Yuyayniyuq runajina purina
1 Jesús tawa challwirista qhipanta rinankupaq waqyaptin, paykunaqa mana iskaychakuspa “chay ratopacha [...] Jesuspa qhepanta rerqanku” (Mat. 4:18-22). Tarso llaqtamanta Sauloqa, cristianoman tukuytawan watiqmanta rikuyta qallarispa, mana iskaychakuspa, “sinagogaspi willayta qallarerqa Jesusqa Diospa Churin kasqanta”, nispa (Hech. 9:20). Tiempoqa, mana sayanchu, ripuptinqa mana jaykʼaq kutimunchu. Chayrayku mana tiempota usuchispa, yuyayniyuq runajina purina (Efe. 5:15, 16).
2 Maykʼaqllapis ñakʼariykuna jamunman. Kunan Jehová Diospaq llamkʼayta atisqanchikqa, qʼayapaqqa chinkapunman (Sant. 4:14). Maykʼaqllapis ñakʼariykunaqa, mana suyachkaptinchik jamunman (Ecl. 9:11). Chantapis tukuy machuyachkanchik. Machuyaywantaq “sajra pʼunchaykuna” jamun; chayraykutaq manaña waynajina Jehová Diospaq llamkʼanchikchu (Ecl. 12:1). Chayrayku, Diosman qukunapaqqa mana watasta suyanachu, nitaq astawan paypa llamkʼanapaq tukuy imapi allin kayta suyanachu (Luc. 9:59-62). Abrahamqa, Diosman tukuy sunqu qukusqanrayku yuyayniyuq runajina purirqa, chayrayku sunqu tiyaykusqa machuyarqa, ‘allin wañuypitaqʼ wañupurqa (Gén. 25:8).
3 Juk chhika tiempollaña kachkan. “Pisi tiempollaña kashan”, chayrayku tiemponchikta mana usuchinanchikchu tiyan (1 Cor. 7:29-31). Kay saqra pachaqa, juk chhikamantawan tukukunqa, jinallataq ‘kay pachap puquyninta’ (llampʼu sunquyuq runasta) uqhariypis tukukunqa (Apo. 14:15). Chayrayku, kay pachap ruwanasninpi tiemponchikta usuchinamantaqa, astawan Diospaq llamkʼanapaq tiempochakuna (Luc. 21:34, 35). Musuq pachapiña kachkaspaqa, ¡mayta kusikusunchik tukuy sunquwan cosechapi llamkʼasqanchikmanta yuyarikuspa!
4 Diosninchikpaq kunan astawan llamkʼayta atiptinchikqa, mana qʼayapaq saqinanchikchu tiyan. “Kunan pʼunchay nisqa tiempopi kashkajtinchej” Jehová tatanchikpa tukuy atisqanchikwan munayninta ruwana (Heb. 3:13). Jinamanta, yuyayniyuq runajina purisqanchikta rikuchisunchik, imaptinchus ‘Diospa munayninta ruwaqkunaqa, wiñaypaq kawsanqanku’ (1 Juan 2:17).