Diciembre

Etiopiamanta uj autoridad bautizakunanpaj, ¿wakichisqañachu kashanman karqa? Kaypi tʼukurina. Chay autoridadqa “Jerusalenman Diosta yupaychaj risqa” (Hech. 8:27). Chayta ruwasqanpi reparakun judiomansina tukusqanta. Payqa Hebreo Qhelqasqasta sumajta rejserqa, chaypitaj Jehovamanta yachakorqa. Jinapis astawan yachayta munarqa. Chayrayku Felipewan tinkushajtenqa profeta Isaiaspa qhelqasqanta leesharqa (Hech. 8:28). Chantapis yachakullaytapuni munarqa. Payqa Etiopiamantapacha Jerusalenpi temploman Jehovata yupaychaj viajarqa. Felipeqa etíope runaman mana yachasqan imasta sutʼincharqa, importante cheqa yachachiykunata. Chaykunamanta ujqa karqa Jesús Mesías kasqan (Hech. 8:34, 35). Jehovatawan Jesustawan munakusqan maytapuni sinchʼiyasqanrayku, bautizakuytapuni munarqa Jesuspa discipulonman tukunanpaj. Felipetaj bautizakunanpaj listoña kashasqanta reparaspa bautizarqa. w23.03 págs. 8, 9 párrs. 3-6

Mana ajinata parlasunman chayqa, Jehová mana allinpajchu qhawawasunman. (Pro. 6:16, 17). Runas llullakuyta allillanpaj qhawajtinkupis, noqanchejqa Jehová jina yuyayta munanchej (Sal. 15:1, 2). Chayrayku ni uj chhikitallantapis llullakunchejchu, nillataj imatapis pakanchejchu wajkuna allillan kasqanta yuyanankupaj. Ama cuento qʼepis kanachu (Pro. 25:23; 2 Tes. 3:11). Pillawanpis parlashajtinchej cuentota rikhurichishasqanchejta reparaspaqa, waj allin imasmanta parlana. Kay mundopeqa casi tukuy runas mana allin imasta parlanku. Chayrayku mayta kallpachakunanchej tiyan Jehovaj munasqanman jina parlananchejpaj. Payqa imaynatachus parlasqanchejta sumajta uyarin. Predicacionpi, reunionespi, wajkunawan parlasqanchejpi ima, tukuy atisqanchejta Jehovata jatunchanapaj kallpachakusun chayqa, payqa bendeciwasun. Manaña kay sajra mundo kajtenqa, parlasqanchejwan Jehová Diosta jatunchayta atillasun (Jud. 15). w22.04 pág. 9 párrs. 18-20

Jehovawan Jesuswan maytapuni munakuwasqanchejpi piensarejtinchejqa, sonqonchej aysawanchej noqanchejpis paykunata munakunallapajtaj (1 Juan 4:10). Astawanraj paykunata munakunchej Jesús sapa ujninchejrayku wañusqanta entiendespa. Apóstol Pabloqa mayta chay regalomanta agradecekorqa. Chayrayku Galatasman cartanpi nerqa: ‘Diospa Wawanqa munakuwarqa, noqaraykutaj kausayninta qorqa’, nispa (Gál. 2:20). Qantapis Jesús wañusqanrayku Jehová pusamusorqa amigon kanaykipaj (Juan 6:44). Jehová qanpi allin imasta rikusqanta yachaspa, amigoyki kananpajtaj may chhikata pagasqanta yachaspa, ¿imayná sientekunki? ¿Nichu sonqoyki kuyurin? ¿Nichu chayrayku Jehovatawan Jesustawan astawan munakunki? Chayrayku tukuyninchej kay tapuypi piensarina kanman: “¿Imata ruwanaypajtaj chay munakuy tanqawanqa?”. Diostawan Cristotawan munakusqanchejqa, wajkunata munakunapaj tanqawanchej (2 Cor. 5:14, 15; 6:1, 2). w23.01 pág. 28 párrs. 6, 7

Jehovaqa Biblianejta kamachisninta yanapan ‘khuska payta sirvinankupaj’. Jehovaqa Palabranmanta ashkha partesta qhelqacherqa kʼumuykukoj sonqo runaslla entiendeyta atinankupaj jina (Luc. 10:21). Bibliataqa mundontinmanta runas leenku. Jinapis kʼumuykukoj sonqoyoj runaslla Bibliata entiendeyta atinku, chayman jinataj kausakuyta atinku (2 Cor. 3:15, 16). Jehovaj yachaynin Bibliapi sutʼi rikukun. Jehovaqa Palabrannejta mana uj grupota jinallachu yachachiwanchej, manaqa sapa ujninchejta yachachiwanchej, sonqochawanchejtaj. Palabranta leespaqa reparanchej sapa ujninchejmanta mayta llakikusqanta (Isa. 30:21). Ashkha kutispichá chay kutipi yanapanawanchejpaj jinapuni uj textota leerqanchej. Biblia may chhika runaspaj qhelqasqa karqa chay, ¿imajtintaj chanta kay tiempomanta runaspaj jina kashan, sapa ujta yanapananpaj jinataj? Bibliata Jehová qhelqachisqanrayku. Payqa pimantapis aswan yachayniyoj (2 Tim. 3:16, 17). w23.02 págs. 4, 5 párrs. 8-10

