Jesús jina tukuy sonqo predicana

1. ¿Imaraykutaj Jehovaj testigosnin llulla cristianoswan mana kikinchu kanchej?

JEHOVAJ testigosnenqa tukuy sonqo predicasqanchejrayku, llulla cristianoswan mana kikinchu kanchej (Tito 2:14). Jinapis wakin kuteqa ichapis reparakusunman mana tukuy sonqochu predicashasqanchejta. Anciano jina sumajta llankʼaj hermano nin: “Wakin kuteqa mana predicaj llojsiyta munallanichu”, nispa. Ichá noqanchejwanpis ajinallataj kanman.

2. ¿Imaraykutaj mana atillasunmanchu tukuy sonqo predicayta?

² Ichapis Jehovapaj waj jinasmanta llankʼay astawan gustawasunman, predicaj riytaj mana anchata gustawasunmanchu. ¿Imajtin? Tantakuna Wasista ruwaypi chayri allinchaypi yanapakojtinchej, labores de socorropi yanapakojtinchej, chayri hermanosta kallpacharejtinchej, usqhayllata reparanchej ruwasqanchej mana qhasichu kasqanta. Chaytaj mayta kusichiwanchej. Chay imasta ruwashaspaqa hermanosninchejwan khuska kusisqas llankʼanchej, purajmantataj munanakunchej. Chantapis yachanchej hermanosninchej chay ruwasqanchejmanta mayta agradecekusqankuta. Predicajtinchejtaj mana ajinachu kanman. Ichapis ashkha watastaña kikin lugarllatapuni predicashanchej, pisi runasllataj uyariwanchej. Wakin runastaj ni uyarillaytapis munawanchejchu. Chantapis yachanchej tukukuy pʼunchay astawan qayllaykamusqanman jina, ichapis runas astawan churanakunawanchejta (Mat. 10:22). ¿Imataj yanapawasun kusisqallapuni predicanapaj chayri chay kusiyninchej astawan yapakunanpaj?

3. ¿Imatá Lucas 13:6-9 Jesusmanta yachachiwanchej?

³ ¿Imataj yanapawasunman tukuy sonqo predicanapaj? Jesuspa kausayninmanta ukhunchariy. Kay jallpʼapi kashajtin Jesusqa sinchʼillatapuni trabajarqa runasman willananpaj, willanan tiempo tukukushajtintaj astawanraj willarqa (Lucas 13:6-9 leey). Payqa higo sachʼanta kinsa watata cuidaj runawan kikinchakorqa, chay sachʼantaj mana poqosqachu. Ajinallatataj Jesuspis kinsa watata judiosman predicaspa karqa, pisi runasllataj discipulosninman tukorqanku. Higo sachʼayoj runaqa mana chay ratochu sachʼanta kʼuturpasqa mana poqonanta yuyaspa. Ajinallatataj Jesuspis mana predicayta saqerqachu, nitaj pisillatañachu predicarqa, manachayqa runaspa sonqonkuman chayananpaj astawan kallpachakorqa.

4. ¿Ima tawa imastataj Jesusmanta yachakusun?

⁴ Kay yachaqanapi parlarisun Jesús tukuy sonqo predicasqanmanta, astawanraj kay jallpʼapi sojta killasllataña kashajtin (Lucas 10:1 versiculomanta “Después de estas cosas” nisqa nota de estudiota leeriy). Jesusmanta tawa imasta yachakusun: 1) Jehovaj munayninta ruwayta ñaupajman churarqa, 2) profeciasta sumajta entienderqa, chayman jinataj ruwarqa, 3) Jehová yanapananpi atienekorqa, 4) mana yuyarqachu ni pi uyarinanta, yacharqa wakillanpis uyarinantapuni.

JEHOVAJ MUNAYNINTA RUWAYTA ÑAUPAJMAN CHURARQA

5. ¿Imaynatá Jesús rikucherqa Diospa munayninta kausayninpi ñaupajman churasqanta?

