Febrero

¿Imayna munakuymantataj Jesús kay pʼunchaypaj versiculopi parlasharqa? Payllataj nerqa wajkunata noqanchejmanta astawanraj munakunanchejta, kausayninchejtapis hermanosninchejrayku qona kajtenqa, qonanchejta. Diospa Palabran yachachiwanchej munanakoyqa allin importante kasqanta. Ashkha runas ninku kay versiculosqa mayta gustasqanta: “Diosqa munakuymin” (1 Juan 4:8). “Runa masiykita munakunayki tiyan qan kikiykita jina” (Mat. 22:39). “Munakoyqa ashkha juchasta pʼampan” (1 Ped. 4:8). “Munakoyqa manapuni jaykʼajpis tukukonqachu” (1 Cor. 13:8). Kay versículos, waj versiculospis sutʼita rikuchin munakuyta yachananchejqa allin importante kasqanta. Munakoyqa Jehovamanta jamun. Chayrayku paypa espiritunta, bendicionninta ima japʼejkunalla purajmanta munanakuyta atinku (1 Juan 4:7). Jesús nerqa paypa discipulosnillan sonqomantapacha munanakunankuta. Nerqa jinapunitaj ashkha runasqa cheqa cristianosta purajmanta munanakusqankupi reparanku. w23.03 págs. 27, 28 párrs. 5-8

Astawan perdonayta necesitanchej chayqa, allin kanman leerinanchej, tʼukurinanchejtaj Diospa ñaupa tiempo kamachisninpi. Paykunamanta wakenqa tukuy sonqo wajkunata perdonarqanku, wakintaj mana. Jesusmanta parlarina. Payqa tukuy sonqo wajkunata perdonarqa (Luc. 7:47). Jesusqa mana runaspa pantasqasnillankutachu qhawarqa, manaqa sumaj imasta ruwayta atisqankutapis. Jinapis chay tiempomanta fariseosqa “wajkunata pisipaj qhawaj kanku” (Luc. 18:9). Chantapis kay tapuykunapi piensarillasunmantaj: “¿Imatataj wajkunapi qhawani? ¿Allin imasta ruwasqantachu astawan qhawani?”. Pillatapis mana perdonayta atishanchejchu chayqa, allin imasta ruwashasqanta qhawanapaj kallpachakusunman. Chantá piensarisunman imaynatachus Jesús chay runata qhawasqanpi. ¿Pay perdonanmanchu? Ajinata estudiayqa yanapawasunman yuyayninchejta cambianapaj. Ichá qallariypeqa sonqonchejta nanachiwarqanchej chay runata perdonanapaj mayta kallpachakunanchej kanqa. Jinapis perdonanapaj mayta kallpachakusun chayqa, tiempo pasasqanman jina wajkunata perdonayta atillasun. w22.04 pág. 23 párr. 6

Apocalipsis libropeqa, Jehová Diospa enemigosnintaqa millay phiña animaleswan kikinchakun. Juanqa mosqoypi jina rikorqa “uj millay phiña animalta mar qochamanta llojsimushajta, chunka wajrasniyojta, qanchis umasniyojta” (Apo. 13:1). Rikullarqataj chaypa qhepanta ‘waj millay phiña animalta jallpʼamanta llojsimushajta’. Chay millay phiña animalqa uj sierpe jina parlan, “ninatapis cielomanta jallpʼaman uraykuchimun” (Apo. 13:11-13). Chaymantataj rikorqa ‘uj puka millay phiña animalta’, patanpitaj uj khuchi warmi tiyasqata. Chay kinsa millay animalesqa Diospa enemigosninwan ninakunku, mayqenkunachus Jehová Diospa contranpi, Gobiernonpa contranpiwan ashkha watasta oqharikorqanku. Chayrayku yachananchejpuni tiyan pikunachus paykuna kasqankuta (Apo. 17:1, 3). Yachanallanchejtaj tiyan, chay millay phiña animales, khuchi warmipis pikunawanchus ninakusqankuta. Chaypajqa qhawarina tiyan imatachus Biblia chaykunamanta sutʼinchasqanta. Apocalipsis libropi millay phiña animalesmanta parlakusqanqa, Bibliaj waj librosninpipis rikhurillantaj. w22.05 págs. 8, 9 párrs. 3, 4

