay nisqantaj Salomón kamachishajtin juntʼakorqa (1 Cró. 22:9; 29:26-28). Salmo 37:10, 11, 29 versiculosqa, ñaupa tiempopiña juntʼakorqa, qhepamanpis juntʼakullanqataj. w22.12 pág. 10 párr. 8

Cheqa cristianos kasqanchejrayku Jehovaj llajtan kamachiwasqanchejta kasukunanchej tiyan. Bibliaqa kay sumaj yuyaychayta qowanchej: “Allinta yuyaychachikusparaj guerramanqa yaykuy. Ashkha yuyaychajkuna kajtenqa ima ruwayllapis allin llojsin”, nispa (Pro. 24:6). ¿Imaynatataj chay yuyaychayman jina ruway yanapawanchej predicaypi, Bibliamanta yachachiypipis allin rinawanchejpaj? Munasqanchejman jinalla predicanamanta chayri yachachinamantaqa, kallpachakuna sumaj yuyaychayta japʼisqanchejman jina ruwanapaj. Chaytataj reunionesninchejpi japʼinchej. Chaykunapeqa mayta yachakusunman discursosmanta, hermanosninchej demostracionesta ruwasqankumantapis, chaykunaqa Bibliaman jina kashanku. Chantapis Diospa llajtanqa orqhollantaj publicacionesta, videostapis. Chaykunataj runasta yanapan Bibliata entiendenankupaj. Diospa Palabranpi sumaj yuyaychaykuna kasqanmanta maytapuni agradecekunchej. Mana chay yuyaychaykuna kajtenqa imachus noqanchejwan kanmanpis. Allin kanman Diospa yachayninman jinapuni kausayninchejpi imatapis ruwananchej (Pro. 3:13-17). w22.10 pág. 23 párrs. 18, 19

Mikhojtinchej, cuerponchejtaj chay mikhusqanchejta chʼonqajtin, aswan kallpitayoj kanchej. Ajinallatataj creeyninchejpis astawan sinchʼiyan Diospa Palabranta estudiajtinchej, chaypitaj tʼukurejtinchej. Jehovaqa munan Palabranta allinta entiendenanchejta. Chaypajtaj ñaupajta orakuspa sonqonchejta wakichina Diospa nisqasninta japʼikunapaj. Chantá Bibliata leerina, chaymantataj imatachus leesqanchejpi sumajta tʼukurina. Astawan tʼukurispaqa Diospa Palabranta astawan entiendesun, creeyninchejtaj astawan sinchʼiyanqa. ¿Imaraykutaj Bibliata leenanchejpuni tiyan, chaypitaj tʼukurinanchejpuni tiyan? Chayta ruwayqa kay tiempopi Diospa Gobiernonmanta willanapaj, tumpamantawantaj juchachana willayta willanapaj necesitasqanchej kallpata qowanchej. Chantapis Jehovaj kʼacha kaykunasninpi piensarispaqa paywan aswan sumaj amigos kanchej. w22.11 págs. 6, 7 párrs. 16, 17

Jesusqa sutʼita rikucherqa discipulosninpis waj runaspis, cheqa cristianostaqa tukuy sonqo munanakusqankupi sutʼita reparanankuta. Diospa llajtanpi hermanospura munanakusqanchejqa allin sutʼitapuni reparakun. Jinapis Jehovaj testigosnenqa pantaj runas kanchej (1 Juan 1:8). Chayrayku hermanosninchejta astawan rejsispaqa, ichapis astawan reparallasuntaj imaspichus pantasqankuta (Rom. 3:23). Llakikunapaj jinataj, wakenqa chayta rikuspa Jehovata sirviyta saqepunku. ¿Imaynatá Jesús apostolesninman rikucherqa paykunata munakusqanta? ¿Imaynatá Jesús jina ruwasunman? May allin kanman testigosña kajkunapis chay tapuykunapi tʼukurinanchej. Chayqa yanapawasun hermanosninchejta astawan munakunapaj, wakin kutis pantajtinkupis (Efe. 5:2). w23.03 págs. 26, 27 párrs. 2-4

