Cristiano Kausayninchej tantakuypaj referencias
4-10 DE MARZO
BIBLIAMANTA SUMAJ YACHACHIYKUNA | ROMANOS 12-14
“¿Ima niyta munan Cristo jina munakuyta yachay?”
(Romanos 12:10) Familia jina tukuy sonqo munanakuychej. Wajkunata jatunpaj qhawaypitaj ñaupajpi kaychej.
it-1-S pág. 429
Familia jina munakuy
Tukuy congregacionpi kajkunaqa familia jina munakunanchej tiyan. Griego parlaypi fi·la·del·fí·a palabraqa niyta munan “hermanosta munakuy” (Ro 12:10; Heb 13:1; leerillaytaj 1Pe 3:8). Chayrayku congregacionpeqa uj familia jina sumajta kausakunanchej tiyan, ujchasqataj kananchej tiyan. Congregacionpi familia jina munanakuspa kausakojtinchejñapis, astawanraj munakuypi wiñanallanchejpuni tiyan (1Te 4:9, 10).
Griego parlaypi fi·ló·stor·gos palabraqa “munanakuy” niyta munan. Chay palabratataj oqharikun uj runa waj runawan allin amigos kasqankumanta, sumajta kausakusqankumanta ima parlanapaj. Stér·gō palabratataj sapa kuti oqharikun familiapi munanakuy kasqanmanta parlanapaj. Apóstol Pabloqa cristianosman nerqa tukuy sonqo munanakuspa kausakunankuta (Ro 12:10). Chantapis nillarqataj qhepa pʼunchaykunapi runas, “runa masinkuta mana munakojkuna” kanankuta, chay runastaj jallpʼamanta chinkachisqa kanankuta. Griego parlaypitaj mana munakojkuna palabrapaj á·stor·goi palabrata churakun (2Ti 3:3; Ro 1:31, 32).
(Romanos 12:17-19) Ama pimanpis sajramanta sajrallawantaj kutichiychejchu. Allin kajtapuni ruwaychej tukuy runaspa ñaupaqenkupi. 18 Tukuy atisqaykichejta ruwaychej, tukuywan allinpi kausakunaykichejpaj. 19 Munasqa hermanosníy, ama ima sajramantapis pagachikuychejchu, astawanqa saqeychej Dios kʼajaj phiñakuyninta sajrata ruwajkunaman rikuchinanta. Imaraykuchus qhelqasqa kashan: “‘Noqamin pagachikusaj sajrata ruwasqankumanta’, nin Jehová Diosqa”.
“Tukuy runaswan allimpi kausakuychej”
3 (Romanos 12:17, ñawiriy.) Pabloqa, ni pimanpis sajramanta sajrallawantaj kutichinanchejta nerqa. Kay yuyaychayqa, may allinpuni, astawanraj familiamanta mana tukuyninku Diosta yupaychajtinkoqa. Cristianosqa, familianchej sajrata ruwawajtinchej chayri sonqonchejta nanachinapaj jina imatapis parlajtinku, phiñakuyninchejta ñitʼiykukunanchej tiyan. Sajramanta sajrallawantaj kutichispaqa, astawan chʼampaykunallata rikhurichisunman.
w07 1/7 págs. 24, 25 párrs. 12, 13
“Ama pimanpis sajramanta sajrallawantaj kutichiychejchu”
12 Apóstol Pabloqa tukuy runaswan allinta kausakunata yuyaychawarqanchej. Pay nerqa: “Ama pimanpis sajramanta sajrallawantaj kutichiychejchu”, nispa. Aswan ñaupajtataj nerqa: “Sajra kajtaqa chejnisqata chejnikuychej”, nispa. Chayrayku mana allinchu kanman sajra kajta chejnini nishaspa, sajra kajllawantaj runasman kutichikunanchej. Ajinata ruwaspaqa runa masinchejta mana ‘tukuy sonqochu munakushasunman, manaqa simillamanta’. Chantapis Pablo yuyaychallawarqanchejtaj: “Allin kajtapuni ruwaychej tukuy runaspa ñaupaqenkupi”, nispa (Romanos 12:9, 17). ¿Imatataj chaymanta yachakunchej?