Cristianosqa Jehovata mayta munakunchej. Jehovataqa tukuy atisqanchejta sirviyta munanchej. Chaypajtaj tukuy atisqanchejta kallpachakunanchej tiyan aswan sumaj cristianos kanapaj, Diospa llajtanpi yanapakunapaj jina sumaj imasta ruwayta yachanapaj, imaynallamantapis wajkunata yanaparinapaj ima. Aswan sumaj cristianos kayta munanchej, munakuyniyoj Tatanchej Jehovata kusichiyta munasqanchejrayku. Jehovaqa imastachus ruwayta yachasqanchejwan payta sirvejtinchej mayta kusikun. Chantapis sumaj cristianos kayta munallanchejtaj hermanosninchejta astawan yanapanapaj (1 Tes. 4:9, 10). Mashkha unayña cristianos kaspapis, tukuyninchej ñaupariyllatapuni atinchej. w22.04 pág. 22 párrs. 1, 2

Kay mundomanta gobiernosqa tumpitamantawan Jatun Babiloniata, nisunman mundontinmanta tukuynin llulla religionesta chinkarparichenqanku. Ajinamanta manchay ñakʼariy tiempo qallarenqa. Chayta rikuspa, ¿ashkha runaschu Jehovata yupaychayta qallarenqanku? Mana. Bibliaqa Apocalipsis 6 capitulopi rikuchiwanchej chay tiempopi Jehovata mana sirvejkunaqa, kay mundomanta gobiernospi, kay mundoj qhapaj kayninpiwan yanapata maskʼanankuta. Chay imastataj orqo chhankaswan kikinchan. Jehovataj mana Gobiernonta apoyasqankurayku paykunata enemigosninta jina qhawanqa (Luc. 11:23; Apo. 6:15-17). Manchay ñakʼariy tiempoqa ancha llakiypuni kanqa. Jehovaj testigosnintaj sutʼi rejsiy kanqanku. Imajtinchus paykunallaña Jehovata sirvishanqanku, manapunitaj ‘millay phiña animalta’ apoyanqankuchu (Apo. 13:14-17). w22.05 págs. 16, 17 párrs. 8, 9

Jehovaj kamachisnenqa mana ‘Diospa Gobiernonmanta sumaj willaykunallatachu’ willashanchej (Mat. 24:14). Manaqa Apocalipsis 8-10 capitulospi parlasqan angelestapis yanapashallanchejtaj. Chay angelesqa willashanku, Diospa Gobiernonmanta willaykunata mana uyariyta munajkunapaj ashkha ñakʼariykuna kananta. Chayrayku Jehovaj testigosnenqa, juchachana willaykunata willashanchej. Chaytaj “granizowan ninawan” jina. Chay willayqa rikuchin imastachus Dios ruwananta Satanaspa mundonmanta kaj imasta (Apo. 8:7, 13). Runasqa yachananku tiyan, kay mundoj tukukuynin qayllitapiña kashasqanta. Ajinallamanta kausayninkuta cambiayta atenqanku, Jehová Diospa kʼajaj phiñakuynin pʼunchaypi mana wañunankupaj (Sof. 2:2, 3). Chay willayqa mana tukuy runasmanchu allin rijchʼan. Chayrayku chayta willanapajqa, mana manchachikojkuna kananchej tiyan. Manchay ñakʼariy tiempopi chay juchachana willayqa aswan sinchʼiraj kanqa (Apo. 16:21). w22.05 pág. 7 párrs. 18, 19

Qhariwarmis wawitayoj kasqankupi piensarina. Paykunaqa niraj wawayoj kashaspa, ashkha kutispi uyarerqankuña imaynatachus wawasta uywanamanta discursosta. Jinapis wawitayoj kaytawanqa, chay discursospi yuyaychaykunata uyarisqankuman jina wawankuta uywananku kanqa. Chayta ruwaytaj may sumajpuni. Bibliaj tukuynin yuyaychaykunasninta jatunpaj qhawajtinchejpis, mana tukuynin yuyaychaykunapunichu noqanchejpaj jina kashan. Imajtinchus wakin yuyaychaykunataqa, kausayninchejpi imapis cambiajtinraj chayman jina ruwananchej kanqa. Chayrayku Jehovata yupaychajkunaqa Bibliata leenchejpuni, ‘sapa diataj’ chaypi tʼukurinchej. Israelmanta reyesmanpis kamachikorqa chayta ruwanankuta (Deu. 17:19). Tatas, Jehovaqa qankunaman kamachisunkichej wawasniykichejman paymanta yachachinaykichejta. Chayta ruwaytaj may sumajpuni. Jinapis wawasniykichejmanqa mana Jehovamanta ashkha imasta yachachinallaykichejchu kanqa, manaqa yanapanaykichej kanqa Jehovata tukuy sonqo munakunankupaj. w22.05 pág. 26 párrs. 2, 3