Kay sajra mundoj tukukuyninman qayllaykusqanchejman jina, congregacionpi kanqapuni Jehovamanta karunchachinawanchejpaj jina imas. Chayrayku yuyaynillanchejpipuni kananchej tiyan. Mayqen hermanollapis sonqonchejta nanachiwasqanchejta yuyanchej chayqa, ama phiñakuywan atipachikunachu. Cheqanchasqa kanchej chayqa, ama pʼenqaypi rikhurisqallanchejpichu yuyana. Astawanpis imastachus yuyaychawasqanchejta japʼikuna, necesitakusqanman jinataj cambiana. Jehovaj llajtanpi cambios kajtin, chaytaj mana allinchu rijchʼawajtinchejpis tukuy sonqo yanapakuna, kamachiwasqanchejman jinataj ruwana. Jehovamanta karunchanawanchejpaj jina ima kajtinpis, Jehovapi, llajtanpipis atienekunallapuni. Chaypajtaj sonqo tiyasqa kananchej tiyan, sumajta piensarinanchej tiyan, Jehová jinataj imatapis qhawananchej tiyan. Chantapis Jehovamanta yanapata mañakuna, amapunitaj hermanosninchejmanta karunchakunachu. Ajinamanta ima kajtinpis, Satanasqa mana tʼaqayta atiwasunchu ni Jehovamantapis ni llajtanmantapis (Sant. 4:7). w22.11 págs. 24, 25 párrs. 14-16

Ancianos, hermanosta yanapaychej kaymanta jinalla ima llakiy kananpajpis wakichisqaña kanankupaj. Congregacionmanta tukuy hermanosta yanapaychej, ima kajtinpis salvakunankupaj imatachus ruwananku kasqanta yachanankupaj, chay ratotaj wajyamusunaykichejpaj. ¿Imatá congregacionmanta kajkuna ruwasunman? Tiyakunchej chay qayllapi uj desastre natural kajtenqa, ancianosta tapurikuna imapichus yanapakuyta atisqanchejta. Ichá uj tiempota wasinchejpi alojasunman wasinkumanta ayqekoj hermanosta, chayri paykunata yanapaj hermanosta. Chantapis ichá yanapasunman mikhunasta chayri necesitasqanku imasta entregaspa. Tiyakunchej chaymanta karupi uj desastre natural kajtinpis, yanapakuyta atillanchejtaj. ¿Imaynasmanta? Chay llakiypi rikukojkunapaj orapuspa, jallpʼantinpi Bibliamanta yachachinapaj nisqa cajitaman qolqesitunchejta churaspa ima (2 Cor. 1:8-11; 8:2-5). Chay lugarman viajayta atinchej chaytaj, ancianosninchejta tapurikuna imapichus yanapakamuyta atisqanchejta. Invitawasun chaytaj, ichá hermanosqa yachachiwasunraj maychus tiemponpi, maypichus necesitakushan chaypitaj yanapakamunanchejpaj. w22.12 pág. 24 párr. 8; pág. 25 párrs. 11, 12

Waj Bibliapi kay pʼunchaypaj versículo nin: ‘Ni ima tentación taripasunkichejchu, manachayqa tukuy runaspata kajlla’, nispa. Chayqa Corintomanta cristianospaj karqa. Paykunamanta wakenqa ñaupajta karqanku qhenchachakojkuna, qharipura puñuykojkuna, machajkuna ima (1 Cor. 6:9-11). ¿Niñachu bautizakuytawan sajra munayninkuta atipanankupaj kallpachakunkuman karqa? Mana, paykunaqa kallpachakullarqankupunichá. Tukuyninku ajllasqa cristianos kajtinkupis pantaj runasllapuni karqanku. Chayrayku maypi jina, mana sajra munayninkuwan atipachikunankupaj maytachá kallpachakunanku karqa. Chaytaj reparachiwanchej wajkunapis noqanchej jinallataj sajra munayninkuwan maqanakusqankuta, atipasqankutataj. Chayta yachaytaj kallpachawanchej. Chayrayku noqanchejpis creeypi sinchʼita sayasunman. ‘Yachanchej jina mundontinpi tukuy hermanosninchejqa kikillantataj ñakʼarishanku’ (1 Ped. 5:9). w23.01 pág. 12 párr. 15

