Mayo

Ñaupa cristianospa tiemponkupeqa “manchay yarqhay jallpʼantinpi” karqa. Tatamamasqa maytachá llakikorqanku imaynatachus familiankuta mantienenankumanta. Jovenestaj ichapis Jehovapaj astawan llankʼayta munarqanku, jinapis ichá yuyarqanku niña chayta ruwayta atinankuta. Ima llakiypi rikukuspapis cristianosqa sigue kallpachakullarqankupuni predicanankupaj, Judeamanta hermanosninkutapis kapuyninkuwan tukuy sonqo yanaparerqanku (Hech. 11:29, 30). Yanapata japʼej cristianosqa ñawisninkuwanpuni rikorqanku Jehová paykunata cuidashasqanta (Mat. 6:31-33). Chantapis astawanchá munakorqanku yanapata apachimoj hermanosta. Yanapata apachimojkunataj, waj jinasmanta yanapakojkunapis maytachá kusikorqanku (Hech. 20:35). w23.04 pág. 16 párrs. 12, 13

Wakin kutis Jehovaqa kamachisninpa oracionesninkuman kutichin, payta mana yupaychaj runaswan yanapachispa. Jehovaqa Nehemiasta yanaparqa rey Artajerjesnejta. ¿Imaynamanta? Rey Artajerjesqa Nehemiasman permisota qorqa Jerusalenman kutinanpaj, llajtatataj watejmanta sayarichiypi yanapakamunanpaj (Neh. 2:3-6). Kunan tiempopipis Jehovaqa, kamachisnin yanapata necesitajtinchej mana testigo runaswan yanapachiwanchej. Jehovaqa mana tʼukunapaj jinachu oracionesninchejman kutichiwanchej. Jinapis payqa mañakuyninchejman kutichiwanchejpuni, chaytaj yanapawanchej paypa qayllallanpipuni kanapaj. Chayrayku mana qonqakunanchejchu tiyan imastachus Jehovamanta mañakusqanchejta. Ajinamanta sutʼita reparasun mañakuykunasninchejman kutichishawasqanchejtachus manachus. Wakin kutis tiempocharikunanchejpuni tiyan, sutʼita reparanapaj imaynatachus Jehová mañakuykunasninchejman kutichishawasqanchejta (Sal. 66:19, 20). Mana orakunallapajchu creeyniyoj kananchej tiyan, manaqa imaynatachus kutichiwasqanchejta reparanapajpis creeyniyojllataj kana tiyan (Heb. 11:6). w23.05 págs. 12, 13 párrs. 13, 15, 16

Jehovaman kausayninchejta qopushaspaqa, payta yupaychananchejta, munaynintataj ruwananchejta nerqanchej. Chay nisqanchejtaqa juntʼananchejpuni tiyan. Chay nisqanchej mana pisillachu kajtinpis, mana uj llasa qʼepi jinachu. Jehovaqa munayninta ruwanapaj ruwawarqanchej (Apo. 4:11). Payqa sonqonchejman churarqa, payta rejsiyta munayta, payta yupaychayta munayta ima. Chantapis rijchʼayninman jina ruwawarqanchej. Chayrayku payman qayllaykuyta atinchej, munayninta ruwaspataj kusisqas kayta atinchej.Mana chayllachu, Jehovaj munayninta ruwaspa, Wawan jinataj kaspaqa, samarikunchej (Mat. 11:28-30). Chay munakuyninchej astawan wiñananpajtaj, tʼukurina imastachus noqanchejrayku ruwasqanpi, ima bendicionestachus qhepaman qonawanchejpipis. Diosninchejta astawan munakusun chayqa, mana yuyasunchu kamachiykunasnin mana juntʼay atina kasqanta (1 Juan 5:3). Jesús jina ruwana, payqa Diospa yanapayninta mañakojpuni, ima premiotachus japʼinanpitaj yuyaynin karqa. Chayrayku Diospa munayninta ruwayta aterqa (Heb. 5:7; 12:2). Noqanchejpis Jesús jina Jehovamanta kallpata mañakuna, wiñay kausayta japʼinanchejpitaj yuyayninchej kachun. w23.08 págs. 27, 28 párrs. 4, 5

Tukuyman gustawanchej pacienciayoj runaswan kay. Mana phiñakuspalla pacienciawan suyakuyta yachaj runastaqa respetanchej, pantajtinchej pacienciakuwasqanchejmantapis mayta agradecekunchej. Chantapis Bibliamanta yachachiwajninchejman mayta agradecekunchej mana entiendeyta atejtinchej pacienciakuwasqanchejmanta, yachachiwasqanchejta mana japʼikuyta atejtinchej, chayri mana chayman jina kausakuyta atejtinchejpis pacienciakuwasqanchejmanta. Astawanqa Jehovaman mayta agradecekunchej noqanchejwan pacienciakusqanmanta. Wajkuna pacienciayoj kasqankumanta mayta agradecekojtinchejpis, noqanchejñataj pacienciakunanchej kajtenqa mana atillasunmanchu. Autota manejashajtinchej ancha trancadera kajtin mana pacienciakuyta atillanchejchu, astawanraj tiempo saruykushawanchejña chayqa. Chantapis pi rabiachiwajtinchej ichapis phiñarpakunchej. Wakin kutistaj ichá yuyanchej, Jehová paraisota apamunanta nisqan anchatañataj qheparikushasqanta. Chay tukuy imaspi pacienciayoj kasqanchejta rikuchinanchej tiyan. w23.08 pág. 20 párrs. 1, 2