⁵ Jesusqa tukuy sonqo “Diospa Gobiernonmanta sumaj willaykunata” willarqa, Dios chaytapuni ruwananta munasqanta yachasqanrayku (Luc. 4:43). Paypajqa chayta ruway kausayninpi ñaupajpipuni karqa. Kay jallpʼapi uj mashkha killasllataña kashajtin, “Jesusqa llajtamanta llajta, ranchomanta rancho yachachispa” rerqa (Luc. 13:22). Chantapis waj discipulostawan wakicherqa pay jinallataj predicanankupaj (Luc. 10:1).

6. Jehovapaj waj jinasmanta llankʼajtinchejpis, ¿ima ruwaytataj kausayninchejpi ñaupajman churananchej tiyan? (Fotostawan qhawariy).

⁶ Kay tiempopipis Jehovawan Jesuswanqa munanku sumaj willaykunata willayta kausayninchejpi ñaupajman churananchejta (Mat. 24:14; 28:19, 20). Jehovapaj waj jinasmanta llankʼasqanchejqa astawan predicakunanpaj yanapakun. Tantakuna Wasista ruwanchej pikunamanchus predicanchej chay runas Jehovata yupaychaj jamunankupaj. Betelpi, chayman rijchʼakoj lugarespipis trabajakusqanqa astawan predicakunanpaj yanapakullantaj. Labores de socorropitaj yanapakunchej mana hermanosman necesitasqankuta qonallapajchu, manachayqa tantakuykunaman, predicacionmanpis watejmanta jamuyta atinankupaj. Amapuni qonqanachu imamanta nisqapis predicananchejta Jehová munasqanta, ajinamanta sonqonchej aysawasun astawan predicanapaj. Hungriamanta János sutiyoj anciano nin: “Yuyarikunipuni Jehovapaj imata ruwaypis mana predicay cuentachu kasqanta. Predicaypuni ñaupajpi kanan tiyan”.

7. ¿Imajtintaj Jehová munan siga predicananchejta? (1 Timoteo 2:3, 4).

⁷ Aswan kusiywan predicanapajqa, Jehová jina runasta khuyakunanchej tiyan. Payqa munan tukuy runas sumaj willaykunata uyarinankuta, japʼikunankutataj (1 Timoteo 2:3, 4 leey). Sumaj willaykuna runasta salvayta atisqanrayku, Jehovaqa yanapawanchej aswan sumaj willajkuna kananchejpaj. Munakuywan yachachiy folletopeqa sumaj yuyaychaykuna tiyan runaswan parlarikunanchejpaj, ajinamanta Bibliata estudiayta qallarinankupaj, Jesuspa discipulosninmantaj tukunankupaj. Willasqanchejta kay tiempopi mana japʼikojtinkupis, ichapis manaraj jatun ñakʼariy tukukushajtin japʼikuyta atenqanku. Kunan predicasqanchej ichapis aswan qhepaman yanapanqa Jehovata sirviyta munanankupaj. Chaywanpis siga predicajtillanchej ajina kanqa.

PROFECIASTA SUMAJTA ENTIENDERQA, CHAYMAN JINATAJ RUWARQA

8. ¿Imaynatá Jesusta yanaparqa profeciasta sumajta rejsisqan?

⁸ Jesusqa Bibliaj profeciasnin imaynatachus juntʼakunanta entiendesqanrayku, yacharqaña kinsa wata khuskanniyojllata predicananta (Dan. 9:26, 27). Yachallarqataj imaynatachus, chantá maykʼajchus wañuchinankuta (Luc. 18:31-34). Profeciasta sumajta rejsisqanrayku Jesusqa tukuy tiemponta churarqa tukuy sonqo predicananpaj, ajinamanta Diospa qosqan ruwayta tukuchananpaj.

