Diospi chayri Bibliapi mana creejta, ¿ima publicacioneswan yanapasunman?
1. ¿Imaraykutaj wakin runas mana Yachachin libromanta yachakuyta munallankuchu?
1 Pillapis Diospa kamachin kananpajqa, Bibliamantaraj yachakunan tiyan. Mana cristianos kajkunapaj, Bibliaqa mana Diospa Palabranchu. Wakintaj ni Bibliapi, ni Diospi creenkuchu. Paykunaqa, ichá Yachachin libromanta mana yachakuyta munallanqankuchu. Jina kajtin, ¿ima publicacioneswantaj paykunata yanapasunman? Kay yuyaychaykunaqa, imachus 20 suyusmanta hermanosta yanapasqanmanta orqhokun.
2. Pillapis Diospi mana creesqanta niwajtinchej, ¿imatá yachana tiyan? ¿Imaraykutaj?
2 Diospi mana creejkuna. Pillapis Diospi mana creesqanta niwajtinchej, imaraykuchus chayta nisqanta tapurina. ¿Sajra ruwaykunaraykuchu? ¿Hermano nichikojkuna puraj uyas kasqankuraykuchu? ¿Kausay jinallamanta rikhurisqanpi creesqanraykuchu? Chayri, ¿llajtanpichu Diospi mana creenku? ¿Nichu jaykʼajpis Diospi creeyta necesitarqa? Chayta yachanapaj ashkha willajkuna tapurinku: “¿Ajinatapunichu yuyarqanki?”, nispa. Tapurispataj kutichisqanta sumajta uyarina. Chay runa imaraykuchus Diospi mana creesqanta yachajtinchej, imatachus kutichinata yachasun, ima publicaciontachus saqenatapis (Pro. 18:13).
3. ¿Imaynatá runasta jatunpaj qhawasqanchejta rikuchisunman?
3 Wasiyoj imatachus niwasqanchejta, ama pisipaj qhawanachu. Estados Unidosmanta sucursal, kay yuyaychayta apachimun: “Sapa runa imapi creenanpajpis derechoyoj, chaytataj respetana tiyan. Pantasqa kashasqanta ninamantaqa, aswan allin tapuykunawan tʼukurichinanchej”. Chaytataj uj hermano ruwan, pichus qotuchakuykunata waturin. Wasiyoj imatachus kutichisqanta uyariytawan nin: “¿Maykʼajllapis kay jinata yuyarqankichu?”, nispa. Chantá wasiyojwan parlarillanpuni.
4. ¿Imaynatá budistaswan parlarisunman?
4 Ashkha budistasqa, mana Dios kasqanpi creenkuchu. Gran Bretañamanta wakin hermanosqa, chay runasman Cómo hallar paz y felicidad duraderas, nisqa folletota saqenku. Ñaupaj paginasninta paykunawan ukhunchariytawan, “¿Existe un Creador todopoderoso?” nisqa rakʼiytañataj ukhunchanku. Waj kutipitaj, “Una guía para toda la humanidad” nisqa rakʼiyta ukhunchanku. Wakinkunaqa, Yachachin librota jaywanapaj ninku: “Diospi mana creejtiykipis, Bibliata ukhunchayqa yanapasunkiman. Imaraykuchus chaypeqa sumaj yuyaychaykunata tarinki”. Estados Unidospi chino qalluta parlajkunaman willaj precursor nin: “Willayku chaypeqa, publicacionesta japʼikojkuna leenkupacha. Jinapis imapajchus Bibliata ukhunchana kasqanta mana entiendenkuchu. Chayrayku ñaupaj kutipi parlarishaspa, Sumaj willaykuna folletota saqeni, runaswan parlarinapaj sumaj kasqanrayku”, nispa. Estados Unidospi chinota parlaj qotuchakuykunata waturej hermano nisqanman jina, wakin kutisqa qallariymantapacha Yachachin librota saqeyta atikun. Chaywanpis ñaupaj yachaqanata rikuchinamantaqa, 2 yachaqananmanta qallarisunman, chay yachaqana Bibliamanta parlashasqanrayku.
5. ¿Imaraykú pacienciakuna tiyan?
5 Ni pipis Diospi chay rato creeyta qallarinchu, chayrayku pacienciakuna tiyan. Ichapis mana uj kutita parlarisqanchejtawanchu, Dios kasqanta creenqa. Chaywanpis ashkha kutista waturisqanchejtawan, ichapis Dios kasqanta creeyta qallarenqa, chayri imaraykuchus wakinkuna Diospi creesqankuta entiendenqa.
