Febrero

Rey Ezequiasqa sinchʼi onqosqa kashaspa, Jehovamanta mañakorqa sanoyachinanta, Jehovataj sanoyacherqa (2 Rey. 20:1-6). Chaywanpis apóstol Pablo ‘aychanpi khishkanta’ orqhonanta mañakojtin, Jehovaqa mana chay khishkanta orqhorqachu (2 Cor. 12:7-9). Rey Herodesqa apóstol Santiagota, apóstol Pedrotawan wañuchiyta munarqa. Santiagoqa wañuchisqa karqa, Pedrotajrí Jehovaj milagronrayku salvakorqa (Hech. 12:1-11). Ichapis yachayta munasunman imaraykuchus Jehová ujta salvasqanta, ujtataj mana. Chayta Biblia mana sutʼinchajtinpis, yachanchej Jehovaqa “mana jaykʼajpis mana cheqan kajtaqa” ruwasqanta (Deu. 32:4). Ichapis wakin kuteqa mana munasqanchejman jinachu Jehová kutichiwasun. Jinapis yachanchej payqa munakuywanpuni, cheqan kajman jinapunitaj imatapis ruwasqanta. Chayrayku mana quejakunchejchu imaynatachus Jehová mañakuykunasninchejman kutichiwasqanchejmanta (Job 33:13). w23.11 pág. 21 párr. 6

Bibliata qhelqaj Santiago nerqa, yachayniyoj runaqa “kasukunanpaj wakichisqa” kasqanta. ¿Ima niytá munan chay? Pikunamanchus Jehová atiyta qon chaykunata kasukunapaj wakichisqa kana kasqanta, tukuy sonqotaj chayta ruwayta munana kasqanta. Chaywanqa Jehovaqa mana nishawanchejchu paypa contranpi imatapis ruwachiyta munawanchej chaykunata kasukunanchejta (Hech. 4:18-20). Jehovaj kamachiykunasnenqa mana pantayniyoj kanku. Chayrayku ichá yuyasunman runata kasukunamantaqa, payta kasukuy aswan fácil kasqanta (Sal. 19:7). Atiyniyoj kanku chay runasqa pantaj runas kanku. Jinapis Tatanchej Jehovaqa tatasman, autoridadesman, ancianosman ima atiyta qon (Pro. 6:20; 1 Tes. 5:12; 1 Ped. 2:13, 14). Paykunata kasukuspataj Jehovata kasukushanchej. w23.10 pág. 6 párrs. 2, 3

Jehovaj atiyninpi tʼukurispa creeyninchejta sinchʼiyachillasunmantaj. Jehovaqa atiyniyoj tukuy nisqasninta juntʼananpaj. Arí, Payqa Tukuy Atiyniyoj (Job 42:2; Mar. 10:27; Efe. 3:20). Jehovaqa Abrahanmanwan Saramanwan nerqa allin viejitusña kajtinkupis, wawitayojraj kanankuta (Gén. 17:15-17). Chantá Abrahanman nillarqataj mirayninman Canaán jallpʼata qonanta. Jinapis Abrahanpa miraynenqa, nisunman israelitasqa ashkha watasta Egiptopi esclavos karqanku. Chayrayku ichapis yuyarqanku Jehovaj chay nisqan ni jaykʼaj juntʼakunanta. Jinapis chayqa juntʼakorqapuni. Aswan qhepamantaj, Mariaman mana qhariwan puñuykuspalla Wawanta nacechikunanta nerqa. Chaywantaj juntʼakorqa imatachus Edén huertapi ashkha watas ñaupajtaña nisqan (Gén. 3:15). Jehovaj tukuy nisqasninpi, imaynatatajchus chaykunata juntʼasqanpi tʼukurispaqa sutʼita reparanchej may atiyniyoj kasqanta. Chayraykutaj paraisota apamunanpi astawan creenchej (Jos. 23:14; Isa. 55:10, 11). w23.04 pág. 28 párrs. 10-12

Jehovaqa Davidpa mañakuykunasninman kuticherqa, salvarqataj (1 Sam. 19:10, 18-20; 2 Sam. 5:17-25). Noqanchejpa mañakuyninchejmanpis kutichillawasuntaj (Sal. 145:18). Ichapis Jehovaqa mana munasqanchejman jinapunichu mañakuykunasninchejman kutichiwasun. Pabloqa uj sinchʼi llakiyniyoj karqa, chaytaj aychanpi khishka jina karqa, kinsa kutitataj Jehovamanta mañakorqa chay khishkata orqhonanta. Jehovaqa oracionesninman kuticherqa, pero mana Pablo munasqanman jinachu. Jehovaqa mana problemanta chinkacherqachu. Astawanpis kallpata qorqa payta tukuy sonqo sirvinallanpajpuni (2 Cor. 12:7-10). Ichá noqanchejmanpis mana munasqanchejman jinapunichu Jehová kutichiwasunman. Jinapis sutʼita yachanchej imachus noqanchejpaj allin kasqanta Jehová yachasqanta. Payqa “mañakusqanchejmantapis chayri yuyasqanchejmantapis, aswan ashkhataraj ruwayta atin” (Efe. 3:20). Chayrayku ichapis mana munasqanchejman jinapunichu, nitaj munasqanchej ratopunichu mañakuyninchejman kutichiwasun. w23.05 págs. 8, 9 párrs. 4-6

