¿Imajtín Jehovaj sutin Jesuspaj may importante?

1, 2. 1) ¿Imatá Jesús wañuchinanku ñaupaj chʼisin ruwarqa? 2) ¿Imatá kay yachaqanapi qhawarisun?

JUEVES chʼisin karqa, 14 de nisán, 33 wata. Manaña imapischu kasharqa Jesusta wasanchanankupaj, juzganankupaj, juchachanankupaj, ñakʼarichinankupaj, wañuchinankupajtaj. Jesusqa kasukoj apostolesninwan alto pata cuartopi tantasqa kasharqa. Sumaj cenata mikhusqankutawan apostolesninta sumajta kallpachaspa encargaykorqa. Niraj chaymanta puririshajtinkutaj Jesusqa sonqomantapacha orakorqa. Chay orakusqantataj apóstol Juan escriberqa Juan 17 capitulopi.

² Kay yachaqanapi qhawarisun Jesuspa mañakuyninmanta kay iskay imasta yachakuyta atisqanchejta: Chay kutipi, ¿imastaj Jesusta llakichisharqa? Kay jallpʼapi kashajtin, ¿imataj paypaj aswan importante karqa?

“PAYKUNAMAN SUTIYKITA REJSICHERQANI”

3. ¿Imatá Jesús Jehovaj sutinmanta nerqa, chaywan imatá niyta munasharqa? (Juan 17:6, 26).

³ Jesusqa Jehovaman orakushaspa nerqa: “Paykunaman sutiykita rejsicherqani”, nispa. Chayta ruway paypaj may importante kasqanrayku, iskay kutita chayta nerqa (Juan 17:6, 26 leey). ¿Diospa sutinta discipulosninman yachachisqantachu nisharqa? Mana. Paykunaqa judíos kasqankurayku yachallarqanku Diospa sutin Jehová kasqanta. Hebreo Qhelqasqaspipis chay suteqa waranqasta rikhurej. Chanta, ¿imatá niyta munasharqa Diospa sutinta rejsichisqanta nispa? Imaynachus Jehová kasqanta paykunaman yachachisqanta, nisunman munayninta, ruwasqasninta, kʼacha kaykunasnintapis. Paylla ni pi jina Jehovata rejserqa, chayrayku paylla may chhika imasta Jehovamanta yachachiyta aterqa.

4, 5. 1) ¿Imaynapí uj suti mana mayqen suti jinallachu noqanchejpaj kanman? Kikinchariy. 2) ¿Imajtín Jehovaj sutin mana ima suti jinallachu apostolespaj karqa?

⁴ Kaywan kikincharina: Congregacionniykipi uj anciano kanman David sutiyoj, paytaj doctor kanman. Ichapis unayña payta rejsinki. Uj pʼunchaytaj kaymanta jinalla wañuy patapi rikhurinki. Chay rato hermano trabajan chay hospitalman apasunku. Paytaj doctor kasqanrayku wañunaykimanta salvasunki. Chayta ruwasqanrayku, ¿nichu payta astawan munakuwaj? Sutinta sapa uyarispataj yuyarikuwajchá chay jinata salvasusqanta. Davidtaqa manaña congregacionniykimanta ancianota jinallachu qhawawaj, manaqa kausayniykita salvajta jina. Chay kutimantapacha sutenqa manaña mayqen suti jinallachu qanpaj kanman.

⁵ Kikillantaj Jesuspa discipulosninwanpis karqa. Diospa sutin Jehová kasqanta yachaspañapis, imaynachus Jehová kasqanta astawan yachakorqanku. Jesús yachachisqanrayku Jehová suteqa paykunapaj mana ima suti jinallachu karqa. Jesusqa ruwasqanwan, parlasqanwanpis imaynapunichus Tatan kasqanta rejsicherqa. Jesús sumajta yachachisqanta uyarispa, runaswan kʼacha kasqanta rikuspa apostolesqa Jehovata aswan sumajta rejserqanku (Juan 14:9; 17:3).

“QOWASQAYKI SUTIYKIRAYKU”

6. ¿Imatá Jesús niyta munasharqa Jehová payman sutinta qosqanta nispa? (Juan 17:11, 12).