Jehovaqa Gedeonta nerqa casi tukuy soldadosninta wasinkuman kachapunanta. Chay kutipi ichá pay yuyarqa: “¿Chayta ruwanaypunichu kanman? ¿Allinchu llojsinman?”, nispa. Jinapis Gedeonqa kasukorqa. ¿Imaynatá ancianos Gedeón jina ruwanku? Diospa llajtan imatapis waj jinamanta ruwakunanta nejtin, chayman jina ruwanku (Heb. 13:17). Gedeonqa manchachikuspapis, kausaynin wañuy patapi kajtinpis Jehovata kasukorqapuni (Jue. 9:17). Jehová paywan kashasqanta yachaspa, Gedeonqa ni tumpitata iskayrayarqachu llajtanta jarkʼananpaj Jehová yanapananmanta. Jehovata yupaychajta mana saqewanchejchu chay lugarespi tiyakoj ancianosqa Gedeón jina ruwanku. Paykunaqa carcelpi wisqʼachikunanku kajtinpis, tapuykachasqas kananku kajtinpis, trabajonkumanta wijchʼuchikunanku kajtinpis, maqachikunanku kajtinpis mana manchachikuspa tukuy imata ruwanku reuniones, predicacionpis kanallanpajpuni. Ancianosqa manchay ñakʼariy tiempopi Diospa llajtanpa nisqanman jina ruwananku kanqa mana manchachikuspa, kausayninku wañuy patapi kajtinpis. w23.06 págs. 5, 6 párrs. 12, 13

Jehovaqa Jehoiadá allin imasta ruwasqanta Palabranpi escribicherqa, chaymanta noqanchejpis yachakunanchejpaj (Rom. 15:4). Jehoiadá wañupojtintaj sumaj pʼampasqa karqa. Payqa “Israelpi allin imasta ruwarqa cheqa Diospaj, jinallataj Diospa wasinpajpis. Chayrayku Davidpa Llajtanpi pʼamparqanku reyespa ladonkuman” (2 Cró. 24:15, 16). Biblia Jehoiadamanta parlasqanqa tukuyta yanapawanchej Diosta astawan manchachikunapaj. Ancianosqa pay jina ruwankuman Diospa ovejitasninta ima kajtinpis jarkʼaspapuni (Hech. 20:28). Kuraj hermanosrí, ¿imatá Jehoiadamanta yachakunkuman? Sichus paykuna Jehovata manchachikonqanku, nitaj wasanchanqankuchu chayqa, Jehovaqa munayninta juntʼananpaj paykunawan yanapachikullanqapuni. Jovenespis piensarinanku tiyan imaynatachus Jehová Jehoiadata qhawasqanpi, kuraj hermanostataj jatunpaj qhawananku tiyan, respetowantaj, astawanraj Jehovata mana wasanchaspa ashkha watastaña sirvishanku chay hermanosta (Pro. 16:31). ‘Ñaupajman pusawanchej’ chay hermanosta ama wasanchanachu, kasukunataj (Heb. 13:17). w23.06 pág. 17 párrs. 14, 15

Tantakuykunapeqa wajkunaj allinninkuta maskʼasqanchejrayku ama sapa ratoñataj makinchejta oqharinachu. Makinchejta sapa ratoñataj oqharisunman chayqa, apaykachaj hermanoqa obligasqa jinallaña ashkhata comentachiwasunman, wajkuna manaraj comentajtinkupis. Chantapis waj hermanosqa niña makinkuta oqhariyta munankumanchu (Ecl. 3:7). Comentanankupaj ashkha hermanos makita oqharejtinkoqa, ichapis mana munasqanchejman jinapunichu ashkhata comentayta atisun. Wakin kutitaj ichapis ni ujllatapis comentachiwasunchu. Ichapis chayqa llakichiwasunman, jinapis ama phiñakunachu (Ecl. 7:9). Mana munasqanchejman jinachu ashkhata comentachiwajtinchejpis, wajkunaj comentasqankuta sumajta uyarisunman, tantakuy tukukojtintaj comentasqankumanta felicitaykusunman. Felicitaykuspaqa comentariosninchejwan jinallataj paykunata kallpachasun. w23.04 págs. 23, 24 párrs. 14-16

Diospa Palabranta estudiana, chaypitaj tʼukurina. Uj sachʼa sumaj sayasqa kananpajqa sinchʼi ukhu saphisniyoj kanan tiyan. Noqanchejpis sumaj sayasqa kanapajqa Jehovapi sinchʼita creenanchej tiyan. Uj sachʼajtaqa wiñasqanman jina saphisninpis astawan wiñallantaj. Ajinamantataj aswan sinchʼita jallpʼapi saphichakun. Creeyninchejpis astawan sinchʼiyan Bibliata estudiajtinchej, chaypitaj tʼukurejtinchej. Ajinamanta aswan sutʼita yachanchej Diospa kamachiykunasnenqa may sumajpuni kasqanta (Col. 2:6, 7). Jehovaqa ñaupa tiempopi payta sirvejkunaman kamachiykunata, yuyaychaykunata ima qorqa, jarkʼarqataj. Imaynatachus chay paykunata yanapasqanpi tʼukurina. Ezequielqa mosqoypi jina uj angelta rikorqa templota midishajta, chaytataj sumajta qhawarqa. Chay rikusqantaj mana Ezequielpa creeynillantachu sinchʼiyacherqa, manaqa noqanchejtapis yanapawanchej. Chay rikusqanmanta yachakunchej Jehovallata yupaychaymanta kamachiykunata respetayta (Eze. 40:1-4; 43:10-12). Noqanchejtapis mayta yanapawanchej Diospa pakasqa yachachiykunasninta estudiay, chaykunapitaj tʼukuriy. Jehová Diospi tukuy sonqo atienekusun chayqa, sinchʼita sayasun (Sal. 112:7). w23.07 pág. 18 párrs. 15, 16