Wakin hermanosqa Jehovapaj astawan llankʼayta munanku. Jinapis mana atinkuchu machitus kasqankurayku chayri onqosqetas kasqankurayku. Chaytaj mayta paykunata llakichin. Jehovapaj astawan mana ruwayta atisqanchejrayku wakin kutis llakikunchej chayqa, piensarisunman imatachus Jehová sapa ujninchejmanta suyasqanpi. Jehovaqa suyan imatachus paypaj ruwayta atisqanchejman jina kallpachakunanchejta. Uj hermanitapi piensarina, payqa 80 watasniyoj. 40 watasniyoj kashaspa Jehovapaj mayta llankʼarqa, kunanqa manaña ajinata ruwayta atisqanmanta mayta llakikun. Payqa Jehovapaj tukuy atisqanta ruwashaspapis, yuyan Jehová chayta pisipaj qhawasqanta. Chaytaj mana jinachu. Hermanitanchejqa 40 watasniyoj kashaspa Jehovapaj tukuy atisqanta ruwarqa, kunan 80 watasniyojña kaspapis ajinallatapuni ruwashan. Noqanchejpis Jehovata sirvinapaj mayta kallpachakusun chayqa, pay niwasun: “Sumajta ruwanki”, nispa (Mat. 25:20-23, kikinchay). Imastachus ruwayta atisqallanchejta ruwanapaj astawan kallpachakusun chayqa, kusisqa kasun. w22.04 pág. 10 párr. 2; pág. 11 párrs. 4-6

Apocalipsis 21 capitulopeqa 144.000 kajkunata kikinchakun uj kʼachitu llajtawan, ‘Mosoj Jerusalenwan’. Chay llajtaqa “12 cimiento rumisniyoj karqa, chaykunapitaj kasharqa 12 sutis, Corderoj 12 apostolesninpa sutisninku” (Apo. 21:10-14; Efe. 2:20). Chay Mosoj Jerusalenqa ni mayqen llajtawan kikinchu. Ancho callenqa chʼuwa qorimanta, 12 punkusninpis 12 perlas karqanku, perqasnin, cimientosninpis kʼachanchasqa karqa tukuy laya valorniyoj rumiswan. “Chay llajtaqa cuadrado karqa, largonman, anchonmanpis chhikankamalla” (Apo. 21:15-21). Jinapis Juanqa repararqa uj ima faltasqanta. Pay nerqa: “Chay llajtapeqa mana ima templotapis rikorqanichu, Tukuy Atiyniyoj Jehová Diosmin chay llajtaj templonqa, jinallataj Corderopis. Chay llajtaqa mana intiwan kʼanchachikunanchu tiyan, nillataj killawanpis, Diospa jatun kaynin kʼanchaykusqanrayku, Corderotaj kʼanchanan kasqanrayku”, nispa (Apo. 21:22, 23). Mosoj Jerusalenmanta kajkunaqa Jehovawan kanqanku (Heb. 7:27; Apo. 22:3, 4). w22.05 págs. 17, 18 párrs. 14, 15

Jehovaqa Ruwawajninchej, Leyesta Churapuwajninchej, Juezninchej kaspapis munakuyniyoj Tatanchej (Sal. 100:3; Isa. 33:22). Jehovaqa paypa contranta juchallikusqanchejmanta tukuy sonqo arrepientekojtinchej perdonayta atiwanchej, perdonaytapunitaj munawanchej (Sal. 86:5). Jehovaqa sonqochanawanchejpaj profeta Isaiasnejta nerqa: “Juchasniykichej ancha puka kajtinpis, ritʼi jina yurajman tukonqa”, nispa (Isa. 1:18). Pantaj runas kasqanchejrayku, parlaspa chayri imatapis ruwaspa pejpa sonqontapis nanachinchejpuni (Sant. 3:2). Jinapis perdonayta yachanchej chayqa, wajkunawan sumaj amigos kayta atisunman (Pro. 17:9; 19:11; Mat. 18:21, 22). Imitallamantapis sonqonchejta nanachinakojtinchej, Jehovaqa perdonanakunanchejta munan. Chaytataj ruwananchejpuni tiyan, imaraykuchus Jehovaqa mana michʼakuspa perdonawanchej (Isa. 55:7). w22.06 pág. 8 párrs. 1, 2

Wajkunawan kikinchakoyqa manapuni allinchu. Jinapis Diospa kamachisninmantaqa mayta yachakunchej. Jesuspi piensarina. Payqa mana noqanchej jina pantaj runachu karqa. Jinapis pay imayna runachus kasqanmanta, sumaj imasta ruwasqanmantapis mayta yachakusunman (1 Ped. 2:21). Jesús jina ruwanapaj tukuy atisqanchejta kallpachakusun chayqa, aswan sumaj cristianosman tukusun. Bibliapeqa parlan Diospa ashkha kamachisninmanta. Paykunaqa pantaj runas kaspapis, Diosta tukuy sonqo sirverqanku. Paykunamantaqa mayta yachakusunman. Jehovaqa rey Davidmanta kayta nerqa: “Davidta tarini sonqoypa munasqanman jina”, nispa (Hech. 13:22). Jinapis Davidqa pantaj runa karqa, jatuchaj juchaspitaj urmarqa. Paymantapis mayta yachakullasunmantaj. Imajtinchus Davidqa pantaykusqanta reconocerqa. Chantá kʼamisqankuta japʼikorqa, tukuy sonqotaj arrepientekorqa mana allin imasta ruwasqanmanta. Chayrayku Jehová payta perdonarqa (Sal. 51:3, 4, 10-12). w22.04 pág. 13 párrs. 11, 12

