Junio

Jehovaqa ñaupa tiempomanta cristianosta bendicerqa llakiypi rikukuspapis ñaupajllamanpuni risqankurayku. Paykunaqa ashkha kutispi qhatiykachasqa karqanku, wakin kutispeqa mana suyashajtillanku. Qhawarina imachus Bernabeta, apóstol Pablotawan pasasqanta Listrapi predicashajtinku. Qallariypi runasqa tukuy sonqo paykunata japʼikorqanku, uyarerqankutaj. Jinapis qhepaman wakin enemigosqa runasta yachaykucherqanku paykunaj contranta oqharikunankupaj. Chay runasmanta wakintaj Pablota rumiswan chʼanqaykorqanku, wañuchisqankutataj creerqanku (Hech. 14:19). Jinapis Bernabewan Pablowanqa waj ladoman ripuspa sigue predicasharqanku. Chayta ruwasqankuwantaj ‘ashkha runasta yanaparqanku creejkunaman tukunankupaj’. Hermanosninkutapis nisqankuwan ruwasqankuwan kallpacharqanku (Hech. 14:21, 22). Bernabewan Pablowanqa qhatiykachasqa kaspapis mana saykʼuporqankuchu, chay ruwasqankutaj ashkha runasta yanaparqa. Sichus noqanchejpis mana saykʼupusunchu, Jehovaj kamachiwasqanchejtataj ruwallasunpuni chayqa, ashkha bendicionesta japʼisun. w23.04 págs. 16, 17 párrs. 13, 14

Rey Davidqa ashkha enemigosniyoj karqa, chayrayku Jehovamanta yanapata mañakojpuni. Davidqa sutʼita yacharqa Jehová mañakuykunasninta uyarisqanta, kutichisqantataj. Qanpis chaymanta ama iskayrayaychu. Biblia niwanchej Jehovaqa yachayta qonawanchejta, llakiykunata aguantanapajpis necesitasqanchej kallpata qonawanchejta. Jehovaqa hermanosnejta yanapawasunman, payta mana yupaychaj runasnejtapis yanapallawasunmantaj. Ichapis Jehovaqa mana munasqanchejman jinapunichu mañakuykunasninchejman kutichiwasun, jinapis kutichiwasunpuni. Jehovaqa necesitasqanchejtapuni qowasun, maychus tiemponpitaj. Chayrayku orakunallapuni Jehová oracionesninchejman kutichinawanchejta yachaspa. Jehovaqa kunan cuidawasunpuni, qhepamantaj tukuyninchejman ‘munasqanchejta qowasun’ (Sal. 145:16). w23.05 pág. 8 párr. 4; pág. 13 párrs. 17, 18

Ima bendicionestachus japʼisqanchejpi piensareyqa sumaj. Bibliata leenapaj, Jehovamanta mañakunapaj kallpachakushanchej chayqa, piensarina imaynatachus chay Jehovaman astawan qayllaykuchinawanchejpi (Sal. 145:18, 19). Aswan sumaj cristiano kanapaj kallpachakushanchej chayqa, piensarina imaynatachus chay wajkunawan aswan sumajta kausakunapaj yanapanawanchejpi (Col. 3:14). ¿Imatawán ruwasunman? Imaraykuchus imatapis ruwayta munasqanchejta anotakusunman, chaytataj sapa kuti qhawaykurisunman. Chantapis yanapawanchej chay hermanoswan masichakuna (Pro. 13:20). Wakin kutisqa mana sonqonchej aysawanchejchu imatachus ruwayta munasqanchejta ruwanapaj. ¿Chay niyta munanchu niña chayta juntʼananchejta? Mana. Noqanchejqa siga kallpachakusunman ruwayta munasqanchejta juntʼanapaj sonqonchej mana aysawajtinchejpis. Chaypaj mayta kallpachakunanchej kajtinpis, nisqanchejta juntʼajtinchejqa sumajpuni kanqa. w23.05 págs. 27, 28 párrs. 5-8

Imata ruwasqanchejmanta noqallanchejtaj juchayoj kasqanchejta reparakoyqa yanapawanchej juchanchejta rimarinapaj, allin kajta ruwanapaj, niñataj ujtawan kikinta pantanapaj. Chayta ruwasun chayqa, wiñay kausayman pusaj ñanpi correllasunpuni. ¿Imatá ruwasunman imatapis mana allintachu ajllarqanchej chay? Ama wajkunata chay ruwasqanchejmanta juchachanachu, nitaj achakista maskʼanachu. Chayta ruwaspaqa tiempollanchejta, kallpallanchejta usuchisunman. Reparakuna pantasqanchejta, tukuy imatataj ruwana chay pantasqanchejta allinchanapaj. Chay ruwasqanchejmanta may llakisqa kashanchej chayqa, kʼumuykukoj sonqowan orakuna, Jehovaman nina pantasqanchejta, perdontataj mañakuna (Sal. 25:11; 51:3, 4). Pejpa sonqontapis nanacherqanchej chayqa, paymanta perdonta mañarikuna. Chantapis necesitanchej chayqa, ancianospa yanapayninta maskʼana (Sant. 5:14, 15). Pantasqasninchejmanta yachakuna, amataj watejmanta kikinta pantanachu. Jehovaqa yanapawasunpuni, khuyakuwasunpunitaj (Sal. 103:8-13). w23.08 págs. 28, 29 párrs. 8, 9

