Jefté nisqanta juntʼan

Israelitasqa Jehová Diosmanta karunchakuspa watejmanta llulla diosesta yupaycharqanku. Jinapis chay dioskunaqa mana paykunata yanaparqankuchu ammonitas paykunawan maqanakoj rejtinku. Chayrayku israelitasqa ashkha watasta sufrerqanku. Chay qhepatataj, Jehová Diosman nerqanku: “Noqaykoqa juchallikuyku. Ama jina kaspa enemigosniykumanta salvallawayku ari”, nispa. Chantá israelitasqa santosninkuta phiriytawan watejmanta Jehová Diosta yupaycharqanku. Diostaj paykunamanta khuyakorqa.

Israelitasqa niraj ammonitaswan maqanakushaspa, Jefteta ajllarqanku paykunata maqanakupi ñaupajman pusananpaj. Jefteqa Jehová Diosman nerqa: “Sichus atipanaykupaj yanapawasqayku chayqa, pichus ñaupajta wasiymanta taripawaj llojsimonqa chayta qopusqayki”, nispa. Jehová Diostaj chay mañakusqanta uyarerqa, maqanakupi atipananpajtaj yanaparqa.

Jefté wasinman kutejtintaj, warmi wawan tususpa, panderetata tocarispa ima, payta taripaj llojsimorqa. Pay sapallan wawan karqa. Jeftetaj Jehová Diosman nisqanta mana qonqarqachu. Chayrayku wawanman nerqa: “Ay wawáy, qannejta jatun llakiypi rikhurini. Juraspa Jehová Diosman nerqani pichus ñaupajta wasiymanta taripawaj llojsimonqa chayta qonayta. Chayta juntʼanaypajtaj, Diosta yupaychana toldoman kachasunay tiyan, mayqenchus Silopi kashan chayman”, nispa. Wawantaj nerqa: “Tatáy, Jehová Diosman imatachus nisqaykitaqa ruwallay. Chaywanpis mañarikuyki kachanawaykita iskay killapaj orqosninta amigasniywan puriykacharimunaypaj. Chanta risaj Diosta yupaychana toldoman”, nispa. Jeftej wawanqa nisqanta juntʼarqa, wañupunankamataj Diosta yupaychana toldopi sirverqa. Amigasnintaj sapa wata Siloman rej kanku watukoj.