Señorpa cenanta yuyarinapaq tiempopi willayninchikta yapanachik
1. Marzo, abril, mayo killaspi, ¿imaraykutaq willayninchikta yaparisunman?
1 Señorpa cenanta yuyarinapaq tiempopi, ¿willayniykita astawan yapawaqchu? Ichapis wakin lugarespi tiempoqa allillan kanqa, chantapis astawan tarde laqhayanqa. Wakin willaqkunaqa, llamkʼayninkumanta chayri yachaywasimanta vacacionespi kachkanqanku, chayraykutaq Diosmanta astawan willayta atinkuman. Abril 2 pʼunchaymantapacha invitacionesta saqispa runasta waqyarikunqa, ñuqanchikwan khuska kay abril 17 pʼunchay Jesuspa wañuyninta yuyarinapaq. Chay chʼisi jamuqkunata Diosmanta yachakunankupaq kallpacharisunman, chantapis kay abril 25 pʼunchayninmanta qhipaman sumaq umallirichiyman waqyarisunman. Jesús kawsayninta ñuqanchikrayku qusqanta yuyariyqa, marzo, abril, mayo killaspi astawan willayman rinapaq kallpachawanchik.
2. ¿Imaynatá willayninchikta yapasunman?
2 Precursor auxiliarjina. Astawanraq llamkʼayta munanki chayqa, precursor auxiliarta urqhuy. May ruwanasniyuq kasqanchikrayku mana atikullanchu, chayrayku ñawpaqmanta tiempochakuna tiyan (Pro. 21:5). Ichapis wakin ruwaykunasniykita qhipapaq saqiwaq (Fili. 1:9-11). Precursor auxiliarjina llamkʼayta munasqaykita wak hermanosmanpis willariy, ichá paykunapis precursoresjina llamkʼaysikunkuman.
3. Familias willayninkuta yapanankupaq, ¿imatá ruwankuman?
3 Familiapi Diosta Yupaychanapaq Chʼisipi, chay killaspi imatachus familiajina ruwayta munasqaykichikta allin kanman parlarinaykichik (Pro. 15:22). Familiapi tukuy yanapanakuptiykichik, mayqillanpis juk killata chayri astawan precursores auxiliaresjina llamkʼayta atiwaqchik. Chayta mana ruwayta atispaqa, familiajina wakin tardesta lluqsinapaq chayri semana tukukuyta astawan willanaykichikpaq wakichikuwaqchik.
4. Señorpa cenanta yuyarinapaq tiempopi astawan willayman lluqsinapaq kallpachakuptinchik, ¿ima bendicionestá japʼisun?
4 Jehovaqa imatachus payrayku ruwasqanchikta, mana qunqanchu, jatunpaqtaq qhawan (Heb. 6:10). Jehovapaq, runaspaq ima, tiempochakuyqa, mayta kusichiwanchik (1 Cró. 29:9; Hech. 20:35). Señorpa cenanta yuyarinapaq tiempopi, ¿astawan willanaykipaq kallpachakuwaqchu? Jinata ruwaspaqa kusisqa kanki, Diospa bendicionnintataq japʼinki.