Jehovapi atienekusqayrayku sumaj cuidasqa kani

JEHOVATA REJSINI, PAYPITAJ ATIENEKUYTA QALLARINI

1948 watapi nacekorqani, Nigeriaj ujnin llajtitanpi, chaytaj Nigeriaj sur ladonpi kashan. Chay wataspeqa tataypa sullkʼa hermanon Moustaphawan, sullkʼa hermanoy Wahabiwan Jehovaj testigonman tukorqanku. Jisqʼon watitasniyoj kashajtiytaj, papasuy wañuporqa. Wañupusqanqa maytapuni llakichiwarqa. Hermanoy Wahabiqa niwarqa kausarimojtin papasuykuta watejmanta rikukapunaykuta. Chaypi piensarisqayraykutaj Bibliata estudiayta qallarerqani. 1963 watapi bautizakorqani, waj kinsa hermanosniypis bautizakullarqankutaj.

1965 watapi Lagosman riporqani. Ujnin kuraj hermanoy Wilsonqa chaypiña tiyakorqa. Chaypeqa congregación Igbobimanta wakin precursores regulareswan khuska kaspa mayta kusirikoj kayku. Paykunata may kusisqasta rikuspa, sonqo kʼajaywantaj Jehovata sirvishajta rikuspa, noqapis enero de 1968 watapi precursor regular kayta qallarerqani.

Betelpi sirvej Albert Olugbebi hermanoqa, uj sumaj tantakuyta jovenespaj ruwarqa. Chaypitaj niwarqayku Nigeriaj norte ladonpi precursores especiales necesitakushasqanta. Chay hermano imatachus sonqo kʼajaywan niwasqaykutaqa kunankama yuyarikullanipuni. Pay niwarqayku: “Qankunaqa jóvenes kashankichej. Tiempoykichejta, kallpaykichejta Jehovata sirviypi churawajchej. Chaypeqa ashkha llankʼana kashan”, nispa. Noqaqa profeta Isaías jina maymanchus Jehová kachawasqanman riyta munarqani, chayraykutaj uj solicitudta juntʼacherqani (Isa. 6:8).

Mayo de 1968 watapi, Kano llajtaman precursor especialta jina kachawarqanku, chayqa Nigeriaj norte ladonpi kashan. Chaypachaspuni Biafrapi guerra kasharqa. Chay guerraqa karqa 1967 watamanta, 1970 watakama. Chay guerra kasqanrayku chay lugaresqa manchay llakiypuni kasharqa. Chantá chay guerraqa chay suyoj inti llojsimuynin ladomanñataj chayarqa. Uj hermanotaj allinniyta munaspa, Kanoman ama rinayta niwarqa. Noqataj nerqani: “Gracias hermanóy. Yachani noqamanta llakikusqaykita. Jinapis Jehová munan chayman rinayta chayqa, yachani pay noqawanpuni kananta”, nispa.

GUERRARAYKU LLAKIYPI RIKHUREJ LUGARPI JEHOVAPI ATIENEKUNI

Kanopi imastachus rikusqayqa may llakiypuni karqa. Guerra civilqa chay llajtata manchay llakiytapuni ruwaykusqa. Predicashaspaqa wakin kutis guerrapi wañuchisqa runaspa cuerposninkuta rikoj kayku. Kanopeqa ashkha congregaciones kasqa. Jinapis casi tukuy hermanos ayqekusqanku, ni 15 publicadorespis qhepakusqankuñachu. Paykunaqa manchay mancharisqas kasharqanku, desanimasqastaj. Chay llajtaman sojta precursores especiales chayajtiykutaj, mayta kusirikorqanku. Kallpacharisqaykoqa maytapuni paykunata yanaparqa. Yanaparerqayku watejmanta reunionesta ruwanankupaj, predicanankupaj, predicacionmanta informesninkuta sucursalman apachinankupaj, publicacionestapis mañakunallankupajpuni.

