Bautizakuyta munajkunapaj tukuchanapaj yuyaychaykuna
Bautizakuyta atejkunaqa, Jehovaj testigosninpa jatun tantakuyninkupi bautizakunku. Bautizakojkunapaj discursanteqa, discursonta tukuchananpajña kashajtin bautizakuyta munajkunata “sayarikuwajchej” nisonqachej, kay iskay tapuykunaman kallpawan kutichinaykichejpaj.
1. ¿Juchasniykimanta pesachikunkiñachu, kausayniykitapis Jehová Diosman qopunkiñachu, creenkitajchu Diosninchejqa Jesusta kachamusqanta salvanawanchejpaj?
2. ¿Yachankichu bautizakuspaqa Jehovaj testigonña kanaykita, Diospa llajtanmantaj yaykusqaykita?
“Arí” nispa kutichejtiykeqa, “simiykiwan runaspa ñaupaqenpi” willashanki Jesús salvanawanchejpaj jamusqanpi creesqaykita, Jehová Diospa munayninta ruwanaykipaj kausayniykita qopusqaykita ima (Rom. 10:9, 10). Chayrayku orakuspa chay tapuykunapi tʼukurinayki tiyan. Ajinamanta bautizakunayki pʼunchay chayamojtin, tukuy sonqo chay tapuykunaman kutichinki.
¿Uj oracionpi Jehovaman ninkiñachu “qanllapajña kausasaj, qanllata yupaychasqayki, tukuy imamanta nisqaqa qanpa munayniykita ñaupajman churasaj” nispa?
¿Sonqomantapachapunichu bautizakuyllataña munanki?
¿Ima ropawantaj bautizakunayki kanman? (1 Tim. 2:9, 10; Juan 15:19; Fili. 1:10).
“Wajkunata jatunpaj qhawaspa, allin yuyaywan”, “Diosta tukuy sonqo yupaychaj” jina maychus kajta vistikunayki tiyan. Bautizakunaykipaj ropaykipis mana letrasniyojchu, nitaj dibujosniyojchu kanan tiyan. Chantapis mana wajkunata pʼenqachinaykipaj jinachu vistikunayki tiyan. Astawanqa ropayki llimphitu, chay diapaj jinataj kanan tiyan.
¿Bautizakushaspa imastataj mana ruwasunmanchu? (Luc. 3:21, 22)
Bautizakushaspaqa Jesús jina ruwana. Payqa yacharqa bautizakuy mana pujllakuy jinallachu kasqanta, chaytataj ruwasqanwan rikucherqa. Bautizakushaspaqa mana chanzakunachu, mana pujllakunachu, mana yakupi nadaj churakunachu, nitaj mana ruwanasta ruwanachu. Manallataj walejchu kanman uj premiotapis japʼishawaj jina kusikunayki. Bautizakuy pʼunchay mayta kusichiwajtinchejpis, chay pʼunchaytaqa jatunpaj qhawana.
Tantakuykunaman risqayki, hermanoswanpis ujchasqa kasqayki, ¿yanapasunkimanchu Diosllapaj kausanaykipaj?
¿Imaraykutaj allin kanman bautizakusqaykitawan siga uj sumaj horariota churakunayki Bibliata estudianaykipaj, predicanaykipaj ima?
ANCIANOSPAJ INSTRUCCIONES
Mana bautizasqa publicador “bautizakuyta munani” nisunkichej chayqa, “Bautizakuyta munajkunapaj tapuykuna” nisqa parteta ukhunchananta niychej. Chay parteqa kay folletopi 12 al 50 paginaspi kashan. Chantapis niwajchej “Manaraj bautizasqa publicadorespaj yuyaychaykuna” nisqa parteta leerinanta, chayqa kay folletoj 8 paginanpi kashan. Chaypi willashan imaynatachus pay wakichikuyta atisqanta ancianos tapuykunata ruwanankupaj. Chay partepi nin jina, bautizakuyta munajta tapushajtiykichejqa, payqa anotakusqasninta qhawaykuyta atin, kay folletotapis kicharisqata japʼiyta atin. Mana necesariochu chay tapuykunata ñaupajta piwanpis ukhunchananqa.