Bibliaqa ashkha kasukoj qharismanta parlan. Paykunaqa Diosta munakorqanku, llajtantataj tukuy imaymanamanta jarkʼarqanku, paykunamanta mayta yachakuwaj. Familiaykipi, congregacionniykipipis, wiñay tukusqa cristianos kallantajchá, paykunamantapis yachakullawajtaj (Heb. 13:7). Chantapis Jesucristomanta mayta yachakuwaj, payqa uj sumaj ejemplo (1 Ped. 2:21). Paykunamanta estudiashaspaqa, imachus sapa ujmanta gustasusqanpi piensariy (Heb. 12:1, 2). Chaymantataj piensariy imaynatachus paykuna jina ruwawaj. Sumajta tanteayta yachaj qharisqa, niraj imatapis ruwashaspa sumajtaraj piensarikunku. Chayrayku qanpis chay jinata ruwanaykipaj sumajta kallpachakuy, amataj chayta ruwayta qonqaychu. Ñaupajtaqa Bibliaj yuyaychaykunasninta yuyayniykipi japʼinayki tiyan, piensarinaykitaj tiyan imaraykutaj Jehovaj nisusqan may sumaj qanpaj kasqanta. Chantataj chay yachakusqaykiman jina imatapis ajllay, Jehovata kusichinaykipaj jina (Sal. 119:9). Wiñay tukusqa cristiano kanapajqa sumajta tanteayta yachananchej tiyan (Pro. 2:11, 12; Heb. 5:14). w23.12 pág. 25 párrs. 4, 5

Tatasqa wawasninkuman yachachinkuman, llampʼu sonqowan kutichiyta pillapis creenciasninkumanta tapuykachajtin (Sant. 3:13). Chaypajtaj wakin tatasqa familiapi Diosta yupaychashaspa ensayanku. Imastachus escuelapi tapunkuman chaykunamanta parlarinku, imaynatachus kutichiytataj ensayanku. Chantapis wawasninkuman yachachinku llampʼu sonqowan parlariyta, runas yachakuyta munanankupaj jinataj parlariyta. Familiapi ensayayqa jovenesta yanapan imaraykuchus imapipis creesqankuta sumajta sutʼinchanankupaj, paykunapis mana iskayrayanankupaj. Jw.org paginapi “Jovenespaj” nisqa partepi ashkha yachaqanas tiyan. Chaytaj jovenespa creeyninkuta kallpachananpaj jina ruwasqa kashan, creenciasninkumantapis palabrasnillankuwan sutʼinchanankupaj jina kashan. Familianchejwan chayta, “Jovenespa tapukuyninku” nisqapi kajtawan ukhunchasun chayqa, creenciasninchejmanta llampʼu sonqowan, runas yachakuyta munanankupaj jinataj sutʼinchayta yachakusun. w23.09 pág. 17 párr. 10; pág. 18 párrs. 15, 16

Tukuypis Jehovata astawan sirviyta munanchej, payta kusichiytataj. Jinapis wakin kutis chayta ruway mana atikullanchu. Pero mana qanllachu ajinapi rikukorqanki. Philipqa sonqomantapacha astawan orakuyta munarqa. Jinapis mana tiempochakuyta atillarqachu Jehovawan parlarikunanpaj. Erikaqa nikorqa predicacionman llojsinapaj tantakuyman horanpipuni chayananta. Jinapis horawan saruchikullajpuni. Ichá imatachus ruwanaykita nikusqaykita juntʼayta munashanki, jinapis mana atishallankichu. Jina kajtenqa ama desanimakuychu. Aswan juchʼuy imasta ruwanapajpis tiempo necesitakun, kallpachakunanchejtaj tiyan. Chayta ruwanaykipaj kallpachakushallankipuni chayqa, sutʼita rikuchinki Jehovaj amigon kayta jatunpaj qhawasqaykita, allin kajtapunitaj payman qoyta munasqaykitapis. Jehovaqa kallpachakusqaykita allinpaj qhawan, manataj mañasunkichu mana atisqaykitaqa (Sal. 103:14; Miq. 6:8). Chayrayku imastachus ruwayta munasqaykeqa atinaykipaj jinalla kanan tiyan, juntʼanaykipaj jinataj. w23.05 pág. 26 párrs. 1, 2

