Wawasta yachachinapaq
May munasqa sipasita
MAY munasqa sipasitamanta parlarina. Payqa Jeftep wawan. Bibliaqa mana sutinta willawanchikchu, chaywanpis kawsayninmanta willawanchik. Jeftep kawsayninmanta, wawanmanta ima parlarina. Kay sipasitata Jehová, amigasnin ima, mayta munakusqankuta yachakunki.
Jueces libropi 11 tʼaqapi paykunamanta qillqasqa kachkan. Jefté Diosta sirvisqanrayku, Diospa Palabranta wawanwan khuska ñawirillaqpunichá, Jehová, israelita tatasta kamachisqanmanjina.
Israelitasqa chay wataspi mana kamachiqniyuq karqanku. Chayrayku chʼampaykunapi kachkarqanku, juk kamachiqtataq necesitarqanku. Amonitasqa paykunawan maqanakuyta munarqanku. Jefteqa maqanakunapaq kallpayuq, wapu runataq karqa, chayrayku israelitasqa yanapayninta mañakurqanku.
Jefté maqanakupi atipanankupaq Diospa yanapayninta munarqa, chayrayku juk tratota ruwarqa. Sichus amonitasta atipanaykupaq yanapawasqayku chayqa, ñawpaqta wasiymanta taripawaq lluqsimuqta qamta sirvisunanpaq qupusqayki, nispa. Ñawpaqta lluqsimuqqa Diospa toldonman —Diosta yupaychanapaq wasi— wañunankama sirviq rinan karqa. ¿Jefté chay maqanakuypi atiparqachu? Arí. ¿Pichus ñawpaqta wasinmanta taripananpaq lluqsimusqanta yachankichu?a...
Arí, wawan. Jefteqa mayta llakikurqa, imaraykuchus paylla kʼata wawan karqa. Chaywanpis Jehovawan tratota ruwarqaña, juntʼanantaq karqa. Ususintaq mana thuturqachu. Astawanqa tatanta, trato ruwasqanta juntʼananpaq kallpacharqa. Chantá tatanmanta mañakurqa iskay killasta urqusman rinanpaq. ¿Imaraykutaq chayta mañakurqa? Imaraykuchus may llakisqa kachkarqa. Diospa toldonpi sirvispaqa manaña casarakuyta, ni wawasniyuq kayta atisqanta yacharqa. Ichapis familiayuq kayta munarqa. Chaywanpis tatanta kasukuyta munarqa, Jehovamanpis chiqa sunqu kayta munallarqataq. ¿Manachu Jehová, Jefté ima ruwasqanmanta kusikurqanku?...
Jefté, sipas masisninwan iskay killata kamunanpaq wawanta kacharqa. Kutimusqantawantaq Jehovawan trato ruwasqanmanjina, yupaychana toldonman wawanta kacharqa. Israelmanta sipaskuna, sapa wata Siló llaqtaman maypichus yupaychana toldo kachkarqa, Jeftep wawanta waturiq, kallpachariq ima rillaqpuni kanku. Chaypitaq wañunankama sirvirqa.
¿Pi wawallatapis tatanta kasukuqta, Jehovata munakuqta ima riqsinkichu?... Allin kanman paykunawan masichakunayki. Chaypaq Jeftep wawanjina kanayki tiyan: tatasniykita kasukuspa, Jehová Diosman chiqa sunqu kaspa ima. Jinamanta tatayki, mamayki ima, may kusisqas kanqanku Jehovapis mayta munakusunqa.
Bibliamanta ñawirinapaq
[Sutʼinchaynin]
a Juk wawitawan kay yachaqanata ñawirichkanki chayqa, kimsa puntitos rikhuriptin, chay puntitospa ñawpaqinpi rikhuriq tapuyman kutichinanta mañay.