Diospa llajtanpi astawan atienekuna

1. Ñaupa tiempomanta Diospa llajtan, ¿imatapis patan urantachu ruwaj?

JEHOVAQA kamachisninman uj ruwayta qospa, munan chayta sumajta ruwanankuta, manataj patan urantachu (1 Cor. 14:33). Payqa munan sumaj willaykuna jallpʼantinpi predicakunanta (Mat. 24:14). Jesustataj churarqa chay llankʼayta ñaupajman apananpaj. Jesustaj chay llankʼayta sumajta ruwachin, manataj patan urantachu. Ñaupa cristianospa tiemponkupeqa Jerusalenpi kasharqanku uj grupo apóstoles, ancianos ima. Paykuna nej kanku imatachus tukuy congregacionespi ruwakunanta (Hech. 15:2; 16:4). Congregaciones tukuy ladopi kasqanraykutaj, sapa congregacionmanta ancianosqa, chay kamachiykunata hermanosman willaj kanku (Hech. 14:23). Hermanos kasukusqankuraykutaj, “congregacionespa creeyninku sinchʼiyallarqapuni, sapa diataj creejkunaqa astawan astawan yapakusharqanku” (Hech. 16:5).

2. ¿Imaynatá Jehová 1919 watamantapacha llajtanta pusashan, mikhuchishantaj?

² Kay tiempopipis Jehovaqa llajtanta yanapashallanpuni sumaj organizasqa kananpaj. 1919 watapeqa Jesús uj grupo ajllasqa cristianosta churarqa, predicacionta wakichinankupaj, discipulosninmantaj yachachiykunata mikhunata jina qonankupaj (Luc. 12:42).a Sutʼita reparanchej Jehová chay ruwasqankuta bendecisqanta (Isa. 60:22; 65:13, 14).

3, 4. 1) ¿Imaynatataj yanapawanchej sumaj organizasqas kasqanchej? Sutʼinchariy. 2) ¿Imatá kay yachaqanapi yachakusun?

³ Manachus sumaj organizasqas kasunman chayqa, imatachus Jesús kamachiwasqanchejta mana ruwayta atisunmanchu (Mat. 28:19, 20). Manachus sapa congregacionpata predicananpaj uj territorion kapunman chayqa, sapa ujchá munasqanchejman jina maypipis predicallasunman. Chayrayku kikin lugarllatachá ashkha kutista predicasunman, waj lugaresmantaj ni jaykʼaj chayasunmanchu. ¿Imaynasmantawantaj yanapawanchej sumaj organizasqas kasqanchej?

⁴ Jesusqa imaynatachus kay jallpʼapi kashaspa discipulosninta wakicherqa, ajinallatataj kay tiempopipis Diospa llajtanta sumajta wakichin. Kay yachaqanapeqa imaynatachus Jesús chayta ruwasqanmanta parlarisun, Diospa llajtanpis kikillantataj ruwasqanmanta. Chantá parlarillasuntaj imatachus ruwananchejta Jehovaj llajtanpi atienekusqanchejta rikuchinapaj.

DIOSPA LLAJTANQA JESÚS JINA RUWAN

5. ¿Imaynatá Diospa llajtan Jesús jina ruwan? (Juan 8:28).

⁵ Jesusqa Tatanmanta yachakorqa imatachus ruwananta, imatachus ninantapis. Ajinallatataj Jehovaj llajtanpis, Diospa Palabranman jinapuni imatapis yuyaychawanchej chayri yachachiwanchej (Juan 8:28 leey; 2 Tim. 3:16, 17). Chantapis sapa kuti yuyarichiwanchej Bibliata leenanchejta, chayman jinataj ruwananchejta. Chay yuyaychawasqanchejman jina ruway, ¿imaynatá yanapawanchej?

6. ¿Imaynatá yanapawanchej Bibliata estudiay?

⁶ Bibliata publicacionesninchejwan estudiayqa maytapuni yanapawanchej. Chayta ruwaspaqa, Bibliaj yachachisqanta Diospa llajtanpa kamachiykunasninwan kikinchayta atinchej. Chay kamachiykuna Bibliaman jina kasqanta reparaspataj, Jehovaj llajtanpi astawan atienekunchej (Rom. 12:2).

7. ¿Imamantataj Jesús willaj, Diospa llajtanrí kikillantatajchu ruwan?

⁷ Jesusqa willarqa “Diospa Gobiernonmanta sumaj willaykunata” (Luc. 4:43, 44). Discipulosninmanpis kamacherqa kikillantataj ruwanankuta (Luc. 9:1, 2; 10:8, 9). Kay tiempopipis Diospa llajtanmanta kajkunaqa, Diospa Gobiernonmanta sumaj willaykunata willanku maypi tiyakuspapis, Diospa llajtanpi ashkha imaspiwan yanapakuspapis.

8. ¿Ima sumaj ruwaytataj japʼinchej?