13 Chay tiempopajqa apóstol Pablo Corintomanta cristianosman cartanta qhelqarqaña. Chay cartanpitaj nerqa apóstoles qhatiykachasqas kashasqankuta. Pay nerqa: “Kay mundoj qhawakunan kayku, angelespaj, jinallataj runaspajpis. [...] Runas noqaykupaj sajrata parlajtinkupis, kʼachamanta kutichiyku. Qhatiykachawajtiykutaj pacienciawan aguantakuyku. Runas qhasimanta tumpawajtiyku, allillanwan kutichiyku”, nispa (1 Corintios 4:9-13). Cheqa cristianostaqa runas chejnikushallawanchejpuni. Jinapis allin kajta ruwanapaj kallpachakushallanchejpuni. Chayta rikuspataj wakin runasqa Bibliamanta yachakuyta munanku (1 Pedro 2:12).
(Romanos 12:20, 21) Chayrayku, “sichus enemigoyki yarqhachikun chayqa, mikhunata qoriy. Chʼakichikun chaytaj, yakuta qoriy. Chayta ruwaspaqa, nina brasastapis umanman churaykushawaj jina kanqa”. 21 Ama sajra kajwan atipachikuychejchu, astawanqa sajra kajta allin kajwan atipallaychejpuni.
Purajmanta perdonanakuychej
13 Wakin kuteqa, ichapis mana allinwan kutichisoj runata, Bibliaj yachachiykunasninta japʼikunanpaj yanapayta atiwaj. Apóstol Pablo qhelqarqa: “Sichus contrarioyqui yarkachicunman chayka, miqhuyta koriy. Sichus contrarioyqui chʼaquichicunman chayka, yacuta koriy, imaraycuchus cayta ruwaspa, nina brasasta umanman taukanqui. Ama sajra cajwan atipachicuychu, antes sajrata allin cajwan atipay”, nispa (Rom. 12:20, 21, Mosoj Testamento). Wajkunawan kʼacha kayqa, phiñakuyninkuta thasnunman, kʼacha kaykunasninkutataj sutʼiman orqhonman. Mana allinwan kutichisoj runata entiendenki, khuyakunkitaj chayqa, ichapis Bibliaj yachachiykunasninta yachakunanpaj yanapayta atinki. Mana ajina kajtinpis, kʼachamanta kutichejtiykeqa imaraykuchus ajina kasqaykipi chay runa tʼukurinman (1 Ped. 2:12; 3:16).
Sumaj yachachiykunata maskʼana
(Romanos 12:1) Chayrayku hermanosníy, Diospa khuyakuyninrayku mañakuykichej: Cuerpoykichejta Diosman jaywanaykichejta kausashaj jaywanata jina, llimphuta, payta kusichejtataj. Ajinamanta Diosta tukuy yuyayniykichejwan sirvinkichej.
lvs-S cap. 6 párrs. 5, 6
Imawanchus kusirikunata sumajta ajllana
5 Tukuy imata ruwasqanchejqa Jehová Diosta yupaychanapaj yanapawasunman chayri mana. Chayrayku Pablo nerqa: “Cuerpoykichejta Diosman [jaywaychej] kausashaj jaywanata jina, llimphuta, payta kusichejtataj” nispa (Romanos 12:1). Jesustaj nerqa: “Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj”, nispa (Marcos 12:30). Arí, Jehová Diosta yupaychanapajqa tukuy atisqanchejta ruwananchej tiyan. Ñaupa tiempopi israelitasqa Diosman uj animalta jaywashaspa mana iman imanasqata jaywananku karqa. Chay animal mana sanochu kajtintaj Diosqa jaywasqankuta mana allin ñawiwanchu qhawaj (Levítico 22:18-20). Noqanchejtapis, mana llimphu sonqoyojchu kajtinchejqa Dios mana allin ñawiwanchu qhawawasun.