9. Bibliaj profeciasnin, ¿imaynatá yanapawanchej tukuy sonqo predicanapaj?

⁹ Bibliaj profeciasninta sumajta entiendejtinchejqa, astawan predicayta munasun. Yachanchej tumpamantawan kay sajra mundo tukuchisqa kananta. Bibliaqa ñaupajmantaña nerqa qhepa pʼunchaykunapi imaynachus runas kanankuta, imaschus pasanantapis. Kay tiempopitaj rikushanchej chay profecías juntʼakushasqanta. Bibliaj profecianqa nillantaj “tukukuy tiempopeqa” sur ladomanta reywan, norte ladomanta reywan maqanakunankuta. Kunantaj entiendenchej sur ladomanta reyqa Reino Unidowan Estados Unidoswan ninakusqanta. Norte ladomanta reytaj, Rusiawan paywan ujchasqa suyuswan ninakusqanta, rikushanchejtaj iskayninku maqanakushasqankuta (Dan. 11:40). Daniel 2:43-45 versiculosmanta profeciaqa jatun lantej chakisninmanta parlan, nintaj uj atiyniyoj gobiernowan ninakusqanta. Kunantaj entiendenchejña chay atiyniyoj gobiernoqa Reino Unidowan Estados Unidoswan kasqankuta. Chay profeciata estudiasqanchejrayku, sutʼita yachanchej tumpamantawan Diospa Gobiernon kay jallpʼamanta tukuy gobiernosta chinkachinanta. Tukuy chay profeciastaj reparachiwanchej tukukuy pʼunchay chayamunanpaj niña unaychu faltasqanta, usqhayllatataj predicananchej kasqanta.

10. ¿Imaynasmantataj Bibliaj profeciasnin yanapawanchej siga predicanallapajpuni?

¹⁰ Bibliaj profeciasnenqa nillawanchejtaj qhepaman sumaj kausay kananta. Chay sumaj willaykunatataj tukuyman willaytapuni munanchej. Carrie sutiyoj hermananchejqa República Dominicanapi sirvin, paytaj nin: “Jehová Diosninchej aswan qhepaman sumaj kausayta apamunanta niwasqanchejpi tʼukurejtiy, tukuyman chayta willariyta munani. Runas llakiyta kausakushasqankuta rikuspa, ‘Jehová sumaj imasta apamunanta nisqanta paykunapis yachanallankutaj tiyan’ nispa nikuni”. Bibliaj profeciasnenqa yuyarichiwanchej Jehovaqa chaypipuni kashasqanta willasqanchejpi yanapanawanchejpaj, chaytaj kallpachawanchej siga predicananchejpaj. Hungriamanta Leila sutiyoj hermana nin: “Isaías 11:6-9 versículos reparachiwan Jehovaqa mayqen runallatapis yanapayta atisqanta kausayninta cambiananpaj. Chaytaj yanapawan tukuy runasman predicanaypaj, mana uyarinawankupaj jina kajkunamanpis”. Zambiamanta Christopher sutiyoj hermanotaj nin: “Marcos 13:10 versiculopi nikusqanman jinapuni mundo enteropi sumaj willaykuna willakushan. Chay profecía juntʼakunanpaj yanapakushasqaytaj may sumajpuni noqapaj”, nispa. Qantarí, ¿ima profeciastaj yanapasunki siga predicanaykipaj?

JEHOVÁ YANAPANANPI ATIENEKORQA

11. ¿Imaraykutaj Jesús Jehovapi atienekunan karqa tukuy sonqollapuni predicananpaj? (Lucas 12:49, 53).

