¿Jesús nisqanman jina maykʼajtaj kay mundoj tukukuynin kanqa?
Yachakunchej jina, Biblia kay mundoj tukukuyninmanta parlaspa, mana parlashanchu kay jallpʼa chayri runas chinkachisqa kanankumanta. Astawanpis parlashan sajra runas, sajra ruwaykuna ima chinkachisqa kanankumanta. Jinapis ¿Biblia ninchu maykʼajchus kay sajra mundo chinkachisqa kananta?
JESÚS NERQA:
“Rijchʼarisqallapuni kaychej. Qankunaqa mana yachankichejchu ima pʼunchaychus, ima horachus chay kananta” (MATEO 25:13).
“Wakichisqa kaychej, ama puñuychejchu. Qankunaqa mana yachankichejchu maykʼajchus señalasqa tiempo kananta” (MARCOS 13:33).
Kay jallpʼapeqa ni pipis yachanchu maykʼajchus kay mundoj tukukuynin kananta. Chaywanpis Diosqa ‘ima pʼunchaychus, ima horachusʼ kay mundoj tukukuynin kananta yachan (Mateo 24:36). Jinapis kay mundoj tukukuynin qayllapiñachus manachus kashasqanta yachayta atisunman. Jesusqa discipulosninman nerqa imaschus kananta kay mundoj tukukuynin qayllamushajtin.
¿IMASTAJ KANAN KARQA?
Jesús nerqa ‘kay mundoj imasninpa tukukuyninmantaʼ imaschus señal jina kananta. Pay nerqa: “Uj aylloqa waj aylloj contranta oqharikonqa, uj suyupis waj suyoj contranta. Kaynejpi jaqaynejpitaj yarqhaykuna, jallpʼa ikhakuykuna ima kanqa”, nispa (Mateo 24:3, 7). Nillarqataj “wañuchej onqoykuna” kananta (Lucas 21:11). ¿Reparankichu imaynatachus Jesuspa nisqan juntʼakushasqanta?
Guerras, yarqhay, terremotos, onqoy ima astawan yapakusqanrayku ashkha runas ñakʼarinku. 2004 watapi océano Índico nisqapi uj terremoto kasqanrayku, mama qochamanta yaku wasarimorqa, chaytaj 225 mil runasta jina wañucherqa. Chantá kinsa wataspi COVID-19 onqoywan mundontinpi casi 7 millones wañorqanku. Jesús nerqa jina, kay imas kasqanqa rikuchiwanchej kay mundoj tukukuynin qayllapiña kasqanta.
“QHEPA PʼUNCHAYKUNA”
Bibliaqa nin kay mundoj tukukuynin qayllata uj tiempo kananta, chay tiempotataj ‘qhepa pʼunchaykuna’ nispa sutichan (2 Pedro 3:3, 4). Kay 2 Timoteo 3:1-5 nin jina qhepa pʼunchaykunapeqa runasqa aswan sajrasman tukunanku karqa (“Mundoj tukukuynin qayllapi kay imas kanan karqa” nisqa recuadrota qhawariy). ¿Reparankichu kay tiempopi runasqa paykunallapi yuyasqankuta, usqhayta phiñakusqankuta, qolqeta munakusqankuta, runa masinkutataj sufrichisqankuta ima? Ajina kasqanqa rikuchillawanchejtaj kay mundoj tukukuynin qayllapipuni kasqanta.
¿Mashkha tiempotaj kay qhepa pʼunchaykuna kanqa? Biblia niwanchej “pisi tiempolla kananta”. Chantá Diosqa kay ‘jallpʼata pierdechejkunata tukuchenqa’ (Apocalipsis 11:15-18; 12:12).
TUMPAMANTAWAN JALLPʼAQA UJ PARAISO KANQA
Diosqa kay sajra mundota chinkachinanpaj uj pʼunchayta, uj horatawan churanña (Mateo 24:36). Chaywanpis Diosqa “mana munanchu ni pi chinkachisqa kananta” (2 Pedro 3:9). Dios munan tukuyninchej payta rejsinanchejta, kasukunanchejta ima. Ajinamanta kay mundoj tukukuynin chamojtin salvakunanchejpaj paraisopitaj kausakunanchejpaj.
Diosqa kamachisninnejta jallpʼantinpi tukuy runasta Palabranmanta yachachishan. Ajinamanta tukuypis yachananchejpaj imatachus ruwananchej kasqanta paraisopi tiyakunapaj, maypichus Diospa Gobiernon kamachenqa chaypi. Jesús nerqa Diospa Gobiernonmanta sumaj willaykunaqa ‘jallpʼantinpi willakunanta’ (Mateo 24:14). Mundontinmanta Jehovaj testigosnenqa Bibliaj sumaj willaykunasninmanta may chhika horasta predicanku, yachachinku ima. Jesús nerqa niraj tukukuy chamushajtin, kay sumaj willaykunata jallpʼantinpi willakunanta.
Rikunchej jina, gobiernosqa tumpamantawan chinkachisqa kanqanku. Chaywanpis kay mundoj tukukuynin chamojtin salvakuyta atisqanchejta yachay, paraisopitaj kausakuyta atisqanchejta yachay, may sumajpuni. Qhepan yachaqanapi yachakusun imatachus ruwananchej kasqanta paraisopi kausakunapaj.
Jesús ‘qhepa pʼunchaykunapi’ imachus kananta nisqanqa suyakuyniyoj kanapaj yanapawanchej.