6. ¿Imaraykutaj wakinkuna Bibliaj yachachisqanta qhesachanku?
6 Bibliamanta mana yachayta munajkuna, chayri Bibliapi mana creejkuna. Ashkha runas Diospi creespapis, mana Biblia Diosmanta jamusqanta creenkuchu. Chayrayku Bibliaj yachachisqanta qhesachanku. Chaytaj rikukun, mayqen suyuspichus casi tukuy runas mana cristianoschu kanku chaykunapi. Paykunaqa Biblia cristianospa libronku kasqanta ninku. Cristiano nichikoj suyuspipis, Bibliaj yuyaychaykunasnin qhasillapaj kasqanta ninku. ¿Imatá ruwasunman chay runas Bibliamanta yachakuyta munanankupaj, Yachachin librowan yachakunankupaj ima?
7. ¿Imaynatá runasta Bibliamanta yachakuyta munanankupaj yanapasunman?
7 Greciapi kaj sucursal apachimusqan carta nin: “Bibliamanta mana yachayta munajkunata yanapanapajqa, Bibliaj nisqanta rikuchina. Ashkha willajkunaqa, Bibliamantapuni leeripusqanku runaspa sonqonkuman chayasqanta reparanku (Heb. 4:12). Wakinkunaqa Bibliapi Diospa sutinta rikuspalla astawan yachakuyta munanku”. India suyumanta sucursal qhelqarqa: “Hinduistasqa imatachus Biblia kausaymanta, wañuymanta nisqanta yachayta munanku. Chantapis Diosninchej chejninakuyta, kʼumuykachachiyta ima chinkachinanta nisqan, ashkhasta kusichin”. Hermanosninchejqa, imaschus runasta llakichisqanmanta parlarejtinku, Diospa Reinon imatachus ruwananta Bibliapi rikuchiyta atinku.
8. ¿Imatá nisunman cristiano nichikoj iglesiasrayku Bibliamanta mana yachayta munajkunaman?
8 Pillapis cristiano nichikoj iglesiasrayku Bibliata qhesachan chayqa, chay religiones ruwasqanku mana Bibliaj nisqanman jinachu kasqanta sutʼinchana. India suyupi sucursalmanta ninku: “Wakin runasmanqa, Biblia mana religionespa libronkuchu kasqanta entiendechina tiyan”, nispa. Chantá nisqankuman jina, hinduistasqa ¿Qué propósito tiene la vida? ¿Cómo descubrirlo? folletoj 4 rakʼiyninta leespa, tʼukulla qhepakunku. Imaraykuchus chay folletoqa, iglesias Diospa Palabranta qʼewiyta chayri chinkachiyta munasqankuta sutʼinchan. Brasilmanta uj precursor runasman nin: “Ashkha runas, ni mayqen iglesiaman rispalla Bibliata ukhunchanku. Qanpis chayta ruwawaj. Ichapis yachakusqayki tʼukuchisunkiman”, nispa.
9. ¿Imaraykutaj Bibliamanta mana yachayta munajkunatapis yanapanallapuni tiyan?
9 Jehová runaj sonqonta qhawan (1 Sam. 16:7; Pro. 21:2). Allin sonqoyoj runastataj, llajtanman pusamun (Juan 6:44). Paykunamanta ashkhasqa, mana Bibliamanta, nitaj Diosmanta yachankumanchu karqa. Willasqanchejraykutaj “cheqa kajta” rejsinku, “salvasqa” kaytataj suyakushanku (1 Tim. 2:4). Chayrayku pillapis Bibliamanta mana imatapis yachayta munasqanta niwajtinchej, yanapanallapuni. Publicacionesninchejmanta mayqenchus interesananpi tʼukurina. Tiempo pasasqanman jinataj, ichá ¿Imatapunitaq Biblia yachachin? librowan yachachiyta qallarisun.
[4 paginapi dibujo/foto]
Diospi mana creejtin
• Tapurisunman: “¿Jinatapunichu yuyaj kanki?”, nispa.
• Budista kajtin, Cómo hallar paz y felicidad duraderas folletoj 9-12 paginasninta rikuchina.
• Kausay jinallamanta rikhurisqanpi creejtin, kaykunawan yanapana:
¡Despertad! revistamanta “¿Casualidad o diseño?”, nisqawan.
Las maravillas de la creación revelan la gloria de Dios, videowan.
¿Sunqu juntʼasqa kawsayta tarisunmanchu? folletoj 4 rakʼiyninwan. Chantá ¿Es la vida obra de un Creador?, chayri El origen de la vida. Cinco cuestiones dignas de análisis folletowan.