Allin kanman kausarimuy kananpi sapa kuti tʼukurinanchej. Mana yachanchejchu imachus qʼaya kananta. Ichapis noqanchej sinchʼita onqoykusunman chayri munasqa familianchej kaymanta jinalla wañupunman (Ecl. 9:11; Sant. 4:13, 14). Kausarimuy kanantapuni suyakusqanchejqa chay llakiykunata aguantanapaj yanapawasun (1 Tes. 4:13). Bibliaqa niwanchej Tatanchej Jehovaqa sumajta rejsiwasqanchejta, maytataj munakuwasqanchejta (Luc. 12:7). Jehovaqa mosoj cuerpoyojta kausarichimuwasun, jinapis kikin yuyayniyojta, kikin genioyojta, imaynachus ñaupajta karqanchej ajinata. Chayta ruwananpajqa may sumajtapuni rejsiwanchej. Mayta munakuwasqanchejraykutaj wiñaypaj kausakunanchejta munan. Chayrayku wañupojtinchejpis payqa kausarichimullawasun. Pero, ¿imajtintaj creesunman Dios kausarichimunawanchejtapuni? Imajtinchus payqa mayta munashan, atiyniyojtaj kausarichimunawanchejpaj. w23.04 págs. 8, 9 párrs. 2-4

Josewan Mariawanqa Jehovawan sumaj amigos kanankupaj iskayninku kallpachakorqanku. Paykunaqa sutʼita yacharqanku familia jina Jehovata yupaychanankupuni kasqanta (Luc. 2:22-24; 4:16). Paykunamantataj kay tiempopi casados mayta yachakunkuman. Wawasniyoj kankichej chayqa, ichapis mana atillankichejchu reunionesman riyta, Familiapi Diosta Yupaychanapaj tantakuyta ruwaytapis. Chantapis qhariwarmi jina khuska estudianaykichejpaj, orakunaykichejpajpis astawanrajchá mana tiempochakuyta atillankichejchu. Jinapis kayta ama qonqaychejchu: Khuska Jehovata yupaychankichej chayqa astawan payman qayllaykunkichej, aswan ujchasqastaj kankichej. Chayrayku Jehovata yupaychaytapuni kausayniykichejpi ñaupajman churaychej. Casado kausayniykichejpi problemas kajtin, nichá Familiapi Diosta Yupaychanapaj tantakuyta ruwayta munallankichejchu. Jina kajtenqa Bibliamanta imachus gustasunkichej chayta uj chhikitallantapis ukhunchariwajchej. Chayqa yanapasonqachej, iskayniykichej astawan munanakunaykichejpaj, Jehovatataj khuska yupaychayta munanaykichejpaj. w23.05 pág. 22 párrs. 7, 8

Abdiasqa Jehovata manchachikusqanrayku tukuy imapi allin kajtapuni ruwaj, de confianza runataj karqa. Chayrayku reyqa wasinmanta encargado kananpaj churarqa (Nehemías 7:2, kikinchay). Chantapis Diosta manchachikusqanqa manchay wapu kananpaj yanaparqa. Payqa sajra rey Achab kamachishajtin kausakorqa (1 Rey. 16:30). Chantapis Achabpa warmenqa Jezabel karqa. Jezabeltaj Baalta yupaychaj, maytataj Jehovata chejnikoj. Chayrayku Israelpi chunka ayllusmanta niña pipis Jehovata yupaychananpaj tukuy imata ruwarqa. Chantapis Diospa ashkha profetasninta wañuracherqa (1 Rey. 18:4). Jezabel Jehovaj profetasninta wañuchinanpaj qhatiykachashajtin, Abdiasqa 100 profetasta pakarqa, “50 profetasta sapa cuevapi, paykunamantaj tʼantatawan yakutawan” qorqa (1 Rey. 18:13, 14). Jezabelchus chayta yachanman karqa chayqa, chay wapu runaqa wañuchisqa kanman karqa. Abdiasqa tukuy runas jina wañuyta manchachikorqachá. Jinapis salvakuyllata munananmantaqa Jehovata, kamachisnintawan astawan munakorqa. w23.06 pág. 16 párrs. 9, 10