¹¹ Jesusqa tukuy sonqollapuni predicananpaj Jehová yanapananpi atienekorqa. Payqa predicashaspa respetowanpuni runasta parlapayaj. Jinapis yacharqa Diospa gobiernonmanta sumaj willaykunata willajtin wakin runas phiñakunankuta, maytataj churanakunankuta (Lucas 12:49, 53 leey). Chantapis religionta kamachejkunaqa predicasqanmanta mayta chejnikoj kanku, ashkha kutispitaj wañuchiyta munarqanku (Juan 8:59; 10:31, 39). Chaywanpis Jesusqa predicallarqapuni, Tatan paywan khuska kashasqanta yachasqanrayku. Payqa nerqa ‘mana sapallanchu’ kashasqanta, manachayqa Tatan paywan khuska kashasqanta (Juan 8:16). Chantá nillarqataj: “Manataj sapallaytaqa saqerpawanchu, munasqantapuni ruwasqayrayku”, nispa (Juan 8:29).

12. ¿Imaynatá Jesús discipulosninta wakicherqa churanakuy kajtinpis predicanallankupajpuni?

¹² Jesusqa discipulosninta yuyaricherqa Jehová yanapananpi atienekuyta atisqankuta. Qhatiykachasqa kanankuta yachasqanrayku, kutin kutita nerqa Jehová yanapanantapuni (Mat. 10:18-20; Luc. 12:11, 12). Chantapis nillarqataj sumaj yuyayniyoj kanankuta (Mat. 10:16; Luc. 10:3). Runas willasqankuta mana uyariyta munajtinkutaj ama obliganankuta nerqa (Luc. 10:10, 11). Qhatiykachasqa kajtinkutaj waj ladoman ayqekunankuta yuyaycharqa (Mat. 10:23). Jesusqa Jehovapi atienekojtinpis, tukuy sonqo predicajtinpis, mana qhasita peligroman churakojchu (Juan 11:53, 54).

13. ¿Imaynapí yachanki Jehová yanapasunantapuni?

¹³ Kunanpis churanakullawanchejtaj. Chayrayku tukuy sonqo predicanallapajpuni Jehovaj yanapayninta necesitanchej (Apo. 12:17). Juan 17 capitulopi Jesuspa mañakusqanqa reparachiwanchej Jehová sapa ujninchejta yanapanawanchejtapuni. Payqa Jehovamanta mañakorqa apostolesninta cuidananta, Jehovataj uyarerqa. Hechos libro willawanchej imaynatachus Jehová apostolesta yanapasqanta, qhatiykachasqa kajtinkupis tukuy sonqo willanankupaj. Jesusqa Tatanmanta mañakullarqataj apostolesninpa willasqankuta japʼikojkunatapis cuidanallantataj. Chay mañakusqantaj noqanchejpajpis. Chayrayku Jehovaqa Jesuspa mañakusqanta ruwallanqapuni, imaynatachus apostolesta yanaparqa ajinata yanapallawasunpuni (Juan 17:11, 15, 20).

14. ¿Imaynapí yachanchej tukuy sonqo predicayta atillasqanchejtapuni? (Fototawan qhawariy).

¹⁴ Tukukuy pʼunchay qayllaykamusqanman jina, ichapis aswan difícil kanqa tukuy sonqollapuni predicay. Jinapis Jesús niwarqanchej necesitasqanchej yanapata japʼinanchejtapuni (Luc. 21:12-15). Jesús jinallataj, discipulosnin jinallataj mana pitapis obliganchejchu uyarinawanchejpaj, nitaj runaswan rimanakunchejchu. Predicajta mana saqewanchejchu chay suyuspipis hermanosninchejqa predicayta atillankupuni Jehovapi atienekusqanrayku, manataj kallpallankupichu. Imaynatachus Jehová ñaupa tiempomanta cristianosman “tukuynejpi allinta” willanankupaj atiyninta qorqa, ajinallatataj noqanchejmanpis atiyninta qowasun, maykamachus predicananchejta niwasun chaykama predicananchejpaj (2 Tim. 4:17). Amapuni kayta qonqakunachu: Sichus Jehovapi atienekusun chayqa, tukuy sonqo predicayta atillasunpuni.