Bibliaqa nin wañoyqa enemigonchej kasqanta (1 Cor. 15:25, 26). Wañuypi piensayqa mayta llakichiwasunman, astawanraj sinchʼi onqosqa kajtinchej chayri familianchejmanta pillapis sinchʼi onqosqa kajtin. ¿Imaraykutaj wañuyta manchachikunchej? Jehová wiñaypaj kausakuyta munanapaj jina ruwawasqanchejrayku (Ecl. 3:11). Jinapis wañuyta tumpata manchachikoyqa yanapawanchej mana imatapis mikhurpanallapaj, ejerciciosta ruwanapaj, kausayninchejta mana wañuy pataman churanapaj, doctorman rinapaj, onqosqa kajtinchejtaj jampita tomanapaj. Satanasqa yachan kausayta may jatunpaj qhawasqanchejta. Payqa nin kausananchejraykoqa imatapis qonapaj jinalla kasqanchejta, Jehovatapis wasanchanallanchejta (Job 2:5). Chayta nispataj llullakushan. Satanasqa wañuchinanpaj atiyniyoj kasqanrayku, wañuyta manchachikusqanchejmanta valekuspa Jehovamanta karunchachiyta munawanchej (Heb. 2:14, 15). w22.06 pág. 18 párrs. 15, 16

Qhatiykachasqa kashaspaqa ichapis juchʼuy grupitosllapi tantakusunchej. Chayrayku ni jaykʼaj jina hermanosninchejwan allinpi kananchej tiyan. Satanaswan maqanakuna, amataj noqanchejpurachu. Hermanosninchej pantajtinku perdonana, phiñanasqa kashanchej chaytaj chay rato allinyakapuna (Pro. 19:11). Purajmanta yanapanakunapaj wakichisqa kana (Tito 3:14). Uj grupomanta hermanitata yanapasqankoqa tukuynin grupopaj allin karqa. Paykunaqa uj familia jinalla aswan ujchasqa karqanku (Sal. 133:1). May chhika hermanosninchejqa autoridades prohibiwajtinchejpis Jehovata sirvishallankupuni. Wakin hermanosqa creeyninkurayku presochasqas kashanku. Paykunapajwan familiasninkupajwan Diosmanta mañapuna. Mañapunallataj paykunata yanapaj hermanospajpis. Paykunaqa carcelman wisqʼaykusqa kanankuta yachaspapis, mana manchachikuspa presochasqa hermanosta Jehovapi atienekunallankupajpuni yanapanku, necesitasqanku imasta qorinku, juzgadospitaj paykunawan khuska kanku (Col. 4:3, 18). Amapuni qonqanachu Diosmanta mañakusqanchejqa chay hermanosta yanapayta atisqanta (2 Tes. 3:1, 2; 1 Tim. 2:1, 2). w22.12 págs. 26, 27 párrs. 15, 16

Tukuy tatasqa pantaj runas kanku. Jinapis wawasqa tatas imatapis ruwasqankuta sumajta qhawanku, kikintataj ruwanku (Rom. 3:23). Chayrayku yachayniyoj tatasqa tukuy atisqankuta kallpachakunanku tiyan, imastachus ruwasqankuwan wawasninkuman sumajta yachachinankupaj. Uj tata nerqa: “Wawasqa tukuy imata rikusqankuman jina ruwanku”, nispa. Chantá nillantaj: “Imatapis mana yachachisqanchejman jinachu ruwajtinchejqa, chay rato tapuwanchej imaraykuchus noqanchej mana ruwasqanchejta”, nispa. Chayrayku wawasninchej Jehovata munakunankuta munanchej chayqa, noqanchejraj Jehovata sinchʼita munakunanchej tiyan. Chaytaj sutʼi reparakunan tiyan. Tatasqa ashkha imaynasmanta wawasninkuman yachachinkuman Jehovata munakuyta. Hermanitonchej Andrewmanta parlarina. Payqa 17 watasniyoj, pay nin: “Tatasneyqa orakunaypuni kasqanta yachachiwaj kanku. Tatayqa sapa chʼisi noqawan orajpuni, sapallaypi orakojtiyñapis. Chayrayku kunanqa Jehovaman orakuyta atillani, munakuyniyoj tatayta jinataj qhawani”, nispa. Tatas, amapuni kayta qonqaychejchu: Qankuna Jehovata munakusqaykichejqa, wawasniykichejtapis yanapallanmantaj payta munakunankupaj. w22.05 pág. 28 párrs. 7, 8

