Noqanchejpajqa allinpuni Diosman qayllaykoyqa

1, 2. 1) ¿Imatá ruwananchej tiyan sumaj amigota tarinapaj? 2) ¿Imatá kay yachaqanapi yachakusun?

UJ SUMAJ amigoykipi piensariy. ¿Imastá ruwarqanki paywan sumaj amigos kanaykichejpaj? Ichapis khuskapuni tukuy imata ruwaj kankichej, astawan rejserqanki, repararqankitaj imachus gustasqanta, imachus mana gustasqantapis. May kʼacha kasqanta reparaspa pay jina kayta munarqanki, tiempowantaj may munasqa amigoykiman tukorqa.

² Sumaj amigota tarinapajqa tiempochakunanchej tiyan, kallpachakunanchej tiyan. Jehovaj amigosnin kananchejpajpis kikillantataj ruwananchej tiyan. Kay yachaqanapi yachakusun imaynatachus Jehovaman astawan qayllaykunanchejta, ima bendicionestachus chayta ruwajtinchej japʼinanchejtapis. Ñaupajtaqa yachakusun imajtinchus allinpuni kasqanta aswan sumaj amigonchej Jehovaman qayllaykunanchej.

3. ¿Imaraykú piensarinanchej tiyan Jehovaman qayllaykuy imaspichus yanapawasqanchejta? Kikinchariy.

³ Allin kanman tʼukurinanchej imajtinchus Diosman qayllaykunanchej may allinpuni kasqanta. Ajinamanta payman astawan qayllaykusun (Sal. 63:6-8). Chayta entiendenapaj kaypi piensarina: Tukuypis yachanku sumajta alimentakuy, ashkha yakuta tomay, ejerciciosta ruway, sumajta puñukuypis allinpuni kasqanta. Chayta yachaspapis ashkha runasqa mana ruwankuchu, nitaj saludninkuta cuidankuchu. Pero sichus sapa kuti piensarinkuman chay imasta ruway sanitos kanankupaj yanapasqanta chayqa, ruwayta atillankuman. Noqanchejpis yachanchej Jehovaman qayllaykoyqa allinpuni noqanchejpaj kasqanta, jinapis imaspichus yanapawasqanchejpi tʼukurispalla payman astawan qayllaykuyta munasun (Sal. 119:27-30).

4. ¿Imatá salmista nerqa Salmo 73:28 versiculopi?

⁴ (Salmo 73:28 leey). 73 Salmota qhelqajqa Leví ayllumanta karqa, templopitaj músico karqa. Ichapis ashkha watastaña Jehovata tukuy sonqo sirvikusharqa. Chaywanpis, ¿imatá reparakorqa? Mana qonqakunanchu kasqanta ‘Diosman qayllaykusqan’ paypaj, wajkunapajpis allinpuni kasqanta. Qhawarina imaraykuchus Diosman qayllaykuy allinpuni kasqanta.

DIOSMAN QAYLLAYKUSQANCHEJ KUSICHIWANCHEJ

5. 1) Jehovaman astawan qayllaykusqanchej, ¿imaraykú kusichiwanchej? 2) ¿Imaynasmantá Jehovaj yachaynin yanapasunki, jarkʼasunkitaj? (Proverbios 2:6-16).

⁵ Astawan Jehovaman qayllaykuspaqa astawan kusisqas kasun (Sal. 65:4). Ashkha imasrayku chayta ninchej. Diosninchej Palabranpi sumajta yuyaychawasqanchejta kasukojtinchej allinpuni riwanchej. Yachachiwasqanchejqa sajra imasmanta jarkʼawanchej, yanapawanchejtaj mana jatun juchaspi urmananchejpaj (Proverbios 2:6-16 leey). Chayrayku Biblia nin: “Kusisqamin yachayta tarej runaqa, sumajta tanteayta yachakoj runapis”, nispa (Pro. 3:13).

6. ¿Imajtín Salmista manaña kusisqachu kasharqa?

