¿Imajtín Jehovaj sutin noqanchejpaj may importante?

1, 2. ¿Imaynatá yachanchej Jehovaj sutinpuni Jesuspaj aswan importante kasqanta?

JESUSPAJQA imamantapis Jehovaj sutinpuni aswan importante. Payqa ni pi jina Tatanpa sutinta allinpaj qhawachin. Ñaupaj yachaqanapi yachakorqanchej jina, Jesusqa Jehovaj sutinrayku wañuyta ajllakorqa, ajinamanta rikuchinanpaj Jehová santo kasqanta, tukuy imatataj cheqantapuni ruwasqanta (Mar. 14:36; Heb. 10:7-9). Waranqa watasta kamachiyta tukuspataj, Jehovaj sutinta jatunchananpaj tukuy atiyninta payman kutichiponqa, tukuy sonqo (1 Cor. 15:26-28). Jehovaj sutinrayku imastachus Jesús ruwasqanqa, sutʼita rikuchin Tatanta manchaytapuni munakusqanta.

² Jesusqa Tatanpa sutinpi jallpʼaman jamorqa (Juan 5:43; 12:13). Discipulosninman Tatanpa sutinta rejsicherqa (Juan 17:6, 26). Jehovaj sutinpi yachacherqa, milagrostapis ruwarqa (Juan 10:25). Orakushaspataj discipulosninpaj Jehovamanta mañaporqa: “Sutiykirayku paykunata qhawariy”, nispa (Juan 17:11). Chayrayku sichus Jehovaj sutin Jesuspaj chay jina importantepuni chayqa, ¿imaynatataj pipis cristiano kani nishaspa Jehovaj sutinta mana yachanmanchu, nitaj oqharinmanchuri?

3. ¿Imatá kay yachaqanapi yachakusun?

³ Cheqa cristianosqa Jesús jinapuni tukuy imata ruwanapaj kallpachakunchej. Chayrayku Tatanpa sutenqa noqanchejpajpis manchay importantellataj (1 Ped. 2:21). Kay yachaqanapi yachakusun ‘Diospa Gobiernonmanta sumaj willaykunata’ willajkunaqa, Jehovaj sutinta apasqankuta (Mat. 24:14). Chantapis yachakullasuntaj Jehovaj sutin may jina importantepunichus sapa ujninchejpaj kanan kasqanta.

‘UJ LLAJTATA AJLLAKUN, PAYPA SUTINTA APANANKUPAJ’

4. 1) ¿Imatá Jesús discipulosninta nerqa niraj cieloman kutipushaspa? 2) ¿Ima tapuytataj sutʼinchasun?

⁴ Niraj cieloman kutipushaspa Jesús discipulosninta nerqa: “Espíritu santo qankunaman jamojtin atiyta japʼinkichej, noqamantataj testigos jina willankichej Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi”, nispa (Hech. 1:8). Chayrayku sumaj willaykunaqa mana Israelllapichu willakunan karqa, tiempowanqa tukuy nacionesmanta runas Jesuspa discipulosninman tukuyta atinkuman karqa (Mat. 28:19, 20). “Noqamantataj testigos jina willankichej” nisqanwan, ¿imatá Jesús niyta munasharqa? ¿Chaywan nisharqachu mosoj discípulos Jesuspa testigosnillan kanankuta chayri Jehovaj sutintawanchu yachananku karqa? Hechos 15 capítulo chayta kutichinapaj yanapawasun.

5. ¿Imaynatá apóstoles, Jerusalenmanta ancianospis rikucherqanku Jehovaj sutinta tukuy runas rejsinanku kasqanta? (Dibujotawan qhawariy).

⁵ 49 watapi, apostoleswan Jerusalenmanta ancianoswan tantakorqanku, mana judío kajkuna cristianoman tukunankupaj imastachus ruwanankumanta parlanankupaj. Parlayta tukushajtinkutaj Jesuspa hermanastron Santiago nerqa: “Symeonqa [Pedroqa] sutʼita willawanchej imaynatachus Diosqa nacionesmanta kajkunatapis khuyakusqanta, paykuna ukhumantataj uj llajtata ajllakusqanta, paypa sutinta apanankupaj”, nispa. ¿Pejpa sutintataj apananku karqa? Santiagollataj profeta Amospa qhelqasqanta oqharispa nerqa: “Ajinamanta chaypi qhepakoj runasqa noqa Jehová Diosta mayta maskʼanawankupaj, tukuy nacionesmanta runaswan khuska, pikunachus sutiyta apanku chaykunawan. Noqa Jehová Diosmin chaytaqa nini”, nispa (Hech. 15:14-18). Chayrayku mosoj discipulosqa mana Jehovamanta yachakunallankuchu karqa, ‘sutintapis apanallankutaj’ karqa, nisunman chay sutiwan rejsisqa kananku karqa, chay sutitapis rejsichinanku karqa.