Mana manchachikoj runaqa, manchachikojtinpis mana chay manchachikuyninwan atipachikunchu, allin kajtapunitaj ruwan. Danielqa mana manchachikoj joven karqa. Payqa Diospa profetasninpa qhelqasqasninkuta estudiajpuni. Chaykunamanta ujnintaj Jeremiaspa qhelqasqan karqa. Ajinata estudiasqanrayku tiemponmanqa repararqa, judíos Babiloniamanta kacharichisqa kanankoqa qayllaykamushasqantaña (Dan. 9:2). Payqa Jehovaj profeciasnin imaynatachus juntʼakusqanta rikuspa astawanchá Jehovapi atienekorqa. Uj runa Jehovapi mayta atienekun chayqa, nipuni imatapis manchachikunchu (Romanos 8:32, 37-39, kikinchay). Danielqa Tatan Jehovaman orakuytapuni yachaj. Chay paytaqa astawan yanaparqa (Dan. 6:10). Danielqa Jehovaman juchasninta willakoj, imaynachus kashasqantapis, yanapantataj mañakoj (Dan. 9:4, 5, 19). Danielqa tukuy runas jina mana nacekusqanmantapachachu mana manchachikoj runa karqa. Payqa estudiaspa, orakuspa, Jehovapitaj atienekuspa mana manchachikoj kayta yachakorqa. w23.08 pág. 2 párr. 4; pág. 4 párr. 7

Autoridadesta kasukoyqa mana noqallanchejtachu yanapawanchej, manaqa wajkunatapis. Kasukojtinchejqa mana autoridadeswan castigachikusunchu leyesta pʼakejkuna jinaqa (Rom. 13:1, 4). Chantapis uj leyta kasukuspaqa yanapakunchej autoridades Jehovaj testigosninmanta allinta parlanankupaj. Pasaj wataspi chay pasarqa Nigeriapi. Hermanos reunionpi kashajtinku, soldados chay salonman yaykuykorqanku. Chay soldadosqa, impuestosta mana pagayta munaspa chʼajwasta rikhurichej runasta maskʼashasqanku. Chay soldadosmanta cargoyoj kajtaj, soldadosninta nerqa chaymanta ripunallankuta. Pay nerqa: “Jehovaj testigosnenqa impuestosninkuta pagankupuni”, nispa. Leyesta kasukuspaqa yanapakunchej Diospa llajtan aswan sumaj qhawasqa kananpaj. Chaytaj aswan qhepaman hermanosninchejta yanapanman. w23.10 pág. 9 párr. 13

Jehovaj kamachisninmanta wakenqa ashkha watastaña suyakushanku tukukuy pʼunchay chayamunanta. Runaspajqa qheparikojman rijchʼakunman. Jehovaqa imaynachus kamachisnin sientekusqankuta entienden. Chayrayku profeta Habacucta nerqa: “Mosqoypi jina rikusqaykimanta señalasqa tiempo chayamunanpajqa faltarinraj. Tukukuyninmanqa usqhayllata rishan, ruwakonqapunitaj. Qheparikojtinpis suyakullaypuni. Juntʼakonqapuni. Mana qhepataqa chayamonqachu”, nispa (Hab. 2:3). Jehová chayta nisqan, ¿Habacucllapajchu karqa? ¿Chayri noqanchejtapis kay tiempopi yanapallawanchejtajchu? Jehovaqa apóstol Pabloman nerqa chayman rijchʼakojllatataj ninanta paraisota suyakoj cristianosman (Heb. 10:37). Chayrayku Jehová qheparikushasqanta yuyajtinchejpis, nisqanqa “juntʼakonqapuni. Mana qhepataqa chayamonqachu”. w23.04 pág. 30 párr. 16

Jehovaqa sutʼita rikucherqa sutinpi parlananpaj Moisesta ajllasqanta, israelitastaj payta qhesacharqanku (Núm. 14:10, 11). Moisesta kutin kutita qhesachasqankurayku, Jehovaqa mana saqerqachu Sumaj Jallpʼaman yaykunankuta (Núm. 14:30). Jinapis wakin israelitasqa Jehovawan pusachikullarqanku. Por ejemplo Jehová nerqa: “Calebtajrí tukuy sonqowan kasukullawarqapuni”, nispa (Núm. 14:24). Chayrayku Diosqa Calebta bendicerqa, saqerqataj Canaanpi maypichus tiyakuyta ajllakunanta (Jos. 14:12-14). Sumaj jallpʼaman yaykoj israelitaspis, Caleb jinallataj Jehovawan pusachikorqanku. Jehovaqa Josuetañataj ajllarqa Moisespa cuentanmanta israelitasta pusananpaj, israelitastaj “Josueta jatunpaj qhawarqanku tukuy kausayninpi” (Jos. 4:14). Chayrayku Jehovaqa paykunata bendicerqa, sumaj jallpʼaman yaykunankutataj saqerqa (Jos. 21:43, 44). w24.02 pág. 21 párrs. 6, 7