Bautizakunapajqa juchasninchejmanta tukuy sonqo arrepientekuna tiyan (Hech. 2:37, 38). Tukuy sonqo arrepientekusqanchejqa cambiasqanchejpi yachakun. ¿Saqepunkiñachu Jehovaj chejnisqan imasta ruwayta? ¿Saqepunkiñachu khuchichakuy kausayta, pitayta, millay imasta parlayta chayri fierosta parlayta? (1 Cor. 6:9, 10; 2 Cor. 7:1; Efe. 4:29). Kallpachakullaypuni chaykunata qonqanaykipaj. Yanapata chayri yuyaychayta necesitanki chayqa, Bibliamanta yachachisojwan parlariwaj chayri ancianosta tapurikuwaj. Sichus jovenllaraj kanki, tatasnillaykiwanrajtaj tiyakushanki chayqa, paykunawan yanapachikuwaj ima viciotapis qonqapunaykipaj, ajinamantataj bautizakunaykipaj. Chantapis Jehovata yupaychaypi ruwanastaqa mana saqespa ruwanaykipuni tiyan. Chaykunataj kashanku reunionesman riy, comentay ima (Heb. 10:24, 25). Predicacionman llojsiyta atispañataj sapa semana predicaypuni. w23.03 págs. 10, 11 párrs. 14-16

Génesis 3:14, 15 versiculospi parlan ‘katarimanta’, ‘mirayninmanta’ ima. Kataripuni kanman karqa chayqa, imatachus Edén huertapi Jehová nisqanta mana entiendeyta atinmanchu karqa. Chayrayku nisunman Jehovaqa mana kataritapunichu juchachasqanta. ¿Pitá chanta juchacharqa? Apocalipsis 12:9 sutʼita niwanchej pichus chay katari kasqanta. Chaypi nin ‘ñaupa katareqa’ Satanás Diablo kasqanta. Wakin kutis Bibliaqa ‘pejpa miraynin’ nispa nejtin, pay jina yuyajkunamanta, pay jina ruwajkunamanta parlan. Chayrayku katarej miraynenqa kanku pikunachus Satanás jina Jehová Diospa contranta oqharikunku, llajtanmanpis churanakunku chay ángeles, runas ima. Chaykuna kankuman Noejpa tiemponpi cielopi ruwayninkuta saqej ángeles, tatanku Diablo jina ruwaj sajra runaspis (Gén. 6:1, 2; Juan 8:44; 1 Juan 5:19; Jud. 6). w22.07 págs. 14, 15 párrs. 4, 5

Pabloqa hermanosninta mayta munakorqa. Pay kikin ashkha llakiykunapi rikukusqanraykutaj llakiypi tarikojkunata khuyakorqa, entienderqataj. Uj pacha qolqen pisirparqa. Chayraykutaj paypaj, paywan kajkunapajpis trabajanan karqa (Hech. 20:34). Pabloj oficionqa toldosta ruway karqa. Corintoman chayaspa Aquilawan Priscilawan trabajarqa, kikin oficioyoj kasqankurayku. Jinapis “sapa samarikuna pʼunchay” judiosman, griegosman predicaj. Silaswan Timoteowan chayajtinkutaj, “Pabloqa Diospa palabranta willaspallaña purerqa” (Hech. 18:2-5). Payqa sutʼita yacharqa, kausayninpeqa Diosta sirviytapuni ñaupajman churananta. Pabloqa ashkhata predicasqanrayku, paypajpis trabajakusqanrayku hermanosta kallpachayta, yuyaychaytapis aterqa. Payqa hermanosta yuyaycharqa “imaschus aswan allin imas kasqanta” reparayta yachanankuta, nisunman Jehovapaj ruwanasninkuta ruwayta mana qonqanankuta, llakiykunapi kajtinkupis chayri familiankuman imatachus necesitasqankuta qonankupuni kajtinpis. w22.08 pág. 20 párr. 3

Kay tiempopeqa Jehová munan Gobiernonmanta sumaj willaykuna jallpʼantinpi willakunanta (1 Tim. 2:3, 4). Kay llankʼayqa Jehová Diospata. May importante kasqanraykutaj, payqa munasqa Wawanpa cargonman chay llankʼayta churan. Chayrayku mana iskayrayasunmanchu tukukuy chayamojtin, chay llankʼay may sumajta ruwakusqanmanta Jehová kusikunanmanta (Mat. 24:14). ¿Imaynapí chayta yachanchej? Jesusqa niraj cieloman ripushaspa, wakin yachachisqasninwan tantakorqa Galilea orqopi. Paykunamantaj nerqa: “Diosqa tukuy atiyta qowan cielopi, jinallataj kay jallpʼapipis”, nispa. Chaymantataj paykunata nerqa: “Chayrayku riychej, tukuy nacionesmanta runasta discipulosniyman tukuchimuychej”, nispa (Mat. 28:18, 19). Chayrayku nisunman Jesusqa predicacionmanta cargoyoj kananpajpis atiyta japʼillasqantataj. Chay tiempomantapacha kunankama Jesús predicacionmanta cargoyoj kashallanpuni. w22.07 pág. 8 párrs. 1, 3; pág. 9 párr. 4