• Ñakʼariykunarayku, sajra ruwaykunarayku ima niña Diospi creejtin, kaykunawan yanapasunman:
¿Existe un Creador que se interese por nosotros? libroj 10 yachaqananwan.
¿Runasta Dios munakunchu?, ¿Qué propósito tiene la vida? folletospa 6 rakʼiyninwan.
• Wasiyoj Dios kasqanpi creeyta qallarejtinpacha, Yachachin librota jaywasunman. Chantá 2 chayri waj yachaqananmanta yachachiyta qallarisunman.
[5 paginapi recuadro]
Bibliapi mana creejtin
• La vida... ¿cómo se presentó aquí? ¿Por evolución, o por creación? libroj 17, 18 yachaqanasninta rikuchina.
• Hinduista kajtin, ¿Por qué debemos adorar a Dios con amor y verdad? folletota rikuchina.
• Bibliaj yuyaychaykunasnin yanapawasqanchejta rikuchina. Chaypajtaj yanapachikuna:
¡Despertad! revistaj “Ayuda para las familias”, nisqa yachaqananwan.
La Biblia: el poder que ejerce en su vida, nisqa videowan.
¡Diosmanta jamoj sumaj willaykuna! folletoj 9, 11 yachaqanasninwan, ¿Sunqu juntʼasqa kawsayta tarisunmanchu? folletoj 2 rakʼiyninwan ima.
Budista kajtin, El camino de la paz y la felicidad folletoj 3-7 paginasninwan.
Musulmán kajtin, La fe verdadera, la puerta a una vida feliz folletoj 3 rakʼiyninwan.
Bibliata qhesachaj runas chaupipi tiyakojtin, ichapis ñaupaj kutispi waturishaspa mana willanachu kanman Bibliaj yuyaychaykunasninmanta parlashasqanchejta.
• Bibliaj profeciasnin imaynatachus juntʼakusqanta sutʼinchana. Chaypajtaj kaykunawan yanapachikuna:
La Biblia: historia exacta, profecía confiable, nisqa videowan.
• Bibliaj yachachisqanmanta yachayta munajtinpacha, Yachachin librota jaywana.
[6 paginapi recuadro]
“Mana Diospi creenichu” nejtin
• Nisunman: “Noqapis jinata yuyaj kani. ¿Yachayta munawajchu imaraykuchus Dios kasqanpi creesqayta?”. Razonamiento libroj 87-89 paginasta rikuchisunman. Chantá ima publicacionchus yanapawasqanchejta apananchejta nisunman.
• Chayrí nisunman: “Dios kanman chay, ¿imayna kanantataj munawaj?”. Ashkhas chay tapuyman kutichinku: “Tukuyta allinpaj qhawananta, mana ujkunallaman kutikunanta, kʼacha, khuyakuyniyoj kananta ima”, nispa. Kutichisqanta uyariytawan, Diosninchej ajinapuni kasqanta Bibliawan rikuchina. (Ichá Yachachin libroj 1 kaj yachaqananpi 6 parrafomantapacha ukhunchasunman.)
“Mana Bibliapi creenichu” nejtin
• Nisunman: “Ashkhas jinata ninku. Wakenqa Biblia cientificospa nisqankuwan churanakusqanta yuyanku. Wakintaj kay tiempopi manaña yanapawasqanchejta ninku. Chaywanpis, ¿Bibliata maykʼajllapis leerqankichu? [Kutichinanta suyariy. Chantá ¿Sunqu juntʼasqa kawsayta tarisunmanchu? folletoj 3 rakʼiyninmanta 1, 2 parrafosta paywan ukhunchay.] Qhepan kutipi, kay folletoj yanapayninwan ima sumaj yuyaychaykunachus Bibliapi kasqanta qhawarisunman”.
• Chayri nisunman: “Ashkhas chayta niwayku. Jinapis uj versiculota rikuchisuyta munayman, chayqa mayta tʼukuchiwarqa [Job 26:7 chayri Eclesiastés 1:7 leey. Chay textosqa, Biblia cienciawan mana churanakusqanta rikuchin]. Bibliaqa familiapi allinta kausakunapaj sumajta yuyaychallantaj. Chaymanta parlarinapaj qhepanta kutimuyman”.
• Nillasunmantaj: “Agradeceyki willariwasqaykimanta. Jinapis Dios uj librota saqewasunman karqa chay, ¿ima yuyaychaykunataj chaypi kanman?”. Kutichisqanman jina, Bibliaj mayqen yuyaychaynintapis rikuchiy.