¿Imaynatataq uyarinqanku?
1. ¿Imaraykutaq willay, mana atikullanmanchu? ¿Imaraykutaq willallanchikpuni?
1 Jehovap pʼunchaynin usqhayllata qayllamuchkasqanrayku, runasta Payta chiqamanta riqsinankupaq, munayninta yachanankupaq ima, yanapananchik tiyan (Juan 17:3; 2 Ped. 3:9, 10). Ichapis willayta mana atillasunmanchu, runas mana uyariyta munasqankurayku, chayri asipayawasqanchikrayku (2 Ped. 3:3, 4). Chaywanpis, maypichus willanchik chaypi, allin willaykunata uyariyta munaqkuna kankuraq. Astawanpis, ¿imaynatataq uyarinqanku, mana pipis willaptin? (Rom. 10:14, 15.)
2. ¿Imaynatá apóstol Pablop ruwasqan kallpachawanchik?
2 Churanakuy kaptin. Manchachikuyninchikta atipananchik tiyan, Diospa Reinonmanta uyariyta munaqkunaman willamunanchikpaq. Qhawarina Europamanta unay Filipos llaqtapi kasqanta, maypichus apóstol Pablo allin willaykunata willarqa. Chaypiqa, Pablota, Silastawan, wakin runas llullakuspa juchacharqanku, siqʼurqanku, chaymantataq carcelman wisqʼaykurqanku (Hech. 16:16-24). Pablo, ¿manchachikurqachu willayta, chayjina llakiypi kaspa? Mana, imaraykuchus chaymantaqa, Tesalónica llaqtaman rirqa, maypichus juk qutuchakuyta sayarichirqa, Diospa espiritunwan kallpachakusqanrayku (1 Tes. 2:2). ¿Manachu jinata ruwasqan, mana saykʼunapaq kallpachawanchik? (Gál. 6:9.)
3. ¿Imaraykutaq wakin runaspa yuyayninku tikrakun, ñawpaqta mana uyariyta munaptinkupis?
3 Wakinqa, watasta willayninchikta mana uyariyta munarqankuchu, chaywanpis kunanqa, yuyayninku tikrakun. ¿Imaraykú? Qullqi mana kasqanrayku, unquyrayku, familiankumanta pillapis wañupusqanrayku, Pachantinmanta llakiy willaykunata uyarisqankurayku ima (1 Cor. 7:31). Chantapis, wakin wawastaqa, tatasninku willayninchikta mana uyariqta saqiqchu kanku, chaywanpis kunanqa, chay wawas wiñaspaña uyariyta munanku. Chayrayku, tiempo kachkaptillanraq willallasunpuni chayqa, Jehová Diosta yupaychayta akllanankupaq yanapasunchik (Rom. 10:13).
4. ¿Imataq “mana saykʼuspa” willananchikpaq tanqawanchik?
4 “Mana saykʼuspa.” Diosta, runa masinchikta ima, munakuyqa, “mana saykʼuspa” willananchikpaq, discipulosta ruwananchikpaq ima, tanqawasun, imaynatachus ñawpa tiempopi apóstoles ruwarqankujina (Hech. 5:42). Achkha runas, kunan pʼunchaykunapi, “tukuy millay imas ruwakusqanmanta qhaparispa waqashanku” (Eze. 9:4). Chaywanpis, allin willaykunata uyarispaqa, ¡suyakuyta, samariyta ima, tarinku! Chantapis, Jehovaqa, Biblia nisqanmanjina runas mana uyariyta munawaptinchikpis, kallpachakusqanchikta kusiywan qhawan (Heb. 13:15, 16).