Sojtantin precursores especiales hausa parlayta yachakuyta qallarerqayku. Parlayninkupi predicasqaykurayku, ashkha runas uyariwaj kayku. Jinapis chaypi aswan rejsisqa kaj religionmanta wakinkunaqa, mana munajchu kanku predicanaykuta. Chayrayku sumajta qhawakunayku karqa. Uj día noqatawan compañeroytawanqa uj runa cuchillowan qhatiykuwarqayku. Aswan usqhayta corresqaykuraykulla ayqekuyta aterqayku. Ajinaspi rikukojtiykupis, Salmo 4:8 nin jina, Jehovaqa “ni ima llakiyniyojta” kausachiwarqayku, pisimanta pisitaj publicadores yapakorqanku. Kunanqa Kanopi 11 congregacionesña tiyan, 500 publicadoresmanta astawantaj.

NIGERPI QHATIYKACHASQA KAYKU

Agosto de 1968 watapitaj, Kanoman chayasqaykumanta uj mashkha killasnillanman, noqatawan waj iskay precursores especialestawan Niameyman kachawarqayku. Chayqa kashan África Occidentalpi, República de Nigerpa capitalnintaj. Chay rato repararqayku Nigerqa entero mundontinmanta aswan qʼoñi kasqanta. Mana chay jina qʼoñipi kausakullaytachu yachakunayku karqa, manaqa francés parlaytapis yachakunallaykutaj karqa. Chaypeqa chay parlayta astawan parlakun. Tukuy chaywanpis Jehovapi atienekorqayku, Niameypitaj predicayta qallarerqayku, chaypi pisi publicadoreslla tiyakojkunawan khuska. Pisi tiemponmantaj, casi tukuy leeyta yachaj runaspata La verdad que lleva a vida eterna nisqa libronku kaporqaña. Chay librowan runasta estudiachej kayku. Chantapis runasqa maskʼawaj kayku chay librota qonaykupaj.

Niraj imapi repararqayku autoridadesqa Jehovaj testigosninta mana allinpajchu qhawasqankuta. Julio de 1969 watapi, chay suyupi ñaupaj kaj asamblea de circuitota ruwarqayku, 20 runas jinataj chaypi tantakorqayku. May kusisqapuni kasharqayku iskay publicadores bautizakunankumanta. Asambleata ñaupaj kaj día ruwashajtiykutaj, policías pantachiwarqayku. Paykunaqa congregacionesta waturej hermanota, precursores especialestawan policía wasiman apawarqayku. Chaypitaj libreta tapuykachawarqayku, niwarqaykutaj qʼayantin kutinaykuta. Yacharqayku autoridades mana asambleata ruwajta saqenawaykuta. Chayrayku bautismopaj discursotaqa uj wasillapi ruwarqayku. Bautizakojkunataj mayupi bautizakorqanku mana reparayllata.

Uj mashkha semanasninmantaj, Ministerio del Interior nisqa chay suyumanta wijchʼuwarqayku, noqata, waj 5 precursores especialestawan. 48 horaspi Nigermanta ripunaykuta niwarqayku, cuentallaykumantataj ripunayku karqa. Nisqankuta kasukorqayku, cheqantataj Nigeria sucursalman rerqayku. Chay sucursalmantataj waj lugaresman kachawarqayku.

Noqataqa Orisunbare llajtaman kachawarqanku, chayqa Nigeriapi kashan. Chaypeqa uj juchʼuy grupito karqa. Paykunawan khuskataj kusisqa predicarqani, wakin runasmanpis Bibliamanta yachacherqani. Jinapis sojta killasninman sucursalqa watejmanta Nigerman kutinayta niwarqa, jinapis sapallayña. Nipuni yuyarqanichu watejmanta chayman kachanawankuta, nerqanitaj “kunan imanasajtajri” nispa. Jinapis Nigerpi kaj hermanosta maytapuni watejmanta rikuyta munasharqani.