Jesusqa Jehovamanta mañakorqa discipulosninta cuidananta (Juan 17:11). ¿Imaraykutaj chayta yachay mana manchachikunapaj yanapawanchej? Imajtinchus Jehovaqa mayqen enemigonchejmanta nisqapis aswan atiyniyoj (1 Juan 4:4). Payqa tukuy imata sumajta qhawamushan. Chayrayku Jehovapi atienekusun chayqa mana imatapis manchachikusunchu, wapustaj kasun. Wakin kutis trabajopi chayri escuelapi, ¿pʼenqakunkichu Jehovaj testigon kasqaykita niyta? ¿Nishankichu “aswan qhepallaman publicador kasaj” chayri “aswan qhepallaman bautizakusaj” nispa? Ama manchachikuychu wajkuna qhawarasunankuta. Astawanpis allin kajtapuni ruway. Jehovamanta rogakuy yanapasunanpaj, munayninta ruwanaykipajtaj kallpata qosunanpaj. Jehová uyarisusqanta rikuspataj, astawan kallpayojman tukunki, astawan mana manchachikojtaj kanki (Isa. 41:10, 13). w23.01 pág. 29 párr. 12; pág. 30 párr. 14

Jesusqa fariseosta taporqa: “¿Manachu leerqankichej?”, nispa. Chaywantaj rikucherqa Diosmanta Qhelqasqata mana allin sonqowanchu leesqankuta (Mat. 12:1-7). Chay kutipi fariseosqa Jesuspa discipulosninta juchachaykorqanku samarikuna pʼunchaymanta leyta pʼakishasqankuta nispa. Jesustaj kuticherqa Diosmanta Qhelqasqamanta iskay ejemploswan, Oseasmanta uj versiculowan ima. Chaywantaj sutʼita rikucherqa fariseosqa imapajchus chay ley kasqanta mana entiendesqankuta, wajkunata mana khuyarikuspataj imatapis ruwasqankuta. Paykunaqa Diospa Palabranta leespapis cambianankupaj mana chaywan yanapachikojchu kanku. Imaraykuchus paykunaqa jatunchakojkuna kaj kanku, wajkunata qhawaranallankupajtaj leej kanku. Ajina kasqankurayku, leesqanku imatapunichus niyta munasqanta mana entiendeyta atejchu kanku (Mat. 23:23; Juan 5:39, 40). Mateo 19:4-6 versiculospi nin waj kutipipis Jesús fariseosta “¿Manachu leerqankichej?” nispa tapusqanta. Paykunaqa yacharqanku Diosmanta Qhelqasqapeqa, Dios tukuy imata ruwasqanta nishasqanta. Jinapis imatachus Dios matrimoniomanta yuyasqanta mana valecherqankuchu. Jesús imatachus nisqanqa yachachiwanchej Bibliata allin sonqowan leena kasqanta. Ama fariseos jina kanachu, astawanpis kʼumuykukoj sonqo kana, saqenataj Jehová yachachinawanchejta. w23.02 pág. 12 párrs. 12, 13