6, 7. 1) ¿Imaraykutaj Jesús kay jallpʼaman jamorqa? 2) ¿Imapitaj Jesús kay jallpʼaman jamuspa ni pi jina yanapakorqa?

⁶ Yuyarikuna, Jesuspa sutenqa niyta munan “Jehovamin salvacionqa”. Ajinapunitaj karqa, Jehovaqa Jesusmanta valekorqa tukuy creeyniyojkunata salvananpaj. Jesusqa kay jallpʼaman jamorqa kausayninta noqanchejrayku qonanpaj (Mat. 20:28). Kausayninta qosqanrayku, tukuy atinkuman juchasninkumanta perdonasqa kayta, wiñaypaj kausakuytapis (Juan 3:16).

⁷ ¿Imaraykutaj runas kacharichisqa kayta necesitarqanchej? Edén huertapi imaschus pasasqanrayku. Ñaupaj yachaqanapi yachakorqanchej jina ñaupa tatasninchej Adanwan Evawan Jehovaj contranpi oqharikorqanku, wiñaypaj kausakuyta atisqankutataj pierderqanku (Gén. 3:6, 24). Chayrayku Jesusqa kay jallpʼaman jamorqa Adanpata Evajtawan mirayninkuta salvananpaj. Jinapis mana chayraykullachu jamorqa. ¿Imataj aswan importante karqa? Yuyarikuna, Satanasqa Jehovaj contranta llullasta parlarqa (Gén. 3:4, 5). Chayrayku aswan importante karqa Jehovaj sutin jatunchasqa kanan. Jesusqa yacharqa Jehovaj sutin jatunchasqa kajtin runasqa salvasqa kanankuta. Payqa Tatanpa sutinpi jamorqa, sutintataj sumajta aparqa. Chayrayku Jehovaj sutin jatunchasqa kananpaj ni pi jina yanapakorqa.

8. ¿Imatataj reconocenanku karqa Jesuspa discipulosninman tukojkuna?

⁸ Tukuy Jesuspa discipulosninman tukojkunaqa judiospis mana judiospis reconocenanku karqa Jesuspa Tatan Jehovanejta salvakuyta atisqankuta (Juan 17:3). Chantapis Jesús jinallataj Diospa sutinta apananku karqa, reparanankutaj karqa Jehovaj sutin may importante kasqanta. Salvakunankoqa chaymanta kasharqa (Hech. 2:21, 22). Chayrayku Jesuspa tukuynin kasukoj discipulosnenqa yachakunanku karqa Jehovamanta, Jesusmantapis. Chayraykuchá Jesusqa Juan 17 capitulopi mañakuyninta kay jinata tukucharqa: “Paykunaman sutiykita rejsicherqani, rejsichillasajpunitaj, imaynatachus qan munakuwarqanki ajinata paykunapis wajkunata munakunankupaj, ajinamanta noqapis paykunawan ujchasqa kanaypaj”, nispa (Juan 17:26).

“QANKUNA TESTIGOSNIY KANKICHEJ”

9. ¿Imaynatá rikuchisunman Jehovaj sutin noqanchejpaj may importante kasqanta?

⁹ Yachakunchej jina, Jehovaj sutin jatunchasqa kananpuni tukuy cristianospaj may importante kanan tiyan (Mat. 6:9, 10). Noqanchejpajqa Jehovaj sutinpuni ima sutimantapis aswan patapi kashan. Ajinata sutinta qhawasqanchejtataj kausayninchejpi rikuchinchej. ¿Imatá ruwasunman Jehovaj sutinta jatunchanapaj, Satanás Jehovamanta llullasllata parlasqanta rikuchinapajpis?

10. ¿Ima juiciomantataj parlan Isaías 42 al 44 capitulospi? (Isaías 43:9; 44:7-9; fotostawan qhawariy).

¹⁰ Isaías 42 al 44 capitulospi sutʼinchan Jehovaj sutin jatunchasqa kananpaj imatachus ruwayta atisqanchejta. Chay capitulospi uj juicio ruwakusqanta nin, pichus cheqa Dios kasqanta yachakunanpaj. Chaypi Jehovaqa dioses kajkunata nin diosespuni kasqankuta sutʼinchanankuta. Jehová nillantaj testigosninkuta pusamunankuta cheqanta parlashasqankuta sutʼinchanankupaj. Ni mayqenninkutaj chayta ruwayta atinkuchu (Isaías 43:9; 44:7-9 leey).