⁶ Chayqa mana niyta munanchu Jehovaj amigosnin ni jaykʼaj llakikunanchejta. 73 Salmota qhelqajqa imaschus payman mana allinchu rijchʼasqanpi anchata yuyasqanrayku niña kusisqachu karqa. Payqa yuyarqa sajra runasta aswan allin risqanta Diosta, kamachiykunasninta mana valechejtinkupis. Chayraykutaj phiñakorqa, envidiakorqataj. Mana allinta reparaspalla yuyarqa sajrata ruwajkunapis, manchayta runaykachajkunapis astawan qhapajyasqankuta, mana onqosqankuta, nitaj ni jaykʼaj sufrisqankuta (Sal. 73:3-7, 12). Chayraykutaj payqa qhasi manakajta Diosta yupaychasqanta yuyarqa. May llakisqapuni nerqa: “Qhasillatasina noqaqa llimphu sonqoyoj kani. Qhasilla mana juchayoj kani,” nispa (Sal. 73:13).

7. Llakisqa kaspa, ¿imaynatá watejmanta kusisqa kasunman? (Tapapi dibujotawan qhawariy).

⁷ Salmistaqa mana jinallachu qhepakorqa. ¿Imatá ruwarqa llakiyninta atipananpaj? “Diospa santo wasinman” yaykorqa, chaypitaj Jehovaqa pantasqata yuyashasqanta reparacherqa (Sal. 73:17-19). Jehovaqa sumaj amigonchej kasqanrayku llakisqa kashajtinchej reparawanchej. Sichus yuyaychayninta mañakunchej chayqa, sichus Palabrannejta, congregacionnejta yanapawasqanchejta tukuy sonqo japʼikunchej chayqa, kallpata japʼinchej llakisqa kaspapis ñaupajman rinallanchejpajpuni. Llakiykunas sinchʼita phutichishawajtinchejpis, Jehová sonqochawasun, kusichiwasuntaj (Sal. 94:19).a

DIOSMAN QAYLLAYKUY YANAPAWANCHEJ KUNANPIS QHEPAMANPIS

8. ¿Imaynasmantá Diosman qayllaykusqanchej yanapawanchej?

⁸ Diosman qayllaykusqanchejqa iskay imaynasmanta yanapallawanchejtaj. Ñaupaj kaj, Diospa amigon kaspaqa kunanña sumajta kausakuyta atinchej. Iskay kaj, sumaj suyakuyniyoj kanchej (Jer. 29:11). Chayta ujmanta uj qhawarina.

9. ¿Imaraykú Jehovata sirvispa aswan kusisqa kanchej?

⁹ Jehovaman qayllaykusqanchejrayku kusisqa kausakunchej. Kay tiempopi ashkha runas ninku Dios mana kasqanta. Chayrayku má yachankuchu imapajchus kausasqankuta, yuyankutaj runas tiempowan chinkapunankuta. Noqanchejtaj Bibliamanta yachakusqanchejrayku, sutʼita yachanchej “Diosqa kasqantapuni, jinallataj sonqo kʼajaywan payta maskʼajkunata tʼinkasqantapis” (Heb. 11:6). Runasqa Diosta sirviyta necesitanchejpuni, Tatanchej Jehová chay necesidadniyojta ruwawasqanchejrayku. Chayrayku payta sirvispa cheqamanta kusisqas kausakunchej (Deu. 10:12, 13).

10. Salmo 37:29 nin jina, ¿ima suyakuyniyojtaj kanku Jehovapi atienekojkuna?

¹⁰ Ashkha runasqa ni ima suyakuyniyoj kanku. Paykunaqa kausanku trabajanallankupaj, wawasninkuta uywanallankupaj, qolqeta tantanallankupaj chaywan jubilakunankupaj, Diosmantataj ni yuyarikullankupischu. Jehovaj kamachisnintaj paypi atienekunchej (Sal. 25:3-5; 1 Tim. 6:17). Amigonchej Jehovapi atienekunchej, yachanchejtaj tukuy ima nisqanta juntʼanantapuni. Aswan qhepaman may sumaj imas kananta suyakushanchej. Paraisopeqa Jehovata wiñaypaj yupaychayta atisun (Salmo 37:29 leey).