⁶ Jesusqa orakushaspa, discipulosninpaj Jehovamanta mañaporqa: “Qowasqayki sutiykirayku paykunata qhawariy”, nispa (Juan 17:11, 12 leey). Chayrayku, ¿Jehová sutitachu Jesús apanan karqa? Mana. Jesusqa orakushaspa Jehovaj sutinmanta nerqa “sutiykirayku” nispa. Chayrayku Jesusqa mana Jehová sutitachu apayta qallarerqa. Chanta, ¿imatá niyta munasharqa Jehová sutinta qosqanta nispa? Ñaupajtaqa Jesusta Jehová kachamusqanta, Jehovaj sutinpi parlasqanta. Jesusqa Tatanpa sutinpi jamorqa, sutinpitaj milagrosta ruwarqa (Juan 5:43; 10:25). Chantapis Jesuspa sutenqa niyta munan “Jehovamin salvacionqa”. Arí, Jehovaj sutenqa Jesuspa sutinpi kashallantaj.

7. ¿Imajtín Jesús Jehovaj sutinpi parlayta aterqa? Kikinchariy.

⁷ Chayta aswan sumajta entiendenapaj kaywan kikincharina: Presidenteqa uj runata churanman paypa sutinpi parlamunanpaj. Chayrayku chay runaj parlasqanqa presidentej parlasqan jinapuni. Kikillantataj Jehovapis Jesusta kachamorqa sutinpi parlananpaj (Mat. 21:9; Luc. 13:35).

8. ¿Imajtín Jehová nerqa Jesús niraj jallpʼaman jamushajtin ‘sutinpi’ tukuy imata ruwasqanta? (Éxodo 23:20, 21).

⁸ Jehová Jesusta churarqa sutinpi angeleswan, runaswanpis parlananpaj, kamachiykunatapis qonanpaj. Chayrayku Bibliapi nin Jesusqa Palabra kasqanta (Juan 1:1-3). Israelitasta chʼin jallpʼapi pusananpaj, jarkʼananpajpis Jehová kacharqa chay angelqa ichapis Jesús karqa. ¿Imajtín chay angelta kasukunanku karqa? Jehovallataj nerqa “sutiypi chay imasta ruwanqa” nispa (Éxodo 23:20, 21 leey).a Chayta nerqa paypa ‘sutinpi’ Jesús parlasqanrayku. Chantapis Jesuslla sutʼinchayta atin Jehová tukuy imata cheqanta ruwasqanta, santotaj kasqanta.

“TATÁY, SUTIYKITA JATUNCHAY”

9. ¿Imaynapí yachanchej Jehovaj sutin Jesuspaj may importante kasqanta?

⁹ Qhawanchej jina, Jesús niraj kay jallpʼaman jamushajtin, Jehovaj sutenqa paypaj may importanteñapuni karqa. Kay jallpʼapiña kashaspataj, tukuy ima ruwasqanwan rikucherqa Jehovaj sutin paypaj may importantellapuni kasqanta. Kay jallpʼapi willayninta tukushaspaña, Jesusqa Jehovamanta mañakorqa: “Tatáy, sutiykita jatunchay”, nispa. Chay ratopachataj Tatanqa cielomantapacha jatunmanta kutichimorqa: “Jatunchaniña, watejmantapis jatunchallasajtaj”, nispa (Juan 12:28).

10, 11. 1) ¿Imaynatá Jesús Jehovaj sutinta jatuncharqa? (Dibujotawan qhawariy). 2) ¿Imajtintaj Jehovaj sutin jatunchasqa, llimphuchasqataj kanan tiyan?

¹⁰ Jesusqa Tatanpa sutinta jatunchallarqataj. ¿Imaynatá chayta ruwarqa? Wajkunaman Jehovaj kʼacha kaykunasninmanta, sumaj imasta ruwasqanmantapis willarispa. Jinapis mana chayllatachu ruwarqa Jehovaj sutinta jatunchananpaj. Payqa sutʼita rikuchinan karqa Jehová tukuy imata cheqanta ruwasqanta, sutinpis llimphuchasqa kanan kasqanta.b Jesusqa chayta ruwakunan may importante kasqanta rikucherqa discipulosninman orakuyta yachachishajtin. Pay nerqa: “Cielopi kashaj Tatayku, sutiyki jatunchasqa kachun [chayri santopaj qhawasqa kachun]”, nispa (Mat. 6:9, sutʼinchaynin).

