4 YACHAQANA
Payqa tatanta, Jehovata ima kusicherqa
¿Imatá Jefté Jehovaman nishan?
Jeftej wawanqa mana atinapaj jina kajtinpis, tatanpa nisqanta juntʼarqa
¿Pitaj kay dibujopi rikhurej imillita wawáy?... Bibliapeqa paypa sutin mana rikhurinchu. Chaywanpis tatanqa Jefté sutikorqa. Paypa ruwasqanqa Jehovata, Jefteta ima mayta kusicherqa. Jeftemanta wawanmanta ima, ¿astawan yachayta munawajchu?
Jefteqa kʼacha runa karqa. Imillitanmanpis Jehovamanta mayta yachacherqa. Chantapis wapu runa karqa, Israel llajtatapis imaynatachus yanapananta sumajta yacharqa. Chayrayku israelitasqa, enemigosninkuwan maqanakuypi kamachejninku kananta mañakorqanku.
Jefteqa chay maqanakuypi atipanankupaj, Jehovaj yanapayninta mañakorqa. Atipasparí, ¿imata ruwanantataj nerqa? Kutipojtin pichá wasinmanta ñaupajta taripaj llojsimojta Jehovaman qopunanta. ¿Imapaj? Dioswan tinkukuna toldopi llankʼananpaj, wañupunankama chaynejpi tiyananpajtaj. Runasqa chay lugarpi Jehovata yupaychaj kanku. ¿Jefté maqanakuypi atiparqachu? Arí. Wasinman kutipojtin, ¿pitaj ñaupajta taripaj llojsimorqa?...
¡Arí, wawan llojsimorqa! Paylla wawanqa karqa. Paytataj Dioswan tinkukuna toldonman kachanan karqa. Chayqa ¡mayta llakicherqa! Chaywanpis, Jefteqa, imatachus ruwananta Jehovaman nerqaña. Chayrayku wawanqa jinata nerqa: “Tatáy, noqamanta Jehovaman imatachus nisqaykitaqa juntʼallay”, nispa.
Amigasnenqa sapa wata Jeftej wawanta waturikoj rej kanku
Paypis llakisqallataj kasharqa. Imaraykuchus Dioswan tinkukuna toldopi sirvispaqa, mana casarakuyta, nitaj wawasniyoj kayta atinmanchu karqa. Chaywanpis, tatanpa nisqanta juntʼayta, Jehovatataj kusichiyta munarqa. Paypajqa chay aswan sumaj karqa, casarakuymanta chayri wawasniyoj kaymanta nisqaqa. Chayrayku wasinmanta riporqa, Dioswan tinkukuna toldonpitaj wañupunankama llankʼarqa.
¿Chayta ruwaspa Jehovata, Jefteta ima kusicherqachu?... ¡Arí! Qanpis Jehovata kasukunki, munakunkitaj chayqa, tatasniykita, Jehovata ima kusichinki.