Diosqa Wawanta kausarichin

JESUSQA amigon Lázaro wañupojtin waqarikorqa. Jehovarí, Jesusta ñakʼarejta, wañupojta ima rikuspa, ¿llakikorqachu?... Bibliaqa wakin imas Diospa ‘sonqonta nanachisqanta’ chayri llakichisqanta nin (Salmo 78:40, 41; Juan 11:35).

Munasqa Wawanta wañojta rikuspa, ¿imaynataj Jehová kashanman karqa?... Jesusqa yacharqa Tatan paymanta yuyarikunanta. Chayrayku wañupushajtinña nerqa: ‘Tatáy, makisniykiman kausayniyta churani’, nispa (Lucas 23:46).

Jesusqa Dios kausarichimunanta yacharqa, nitaj aya pʼampanapichu saqerparinanta. Jesús kausarisqanmanta qhepaman, apóstol Pedroqa imatachus Biblia Jesusmanta nisqanta oqharerqa, nerqataj: ‘Jesusqa mana aya pʼampanapichu pʼampasqa qhepakorqa, nitaj aychanpis ismorqachu’, nispa (Hechos 2:31; Salmo 16:10). Jesuspa cuerponqa mana unaytachu pʼampasqa karqa. Chayrayku mana ismorqachu, nitaj asnaykorqachu.

Jesusqa Jallpʼapi kashaspa, yachachisqasninman willarqa mana unaytachu wañusqa kananta. Pay nerqa: ‘Wañuchiwanqanku, kinsa pʼunchayninmantaj kausarinpusaj’, nispa (Lucas 9:22). Chayrayku yachachisqasnenqa, Jesús kausarinpojtin mana tʼukunankuchu karqa. ¿Jinachu karqa?... Chayta yachakuna.

Jesusqa viernes tardepi las tres chayta jatun rakhu kʼaspipi warkhusqa wañuporqa. Qhapaj runa Josetaj, chayta yachaytawan, kamachej Pilatomanta ayanta mañaj rerqa. Joseqa judiospa juntankumanta karqa, pakayllamantataj Jesuspi creej. Payqa Jesuspa cuerponta uraykuchispa, huertapi kaj aya pʼampanaman aparqa.

Chantá Jesusta aya pʼampanaman churaykuytawan, jatun rumiwan wisqʼaykorqa. Kinsa pʼunchayninman, domingo karqa, nirajtaj sutʼiyamusharqachu. Kuraj sacerdotespa kachasqanku soldadostaj aya pʼampanata qhawasharqanku. ¿Imaraykutaj?...

Kuraj sacerdotesqa Jesús “kausarimusaj” nisqanta uyarerqanku. Yuyarqankutaj yachachisqasnin Jesuspa ayanta suwaytawan ‘kausarinpun’ nispa ninankuta. Mana chay kananpajtaj soldadosta churarqanku. Laqhallaraj kashajtintaj, jallpʼaqa kharkatiterqa, uj kʼanchaytaj rikhurerqa. ¡Jehovaj angelnin karqa! Soldadosqa manchariywan titilla kasharqanku. Chantá angelqa aya pʼampanaman rispa, punkupi kaj rumita tanqarparqa. Aya pʼampanataj, ¡chʼusaj kasharqa!

Apóstol Pedro aswan qhepaman nerqa jinapuni karqa, ‘Diosqa Jesusta kausarichimorqa’ (Hechos 2:32). Jehovaqa Jesusta cielopaj cuerpoyojta kausaricherqa, nisunman uj angelta jina. Jesusqa niraj Jallpʼaman jamushaspa imayna cuerpoyojchus karqa, kikin cuerpoyoj kausarerqa (1 Pedro 3:18, NM). Jinapis runas payta rikunankupajqa, aycha cuerpoyoj rikhurinan karqa. ¿Chaytachu ruwarqa?... Qhawarina.

Inti llojsimushajtin, soldadosqa riporqankuña. María Magdalenataj, waj warmiswan aya pʼampanaman risharqa. Rishaspataj ninakusharqanku: ‘¿Pitaj aya pʼampana punkupi kaj rumita tanqaripuwasunri?’, nispa (Marcos 16:3). Chayanankupajqa, rumi tanqarpasqaña, aya pʼampanataj chʼusaj kasharqa. María Magdalenaqa usqhayllata apostolesman chayta willaj rerqa.

