Niña kausayta munajtiyki

Brasilmanta Adriana nin: “Sapa kuti tukuy imamanta anchatapuni llakikorqani, chayrayku wañuchikuyllataña munarqani”, nispa.

ICHÁ wakin kutis qanpis jatun llakiypi kaspa wañuchikuyllataña munarqanki. Adrianapis ajinapi rikukorqa. Payqa imallamantapis anchatapuni llakikoj. Doctorestaj nerqanku chayqa uj onqoy kasqanta.

Japonmanta Kaoru sutiyoj runa imapichus rikukusqanta qhawarina. Payqa machitu tatasninta onqoykojtinku cuidarqa. Pay nin: “Chaypachaqa niña yacharqanichu imatachus ruwanayta, imaraykuchus trabajoypi anchatapuni matʼiykuwarqanku. Aswan qhepamantaj niña yarqhawarqachu, nitaj puñuypis chayawarqachu. Wañuyllataña munarqani”, nispa.

Nigeriamanta Ojebode nin: “Llakisqallapuni kaj kani. Imamantapis waqallaj kani. Wakin kuteqa wañuchikuyta yuyaj kani”, nispa. Ojebodewan, Kaoruwan, Adrianawan wañuchikuyta piensaspapis mana wañuchikorqankuchu. Jinapis mundontinmanta may chhika runasqa jatun llakiypi kaspa wañuchikunku.

¿MAYPITAJ YANAPATA TARISUNMAN?

Wañuchikoj runasmanta astawanqa qharis kanku. Paykunamanta ashkhasqa pʼenqakusqankurayku mana ima yanapatapis maskʼankuchu. Jinapis Jesús nerqa onqosqasqa doctorta necesitasqankuta (Lucas 5:31). Chayrayku yanapata necesitanki chayqa ama pʼenqakuychu. Ashkha runasqa depresión onqoywan kaspa tratamientota ruwanku, ajinamantataj chay onqoyninkumanta allinyanku. Ojebodewan, Kaoruwan, Adrianawanqa, especialistaswan uj tratamientota ruwarqanku. Kunantaj allillanña kashanku.

Chay depresión onqoypaj wakin doctoresqa medicamentosta qonku. Wakin doctorestaj chay onqoyniyoj kajkunata imaynachus kashasqankuta tapurispa parlachinku, chayman jinataj yanaparinku, yuyaycharinku ima. Chay onqoyniyoj kajkunaqa necesitanku familiaresninku, amigosninku yanapanankuta, pacienciakunankuta, entiendenankuta ima. Sumaj amigonchej Jehová Diosqa, Bibliawan sumajta yanapawanchej.

¿MAYKʼAJLLAPIS CHAY ONQOY CHINKANMANCHU?

Depresión onqoyniyojkunaqa unayta tratamientota ruwananku tiyan. Chantapis chay onqoyta atipanankupajqa imastachus ruwaj kanku chay imasta cambiananku tiyan. Qan depresión onqoywan kashanki chayqa, ama qonqaychu aswan qhepaman allin kausay kananta. Ojebode chaypi piensarerqa. Pay nin: “Isaías 33:24 versículo imatachus nisqan juntʼakunanta mayta suyakushani. Chaypeqa nin uj pʼunchay onqoykuna chinkananta”, nispa. Diosninchejqa niwanchej uj mosoj jallpʼata qonawanchejta. Chaypeqa manaña ima llakiypis kanqachu. Chayta yachayqa maytachá sonqochasunki (Apocalipsis 21:1, 4). Llakiykunasniykeqa wiñaypaj chinkanqa. Chantapis niña ujtawan rikunkichu chay jina ñakʼariykunata, niñataj chaymanta yuyarikunkichu (Isaías 65:17).

Kay versículos yanapasunkiman

Diosqa yachan imaynachus kashasqaykita

“Noqaqa paña makiykimanta japʼisoj Señorniyki Tata Dios kani, niykitaj: Ama manchachikuychu; noqa yanapasqayki, nispa” (Isaías 41:13).

Jehová Diosqa imaynachus kashasqanchejta yachan, yanapaytataj munawanchej.

Bibliaj nisqasninpi tʼukuriy

Eliasqa wañupuyta munaspa mañakorqa: “¡Señor Diosníy, kaykamallaña! Kawsayniyta qechupuway”, nispa (1 Reyes 19:4, Diospa Simin Qelqa, 2004).

Ojebode nin: “Bibliaj nisqanpi tʼukureyqa mayta yanapawarqa. Repararqani profeta Eliaspis noqa jinallataj sientekusqanta”, nispa.

Ñaupa tiempo runasmanta Bibliapi yachakuy

Jesús Pedroman nerqa: “Noqataj qanpaj sinchʼita Diosmanta mañapuyki ama creesqayki pisiyananpaj”, nispa (Lucas 22:32).

Pedroqa, Jesusta kinsa kutita mana rejsisqanta niytawan mayta llakikorqa, sonqo nanaytataj waqarikorqa. Kaoru nin: “Jehová Dioswan Jesuswanqa yacharqanku imayna llakisqachus Pedro kashasqanta. Chayta yachaytaj mayta noqatapis kallpachawarqa”, nispa.

Niña ujtawan rikunkichu ñakʼariykunata, niñataj chaymanta yuyarikunkichu (Isaías 65:17)