Israelitaspa wasinkupi, llankʼayninkupipis mana jatuchaj accidentes kananpajqa Jehová paykunaman leyesta qorqa (Éxo. 21:28, 29; Deu. 22:8). Pillapis uj runata mana munashaspalla wañuchejtenqa, jatun llakiykuna qhatirej (Deu. 19:4, 5). Pillapis manaraj nacekoj wawitata imanarpajpis castigasqa kanan karqa, mana munashaspalla chayta ruwajtinpis (Éxo. 21:22, 23). Bibliaqa sutʼita rikuchiwanchej Jehovaqa accidentesmanta jarkʼakunapaj tukuy atisqanchejta kallpachakunanchejta munasqanta. ¿Imaynatá Jehová kausayta uj regalota jina qowasqanchejmanta agradecekusqanchejta rikuchinchej? Wasinchejpi, trabajonchejpipis ni ima accidentakunapaj jina kananta saqespa. Chayrayku filoyoj imasta, quimicosniyoj imasta chayri medicamentosta wawas mana tarinankupaj jina jallchʼanchej. Chaykunata wijchʼunanchej kajtintaj, ni pi imanarpakunanpaj jina wijchʼunchej. Sumajta cuidakullanchejtaj ninamanta, corrientewan funcionaj herramientasmanta, rupha yakusmantapis. Ni jaykʼaj chaykunasta jinallata saqerpanchejchu. Chantapis sichus umanchejta muyurpachej medicamentota tomarqanchej, machana ujyanasta tomarqanchej chayri mana allin puñusqachu kashanchej chayqa, mana autota manejanchejchu. Celular japʼirisqapis nillataj manejanchejchu. w23.02 págs. 21, 22 párrs. 7-9

Jehovaqa pacienciayoj Yachachej, kʼacha Yachachej, entiendekoj Yachachejtaj. Chantapis pikunamanchus yachachin chaykunapi allin imastapuni qhawan (Sal. 130:3). Payqa ni jaykʼaj mañawasunmanchu imatachus mana ruwayta atisqanchejta. Amapuni qonqakunachu pay ñojtunchejta ruwasqanta, ñojtunchejtaj uj sumaj regalo (Sal. 139:14). Diosninchejqa munan wiñaypaj yachakunallanchejtapuni, yachakuspataj kusikunanchejta. Chayrayku kunanmantapachaña Bibliaj cheqa yachachiykunasninta “mayta munariyta” yachakunanchej tiyan (1 Ped. 2:2). ¿Imataj chaypaj yanapawasunman? Imatapis ruwayta munasqanchejqa, atinanchejpaj jinalla kanan tiyan. Chantapis Bibliata leenapuni, estudianapunitaj (Jos. 1:8). Jehovaj yanapayninwanqa paymanta leey, yachakuypis astawan astawan gustawasun. Estudiaspaqa mana ashkha imasta yachayllatachu munanchej, manaqa munanchej Jehovata rejsiyta, payta munakuyta, paypi creeytapis (1 Cor. 8:1-3). Jehovamanta astawan astawan yachakusqanchejman jina, mañakunallapuni astawan creeyniyoj kananchejpaj yanapanawanchejta (Luc. 17:5). Paytaj tukuy sonqo uyariwasun. w23.03 pág. 10 párrs. 11, 13

Jesuspa discipulosnin tukukuy chayamunanta, ¿ni imata ruwaspachu suyakunkuman karqa? Mana. Jesusqa paykunaman uj llankʼayta qorqa. Payqa sumaj willaykunata willanankuta kamacherqa “Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi” (Hech. 1:6-8). Chayqa jatun llankʼay karqa. Tukuy atisqankuta chay llankʼayta ruwaspataj, may sumajta tiemponkuta aprovecharqanku. Noqanchej kikinchejta allinta qhawarikunapajqa, sumajta reparananchej tiyan imaynatachus tiemponchejta apaykachashasqanchejta. Eclesiastés 9:11 nin jina, tukuyman “mana yuyasqallamanta ima llakiypis” chayamuwasunman, chayri ichapis kaymanta jinalla wañupusunman. ¿Imaynatataj tiemponchejta sumajta aprovechasunman? Jehovaj munayninta ruwaspa, payman astawan qayllaykuspa ima (Juan 14:21). Bibliaqa kayta yuyaychawanchej: “Sinchʼita sayallaychejpuni, mana kuyurispa. Señorpa ruwayninpi ashkhata llankʼallaychejpuni”, nispa. Chaytaqa kasukunapuni (1 Cor. 15:58). Ajinamanta wañuy patapiña kashajtinchejpis chayri kay mundoj tukukuynin chayamojtinpis, mana nisunchu: “Astallawanpis Jehovapaj llankʼayman karqa”, nispa (Mat. 24:13; Rom. 14:8). w23.02 pág. 18 párrs. 12-14