¿Kay mundo chinkachisqachu kanqa?
Ichapis uyarerqanki Biblia kay mundoj tukukuyninmanta parlasqanta (1 Juan 2:17). ¿Tukuy runas chinkachisqa kanankumantachu parlashanman? ¿Jallpʼapi niña kausay kananmantachu parlashanman? Chayrí, ¿jallpʼa tukuchisqa kananmantachu parlashanman?
BIBLIAQA MANA CHAYKUNA CHINKANANMANTACHU PARLAN.
¿Imastaj mana chinkanqachu?
RUNAS
Biblia nin: ‘Dios kay pachata ruwarqa, kamacherqataj ama chʼusajlla kananpaj, manachayqa kausayniyojkuna chaypi tiyakunankupaj’ (ISAÍAS 45:18).
JALLPʼA
Biblia nin: “Runaqa mirashantaj, wañushantaj, kay pachataj kikillampuni sayan” (ECLESIASTÉS 1:4).
¿IMA NIYTA MUNAN? Biblia nisqanman jina, jallpʼaqa mana jaykʼaj chinkachisqachu kanqa, kausayniyojkunapis chaypi tiyakonqankupuni. Jina kajtin, Biblia kay mundoj tukukuyninmanta parlaspa, ¿imamantá parlashanman?
KAYPI TʼUKURIY: Bibliaqa kay mundoj tukukuyninmanta parlaspa Noejpa tiemponwan kikinchan. Chay tiempopeqa ‘imaymana jucha kay jallpʼaman juntʼarqa’ (Génesis 6:12, 13). Chaywanpis Noeqa cheqan runa karqa. Chayrayku Diosqa Noeta familiantawan salvarqa, sajra runastataj Jatun Parapi chinkacherqa. Chaymanta parlaspa Biblia nin: “Chay tiempomanta mundoqa chinkachisqa karqa, maypachachus yakuwan pʼampasqa karqa, chaypacha”, nispa (2 Pedro 3:6). Ajina karqa chay tiempomanta mundoj tukukuynenqa. ¿Imatá chay kutipi Dios chinkacherqa? Sajra runasta, manataj jallpʼatachu. Chayrayku Biblia kay mundoj tukukuyninmanta parlaspa, mana kay jallpʼa tukuchisqa kananmantachu parlashan. Astawanpis sajra runas, sajra ruwaykuna ima tukuchisqa kanankumanta parlashan.
¿Imastaj chinkanqa?
LLAKIYKUNA SAJRA RUWAYKUNA
Biblia nin: “Tumpamantawanqa manaña sajra runas kanqankuchu; may jinata maskʼaspapis, manaña paykunata tarinkiñachu. Llampʼu sonqoyojkunatajrí kay pachata herenciata jina japʼenqanku, allin kawsaypitaj kusisqa kanqanku” (SALMO 37:10, 11).
¿IMA NIYTA MUNAN? Noejpa tiemponpi Jatun Paraqa mana wiñaypajchu sajra ruwaykunata chinkacherqa. Imaraykuchus Jatun Para pasasqantawan, sajra runasqa kausayta llakiyman tukuchillarqankutaj. Chaywanpis Diosqa tumpamantawan sajra imasta wiñaypaj chinkachenqa. Bibliapi nin jina “manaña sajra runas kanqankuchu”. Diosqa Gobiernonnejta sajra ruwaykunata chinkachenqa. Chay Gobiernotaj cielomantapacha kay jallpʼapi kasukoj runasta kamachenqa.
KAYPI TʼUKURIY: ¿Imataj kanqa kay tiempomanta gobiernoswan? ¿Diospa Gobiernonta apoyanqankuchu? Bibliaqa nin mana apoyanankuta. Astawanpis Diospa Gobiernonpa contranpi oqharikonqanku (Salmo 2:2). Diospa Gobiernontaj kay jallpʼapi kaj tukuynin gobiernospa cuentanmanta kamachenqa. Chay Gobiernotaj ‘wiñaypaj sayanqa’ (Daniel 2:44). ¿Imaraykutaj gobiernos manaña kamachinankuchu tiyan?
¿IMATÁ NECESITANCHEJ?: Gobiernos chinkanankuta
Biblia nin: ‘Runaqa kausayninpi imatachus ruwananta mana niyta atinchu’ (JEREMÍAS 10:23).
¿IMA NIYTA MUNAN? Runasqa mana noqanchejpura kamachinakunapajchu ruwasqa kanchej. Gobiernosqa mana allinta kamachiyta atinkuchu, nitaj problemastapis allinchayta atinkuchu.
KAYPI TʼUKURIY: Uj libro nisqanman jina, gobiernosqa “mana chinkachiyta atinkuchu wajchayayta, yarqhayta, onqoykunata, terremotosta, loco parasta, sinchʼi wayrasta, guerrasta, imaymana maqanakuykunata ima”. Chay libro nillantaj: “Wakin runas creenku mundontinpi uj gobiernolla chay llakiykunata wiñaypaj chinkachiyta atisqanta”, nispa. Jinapis, mundontinpi uj gobiernolla kamachejtinpis, pantaj runaslla kamachishasqankurayku chay llakiykunata mana chinkachiyta atinkumanchu. Diospa Gobiernollan atiyniyoj tukuy llakiykunata wiñaypaj chinkachinanpaj.
¡Chay willayqa may sumajpuni! Imaraykuchus kay sajra mundoqa tukuchisqa kanqa, Diostaj sumaj kausayta apamonqa. Chayrayku Biblia nisqanman jina, kʼacha runasqa kay mundoj tukukuyninmanta uyarispa mana manchachikunankuchu tiyan.
¿Maykʼajtaj chay imas kanqa? Qhepan yachaqanapi Bibliawan chay tapuyman kutichikonqa.