11. Jehovaman qayllaykusqanchej, ¿imaynatá yanapawanchej, chayta ruwajtinchej imaynataj Diospa sonqon kashan?

¹¹ Diosman qayllaykoyqa waj imaspi yanapallawanchejtaj. Jehovaqa juchasninchejmanta pesachikojtinchej perdonanawanchejta niwanchej (Isa. 1:18). Chayrayku ñaupa juchasninchejmanta mana llakisqallapunichu kana tiyan (Sal. 32:1-5). Chantapis mayta kusikunchej Jehovaj sonqonta kusichishasqanchejta yachaspa (Pro. 23:15). Ichá qanpis Jehovaj amigon kasqaykirayku ashkha bendicionestaña japʼinki. Jinapis, ¿imatá ruwasunman payman astawan qayllaykunapaj?

¿IMAYNATÁ DIOSMAN ASTAWAN QAYLLAYKUSUNMAN?

12. ¿Imatá ruwanayki tiyan Diosman astawan qayllaykunaykipaj?

¹² Jehovaj testigon jina bautizakunkiña chayqa, maytaña Jehovaman qayllaykunki. Jehovamanta, Jesucristomantawan ashkha imastaña yachakunki, juchasniykimanta arrepientekunkiña, Diospi creesqaykita rikuchinkiña, paypa kamachiykunasninta kasukunaykipajtaj ashkhataña kallpachakunki. Jinapis Diosman astawan qayllaykunanchejpajqa, chay imasta sigue ruwanallanchejpuni tiyan (Col. 2:6).

13. ¿Imastaj yanapawasun Jehovaman astawan qayllaykunapaj?

¹³ ¿Imataj yanapawasun Jehovaman astawan qayllaykunapaj? 1) Bibliata leenallapuni, estudianallapuni. Mana wakin imasllatachu Diosmanta yachananchej tiyan. Jehová imatachus ruwananchejta munan chayta sumajta entiendenanchej tiyan, Palabranpi yuyaychawasqanchejman jina kausakunanchej tiyan (Efe. 5:15-17). 2) Creeyninchejta astawan sinchʼiyachinanchej tiyan, munakuwasqanchejrayku ashkha imasta ruwapuwasqanchejpi tʼukurispa. 3) Jehovaj chejnisqan imasta chejnikunallanchejpuni tiyan, chay imasta ruwajkunawantaj mana masichakunanchejchu tiyan (Sal. 1:1; 101:3).

14. 1 Corintios 10:31 nisqanman jina, ¿imatataj sapa día ruwasunman Jehovata kusichinapaj? (Fotostawan qhawariy).

¹⁴ (1 Corintios 10:31 leey). Imaschus Jehovata kusichin chay imasta ruwanapaj mayta kallpachakunanchej tiyan. Mana predicayllachu, nitaj reunionesman riyllachu bastan. Astawanqa sapa día Jehovata kusichinapaj jina tukuy imata ruwananchej tiyan. Payqa mayta kusikun tukuy imata mana engañaspa ruwajtinchej, kapuwasqanchejmantataj wajkunaman tukuy sonqo qorejtinchej (2 Cor. 8:21; 9:7). Chantapis munan kausayta regalota jina qowasqanchejta mayta valorananchejta. Chayrayku Jehovaman astawan qayllaykunchej mikhunata, ujyanatapis midirikuspa, saludninchejtapis maychus kajllata cuidaspa. Kallpachakuna Jehovata tukuy imapi kusichinapaj, juchʼuy imasta ruwaspapis. Jehovataj chayta rikuspa astawan munakuwasun (Luc. 16:10).

15. ¿Tukuy runaswan imayna kananchejtataj Jehová munan?