¹¹ ¿Imajtintaj Jehovaj sutin jatunchasqa, llimphuchasqataj kanan tiyan? Imaraykuchus Satanasqa Edén huertapi Jehová Diosmanta llullasta parlarqa, llulla kasqanta nerqa. Adanta, Evatawan allin imasmanta jarkʼashasqanta nerqa (Gén. 3:1-5). Chaywan Diabloqa niyta munallarqataj Jehovaqa mana imatapis cheqantachu ruwasqanta. Satanás chay jinata llullakusqanrayku runasqa yuyankuman karqa Jehová sajra kasqanta. Chaymanta Jobpa tiemponpi Satanasqa nerqa tukuypis interesraykulla Jehovata sirvisqanchejta. Chantapis llullakuspa nerqa ni pi runapis sonqomantapacha Jehovata munakusqanta. Chayrayku ima pruebas kajtinpis manaña payta sirvinankuta (Job 1:9-11; 2:4). Tiempowan yachakunman karqa Jehovachus Satanaschus llullakushasqanta.

“KAUSAYNIYTA QONI”

12. ¿Imatá Jesús ruwarqa Jehovaj sutinta munakusqanrayku?

¹² Jesusqa Tatanta mayta munakusqanrayku, tukuy imata ruwayta munarqa sutinta jatunchananpaj, llimphuchananpaj ima. Chayrayku nerqa: “Kausayniyta qoni”, nispa (Juan 10:17, 18). Arí, Jehovaj sutinrayku Jesusqa ni wañuytapis manchachikorqachu.c Adanwan Evawanqa kay jallpʼapi mana pantayniyoj ruwasqa karqanku, jinapis Jehovata wasancharqanku, Satanaspa ladonmantataj churakorqanku. Jesustajrí tukuy sonqo kay jallpʼaman jamuspa, tukuy kausayninpi Jehovata kasukusqanwan mayta munakusqanta rikucherqa (Heb. 4:15; 5:7-10). Jehovata tukuy sonqo kasukullarqapuni ñakʼarina kʼaspipi wañuchinankukama (Heb. 12:2). Ajinamanta Jehovata, sutintapis munakusqanta rikucherqa.

13. ¿Imaraykú Jesús ni pi jina sutʼita rikucherqa Satanás llulla kasqanta? (Dibujotawan qhawariy).

¹³ Kausayninpi tukuy ima ruwasqanwan Jesusqa rikucherqa Satanasmá llulla kasqanta, mana Jehovachu (Juan 8:44). Jesusqa ni pi jina Jehovata astawan rejsin. Chayrayku sichus Satanás Jehovaj contranpi tukuy ima parlasqanmanta imallapis cierto kanman karqa chayqa, Jesusqa yachanman karqa. Chaywanpis Jesusqa Jehovaj sutin mana chʼichichasqa kananpaj tukuy imata ruwarqa. Jehovaj saqerparisqan jina rikhurispapis Jesusqa mana munasqa Tatanta wasancharqachu, astawanpis wañuchinankuta ajllakorqa (Mat. 27:46).d

‘QOWASQAYKI RUWANATA TUKUCHANI’

14. ¿Imaynatá Jehová Jesusman pagaporqa tukuy sonqo kasukusqanrayku?

¹⁴ Wañupunan ñaupaj chʼisi Jesusqa Jehovamanta mañakuspa nerqa: ‘Qowasqayki ruwanata tukuchani’, nispa. Tukuy sonqo kasukusqanrayku Jehová pagapunanta yacharqa (Juan 17:4, 5). Jehovataj chaytapuni ruwarqa, mana wañusqata saqerparerqachu (Hech. 2:23, 24). Jesusta kausarichimuspa cielopi karqa chaymanta aswan pataman churarqa (Fili. 2:8, 9). Ashkha watasninmantaj Jesusqa Rey jina Diospa Gobiernonpi kamachiyta qallarerqa. Chantá, ¿imatá chay Gobierno ruwanqa? Jesusqa chayta sutʼincharqa Jehovamanta kayta mañakunanchejta yachachishaspa: “Gobiernoyki jamuchun. Munayniykitaj ruwasqa kachun, imaynachus cielopi, ajinallatataj kay jallpʼapipis” (Mat. 6:10).