Bautizakuyta munajqa coordinador nisqa ancianoman willanan tiyan. Chantá “Bautizakuyta munajkunapaj tapuykuna” nisqa parteta leenan tiyan. Leesqantawantaj coordinador nisqa ancianoqa payta tapurinan tiyan uj oracionpi Jehová Diosman “kausayniyta qopuyki, munaynillaykita ruwanaypaj” nispa nisqantañachus manachus. Bautizakuyta munaj chayta ruwasqantaña nejtenqa, coordinador nisqa ancianoqa iskay ancianosta nenqa tapuykunasta ruwanankuta. Mana uj ancianollachu iskaynin partesta tapunan tiyan. Chay tapuykunata ruwanapajqa mana suyanachu tiyan ima fechachus uj asamblea kananta willakunantaraj.
Sapa parteta uj horapi jina ruwawajchej, astawan tiempo necesitakojtintaj aswan unaysitupipis ruwawajchej. Sapa parteta qallarishaspa tukuchashaspataj uj oracionta ruwanaykichej tiyan. Ni ancianospis, ni bautizakuyta munajpis apurakunanchu tiyan usqhayllata tapuykunata tukuchananpaj. Ancianos, tapuykunata ruwanaykichej kajtenqa bautizakuyta munajwan usqhayllata tantakunaykichej tiyan.
Bautizakuyta munajkunata ujmanta uj tapunaqa aswan sumaj, ashkha ukhuta ujllapi tapunamanta nisqaqa. Bautizakuyta munaj sapa tapuykunaman kutichejtenqa, ancianosqa reparayta atinkichej Bibliaj nisqanta entiendesqantachus manachus. Ajinamanta sutʼita yachankichej bautizakunanpaj wakichisqañachus manachus kasqanta. Chantapis bautizakuyta munajta sapallanpi tapojtiykichejqa, mana manchikuspa parlarillanqa. Qhariwarmi kajkunataqa iskayninkuta ujllapi tapuykunata ruwawajchej.
Bautizakuyta munaj warmi kajtenqa, ancianos tapuykunata ruwananku tiyan wajkunaj rikunankuta, jinapis parlasqankuta mana pipis uyarinanchu tiyan. Iskaymanta tapuykunata ruwanaykichej kajtenqa, uj ancianowan chayri uj siervo ministerialwan acompañachikuwajchej.
Uj congregacionpi pisi ancianoslla kajtenqa, uj wakichisqa siervo ministerial ñaupaj kaj partemanta tapuykunata ruwanman. Iskay kaj partemanta tapuykunatataj ancianospuni ruwananku tiyan. Uj congregacionpi chay tapuykunata ruwanapaj mana wakichisqa hermanos kankuchu chayqa, waturej hermanota wajyarinkuman aswan qayllapi kaj congregacionmanta ancianoswan yanapachikunankupaj.
Bautizakuyta munaj menor de edad kajtenqa, tapuykunata ruwashajtinku testigo tatasnin iskayninku chayri ujninku chaypi kananku tiyan. Mana tatasninku chaypi kayta atejtinkoqa, sapa parteman jina, iskay ancianos chayri uj anciano uj siervo ministerialwan tapuykunata ruwankuman.