Doctorqa makinchejpi controlaspa yachayta atin imaynachus corazonninchej kashasqanta. Ajinallatataj noqanchejpis yachayta atisunman imaynatachus Jehovata munakushasqanchejta. ¿Imaynapi? Hermanosninchejta sinchʼitachus manachus munakushasqanchejpi. Sichus reparanchej hermanosninchejta pisillataña munakushasqanchejta chayqa, ichá Jehovatapis pisillataña munakushanchej. Chaywanpis sichus hermanosninchejta munakusqanchejta rikuchinchejpuni chayqa, chaypi yachakun Jehovatapis mayta munakullasqanchejtataj. Ichapis reparasunman hermanosninchejta munakusqanchejqa pisiyapushasqanta. Chaytaqa sumajta qhawarikunanchej tiyan. ¿Imarayku? Chayqa rikuchinman Jehovata pisillataña munakushasqanchejta. Chayta sutʼita reparanchej apóstol Juan nisqanpi. Pay nerqa: “Sichus rikusqan hermanonta mana munakunchu chayqa, ¿imaynatataj munakunman mana rikusqan Diostari?”, nispa (1 Juan 4:20). ¿Imatá chaymanta yachakunchej? Jehovataqa kusichisun purajmanta munanakuspalla (1 Juan 4:7-9, 11). w23.11 pág. 8 párr. 3; pág. 9 párrs. 5, 6

Jehoaspataqa wawitallaraj kashajtin tatan wañuporqa, kuraj kaj sacerdote Jehoiadataj wawanta jina uywakaporqa, Jehovamantataj ashkha imasta yachacherqa. Jehoasqa Jehoiadaj yuyaychaykunasninta japʼikorqa. Chayraykutaj Jehovata sirviyta ajllarqa, llajtantapis chayllatataj ruwanankupaj yanaparqa. Chantapis Jehová Diospa templonta allinchacherqa (2 Cró. 24:1, 2, 4, 13, 14). Tatasniyki chayri wajkuna Jehovata munakunaykipaj, kamachiykunasnintapis kasukunaykipaj yanapashasunku chayqa, uj sumaj regalo (Pro. 2:1, 10-12). Tatasqa ashkha imaynasmanta wawasninkuman yachachiyta atinkuman. Tatasniyki Bibliaj yuyaychaykunasninmanta yachachisusqankuman jina kausakunki chayqa, paykunaqa mayta kusikonqanku. Astawanpis Jehovata kusichinki, wiñaypajtaj amigon kayta atinki (Pro. 22:6; 23:15, 24). Chayrayku may sumajpuni kanman Jehoás jina ruwanayki. w23.09 págs. 8, 9 párrs. 3-5

Jehovaqa mañakuykunasninchejta uyarinantapuni niwanchej. Payqa kamachisninta munakun, mañakusqankutataj uyarishanpuni (Sal. 10:17; 37:28). Jinapis chayqa mana niyta munanchu, tukuy ima mañakusqanchejta qonawanchejtapuni. Ichapis wakin imasta mañakusqanchejtaqa, paraisopiraj qowasun. Jehovaqa munayninpi piensarispapuni mañakuykunasninchejman kutichiwanchej (Isa. 55:8, 9). Payqa munan kay jallpʼaman Gobiernonta apoyaj runas juntʼanankuta, chaypitaj kusisqas, ujchasqastaj payta sirvinankuta. Satanastajrí nerqa runastaqa aswan allin rinawanchejta noqanchejpuralla gobernanakojtinchej (Gén. 3:1-5). Jehovataj chay nisqan llulla kasqanta rikuchinanpaj, saqerqa runaspuralla kamachinakunankuta. Chaynejta kay tiempopeqa ashkha problemas tiyan (Ecl. 8:9). Chayrayku yachanchej Jehovaqa chay problemasta mana kunanchu allinchananta. w23.11 pág. 21 párrs. 4, 5

Jehovaqa nerqa Abrahannejta ashkha naciones bendecisqa kanankuta. Chaywanpis Abrahanqa 100 watasniyojña karqa, Sarataj 90 watasniyojña, nitaj ni uj wawankupis karqarajchu. Runa jinalla yuyaspaqa niña wawayoj kayta suyakunkumanchu karqa. Chayqa Abrahanpaj uj sinchʼi prueba karqa. Jinapis “suyakorqa, creerqataj ashkha nacionespa tatan kananta” (Rom. 4:18, 19). Tiemponmantaj chay suyakusqanqa juntʼakorqapuni. Wawan Isaac nacekorqa, pitachus maytapuni suyakusharqa (Rom. 4:20-22). Noqanchejpis Abrahán jinallataj Jehovawan cheqan runaspaj, amigosninpajtaj qhawachikusunman. Chayrayku Abrahanmanta parlaspa Pablo nerqa: “‘Cheqan runapaj qhawasqa karqa’ nisqaqa, mana Abrahanllapajchu qhelqasqa karqa, manachayqa noqanchejpajpis. Imaraykuchus noqanchejpis, Diospi creesqanchejrayku cheqan runaspaj qhawasqa kasun. Paymin Señorninchej Jesusta wañusqas ukhumanta kausaricherqa”, nispa (Rom. 4:23, 24). Chayrayku Abrahán jinallataj creeyniyoj kananchej tiyan, ruwasqasninchejwan chayta rikuchinanchej tiyan, suyakuyniyojtaj kananchej tiyan. w23.12 pág. 7 párrs. 16, 17