⁸ Diospa Gobiernonmanta runasman willareyqa may sumajpuni. Chay llankʼaytaqa mana tukuychu ruwayta atinku. Jesusqa kay jallpʼapi kashaspa, mana saqerqachu supaykuna paymanta willanankuta (Luc. 4:41). Kunanpis pillapis Jehovaj testigosninwan khuska predicayta munan chayqa, Jehová munasqanman jinaña kausakushanan tiyan. ¿Imaynatá rikuchinchej predicayta atisqanchejta may jatunpaj qhawasqanchejta? Maypi kashaspapis runasman willarispa. Jesús jinallataj noqanchejpis runaspa sonqonkupi cheqa kajta mujuta jina tʼakayta munanchej, qarpaytapis (Mat. 13:3, 23; 1 Cor. 3:6).

9. ¿Imatá Diospa llajtan ruwan Diospa sutinta rejsichinanpaj?

⁹ Jesusqa Diospa sutinta rejsicherqa. Payqa Tatanmanta mañakushaspa nerqa: “Sutiykita rejsicherqani”, nispa (Juan 17:26). Jehovaj llajtanpis Jesús jinallataj tukuy imata ruwan runasman Diospa sutinta rejsichinanpaj. Chaytataj astawanqa ruwan Mosoj Jallpʼapi Kausajkunapaj Diospa Palabran Biblianejta. Chay Bibliataj 270 kuraj qalluspiña tiyan. Chay Bibliapeqa ima lugarespichus ñaupa qhelqasqaspi Diospa sutin rikhurerqa, chaykunaman watejmanta churaykapunku. Yanapa A4 chantá yanapa A5 nisqapi chaymanta aswan sumajsituta sutʼinchashan. Chantá castellanopi Biblia de estudio apéndice C nisqapi, Griego qhelqasqaspi Diospa sutin 237 kutistapuni rikhurinan kasqanta sutʼinchashan.

10. ¿Imatá yachakunchej uj señoraj kausayninmanta?

¹⁰ Jesús jinallataj munanchej tukuy runas Diospa sutinta rejsinankuta. Myanmarpi uj hermananchejqa 67 watasniyoj señoraman Diospa sutin Jehová kasqanta yachacherqa. Chayta yachaspa chay señoraqa waqarikorqapuni, nerqataj: “Kunanpuni Diospa sutintaqa uyarishani. [...] Kay yachachiwasqaykeqa ni imawan kikinchakunchu”, nispa. Reparanchej jina, Diospa sutinta yachayqa runaspa kausayninkuta cambianman.

DIOSPA LLAJTANPI CONFIASQANCHEJTA RIKUCHINALLAPUNI

11. ¿Imaynatá ancianos Diospa llajtanpi confiasqankuta rikuchinkuman? (Fotostawan qhawariy).

¹¹ ¿Imaynatá ancianos Diospa llajtanpi confiasqankuta rikuchinkuman? Ujqa kanman kamachiykunata japʼisqankuta sumajta leespa, chayman jinataj tukuy atisqankuta ruwaspa. Paykunaqa kamachiykunata japʼinku imaynatachus reunionpi asignacionesta, oracionesta ima ruwanamanta. Cristoj ovejasninta imaynatachus cuidanankumantapis kamachiykunata japʼillankutaj. Ancianos Diospa llajtanpa kamachiykunasninman jinapuni ruwanku chayqa, hermanosqa reparanku Jehová paykunata munakusqanta, cuidashasqantataj.

12. 1) ¿Imaraykutaj ñaupajman pusawanchej chaykunata kasukunanchej tiyan? (Hebreos 13:7, 17). 2) ¿Imajtintaj ancianospi allin kajtapuni qhawananchej tiyan?

¹² Ancianos imata kamachiwajtinchejpis tukuy sonqo chayta ruwana, ajinamanta yanapanchej ruwanasninkuta juntʼayta atinallankupaj. Bibliaqa niwanchej ñaupajman pusawanchej chaykunata kasukunanchejta, kamachiyninkupitaj kananchejta (Hebreos 13:7, 17 leey). Ancianos pantaj runas kasqankuraykutaj, chayta ruwayqa mana atikullanchu. Ichapis allin imasta ruwasqankuta qhawanamantaqa pantasqasnillankuta qhawashasunman. Chayta ruwasunman chayqa, enemigosninchejpa munasqankuta ruwashasunman. Paykunaqa munanku Diospa llajtanpi manaña confiananchejta. Chayrayku amapuni ancianosmantaqa mana allinta yuyanachu. ¿Imatá ruwasunman enemigosninchejpa llullasninkuta reparanapaj, nitaj kasunapaj?

IMA KAJTINPIS DIOSPA LLAJTANPI CONFIANALLAPUNI

13. ¿Imaynatataj enemigosninchej Diospa llajtanta qhawachiyta munanku?

¹³ Enemigosninchejqa Diospa llajtanmanta allin imasta, manapis allinchu kanman jinata qhawachiyta munanku. Biblia nisqanman jina Jehovaqa munan cuerponchejpi, kausayninchejpi, yupaychayninchejpipis llimphus kananchejta. Chantapis nillantaj pichus chʼichi kausayniyoj kajqa, nitaj arrepientekunchu chayqa, congregacionmanta qharqosqa kananta (1 Cor. 5:11-13; 6:9, 10). Chay kamachiyta kasukusqanchejrayku, enemigosninchejqa niwanchej runasta mana munakusqanchejta, tukuy imata juchapaj qhawasqanchejta, mana noqanchej jinachu kajkunatataj chejnikusqanchejta.