Rey Jehoasqa joven kashaspa kallpachakorqa Jehovata kusichinanpaj Jehoiadá yanapasqanrayku. Jinapis Jehoiadá wañupusqantawan Jehoasqa Jehovata wasanchaj kuraj kamachejkunata uyarerqa (2 Cró. 24:4, 17, 18). Chayta rikuspa Jehová mayta sonqonta nanachikojtinpis, “paykunaman profetasta kachallarqapuni payman kutirinankupaj”. Paykunatajrí “mana uyarejchu kanku”, Jehoiadaj wawan Zacariastapis ni kasorqankuchu. Payqa profeta, sacerdotetaj karqa, Jehoaspa primontaj, chantapis Jehoasqa Zacariasta wañuchicherqa(2 Cró. 22:11; 24:19-22). Jehoasqa manaña Diosta manchachikorqachu. Jehová nerqa: “Pisipaj qhawawajkunataj, pisipaj qhawasqa kanqanku”, nispa (1 Sam. 2:30). Tiemponmantaj sirio ‘soldadosqa pisilla kaspapis’, Jehoaspa ‘may chhika soldadosninta’ atipaykorqanku, Jehoastataj “wañuy patallapiña saqerparqanku” (2 Cró. 24:24, 25). Jehoastaqa kamachisnillantaj wañucherqanku Zacariasta wañuchisqanrayku. w23.06 pág. 18 párrs. 16, 17

Apóstol Pabloqa uj tiempota Efesopi sumaj willaykunata predicarqa, yachacherqataj (Hech. 19:1, 8-10; 20:20, 21). Pabloqa hermanosninta mayta munakorqa, Jehovata tukuy sonqo kasukunallankupajpunitaj yanapayta munarqa. Efesiosqa ñaupajta ashkha llulla creenciasniyoj karqanku, yuyajtaj kanku imapis suerteta, mala suerteta apamusqanta. Efesomanta runasqa chʼichi kausayniyoj karqanku, khuchichakusqankumantataj ni imaynitata pʼenqakojchu kanku. Teatropi imastachus ruwasqanku, religionninkoj fiestasninkupis khuchichakuy juchamanta juntʼa kaj (Efe. 5:3). Runasqa “ni imamanta pʼenqakuspa juchata ruwayman” qokoj kanku, nisunman sajra kajta ruwajtinku ni imaynitata sonqonku nanajchu (Efe. 4:17-19). Sonqonkoqa nipuni juchachajchu. Allin kajta mana allin kajtapis mana reparayta atisqankurayku, Pablo nerqa: “Paykunaj yuyayninkoqa laqhayasqa kashan, Dios qoyta munawanchej chay kausaymantataj karunchasqa kashanku”, nispa. Chaywanpis wakin efesioskunaqa tukuy chay laqhamanta llojsimusqankuña. w24.03 pág. 20 párrs. 2, 4; pág. 21 párrs. 5, 6

Gedeonqa Israelpi juez kasqanrayku sinchʼita trabajarqa. Tutan madianitaswan maqanakushajtinku, madianitasqa ayqekorqanku, Gedeontaj Jezreel ura pampasmantapacha Jordán mayukama qhatiykorqa (Jue. 7:22). Chaypi, ¿imatá Gedeón ruwarqa? Payqa qhatiykullarqapuni. Gedeonwan 300 soldadosninwan saykʼusqa kashajtinkupis, mayuta pasaspa qhatiykullarqankupuni. Madianitasta taripaytawantaj atipaykorqanku (Jue. 8:4-12). Chayta Gedeón ruwarqa, Jehovataj yanaparqapuni (Jue. 6:14, 34). Uj kutipi Gedeonwan soldadosninwanqa, chakipi qhatiykorqanku iskay madianita reyesta. Paykunaqa camellosninkupi montasqasina ayqekusharqanku (Jue. 8:12, 21). Jehovaj yanapayninwantaj paykunata qhatiykullarqankupuni, taripaytawantaj atipaykorqanku. Kunan tiempopipis ancianosqa Jehovapi atienekunkuman. “Payqa mana jaykʼajpis saykʼunchu, nitaj kallpanpis tukukunchu”. Jehovaqa kallpata qonqapuni necesitajtinku (Isa. 40:28, 29). w23.06 págs. 6, 7 párrs. 14, 16

Ima pruebapi rikukuspapis, sinchʼita sayayta atisunman. Chayrayku Jehovapi atienekuna. Juez Baracpi tʼukurina. Paytaqa may sumajpuni rerqa Jehovaj kamachiykunasninta mana iskayrayaspa kasukusqanrayku. Chaypacha israelitasqa guerraman rinankupaj mana wakichisqachu kasharqanku. Paykunajtaqa ni escudollankupis, nitaj tʼojsina lanzallankupis kaporqachu. Jehovatajrí Baracta nerqa Sisarawan, ejercitonwan ima maqanakoj rinanta. Chay cananeosqa guerrapaj sumaj wakichisqapuni karqanku (Jue. 5:8). Profetisa Deboraqa Baracta nerqa Tabor orqomanta uraykuspa Sisarawan, 900 carrosninwan maqanakamunanta. Pampapi carrosniyoj soldadoswan maqanakoyqa, israelitaspaj mana atipanapaj jinachá karqa. Jinapis Baracqa Jehovata kasukorqa. Soldados pampaman uraykushajtinkutaj Jehovaqa sinchʼita parachimorqa, Sisaraj carrosnintaj tʼuruman satʼiykukorqanku. Jehovataj Baracta yanaparqa atipananpaj (Jue. 4:1-7, 10, 13-16). Noqanchejpis sichus Jehovapi atienekusun, llajtan imastachus kamachiwasqanchejta kasukusun chayqa, Jehovaqa Baracta jina atipanapaj yanapallawasuntaj. w23.07 pág. 19 párrs. 17, 18