Juchallikuspaqa mana sonqollanchejtachu nanachikunanchej tiyan, manaqa niña chay juchata ruwanapaj kallpachakunanchej tiyan. Jehovaqa perdonanawanchejpaj sumajta qhawaykurin cambiashasqanchejtachus manachus. Cambiaj runaqa sajra kausayninta saqen, Jehovaj munayninman jinataj watejmanta kausakun (Isa. 55:7). Chantapis yuyayninta mosojyachin, Jehovaj yuyaychaykunasninwantaj yanapachikun (Rom. 12:2; Efe. 4:23). Chay runaqa sajra yuyaykunata wijchʼunan tiyan, sajra ruwaykunatapis saqepunan tiyan (Col. 3:7-9). Chaywanpis Jehová perdonanawanchejpaj, juchasninchejmantapis llimphuchanawanchejpajqa, Jesús juchasninchejrayku wañusqanpi creenanchejpuni tiyan. Jehovaqa cambianapaj tukuy atisqanchejta kallpachakushasqanchejta rikuspa, Jesús kausayninta qosqanrayku perdonawasun (1 Juan 1:7). w22.06 pág. 6 párrs. 16, 17

Adanwan Evawan juchallikusqankumantapacha, runasqa paykunapura ñakʼarichinakunku (Ecl. 8:9). Wakenqa atiyninkuman atienekuspa wajkunata sufrichinku, maqaykunku, escuelamanta compañerosninkuta insultanku, imata ruwaykunankuta ninku, wakintaj familiankutapis ñakʼarichinku. Chayraykuchá runaqa runa masillantataj manchachikun. ¿Imaynatataj Satanás chaymanta valekun? Satanasqa runata manchikusqanchejmanta valekun, manaña predicananchejpaj chayri Jehovaj waj kamachiykunasninta manaña kasukunanchejpaj. Payqa wakin gobiernosta tanqan manaña predicajta saqenawanchejpaj, qhatiykachanawanchejpajtaj (Luc. 21:12). Kay mundo Diabloj makinpi kasqanrayku, ashkha runasqa Jehovaj testigosninmanta yapasqata parlanku, imaymana llulla imastapis. Chay llullasta creejkunataj noqanchejmanta burlakuwasunman, maqaykuwasunman ima (Mat. 10:36). Satanás chayta ruwachisqanmantataj mana tʼukunchejchu. Payqa ñaupa cristianospa tiemponkupiña chayta ruwachej (Hech. 5:27, 28, 40). w22.06 pág. 16 párrs. 10, 11

“Cheqan kajta ruwanankupaj ashkhasta” yanapakonqa nispa, ¿pikunamantataj parlashan? Kausarimojkunamanta, Armagedonta kausashaj pasajkunamanta, mosoj jallpʼapi nacekoj wawasmanta ima. Waranqa watas tukukuyta, tukuy kay jallpʼapi kausakojkunaqa manaña pantaj runaschu kanqanku. Yachanchej jina pipis mana pantaj runa kasqanqa, mana niyta munanchu wiñay kausayta japʼinanqa seguroña kasqanta. Adanpiwan Evapiwan piensarina. Paykunaqa mana pantaj runas karqanku. Jinapis wiñay kausayta japʼinankupajqa Jehovata kasukusqankuta rikuchinanku karqa. Llakikunapaj jinataj mana kasukorqankuchu (Rom. 5:12). 1.000 watas tukukuytaqa, tukuy kay jallpʼapi kausajkuna manaña pantaj runaschu kanqanku. ¿Tukuy chay mana pantaj runaschu Jehovaj Gobiernonta wiñaypaj apoyanqanku chayri Adanwan Evawan jinachu wakin kanqanku? Paykunaqa mana pantaj runas kaspapis mana Jehovata kasukorqankuchu. w22.09 págs. 22, 23 párrs. 12-14

Kay mundo astawan sajrayapushasqanta rikuspa, ¿creeyta atillasunmanchu kausay allinyananta? Familiasqa niña ñaupajta jinachu munanakunku. Runasqa astawan sajrayapushanku, aswan phiñas kanku, paykunallapajtaj imatapis munanku. Ashkhasqa mana autoridadespi atienekuyta atillankuchu. Jinapis chayqa rikuchiwanchej tumpamantawan kausay allinyananta. ¿Imajtin? Imajtinchus runasqa, ‘qhepa pʼunchaykunamanta’ profecía nisqanman jinapuni kashanku (2 Tim. 3:1-5). Kʼacha sonqoyoj runasqa mana negankumanchu chay profecía juntʼakushasqanta. Chay profecía juntʼakushasqantaj, rikuchiwanchej Jesucristo Rey jina Diospa Gobiernonpi kamachiyta qallarisqantaña. Jinapis chay profeciaqa, Diospa Gobiernonmanta parlaj ashkha profeciasmanta ujnillan. Chay profecías juntʼakusqanqa uj rompecabezas jina armaykukushan, reparachiwanchejtaj ima tiempopiñachus Jehovaj churasqan horariopi kausakushasqanchejta. w22.07 pág. 2 párrs. 1, 2

Coronavirus onqoy tiempopeqa, sumaj kamachiykunata japʼillarqanchejtaj imaynatachus tantakunanchejmanta, predicananchejmantapis. Tantakuykunasninchejta, jatun tantakuykunasninchejtapis, niraj imapi Internetnejta ruwayta qallarerqanchej. Chantapis casi tukuyninchej cartanejta, telefononejta predicayta qallarerqanchej. Jehovataj maytapuni bendeciwarqanchej. Ashkha sucursalesqa ninku mosoj willajkuna astawan yapakusqankuta. Ashkha hermanostaqa may sumajpuni rerqa chay tiempopi. Ichapis wakinninchejqa yuyarqanchej, coronavirus onqoymanta Diospa llajtanqa anchatañataj cuidashawasqanchejta. Jinapis kutin kutita rikorqanchej, chay kamachiwasqanchejqa may sumajpuni kasqanta. Tʼukurinapuni Jesús munakuywan pusashawasqanchejpi. Ajinamanta mana iskayrayasunchu, ima kajtinpis Jehovawan Jesuswan noqanchejwanpuni kanankumanta (Heb. 13:5, 6). w22.07 pág. 13 párrs. 15, 16