Ichá uj llakiypi rikukushanchej, chayraykutaj mancharisqas kashanchej. Jina kajtenqa yuyarikuna Jehovaqa mana imapichus rikukushallasqanchejtachu qhawamushasqanta, manaqa imaynachus sonqonchej kashasqantapis yachasqanta. Ñaupa tiempomanta Diospa kamachisnin Egiptopi esclavos kashajtinku, Jehovaqa allinta yacharqa nanayninkuta, ‘mayta sufrishasqankutapis’ (Éxo. 3:7). Ichapis uj llakiypi rikukushanchej, chaytaj manchachiwanchej. Chayrayku mana reparayta atillasunmanchu imaynatachus Jehová yanapashawasqanchejta. Jina kajtin, ¿imatá ruwasunman? Jehovamanta mañakuna imatachus pay noqanchejrayku ruwashasqanta reparachinawanchejpaj (2 Rey. 6:15-17). Chaymantataj kaypi piensarina: ¿Kallpachawarqanchejchu tantakuypi uj discursota chayri uj comentariota uyarisqanchej? ¿Kallpachawarqanchejchu uj publicacionta leeriy, uj videota qhawariy, chayri uj takiyta uyariy? ¿Uj hermano sonqochariwarqanchejchu uj textowan chayri uj mashkha simita nispa? Hermanosninchej munakuwasqanchej, Diospa Palabran kallpachawasqanchejpis Jehovamanta may sumaj regalos kanku. Wakin kutitaj chaymanta qonqakusunman (Isa. 65:13; Mar. 10:29, 30). Chay regalosqa sutʼita rikuchiwanchej Jehová noqanchejmanta llakikusqanta, atienekunapaj jinataj kasqanta (Isa. 49:14-16). w24.01 pág. 4 párrs. 9, 10

Jesusqa niraj cieloman kutipushaspa, discipulosninman yuyaricherqa paymanta willananku kasqanta “Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi” (Hech. 1:8; Luc. 24:46-48). Pisi tiemponmantaj judiosta kamachejkunaqa Pedrotawan Juantawan presochaspa Jatun Juntaman aparqanku. Chaypitaj kamacherqanku amaña predicanankuta, manchaykucherqankutaj (Hech. 4:18, 21). Pedrowan Juanwantaj nerqanku: “Qankunaña qhawariychej, Diospa ñaupaqenpi qankunata kasukunaykuchus chayri Diosta kasukunaykuchus aswan allin kasqanta. Noqaykoqa mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:19, 20). Kacharipusqankutawantaj, Pedrowan Juanwanqa waj discipuloswan tantakamorqanku. Khuskataj Jehovamanta mañakorqanku munayninta ruwanallankupajpuni yanapananta. Jehovataj chay kamachisnin sonqomantapacha mañakusqankuman kuticherqa (Hech. 4:31). w23.05 pág. 5 párrs. 11, 12

Jehovawan munasqa Wawanwanqa ni pi jina may chhika watastaña khuska kanku. Chayrayku ni pi jina manchay ujchasqas kanku, maytataj munanakunku. Kay diapaj textopi Jehovaqa sutʼita nerqa Jesusta munakusqanta. Payqa mana “allinpaj qhawani” nispallachu nerqa, manachayqa yachananchejta munarqa may jinatapunichus munakusqanta. Chayrayku nerqa: “Kaymin munasqa Wawayqa”, nispa (Efe. 1:7). Jehovaqa Jesús Wawan kasqanmanta, imatachus tumpamantawan ruwananmantapis may kusisqa kasharqa. Jesusqa sutʼita yacharqa, Jehová payta mayta munakusqanta. Chayrayku kutin kutita nerqa, Tatan payta munakusqanta (Juan 3:35; 10:17; 17:24). w24.01 pág. 28 párr. 8

Kaypi piensarina: mayta munakusqanchej runa contranchejpi llullasta parlanman. Noqanchejtaj yachanchej chay nisqanqa llulla kasqanta, jinapis wakin runas payta creenku. Mana chayllachu, chay nisqanta wajkunaman willaranku. Ajinamanta chay llullakusqanqa tukuynejman chayan. Chay pasawajtinchej, ¿imaynataj sientekusunman? Mayta phutikusunman, ¿icharí? Chayqa entiendechiwanchej imaynachus Jehová sientekusqanta ujnin angelnin paymanta llullasta parlajtin, chaywantaj sutinta chʼichichajtin. Evataj chay llullakusqanta creeykorqa, chayrayku ñaupa tatasninchejqa Jehovaj contranta oqharikorqanku. Chaynejta tukuy runas juchallikunchej, tiempowantaj wañunchej (Gén. 3:1-6; Rom. 5:12). Satanás llullakusqanrayku, mundo enteropi chay jina problemas kashan: wañuy, guerras, ñakʼariykunas ima. Jehovaj sonqonqa imaynapunichus kashan Satanás ajinata llullakusqanmanta, chaynejtataj may llakiypi kashasqanchejmanta. Chayrayku ichapis Jehovaqa phiñasqalla, sonqo nanasqalla kanman karqa. Pero mana jinachu kashan, astawanpis Bibliaqa nin ‘kusikuyniyoj Dios’ kasqanta (1 Tim. 1:11). w24.02 pág. 8 párrs. 1, 2