6 Jehová Diosqa niwanchej: “Llimphus kanaykichej tiyan, imaraykuchus noqaqa llimphu kani”, nispa (1 Pedro 1:14-16; 2 Pedro 3:11). Payqa llimphu kajtillanchej allinpaj qhawawasun (Deuteronomio 15:21). Payqa khuchichakuykunata, maqanakuykunata, layqeriosta, brujeriasta ima chejnikun. Chayrayku chay imasta ruwajtinchej mana allinpajchu qhawawasunman (Romanos 6:12-14; 8:13). Chantapis Diosqa mana allinpajchu qhawawasun chay imasta qhawaspa chayri ruwaspa kusirikojtinchej. Imaraykuchus chay imasqa chʼichichawasunman, paymantataj karunchawasunman.
(Romanos 13:1) Tukuy runas autoridadesta kasuchunku. Manachus Dios autoridades kanankuta saqenman chayqa, mana autoridades kanmanchu. Tukuy autoridadesqa Diospa churasqan kanku.
Romanos libromanta wakin allin yachachiykuna
13:1 ¿Imarayku “kamachejkunapis [maychus kajman] Diospa churasqallantaj” kasqankuta nisunman? Imajtinchus kamachejkunata, Dios kamachinankuta saqeshan. Maypachachus Dios profeciaspi wakin kamachejkuna kananmanta qhelqacherqa, nisunman chay ‘kamachejkunata maychus kajman Dios churasqanta’.
Bibliata leenapaj
11-17 DE MARZO
BIBLIAMANTA SUMAJ YACHACHIYKUNA | ROMANOS 15, 16
“Jehovamanta mañakuna sonqochanawanchejta, kallpachanawanchejtataj”
(Romanos 15:4) Ñaupa tiempopi qhelqakusqanqa, yachachinawanchejpaj qhelqasqa karqa, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej.
Waqajkunawan waqana
11 Lázaro wañupojtin imaynatachus Jesús runasmanta khuyakusqanta yachaspa mayta sonqochakunchej. Chantapis Bibliapeqa sonqochanawanchejpaj jina waj versículos kallantaj. Imaraykuchus “ñaupa tiempopi qhelqakusqanqa, yachachinawanchejpaj qhelqasqa karqa, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej” (Rom. 15:4). ¿Qanpata pinillaykipis wañupunchu? Ajina kajtenqa kay versículos mayta sonqochasunkiman:
▪ “Tata Diosqa qayllallapi kashan salvanampaj juchallisqankumanta sonqonkuta nanachikojkunata, pikunachus manaña salvasqa kayta suyankuchu, chaykunata” (Sal. 34:18, 19).
▪ “Sonqoy ukhupi ashkha llakiyniyoj kashajtiy, sonqochawasqaykeqa almayta kusicherqa” (Sal. 94:19).
▪ “Tatanchej Diosqa munakuwanchej. Jatun khuyakuyninraykutaj wiñaypaj sonqochawanchej, sumaj suyakuyta ima qowanchej. Noqayku mañakuyku, Dioswan Señorninchej Jesucristowan qankunata sonqochanankuta, kallpachanankutataj” (2 Tes. 2:16, 17).
(Romanos 15:5) Diosqa sonqochawanchej, kallpachawanchejtaj sinchʼita sayanapaj. Chayrayku paymanta mañakuni qankunata yanapasunaykichejta, Cristo Jesús jina yuyanaykichejpaj.
Mana saykʼuspa sinchʼita sayana
5 Jehovamanta yanapata mañakuna. Jehovaqa “pacienciata, sonqochakuytawan qoj Dios” (Rom. 15:5, 6). Paylla sumajta entienden llakisqa kashaspa imaynachus kasqanchejta, imayna ruwasqachus kasqanchejta, imachus sonqonchejpi kasqanta ima. Chayrayku paylla aguantanapaj yanapayta atiwanchej. Bibliaqa Jehová Dios “payta manchachikojkunaj munarisqankuta juntʼan; yanapata mañakusqankuta uyarispa, paykunata salvan” nispa nin (Sal. 145:19). Chaywanpis, ¿imaynatá Jehová uyariwasunman aguantanapaj kallpata mañakojtinchej?