Cheqan runasqa, nisunman niraj wañupushaspa allin imasta ruwajkunaqa, “wiñay kausayta japʼinankupaj” kausarimonqanku, sutisninku kausay libropi qhelqasqaña kasqanrayku. Chayqa niyta munan Juan 5:29 versiculopi ‘allin imasta ruwajkuna’ kausarimunankumanta parlasqanqa, kikillantaj kasqanta Hechos 24:15 versiculopi ‘cheqan runas’ kausarimunankumanta parlasqanwan. Chaytaj Romanos 6:7 versiculopi nisqanman jinapuni kashan. Chaypi nin: “Wañoj runaqa juchanmanta perdonasqaña”, nispa. Cheqan runas wañojtinku Jehovaqa juchasninkuta perdonapun. Jinapis mana qonqakonqachu kausashaspa payta tukuy sonqo sirvisqankuta (Heb. 6:10). Chaywanpis cheqan runasqa kausarimuytawan Jehovata tukuy sonqo sirvinallankupuni tiyan, sutisninku kausay libromanta mana orqhosqa kananpaj. w22.09 pág. 18 párrs. 13, 15

Profeta Danielmantaqa mayta yachakusunman. Babiloniaman apajtinku, runasqa pisi tiempollapi de confianza runata jina qhawarqanku. Astawanraj paypi confiarqanku rey Nabucodonosorpa mosqoykunasninta Jehovaj yanapanwan sutʼinchasqanrayku (Dan. 4:20-22, 25). Ashkha watasninmantaj Danielqa watejmanta rikucherqa de confianza runa kasqanta. Payqa Babiloniamanta reypa kamachina wasinpa perqanpi rikhurej qhelqasqata, maychus kajsituta suntʼincharqa (Dan. 5:5, 25-29). Aswan qhepamanpis Media nacionmanta rey Darío, kuraj autoridadesninpis reparallarqankutaj Danielqa aswan yachayniyoj kasqanta. Paykunaqa repararqanku de confianza kasqanta, “nitaj juchachayta aterqankuchu imatapis mana allinta apaykachasqanmanta, nitaj mana allin imasta ruwasqanmantapis” (Dan. 6:3, 4). Noqanchejpis kay tapuypi piensarisunman: “¿Ruwanasninta juntʼaj runata jinachu qhawawanku?”. Confianza runas kaspaqa Jehovata jatunchanchej. w22.09 págs. 8, 9 párrs. 2-4

Imachus allin, imatajchus mana allin kajmanta Jehovaj kamachiykunasninta kasukunchejpuni chayqa, kausayninchejpi allin riwanchej. Qhawarina imajtinchus chayta nisqanchejta. Construccionpi trabajaj empresasmanta sapa empresa munayninman jina waj jina medidasta apaykachanman chayqa, manapuni allinchu kanman. Uj hospitalpi sapa doctor munayninman jina onqosqasta atiendenman chaytaj, wakin onqosqas wañupunkuman. Sutʼita reparanchej imatapis kamachiykunaman jina ruwayqa, allinninchejpajpuni kasqanta. Jehová Diospa kamachiykunasninpis allinnillanchejpajtaj. Payqa kamachiykunasninman jina ruwanankupaj kallpachakojkunata bendecin. Pay nin: “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku”, nispa (Sal. 37:29). ¿Imaynataj kausay kanqa tukuypis Jehovaj kamachiykunasninta kasukojtinku? Kusisqas kausakusun, sonqo tiyasqas, ujchasqastaj. Jehovaqa chay bendicionesta japʼinanchejta munan. Chayrayku justicianta munakunchej. w22.08 págs. 27, 28 párrs. 6-8

Pruebaspi kajtinchej Jehovamanta, llajtanmantapis karunchakuyta atisunman. ¿Imataj yanapawasunman mana karunchakunapaj? Yuyayninchejpi kana, rijchʼarisqallapuni kana, creeypitaj sinchʼita sayana. ¿Imaynatá yuyaynillanchejpipuni kasunman? Sonqo tiyasqallapuni kaspa, sumajta piensarispa, Jehová jinataj imatapis qhawanapaj kallpachakuspa. Chayta ruwasun chayqa, mana imaynachus kashasqanchejman jinallachu imatapis ruwarpasun. Ichá maykʼajllapis uj hermano sonqonchejta nanachiwarqanchej, chay hermanotaj ichapis uj anciano karqa. Ichapis chay hermanoqa mana sonqonchejta nanachiytapunichu munarqa (Rom. 3:23; Sant. 3:2). Jinapis mayta sonqonchej nanawarqanchej. Ichapis nerqanchej: “Uj hermano ajinata ruwawan chay, ¿Diospa llajtanpunichu kay kanman?”, nispa. Satanasqa chaytapuni yuyananchejta munan (2 Cor. 2:11). Ajinasta yuyasqanchejtaj Jehovamanta, llajtanmantapis karunchawasunman. Chayrayku ama phiñakuywan atipachikunachu. w22.11 pág. 20 párrs. 1, 3; pág. 21 párr. 4