Orakushaspaqa mana Jehovata jatunchanallanchejchu tiyan, agradecekunallanchejtaj tiyan tukuy ima sumaj imasta qowasqanchejmanta. Agradecekusunman tʼikaspi may kʼachitu coloresta rikusqanchejmanta, may chhika miskʼi mikhunas kapuwasqanchejmanta, sumaj amigosniyoj kasqanchejmantapis. Munakuyniyoj Tatanchejqa tukuy chay imasta, waj imastapis qollawanchejtaj kusisqa kananchejta munasqanrayku (Sal. 104:12-15, 24). Jehovaman astawanraj agradecekunchej, sumaj yachachiykunata mikhunata jina qowasqanchejrayku, sumaj suyakuytapis qowasqanchejrayku. Ichapis qonqakusunman Jehovaman agradecekuyta imastachus noqanchejpaj ruwapuwasqanchejmanta. ¿Imataj yanapawasunman Jehovaman agradecekuyta mana qonqakunanchejpaj? Uj listapi anotakusunman imastachus Jehovamanta mañakusqanchejta, sapa kutitaj chay listanchejta qhawaykusunman imaynatachus Jehová kutichiwasqanchejta reparanapaj. Chaymantataj Jehovaman agradecekusunman yanapawasqanchejmanta (Col. 3:15). w22.07 pág. 22 párrs. 8, 9

Cheqa kajtaqa mana estudianallanchejchu tiyan. Chaywan sumajta yanapachikunapajqa cheqa kajman jina kausakunanchej tiyan, nisunman yachakusqanchejman jina ruwananchej tiyan. Ajinallamanta cheqa kajqa yanapawasun kusisqa kausakunapaj (Sant. 1:25). ¿Imatá ruwasunman cheqa kajman jinachus manachus kausakushasqanchejta yachanapaj? Uj hermano nin allinta qhawarikunanchej kasqanta imapichus allinta ruwashasqanchejta, imapitajchus mejorananchej kasqanta. Apóstol Pablo nerqa: “Maykamachus ñauparerqanchej, chayman jinallapuni maychus kajta purinachej”, nispa (Fili. 3:16). ‘Cheqa kajpi purinallapajpuni’ tukuy atisqanchejta kallpachakusqanchejqa, mayta yanapawanchej. Mana kausaynillanchejchu allinyan, manaqa Jehová Diosta kusichinchej, hermanosninchejtapis (Pro. 27:11; 3 Juan 4). Chayrayku cheqa kajta munakunchej, chayman jinataj kausakunchej. w22.08 págs. 18, 19 párrs. 16-18

¿Imaynatataj ancianos Jehovatawan Jesustawan mayta munakusqankuta rikuchinkuman? Jesuspa ovejitasninta munakuywan cuidaspa (1 Ped. 5:1, 2). Diospa Wawanqa chayta sutʼisituta nerqa apóstol Pedroman. Pedroqa kinsa kutita Jesusta mana rejsisqanta nisqanrayku, maytachá munarqa Jesusta munakusqanta rikuchiyta. Jesustaj kausarimuytawan payta taporqa: “Juanpa wawan Simón, ¿munakuwankichu?”, nispa. Pedroqa tukuy imatachá ruwanman karqa munakusqanta rikuchinanpaj. Jesustaj nerqa: “Ovejitasniyta michipuway”, nispa (Juan 21:15-17). Chaymantapacha Pedroqa Señorpa ovejitasninta munakuywan cuidarqa. Ajinamanta Jesusta munakusqanta rikucherqa. ¿Imaynatataj ancianos rikuchinkuman Jesús imatachus Pedroman nisqan paykunapaj may importante kasqanta? Jehovatawan Jesustawan mayta munakusqankuta rikuchinkuman, hermanosta kallpacharinankupaj tiempochakuspa, chiriyapoj hermanosta yanaparinankupajtaj mayta kallpachakuspa (Eze. 34:11, 12). w23.01 pág. 29 párrs. 10, 11

Ichapis uj sajra munayta atipayta munashasunman, yuyasunmantaj ni pi entiendewasqanchejta. Ajinata yuyayqa uj trampa jina. Chayqa yuyachiwasunman sajra munayninchejta atipanapaj kallpachakusqanchejqa qhasilla kasqanta, nipunitaj atipayta atinanchejta. Jinapis Bibliaqa kayta niwanchej: “Juchaman tanqasqa kashajtiykichej, Diosllataj yanapasonqachej aguantanaykichejpaj”, nispa. Chayrayku uj sajra munayninchej may sinchʼi kajtinpis, Jehovata mana wasanchaspa sirviyta atinchej. Jehovaj yanapayninwanqa mana atipachikusunchu chay sajra munayninchejwan. Kayta yuyarikunapuni: Pantaj runas kasqanchejrayku sajra munaykunaqa jamuwasunpuni. Chay munaykuna jamuwajtinchejtaj chay rato qhesachana, imaynatachus José Potifarpa warminmanta ayqekorqa ajinata (Gén. 39:12). Sajra munayninchejtaqa atipayta atinchejpuni. w23.01 págs. 12, 13 párrs. 16, 17