Jehovaqa kay tiempopipis llajtanta pusashallanpuni Palabrannejta, Wawannejta ima, payqa congregacionmanta uma. ¿Sutʼitachu reparanchej Jehová runasnejta llajtanta pusashallasqantapuni? Arí. Piensarina imachus kasqanta 1800 wata qhepata. Charles Russellwan yanapajkunasninwanqa repararqanku 1914 wataqa may importantepuni kasqanta Diospa Gobiernonpaj (Dan. 4:25, 26). ¿Imaynapí chayta repararqanku? Bibliaj profeciasninta estudiaspa. Jehovataj chay estudiasqankuta bendicerqa. Imachus 1914 watapi pasasqanqa, sutʼita reparachiwarqanchej Diospa Gobiernon kamachiyta qallarisqanta. Chay watapi Primera Guerra Mundial qallarerqa, wañuchej onqoykuna karqa, terremotos, yarqhaykuna ima (Luc. 21:10, 11). Chaypi sutʼita reparakorqa Jehovaqa chay kʼacha sonqoyoj runasnejta llajtanta yanapashasqanta. w24.02 pág. 22 párr. 11

Diospa kamachisnenqa yachanchej pay munakuwasqanchejta, allinninchejtapunitaj munasqanta (Rom. 8:35-39). Yachallanchejtaj Bibliaj yuyaychaykunasninta kasukoyqa allinninchejpajpuni kasqanta (Isa. 48:17, 18). Jinapis, ¿imatá ruwasunman kaymanta jinalla uj llakiypi rikhurejtinchej? Ichapis uj familiarninchej imata nispa chayri imata ruwaspa, sonqonchejta nanachiwasunman. Ichapis onqosqa kasqanchejrayku manaña anchata Jehovapaj llankʼayta atisunmanchu. Ichapis uj desastre natural kasqanrayku llakiypi rikhurinchej. Chayri ichapis creenciasninchejrayku qhatiykachasqas kanchej. Chay jina llakiykunapi rikukuspa ichapis tapukunchej: “¿Imajtintaj noqatapuni kay pasashawanri? ¿Imapichu pantani? ¿Niñachu Jehová bendecishawanman?”, nispa. Maykʼajllapis ajinata yuyarqanki chayqa ama llakikuychu. Diospa kamachisninmanta ashkhas ajinallapitaj rikukorqanku (Sal. 22:1, 2; Hab. 1:2, 3). w23.04 pág. 14 párrs. 1, 2

Juchata ruwayman tanqasqa kajtinchej, chay rato qhesachanchej ima sajra yuyaytapis chayri ima sajra ruwaytapis. Ajinamanta Diosninchejwan amigosllapuni kanapaj. Jehovaqa munan “tukuy sonqo” kasukunanchejta (Rom. 6:17). Imastachus kamachiwasqanchejqa allinninchejpajpuni, nitaj chay kamachiykunasninta cambiayta atisunmanchu (Isa. 48:17, 18; 1 Cor. 6:9, 10). Satanasqa manaña sinchʼita sayayta atinanchejpaj maqachiwanchej, llakiykunapitaj rikhurichiwanchej. Payqa “oqoykuyta” munawanchej, nisunman Jehovamanta karunchayta munawanchej (1 Ped. 5:8). Ñaupa tiempomanta cristianostaqa, sinchʼita sayayta munasqankurayku manchaykucherqanku, maqarqanku, wañucherqanku ima (Hech. 5:27, 28, 40; 7:54-60). Kay tiempopipis Satanasqa qhatiykachachillawanchejtaj. Ajinata ruwachishan Rusiapi, waj lugarespiwan. Chaypi hermanosninchejtaqa maytapuni ñakʼarichishanku. Chantapis ashkha hermanosninchej imaynallamantapis qhatiykachasqas kanku. Satanasqa mana qhatiykachachillawanchejchu, payqa mana reparay ‘trampastapis’ churallawanchejtaj (Efe. 6:11). w23.07 págs. 15, 16 párrs. 6-9

Diospa Palabranta estudiajtinchej Jehovata astawan munakusunchej. Chay munakuytaj yachakusqanchejman jina kausakunapaj yanapawasunchej. Bibliaj yuyaychaykunasnin yanapawasqanchejraykutaj imatapis aswan sumajta ajllayta atisunchej. Diosta kusichiyta munasqanchejraykutaj yuyayninchejta cambiasunchej, allin kajtataj ruwasunchej. Imaynatachus uj wawita tatan jina imatapis ruwan, ajinallatataj noqanchejpis Tatanchej Jehová jina ruwayta munasunchej (Efe. 5:1, 2). Kaykunata tapurikusunman: “Bautizakusqaymantapacha, ¿astawanñachu kunan Jehovata munakuni? Yuyasqay, ruwasqaypis, ¿astawanñachu rijchʼakun Jehovaj yuyasqanman, ruwasqanmanpis? Chaytaj, ¿sutʼichu reparakun congregacionmanta hermanosta munakusqaypi?”, nispa. Sichus munakuyninchej manaña ñaupajta jinachu kashan chayqa, ama desanimakunachu. Ñaupa tiempomanta cristianospis ajinallapitaj rikukorqanku. Jinapis Jesusqa mana chayraykuchu paykunata qhesacharqa, noqanchejtapis nillataj qhesachawasunchu (Apo. 2:4, 7). Payqa yachan Jehovata, hermanosninchejtapis qallariypi jina watejmanta munakuyta atisqanchejta. w23.07 pág. 8 párrs. 2, 3

