Diosman qayllaykuy
‘Tukuy imapi sunquchaq Dios’
KAWSAYPIQA, imaymana llakiykuna tiyan, chayrayku wakinkunaqa, mana imanakuyta atinkuchu. Chayjina llakiypi kachkaspaqa, ichapis tapukunchik: “¿Pillapis yanapawanmanchu?”, nispa. Apóstol Pabloqa, 2 Corintios 1:3, 4, Jehová Diosninchik chiqamanta sunquchayta atiwasqanchikta niwanchik.
Kay 2 Corintios 1:3 pʼitipiqa, Dios “khuyakoj Tata” kasqanta nin. ¿Imaraykutaq Diospaq chay rimayta uqharikun? Griego simipi, “khuyakoj” rimayqa, wakkunap llakiyninmanta khuyakuymanta parlan.a Chayrayku, wakin yachayniyuq runasqa, kayjinata tikrachinku: “khuyakuyniyuq Tata” chayri “achkhata llakikuq Tata”, nispa. Chay ‘khuyakuytaq’, mana Jehovap sunqullanpichu qhipakun, manaqa chay khuyakuyninmanjina imatapis ruwan. ¿Manachu chay kʼacha kaynin, payman astawan qayllaykunanchikpaq tanqawanchik?
Pabloqa, Jehová “tukuy imapi sonqochaj Dios” kasqanta niwanchik. Bibliamanta yachayniyuq runa nisqanmanjinaqa, griego simipi “khuyakuj” rimayqa, “llakiypi kaqta yanapay, chayri sunquchay” niyta munan. Kay The Interpreter’s Bible nisqanmanjinataq: “Llakisqa kaqta sunquchayqa, chay nanayninwan mana atipachikunanpaq yanapay, niyta munan”.
Chaywanpis, ichá tapukunchik: “¿Imaynatá Dios sunquchawanchik? ¿Imaynatá nanaywan mana atipachikunanchikpaq, kallpachawanchik?”, nispa. Payqa, Bibliata quwanchik, chantapis paymanta mañakuqta saqiwanchik. Pablo sutʼinchasqanmanjinaqa, Diosqa, Palabranta quwanchik “Diosmanta Qhelqasqapi pacienciakuspa, sonqochakuspataj suyakuyniyoj kananchejpaj”. Chantapis, tukuy sunquwan Diosmanta mañakuptinchikqa, “mana unanchay atina sonqo tiyaykuyninta sonqosni[n]chejman churanqa” (Romanos 15:4; Filipenses 4:7).
¿Imapitaq Jehová sunquchawasunman? Pablo nisqanmanjinaqa, “tukuy llakiyninchejpi” (2 Corintios 1:4). Chayrayku, ima llakiypis, ima ñakʼariypis kachun, Dios kallpanta quwasun, chay ñakʼariykunawan mana atipachikunanchikpaq. ¡Mayta chayta yachaspa sunquchakunchik!, ¿icharí?
Chaywanpis, chay sunquchawasqanchikqa, mana ñuqallanchiktachu yanapawanchik. Pablo nisqanmanjina, Diosqa “sonqochawanchej tukuy llakiyninchejpi, noqanchejpis sonqochananchejpaj llakiypi, ñakʼariypi kajkunata, imaynatachus noqanchejpis sonqochasqa karqanchej Diosmanta, ajinata”. Jehová Diosninchik sunquchawasqanchikqa, wakkunata khuyakunanchikpaq, kallpachananchikpaq ima, tanqawanchik.
Chiqamantapuni Jehová, “tukuy imapi sonqochaj Dios”. Chaywanpis, mana suyasunmanchu kunanpacha tukuy llakiyninchikta, chinkachinantaqa. Payqa, mana saqirpariwanchikchu, astawanpis, llakiykunawan mana atipachikunanchikpaq sunquchawanchik, kallpachawanchik ima. ¡Jehovaqa, mayta khuyakuq Diospuni!, ¿icharí? ¿Manachu Payta tukuy imaymanamanta jatunchana kanman?
[Sutʼinchaynin]
a Kay pʼitipiqa, Dios “khuyakuq Tata” —khuyakuypa qallariynin— kasqanta niwanchik, chayrayku khuyakuy paymanta jamusqanta, paypi kasqanta ima, nisunman.