(Romanos 15:13) Suyakuyta qoj Diosqa, paypi atienekusqaykichejrayku qankunata juntʼachichun tukuy kusiywan, sonqo tiyaykuywantaj. Ajinamanta suyakuyniykichej Diospa atiyninnejta aswan sinchʼi kananpaj.
“Señor Diosniykitaqa munakunki”
11 Jehová qowasqanchej suyakoyqa, kusiyta, sonqo tiyaykuyta ima qowanchej (Rom. 15:13). Wiñay kausayta suyakoyqa creeyninchej pruebaman churasqa kajtin, muchunapaj yanapawanchej. Ajllasqa cristianos wañunankukama cheqa sonqos kajtinkoqa janaj pachapi “kawsay pilluta” japʼenqanku (Apo. 2:10). Mana ajllasqa cristianostaj kay Jallpʼapi wiñay kausayta japʼenqanku (Luc. 23:43, NM). Chay suyakuytaj mayta kusichiwanchej, sonqo tiyaykuyta ima qowanchej, ‘allin kajta, kʼacha kajta’ ruwaj Diosta astawan munakunapajtaj tanqawanchej (Sant. 1:17).
Sumaj yachachiykunata maskʼana
(Romanos 15:27) Arí, paykunaqa chayta tukuy sonqo ruwarqanku, paykunaman manu jina kasqankurayku. Mana judío kajkunaqa, judío hermanosninkunejta Diospa bendicionesninta japʼerqanku. Chayrayku mana judío kajkunapis, Jerusalenpi kaj hermanosta kapuyninkuwan yanapanallankutaj tiyan.
w89 1/12 pág. 24 párr. 3
‘Munakuyniykichej tukuy sonqochus manachus kasqan yachakuchun’
Mana judío kaj hermanosqa Jerusalenmanta hermanosta maytachá yanapariyta munankuman karqa. Imajtinchus paykunataqa Jerusalenmanta hermanos Jehová Diosta rejsinankupaj yanaparqanku. Chayrayku paykunaqa manu jina kasharqanku Jerusalenmanta hermanosman. Pablo nerqa: “Mana judío kajkunaqa, judío hermanosninkunejta Diospa bendicionesninta japʼerqanku. Chayrayku mana judío kajkunapis, Jerusalenpi kaj hermanosta kapuyninkuwan yanapanallankutaj tiyan”, nispa (Romanos 15:27).
(Romanos 16:25) Willashani chay sumaj willaykunaqa, Jesucristomanta willaypis, Dios qankunata sinchʼita sayachiyta atisqanta rikuchin. Chay sumaj willaykunataj, Diospa pakasqa yachaynin sutʼinchakusqanman jina kashan, mayqenchus unay tiempota pakasqa karqa.
it-2-S pág. 708 párr. 5
Ñaupajmantaña yachakusqan
Mesiasqa chayri Cristoqa warmej miraynin. Paynejtataj jallpʼantinmanta Diosta kasukoj familias bendecisqa kanqanku (Gál 3:8, 14). Adanwan Evawan juchallikorqanku chay pacha warmej mirayninmantaqa parlakorqa. Chaypajqa niraj Abel nacekorqachu (Gé 3:15). Chay pachamanta 4.000 watasninman jinataj, ‘pakasqa yachayqa’ warmej miraynin kasqanta sutʼinchakorqa. Chayrayku nisunman chay pakasqa yachayqa “unay tiempota pakasqa” kasqanta (Ro 16:25-27; Ef 1:8-10; 3:4-11).
Bibliata leenapaj
18-24 DE MARZO
BIBLIAMANTA SUMAJ YACHACHIYKUNA | 1 CORINTIOS 1-3
“¿Dios jinachu yuyanchej chayri runa jinallachu?”