Chayrayku Niameyman kuterqani. Chayasqaymanta qʼayantenqa, Nigeriamanta negociosniyoj uj runa repararqa Jehovaj testigon kasqayta, Bibliamantataj ashkha imasta tapuriwarqa. Bibliata estudiarqayku, chaymantataj payqa pitayta saqeporqa, machaytapis, chantá bautizakorqa. Chantapis suyuntinpi ashkha lugarespi predicarqani, rikorqanitaj imaynatachus runas pisimanta pisi Bibliaj nisqanta japʼikusqankuta. Nigerman chayashajteyqa, 31 testigoslla karqanku, ripushajtiytaj 69 testigosña karqanku.

“MANA SUMAJTACHU YACHAYKU IMAYNACHUS PREDICACIÓN GUINEAPI KASHASQANTA”

Diciembre de 1977 watapi, kinsa semanapaj Nigeriaman kuterqani uj capacitacionman. Capacitación tukukojtintaj, Sucursalta Kamachejkunamanta coordinador Malcolm Vigoqa uj cartata jaywawarqa. Chay cartataqa Sierra Leonapi sucursalmanta apachimusqanku. Hermanosqa Guinea-Conakripi congregacionesta waturinanpaj, uj soltero precursorta maskʼashasqanku, mana anchata onqoj hermanota, inglestawan francestawan parlajta. Hermano Vigotaj niwarqa chayrayku chay capacitacionman invitawasqankuta. Payqa niwarqa chay ruwayqa mana atinapaj jinallachu kananta, yuyaychariwarqataj “allintaraj pinsarikuy manaraj ‘ya’ nishaspa” nispa. Noqataj chay rato nerqani: “Jehová kachashawan chayqa, risajpuni”, nispa.

Sierra Leonaman avionpi viajarqani, sucursalmanta hermanoswantaj tantakorqani. Sucursalta Kamachejkunamanta ujnintaj niwarqa: “Mana sumajtachu yachayku imaynachus predicación Guineapi kashasqanta”, nispa. Chay sucursal encargakusharqa Guineapi predicacionmanta. Jinapis mana chay suyumanta publicadoreswan parlayta aterqankuchu, chay suyupi politicarayku manchay chʼajwas kashasqanrayku. Chaymanqa ashkha kutispi uj hermanota kachayta munasqanku, nitaj atisqankuchu. Chayrayku niwarqanku Guineaj capitalnin Conakriman viajanayta, chaypitaj chay suyupi tiyakunaypaj papelesta orqhonayta.

Conakriman chayaspa Nigeriamanta embajadaman rerqani, chaypi trabajaj runawantaj parlarqani. Payman nerqani Guineapi predicayta munasqayta, paytaj niwarqa: “Ama chayta ruwaychu. Carcelmantaj wisqʼaykusunkuman, chayri imatapis ruwaykusunkuman”, nispa. Nillawarqataj: “Antes Nigeriallaman kutipuy, chayllapi predicamuy”, nispa. Noqataj nerqani: “Imanawachunkupis, kaypi qhepakusaj”, nispa. Chay embajadorqa Guineamanta ministro del Interiorman yanapanawanpaj uj cartata escriberqa, yanapawarqapunitaj.

Pisi tiemponmantaj Sierra Leona sucursalman kuterqani, hermanosmantaj willarqani imatachus ministro ruwasqanta. Hermanosqa maytapuni kusikorqanku Jehovaj bendicionninwan Guineapi tiyakunaypaj gobierno permisota qowasqanmanta.

1978 watamanta, 1989 watakama congregacionesta waturerqani Guineapi, Sierra Leonapi, Liberiapitaj sustituto jina waturerqani. Qallariypeqa onqollajpuni kani. Wakin kutisqa karu lugaresta visitashajtiypuni onqoykoj kani, pero hermanosqa tukuy imata ruwaj kanku hospitalman apanawankupaj.