Apóstol Pedroqa ashkha imaspi pantarqa. Ñaupajta pay nerqa imapis kajtin Jesuspa ladollanpipuni kananta, nitaj chay ujnin apóstoles jinachu saqerparinanta (Mar. 14:27-29). Chantá kutin kutita puñurparerqa (Mar. 14:32, 37-41). Jesusta japʼishajtinkutaj saqerparerqa (Mar. 14:50). Chaymantataj kinsa kutita nerqa Jesusta mana rejsisqanta, jurarqa ima (Mar. 14:66-71). ¿Imaynataj Pedro kasharqa jatun juchapi urmasqanta reparakuspa? Manchaytapuni llakikorqa, sonqo nanaytataj waqarikorqa (Mar. 14:72). Jesustaj mana uyanpichu niporqa pantasqanta. Astawanpis amigon Pedroman nerqa sumaj ruwaykunata japʼinanta (Juan 21:15-17). Pedroqa yacharqa jatun juchapi urmasqanta, jinapis mana desanimakorqachu. ¿Imarayku? Payqa sutʼita yacharqa Jesús payta munakusqantaraj. ¿Imatá yachakunchej? Jehovaqa munan munakuwasqanchejmanta, perdonawasqanchejmantapis manapuni iskayrayananchejta (Rom. 8:38, 39). w24.03 págs. 18, 19 párrs. 13-15

Khuchichakuy juchapi purejkunaqa ichapis pʼenqakunkuman, pisipaj qhawakunkuman, mana munashaspalla onqoj rikhurinkuman, chayri familiankuta tʼaqanachinkuman. Chayrayku amapuni kasunachu “mana yuyayniyoj” warmej invitacionninta. Khuchichakuy juchapi urmajkunamanta ashkhasqa mana Jehovallamantachu karunchakunku, manaqa wañuchej onqoykunatapis japʼikunku, chaywantaj wañunku (Pro. 7:23). Proverbios 9:18 versiculoqa nin “chay warmej invitadosnenqa Sepultura ukhupiña kashasqankuta”. Ajina kajtin, ¿imajtintaj chay chhika runas chay invitacionta japʼikunkuri? (Pro. 9:13-18). Pornografiaqa tukuynejpi kashan uj trampa jina. Wakenqa yuyanku chayta qhaway allillan kasqanta, jinapis mana ajinachu. Pornografiata qhawaj runasqa may llakiypipuni rikukunku, ni paykunata, ni wajkunatapis respetankuñachu, nitaj chayta qhawayta saqeyta atillankuchu. Khuchichakuy imasta qhawaj runasqa mana yuyayninkumanta chayta orqhoyta atillankuchu, nitaj qonqaytapis. Chantapis pornografiata qhawayqa sajra kajta munapayayta mana chinkachinchu, manaqa astawan rijchʼarichin (Col. 3:5; Sant. 1:14, 15). Chantapis pornografiata qhawajkunamanta ashkhasqa khuchichakuy juchapi urmankupuni. w23.06 pág. 23 párrs. 10, 11

Ichapis maypi jina waj naciones chay atiyniyoj gobiernoj contranta sayaykonqanku, pero mana cuentanmantaqa atiyniyoj gobierno kayta atenqankuchu. Chayta yachanchej Bibliaj profecianpi “rumi”, nisunman Diospa Gobiernon chay lantej chakisninta qʼalata phirirparinanta nisqanrayku (Dan. 2:34, 35, 44, 45). ¿Imatachus Daniel lantej chakisninmanta nisqanta creenchejchu? Creenchej chayqa kausayninchejpi chay rikukonqa. Kay mundoj tukukuynin qayllitapiña kashasqanta yachasqanchejrayku, mana ashkha qolqeta ganaytachu, nitaj ashkha imasniyoj kaytachu maskʼasun (Luc. 12:16-21; 1 Juan 2:15-17). Chantapis chay profeciata entiendeyqa yanapawasun predicayta, runasta Jesuspa discipulosninman tukuchiytapis kausayninchejpi ñaupajman churanapaj (Mat. 6:33; 28:18-20). Kay profeciata estudiaytawan kaypi piensarisunman: “Diospa Gobiernonqa tumpamantawan tukuynin gobiernosta chinkachenqa, ¿ruwasqasniywan chaymanta mana iskayrayasqaytachu rikuchini?”. w23.08 pág. 11 párrs. 13, 14

