Invitacionesta jaywarisqanchej mana qhasipajchu

Jatun tantakuymanta kinsa semana ñaupajta, runasta jatun tantakuyman wajyarisun, tukuy sonqotaj yanapakusunman. Pasaj wataspi invitacionta japʼikojkunaqa, umallirichiykunata uyarispa, yanapakojkuna sumaj wakichisqa kasqankuta qhawaspa, tantakojkuna uj sonqolla kʼachata kausakusqankuta rikuspa ima, tʼukulla qhepakorqanku (Sal. 110:3; 133:1; Isa. 65:13, 14). Chaywanpis jatun tantakuyninchej karupi kajtin, ¿wajyarisqanchej runas rinkumanchu?

Kay 2011 watapi jatun tantakuy tukukusqantawan, uj warmi suyunpi sucursalman cartata apachisqa. Payqa willayninchejta mana uyariyta munajchu, chaywanpis wasi punkunpi uj invitacionta saqesqanku. Cartanpi nerqa: “Sumaj wasiyoj, kʼacha qosayojtaj kani. Kusisqa kanaypaj tukuy imayoj karqani. Chaywanpis mana sonqo juntʼasqachu kasharqani. Chayrayku 320 kilometrosta viajanay kajtinpis, jatun tantakuyman sabadollatapis riyta munarqani”, nispa. Yachakusqanwan mayta kusikusqanrayku, domingotawan chaypi kananpaj qosanta wajyarisqa. Nillantaj: “Tukuynin umallirichiykunata uyarerqani, ashkha hermanostataj rejserqani. Nitaj tukukunanta munarqanichu”, nispa. Wasinman kutipuspa Bibliamanta yachakuyta qallarisqa, tawa killanmantaj qotuchakuywan willaj llojsisharqaña. Pay nillanpuni: “¡Walejtachá chay invitacionta punkuypi tarerqani! Kunanqa cheqamantapuni sonqo juntʼasqa kani”, nispa.

Invitacionesta japʼikojkunamanta, jatun tantakuyman ujllapis renqapuni. Chayrayku invitacionesta sonqo kʼajaywan jaywamuna. Puchojtataj jatun tantakuyman apana, chay llajtapi kashaspa mayllapipis jaywanapaj.

[5 paginapi dibujo/foto]

¿Imaynatá invitacionesta jaywasun?

Tukuy wasisman invitacionta saqenapaj pisillata parlarina kanman. Ichá nisunman: “Imaynalla. Jallpʼantinpi runasta uj sumaj tantakuyman wajyarishayku. Kay invitacionta qanpaj apamuni. Maypichus, maykʼajchus kananta kaypi willashan”, nispa. Sonqo kʼajaywan willana. Semana tukukuypi invitacionesta saqeshaspa, atikojtin revistastawan saqena.