11. ¿Imatataj Jehová kamachisninman nin Isaías 43:10-12 versiculospi?

¹¹ (Isaías 43:10-12 leey). Jehová kamachisninta nin: “Qankuna testigosniy kankichej”, “noqataj Dios kani”, nispa. Chantá kay tapuyta kutichinankuta nin: “¿Kanchu noqamanta waj Diosqa?”, nispa (Isa. 44:8). Chay tapuyman tukuyninchej kutichiyta atisqanchejqa may sumajpuni. Parlasqanchejwan ruwasqanchejwan sutʼita rikuchinchej Jehovalla cheqan Dios kasqanta, sutintaj ima sutimanta nisqapis aswan patapi kashasqanta. Imaynatachus kausasqanchejwan rikuchinchej Jehovata tukuy sonqo munakusqanchejta, tukuy sonqo kasukusqanchejtapis, Satanás jatuchaj pruebaspi churawajtinchejpis. Ajinamanta Jehovaj sutinta jatunchayta atinchej.

12. ¿Imaynatá Isaías 40:3, 5 versiculosmanta profecía juntʼakorqa?

¹² Jehovaj sutinta jatunchaspa Jesucristo jinallataj ruwashanchej. Profeta Isaías nillarqataj pichá “Jehová Diospa ñanninta” ‘pichananta’ chayri ‘allinchananta’ (Isa. 40:3, sutʼinchaynin). ¿Imaynatá chay profecía juntʼakorqa? Juan Bautista Jesuspaj ñanta allincharqa, Jesustaj Jehovaj sutinpi jamorqa, Jehovaj sutinpitaj parlarqa (Mat. 3:3; Mar. 1:2-4; Luc. 3:3-6). Isaías nillarqataj: “Jehová Diospa jatun kaynenqa rikukonqa”, nispa (Isa. 40:5). ¿Imaynatá chay juntʼakorqa? Jesusqa kay jallpʼaman jamuspa Jehovaj kachamusqan jinapuni tukuy imata ruwarqa, Jehovapunipis kay jallpʼaman jamunman jina (Juan 12:45).

13. ¿Imaynatá Jesús jina ruwasunman?

¹³ Jesús jinallataj Jehovaj testigosnin kanchej, Jehovaj sutinta apanchej, tukuy runasmantaj willarinchej Jehová tʼukuna imasta ruwasqanta. Jinapis Jehovaj sumaj testigosnin kanapajqa, runasman willarinallanchejtaj tiyan Jehovaj sutinta jatunchananpaj imastachus Jesús ruwasqanta, imastachus ruwanantapis (Hech. 1:8). Jehovaj aswan sumaj testigonqa Jesuspuni, noqanchejtaj Jesús jinallataj ruwanchej (Apo. 1:5). Chaywanpis, ¿imaynatá rikuchisunman Jehovaj sutinpuni noqanchejpaj may importante kasqanta?

JEHOVAJ SUTIN NOQANCHEJPAJ MAY IMPORTANTE KASQANTA RIKUCHINA

14. Salmo 105:3 nisqanman jina, ¿imata ruwanapajtaj sonqonchej aysawanchej?

¹⁴ Jehovaj sutinmanta tukuy sonqo parlanchej (Salmo 105:3 leey). Jehovaqa manchayta kusikun sutinmanta mana pʼenqakuspa parlajtinchej (Jer. 9:23, 24; 1 Cor. 1:31; 2 Cor. 10:17). Jehovamanta ‘tukuy sonqo parlay’ niyta munan Diosninchej kasqanmanta kusiywan umata oqhariy. Noqanchejpajqa mana imapis aswan sumaj kanmanchu Jehovaj sutinta jatunchanamanta, sutin llimphuchasqa kananpaj yanapakuymantapis. Ni jaykʼaj pʼenqakunachu tiyan Jehovaj testigosnin jina rejsichikuyta trabajopi, escuelapi, llajtanchejpi chayri tiyakunchej chaypi. Diabloqa munan manaña Jehovaj sutinta rejsichinanchejta (Jer. 11:21; Apo. 12:17). Paypis llulla profetasninpis munanku runas Jehovaj sutinmanta qonqapunankuta (Jer. 23:26, 27). Noqanchejtajrí Jehovaj sutinta maytapuni munakusqanchejrayku “tuta pʼunchay” payta jatunchanchej (Sal. 5:11; 89:16).