Kʼumuykukoj sonqo kayqa yanapawasun manaña ñaupajta jinachu imatapis ruwayta atisqanchejta reparakunapaj, ichapis edadninchejrayku, onqosqa kasqanchejrayku, chayri waj imasrayku. Onqosqa kasqanchejrayku congregacionpi ima ruwaytapis mana juntʼayta atisunchu chayqa, Barzilái jina ama japʼikunallachu (2 Sam. 19:35, 36). Chayri Moisés jina wajkunawan yanapachikuna, atikojtintaj wajkunaman ruwaykunata qona (Éxo. 18:21, 22). Kʼumuykukoj sonqo kasun chayqa, atisqallanchejta ruwasun, manataj mana atisqanchejtaqa. Ajinamanta mana kallpanchejta qhasita usuchisunchu. Ama yuyanachu wajkuna pantasqankumanta noqanchej juchayoj kasqanchejta. Noqanchejqa mana wajkunapaj ajllapuyta atisunmanchu, mana allinta ajllajtinkutaj mana jarkʼayta atisunmanpunichu ima llakiykunaspichus rikukunankumanta. Ichapis uj wawaqa Jehovamanta karunchakapunman, chaytaj tata mamanpa sonqonkuta maytapuni pʼakinman. Sichus tatas wawankoj pantasqanmanta paykuna juchayoj kasqankuta yuyankuman chayqa, manchay llasa qʼepita jina qʼepiriykukunkuman, Jehovataj mana munanchu chayta ruwanankuta. w23.08 pág. 29 párrs. 11, 12

Sansonqa noqanchej jinallataj pantaj runa kasqanrayku, wakin kutisqa pantarqa. Uj pacha Jehovaj nisqanta mana kasusqanrayku pantarqa, chayraykutaj may llakiypi rikhurerqa. Unaysitutaña juez kashajtin, “Sansonqa Sorec mayumanta Dalila sutiyoj warmiwan sonqonta suwachikorqa”. Niraj Dalilata rejsishaspa payqa uj filistea warmiwan casarakuyta munarqa. Bibliataj nin “chayqa Jehová Diospa wakichisqan kasqanta. Diosqa maskʼasharqa imaynallamantapis filisteospa contrankupi maqanakuyta”. Chay qhepatataj Sansonqa filisteospa Gaza llajtankuman rispa, uj khuchi warmej wasinpi qhepakorqa. Chay kutipi Jehovaqa Sansonman kallpata qorqa chay llajtaj punkusninta orqhorananpaj, ajinamanta niña sumaj jarkʼasqachu kananpaj (Jue. 14:1-4; 16:1-3). Pero Dalilawan sonqonta suwachikuspaqa mana allintachu ruwarqa. Paywan casaraspaqa manaña filisteoswan maqanakuyta atinmanchu karqa, imaraykuchus Dalilaqa israelitasina karqa. Filisteosqa munarqanku Dalila Sansonta chʼaukiyananta. Chaypajtaj ashkha qolqeta paganankuta nerqanku, Dalilataj munallarqa. w23.09 pág. 5 párrs. 12, 13

Tanteariyta yachayqa yanapawasun llampʼu sonqo kanapaj. Tanteariyta yachaj runaqa, pipis creenciasninmanta mana allinta parlajtin, mana phiñarpakullanchu. Ashkha kutispeqa, runas imatapis tapuwajtinchejqa, mana niwanchejchu imaraykuchus chayta tapuwasqanchejta. Chayrayku manaraj kutichishaspa, allin kanman kayta yuyarikunanchej: Ichapis mana yachanchejchu imaraykuchus chayta tapushawasqanchejta (Pro. 16:23). Gedeonpi piensarina. Uj kuti, Efraín ayllumanta runasqa Gedeonta mayta rimarqanku, israelitaspa enemigosninwan maqanakoj paykunata mana pusasqanmanta. ¿Imaraykutaj paykuna ajinata rimankuman karqa? Ichapis may phiñasqas kashasqankurayku. Imayna kajtinpis, Gedeonqa tanteariyta yacharqa. Payqa kallpachakorqa imaraykuchus ajina phiñasqa kashasqankuta entiendenanpaj, llampʼu sonqowantaj kuticherqa. “Chayta uyarispa Efraín ayllumanta kajkunaqa manaña phiñakorqankuchu” (Jue. 8:1-3). w23.09 pág. 16 párrs. 8, 9

