Diosta rejseyqa payman qayllaykuchiwanchej
Diosninchejqa manchay kʼacha, rejsiyta munanapaj jina, nitaj mana rikukoj kallpallachu. Payqa rejsinanchejta, amigosnin kananchejta ima munan. Chayrayku paymanta ashkha imasta willawanchej (Juan 17:3; Santiago 4:8).
Diosninchejqa sutiyoj
‘Yachachunku qan, Jehová sutiyoj, qanlla Altísimo kasqaykita tukuy kay pacha patapi’ (SALMO 83:18, Biblia Quechua de Cuzce).
Bibliaqa yachachiwanchej Jehová Dios paylla kʼata cheqa Dios kasqanta, paytaj tukuy imata ruwasqanta. Chayrayku payllata yupaychana tiyan (Apocalipsis 4:11).
Jehovaqa munakuyniyoj Dios
“Diosqa munakuymin” (1 JUAN 4:8).
Jehová Diosta rejsisunman Biblianejta ruwasqasninnejta ima. Jehová Diosqa manchay munakuyniyoj. Tukuy ima ruwasqanpis munakuwasqanchejrayku ruwan. Jehová Diosta astawan rejsispaqa payta astawan munakunchej.
Jehová Diosqa perdonawanchej
“Qanqa perdonaj Diosmin kanki” (NEHEMÍAS 9:17).
Jehová Diosqa yachan pantaj runas kasqanchejta, chayrayku perdonayta munawanchej. Paymanta perdonta mañakojtinchej, mana allin kaj imastataj saqepunapaj kallpachakojtinchej, payqa perdonawasun. Niñataj watejmanta juchanchejta yuyarikonqachu (Salmo 103:12, 13).
Diosqa paymanta mañakunanchejta munan
Jehová ‘Diosqa payta wajyakojkunaj qayllanpi kashan, yanapata mañakusqankuta uyarispa’ (SALMO 145:18, 19).
Jehová Diosqa mana munanchu lantisnejta chayri waj imasnejta payta yupaychananchejta. Imaynatachus uj munakuyniyoj tata wawasninta uyarin, kikillantataj Diosninchejpis mañakusqanchejta uyarin.