¿Imaynatá José jina ruwasunman juchaman tanqasqa kaspa allin kajtapuni ruwanapaj? Kunanña piensarinanchej tiyan imatachus ruwananchejta juchaman tanqasqa kajtinchej. Imatachus Jehová chejnikusqantaqa chay rato qhesachayta yachakunanchej tiyan, mana ni uj ratitollatapis piensarispa (Sal. 97:10; 119:165). Chay yanapawasunchej mana jatun juchaman urmanapaj. Ichapis yachankiña cheqa kajta tarisqaykita, Jehovatataj tukuy sonqo sirviyta munashanki. Chaywanpis, ¿imachu jarkʼashasunki Jehovaman kausayniykita mana qopunaykipaj, bautizakunaykipajpis? Jina kajtenqa rey David jina ruwawaj, Jehovamantataj mañakuwaj: “Diosníy, allinta qhawaykuriway, sonqoytapis allinta rejsiy. Allinta qhawaykuriway, sonqoypi phutiyniytapis allinta rejsiy. Allinta sonqoyta qhawaykuriy, ichus ima sajra yuyaypis llakiy ñanman apawanman, wiñay ñantataj pusaway”, nispa (Sal. 139:23, 24). Kausayniykita Jehovaman qopunaykipaj, bautizakunaykipajpis kallpachakushanki chayqa, sonqo kʼajaywan payta maskʼashasqaykita rikuchishanki. Bibliataj niwanchej chayta ruwajkunata Jehová bendecisqanta (Heb. 11:6). w24.03 pág. 6 párrs. 13-15

Kuraj kaj sacerdoteqa israelitaspa sutinkupi Dioswan parlaj. Israelpeqa ñaupaj kuraj kaj sacerdote Aarón karqa. Jehovataj payta churarqa yupaychana toldota payman jaywashajtinku. Chaywanpis apóstol Pabloqa kay jinata sutʼincharqa: “Sacerdotesqa wañupusqankurayku manaña sacerdotesllapuni kayta aterqankuchu. Chayrayku wajkunañataj cuentankumanta yaykoj kanku”, nispa (Heb. 7:23-26). Chantapis chay kuraj kaj sacerdotesqa pantaj runas karqanku. Chayrayku juchasninkuraykupis uywasta jaywanallankutaj karqa. Chaypi mana kikinchu kanku Israelmanta kuraj kaj sacerdoteswan aswan Kuraj kaj Sacerdote Jesucristowan. Kuraj kaj Sacerdotenchej Jesucristoqa sirvin ‘cheqa kaj toldopi, mayqentachus Jehová Dios sayaricherqa, manataj runaschu chaypi’ (Heb. 8:1, 2). Pablo sutʼincharqa: “Jesús wiñaypaj kausasqanrayku, manaña cuentanmanta waj sacerdotes yaykunankuchu tiyan”, nispa. Chantapis Pablo nerqa Jesusqa “mana chʼichiyoj, juchasapasmanta tʼaqasqa” kasqanta, nitaj Israelmanta chay waj kuraj kaj sacerdotes jinachu juchasninrayku “sapa día uywa wañuchisqasta” jaywanan kasqanta. w23.10 pág. 26 párrs. 8, 9

Chay ‘ñaupaj cieloqa’ ninakun gobiernoswan, pikunachus Satanaspa atiyninpi, demoniosninpa atiyninpiwan kashanku chaykunawan (Mat. 4:8, 9; 1 Juan 5:19). Bibliapi jallpʼa palabrataqa wakin kutis oqharin kay jallpʼapi tiyakoj runasmanta parlananpaj (Gén. 11:1; Sal. 96:1). Chayrayku “chay ñaupaj jallpʼapis” nispaqa kay tiempopi sajra runasmanta parlashan. Jehovataj “cielotawan” “jallpʼatawan” mana tumpa tumpasllatachu allinchanqa, manaqa qʼalata chinkachenqa, ‘uj mosoj cielota, uj mosoj jallpʼatawantaj’ cuentanmanta churanqa. Chayqa niyta munan uj mosoj gobierno cheqan runasta kamachinanta. Jehovaqa jallpʼata, runastapis allinchanqa mana pantayniyoj kanankukama. Isaías nisqanman jina tukuynin jallpʼa uj paraisoman tukonqa, Edén huerta jina manchay kʼachituman. Noqanchejpis sapa ujninchej mosojyachisqa kasunchej. Jehovaqa cojitosta, cieguitosta, joqʼaritasta sanoyachenqa, wañojkunatapis kausarichimonqa (Isa. 25:8; 35:1-7). w23.11 pág. 4 párrs. 9, 10

“Manchay ñakʼariy” tiempoqa kaymanta jinalla qallarenqa (Mat. 24:21). Kay tiempopi desastres naturalesqa mana yuyashajtillanchej chayarpamun, pero manchay ñakʼariy tiempowantajrí mana ajinachu, yachanchejña chayamunanta. 2.000 watas ñaupajta jina Jesusqa discipulosninman nerqa chay diapaj wakichisqa kanankuta. Jesuspa nisqanta kasukusun chayqa, chay tiempo chamojtin salvakuyta atillasun, wajkunatapis salvakunankupaj yanapayta atisun (Luc. 21:36). Necesitasun aguantayta Jehovata kasukunapaj, pay jarkʼanawanchejpitaj confianapaj. ¿Imatá ruwasunchej hermanosninchej cosasninkuta pierdejtinku chayri ni imayoj qhepakojtinku? (Hab. 3:17, 18). Chay kutipi paykunata yanapanapaj, necesitasqankutataj jaywarinapaj khuyakunanchej kanqa. Uj qotu naciones contranchejpi oqharikonqanku chaypacha, ¿imatá ruwasun hermanosninchejwan uj tiempota ashkha ukhu tiyakunanchej kanqa chay? (Eze. 38:10-12). Tukuy hermanosninchejta mayta munakusqanchejta rikuchinanchej kanqa. w23.07 pág. 2 párrs. 2, 3