Cheqan kayqa Jehovaj ujnin kʼacha kaynin (Deu. 32:4). Pichus cheqan kajta ruwajqa tukuytapuni uj rejllata qhawayta yachan. Jehovataj tukuyta uj rejllata qhawan (Hech. 10:34, 35). Chaytataj sutʼita rikunchej ima parlaykunapichus Bibliata qhelqachisqanpi. Jehovaqa nerqa kay tukukuy tiempopi ‘cheqa yachayqa astawan ashkhayananta’, nisunman ashkha runas Bibliata entiendenankuta (Dan. 12:4). Chaytaj ajina kashan Bibliata, Bibliamanta orqhosqa publicacionestapis ashkhata traducikusqanrayku, ruwakusqanrayku, runasmantaj jaywakusqanrayku. Jehovaj llajtanqa tukuynin Bibliata chayri wakillanta 240 kuraj parlaykunapiña traducin. Tukuy runastaj mana pagaspalla chay Bibliata japʼikuyta atinku. Chayrayku tukuy nacionesmanta may chhika runasqa, ‘Diospa Gobiernonmanta sumaj willaykunata’ niraj tukukuy chayamushajtin japʼikushanku (Mat. 24:14). Jehovaqa cheqan Dios, mayta munakuwasqanchejraykutaj atikojtenqa tukuy runas Palabranta leespa payta rejsinankuta munan. w23.02 pág. 5 párrs. 11, 12

Diospa justiciantaqa maytachá munakunchej. Jinapis tukuy pantaj runas kanchej. Chayrayku mana allinta qhawarikusunman chayqa, imachus allin, imatajchus mana allin kasqanmanta facilta kay mundomanta runas jina yuyayta qallarisunman (Isa. 5:20). Jesús kay jallpʼapi kashajtin, chay tiempomanta religionta kamachejkunaqa cheqan runas kasqankuta, cheqan kajta ruwasqankutataj yuyakoj kanku. Jinapis Jesusqa paykunata sinchʼita kʼamerqa. Imaraykuchus mana wajkunata khuyakojchu kanku, munayninkuman jinallataj imachus allin, imatajchus mana allin kasqanta nej kanku (Ecl. 7:16; Luc. 16:15). Kay tiempomanta wakin runaspis paykunaman rijchʼakunku. Paykuna yuyasqankuman jinaqa, mana ima sajratapis ruwankuchu. Chay runasqa wajkunata qhawaranku, aswan sumaj kasqankutataj yuyakunku. Jehovaqa ajinata ruwaj runasta manapuni allinpajchu qhawan, mana justicianman jinachu ruwasqankurayku. Chantá, ¿imataj justicia niyta munan? Imachus Diospa qhawayninman jina allin chayta ruway. Bibliapi ima palabrasmantachus “justicia” traducikun chay palabrasqa, niyta munan Jehovaj cheqan kamachiykunasninman jina kausakuy. w22.08 pág. 27 párrs. 3-5

Jesusqa discipulosnin pantajtinkupis paykunapi confiarqa (Juan 15:16). Santiagowan Juanwanqa Jesusmanta mañakorqanku Gobiernonpi ujninkuta pañanman, ujninkutataj lloqʼenman tiyaykuchinanta. Jesustajrí mana yuyarqachu chayraykulla Jehovata sirvishasqankuta, nitaj nerqachu niña apostolesninchu kanankuta (Mar. 10:35-40). Aswan qhepamantaj Jesusta japʼerqanku chay chʼisi, tukuynin discipulosnin payta saqerparqanku (Mat. 26:56). Jinapis Jesusqa paykunapi atienekullarqapuni. Payqa discipulosnin pantaj runas kasqankuta yachaspapis, tukukuykama munakullarqapuni (Juan 13:1). Kausarimuytawantaj 11 cheqa sonqo apostolesninman kay sumaj ruwaykunata qorqa: Runasta discipulosninman tukuchimunankuta, munasqa ovejitasnintataj cuidapunankuta (Mat. 28:19, 20; Juan 21:15-17). Jesusqa paykunapi confiaspa mana pantarqachu. Tukuyninku wañupunankukama Diosta sirvillarqankupuni. Jesusmantaqa yachakusunman wajkunapi confiayta pantaj runas kajtinkupis. w22.09 pág. 6 párr. 12

Jehová munakuwasqanchejmanta, noqanchejwan kashasqanmanta mana iskayrayasunchu chayqa, Satanasta mana manchachikusunchu. 118 Salmota qhelqaj salmistaqa ashkha llakiykunapi rikukorqa. Payqa ashkha enemigosniyoj karqa, chaykunamanta wakintaj manchay atiyniyoj karqanku (versículos 9, 10). Wakin kutistaj urmachinankupaj mayta tanqarqanku (versículo 13). Chantapis Jehovawan sinchʼita kʼamichikorqa (versículo 18). Jinapis takiyninpi kayta nerqa: “Mana manchikusajchu”, nispa. Yacharqa mayta kʼamichikojtinpis Jehová payta munakusqantapuni. Chay salmistaqa mana iskayrayarqachu ima kajtinpis, munakuyniyoj Diosnin yanapananmantapuni (Sal. 118:29). Mana iskayrayananchejchu tiyan Jehová sapa ujninchejta munakuwasqanchejmanta, ajinamanta kay imasta mana manchachikusunchu: 1) Familianchejta mana uywayta atinata. 2) Runata manchachikuyta. 3) Wañuyta manchachikuyta. w22.06 pág. 15 párrs. 3, 4