Ancianos, sumajta qhawariychej bautizakuyta munaj atisqanman jina Bibliaj yachachiykunasninta sutʼitachus manachus entiendesqanta. Chantapis sumajta reparaychej tukuy sonqochus manachus Bibliata kasukuyta munasqanta, Diospa llajtantapis jatunpaj qhawasqanta. Bautizakuyta munaj mana sutʼita Bibliaj yachachiykunasninta entiendenchu chayqa, arreglosta ruwaychej uj hermano payta yanapananpaj. Ajinamanta aswan qhepaman bautizakuyta atinanpaj. Ichá wakenqa unayninmanraj predicacionta jatunpaj qhawanqanku, Diospa llajtanpa kamachiykunasnintapis kasukonqanku. Sapa anciano qhawarikunaykichej tiyan mashkha tiempopichus sapa partemanta tapuykunata ruwanaykichejta, jinamanta reparanaykichejpaj bautizakunanpaj wakichisqañachus manachus kasqanta. Jinapis tukuynin tapuykunasta ruwanaykichej tiyan.
Tapuykunata ruwaj ancianosqa iskaynin partesta tapusqaykichejtawan tantakunaykichej tiyan, qhawarinaykichejpaj bautizakuyta atisqantachus manachus. Chaytaqa atisqanman jina qhawariychej, reparaychej bautizakuyta munaj leeyta atisqantachus manachus, sumaj yuyayniyojchus manachus kasqanta, waj imastawan. Bautizakuyta atinku pikunachus Jehovata tukuy sonqo munakunku, Bibliaj yachachiykunasnintataj entiendenku chaykuna. Qankunaj yanapaykichejwanqa bautizakuyta munajkuna wakichisqa kanqanku sumaj willaykunata willamunankupaj.
Chaymantaqa ujniykichej chayri iskayniykichej bautizakuyta munajwan tantakunaykichej tiyan, ninaykichejpaj bautizakuyta atisqantachus manachus. Bautizakuyta atin chayqa, “Bautizakuyta munajkunapaj tukuchanapaj yuyachaykuna” nisqa parteta paywan qhawaykuychej, chayqa kay folletopi 52 al 54 paginaspi kashan. Bautizakuyta munaj Wiñaypaj kusisqa kausakuy librota manaraj estudiayta tukunchu chayqa, bautizakusqantawan estudiayta tukunanpaj kallpachaychej. Chantapis niychej: “Bautizakusqayki fechataqa Registro de publicador de la congregación nisqapi churasqayku. Chayta ruwayku Diospa llajtan mundontinmanta testigosta sumajta qhawananpaj, congregacionpi llankʼanaykipaj, noqaykupis maychus tiemponpi kallpachanaykupaj, yuyaychanaykupajtaj”, nispa. Chantapis mosoj publicadoresta niwajchej: “Sutiykita, fecha de nacimientoykita, waj datostawan apaykachakun kay ‘Política global de protección de datos personales de los testigos de Jehová’ nisqanman jina, chaytaj Internetpi jw.org nisqapi kashan”, nispa. Kay tantakuytaqa 10 minutosllapi chayri aswan pisillapi ruwanaykichej tiyan.
Bautizakusqanmanta uj watanman, iskay ancianos paywan tantakunaykichej tiyan kallpachanaykichejpaj, yuyaychanaykichejpajtaj. Ujnin ancianoqa gruponmanta encargado kanan tiyan. Bautizakoj menor de edad kajtenqa, testigo tatasnin chaypi kananku tiyan. Kay tantakoyqa sonqochanapaj, kallpachanapaj jinataj kanan tiyan. Imaynatachus ñauparisqanmanta parlariychej, yuyaychariychejtaj imaynatachus ñauparillaytapuni atisqanta Bibliata sapallanpi estudiaspa, sapa día leespa, sapa semana familiapi Diosta yupaychaspa, tantakuykunaman rispa, sapa semana predicaspa ima (Efe. 5:15, 16). Sichus Wiñaypaj kusisqa kausakuy librota manaraj estudiayta tukuchanchu chayqa, uj hermanota niychej payta estudiachinanta. Mosoj hermanota sonqomantapacha allinta ruwashasqanta niychej. Allin kanman ujllamanta chayri iskay imasllamanta parlarispa yuyaycharinaykichej.