15. ¿Ima niytá munan Jehovaj sutinta oqhariy?

¹⁵ Jehovaj sutinta oqharillanchejpuni (Joel 2:32; Rom. 10:13, 14). Jehovaj sutinta oqhareyqa mana Diospa sutinta yachayllachu, nitaj chay sutita oqhariyllachu. Astawanqa niyta munan imayna Dioschus kasqanta yachay, paypi atienekuy, yanapata, yachaytapis paymanta mañakuy (Sal. 20:7; 99:6; 116:4; 145:18). Niyta munallantaj sutinta, kʼacha kaykunasnintapis runasman willay. Chantapis runasta yanapananchej tiyan arrepientekunankupaj, kausayninkutapis cambianankupaj, ajinamanta Jehovaj ñaupaqenpi allinpaj qhawasqa kayta atinankupaj (Isa. 12:4; Hech. 2:21, 38).

16. ¿Imaynatá rikuchisunman Satanás llulla kasqanta?

¹⁶ Jehovaj sutinrayku ñakʼariyta mana manchachikunchejchu (Sant. 5:10, 11). Sufrispapis Jehovata tukuy sonqo kasukunchej chayqa, rikuchinchej Satanás llulla kasqanta. Jobpa tiemponpi Satanasqa Jehovaj tukuy kamachisninmanta kayta nerqa: ‘Runaqa kausananraykoqa imatapis qonanpaj jinalla’, nispa (Job 2:4). Waj parlaypi nisharqa tukuy imapi allin rejtillan runas Jehovata sirvinankuta, mana allin rejtintaj saqerparinankuta. Jobqa tukuy sonqo kasukusqanwan rikucherqa chay nisqanqa llulla kasqanta. Noqanchejpis Job jinallataj, ni jaykʼaj Jehovata wasanchasunchu Satanás ima pruebamanpis churawajtinchej. Ni imarayku iskayrayanchejchu Jehovaqa sutinrayku siga cuidanawanchejmanta (Juan 17:11).

17. 1 Pedro 2:12 nisqanman jina, ¿imaynamantá Jehovaj sutinta jatunchallasunmantaj?

¹⁷ Jehovaj sutinta respetasqanchejta rikuchinchej (Pro. 30:9; Jer. 7:8-11). Jehovaj sutinpi parlasqanchejrayku, sutintataj apasqanchejrayku, imaynatachus kausasqanchejwan jatunchasunman chayri pisipaj qhawachisunman (1 Pedro 2:12 leey). Chayrayku mayta kallpachakunchej parlasqanchejwan, ruwasqanchejwanpis Jehovata jatunchanapaj. Ajinamanta pantaj runas kajtinchejpis Diospa sutinta jatunchanchej.

18. ¿Imaynatá rikuchillanchejtaj Jehovaj sutin noqanchejpaj may importante kasqanta? (Sutʼinchaynintawan qhawariy).

¹⁸ Allinpaj qhawachikunanchejmantaqa Jehovaj sutintapuni jatunchanchej (Sal. 138:2). Jehovaj sutinta munakusqanchejrayku kusichisqan imastapuni ruwanchej. Chayrayku runas wakin kutis burlakuwanchej, qhawarawanchej ima.a Jesusqa suwata jina wañuchinankuta saqellarqa Tatanpa sutin jatunchasqa kananrayku. Chayta ruwarqa “mana pʼenqakuspa”, nisunman mana anchata llakikorqachu runas paymanta imatachus ninankumanta (Heb. 12:2-4). Astawan llakikorqa Tatanpa munayninta ruwananmanta (Mat. 26:39).

19. ¿Imaynatá Jehovaj sutinta qhawanki, chanta imarayku?

¹⁹ Umata oqharinchej Jehovata sirvisqanchejmanta, maytataj kusikunchej Jehovaj testigosnin kasqanchejmanta. Chayrayku mana llakikunchejchu wajkuna burlakuwajtinchej chayri qhawarawajtinchej. Noqanchejpajqa Jehovaj sutin aswan importante, nitaj runaswan allinpaj qhawachikuychu. Chayrayku Jehovaj sutinta jatunchallaytapuni munanchej Satanás imanawajtinchejpis. Ajinamanta Jesús jinallataj rikuchisun Jehovaj sutinpuni noqanchejpaj aswan importante kasqanta.