Jehovata yupaychayta ñaupajmanpuni kausayninchejpi churana. Jehová Ruwawajninchej kasqanrayku payllata yupaychananchej tiyan (Apo. 4:11; 14:6, 7). Chayrayku Jehovata yupaychay kausayninchejpi aswan importante kanan tiyan. Paytataj munasqanman jina yupaychananchej tiyan, nisunman “espirituman jina, cheqa kajman jinataj” (Juan 4:23, 24). Munanchej Diosqa espíritu santonwan yanapanawanchejta, ajinamanta payta yupaychasqanchej Bibliapi nisqanman jina kananpaj. Maypichus tiyakunchej chaypi Jehovaj testigosnin prohibisqa kajtinkupis, Jehovata yupaychayqa aswan importantepuni kanan tiyan. Kay tiempopi hermanosninchej, hermanasninchejpis pachajmanta astawan carcelpi kashanku Jehovaj testigosnin kasqankuraykulla. Chaywanpis kusisqa kanku, imaraykuchus tukuy atisqankuta ruwanku Diosmanta mañakunankupaj, estudianankupaj, wajkunamanpis Diosmanta, Gobiernonmanta ima willarinankupaj. Runas contranchejta parlajtinkupis, qhatiykachawajtinchejpis kusisqa kanchej, imajtinchus yachanchej Jehová noqanchejwan kashasqanta, tʼinkanawanchejtataj (1 Ped. 4:14). w22.10 pág. 9 párr. 13

Proverbios libropeqa Jehovaqa tukuy tiempomanta runaspaj sumaj yuyaychaykunata qon. Chayman jina ruwajtinchejtaj aswan allinta kausakunchej. Chay sumaj yuyaychaykunamanta iskayllata qhawarina. Ñaupaj kaj, kapuwasqanchej imasllawan sonqo juntʼasqa kana. Proverbios 23:4, 5 kayta yuyaychawanchej: ‘Ama qhapaj kayta maskʼaspalla puriychu. Chay qhapaj kayqa lijrachakuytawan águila jina patata phawarispa chinkariponqa’, nispa. Jinapis kay tiempopeqa, qhapajkunajtapis wajchaspatapis yuyayninkoqa qolqeta ganayllapiña kashan. Paykunaqa usqhayllata qhapajyayta munasqankurayku juchata ruwanku. Chayrayku mana allinpaj qhawasqachu kanku, wajkunawan phiñanakunku, onqoykunku ima (Pro. 28:20; 1 Tim. 6:9, 10). Iskay kaj, niraj parlashaspa tʼukurina. Mana allinta qhawarikuspaqa parlasqanchejwan wajkunaj sonqonkuta mayta nanachisunman. Proverbios 12:18 nin: “Mana allinta yuyaychakuspa parlarpareyqa espadaj tʼojsisqan jina. Yachayniyoj runaj parlasqantaj sanoyachin”, nispa. Ama wajkunaj pantasqankumanta parlaspa purinachu, ajinamanta tukuywan allinta apanakusun (Pro. 20:19). w22.10 pág. 21 párr. 14; pág. 22 párrs. 16, 17

Ezequielqa imatachus willanan karqa chay willayta sumajta entiendenan karqa. Payqa chay willaypi creenan karqa, ajinamanta tukuy sonqo willayta atinanpaj. Ezequiel chay kʼuyuna librota mikhuykusqantawantaj, tʼukunapaj jina repararqa “miskʼi jina miskʼipuni” kasqanta (Eze. 3:3). Paypajqa Jehovaj sutinpi willay miskʼirichikunanpaj jinapuni karqa (Sal. 19:8-11). Ezequielqa may agradecesqa kasharqa Jehová profetan kananpaj ajllakusqanmanta. Chay qhepatataj Jehovaqa Ezequielman nerqa: “Kay tukuy nisusqayta uyariway, sonqoykipitaj japʼikuy”, nispa (Eze. 3:10). Chaywanqa Jehová payta nisharqa kʼuyuna libropi imastachus nisqanta yuyarikunanta, chaypitaj tʼukurinanta. Ezequiel chayta ruwajtintaj creeynenqa astawan sinchʼiyarqa. Chantapis chaywanqa sutʼita yacharqa ima willaytachus runasman willanan kasqanta (Eze. 3:11). Ezequielqa imatachus willanan karqa chayta sumajta entiendeytawan, chaypitaj creeytawan wakichisqaña karqa willananpaj, tukuchanankamataj chayta ruwananpaj. w22.11 pág. 6 párrs. 12-14