(1 Corintios 2:14) Runa jinalla yuyajqa, Diospa atiyninmanta jamoj imasta qhesachan. Imaraykuchus paypajqa wampoj thautisqan jinalla, manataj chay imasta entiendeyta atinchu. Imaraykuchus payqa chay imasta Diospa atiyninpa yanapayninwan ukhunchanan tiyan.
Dios jina yuyana
4 Runa jinalla yuyajqa, munaynillanta maskʼan kay mundomanta runas jina yuyasqanrayku. Pablotaj nerqa: ‘Kay mundoj yuyaynenqa wayra jina tukuynejpi kashan, mana kasukoj runaspitaj trabajashan’, nispa (Efe. 2:2). Chayrayku runasqa, sajra imasllata ruwanku allinninkuta maskʼaspa. Nitaj kallpachakunkuchu Diospa kamachiykunasninman jina kausakunankupaj. Chantapis runa jinalla yuyajqa, payllapi yuyan, kapuyniyoj kayllatataj maskʼan.
5 Biblia nisqanman jinataj, ‘runaj sajra munayninpa ruwasqasnillanta’ ruwan (Gál. 5:19-21). Chantá Pabloqa Corintomanta cristianosman ñaupaj kaj cartanpi nillarqataj, imastawanchus runa jinalla yuyaj runa ruwasqanta. Chay jina runaqa wajkunaj chʼampayninman satʼikun, runasta tʼaqanachin, chʼajwasta rikhurichin, wajkunawan juzgadoman chayachinakun, autoridadesta mana respetanchu, mikhuyllaman, ujyayllamantaj qokun. Chantá ima juchatapis ruwarpallan (Pro. 7:21, 22). Judasqa, chay jina runasmanta jinata nerqa: “Paykunapeqa Diospa atiynin mana kanchu”, nispa (Jud. 18, 19).
(1 Corintios 2:15, 16) Chaywanpis Dios jina yuyajqa tukuy imata allinta reparayta atin, manataj paytaqa pipis juchachayta atinchu. 16 Diosmanta QheIqasqapi nin: “¿Pitaj Jehová Diospa yuyayninta rejsin payta yachachinanpajri?”, nispa. Chaywanpis noqanchejpataqa, Cristoj yuyaynin kapuwanchej.
Dios jina yuyana
6 Dios jina yuyaj runaqa, Diosman qayllaykunanpaj, pay jina imatapis ruwananpajtaj kallpachakullanpuni (Efe. 5:1). Kallpachakullantaj Jehová Diosta astawan rejsinanpaj. Diosta Tatanta jina qhawasqanraykutaj, kausayninpi kamachiykunasninta kasukunpuni (Sal. 119:33; 143:10). Arí, ‘Diospa atiyninpa poqoyninman’ jina kausakun, nitaj sajra runas jinachu (Gál. 5:22, 23).
Dios jina yuyana
15 Bibliaqa 1 Corintios 2:16 versiculopi niwanchej, Cristo jina yuyananchejta. Romanos 15:5 versiculopitaj yuyarichiwanchej, ‘Cristo Jesús jina yuyananchejta’. Chayrayku Cristo jina yuyanapajqa, yachananchej tiyan imatachus pay yuyasqanta, ruwasqanta ima. Jesusqa kausayninpi, Jehová Diosta sirviyta aswan ñaupajman churarqa. Chayrayku Jesús jina yuyanapaj kallpachakunallapuni, ajinamantataj Jehová Diosman astawan qayllaykusunchej.
Sumaj yachachiykunata maskʼana
(1 Corintios 1:20) ¿Maypitaj kay mundomanta yachayniyoj runa kashanri? ¿Maypitaj leymanta yachachej, churanakoj runapis kashanri? ¿Manachu Diosqa kay mundoj yachayninta qhasi manakajman tukucherqa?