15. ¿Imatawán Jesús ruwallanqataj?

¹⁵ Tumpamantawan Jesusqa Diospa enemigosninwan maqanakonqa, sajra runastataj Armagedonpi tukuchenqa (Apo. 16:14, 16; 19:11-16). Chaymantataj ‘chinkay ukhuman’ Satanasta wijchʼuykonqa. Chaypitaj Satanasqa ni imata ruwayta atispa wisqʼasqa jina kanqa (Apo. 20:1-3). Chantá Jesusqa waranqa watasta kamachiyta qallarenqa. Chaypitaj kay jallpʼaman allin kausayta apamonqa, runastapis yanapanqa mana pantayniyojman tukunankupaj. Wañusqasta kausarichimonqa, jallpʼantintataj paraisoman tukuchenqa. Ajinamanta Jehovaj munaynin juntʼakonqa (Apo. 21:1-4).

16. ¿Imaynataj kausay kanqa Jesús waranqa watasta kamachiyta tukojtin?

¹⁶ ¿Imaynataj kausay kanqa Jesús waranqa watasta kamachiyta tukojtin? Juchapis pantaypis manaña kanqachu. Runasqa manaña necesitasunchu Jesuspa wañuyninwan yanapachikuspa perdonta mañakuyta. Jehovaman qayllaykunanchejpajqa manaña necesitasunchu 144.000 ajllasqa sacerdotesninchejta, nillajtaj Kuraj kaj Sacerdotenchej Jesustapis. ‘Qhepa kaj enemigo wañuypis’ chinkachisqallataj kanqa. Wañusqasqa kausarichisqaña kanqanku. Kay jallpʼapi tukuy tiyakojkunaqa mana pantayniyoj kanqanku (1 Cor. 15:25, 26).

17, 18. 1) ¿Imataj kanqa Jesús waranqa watasta kamachiyta tukojtin? 2) ¿Imatá Jesús ruwanqa kamachiyta tukojtin? (1 Corintios 15:24, 28; dibujotawan qhawariy).

¹⁷ ¿Imataj kallanqataj Jesús waranqa watasta kamachiyta tukojtin? Niña ni jaykʼaj ni pipis iskayrayanqachu Jehová santo, cheqan Dios kasqanmanta. Chaytaj may sumajpuni kanqa. ¿Imajtin? Satanasqa Edén huertapi nerqa Jehová llulla kasqanta, mana allin kamachejchu kasqanta, runastapis mana munakusqanta. Jinapis chay kutimantapacha Jehovaj sutenqa jatunchasqa karqa, kamachisnenqa kutin kutinta rikucherqanku Jehovaqa tukuy imata allintapuni ruwasqanta. Jesús waranqa watasta kamachiyta tukojtintaj, Jehovaj sutenqa llimphuchasqamantapis llimphuchasqa kanqa. Tatanchej Jehovaqa sutʼita rikuchenqa maytapuni munakuwasqanchejta.

¹⁸ Ajinamanta tukuy yachanqanku Satanasqa Jehovamanta llullasllata parlasqanta. ¿Imatá Jesús ruwanqa kamachiyta tukojtin? ¿Satanás jinachu Jehovaj contranpi oqharikonqa? Mana, ni imarayku (1 Corintios 15:24, 28 leey). Payqa mana Satanás jinachu. Jesusqa Tatanman Gobiernota kutichiponqa, paypa makinmantaj churakonqa. Chaytataj tukuy sonqo ruwanqa Jehovata munakusqanrayku.

19. ¿Imaynatá Jesús Jehovaj sutinta qhawan?

¹⁹ Chayraykuchá Jehovaqa Wawanman sutinta qollarqa sutinpi imatapis ruwananpaj. Jesustaj sumajta chayta ruwarqa. Chayrayku, ¿imaynatá Jesús Jehovaj sutinta qhawan? Paypajqa imamantapis aswan importante. Jehovaj sutinrayku wañuyta ajllakorqa, waranqa watasta kamachiyta tukojtintaj Jehovaman tukuy imata kutichiponqa, tukuy sonqo. ¿Imaynatá Jesús jina ruwasunman? Qhepan yachaqanapi chayta yachakusun.