14. ¿Pitaj Diospa llajtanmanta llullasta rikhurichin?

¹⁴ Yuyarikuna pichus chayta ruwachisqanta. Satanasqa ‘llullakuypa tatan’, chayrayku pay Diospa llajtanmanta llullasta rikhurichin (Juan 8:44; Gén. 3:1-5). Chay llullasninta tukuy ladoman chayachinanpajtaj, enemigosninchejmanta valekun. Ñaupa cristianospa tiemponkupiña chayta ruwarqa.

15. ¿Imastataj religionta kamachejkuna ruwarqanku Jesustawan discipulosnintawan?

¹⁵ Jesusqa Diospa Wawan karqa, nitaj pantaj runachu karqa, tʼukuna milagrostataj ruwarqa. Satanastaj wakin runasmanta valekorqa paymanta llullasta parlanankupaj. Religionta kamachejkunaqa runasman nej kanku Jesusqa supaykunata qharqosqanta “supaykunaj kamachejninkoj atiyninwan” (Mar. 3:22). Juzgashajtinkutaj religionta kamachejkunaqa Jesusta juchacharqanku Diospa contranta parlasqanta nispa, runasmantaj yachaykuchisqanku Jesús wañuchisqa kananta mañakunankupaj (Mat. 27:20). Tiemponmantaj Cristoj discipulosnin predicayta qallarisqankutawan, enemigosninkoqa runasta “yachaykucherqanku” “contrankupi oqharikunankupaj”, qhatiykachanankupajtaj (Hech. 14:2, 19). Hechos 14:2 versiculomanta parlaspa, La Atalaya de 1 de diciembre de 1998 revistapi sutʼincharqa Satanás partemanta kajkunaqa, cristianospa predicasqankuta manapuni allinpajchu qhawasqankuta, paykunamantataj “sajra imasta parlasqankuta”. Ajinamanta runas mana uyarinankupaj, chejnikunankupajtaj.

16. ¿Imatá yuyarikunanchej tiyan mana allin imasta uyarispa?

¹⁶ Satanasqa kunankamapis llullakushallanpuni, “jallpʼapi kaj tukuy runasta chʼaukiyashan” (Apo. 12:9). Chayrayku Diospa llajtanmanta, chayri ñaupajman pusaj hermanosmanta mana allin imasta parlasqankuta uyarinchej chayqa, yuyarikuna tiyan imatachus Diospa enemigosnin ruwasqankuta Jesustawan discipulosnintawan. Bibliapi nikorqa jina, runasqa Jehovaj testigosninta qhatiykachashanku, llullastataj paykunamanta parlashanku (Mat. 5:11, 12). Noqanchejqa yachanchej maymantachus chay llullas jamusqanta. Chayrayku enemigosninchejqa mana engañayta atiwasunchu, tukuy imatataj ruwasun jarkʼakunanchejpaj.

17. ¿Imatá ruwananchej tiyan llulla cuentosta uyarejtinchej? (2 Timoteo 1:13; “Llulla cuentos chayamusojtin, ¿imatá ruwawaj?” nisqa recuadrotawan qhawariy).

¹⁷ Llulla cuentosta qhesachana. Apóstol Pabloqa sutʼita niwarqanchej imatachus ruwananchejta llulla cuentosta uyarejtinchej. 1 Timoteo 1:3, 4 versiculospi nin: “Amataj uyarichunkuchu llulla cuentosta”, nispa. Timoteomantaj kayta yuyaycharerqa: “Diospa contranpi kashan chay llulla cuentosta qhesachay”, nispa (1 Tim. 4:7). Kaypi tʼukurina: Uj wawitaqa imatapis pampapi tarispa chay rato siminman apan. Uj wiñay tukusqa runataj nipuni chaytaqa ruwanmanchu, maymantachus jamusqanta yachasqanrayku, maltataj ruwananta yachasqanrayku. Noqanchejpis llulla cuentosta mana uyarillanchejchu, “cheqa yachachiykunamanta” imasllata uyarinchej (2 Timoteo 1:13 leey).

18. ¿Imaynatá Diospa llajtanpi confiasqanchejta rikuchisunman?

¹⁸ Kaypeqa Jesús jina Diospa llajtan ruwasqanmanta kinsa imasllata yachakunchej. Bibliata estudiasqaykiman jina ashkhatawanrajchá tarinki. Hermanosta Diospa llajtanpi confianallankupajpuni yanapariy, Jehovatataj tukuy sonqo sirvillaypuni. Amataj ni ima Diospa llajtanmanta karunchasunanta saqeychu. Llajtannejta Jehovaqa munayninta juntʼashan (Sal. 37:28). Diospa llajtanpeqa munakuy tiyan, tukuy sonqotaj Jehovata sirvinku. Paykunawan khuska Diosta sirviytaj may sumajpuni. Amapuni pisipaj qhawanachu Diospa llajtanpi kaytaqa.