it-2-S pág. 886 párr. 5
Yachay
Kay mundoqa yachayninwan, Cristo noqanchejrayku wañusqanta qhasi manakajpis kanman jina qhesacharqa. Kay mundomanta kamachejkunaqa yachaysapas kaspapis ‘Señorninchej Jesusta wañucherqanku’ (1Co 1:18; 2:7, 8). Chaywanpis kay mundoj yachaynenqa qhasi manakajlla. Imaraykuchus Diosqa munayniyta juntʼananpaj “kay mundopi wampupaj qhawasqa kajkunata”, “pisi kallpayojpaj qhawasqa kajkunata” ajllaspa, yachayniyoj runasta pʼenqacherqa (1Co 1:19-28). Apóstol Pabloqa Corintomanta cristianosman yuyaricherqa kay mundopi yachayniyoj runas, kay mundopi kamachejkuna ima chinkachisqa kanankuta. Chantapis Pabloqa Diospa yachayninmanta astawan runasman sutʼincharqa (1Co 2:6, 13). Colosasmanta cristianosmantaj nerqa: “Pajtataj pipis presota jina apakapusunkichejman runaj yachayninwan (fi·lo·so·fí·as palabraqa niyta munan “yachayta munan”), qhasi manakaj yachachiykunawan ima. Chaykunaqa ñaupa runaspa yachachiyninkumanta jamun”, nispa (Col 2:8; kikinchay 20-23 versículos).
(1 Corintios 2:3-5) Chantapis qankunaman jamorqani pisi kallpayoj, mancha manchalla, mayta kharkatitispataj. 4 Parlasqaypis yachachisqaypis, mana yachaysapa runaspa parlasqanku jinachu karqa. Astawanpis parlasqayqa Diospa atiyninta rikucherqa. 5 Ajinata parlarqani, creesqaykichej ama runaspa yachayninkupi sayachisqa kananpaj, manachayqa Diospa atiyninpi.
Corintiosman cartasmanta wakin allin yachachiykuna
2:3-5. Pablo Corinto llajtaman willananpaj rishaspa ichá tapurikorqa, chay llajtapi sichus uj runallatapis Diosta yupaychayta munajta tarinanta, imaraykuchus chay llajtapeqa runaj yachaynin may jatunpaj qhawasqa karqa. Chaywanpis mana manchachikuyninwan atipachikorqachu, mana chayqa Diosninchej kamachisqanta juntʼallarqapuni. Noqanchejpis willaytaqa mana saqenanchejchu tiyan, wakin kuti mana atikoj jina kajtinpis, Pablo jina Jehovamanta mañakuspa, Reinonmanta runaman willanallanchejpuni tiyan.
Bibliata leenapaj
25-31 DE MARZO
BIBLIAMANTA SUMAJ YACHACHIYKUNA | 1 CORINTIOS 4-6
“Pisi levaduralla tukuy masata poqochin”
(1 Corintios 5:1, 2) Uyarini qankuna ukhumanta uj runa tatanpa warminwan tiyakapusqanta. Chay jina khuchichakuy juchaqa mana creejkuna ukhupipis mana kanchu. 2 Qankunarí chaymanta kusikushankichejraj. ¿Manachu astawanpis llakikunaykichej kanman? ¿Manachu chay juchallikoj runata qankuna ukhumanta qharqonaykichej karqa?
(1 Corintios 5:5-8) Chay juchallikoj runata Satanasman jaywaykuychej. Ajinamanta chay jucha congregacionmanta chinkananpaj, qankunaj allin yuyayniykichejtaj jarkʼasqa kananpaj Señorpa pʼunchayninpi. 6 Mana allinchu jatunchakusqaykichejqa. ¿Manachu yachankichej pisi levaduralla tukuy masata poqochisqanta? 7 Unayniyoj levadurata wijchʼuychej, mosoj masa kanaykichejpaj. Qankunapeqa manaña ima levadurapis kananchu tiyan. Imaraykuchus Cristoqa, Pascua corderonchej jina noqanchejrayku wañorqa. 8 Chayrayku Pascua pasay fiestataqa mana unayniyoj levadurawanchu ruwananchej tiyan, nillataj sajra kajwan, juchawan ima ninakoj levadurawanchu. Astawanqa mana levadurayoj tʼantawan ruwananchej tiyan. Chaytaj ninakun cheqa kajwan, chʼuwa sonqo kaywantaj.