MANA YUYARQACHU NI PI UYARINANTA

15. ¿Imataj Jesusta yanaparqa siga predicananpaj?

¹⁵ Jesusqa yacharqa wakin runasllapis sumaj willaykunata uyariyta munanankuta. Ajinata yuyasqantaj yanaparqa tukuy sonqo predicanallanpajpuni. 30 wata tukukuyta Jesusqa repararqa ashkha runasraj sumaj willaykunata uyariyta munasqankuta, chajraswantaj kikincharqa, nerqataj cosechanapaj poqosqaña kasqankuta (Juan 4:35). Watanman jinataj discipulosninta nerqa: “Cosechanaqa ashkha”, nispa (Mat. 9:37, 38). Aswan qhepamantaj watejmanta nerqa: “Cosechanaqa ashkha, […] cosechaj Dueñonmanta mañakuychej cosechanman oqharejkunata kachamunanpaj”, nispa (Luc. 10:2). Jesusqa yuyarikojpuni ashkha runasraj sumaj willaykunata japʼikuyta atisqankuta, pillapis sumaj willaykunata japʼikojtintaj mayta kusikoj (Luc. 10:21).

16. ¿Ima kikinchaykunamantataj Jesús parlarqa predicasqankupi sumaj rinanta ninanpaj? (Lucas 13:18-21; fototawan qhawariy).

¹⁶ Jesusqa discipulosninta yuyaricherqa willajtinku may sumaj rinanta, chaytaj yanaparqa tukuy sonqollapuni predicanankupaj. Iskay kikinchaykunasninmanta parlarina (Lucas 13:18-21 leey). Ujnin kikinchayninpi nerqa Diospa Gobiernonmanta willayqa uj mostaza mujuman rijchʼakusqanta, mayqenchus uj sachʼaman tukunankama wiñasqa chayman. Chaywanqa niyta munasharqa ashkha runas sumaj willaykunata japʼikunankuta, japʼikunankupajtaj ni ima jarkʼananta. Chantapis nillarqataj Diospa Gobiernonmanta willayqa levaduraman rijchʼakusqanta. Chaywanqa niyta munasharqa sumaj willaykuna mundo enteropi ashkha lugarespi predicakunanta, runastaj mana reparayllata pisimanta pisi kausayninkuta cambianankuta. Chay kikinchaykunawan discipulosninta yanaparqa predicajtinku sumaj rinanta reparanankupaj.

17. ¿Imataj yanapawasunman siga predicanallapajpuni?

¹⁷ Predicasqanchej mundo enteromanta ashkha runasta yanapashasqanpi piensarispaqa, siga predicayta munanchej. Sapa wata may chhika runas Jesuspa Wañuyninta Yuyarinapaj tantakuyman jamunku, noqanchejwantaj Bibliata estudiayta qallarinku. Paykunamanta ashkhastaj predicayta qallarinku, bautizakunkutaj. ¿Yachayta atisunmanchu mashkha runasrajchus willayninchejta japʼikunankuta? Mana. Chaywanpis yachanchej Jehovaqa may chhika runasta tantashasqanta manchay ñakʼariy tiempopi salvakunankupaj (Apo. 7:9, 14). Jehovaqa cosechaj Dueñon kasqanrayku, yachan may chhika runasraj sumaj willaykunata japʼikunankuta. Chayrayku predicanallanchejpuni tiyan.

18. ¿Imatá runas reparanankuta munanchej?

¹⁸ Jesuspa cheqa discipulosnenqa ñaupa tiempomantapacha tukuy sonqo predicasqankumanta rejsisqa kanku. Apostolesta mana manchachikuspa parlajta rikuspa, runasqa “repararqanku Jesuswan khuska purejkuna kasqankuta” (Hech. 4:13). Noqanchejpis munallanchejtaj runas reparanankuta Jesús jinallataj tukuy sonqo predicasqanchejta.