Uj mosoj video Bibliamanta yachachiyta qallarinapaj
Ashkha runasqa, Internetpi jw.org nisqapi, pisi minutosllapi kaj videota qhawankuña. Chay videoqa sutikun, ¿Imaraykutaj Bibliamanta yachakuna?, nisqa. Chaytaj wakichisqa kashan, runa mana pagaspalla Bibliamanta yachakunanpaj. Internetpeqa, qallariynin nisqaj ura kantunpi “Mana pagaspalla Bibliamanta yachakuy” nisqaman yaykuspa tariwaj chayri mosoj tratadospa qhepan paginanpi rikhurej codigowan yaykuwaj. Imaynatachus chay video yanapanawanchejta qhawarina:
Bibliamanta yachakuyta munajman kutispataj, ichá nisunman: “¿Uj videota qhawarichiykimanchu? Kay videoqa, imatachus Bibliamanta tapukusqanchejta sutʼinchashan”, nispa. Wasiyoj munajtinrí celularninchejpi chayri computadoranpi rikuchisunman.
Mayllapipis chayri ashkha runas tiyan chaypi mosoj tratadosta saqespaqa, codigonta rikuchisunman, celularninpitaj yaykunanta nisunman. Chayri celularninchejpi rikuchisunmanpacha, imaraykuchus chay codigonejta Internetpi ashkha qalluspi chay videota tarisunman.
Chantapis llankʼayninchejmanta, yachaywasimanta compañerosninchejman, familiaresninchejman, rejsisqasninchejman ima chay video kasqanta willarisunman, rikuchisunmantaj. Correonejtapis direccionninta apachisunman, pay Internetman yaykuspa qhawananpaj.
Kay videota sumajta apaykachasun chayqa, ashkha runasman Bibliamanta yachachiyta qallarisun. Ajinamantataj “wiñay kawsaypaj ajllasqa kajkuna[ta]” Diosmanta yachakunankupaj yanapasun (Hech. 13:48).