Yachanchej jina, Jehovaqa Wawanta maytapuni munakorqa, Wawanpis payta mayta munakullarqataj. Jehovaj sonqonqa maytachá nanarqa Wawanta ñakʼarichisqankuta, pisipaj qhawasqankuta, maytataj sufrichisqankuta rikuspa. Uj tatalla yachan wawan wañupojtin imayna llakiychus kasqanta. Kausarimuy kananpi sinchʼita creejtinchejpis, pinillanchejpis wañupojtenqa llakikunchejpuni. Ajinachá Jehovapis sientekorqa 33 watapi Wawanta wañuchejtinku. Munasqa Wawantaqa mayta sufrichispa wañucherqanku (Mat. 3:17). Señorpa Cenan chayamunankama, ¿imatá ruwasunman? Jesús kacharichiwasqanchejmanta astawan estudiasunman sapallanchejpi Bibliata estudiashaspa, chayri familiapi Diosta yupaychashaspa. Amataj qonqanachu Jesuspa wañuyninta yuyarinapaj pʼunchaypaj Betelpi Bibliamanta sutʼinchakusqan videota qhawariyta. Jesuspa wañuyninta yuyarinapaj sonqonchejta wakichisun chayqa, wajkunatapis yanapasun chaywan yanapachikunankupaj (Esd. 7:10). w24.01 pág. 11 párrs. 10-12

Jehovaj kallpanta japʼinapajqa mañakunanchej tiyan. Paytaj mañakuykunasninchejman kutichiwasun sumaj atiyta qowasqanchejwan (2 Cor. 4:7). Chantapis Palabranta leenanchej tiyan, chaypitaj tʼukurinanchej tiyan (Sal. 86:11). Imatachus Palabranpi niwasqanchejqa ‘atiyniyoj’ (Heb. 4:12). Chayrayku sichus Jehovamanta mañakusun, Palabrantataj leesun chayqa, necesitasqanchej atiyta japʼisun, ajinamanta aguantayta atisun, payta kusisqallapuni sirvisun, qowasqanchej ruwaytapis juntʼayta atisun mana atinapaj jinallachu kajtinpis. Qhawarina imaynatachus Jehová profeta Jonasta kallpachasqanta. Jehovaqa Jonasman uj llankʼayta qorqa. Chaywanpis manchachikorqa chayta ruwayta. Chayrayku waj ladoman rej barcota japʼirispa chaypi ayqekorqa. Chaynejta paywan, barcopi risharqanku tukuy chaykunawanqa, sinchʼita paramusqanrayku, wayramusqanrayku ima wañuy patapi rikukorqanku. Barcota apaykachajkunataj Jonasta yakuman wijchʼuykorqanku. Chaypitaj uj jatun pescado Jonasta oqoykorqa. Pescadoj wijsantaj manchay laqhachá, manchachikunapaj jinatajchá karqa. ¿Imatá Jonás ruwarqa pescadoj wijsanpi sapitallan kashaspa kallpata japʼinanpaj? Jehovamanta mañakorqa (Jon. 2:1, 2, 7). w23.10 pág. 13 párrs. 4-6

Apóstol Pedro chay iskay cartasninta ñaupa tiempomanta cristianosman qhelqajtinpis, Jehovaqa Bibliaman chaykunata churacherqa noqanchejpis chay iskay cartaswan yanapachikunanchejpaj (Rom. 15:4). Runasqa mana creenkuchu imatachus Biblia aswan qhepaman kananta nisqanpi. Noqanchejqa ashkha watastaña kay mundoj tukukuynin chayamunanta sonqo kʼajaywan willashanchej. Chayrayku contranchejpi kaj runasqa noqanchejmanta burlakuwasunman, ninkumantaj tukukoyqa ni jaykʼaj chayamunanta (2 Ped. 3:3, 4). Pillapis predicacionpi chayta niwajtinchej, chayri trabajonchejmanta, familianchejmanta pillapis ajinata niwajtinchej creeyninchej pisiyanman. ¿Imataj yanapawasunman? Qhawarina imatachus Pedro nisqanta. Wakin runasqa ichapis yuyankuman Jehová kay mundota tukuchinanpaj anchata qheparishasqanta. Jinapis Pedroj nisqanqa yuyarichiwanchej Jehovaqa mana noqanchej jinachu tiempota qhawasqanta (2 Ped. 3:8, 9). Jehovapajqa waranqa watas uj pʼunchay jinalla. Chantapis payqa mayta pacienciakuwanchej, nitaj munanchu ni pi chinkachisqa kananta. Jinapis pʼunchaynenqa chayamonqapuni, kay mundotaj tukuchisqapuni kanqa. w23.09 págs. 26, 27 párrs. 2-5

