¿Imaynatá Dios sonqochawanchej?

Apóstol Pablo nisqanman jina, Jehovaqaa “tukuy imapi sonqochaj Dios [...]. Payqa sonqochawanchej tukuy llakiyninchejpi” (2 Corintios 1:3, 4). Chaywantaj Bibliaqa rikuchin, Dios tukuyta yanapayta atisqanta, may jina llakiypi rikukojtinkupis sonqochayta atisqanta.

Dios yanapanawanchejta munaspaqa mana jinallachu qhepakuna. Kaypi tʼukurina, ¿imaynatá uj doctor yanapawasunman mana rejtinchej? Chayrayku Bibliapeqa jinata niwanchej: “Diosman astawan qayllaykuychej; paypis qayllamusonqachej” (Santiago 4:8).

¿Imaynatá yachasunman Dios qayllamunawanchejta? Ñaupajta, pay kutin kutita niwanchej yanapayta munawasqanchejta (5 paginapi recuadrota qhawariy). Chantapis, yachallanchejtaj ñaupa tiempomantapacha runasta Dios sonqochasqanta.

Rey Davidpis, kay tiempo runas jinallataj ashkha chʼampaykunapi rikukorqa, Diospa yanapaynintataj jinata mañakorqa: “Yanapayniykita mañakuspa qhaparikusqayta uyariway”. ¿Jehová uyarerqachu? Arí, Davidllataj nerqa: “Paytaj yanapawarqa. Chayrayku sonqoy kusisqa kashan”, nispa (Salmo 28:2, 7).

JESUSQA RUNASTA SONQOCHAJ

Diosqa munarqa Jesús tukuy runasta sonqochananta. Chayrayku Jehovaqa ajllarqa tukuy llakisqasta sonqochananpaj (Isaías 61:1, 2). Bibliapi nerqa jinaña, Jesusqa tukuy sonqo yanaparqa tukuy saykʼusqa kajkunata, llasa qʼepiyojkunata ima (Mateo 11:28-30).

Jesusqa runasta sonqochaj sumajta yuyaychaspa, kʼachallamanta parlarispa, wakin kutitaj onqoyninkuta jampispa. Uj kuti lepra onqoyniyoj runa jinata mañakorqa: “Munankichus chayqa, atinki sanoyachiwayta”, nispa. Jesustaj khuyaspa nerqa: “Arí, munani; llimphuchasqa kay”, nispa (Marcos 1:40, 41). Chay runataj sanoyaporqa.

Jesús manaña kay Jallpʼapichu sonqochanawanchejpaj kajtinpis, Tatan “tukuy imapi sonqochaj Diostaj”, yanapashallanpuni ñakʼarejkunata (2 Corintios 1:3). ¿Imasnejtataj yanapawanchej?

• Biblianejta. “Ñaupajta qhelqasqa kajqa yachachinawanchejpaj qhelqasqa karqa, Diosmanta Qhelqasqapi pacienciakuspa, sonqochakuspataj suyakuyniyoj kananchejpaj” (Romanos 15:4).

• Espíritu santonejta. ¿Imaraykú cristianos sonqo tiyasqas kasharqanku Jesús wañupusqanmanta qhepaman? Bibliaqa nin cristianos “espíritu santoj yanapayninwan. Chantá Señorta manchachikuspa” kausakushasqankuta (Hechos 9:31). Espíritu santo, nisunman Diospa kallpan mayta yanapawasunman. Diosqa chaynejta runasta, ima chʼampaypi kajtinkupis sonqochayta atin.

• Diosmanta mañakuynejta. Biblia nin: “Ama imamantapis phutikuychejchu. [...] Imatachus munasqaykichejta mañakuychej, tukuy imamanta graciasta qospallapuni. Chantá Diosqa chay mana unanchay atina sonqo tiyaykuyninta sonqosniykichejman churanqa, chaytaj sonqoykichejta, yuyayniykichejtawan waqaychanqa” (Filipenses 4:6, 7).

• Hermanosnejta. Hermanosqa, sumaj amigosninchej sonqochanawanchejpaj. Apóstol Pablo nerqa hermanosnin sonqochasqankuta “may jina llakiypi, ñakʼariypitaj” kashajtin (Colosenses 4:11; 1 Tesalonicenses 3:7).

Diosqa chaykunanejta yanapawanchejpuni. Ñaupaj yachaqanapi parlarisqanchej runaspa kausayninkumanta astawan parlarina. Qanpis paykuna jinallataj rikunki, Dios kayta nisqan juntʼakushasqanta: “Imaynatachus mamaqa wawanta sonqochan, ajinallatataj noqapis qankunataqa sonqochasqaykichej” (Isaías 66:13).