Jehovaqa wiñay kausayta qonawanchejta niwanchej, chaytaj uj sumaj suyakuy. Wakin cristianosqa cielopi wiñaypaj kausakuyta suyakushanku (1 Cor. 15:50, 53). Casi tukuynin cristianostaj kay jallpʼapi kusisqas, mana onqospataj wiñaypaj kausakuyta suyakushanchej (Apo. 21:3, 4). Cielopi chayri kay jallpʼapi wiñaypaj kausakuyta suyakuspapis, chay suyakusqanchejmanta tukuy sonqo agradecekunchej. Suyakuyninchej Jehovamanta jamusqanrayku juntʼakonqapuni (Rom. 15:13). Yachanchej imastachus Jehová nisqanta, chaytataj juntʼanantapuni (Núm. 23:19). Jehovaqa tukuy ima ruwasaj nisqanta ruwaytapuni munan, atiyniyojtaj chayta ruwananpaj. Chaymantataj mana iskayrayanchejchu. Tatanchej Jehovaqa munakuwanchej, munantaj paypi atienekunanchejta. Jehovapi suyakuyninchej sinchʼi kajtenqa, pruebaspi kaspa aguantayta atisun, jamoj tiempotapis mana manchachikuspa kusiywan suyakusun. w22.10 pág. 24 párrs. 1-3

Isaiasqa israelitasman nerqa mana kasukusqankurayku Jehovaqa jatun llakiy qhatirejta saqenanta (Isa. 30:5, 17; Jer. 25:8-11). Ajinapunitaj karqa. Babiloniosqa paykunata presosta jina apakaporqanku. Jinapis chay judíos ukhupeqa Diosta kasukoj wakin runas kallarqankutaj. Profeta Isaiastaj paykunata nerqa uj pʼunchay Jehová paykunawan watejmanta kʼacha kananta. Chaytaj sumaj suyakuypuni karqa (Isa. 30:18, 19). Chay nisqantaj juntʼakorqapuni. Jehovaqa paykunata Babiloniamanta kacharicherqa, jinapis mana chay ratochu. ‘Jehová Diosqa pacienciawan suyakushan qankunawan kʼacha kananpaj’ nispa Isaías nisqanqa, kasukoj judíos kacharichisqas kanankupaj uj tiemporaj pasanan kasqanta entiendecherqa. Jehovaqa 70 watasninmanraj saqerqa wakin judíos Jerusalenman kutipunankuta (Isa. 10:21; Jer. 29:10). Israelitasqa Babiloniapi llakiymanta waqarqanku, jallpʼankuman kutipuspataj kusiymanta waqarqanku. w22.11 pág. 9 párr. 4

Kay tiempomanta hermanosninchejqa, ashkha lugarespi apóstoles jina qhatiykachasqa kashanku. Apostolestaqa qhatiykacharqanku Jesusmanta willasqankurayku. Ashkha kutispi judiospa Jatun Juntankumanta juecesqa “amaña Jesuspa sutinpi parlanankuta kamacherqanku” (Hech. 4:18-20; 5:27, 28, 40). Paykunaqa yacharqanku aswan atiyniyoj autoridad predicanankuta kamachisqanta, Cristomantataj allinta sutʼinchanankuta (Hech. 10:42). Pedrowan Juanwanqa tukuynin apostolespa sutinpi mana manchachikuspa nerqanku Diosta kasukunankuta, manataj paykunatachu. Chantapis nillarqankutaj Jesusmanta parlanallankutapuni (Hech. 5:29). Jehovata tukuy sonqo kasukusqankurayku jasutʼisqa kasqankutawan, Jatun Juntaj “ñaupaqenmanta kusisqas riporqanku, Jesuspa sutinrayku ñakʼarisqankumanta”, predicallarqankupunitaj (Hech. 5:41, 42). w22.10 págs. 12, 13 párrs. 2-4

Jehovamanta yachakuyta qallarejtinchejqa, apóstol Pablo hebreosman cartanpi nerqa jina, ‘qallariy yachachiykunallataraj’ yachakuyta qallarinchej. Pablotaj ‘qallariy yachachiykuna’ nispa mana pisipajchu chay yachachiykunata qhawasharqa. Astawanqa nisharqa wawata alimentanapaj leche jina kasqanta (Heb. 5:12; 6:1). Payqa cristianosta nillarqataj mana chay qallariy yachachiykunallatachu yachakunankuta, manaqa Diospa Palabranmanta pakasqa yachachiykunatapis yachakunallankutataj. Qanpis, ¿maytachu munanki chay yachachiykunata yachakuyta? ¿Maytachu munashanki ñauparillaytapuni, Jehovamanta, munayninmantapis yachakullaytapuni? Wakenqa estudiayta ichapis mana atillankumanchu. Qanrí, ¿atillankichu? ¿Escuelapi yachachisorqankuchu leeytawan estudiaytawan? ¿Chayta ruway gustasorqachu? Chayri, ¿nichu librosta rikuyllatapis munanki? Jina kajtenqa, mana qanllachu ajinapi rikukunki. Jehovaqa yanapasunkiman. Payqa ni imapi pantanchu, aswan sumaj Yachachejtaj. w23.03 págs. 9, 10 párrs. 8-10