Uj kuti manchaytapuni onqoykorqani. Malaria japʼiwarqa, wijsaypitaj khurus karqa. Ñakʼayta kutirikojtiytaj, yacharqani hermanosqa maypichus pʼampanawankumantaña parlashasqankuta. Ajina wañuy patapi rikukuspapis, ni jaykʼaj yuyarqanichu asignacionniyta saqepuyta. Manapuni iskayrayanichu Jehovalla sumajta cuidayta atiwasqanchejmanta. Wañupojtinchejpis payqa kausarichimuwasun.

SEÑORAYWAN JEHOVAPI ATIENEKUYKU

1988 watapi Dorcasta rejserqani. Payqa kʼumuykukoj sonqo precursora karqa, Jehovatataj tukuy sonqo yupaychasharqa. Casarakuytawanñataj warmiywan congregacionesta waturillarqanipuni. Dorcasqa mayta yanapawan, munakuwantaj, Jehovaraykupis tukuy imata ruwan. Wakin kuteqa uj congregacionmanta waj congregacionman rinaykupaj, 25 kilometrosta purinayku karqa qʼepisniyku aparisqa. Aswan karupi kaj congregacionesta visitanaykupajtaj, imachá viajanapaj kaj chaypi rej kayku, tʼuru ñankunasta, tʼoqo tʼoqo ñankunasta ima.

Dorcasqa ni imata manchikunchu. Wakin kutisqa ashkha cocodrilosniyoj mayusta pasanayku kaj. Uj kuti phishqa diasta viajarqayku, kʼullusmanta puentes mana allinchu kasqanraykutaj, canoapi mayuta pasarqayku. Dorcas canoamanta uraykunanpaj sayaykojtintaj, urmaykuspa yakuman chinkaykorqa. Ni mayqenniyku nadayta yacharqaykuchu, chay mayupitaj cocodrilos karqa. Walejtapuni wakin jóvenes yakuman phawaykuspa Dorcasta salvapuwarqanku. Chayrayku chayqa uj tiempota mosqochillawajpuni kayku. Jinapis congregacionesta waturillarqaykupuni.

1992 watapitaj yacharqayku warmiy onqoj kashasqanta, chaytataj nipuni suyasharqaykuchu. Ajllanayku karqa precursores especiales jinallapunichus manachus sirvinaykuta, nikorqaykutaj “kay wawitanchejqa Jehovaj regalon” nispa. Chayrayku warmi wawitaykuta Jahgift nispa suticharqayku. Chayqa niyta munan “Jahjpa regalon”. Jah suteqa pisi letrasllapi “Jehová” niyta munan. Tawa watasninmantaj wawayku Eric nacekorqa. Iskaynin wawasniyku Jehovamanta sumaj regalos kanku. Jahgiftqa uj tiempota Conakripi traducinapaj oficinaspi yanapakorqa, Erictaj siervo ministerial kashan.

Wawasniyku juchʼuysitusllaraj kashajtinku Dorcasqa niña precursora especialchu karqa, jinapis precursora regularllapuni karqa. Noqataj Jehovaj yanapayninwan precursor especialllapuni karqani. Wawasniyku wiñajtinkutaj, Dorcasqa watejmanta precursora especial karqa. Kunantaj iskayniyku Conakripi misioneros jina sirvishayku.

JEHOVÁ CUIDAWANCHEJ

Noqaqa Jehová maymanchus rinayta niwarqa chaymanpuni rerqani. Ashkha kutispi, warmiywan noqawanqa reparayku Jehová jarkʼawasqaykuta, bendeciwasqaykutataj. Jehovapi atienekusqaykurayku, manataj kapuyniyoj kaypichu atienekusqaykurayku, ashkha problemasmanta, llakiykunamanta ima jarkʼakuyku. Noqaykupuni rikuyku ‘Salvawaj Diosniykulla’ cuidayta atiwasqaykuta (1 Cró. 16:35). Yachani Jehovaqa paypi atienekojkunaj kausayninkuta “kausay wayaqanpi” sumajta waqaychasqanta (1 Sam. 25:29).