Salvakunapajqa pacienciayoj runaspuni kananchej tiyan. Ñaupa tiempomanta Jehovaj kamachisnin jina, pacienciawan suyakunanchej tiyan Jehová nisqasninta juntʼananta (Heb. 6:11, 12). Bibliaqa chajra runawan kikinchawanchej (Sant. 5:7, 8). Chajra runaqa maytapuni llankʼan. Payqa tarpunan tiyan, qarpanan tiyan, nitaj yachanchu chay tarpusqan maykʼajpunichus poqonanta. Chayrayku pacienciawan suyan, pero yachan tarpusqanta oqharinantapuni. Ajinallatataj cristianospis Jehová Diospaj sinchʼita llankʼanchej, nitaj yachanchejchu ima pʼunchaychus Señorninchej jamunanta (Mat. 24:42). Pacienciawan suyakushanchej, pero yachanchej Jehovaqa nisqasninta maychus tiemponpi juntʼanantapuni. Mana pacienciakusunman chayqa, saykʼupusunman, Jehovamantataj pisimanta pisi karunchakapusunman. Chantapis imaschus uj ratollata kusichiwanchej chay imasta ruwaj churakusunman. Pacienciayoj kasun chaytaj, tukukuykama aguantasun, salvasqataj kasun (Miq. 7:7). w23.08 pág. 22 párr. 7

Daniel 2:41-43 profeciata, Daniel libromanta wakin profeciastawan, Apocalipsis libromanta wakin profeciaswan kikinchaspaqa, sutʼita reparanchej lantej chakisnenqa Reino Unidowan, Estados Unidoswan ninakusqankuta. Chay iskay naciones kay tiempopi uj atiyniyoj gobiernolla kanku. Danielqa Nabucodonosorman imachus chay mosqoynin niyta munasqanta sutʼinchashaspa, chay atiyniyoj gobiernomanta kayta nerqa: “Wakinpi kallpayoj kanqa, wakinpitaj pisi kallpayoj”, nispa. ¿Imajtintaj wakinpi pisi kallpayoj kanan karqa? Tʼuruwan ninakoj runas mana fierro jina kallpayoj kananta saqesqankurayku. Chay jatun lantimanta ashkha imasta yachakunchej. Uj kaj, Reino Unidowan Estados Unidoswanqa, atiyniyoj gobierno jina may atiyniyoj kasqankuta rikuchinkuña. Primera Guerra Mundialpi, Segunda Guerra Mundialpipis, Reino Unidowan Estados Unidoswanqa atipaj naciones ukhupi kasharqanku. Jinapis chay atiyniyoj gobiernoj kallpanqa pisiyan, sigataj pisiyallanqapuni, chay nacionespi tiyakojkuna paykunapura chʼajwasqankurayku. Iskay kaj, chay atiyniyoj gobiernomanta wajqa manaña kanqachu Diospa Gobiernon tukuy gobiernosta tukuchinankama. w23.08 pág. 11 párrs. 12, 13

Davidqa ashkha llakiykunapi rikukusharqa, chayraykutaj wakin kutispi phutikoj (Sal. 18:4, 5). Chaywanpis Jehová manchaytapuni payta munakusqanta reparaspa, watejmanta kallpata japʼerqa. Davidqa nerqa amigon Jehovaqa “qʼomer pampaspi” samarichisqanta, samarikunanpajtaj “ashkha yakuyoj lugaresman” pusasqanta. Ajinamanta watejmanta kallpata japʼerqa, Jehovatataj kusiywan sirvillarqapuni (Sal. 18:28-32; 23:2). Noqanchejpis llakiykunapi rikukuspaqa, kayta nillasunmantaj: “Jehová Diosqa munakuyninrayku mana chinkasqatachu chinkachiwanchej”, nispa (Lam. 3:22; Col. 1:11). Davidqa manchachikunapaj jina ashkha enemigosniyoj karqa, ashkha kutispitaj wañuy patapi rikhurerqa. Chaywanpis Jehová payta munakusqanta reparaspa mana manchachikorqachu, jarkʼasqataj sientekorqa. Paypajqa Jehová ladonpipunipis kashanman jina karqa. Chayrayku uj takiypi nerqa: “Paymin tukuy llakiyniymanta librawarqa”, nispa (Sal. 34:4). Davidqa wakin kutispi may mancharisqapuni kashajtinpis, chay manchachikuyninta atiparqa Jehová payta munakusqanta yachasqanrayku. w24.01 pág. 30 párrs. 15-17