Llampʼu sonqo kasun chayqa, saqesun Diospa Palabran sonqonchejpi saphichakunanta. Biblia cambiachinawanchejpajqa mana wajkunata qhawarananchejchu tiyan, nitaj jatunchakunanchejchu tiyan. Ajinallamanta Biblia khuyakuyniyoj kaymanta, kʼacha sonqoyoj kaymanta, munakuyniyoj kaymanta imatachus yachachisqanwan cambianapaj yanapachikusun. Wajkunawan imaynatachus apanakusqanchejpi sutʼi reparakun, cambianapaj Bibliawan yanapachikushasqanchejtachus manachus. Fariseosqa cambianankupaj Diospa Palabranwan mana yanapachikorqankuchu. Chayrayku mana juchayoj kajkunata juchacharqanku (Mat. 12:7). Noqanchejpis sumajta qhawarikuna imayna ñawiwanchus wajkunata qhawasqanchejta, imaynatajchus paykunawan kasqanchejtapis. ¿Yachasqachu kanchej wajkuna allin imasta ruwasqankumanta parlayman? Chayrí, ¿mana allin imasta ruwasqallankutachu qhawanchej? ¿Wakichisqachu kanchej wajkunata perdonanapajpuni? Chayrí, ¿yachasqachu kanchej qhawarayman, pipis sonqonchejta nanachiwajtinchejtaj phiñasqallapuni kayman? Chay tapuykunaman kutichisqanchejpi reparasun yuyasqanchejta, sonqonchejta, ruwasqanchejtapis cambianapaj Bibliawan yanapachikushasqanchejtachus manachus (1 Tim. 4:12, 15; Heb. 4:12). w23.02 pág. 12 párrs. 13, 14

Arimateamanta Josepi piensarina. Payqa judíos ukhupi may respetasqa runa karqa, judiospa Jatun Juzgadonkupi kajkunamantataj ujnin karqa. Jinapis Jesús kay jallpʼapi kashajtenqa manchachikoj runalla karqa. Juan nerqa: “Joseqa Jesuspa discipulon karqa, judiosta manchachikuspataj mana pimanpis willarqachu Jesuspi creesqanta”, nispa (Juan 19:38). Diospa Gobiernonmanta yachakuyta munaspapis, ni piman willarqachu Diospa Wawanpi creesqanta. Manchachikunmanchá karqa runas niña respetanankuta. Imayna kajtinpis, Bibliaqa nin Jesús wañupusqantawan “Joseqa mana manchachikuspa Pilatomanta Jesuspa ayanta mañamorqa” nispa (Mar. 15:42, 43). Ajinamanta Joseqa Jesuspi creesqanta manaña pakarqachu. ¿Qanpis Arimateamanta José jinallatajchu manchachikunki wajkuna qhawarasunankuta? w23.01 pág. 30 párrs. 13, 14

Salomón kamachishajtin israelitas allinta, tukuy ima patapitaj kausakushasqankuta Sabamanta reinaman willarqanku. Paytaj may karumanta Jerusalenman viajarqa, paypuni tukuy chayta rikumunanpaj (1 Rey. 10:1). Imaynachus Salomonpa kamachiynin kasqanta qhawaykuytawantaj, reyman nerqa kay pʼunchaypaj textopi nisqanta. Salomón kamachishajtin imaynachus kausay kasqanqa, imatachus Jehová Wawan Jesús kay jallpʼata kamachishajtin runasrayku ruwananta rikucherqa. Jinapis chayqa aswan sumajraj kanqa. Jesusqa tukuy imapi Salomonmanta aswan kuraj. Salomonqa pantaj runa kasqanrayku jatun juchaspi urmarqa. Chaytaj tiemponmanqa Diospa llajtanta llakiypi rikhuricherqa. Kamachejninchej Jesustajrí ni jaykʼaj pantanchu (Luc. 1:32; Heb. 4:14, 15). Cristoqa rikucherqaña ni jaykʼaj juchallikunanta, nitaj kamachiyninpi kajkunata llakiypi rikhurichinanta. ¿May sumajpunicharí pay Reyninchej kananqa? w22.12 pág. 11 párrs. 9, 10

Tiyakunchej chaypi uj wañuchej onqoy rikhurejtin, ¿imatá ruwananchej tiyan? Autoridadespa kamachisqankuta kasukuna. Ichá niwasun makista mayllakunata, mana wajkunaman anchata kʼaskaykunata, barbijota churakunata chayri cuarentenapi kanata. Chaykunata ruwasun chayqa, Jehová kausayta uj regalota jina qowasqanchejmanta agradecekusqanchejta rikuchisun. Kaymanta jinalla imapis kajtenqa, ichapis rejsisqasninchejnejta, amigosninchejnejta, noticiasnejta mana cheqan willaykunata uyarisunman chayri mana cabaltachu parlashasqankuta uyarisunman. Ama “ima nisqankutapis” creenallachu. Astawanpis gobiernomanta chayri doctoresmanta cheqa kaj willaykuna jamusqanta uyarina (Pro. 14:15). Chantapis Diospa Llajtanta Kamachejkuna, sucursalespis reunionesmanta, predicacionmantapis imatachus kamachisqankuta kasukuna. Imajtinchus paykunaqa tukuy atisqankuta kallpachakunku cheqa willaykunaman jinapuni, atienekunapaj jina willaykunaman jinapuni imatapis ruwanata ninankupaj. Paykunata kasukuspaqa cuidakushanchej, wajkunatapis cuidashallanchejtaj. Chantapis chayta ruwajtinchejqa, ichapis Jehovaj testigosninmanta runas aswan allinta parlanqanku (1 Ped. 2:12). w23.02 pág. 23 párrs. 11, 12

