Imaraykutaq kutillanchikpuni
1. Willasqanchikmanta parlaspa, ¿ima tapuytaq rikhurin?
1 Wakin llaqtakunapiqa kikin punkullatapuni takanchik. Sapa kuti, mana uyariyta munaptinkupis, kikin runallawanpuni tinkunchik. ¿Imaraykutaq chay runakunaman Diosmanta willaq rillanchikpuni?
2. ¿Imaraykutaq runaman willanchik?
2 Jehovata, runa masinchikta munakusqanchikrayku. Runaman astawan willamunchik, Jehovata munakusqanchikrayku. Sunqunchikqa tanqawanchik wakkunaman jatun Diosninchikmanta parlanapaq (Luc. 6:45). Jehovata munakuyninchik payta kasukunapaq tanqawanchik, runa masinchikpis kikinta ruwananpaq yanapayta munanchik (Pro. 27:11; 1 Juan 5:3). Runa mana uyariptinpis mana saykʼuspa willallanchikpuni. Ñawpa cristianosqa qhatiykachachikuspapis mana saykʼuspa willallarqankupuni (Hech. 5:42). Runa mana uyariyta munaptin llakikunamantaqa, Diosmanta willanallapuni, jinamanta Jehovata munakusqanchikta, yupaychasqanchikta ima rikuchisunchik.
3. ¿Imaraykutaq runaman willamullanchikpuni?
3 Chantapis, runata munakusqanchikrayku willamullanchikpuni (Luc. 10:27). Jehovaqa mana pipis chinkananta munanchu (2 Ped. 3:9). Kikin wasillamanpuni chayaspapis, Jehovata kasukuyta munaqkunata tarisunchik. Guadalupe islapiqa, sapa 56 runamanta juknin Jehovamanta sutʼinchaq, chaypiqa qayna wata 214 runakuna bautizakurqanku. Señorpa cenanta yuyarinapaqtaq, yaqha iskay waranqa runakuna tantakurqanku, nisunman sapa 22 runamanta juknin Señorpa cenanman rirqa.
4. ¿Kikin runallatapunichu tarinchik?
4 Runaqa tikrakun. Willamunchik chaypiqa, runaqa mana kikinchu. Ichapis ñawpaqta juk wasipi mana uyariwarqanchikchu. Chaywanpis kutiptinchikqa ichapis familiamanta wak runa uyariyta munawasunchik. Chayri wakkunañataq chay wasipi tiyakunku, paykunataq willasqanchikta uyariyta munanku. Wakin kutiqa tatakuna mana uyariyta munankuchu. Wawasninkutaq, runayaspa wasinkumanta ripuptinku uyariyta munawasunman.
5. ¿Imaraykutaq runa uyarillawanchiktaq?
5 Kikin runapis tikrakullantaq. Apóstol Pabloqa ñawpaqta ‘millayta parlaq, cristianosta qhatiykachaq’, runa karqa (1 Tim. 1:13). Kunanpis kikillantaq, Jehovata kasukuqkunamanta wakinkunaqa, ñawpaqta mana imatapis yachayta munarqankuchu, wakinkunataq churanakuq kanku. Kay pachapi saqra ruwaykuna yapakusqanrayku, mana uyariyta munaqkuna, churanakuqkunapis, uyariwasunman. Wakinkunataq familianmanta juknin wañusqanrayku, mana llamkʼaynin kasqanrayku, chayri unqusqankurayku uyarillawanchiktaq.
6. ¿Imaraykutaq tukuy sunquwan willanallanchikpuni tiyan?
6 Kay pachap tukukuynin chayamuchkanña, ñuqanchiktaq runakunaman astawan willananchik, yachachinanchik tiyan (Isa. 60:22). Chayrayku mana saykʼuspa, tukuy sunquwan runakunata willanallapuni kachun. Ichapis kunanpacha runaqa uyariwasunchik. Imapis kachun, mana willayta saqisunmanchu. ‘Ajinata ruwaspa ñuqanchik kikinchikta salvakusunchik, ajinallataq uyariqkunatapis’ (1 Tim. 4:16).