Diospa llajtanpi cambios kajtin, chaytaj mana allinchu rijchʼawajtinchej, ¿imatá ruwasunman? Tukuy sonqowan kasukunallapuni. Israelitas chʼin jallpʼanta rishajtinku, Cohatpa familianmanta levitasqa tukuypa rikunanta Diospa trato ruwasqan arcata apaj kanku (Núm. 3:29, 31; 10:33; Jos. 3:2-4). Chayta ruwayqa may sumajpuni karqa. Jinapis israelitas Sumaj Jallpʼata japʼikapusqankutawan, manaña uj lugarmanta waj lugarman apanankuchu karqa. Chayrayku cohatitasqa waj ruwanasta japʼerqanku (1 Cró. 6:31-33; 26:1, 24). Cohatitasqa ñaupajta sumaj llankʼayniyoj kasqankurayku quejakunkuman karqa, chayri aswan sumaj llankʼayta mañakunkuman karqa. Jinapis Bibliaqa mana ninchu chayta ruwasqankuta. ¿Imatá paykunamanta yachakunchej? Jehovaj llajtan ima cambiota ruwajtinpis tukuy sonqo yanapakuna, chay cambiorayku waj imastañataj ruwananchej kajtinpis. Ima llankʼayta qowajtinchejpis kusiywan ruwana. Kayta yuyarikunapuni: Jehovaqa mana llajtanpi ima ruwanayoj kasqanchejraykuchu allinpaj qhawawanchej. Paypajqa aswan sumaj kasukunanchej, ima llankʼayta ruwananchejmantapis. w22.11 pág. 23 párrs. 10, 11

Ñaupa tiempopi, Pablo presochasqa kashajtin uj cristiano yanaparispa allinta ruwarqa. Sutenqa Onesíforo karqa. Pabloqa paymanta kayta nerqa: “Manataj carcelpi wisqʼasqa kasqaymanta pʼenqakorqachu”, nispa. Astawanpis Onesiforoqa Pablota tarinankama mayta maskʼaykorqa, taripaspañataj necesitasqanpi yanaparqa. Payrayku kausaynintapis wañuy pataman churarqa. ¿Imatá Onesiforomanta yachakunchej? Qhatiykachasqa kashanku chay hermanostaqa yanapanallapuni, mana wajkunata manchachikuspa. Tukuy atisqanchejta ruwana paykunaman kutikunapaj, yanaparinapajtaj (Pro. 17:17). Paykunaqa munakunanchejta, yanapananchejta ima necesitanku. Tʼukurina Rusiamanta hermanosninchej, hermanasninchejpis imatachus ruwasqankupi wakin hermanos presochasqa kajtinku. Chay hermanosmanta wakin juzgasqa kajtinku, ashkha hermanos juzgadoman rinku paykunawan kanankupaj. ¿Imatá paykunamanta yachakunchej? Ñaupajman apaj hermanosmanta llullasta parlajtinku, paykunata presochajtinku chayri qhatiykachajtinku ama manchachikunachu. Paykunapaj Jehovamanta mañapuna, familiasninkuta cuidana, imaynamantapis yanapariyta maskʼana (Hech. 12:5; 2 Cor. 1:10, 11). w22.11 pág. 17 párrs. 11, 12

Ancianosqa Bibliawan hermanosta kallpachananku tiyan, llakisqa kashajtinkutaj sonqochananku tiyan. Chay ruwayta Jehová paykunaman qon (1 Ped. 5:2). Uj desastre natural kajtin, ñaupajtaqa hermanosta yanapananku tiyan allillan kashanankupaj, mikhunanku, ropanku, maypichus puñukunankupis mana faltananpaj. Jinapis chay llakiypi rikukojkunaqa, ashkha killasta necesitanqanku Bibliawan kallpacharinata, sonqocharinatapis (Juan 21:15). Hermanonchej Haroldqa Sucursalta Kamachejkunamanta ujnin. Payqa desastres naturales kasqanrayku llakiypi rikukoj ashkha hermanoswan parlarerqa. Pay nin: “Llakiypi rikukojkunaqa mana chay ratochu allinyapunku. Hermanosqa ichapis ruwanasninkuta watejmanta ruwayta qallarinkuman. Jinapis ichá kutin kutita yuyarikunkuman uj desastrepi familiarninku wañupusqanta, munasqa familiarninkoj regalonta pierdesqankuta, chayri casi wañusqankuta. Chaykunata yuyarikojtinkoqa watejmanta sonqonku nananman. Chaytaj mana niyta munanchu pisi creeyniyoj kasqankuta. Ajina llakiypi rikukojkunataqa chay pasanpuni”, nispa. Bibliaqa kayta yuyaychan: ‘Waqajkunawan waqaychej’, nispa. Ancianostaj chay yuyaychayman jinapuni ruwananku tiyan (Rom. 12:15). w22.12 pág. 22 párr. 1; págs. 24, 25 párrs. 10, 11

Allin kajta ruwanapaj kallpachakushanchej chayqa, Jehovaqa yanapawanchej espíritu santonta mana michʼakuspa qowasqanchejwan. Diospa Palabranta estudiaspaqa espiritunwan yanapachikushanchej. Tantakuykunaman rispapis espíritu santota japʼillanchejtaj. Chaypeqa hermanosninchejwan karikunchej. Paykunapis noqanchej jinallataj allin kajta ruwanankupaj kallpachakushanku. Chayta yachaytaj mayta kallpachawanchej (Heb. 10:24, 25; 13:7). Tukuy sonqo mañakojtinchej, imapichus cambianapajtaj yanapata mañakojtinchej, Jehovaqa espíritu santonta qowanchej. Ajinamanta cambianallapajpuni kallpata japʼinchej. Jinapis ichá chayqa mana sajra munayninchejta chinkachenqachu. Pero kallpata qowasunchej mana chaykunawan atipachikunapaj. Imaschus Jehovaman qayllaykuchiwanchej chay imasta ruwashanchejña chayqa, kallpachakunallapuni mana chay imasta ruwayta saqenapaj, allin imastataj ruwayta munanapaj. w23.01 pág. 11 párrs. 13, 14