Chay ujnin warmistajrí aya pʼampanapi qhepakorqanku. Tapukusharqankutaj: ‘¿Maypitaj Jesuspa ayan kashanmanri?’, nispa. Jinallapi iskay runas qayllankupi rikhurerqanku, lliphipishaj ropasniyoj. Paykunaqa ángeles karqanku. Warmismantaj nerqanku: ‘¿Imaraykú Jesusta kaypi maskʼashankichejri? Payqa kausaripunña. Usqhayta rispa, yachachisqasninman willamuychej’, nispa. Chay warmis usqhayta rishajtinku, uj runawan tinkorqanku. ¿Yachankichu piwanchus?...

Jesuswan tinkorqanku. Payqa aycha cuerpopi paykunaman rikhurispa nerqa: ‘Rispa yachachisqasniyman willamuychej’, nispa. Chay warmistaj may kusisqa rerqanku. Yachachisqasnin kasharqanku, chayman chayaspataj, ‘¡Jesusta rikuyku! ¡Kausashan!’, nispa nerqanku. María Magdalenaqa, Pedroman, Juanman ima, Jesuspa aya pʼampanan chʼusaj kashasqanta willarqaña. Dibujopi qhawashanki jinataj, paykunapuni chayta qhawarej rerqanku. Pedrowan Juanwanqa, Jesús maytʼusqa karqa chay sabanasllataña rikorqanku. Nitaj ni imanakuyta aterqankuchu. Jesús kausarimusqanta creeyta munaspapis, mana atillarqankuchu.

Chay domingollapitaj, Jesusqa iskay yachachisqasninman rikhurerqa, Emaús ranchoman rishajtinku. Jesusqa qayllaykuytawan paykunawan parlaspa rerqa. Paykunataj Jesusta mana rejserqankuchu, imaraykuchus waj cuerpoyoj kasharqa. Chantá paykunawan mikhorqa. Paykunaqa Diosman graciasta qojtinraj, Jesusta rejsikaporqanku. May kusisqastaj usqhayllata Jerusalenman kutirerqanku. Chaytaj karupi kasharqa. Ichá Jesusqa, chantaraj Pedroman rikhurerqa kausarisqanta rikuchinanpaj.

Chay chʼiseqa, Jesuspa ashkha yachachisqasnin uj wasipi tantakorqanku. Chay wasej punkusnenqa wisqʼasqa kasharqa. Jinallapi Jesusqa chaupinkupi rikhurerqa. Ajinamanta yacharqanku Jesús kausarinpusqantapuni. Chayta yachaspa, ¡maytachá kusikorqanku! (Mateo 28:1-15; Lucas 24:1-49; Juan 19:38–20:21).

Jesusqa 40 pʼunchaykunata, imaymana aycha cuerpoyoj yachachisqasninman rikhurerqa. Ajinamanta Jesús kausashasqanta yacharqanku. Chantá Jesusqa cieloman riporqa, Tatanpa ladonman (Hechos 1:9-11). Yachachisqasnenqa Jesusta Dios kausarichisqanta tukuyman willayta qallarerqanku. Sacerdotes maqajtinkupis, wakinta wañuchejtinkupis, willallarqankupuni. Paykunaqa yacharqanku, wañojtinkupis Diosqa Jesusta jina kausarichinanta.

Jesuspa yachachisqasnenqa, mana kay tiempomanta runas jinachu karqanku. Wakin suyuspi runasqa, Jesús kausarimusqanta yuyarina tiempopi, conejospi, pintasqa runtuspi imalla yuyanku. Bibliatajrí mana chaykunamanta parlanchu. Astawanqa Diosta sirvinanchejta nin.

Jehová, Wawanta kausarichisqanta runasman willaspa, Jesuspa yachachisqasnin jina ruwasun. Wañuchiyta munawajtinchejpis, ama manchachikunachu. Wañupusun chaypis Jehovaqa yuyarikuwasun, Jesusta jinataj kausarichiwasun.

Jehová kamachisninmanta yuyarikusqanta, wañupojtinkupis kausarichinanta yachaspa, ¿maytacharí kusikunchej?... Chayta yachaspaqa, Diosta kusichiyta munanchej. Kusichiyta atisqanchejta, ¿yacharqankichu?... Qhepanpi chayta yachakusun.