Casadosqa Aquilamantawan Priscilamantawan mayta yachakunkuman. Chay qhariwarmeqa ñaupa tiempomanta cristianospaj may munasqa karqanku (Rom. 16:3, 4). Paykunaqa khuska trabajarqanku, khuska predicarqanku, wajkunatapis khuska yanaparqanku (Hech. 18:2, 3, 24-26). Bibliaqa paykunamanta parlaspa iskayninkumantapuni parlan. Casados kajkuna, ¿imaynatá paykuna jina ruwankuman? ¿Ima ruwanastaj sapa ujniykichejpata tiyapusunkichej? ¿Chaykunamanta wakillantapis khuska ruwayta atiwajchejchu? Aquilawan Priscilawanqa khuska predicaj kanku. Qankunapis, ¿paykuna jinachu khuska predicankichej? Aquilawan Priscilawanqa khuskallataj trabajaj kanku. Ichapis qankunaqa mana kikin trabajoyojchu kankichej. Jinapis wasipi ruwanasta khuska ruwayta atiwajchej (Ecl. 4:9). Purajmanta yanapanakuspa imatapis khuska ruwankichej chayqa, astawan parlarikuyta atinkichej. w23.05 págs. 22, 23 párrs. 10-12

Wakin kutisqa tukuy manchachikunchej. Davidqa Rey Saúl wañuchinanpaj qhatiykachashajtin, filisteospa llajtanku Gatman ayqekorqa. Gatpa reynin Akismantaj nerqanku Davidqa wapu soldado kasqanta, ‘chunka waranqastataj wañurachisqanta’. Chayta willasqankuta yachaspataj Davidqa “mayta manchachikorqa” (1 Sam. 21:10-12). Imatachus chay rey payta ruwananmanta manchachikorqa. ¿Imatá ruwarqa chay manchikuyninta atipananpaj? Davidqa 56 Salmopi willan Gat llajtapi kashaspa imaynachus kashasqanta. Chay Salmopi sutʼimanta nishan imaraykuchus manchachikusqanta, Jehovapi atienekusqantaj chay manchachikuyninta atipananpaj yanapasqanta (Sal. 56:1-3, 11). Chayta ruwasqanraykutaj payta may allin rerqa. Davidqa Jehovaj yanapayninwan yuyaychakorqa locomanta pasachikunanta. Ajinamanta Akisqa manaña Davidta wañuchiyta munarqachu, manaqa ripunallantaña munarqa. Chayrayku Davidqa ayqekuyta aterqa (1 Sam. 21:13–22:1). w24.01 pág. 2 párrs. 1-3

¿Pikunamantataj parlashan kay diapaj ajllasqa texto? Tukuy ajllasqa cristianosña cielopi kajtinku, paykunaqa maqanakunanku kanqa, chay kanqa ñaupaj kaj ruwananku. Chay ruwayninkoqa tʼukunapaj jinapuni kanqa. Cielopiña kashaspataj, Cristowan khuska angelesninwan khuska qhepa kaj guerrapi Diospa enemigosninpa contranta maqanakonqanku. Kaypi piensarina: Kay jallpʼapiraj kaj ajllasqa cristianosmanta wakenqa, machitusña kanku, niñataj kallpankupichu kanku. Jinapis cielopiña kashaspaqa ni jaykʼaj wañoj cuerpoyojman tukonqanku, may atiyniyojmantaj, ajinamanta Rey Jesucristowan khuska maqanakunankupaj. Armagedón pasaytataj runasta yanapanqanku mana pantaj runasman tukunankupaj. Kay jallpʼapi pantaj runas jina kashaspaqa, mana tukuy chayta ruwayta atinkumanchu. Chayrayku cielopiña kashaspa astawan yanapayta atiwasunchej. w24.02 págs. 6, 7 párrs. 15, 16

Wakin runasqa Jehovaman kausayninkuta qopunankupaj, bautizakunankupajpis wakichisqaña kashanku. Jinapis mana chayta ruwayta munankuchu. Ichapis manchachikunku jatun juchapi urmayta, congregacionmantataj qharqochikuyta. Jinapis Bibliaqa nin Jehovaqa kamachisninman tukuy ima necesitasqankuta qonanta, ‘imastachus payta yupaychajkuna ruwanku chay imasta ruwanankupaj, ajinamanta payta kusichinankupaj’ (Col. 1:10). Chayrayku ama iskayrayaychu allin kajta ruwanaykipaj necesitasqayki kallpata Jehová qosunanmanta. Payqa ashkhastaña yanaparqa (1 Cor. 10:13). Chayrayku uj mashkha runaslla congregacionmanta qharqochikunku. Jehovaj yanapanwanqa payman cheqa sonqos kayta atisunman. Pantaj runas kasqanchejrayku tukuy aysasqa kanchej sajra imasta ruwayman (Sant. 1:14). Jinapis ajinapi rikukuspaqa ayqeyta atisunman, imaraykuchus allin kajtapis chayri mana allin kajtapis ruwayqa noqanchejmanta kashan. Wakin runasqa ninku sonqonchejpa munayninta mana mandayta atisqanchejta, nitaj imatachus ruwasqanchejtapis, jinapis chayqa mana ajinachu. w24.03 pág. 5 párrs. 11, 12