Bibliaqa mana jampismanta parlaj librochu, nitaj sumajta alimentakunamanta parlaj librochu. Jinapis sutʼinchawanchej imaynatachus Jehová chayta qhawasqanta. Uj versiculopi kayta yuyaychawanchej: ‘Cuerpoykimanta karunchay imaschus ñakʼarichisunkiman chay imasta’, nispa (Ecl. 11:10). ¿Imastaj onqochiwasunman? Mana midirikuspa mikhuy, anchata tomay ima. Bibliataj chaykuna jucha kasqanta nin (Pro. 23:20). Chayrayku Jehovaqa sumajta midirikuyta yachananchejta munan, imatachus chantá mashkhatachus mikhunata chayri tomanata ajllashaspa (1 Cor. 9:25). Dios kausayta uj regalota jina qowasqanchejmanta agradecekusqanchejtaqa, imastachus ajllasqanchejwan rikuchiyta munanchej. Chayrayku allinta piensarispa imatapis ajllananchej tiyan (Sal. 119:99, 100; Pro. 2:11). Imastachus mikhunanchejtaqa allin yuyaywan ajllana. Ichapis uj mikhuna gustawanchej. Pero malta ruwawasqanchejta yachanchej chayqa, mana allinchu kanman chayta mikhuykunallanchej. Chantapis sumaj yuyayniyoj kasqanchejta rikuchillanchejtaj sumajta puñuspa, ejerciciosta ruwaspapuni, llimphitus kaspa, wasinchejtapis llimphutapuni japʼispa. w23.02 pág. 21 párrs. 6, 7

¿Imaynatá tarisunman Bibliapi sumaj yachachiykunata? Chayta yachanapajqa 2 Timoteo 3:16, versiculosta ukhuncharina. Chaypi nin ‘Diosmanta tukuy Qhelqasqaqa may sumaj’ kasqanta kay tawa imaspaj: yachachinapaj, kʼaminapaj, tukuy imata cheqanchanapaj, imachus allin kasqanman jina yachachinapajpis. Bibliamanta wakin libros mana anchata oqharikunchu chaykunapis, chay tawa imaspi yanapallawanchejtaj. Chaypajqa leesqanchejta sumajta ukhuncharina imatachus Jehovamanta, munayninmanta chayri yuyaychaykunasninmanta yachachiwasqanchejta reparanapaj. Leesqanchej kʼaminawanchejpaj jina kananpajrí, ¿imatá ruwasunman? Bibliata leeshaspaqa reparakuna ima mana allin imitasta ruwaymanchus chayri yuyaymanchus yachasqa kasqanchejta, chaykunatataj saqepuna. Reparanallataj imaschus Jehovata mana wasanchanapaj yanapawasqanchejta. Chantapis piensarina imaynatachus uj versículo pantasqa yuyayta cheqanchasqanta. Chaytaj ichapis kanman imatachus predicacionpi niwasqanchej. Allin kasqanman jina yachachinawanchejpajrí, ¿imatá ruwananchej tiyan? Imaschus Jehová jina yuyanapaj yanapawasunman chay tukuy imasta maskʼana. Chay tawa yuyaychaykunaman jinapuni ruwasun chayqa, Bibliapi sumaj yachachiykunata astawan tarisun. Chaytaj yanapawasun Bibliata leesqanchejwan astawan yanapachikunapaj. w23.02 pág. 11 párr. 11

Daniel libromanta uj profeciapi nin, Jesusqa qanchis tiempos tukukuyta Gobiernonta japʼinanta. ¿Yachayta atisunmanchu maykʼajchus chay kasqanta? (Dan. 4:10-17). ‘Qanchis tiemposqa’ 2.520 wataswan ninakun, qallarerqataj 607 watapi Jesús niraj jamushajtin. Chay watapi babiloniosqa Jehovaj sutinpi kamachej qhepa kaj reyta Jerusalenmanta orqhorqanku. Tukukorqataj 1914 watapi. Chay watapi Jehovaqa Gobiernonmanta Rey kananpaj Jesusta churarqa, pichus “chayta japʼinanpaj derechoyoj karqa” chayta (Eze. 21:25-27). ¿Imaynatá kay profecía yanapawanchej? ‘Qanchis tiemposmanta’ profeciata entiendeyqa, sutʼita reparachiwanchej Jehovaqa maychus tiemponpipuni nisqasninta juntʼasqanta. Jehovaqa nerqaña maykʼajchus Gobiernonta sayarichinanta. Chay nisqan tiempopipunitaj sayaricherqa. Chayrayku mana iskayrayasunmanchu chay waj profeciaspis nisqan tiempollapitaj juntʼakunanta. Arí, Jehovaj pʼunchaynenqa ‘mana qhepata chayamonqachu’ (Hab. 2:3). w22.07 pág. 3 párrs. 3-5