Mujuta wiñananpaq qarpana
1. Bibliamanta yachachiykunata mujutajina, ¿imaraykutaq qarpananchik tiyan?
1 Mujuta tarpuspaqa, pʼutumunanpaq qarpana tiyan. Kikillantataq qarpana runap sunquman Bibliamanta yachachiykunata mujutajina tarpuspa (1 Cor. 3:6). Chayrayku yachakuyta munaqkunaman kutinanchik tiyan, ajinamanta Diospa kawsayta quq yakuwan nisunman Palabranwan qarpachkasunmanpisjina kanqa. Chayta ruwaptinchikqa sumaqta saphichanqa, wiñanqa, puqunqa ima.
2. ¿Imatá ruwasunman, wak pʼunchay kutinapaq?
2 Juk tapuyta ruwana. Willaypaq wakichikuchkaspa, runas yachakuyta munanallankupaqpuni, juk tapuyta ruwanaykipi tʼukurinayki allin kanman. Chay tapuytataq niraq parlariyta tukuchachkaspa allin kanman ruwanayki, wak pʼunchay chay tapuyman kutichinaykipaqtaq kutinaykita niy. Achkha hermanosta Yachachin libromanta juk tapuyta ruway, yachachiyta qallarinankupaq yanapan.
3. Juk runa yachakuyta munaptin, ¿imastataq qillqana tiyan?
3 Cuadernopi qillqana. Ñawpaq kutirayku juk runawan parlariytawan, kaykunata qillqasunman: Sutinta, maypichus tiyakusqanta, ima diachus, ima horachus parlarisqanchikta, ima publicaciontachus saqisqanchikta, imamantachus parlarisqanchikta ima. Chantapis religionniyuqchus, familiayuqchus manachus kasqanta, imachus llakichisqanta, imachus interesasqanta ima qillqallasunmantaq. Chaykunataq, wak día watiqmanta parlarinapaq yanapawasunman. Maykʼaqchus kutinanchikta, ima tapuytachus ruwasqanchikta ima qillqakunallataq tiyan.
4. Runa yachakuyta munanallanpaqpuni, ¿imaraykutaq kutinallapuni tiyan?
4 Kutinallapuni. Satanasqa, runap “sonqonkupi imachus tarpusqa kajta qhechun” (Mar. 4:14, 15). Chayrayku yachakuyta munaqkunata wasinkupi mana taripaspaqa kutinallapuni. Ichá juk cartata chayri juk notitata saqina kanman. Sutʼincharinapaq; juk precursora, juk señoraman yachachiyta qallarisqa, chay señorata manaña wasinpi taripaspataq juk cartata apachisqa. Taripaptintaq, señoraqa cartata apachisqanmanta mayta kusikusqanta nisqa. Bibliamanta yachachiykunata mujutajina, ¿imaraykutaq qarpananchik tiyan? Imaraykuchus qarpaspaqa, pʼutumuqta, wiñaqta, sapa mujumanta kimsa chunkatajina, suqta chunkatajina, pachaqtajina puquqta ima rikusunchik (Mar. 4:20).