¿Imaraykutaj apóstol Pablo Judeapi tiyakoj hebreo cristianosman qhelqarqa? Iskay imasraykusina. Ñaupajtaqa paykunata kallpachananpaj. Chay cristianosmanta ashkhasqa judiospa religionninkupi uywasqa kasqanku, chay religionta kamachejkunataj paykunamanta burlakojchá kanku cristianosman tukusqankurayku. Cristianosman tukojkunajtaqa mana Diosta yupaychanankupaj uj jatun templonku karqachu, nillataj uywasta ofrendata jina jaywanankupaj altarninkupis, nillataj sacerdotesninkupis. Judiospatataj chaykuna karqa. Chayraykutaj Cristoj discipulosnenqa desanimakunkuman karqa, creeyninkupis pisiyanman karqa (Heb. 3:12, 14). Ichapis paykunamanta wakenqa yuyarqanku judiospa religionninkuman kutipuyta. Iskay kaj, apóstol Pabloqa paykunata reparacherqa mosoj yachachiykunata, chayri aswan pakasqa yachachiykunata entiendenankupaj mana kallpachakushasqankuta. Chay yachachiykunaqa Diospa Palabranmanta “khamuna” mikhuna jina kanku (Heb. 5:11-14). Paykunamanta wakenqa Moisespa Leyninman jinallarajpunisina kausakusharqanku. w23.10 págs. 24, 25 párrs. 3, 4

Wakin hermanasqa mana casarakuyta munankuchu (Mat. 19:10-12). Jehovawan Jesuswanqa soltera hermanasta may valorniyojpaj qhawanku. Entero mundontinpi soltera hermanasqa congregacionespaj uj sumaj bendición kanku. Soltera hermanas munakuyninkuta rikuchisqankurayku, wajkunamantataj llakikusqankurayku, ashkhasqa paykunata hermanasninkuta jina, mamasninkuta jina qhawanku (Mar. 10:29, 30). Wakenqa Jehovapaj astawan llankʼanku. Mundontinpi astawanqa hermanaspuni predicanku (Sal. 68:11). ¿Kunanmantapacha wakichikuwajchu Jehovapaj astawan llankʼanaykipaj? Ichapis precursora kawaj, construccionpi yanapakuwaj chayri Betelpi yanapakuwaj. ¿Imataj chaypaj yanapasunkiman? Jehovamanta mañakuy, pikunachus chay imasta ruwashankuña chaykunawan parlariy, tapurikuytaj imatachus chaypaj ruwanayki kasqanta. Imastachus ruwanaykitataj sumajta anotakuy, ajinamanta imatachus ruwayta munasqaykita juntʼanaykipaj. Jehovapaj astawan llankʼanki chayqa, llajtanpi waj sumaj imastawan ruwayta atinki. w23.12 pág. 22 párrs. 16, 17

Yachanchej manchay ñakʼariy tiempo may qayllitapiña kashasqanta. Chayrayku kunan ni jaykʼaj jina kasukunanchej tiyan sumaj willaykunata predicanamanta kamachiyta. Jinapis qolqemanta pisichikushanchej chay, chayri autoridades predicacionman churanakushanku chayqa, ichapis mana atillasunmanchu predicacionta ñaupajman churayta. ¿Imataj yanapawasunman? “Angelesta kamachej Jehová” Dios noqanchejwanpuni kashasqanpi atienekunanchej tiyan. Sichus munayninchejta ñaupajman churanamanta Diospa Gobiernonta ñaupajman churasun chayqa, Jehovaqa yanapawasunpuni. Chayrayku ni imata manchikunanchejchu tiyan (Ageo 2:4). Jehovaqa munan tukuy atisqanchejta runasta yanapananchejta payta sirvinankupaj, ajinamantataj salvakunankupaj. Ageoqa judiosta kallpacharqa Diospa templonta watejmanta ruwayta qallarinankupaj. Paykunaman kaytapis nishanman jina karqa: “Cimientosta watejmanta churaykuychej, imatachus ñaupaj wataspi mana ruwasqaykichejmantataj qonqapuychej”, nispa. Arí, qonqapuspa watejmanta ruwayta qallarinanku karqa. Jehová paykunata nerqa kasukojtinku bendecinantapuni (Ageo 2:18, 19). Noqanchejpis predicacionta ñaupajman churasun chayqa, Jehová bendeciwasunpuni. w23.11 pág. 16 párr. 8; pág. 17 párr. 11

Apóstol Pabloqa romanosman cartanpi nerqa tukuy runas juchasapas kasqanchejta. Chanta, ¿imaynamantataj Diosta kusichiyta atinchej, ñaupaqenpitaj cheqan runaspaj qhawasqa kayta atinchej? Pabloqa Abrahanmanta parlarqa tukuy cristianosman chayta entiendechinanpaj. Jehovaqa Abrahán Canaanpi tiyakushajtin, cheqan runa kasqanta nerqa. ¿Imaraykutaj chayta nerqa? Mana Moisespa Leyninta kasukusqanraykuchu (Rom. 4:13). Chayta ninchej Israel nacionqa 400 watas kurajninmanraj chay Leyta japʼisqanrayku. Chanta, ¿imaraykutaj Jehová Abrahanta cheqan runapaj qhawarqa? Payqa Abrahanta mayta khuyakorqa, creeyninraykutaj cheqan runapaj qhawarqa (Rom. 4:2-4). w23.12 pág. 3 párrs. 4, 5