(1 Corintios 5:13) Jawapi kajkunatataj, Dios juzganqa. Chayrayku “chay juchallikoj runataqa qankuna ukhumanta qharqoychej”.
it-2-S pág. 212 párr. 3
Levadura
Apóstol Pabloqa Corinto congregacionmanta uj khuchi runata qharqonankuta nerqa. Chaypajtaj levaduramanta parlarqa. Pablo nerqa: “¿Manachu yachankichej pisi levaduralla tukuy masata poqochisqanta? Unayniyoj levadurata wijchʼuychej, mosoj masa kanaykichejpaj. Qankunapeqa manaña ima levadurapis kananchu tiyan. Imaraykuchus Cristoqa, Pascua corderonchej jina noqanchejrayku wañorqa”, nispa. Chantá Pabloqa levadurawan imatachus sutʼinchayta munashasqanmanta nerqa: “Chayrayku Pascua pasay fiestataqa mana unayniyoj levadurawanchu ruwananchej tiyan, nillataj sajra kajwan, juchawan ima ninakoj levadurawanchu. Astawanqa mana levadurayoj tʼantawan ruwananchej tiyan. Chaytaj ninakun cheqa kajwan, chʼuwa sonqo kaywantaj”, nispa (1Co 5:6-8). Masataqa uj chhika levaduralla chay rato poqochin. Ajinallatataj congregacionmanta chay khuchi runata mana qharqojtinkoqa, congregacionmanta tukuy hermanos Jehová Diospa ñaupaqenpi chʼichipaj qhawasqa kankuman karqa. Israelitasqa mana levadurayoj tʼanta fiestata, Pascua fiesta pasasqantawan ruwaj kanku. Chay fiestapitaj wasisninkupi mana levadurata japʼinankuchu karqa. Ajinallatataj congregacionpi “levadurata” nisunman millay imasta ruwajkunata, congregacionmanta qharqonanku karqa. Apóstol Pabloqa chay versiculopi levaduramanta parlaspa, chaymanta parlasharqa.
it-2-S pág. 972 párr. 6
Satanás
¿Ima niyta munan juchallikoj runata Satanasman jaywaykuy?
Corinto congregacionpi uj runa tatanpa warminwan tiyaykakapojtin, apóstol Pablo imatachus chay runawan ruwanankumanta nerqa: “Chay juchallikoj runata Satanasman jaywaykuychej. Ajinamanta chay jucha congregacionmanta chinkananpaj”, nispa (1Co 5:5). Chayqa karqa uj kamachiy congregacionmanta chay runata qharqonankupaj, niñataj chay runawan masichakunankupaj (1Co 5:13). Satanasman jaywaykoyqa niyta munan congregacionmanta juchallikojta qharqoy. Ajinamanta chay runaqa Satanaspa mundonpi kausayta qallarin. Kay mundotaqa Satanás kamachishan. Chay runaqa “tukuy masata poqochej’ ‘levadura’ jina karqa, nisunman congregacionta chʼichichaj. Chay runata congregacionmanta qharqokojtenqa chay jucha congregacionmanta chinkan (1Co 5:6, 7). Apóstol Pablopis Himeneota Alejandrotawan Satanasman jaywaykorqa, nisunman congregacionmanta qharqorqa. Imajtinchus chay runasqa manaña creeyniyojchu karqanku niñataj chʼuwa sonqoyojchu, astawanpis creeyninku chinkaporqa (1Ti 1:20).