Jehoás mana allin imasta ruwasqanmanta yachakuy. Kuraj kaj sacerdote Jehoiadá wañupusqantawan, Jehoasqa mana allin amigosniyoj kayta qallarerqa (2 Cró. 24:17, 18). Payqa Judamanta kuraj kamachejkunaj yuyaychasqankuta uyarerqa. Paykunaqa mana Jehovata munakojchu kanku, chayrayku, ¿manacharí kasunanchu karqa? Payqa mana allintachu ruwarqa chay mana allin amigosninpa nisqankuta kasuspa. Primon Zacarías cheqanchayta munajtintaj, Jehoasqa kamacherqa payta wañuchinankuta (2 Cró. 24:20, 21; Mat. 23:35). Chay ruwasqanqa nipuni allinchu karqa, sonso jina chaytaqa ruwarqa. Qallariypi sumajta ruwajtinpis, llakikunapaj jina payqa Jehovaj contranpi oqharikorqa, runa wañuchimantaj tukorqa. Aswan qhepaman Jehoastaqa kamachisnillantaj wañucherqanku (2 Cró. 24:22-25). Jehovata, payta munakojkunatapis uyarillanmanpuni karqa chayqa, kausaynenqa mana ajinapichu tukukunman karqa. w23.09 pág. 9 párr. 6

Jesusqa yacharqa apóstol Pedro sinchʼi sayasqa kayta atinanta. Chayrayku kʼachallamanta nerqa: “Amaña manchachikuychu”, nispa. Jesús Pedropi atienekusqanqa, Pedrota yanaparqa kausayninta cambiananpaj. Paywan hermanon Andreswanqa aswan qhepaman, pescado negocionkuta saqepuytawan, Mesiaspa qhepallantaña rerqanku. Chayta ruwasqankuraykutaj tʼukuna bendicionesta japʼerqanku (Mar. 1:16-18). Pedroqa Cristoj discipulon kasqanrayku tʼukuna imasta rikorqa. Payqa Jesusta rikorqa onqosqasta sanoyachisqanta, supaykunata qharqosqanta, wañusqastapis kausarichisqanta (Mat. 8:14-17; Mar. 5:37, 41, 42). Chantapis Pedroqa Jesusta waj jina rijchʼayniyojman tukojtin, Diospa Gobiernonpi Reyta jinaña rikorqa. Chay rikusqantataj nichá ni jaykʼaj qonqakorqachu (Mar. 9:1-8; 2 Ped. 1:16-18). Pedroqa manachus Jesuspa discipulonman tukunman karqa chayqa, ni jaykʼaj chay imasta rikunmanchu karqa. Payqa ni imapaj sirvisqanta yuyaspapis, Jesuspa qhepanta rillarqapuni. Maytachá kusikorqa chay bendicionesta japʼisqanmanta. w23.09 pág. 21 párrs. 4, 5

Apóstol Pedroqa ñaupaj kaj cartanpi “mayta munanakuychej” nerqa. Chay munakuytaj mana uj mashkha juchasllatachu pʼampan, manachayqa “ashkha juchasta pʼampan” (1 Ped. 4:8). Chayta qhelqashaspa, ichapis Pedroqa yuyarikorqa imatachus Jesús ashkha watas ñaupajta perdonmanta yachachisqanta. Chay kutipi Pedroqa Jesusman nerqa contranpi juchallikojta ‘qanchis kutitapuni’ perdonananta, chayta nispataj manchay kʼacha kasqantachá yuyasharqa. Jesustaj payman nerqa “77 kutista” perdonanan kasqanta, nisunman mana yupaspa perdonanan kasqanta. Noqanchejpis chaymanta mayta yachakusunman (Mat. 18:21). Ichapis mana atillanchejchu chay yuyaychayman jina ruwayta. Jina kajtenqa siga kallpachakunallapuni. Pantaj runas kasqanchejrayku tukuyninchej wakin kuteqa mana perdonayta atillanchejchu. ¿Imatá ruwasunman? Tukuy atisqanchejta kallpachakuna hermanosninchejta perdonanapaj, paykunawantaj allinyakunapaj. w23.09 pág. 29 párr. 12

Jonasqa pescadoj wijsanpi kashaspaqa yacharqa kʼumuykukoj sonqowan mañakojtin Jehová uyarinantapuni, yanapanantapunitaj. Mar qocha kantupiña kashajtintaj, Jonasqa Jehovaj kamachisqanta juntʼananpaj wakichisqa kasharqa (Jon. 2:10–3:4). Uj pruebapi kashaspaqa manchay llakisqa kashasqanchejrayku, ichá mana orakuyta atillanchejchu. Estudiananchejpajpis nichá kallpanchejpis kanchu. Ama qonqakunachu Jehovaqa sutʼisituta yachan imaynachus kashasqanchejta. Chayrayku may pisisitullata mañarikojtinchejpis, payqa imatachus necesitasqanchejta qowasunpuni (Efe. 3:20). Imanchejpis mayta nanawasqanchejrayku, chayri sinchʼi llakisqa kashasqanchejrayku mana leeyta, nitaj estudiayta atillanchejchu chayqa, Bibliamanta chayri publicacionesninchejmanta grabacionesta uyarisunman. Chayri jw.org paginanchejmanta takiykunata uyarisunman chayri uj videota qhawasunman. Chaypis mayta yanapallawasunmantaj. Jehovamanta mañakusqanchej, imastachus pay qowasqanchejpitaj kutichiwasqanchejta maskʼasqanchejqa, kaytapis nishasunman jina kanman: “Ama jina kaspa, Diosníy kallpata qoway ari”, nispa. w23.10 pág. 13 párr. 6; pág. 14 párr. 9