Kay diapaj textoj nisqantaqa profeta Natán nerqa. Chayta rey Davidman nisqantawan, Jehovaqa profeta Natanman nerqa mana Davidchu templota ruwapunanta (1 Cró. 17:3, 4, 11, 12). Chayta uyarispa, ¿David phiñakorqachu? Mana. Astawanqa wawan Salomón chay wasita ruwananpaj tukuy imata alistarqa: qolqeta, materialestapis (1 Cró. 29:1-5). Jehovaqa Davidwan uj tratota ruwarqa mana paychu templota ruwapunanta nisqantawanpacha. Payqa nerqa mirayninmanta ujnin wiñaypaj kamachinanta (2 Sam. 7:16). Paraisopi Cristo waranqa watasta kamachishajtin, Davidqa maytachá kusikonqa Jesucristo paypa mirayninmanta kasqanta yachaspa. Davidpa kausayninmanta yachakunchej Jehovapaj mana tukuy munasqanchejtapunichu ruwayta atejtinchejpis, Diosninchejqa mana suyasqanchej bendicionesta qonawanchejta. w23.04 pág. 16 párrs. 8-10

Bibliamanta wakin partes llakiypi kashajtinchej maytapuni sonqochawasunman. Wakenqa kanku Job libro, Salmos libro, Proverbios libro, imatachus Jesús Mateo 6 capitulopi nisqanpis. Sichus Jehovaman orakusun, Palabrantataj leesun chayqa, reparasun imaynatachus sonqochawasqanchejta. Kaykunata yuyarikunapuni: Aswan sinchʼi llakiypi kashajtinchejpis, Jehovaqa chaypipuni kanqa yanapanawanchejpaj, ni jaykʼaj sapanchejta saqerpariwasunchu (Sal. 23:4). Payqa niwanchej jarkʼanawanchejta, sinchʼita sayachinawanchejta, yanapanawanchejta, sonqochanawanchejta ima. Isaías Jehovaman nerqa: “Qanpi tukuy sonqo atienekojkunata jarkʼanki, sonqo tiyaykuyta paykunaman qonki, qanpi atienekusqankurayku”, nispa (Isa. 26:3). Chayrayku Jehovapi atienekuna, ima yanapastachus qowasqanchejwantaj yanapachikuna. Chayta ruwasun chayqa, aswan sinchʼi llakiyta aguantanapajpis kallpanchej kallanqa. w24.01 pág. 25 párrs. 16, 17

Kay pʼunchaypaj textoqa kay tiempopi juntʼakushan. Kay palabraspis juntʼakushallantaj: “Tukuynin wawasniykita Jehová Dios yachachipusonqa, wawasniykeqa allintapuni kausakonqanku. Justiciapi sumaj sayachisqa kanki […], ni imapis manchachisonqachu, ni imamanta manchachikunayki kanqachu, manchachikoyqa mana qayllamusonqachu” (Isa. 54:13, 14). Jehovaj llajtan runasman yachachisqantaqa, ni ‘kay mundoj diosnin’ Satanaspis sayachiyta atenqachu (2 Cor. 4:4). Jehovallata yupaychayqa watejmanta sayarichisqaña, niñataj ujtawan chʼichichasqachu kanqa, contranchejpi ima armata ruwasqankupis qhasilla kanqa. w24.02 pág. 4 párr. 10

Cristianosqa Jehová Diosman kausayninchejta qopusqanchejta may jatunpaj qhawanchej. Chaytaj sutʼita reparakun imastachus ajllasqanchejpi, familiapaj ruwanasninchejpipis. Familianchejta mantienenapaj tukuy atisqanchejta ruwanchej. Jinapis Jehovaj munasqantapuni ruwanchej familianchej munasqanta ruwanamantaqa (Mat. 10:35, 36; 1 Tim. 5:8). Ichapis wakin kutisqa Jehovata kusichinapaj wakin imasta ruwasunman, chaytaj familianchejta mana kusichinmanchu. Familiataqa Jehová rikhuricherqa, munantaj kusisqa kausakunankuta (Efe. 3:14, 15). Cheqamantapuni kusisqa kausakuyta munanchej chayqa, Jehová munasqanman jinapuni ruwananchej tiyan. Jehovaqa payta sirviyta munasqanchejrayku tukuy imata ruwasqanchejta may jatunpaj qhawan. Chaywanpis munan familianchejta cuidanallatapuni, munakuyninchejta, respetasqanchejtapis rikuchinallatapuni (Rom. 12:10). w24.02 pág. 18 párrs. 11, 13