Mundial apakusqan, ¿runasta ujchanmanpunichu? | ¿Imatá Biblia nin?

Kay 2022 watapeqa 20 de noviembremanta 18 de diciembrekama, FIFA nisqa wakichin chay Copa Mundialta 5 mil millones runas jina qhawashanku. Ashkha runasqa yuyanku chay jina pujllaykuna runasta sumajta ujchasqanta.

•  Sudafricamanta expresidente Nelson Mandela nerqa: “Deporteta ruwayqa mundontinmanta runasta cambianman, runasta yuyaychanman imatapis sumajta ruwanankupaj, ni ima jinataj runasta sumajta ujchanman”, nispa.

•  FIFAa nisqamanta presidente Gianni Infantino nerqa: “Futbolqa [...] runasta ujchan suyakuypi, kusiypi, uj imata mayta munaypi, munakuypi, waj rijchʼayniyoj kaspapis uj imallata ruwayta munaypi ima”, nispa.

Mundialpi futbolta pujllasqanku chayri waj deportes, ¿runasta ujchanmanpunichu? ¿Atisunmanchu allinta, ujchasqastaj kausakuyta?

¿Runasta ujchanmanpunichu?

Kay wata mundialpeqa mana futbolllamantachu parlakushan. Kay mundial kasqanrayku runaspis politicospis astawan parlashanku runaspa derechosninkumanta, runapura rijchʼayninkurayku qhawanakuy kasqanmanta, wakillan ashkha qolqeyoj kasqankumanta ima.

Ajinapis ashkha runasqa yuyanku kay mundial jina waj deportespis runasta kusichisqanta. Jinapis deportesqa mana runas munasqankuman jinapunichu runasta ujchan, manaqa chay ujchasqan uj ratollapaj. Astawanpis deportesqa runas imatachus yuyasqankuta, imaynachus kasqankutapis sutʼiman orqhon, chaytaj runasta tʼaqanachin. Bibliatajrí nerqaña runas imaynachus kay ‘qhepa pʼunchaykunapi’ kanankuta (2 Timoteo 3:1-5).

¿Imataj tukuy runasta cheqamanta ujchanqa?

Bibliaqa willawanchej mundontinmanta runas ujchasqa kanankuta. Niwanchejtaj ‘Diospa Gobiernon’ cielomanta kamachimushajtin tukuy runas kay jallpʼapi ujchasqa khuska tiyakunankuta (Lucas 4:43; Mateo 6:10).

Diospa Gobiernonmanta Reyqa Jesucristo kanqa, paytaj kay jallpʼaman allin kausayta apamonqa. Biblia nin:

• “Cheqan runas tʼikarenqanku. Allin kausaytaj wiñaypaj kanqa” (Salmo 72:7).

• “Pay pobresta salvanqa yanapata mañakuspa qhaparikojtinku. [...] Paykunataqa ñakʼarichej runasmanta, sajra runasmantawan salvanqa” (Salmo 72:12, 14).

Jesuspa yachachisqanqa kay tiempopiña 239 suyuspi, llajtaspi ima may chhika runasta ujchashan, mana chejninakunankupajtaj yanapashan. Chaymanta astawan yachakunaykipaj “Amaña chejninakunachu” nisqa yachaqanata leeriy.