Diosta yupaychana toldopis, aswan qhepaman Jerusalenpi templosta ruwakorqa chaykunapis, ukhunpeqa casi kikillan karqanku. Chay ukhunpeqa iskay cuartos karqa: Ujnenqa “Santo Lugar”, ujnintaj “Aswan Santo Lugar”. Chaykunataj uj cortinawan tʼaqasqa karqa (Heb. 9:2-5; Éxo. 26:31-33). Santo Lugarpeqa karqa oromanta candelero, inciensota qʼoshñichinapaj altar, Diospa ñaupaqenpi kaj nisqa tʼantata churanapaj mesa ima. Chay Santo Lugarmanqa “ajllasqa” sacerdoteslla yaykuyta atej kanku, ruwanasninkuta juntʼanankupaj (Núm. 3:3, 7, 10). Aswan Santo Lugarpitaj Diospa trato ruwasqan arca kasharqa, mayqenchus oromanta karqa, Jehová chaypi kashasqanwantaj ninakorqa (Éxo. 25:21, 22). Kuraj kaj sacerdotella cortinata pasaspa Aswan Santo Lugarman yaykuyta atej. Payqa Perdonta Tarina Pʼunchayllapi chayman yaykoj. Chaymanqa yaykoj uywaspa yawarninku aparisqa, juchasninmanta, runaspa juchasninkumantawan perdonta tarinanpaj (Lev. 16:2, 17). Tiempowantaj Jehovaqa sutʼincharqa imawanchus chay imas ninakusqanta (Heb. 9:6, 7). w23.10 pág. 27 párr. 12

Bibliapeqa ashkha lugarespi kay kamachiy tiyan: “Purajmanta munanakuychej” (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Jinapis munakoyqa sonqonchej ukhullapi wiñan, nitaj ni pi chayta rikuyta atinmanchu. Chayrayku, ¿imatá ruwasunman chay munakuyninchejta wajkuna reparanankupaj? Parlasqanchejwan, ruwasqanchejwan ima chay munakuyninchejta rikuchinanchej tiyan. Ashkha imaymanasmanta rikuchisunman hermanosninchejta munakusqanchejta. Bibliaqa chay munakuyta kay jinasmanta rikuchiyta atisqanchejta niwanchej: “Ama llullasta willanakuychejchu” (Zac. 8:16). “Ujkuna ujkunawantaj allinta kausakuychej” (Mar. 9:50). “Wajkunata respetaypi ñaupajpi kaychej” (Rom. 12:10). “Ujkuna ujkunata tukuy sonqo japʼikuychej” (Rom. 15:7). “Perdonanakuychej” (Col. 3:13). “Llakiykunapi kaspaqa purajmanta yanapanakuychej” (Gál. 6:2). “Purajmanta sonqochanakullaychejpuni” (1 Tes. 4:18). “Kallpachanakuychejtaj” (1 Tes. 5:11). “Ujkuna ujkunapajtaj Diosmanta mañapuychej” (Sant. 5:16). w23.11 pág. 9 párrs. 7, 8

Sapa día imata ruwaytapis ajllanchejpuni, chaypajtaj sinchʼi creeyniyoj kananchej tiyan. Ajllananchej tiyan pikunawanchus masichakunanchejta, imawanchus kusirikunanchejta, imatachus estudiananchejta, piwanchus casarakunanchejta, wawasniyojchus manachus kananchejta, imapichus trabajananchejtapis. Kayta tapurikusunman: “Imastachus ajllasqay, ¿rikuchinchu kay mundoqa uj ratollapaj kasqanta, Jehovataj paraisota tumpamantawan apamunanpi creesqayta? Chayrí, ¿wiñay kausay kananta mana creej runas jinachu imatapis ajllani?”, nispa (Mat. 6:19, 20; Luc. 12:16-21). Paraíso qayllitapiña kashasqanpi astawan creesun chayqa, allinta imatapis ajllayta atisun. Llakiykunata aguantanapajpis sinchʼi creeyniyojllataj kananchej tiyan. Ichapis qhatiykachasqas kasunman, sinchʼita onqoykusunman chayri waj llakiykunapi rikukusunman, chaykunataj desanimachiwasunman. Ichapis qallariypeqa yuyasunman chay llakiykunata aguantayta atinallanchejta. Jinapis chay jina llakiykunaqa mana uj ratollapichu chinkapuyta yachan. Chayrayku sinchʼi creeyniyoj kayta necesitanchej chaykunata aguantanapaj, Jehovatataj kusiywan sirvinallapajpuni (1 Ped. 1:6, 7). w23.04 pág. 27 párrs. 4, 5