¹⁵ Jehovaqa cheqan runaspajpis, mana cheqan runaspajpis kʼacha (Mat. 5:45). Munantaj noqanchejpis tukuywan kʼachas kananchejta. Jehovaqa mana munanchu ‘pipajpis sajrata rimananchejta’, nitaj ‘chʼajwasta maskʼananchejtapis’. Payqa munan ‘tukuy runaswan llampʼu sonqoyojpuni’ kananchejta (Tito 3:2). Chayrayku runas Jehovapi mana creejtinkupis, mana yuyanchejchu paykunamanta nisqa aswan sumaj kasqanchejta (2 Tim. 2:23-25). Tukuywan kʼachaspuni kasun chayqa, Jehovaman astawan qayllaykusun.

PANTASPAPIS JEHOVAMAN QAYLLAYKUYTA ATINCHEJ

16. ¿Imaynataj kasharqa 73 Salmota qhelqaj?

¹⁶ Wakin kuteqa ichapis yuyasunman Jehová niña munakuwasqanchejta. 73 Salmota qhelqajpi piensarinallataj. Payqa llakisqa nerqa: “Noqatajrí casipuni cheqan ñanmanta wistʼuykaporqani. Yaqhapuni lluskʼarqani”, nispa (Sal. 73:2). Payqa Jehovata nerqa: “Sonqoyqa nanasqa kasharqa”, “mana yuyayniyoj karqani”, “ñaupaqeykipeqa mana yuyayniyoj animal jinalla karqani”, nispa (Sal. 73:21, 22). ¿Chaywanpis yuyarqachu pantasqanrayku Jehová niña munakusqanta, nitaj perdonananta?

17. 1) Salmista ni imata ruwayta atinanpaj jina kashajtin, ¿imatá ruwarqa? 2) ¿Imatá salmistaj kausayninmanta yachakunchej? (Fotostawan qhawariy).

¹⁷ Salmista Jehová saqerpasqanta yuyasharqa chayqa, chay rato reparakorqa mana jinachu kasqanta. Niña ni imata ruwayta atinanpaj jina kashajtin, payqa repararqa Jehovaman qayllaykunan kasqanta. Chayrayku nerqa: “Kunanqa Diosníy, mana kacharikuspa qanwan kashani. Qanmin paña makiymanta japʼishawanki. Qanmin yuyaychawaspa pusaykachakuwanki, khuyakuwankitaj”, nispa (Sal. 73:23, 24). Noqanchejpis pantasqanchejrayku llauchʼiyasunman, desanimakusunmantaj. Chay kutispi salmista jinallataj Jehovamanta mana kacharikunachu. Paymanta kallpata mañakuna, payqa Pakakunanchej Chhanka (Sal. 73:26; 94:18). ¿Uj tiempota cheqan ñanmanta wistʼuykapunchej chayrí? Jehovaman kutinpuyta atinchej, payqa ‘perdonanawanchejpaj wakichisqa kashan’ (Sal. 86:5). Ni imata ruwayta atinapaj jina kashajtinchej, astawanraj Diosninchejman qayllaykunanchej tiyan (Sal. 103:13, 14).

WIÑAYPAJ DIOSMAN QAYLLAYKUNA

18. ¿Imaraykutaj Jehovaman qayllaykusqanchej mana tukukuyniyojchu?

¹⁸ Jehovaman qayllaykusqanchejqa mana tukukuyniyojchu, paymanta yachakuytaqa ni jaykʼaj tukusunchu. Bibliaqa nin yachayninpis, imastachus yachasqanpis, ñankunasninpis “mana rejsiy atina” kasqanta (Rom. 11:33).

19. ¿Imatá Salmos aswan qhepamanta niwanchej?

¹⁹ Salmo 79:13 nin: “Noqayku kamachisniyki, pikunatachus michinki chay ovejitasniyki, wiñaypaj pachis nisqayku, wiñaypaj wiñaynintinpaj jatunchasqayku”, nispa. Kaymanta amapuni iskayrayaychu: Jehovaman qayllaykullankipuni chayqa, wiñaypaj bendicionesta japʼinki, ninkitaj: “Diosqa sonqoyta waqaychan, paymin pakakunay chhanka, paymin herenciayqa wiñaypaj wiñaynintinpaj”, nispa (Sal. 73:26).