(1 Corintios 5:9-11) Cartaypi qhelqamorqaykichej, khuchichakoj runaswan amaña purinaykichejta. 10 Chaywanqa mana nisharqaykichejchu tʼaqasqata tʼaqakunaykichejta: kay mundopi khuchichakoj runasmanta, munapayajkunamanta, sutʼi suwasmanta, nitaj llulla dioskunata yupaychajkunamantapis. Tʼaqakunaykichej kanman chayqa, kay mundomanta llojsipunaykichejchá kanman. 11 Kunantaj qhelqamushaykichej amaña purinaykichejta, pichus hermano kani nishaspa khuchichakojwan, munapayajwan, llulla dioskunata yupaychajwan, wajkunapaj sajrata parlajwan, machajwan chayri sutʼi suwawan. Chay jina runawanqa ama mikhullaychejpischu.
lvs-S sutʼinchaykuna 8
Qharqochikuy
Uj hermano juchallikuspa mana pesachikunchu, nitaj Jehovaj kamachiykunasninman jinachu ruwan chayqa, manaña congregacionpi kananpaj jinachu. Chayraykutaj congregacionmanta qharqosqa kanan tiyan. Qharqosqa kajkunawantaj manaña parlanachu tiyan, nitaj masichakunachu tiyan (1 Corintios 5:11; 2 Juan 9-11). Ajinata ruwakusqanraykutaj Diospa sutin mana chʼichichakunchu, congregacionpis llimphullapuni (1 Corintios 5:6). Chantapis chayqa qharqochikojta yanapallantaj yuyayninman churakunanpaj, Diosman kutirikunanpaj ima (Lucas 15:17).
▸ Capítulo 3, párrafo 19
Sumaj yachachiykunata maskʼana
(1 Corintios 4:9) Noqaj yuyayniymantaqa, Diosqa noqayku apostolesta qhepa qhepaman churawayku, tukuy rikunawaykupaj wañuchinapaj juchachasqa runasta jina. Imaraykuchus kay mundoj qhawakunan kayku, angelespaj, jinallataj runaspajpis.
‘Angelesqa espiritusjina Diosta’ yupaychanku
16 Bibliaqa, Diospa kamachisnin chʼampaykunapi kajtinku, ángeles ‘qhawashasqankuta’ sutʼinchan (1 Cor. 4:9). Paykunaqa imayna runachus kasqanchejta qhawawanchej, Dios nisqanman jinapuni imatapis ruwajtinchejtaj, mayta kusikunku. Chantapis uj hermano juchallikuspa, tukuy sonqo juchanmanta pesachikuspa Jehovaman kutirikojtin, mayta kusikullankutaj (Luc. 15:10). Angelesqa, cristianas imatachus ruwasqankuta, qhawallankutaj. Biblia nin: “Warmeqa umanta sukʼumpakunan tiyan angelesrayku”, nispa (1 Cor. 11:3, 10). Arí, angelesqa Jehová kamachisqanman jina cristianos ruwajtinku, mayta kusikunku. Kasukuyninchejpis, paykunata yanapallantaj.
(1 Corintios 6:3) ¿Manachu yachankichej angelestapis juzgananchejta? Chantá, ¿imaraykutaj mana juzgayta atisunmanchu kay kausaypa imasnintari?
it-2-S pág. 216
Ley
Angelespaj leyes. Angelesqa runasmanta aswan atiyniyoj kanku. Jehová Diospa leyesninta, kamachiykunasnintawan kasukunku (Heb 1:7, 14; Sl 104:4). Chantapis Jehová Diosqa Satanasman kamacherqa imatachus ruwananta, imatatajchus mana ruwananta (Job 1:12; 2:6). Arcángel Miguelqa Jehová Diosta tukuy atiyniyoj Juezta jina qhawarqa. Chayrayku Kuraj Supaywan churanakushaspa nerqa: “Jehová Dios kʼamisuchun”, nispa (Jud 9; kikinchay Zac 3:2). Jehová Diosqa Jesucristota churan tukuy angelesta kamachinanpaj (Heb 1:6; 1Pe 3:22; Mt 13:41; 25:31; Flp 2:9-11). Jesusqa uj angelta Juanman kacharqa (Ap 1:1). Apóstol Pablo 1 Corintios 6:3 versiculopi nerqa ajllasqa cristianos angelesta juzganankuta. Chaytaj rikuchiwanchej ajllasqa cristianos supaykunata juzgaypi Jesusta yanapanankuta.
Bibliata leenapaj