Jehovaqa mañakuytawan chayman jina ruwananchejta munan. Kaypi piensarina: Uj hermano kinsa pʼunchaypaj jatun tantakuyman riyta munaspa, Jehovamanta mañakun jefen permisota qonanpaj. ¿Imatá Jehová ruwanman chay mañakuyninman kutichinanpaj? Ichapis kallpata qonqa jefenwan mana manchachikuspa parlamunanpaj. Chaywanpis hermanoqa mana jinallachu kakunan tiyan. Jefenwan parlaj rinan tiyan, ichá chaytaqa ashkha kutista ruwanan kanqa. Ichapis jefenman ninan kanqa chay diapaj trabajonta uj compañeronwan cambiananta chayri chay día mana trabajasqanmanta mana pagota mañakunanta. Jehovaqa munan imachus llakichiwasqanchejmanta kutin kutita mañakunanchejta. Jesuspa nisqanpi reparanchej Jehovaqa wakin mañakuykunasninchejman mana chay ratochu kutichinawanchejta (Luc. 11:9). Chayrayku ama saykʼupunachu. Jehovamanta tukuy sonqowan, kutin kutitataj mañakunallapuni (Luc. 18:1-7). Ajinata ruwaspaqa payman rikuchishanchej mana gustunchejraykullachu chayta mañakushasqanchejta, yanapayta atiwasqanchejpitaj creesqanchejta. w23.11 pág. 22 párrs. 10, 11

Jehovaqa amigon Abrahanman nerqa mirayninnejta kay jallpʼapi tukuy naciones bendecisqa kanankuta (Gén. 15:5; 22:18). Abrahanqa Jehovapi sinchʼita creesqanrayku mana iskayrayarqachu chay juntʼakunanmanta. Jinapis Abrahán 100 watasniyoj kashajtin, warmintaj 90 watasniyoj kashajtin, niraj ni uj wawayojrajpischu karqanku (Gén. 21:1-7). Biblia nin: “Abrahanqa suyakorqa, creerqataj ashkha nacionespa tatan kananta. Chaytaj karqa payman nisqa kasqanman jina”, nispa (Rom. 4:18). Yachanchej jinataj suyakusqanqa juntʼakorqapuni: Wawan Isaac nacekorqa, pitachus maytapuni suyakusharqa. Jehová nisqanta juntʼananmanta, ¿imaraykutaj Abrahán mana iskayrayarqachu? Abrahanqa Jehovata sumajta rejserqa. Chayrayku yacharqa “nisqanta juntʼanantapuni” (Rom. 4:21). Jehovataj creeyninrayku Abrahanta cheqan runapaj qhawarqa, allinpajtaj (Sant. 2:23). w23.12 pág. 8 párrs. 1, 2

Atienekunapaj jina kanki chayqa, tukuy ruwanasniykita sumajta juntʼanki. Jesuspi piensariy: Payqa ruwanasninta sumajta juntʼaj, nitaj saqerpajchu. Imatachus Jehová kamacherqa chay tukuy imata ruwarqa, mana atinanpaj jinallachu kajtinpis. Payqa runasta munakoj, astawanraj discipulosninta, kausaynintapis paykunarayku tukuy sonqo qorqa (Juan 13:1). Jesús jina kallpachakuy uj ruwayta qosojtinku, chayta sumajta juntʼanaykipaj. Chayta mana ruwayta atinkichu chayqa, kʼumuykukoj sonqo kay, wiñay tukusqa hermanowantaj yanapachikuy. Mana qhellakuspalla tukuy atisqaykipi yanapakuy (Rom. 12:11). Imatapis ruwanaykita nisunku chayqa, tukunaykikama chayta ruway “Jehová Diospaj jina, manataj runaspaj jinachu” (Col. 3:23). Pantaj runa kasqanchejrayku imapipis pantankipuni. Chayrayku llampʼu sonqo kay, pantasqaykitataj reparakuy (Pro. 11:2). w23.12 pág. 26 párr. 8

Pillapis bautizakun chayqa Jehovaj familianman yaykumun, chaytaj may kusiypuni. Jehovaj familianmanta kajkunaqa salmista David jinachá ninkuman: “Kusisqamin runaqa patiosniykipi tiyakunanpaj qan ajllajtiyki, qanmantaj qayllaykojta saqejtiyki”, nispa (Sal. 65:4). Jehovaqa mana pitapis patiosninman yaykuchimullanchu. Payqa amigosnin kayta munasqankuta rikuchejkunallaman qayllaykun (Sant. 4:8). Pillapis kausayninta Jehovaman qopun, bautizakuntaj chayqa, Jehovaqa payman bendicionesta tʼakaykamonqa, ni iman pisinankama (Mal. 3:10; Jer. 17:8). Bautizakoyqa qallariyllaraj. Chantá Jehovaman kausayninchejta qopusqanchejman jina kausakuyta munanchej juchaman tanqasqa kajtinchejpis, chayri creeyninchej pruebaman churasqa kajtinpis (Ecl. 5:4, 5). Chantapis Jesús jina ruwananchej tiyan, kamachiykunasnintataj kasukunanchej tiyan (Mat. 28:19, 20; 1 Ped. 2:21). w24.03 pág. 8 párrs. 1-3