Israelitasqa Sumaj Jallpʼaman yaykuspa tukuy ladospi tiyakuyta qallarerqanku. Chayrayku nacionpa ujnin ladonpi tiyakoj israelitasqa, facilta qonqapunkuman karqa waj ladopi tiyakoj israelitasmanta. Jehovatajrí kamacherqa tukuyninku tantakunankutapuni Palabranta uyarinankupaj, astawantaj yachakunankupaj (Deu. 31:10-12; Neh. 8:2, 8, 18). Jerusalenmanqa nacionnintinmanta may chhika israelitas rej kanku Jehovata yupaychaj. Chay chhika israelitasta rikuspa, ¿imaynataj uj israelita kashanman karqa? Ajinata Jehovaqa tukuy israelitasta yanaparqa ujchasqallapuni kanankupaj. Ñaupa cristianospa tiemponkumanta congregacionpitaj tukuy laya qharis, warmis ima karqanku. Paykunamanta wakenqa ñaupajta sumajpaj qhawasqas karqanku, wakintaj pisipaj qhawasqas, kallarqankutaj qhapajkuna, wajchaspis, nitaj tukuychu uj parlayllata parlaj kanku. Jinapis tukuyninku ujchasqas Jehovata sirvej kanku. Mosojkunapis congregacionman yaykuytawan, Diospa Palabranta entiendeyta atej kanku waj cristianos sutʼinchasqankurayku, khuskataj tantakusqankurayku (Hech. 2:42; 8:30, 31). w23.02 pág. 3 párr. 7

Jehová Diosqa kasukojkunaman ‘wiñay kausayta’ qonanta nin (Rom. 6:23). Chay nisqanpi tʼukurejtinchejqa, payta astawan munakunchej. Kaypi tʼukurina: Tatanchej Jehovaqa mayta munakuwasqanchejrayku chay sumaj regalota qoyta munawanchej, ajinamanta ni jaykʼaj paymanta tʼaqakunanchejpaj. Diosninchej wiñay kausayta qonawanchejta niwasqanchejqa, pruebaspi rikukuspa sinchʼita sayanapaj yanapawanchej. Enemigosninchej wañuchinawanchejta niwajtinchejpis, Jehovata sirvikullasunpuni. ¿Imarayku? Yachanchej wañupunanchejkama Jehovata mana wasanchaspa sirvikojtinchejqa, pay kausarichimunawanchejta. Suyakuytataj atisun niña ujtawan wañuyta (Juan 5:28, 29; 1 Cor. 15:55-58; Heb. 2:15). Jehovaqa kausay yaku juturi, wiñaypajtaj kausan. Chayrayku yachanchej noqanchejmanpis wiñay kausayta qoyta atiwasqanchejta (Sal. 36:9). Bibliaqa sutʼita rikuchin Jehovaqa wiñaymantapacha kasqantapuni, wiñaykamataj kanallantapuni (Sal. 90:2; 102: 12, 24, 27). w22.12 pág. 2 párrs. 1-3

Jehovaj kamachisnenqa pruebas jamuwajtinchej mana tʼukunchejchu. Yachanchej Biblia kayta nisqanta: “Noqanchejqa tukuy imasta ñakʼarinanchejpuni tiyan Diospa Gobiernonman yaykunapaj” (Hech. 14:22). Yachallanchejtaj wakin problemasninchejqa paraisopi kausakushajtillanchej wiñaypaj chinkananta. Chaypeqa manaña “wañuy kanqachu, nitaj llakiypis, nitaj waqaypis, nitaj nanaypis” (Apo. 21:4). Jehovaqa mana pruebasmanta jarkʼawanchejchu, jinapis aguantanapaj yanapawanchej. Romamanta cristianosman imatachus apóstol Pablo nisqanpi tʼukurina. Ñaupajtaqa nerqa ima pruebaspichus paypis, hermanosninpis kashasqankuta. Chaymantataj qhelqarqa: “Tukuy chay imaspi atipajkunapuni kanchej, pichus munakuwarqanchej chaynejta”, nispa (Rom. 8:36, 37). Chayqa rikuchiwanchej Jehovaqa uj pruebapi kashajtinchejpis allin rinawanchejpaj yanapayta atiwasqanchejta. w23.01 pág. 14 párrs. 1, 2