¿Kausay tijrakusqanman jinachu willasun?
1. Runaj kausaynin tijrakusqanrayku, ¿imatá ruwananchej tiyan?
1 Watamanta wata, runaj kausaynin sapa kuti tijrakun. Chayrayku ima horaspichus willaj risqanchejta, imaynatachus, imamantachus runaswan parlasqanchejta ima, tijrananchej kanqa. Chayta ruwanapaj, ¿wakichisqachu kanchej?
2. Jehovaj llajtanwan khuska rinallapajpuni, ¿imaraykú waj jinasmantawan willananchej tiyan?
2 Imaynatachus willanchej. Ñaupa tiempomantapacha, cristianosqa runaman willanapaj tukuy imata ruwanchej. Jesús discipulosninta ñaupaj kutirayku willanankupaj kachashajtin, ama wayaqata, nitaj qolqeta apanankuta nerqa (Mat. 10:9, 10). Chaywanpis aswan qhepaman, waj jinatañataj kamacherqa. ¿Imaraykú? Discipulosnin qhatiykachasqas kanankuta, tukuynejmantaj willaj rinankuta yachasqanrayku (Luc. 22:36). Pasaj pachaj wataspi, Jehovaj llajtanqa willayniyoj papelesnejta, radionejta, parlanteyoj autosnejta, waj imasnejta ima runaman willarqa. Chaywanpis kunanqa, runasta manaña wasisninkupi tarinchejchu. Chayrayku mana wasimanta wasillachu willanchej, manaqa mayllapipis kashaspa, maypichus ashkha runa kan chaypipis. Pʼunchaynintinta llankʼaj runasta taripanapajtaj, chʼisisninta willanchej. Arí, Jehová Diospa carretanqa maynintachus purinanta tijrachishan. ¿Chaywan khuskachu rishanchej? (Eze. 1:20, 21.)
3. ¿Imatá ruwasunman runasman aswan sumajta willanapaj?
3 Imamantachus runaswan parlarinchej. Maypichus willanchej chaypi, ¿imataj runasta astawan llakichin? ¿Qolqechu? ¿Familiachu? ¿Suwas miraykusqanchu? Chaykunapi tʼukureyqa, imamantachus parlananchejta yachanapaj yanapawasun (1 Cor. 9:20-23). Runas imatachus yuyasqankuta niwajtinchejtaj, wakichikusqanchejman jina parlanamantaqa, imamantachus yachayta munasqankumanta parlarina.
4. ¿Imaraykú willayninchejta tijrana tiyan?
4 Tumpamantawan kay pachaj imasnin tukukaponqa, jatun ñakʼariytaj qallarenqa. “Pisi tiempollaña kashan” (1 Cor. 7:29). Chayrayku runaj kausaynin tijrakusqanman jina, willayninchejta tijrana tiyan. Ajinallamanta ruwayninchejta kay pisi tiempopi maychus kajta juntʼasun.