Qhariwarmi jina khuska kaspa manaña kusisqachu kankichej chayqa, ¿imatá ruwawajchej? Nina lauraypi piensarina. Nina japʼikuyta qallarejtin lauraynenqa juchʼuysitulla. Chay nina sumajta, astawantaj laurarinanpajqa pisimanta pisi llantʼata yapana tiyan. Ajinallatataj qankunapis kallpachakuychej sapa día uj ratitullatapis khuska karikunaykichejpaj. Kallpachakullaychejtaj imachus iskayniykichejman gustasunkichej chayta ruwanaykichejpaj (Sant. 3:18). Ajinata juchʼuy imitasta khuska ruwayta qallarinkichej chayqa, munakuyniykichejqa watejmanta nina jina laurarenqa. Matrimoniopeqa respeto kananpuni tiyan. Nina lauranallanpajpuneqa aire (oxígeno) necesitakun. Aire mana kajtenqa ninaqa chay rato wañupunman. Matrimoniopipis mana respeto kajtenqa munakoyqa usqhayllata chiriyapunman. Sichus casados purajmanta respetanakullankichejpuni chayqa, munakuyniykichejqa nina jina laurarillanqapuni. Pero yuyarikuna, mana qanchu ninayki tiyan, “noqaqa qosayta chayri warmiyta respetanipuni” nispaqa. Manaqa pay ninan tiyan respetasqaykitachus manachus. w23.05 pág. 22 párr. 9; pág. 24 párrs. 14, 15

Bibliaqa willawanchej Jehovaj wakin kamachisnenqa manchikuywan maytapuni kharkatisqankuta enemigosninkurayku, chayri waj sinchʼi problemasrayku (Sal. 18:4; 55:1, 5). Noqanchejmanrí, ¿churanakushawanchejchu escuelamanta, trabajomanta compañerosninchej, chayri familiaresninchej, gobierno partemanta autoridadespis? Sinchʼi onqosqa kasqanchejrayku, ¿wañuy patapichu kashanchej? Ajina llakiykunapi kaspa, ichapis mana piniyoj wawita jina sientekusunman. ¿Imatá Jehová ruwan yanapanawanchejpaj? Payqa sonqochawanchej, sonqonchejtataj tiyaykuchin. Chayrayku tiempochakunanchejpuni tiyan Jehovawan parlarinapaj, Palabrantapis leerinapaj (Sal. 77:1, 12-14). Ajinamanta uj sinchʼi llakiypi kashajtinchej, Tatanchej Jehovaj yanapantarajpuni ñaupajta maskʼasun. Payman willarina imachus llakichiwasqanchejta, imachus manchachiwasqanchejtapis. Saqenataj Jehová kutichinawanchejta, Palabranwantaj sonqochanawanchejta (Sal. 119:28). w24.01 págs. 24, 25 párrs. 14-16

Jehovata yupaychayninchejpi imastachus ruwayta munasqanchejta juntʼanapajqa, sonqonchej aysanawanchej tiyan chayta ruwanapaj. Imaraykuchus chayta ruwaytapuni munasun chayqa, tukuy atisqanchejta kallpachakusun chayta ruwanapaj. Imastachus ruwayta munasqanchejta juntʼanapaj sonqonchej aysawasun chayqa, juntʼayta atisunmanpuni. ¿Imataj yanapawasunman imatapis ruwanapaj sonqonchej aysanawanchejpaj? Jehovamanta mañakuna ruwayta munanapaj astawan sonqonchej aysanawanchejta. Imata ruwanapajpis sonqonchej aysanawanchejpajqa, Jehová espíritu santonwan yanapawasunman, ajinamanta ruwayta munasqanchejta juntʼanapaj. Wakin kutisqa uj imata ruwananchejta ninchej ruwananchejpuni kasqanraykulla. Chaytaj mana juchachu. Jinapis ichá sonqonchejpeqa mana munanchejchu chayta ruwayta. Tʼukurina imatachus Jehová noqanchejrayku ruwasqanpi (Sal. 143:5). Apóstol Pabloqa tʼukurerqa imastachus Jehová jatun khuyakuyninrayku paypaj ruwasqanpi. Chaytaj yanaparqa tukuy sonqo Jehovata sirvinanpaj (1 Cor. 15:9, 10; 1 Tim. 1:12-14). Ajinallatataj imastachus Jehová noqanchejrayku ruwasqanpi piensarillasunpuni chayqa, astawan juntʼayta munasun imatachus Jehovapaj ruwayta munarqanchej chayta (Sal. 116:12). w23.05 pág. 27 párrs. 3-5

Tatanchej Jehovataqa kusichinchej sutinta jatunchaspa (Sal. 119:108). Runasqa munanchej wajkuna alabanawanchejta, ajinamanta sumaj sientekunanchejpaj. Tukuy Atiyniyoj Jehová Diosninchejrí, ¿ajinallatajchu? Mana. Satanasqa llullakusqanpi noqanchejtawan japʼiykuchiwarqanchej. Payqa nin llakiypi kaspa ni mayqen runa Jehová Diosta kasukunallantapuni. Nillantaj tukuyninchej Diosta wasanchananchejta imapis mana allinchu llojsinanta yuyajtinchej (Job 1:9-11; 2:4). Jinapis cheqan runa Jobqa Satanás llulla kasqanta rikucherqa. Noqanchejpis Jehovata jatunchaspa rikuchishanchej Satanás llulla kasqanta. Sapa ujninchej Jehovaj sutinta jatunchayta atinchej, payta tukuy sonqo kasukuspataj kusichiyta atinchej. Chayta ruwayta atisqanchejtaj may sumajpuni (Pro. 27:11). w24.02 págs. 8, 9 párrs. 3-5

Moisespis Josuepis wañupusqankumanta aswan qhepaman Jehovaqa juecesta churarqa llajtanta pusanankupaj. Aswan qhepamantaj reyespa tiemponkupi, profetastañataj churarqa chayta ruwanankupaj. Diosta kasukoj reyesqa, chay profetaspa yuyaychasqankuta uyarerqanku. Uj kuti rey Davidtaqa profeta Natán cheqancharqa, paytaj kʼumuykukoj sonqowan chayta japʼikorqa (2 Sam. 12:7, 13; 1 Cró. 17:3, 4). Rey Jehosafattaj profeta Jahazielta kasukorqa, Judapi tiyakojkunatataj nerqa Diospa profetasninpi creenankuta (2 Cró. 20:14, 15). Rey Ezequiastaj, llakiy tiempospi kashaspa profeta Isaiaspa yanapayninta mañakorqa (Isa. 37:1-6). Reyes Jehovata kasukojtinkoqa pay bendicerqa, nacionninkutataj jarkʼarqa (2 Cró. 20:29, 30; 32:22). May sutʼipuni karqa Jehová llajtanta profetasnejta pusashasqanqa. w24.02 pág. 21 párr. 8

Satanasqa munan sajra runaswan masichakunanchejta, ajinamanta Jehovaj kamachiykunasninta mana kasukuyta atinanchejpaj. Kay tiempopeqa mana uyapurallachu runaswan parlariyta atinchej, manaqa redes socialesnejtapis. Kay mundomanta runasqa ninku millay kausayniyoj kayqa allillan kasqanta. Jinapis ama chaywan engañachikunachu, yachanchej llulla kasqanta (Efe. 4:19, 20). Kay tapuykunapi piensarisunman: “¿Tukuy imatachu ruwani escuelamanta, trabajomanta compañerosniywan, chayri Jehovaj kamachiykunasninta mana respetaj runaswan mana anchata masichakunaypaj? ‘Qanqa ni imata allinpajchu qhawanki’ nispa niwajtinkupis, ¿mana manchikuspachu Bibliaj yuyaychaykunasninta sutʼinchani?”. 2 Timoteo 2:20-22 nisqanman jina, congregacionpipis sumajta amigosninchejta ajllakunanchej tiyan. Yuyarikuna, mana tukuychu Jehovata tukuy sonqo kasukunapaj yanapawasunman. w24.03 págs. 22, 23 párrs. 11, 12

¿Imaynachus Jehová kasqanpi piensarerqankichu? Payta mana rikojtinchejpis, Bibliaqa Jehovata ashkha imaswan kikinchan. Por ejemplo nin: “Jehová Diosqa inti jina kʼancharimuwanchej, escudo jinataj jarkʼakuwanchej”, nispa. Nillantaj “tukuy imata ruphaykoj nina jina” kasqanta (Sal. 84:11; Heb. 12:29). Profeta Ezequielqa mosqoypi jina rikusqanpi nerqa Jehovaqa zafiro rumi jina kasqanta, kʼancharishaj metal jina lliphipirisqanta, kʼuychi jinataj kasqanta, nisunman arcoíris jina (Eze. 1:26-28). Jehovata mana rikusqanchejrayku ichapis mana creeyta atillasunmanchu munakuwasqanchejta. Chayri ichapis kausayninchejpi imapis pasawarqanchej, chayraykutaj yuyasunman Diosqa ni jaykʼaj munakunawanchejta. Pero Jehovaqa entienden imaynachus sientekushasqanchejta, chantá imaschus ñaupajta pasawasqanchejrayku imaynachus kashasqanchejtapis. Diosninchejqa munakuwasqanchejta entiendenanchejpaj, Palabranpi willawanchej imayna kʼachachus kasqanta. Imaynachus Jehová kasqanmanta parlaspaqa, munakuy palabratapuni oqharisunman (1 Juan 4:8). Jehovaqa munakuy, tukuy imatataj munakuyninrayku ruwan. Munakuynenqa may jatunpuni, may sinchʼitaj. Payta mana munakojkunatapis payqa munakun (Mat. 5:44, 45). w24.01 pág. 26 párrs. 1-3

Jehovaqa Moisesta ajllarqa israelitasta Egiptomanta kacharichinanpaj, chaypajtaj señalesta churarqa. Chaytaj karqa pʼunchaypi chhoqo phuyu, tutanpitaj chhoqo nina kʼanchay (Éxo. 13:21). Moisesqa chay chhoqo phuyuta qhaterqa, chayrayku paywan israelitaswanqa chay puka mar qochaman chayarqanku. Israelitaspa ñaupaqenkupeqa mar qocha kasharqa, qhepankupitaj egipcio ejército, yuyarqankutaj ni mayman ayqeyta atinankuta, chayrayku sinchʼitapuni mancharikorqanku. Pero mana ajinachu karqa, Jehovapuni Moiseswan chay lugarman pusacherqa (Éxo. 14:2). Chaypitaj tʼukunapaj jina uj milagrowan paykunata salvarqa (Éxo. 14:26-28). Moisesqa 40 watasta chhoqo phuyuta qhaterqa, ajinamanta Diospa llajtanta chʼin jallpʼapi pusaykachananpaj (Éxo. 33:7, 9, 10). Jehovaqa chay chhoqo phuyumantapacha Moiseswan parlaj. Moisestaj kamachiykunasninta llajtanman willaj. Chayrayku israelitasqa sutʼita repararqanku Jehovapuni Moisesta ajllasqanta paykunata pusananpaj. w24.02 pág. 21 párrs. 4, 5